Category: SHËNDETËSI

Shëndeti i syve mund të anashkalohet shpesh ose të merret për i mirëqenë. Ai rrezikohet nga ushqyerja e keqe, përdorimi i tepërt i aparateve teknologjike por edhe nga mosha.

Ushqyerja e keqe është një faktor i rëndësishëm sepse manifestohet me mungesë vitaminash në organizëm.

Këto të fundit përbëjnë mburojën më të madhe për sytë (dhe jo vetëm) nga dëmtimet oksiduese dhe inflamacioni.

Katër vitamina thelbësore për shëndetin e syve

Në rutinën tuaj të përkujdesjes për sytë duhet të jini të vëmendshëm ndaj vitaminave të mëposhtme:

Vitamina A
Kjo vitaminë është e një rëndësie parësore për sytë.

Prania e saj ndihmon që njeriu të shikojë qartë edhe në kushte të errësirës ose dritës së pakët.

Mungesa e vitaminës A e bën syrin ndjeshëm më të thatë dhe rrjedhimisht dëmton shikimin.

Vitamina E
Vitamina E është një antioksidant i fuqishëm që lufton radikalet e lira të cilat dëmtojnë shumë organe të trupit.

Në shumë raste, radikalet e lira dëmtojnë proteinat e syrit gjë që më pas shkakton mjegullim të shikimit.

Vitamina C
Vitamina C është gjithashtu një antioksidant i fuqishëm që mbron organizmin nga radikalet e lira.

Studimet të cilave u referohet AgroWeb.org thonë se prania e kësaj vitamine e ul me 33 për qind rrezikun e problemeve me shikimin.

Kompleksi i Vitaminave B
Studimet tregojnë se një kombinim i vitaminave B6, B9 dhe B12 ul ndjeshëm rrezikun e degjenerimit të shikimit, kryesisht tek vajzat dhe gratë.

Ekspertët këshillojnë që këto vitamina të mos mungojnë në rutinën e përkujdesjes për sytë.

Ushqyes të tjerë të rëndësishëm për shëndetin e syve.
Përveç vitaminave të lartpërmendura, ekspertët thonë se njerëzit duhet të kujdesen që të marrin dozat e nevojshme të zinkut.

Ky i fundit lehtëson rrugëtimin e vitaminës A nga mëlçia tek retina e syrit ku edhe prodhon melaninën.

Ky pigment është i domosdoshëm sepse mbron sytë nga rrezet ultra vjollcë.

Marrja e 40-80 mg zink në ditë bashkë me antioksidantët mund të ngadalësojë përkeqësimin e shikimit me 25 për qind, thonë ekspertët.

Një ushqyes tjetër i nevojshëm janë acidet yndyrore omega-3 të cilat shërbejnë si mburojë e retinës por edhe lehtësojnë qarkullimin e gjakut drejt syve./AgroWeb.org

Pirja e duhanit është një prej sjelljeve të fundit që po zhduket në Shtetet e Bashkuara të Amerikës.

Shkala e të rriturve në Amerikës që konsumojnë duhanin ka rënë nga 42 për qind sa ishte më 1965 në 15 për qind në vitin 2015.

Sidoqoftë, ka disa faktorë të tjerë që ju rrezikojnë në ditët e sotme, që rrjedhin nga preferencat në rritje për stilin e jetesës.

Duhanpirja po zvogëlohet në SHBA, por faktorët tjerë që sipas shkencës duhet mbajtur sytë në ta, janë:

1. Vetmia

2. Qëndrimi ulur

3. Pagjumësia

4. Solariumi

5. Dieta e varfër

Rastet e kollës së mirë janë rritur ndjeshëm në Mbretërinë e Bashkuar me mjekët që paralajmërojnë se infeksioni është “jashtëzakonisht serioz” për foshnjat e vogla. Kolla e mirë si duket ka pasur përhapje të madhe edhe në SHBA.

Autoritetet shëndetësore amerikane thonë se numri i rasteve është tre herë më i madh se e njëjta periudhë vitin e kaluar, shkruan USA Today.

