Category: ZGJEDHJET

Në tubimin e parë zgjedhor në veri të Mitrovicës, Lista Serbe ka nisur fushatën jo me programe për mirëqenien e serbëve të Kosovës, por me thirrje për “çlirim të Kosovës” dhe glorifikim të terroristit Milan Radojçiq.
“Të gjithë për vëlla Milanin” ishte njëra nga parullat kryesore të mbrëmshme, ndërsa tubimi filloi me intonimin e himnit të Serbisë. Në vend të diskutimit për problemet sociale të komunitetit serb, folësit sulmuan qeverinë e Kosovës dhe kryeministrin në detyrë Albin Kurti.

Milan Radojçiq, emri i të cilit u brohorit në tubim, është i kërkuar për terrorizëm dhe krime lufte. Ai akuzohet si udhëheqës i grupit terrorist që kreu sulmin në Banjskë në vitin 2023, ku u vra rreshteri i Policisë së Kosovës Afrim Bunjaku. Gjithashtu, Gjykata e Prishtinës ka lëshuar urdhërarrest ndaj tij dhe 19 serbëve të tjerë, të dyshuar për krime lufte gjatë viteve ’90, përfshirë vrasjen e 106 civilëve shqiptarë në Gjakovë dhe keqtrajtimin e mbi 300 të tjerëve.

Njohës të politikës dhe sigurisë e cilësojnë këtë fushatë si të dirigjuar nga Beogradi, me retorikë të rrezikshme që synon destabilizimin e Kosovës:

“Ata po mundohen me çdo kusht t’i kthejnë strukturat paralele që i kanë humbur. Kandidatët e Listës Serbe duhet të verifikohen mirë dhe fushata e tyre të monitorohet strikt”, tha njohësi i politikës, Jeton Maliqi.

Ndërsa Arben Dashevci, njohës i sigurisë, tha se “Këto thirrje në aspektin e sigurisë janë shqetësuese. Lista Serbe po e vazhdon politikën dirigjuese nga Beogradi, për ta mbajtur veriun nën kontroll me shantazhe dhe dezinformata”.

Pavarësisht përpjekjeve, Komisioni Qendror i Zgjedhjeve nuk dha përgjigje për këtë situatë. Por ekspertët e sigurisë kërkojnë që organet e drejtësisë të nisin hetime për nxitje urrejtjeje dhe mbështetje të terrorizmit.

Ky tubim dëshmon se Lista Serbe mbetet instrument i Beogradit për të tensionuar veriun dhe për të minuar shtetin e Kosovës.

Sot, më 13 shtator ka nisur periudha e fushatës zgjedhore për subjektet politike dhe kandidatët për Zgjedhjet Lokale për kryetarë të komunave dhe për kuvende komunale, ndërsa përfundon më 12 tetor, në orën 06:59.

Lëvizja Vetëvendosje ka hapur fushatën zgjedhore të premten në ora 19:00 në sheshin “Skënderbeu”, ndërsa sot vazhdojnë partitë tjera, Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës, etj.
Komisioni Qendror i Zgjedhjeve i Kosovës më 6 shtator ka konfirmuar listën e votuesve për zgjedhjet lokale të 12 tetorit, sipas së cilës do të kenë të drejtë vote 2.069.098 persona.

“Sipas të dhënave nga lista e votuesve, numri i qytetarëve me të drejtë vote në vendvotime në Republikën e Kosovës është 2.025.105 votues, ndërsa numri i qytetarëve që janë regjistruar për të votuar me postë jashtë Kosovës është 43.993 votues”, është bërë e ditur në njoftim.

Procesi zgjedhor në Republikën e Kosovës, do të organizohet në 938 Qendra të Votimit me gjithsej 2,625 vendvotime, prej të cilave 910 Qendra të Votimit për votimin e rregullt me 2,571 vendvotime dhe 38 Qendra të Votimit për votimin me kusht me gjithsej 54 vendvotime.

Për këto zgjedhje janë certifikuar 93 subjekte – 32 parti politike, 32 iniciativa qytetare, dy koalicione dhe 27 kandidatë të pavarur.

KQZ po ashtu ka miratuar përmbajtjen dhe dizajnin e fletëvotimeve për Zgjedhjet Lokale që do të mbahen më 12 tetor 2025.
Do të jenë dy fletëvotime, njëra për zgjedhjen e kryetarit të Komunës dhe tjetra për zgjedhjen e anëtarëve të Kuvendeve Komunale.

Sipas vendimit të KQZ-së, për raundin e parë të zgjedhjeve për Kryetar të Komunave do të shtypen 1,800,410 fletëvotime dhe po aq, 1,800,410, edhe për zgjedhjet për Kuvende Komunale. Në këtë numër përfshihen fletëvotimet për vendvotimet e rregullta, votimin me kusht, Votimin e Personave e Nevoja të Veçanta, fletëvotimet rezervë dhe për votimin me postë.

Ndërkaq, për të gjithë ata që mund të kenë dilema për qendrën e votimit, mund ta verifikojnë atë.

KQZ fton të gjithë qytetarët me të drejtë vote që të kontrollojnë adresën e qendrës së tyre të votimit.

Për ta bërë këtë në mënyrë të shpejtë dhe të lehtë, KQZ ka vënë në dispozicion platformën elektronike: https://qv.kqz-ks.org

“Duke e vizituar këtë faqe, çdo qytetar mund të informohet saktësisht se në cilën qendër mund të votojë më 12 tetor 2025, duke shmangur paqartësitë apo vonesat në ditën e zgjedhjeve. Platforma elektronike e KQZ-së do të jetë e qasshme vazhdimisht, përfshirë edhe ditën e zgjedhjeve”, thuhet në njoftim.