Në SHBA janë raportuar 4,864 raste deri më tani, në vitin 2024, një rritje nga 1,746 të raportuara deri këtë periudhë të njëjtë në vitin 2023.

Kolla e mirë është një infeksion ciklik që normalisht arrin kulmin çdo tre deri në pesë vjet – kështu që rritja aktuale nuk është e papritur.

Por çfarë duhet të dini për simptomat, vaksinën dhe trajtimin e saj?

Çfarë është kolla e mirë?

Kolla e mirë nganjëherë quhet “kolla 100-ditore” për shkak të asaj se sa kohë mund të marrë për t’u rikuperuar.

Infeksioni bakterial, i njohur gjithashtu si pertusis, prek mushkëritë dhe tubat e frymëmarrjes dhe shkakton periudha të kollitjes.

Është shumë ngjitëse dhe përhapet nga pikat e kollitjes dhe teshtitjes.

Cilat janë simptomat e kollës së mirë?

Simptomat e para janë të ngjashme me ato të ftohjes dhe mund të përfshijnë:

Rrjedhje e hundës;

Sy të kuq dhe të përlotur;

Dhimbje të fytit;

Temperaturë pak e ngritur.

Periudhat e kollitjes intensive fillojnë rreth një javë më vonë, sipas Shërbimit britanik Shëndetësor Kombëtar (NHS), shkruan Sky News.

Periudhat e kollitjes kryesisht janë më të zakonshme gjatë natës dhe mund të zgjasin disa minuta.

Midis kollitjes, ju ose fëmija mund të hasni probleme në frymëmarrje. Megjithatë, jo të gjithë e kanë këtë.

Kollitja mund të shkaktojë vështirësi në frymëmarrje dhe në veçanti foshnjat e vogla mund të bëhen blu ose gri.

“Kjo shpesh duket më keq se sa është dhe frymëmarrja e tyre duhet të fillojë përsëri shpejt”, sipas NHS-s.

Kollitja mund të sjellë gjithashtu një mukozë të trashë, e cila mund t’ju bëjë të vjellni.

Periudhat gjithashtu mund të bëjnë që fytyra të skuqet shumë, veçanërisht te të rriturit.

Sa serioze është kolla e mirë?

“Kolla e mirë mund të prekë njerëzit e të gjitha moshave, por për foshnjat shumë të vogla mund të jetë jashtëzakonisht serioze”, sipas Dr Gayatri Amirthalingam, konsulent epidemiolog në Agjencinë e Sigurisë Shëndetësore në Mbretërinë e Bashkuar (UKHSA).

Foshnjat nën 6 muajsh me kollë të mirë kanë një rrezik më të lartë të problemeve duke përfshirë dehidratimin, vështirësitë në frymëmarrje, pneumoni dhe konvulsione, sipas NHS.

Si trajtohet kolla e mirë?

Nëse kolla e mirë diagnostikohet brenda tre javësh, do të jepen antibiotikë për të ndihmuar në ndalimin e përhapjes së saj te të tjerët.

Nëse keni pasur kollë të mirë për më shumë se kaq, nuk jeni më ngjitës dhe nuk keni nevojë për antibiotikë, sipas NHS.

Është e rëndësishme të qëndroni jashtë shkollës, punës ose çerdhes deri 48 orë pas fillimit të antibiotikëve ose tre javë pas fillimit të simptomave nëse nuk keni marrë antibiotikë.

NHS këshillon që të pushoni dhe të merrni shumë lëngje për të trajtuar simptomat e kollës së mirë.

Paracetamoli dhe ibuprofeni mund të ndihmojnë – edhe pse nuk duhet t’u jepen në të njëjtën kohë moshave nën 16 vjeç – por ilaçet e kollës nuk ndihmojnë me këtë lloj kolle. /Telegrafi/

Shumë prej nesh përdorin maska, vajra dhe serume për të ushqyer flokët dhe për t’i pasur sa më të shëndetshëm dhe me sa më shumë shkëlqim. Por a e dini se ajo që ju hani luan një rol të rëndësishëm?

Naturopatja Yohan Mannone thotë se: “Flokët pasqyrojnë gjendjen e trupit tonë.” Po, nuk ka të bëjë vetëm me atë që është e dukshme jashtë, por edhe gjendja jonë e brendshme ka po kaq rëndësi.

Ja pesë lëndë ushqyese që ju nevojiten për flokë më të bukur dhe më të shëndetshëm:

1. Zinku

Ky mineral është thelbësor për sintetizimin e keratinës dhe kolagjenit. Ai nxit rritjen e flokëve dhe forcon fibrat e tyre. Për një rritje të sasisë së zinkut, shtoni në menu midhjet, të verdhat e vezëve, mëlçinë e viçit, tërshërë, farat e kungullit, farat e susamit, majanë e birrës dhe arrat.

2. Hekuri

“Një element thelbësor i hemoglobinës është hekuri dhe ky përbërës është jetik për t’u dhënë flokëve oksigjenin që u nevojitet për t’u rritur,” thotë Mannone. Mëlçia e viçit, thjerrëzat, qiqrat, fasulet e zeza, spinaqi, arrat dhe majdanozi janë të pasura me hekur.

3. Omega-3

Omega-3 ushqejnë folikulat e flokëve dhe kanë një veprim anti-inflamator në lëkurën e kokës. Ato forcojnë flokët, i ushqejnë, parandalojnë rënien e tyre dhe përmirësojnë shkëlqimin dhe strukturën. Ju mund të gjeni omega-3 te sardelet, salmon, vezë, vajra bimore, fara liri, fara chia, arra dhe soje.

4. Vitamina B

“Vitamina B nxit prodhimin e keratinës dhe redukton brishtësinë e flokëve,” sipas Mannones. Ushqimet e mbushura me vitaminë B janë spinaqi, lakër jeshile, brokoli, mishi i viçit, pula, salmoni, toni, trofta, veza, qumështi, qiqrat dhe thjerrëzat, citon Anabel.

5. Proteinat

Flokët përbëhen nga mbi 90% proteina. Pra, është e rëndësishme të plotësoni nevojat tuaja për proteina çdo ditë. Për të rritur marrjen e proteinave, zgjidhni mishin e pulës, gjelit të detit, vezët, salmonin, farat e lulediellit, orizin integral, fasulet etj. /Telegrafi/

Freskuesja është një pajisje shpëtimtare për ata që nuk kanë mundësi të përballojnë një kondicioner.

Kjo pajisje supozohet të na sjellë freskinë e nevojshme për të duruar vapën përvëluese të këtyre ditëve.

Megjithatë, ekspertët thonë se freskueset mund të rrisin rrezikun e drobitjes nga vapa.

Nëse temperatura e jashtme rritet mbi 35 gradë, freskuesja nxit rritjen e temperaturës së trupit, thonë studiuesit.

Sipas tyre, freskuesja në të vërtetë fryn ajrin që është më i ngrohtë se trupi.

Ata e krahasojnë freskuesen me ventilatorin e sobës që përshpejton pjekjen e një ushqimi të caktuar.

Freskuesja Elektrike Më e Rrezikshme Në Mot Të Nxehtë e Të Thatë
Një studim tjetër të cilit i referohet AgroWeb.org thotë se freskuesja është veçanërisht e rrezikshme për shëndetin në klimë të nxehtë dhe të thatë.

Megjithatë, përdorimi i saj ndihmon në uljen e temperaturës bazë të trupit dhe mbron zemrën kur klima është e nxehtë por e lagësht.

Njerëzimi Do Të Preket Nga Goditje Të Nxehta Të Klimës
Valët e nxehtësisë, thonë ekspertët, do të jenë më të shpeshta dhe më të ashpra si pasojë e ngrohjes globale.

Vetëm në vitin 2003, u regjistruan mbi 30,000 viktima si pasojë e të nxehtit, ndërsa në vitin 2010, vetëm në Moskë u regjistruan mbi 11,000 viktima.

Shumë studime mbi përdorimin e freskueses dhe ndikimit të saj në shëndet sugjerojnë se kjo pajisje rrit rrezikun e vdekjes gjatë motit përvëlues.

Kjo për vetë faktin se freskuesja nuk të freskon.

Ajo thjesht qarkullon ajrin i cili është i të njëjtës temperaturë si ajo e ambientit.

Freskuesja përshpejton avullimin e djersës që do të thotë se shkakton humbjen e madhe të lëngjeve nga trupi.

Nëse njeriu djersin shumë dhe nuk zëvendëson lëngjet e humbura, do të dehidratohet më shpejt.

Kësisoj ai do të jetë më i drobitur nga vapa dhe problemet që shkakton ajo tek organet./AgroWeb.org

Është e rëndësishme të qëndroni të hidratuar mirë, veçanërisht në muajt e verës. Mos pirja e mjaftueshme e ujit mund të shkaktojë dhimbje koke, marramendje dhe konfuzion midis efekteve të tjera anësore të padëshiruara.

Prandaj, është thelbësore që të pini rregullisht ujë gjatë gjithë ditës, shkruan Express.co.uk.

Kur jeni të etur dhe me nxitim, mund të jetë tunduese të kapni shishen e parë të ujit që gjeni.

Por, një eksperte ka paralajmëruar për rreziqet shëndetësore të pirjes së ujit të ngrohtë në shishe, veçanërisht nëse ka qëndruar në një vend shumë të nxehtë sikurse brenda një makine.

Kjo për shkak se kimikatet nga plastika mund të depërtojnë në ujë.

“Mos pini ujë në shishe që ka qëndruar në diell ose në një mjedis të nxehtë, si një makinë”, tha Sarah Lawdon, një eksperte e sigurisë ushqimore nga Storage Box Shop.

“Nxehtësia mund të shkaktojë që kimikatet e dëmshme të rrjedhin nga plastika në ujë”.

Sipas Lawdon, kur uji në shishe nxehet, kimikatet nga plastika mund të futen në ujë.

Këto kimikate, si BPA-ja dhe ftalatet, mund të jenë të dëmshme nëse i pini.

Pirja e ujit me këto kimikate mund t’ju bëjë të ndiheni keq dhe të keni probleme shëndetësore.

Ajo paralajmëroi për efektet anësore nga pirja e këtij uji, të cilat janë:

Probleme me stomakun: Mund të përjetoni të përziera ose të keni dhimbje barku

Dhimbje koke: Këto kimikate mund t’ju shkaktojnë dhimbje koke

Marramendje: Kjo është një tjetër simptomë që mund t’ju shfaqet

Problemet me hormonet: Disa kimikate mund të prishin hormonet tuaja, duke shkaktuar probleme më serioze shëndetësore me kalimin e kohës.Për të shmangur këtë, ajo rekomandoi që gjithmonë të ruani shishen me ujë në një vend të freskët dhe të mos e lini atë në rrezet e diellit direkte. /Telegrafi/

Shtimi në peshë është një nga simptomat kryesore të luhatjeve hormonale të tiroides.

Kjo gjendër konsiderohet e shenjtë në organizëm dhe çdo shqetësim i vogël nxit simptoma që shpesh bëhen ekstreme.

Prodhimi i tepërt i hormoneve nga ana e tiroides (hipertiroidizëm) mund të nxisë rënie të shpejtë nga pesha.

Mungesa e hormoneve (hipotiroidizmi) nga ana tjetër mund të nxisë shtimin në peshë.

Hipotiroidizmi ngadalëson metabolizmin, thonë ekspertët.

Sipas tyre, një person që vuan nga hipotiroidizmi ka nevojë të kryejë përpjekje të shtuara jo vetëm sa i përket akvititetit fizik por edhe ushqyerjes apo mbajtjes nën kontroll të stresit.

Ekspertët thonë se dy faktorët më të rëndësishëm që duhen marrë përsipër në përpjekjet për të humbur kilogramët e tepërt është angazhimi dhe qëndrueshmëria.

Në këtë artikull të AgroWeb.org do të mësoni këshillat e ekspertëve për pacientët që vuajnë nga hipotiroidizmi dhe duan të heqin peshën e tepërt që shkakton ky problem.

Zgjidhni Llojin dhe Sasinë e Duhur të Karbohidrateve
Duke mbajtur në konsideratë faktin që tiroidja ruan ekuilibrat në organizëm, është e rëndësishme që të mos e teproni me karbohidratet.

Ju duhet të zgjidhni karbohidrate që vijnë nga ushqime natyrale siç janë drithërat e plota, frutat dhe perimet dhe të qëndroni larg ushqimeve të përpunuara.

Më Shumë Minerale
Tiroidja ka nevojë për jod dhe selenium që të funksionojë siç duhet. Mungesa e këtyre mineraleve mund të shkaktojë probleme me tiroiden.

Jodi gjendet në shumë produkte deti ndërsa seleniumi gjendet tek kërpudhat dhe farat chia.

Një mineral tjetër i rëndësishëm për tiroiden është zinku. Atë mund ta gjeni tek mishi i viçit, karkalecat e detit, fasulet, spinaqi dhe farat chia.

Më Shumë Kefir
Kefiri dhe lakra turshi e bërë vetë në shtëpi, janë dy produkte të fermentuara shumë të nevojshme jo vetëm për shëndetin e stomakut por edhe për tiroiden.

Ato kanë baktere të shëndetshme të cilat fuqizojnë florën bakteriale të organizmit.

Më Shumë Brokoli Dhe Lulelakër
Perimet si brokoli, lulelakra, lakra, barishtet dhe kale janë shumë të mira për shëndetin e tiroides, por ato duhen konsumuar të gatuara sa më pak.

Sa më pak që të gatuhen këto perime, aq më të paprekura do të jenë depozitat e vitaminave dhe mineraleve që ofrojnë.

Yndyrnat
Ekspertët këshillojnë konsumin e yndyrnave të shëndetshme siç është omega-3, që vijnë në ndihmë kundër çrregullimeve të tiroides.

Më të mirat janë arrat, farat chia, farat e linit, salmoni, sardeli dhe skumbria.

Më Shumë Proteinë
Vezët, mishi i pulës, peshku, legumet, arrorët dhe farat janë ndër burimet më të pasura të proteinës e cila mbështet shëndetin e tiroides.

Produktet e bulmetit kanë proteinë por struktura e saj molekulare nuk e bën të përshtatshme për tiroiden./AgroWeb.org

Siguria e ushqimit dhe të ushqyerit e drejtë janë parakushte themelore për shëndet dhe mirëqeni të popullatës së një vendi dhe duhet të integrohen në të gjitha politikat, jo vetëm në ato shëndetësore, por edhe në ekonominë, bujqësinë, turizmin dhe tregtinë e një vendi.

Në 20 dhjetor 2018 sekretari i përgjithshëm i Kombeve të bashkuara miratoi Rezolutën 73/250 për caktimin e Ditës Botërore të sigurisë së ushqimit.

Duke filluar nga 2019, kjo ditë shënohet me aktivitete të cilat theksojnë përfitimet nga ushqimi i sigurt, por edhe lëshimet dhe mangësitë eventuale në zinxhirin e ushqimit të sigurt.

Çdo vit, Dita Botërore e Sigurisë Ushqimore festohet me një temë specifike që udhëzon aktivitetet dhe fushatat globale. Tema të tilla si “Siguria e ushqimit, biznesi i të gjithëve” theksojnë përgjegjësinë e përbashkët midis qeverive, prodhuesve dhe konsumatorëve për të garantuar sigurinë ushqimore.

Tema e këtij viti është “Siguria e Ushqimit: Përgatituni për të Papriturat”, e cila nënvizon rëndësinë e përgatitjes për incidentet e sigurisë ushqimore, pavarësisht sa të lehta apo të rënda mund të jenë ato, sipas OBSH-së.

Aktivitete të ndryshme zhvillohen në nivel global, duke përfshirë fushata edukative, seminare dhe seminare, që synojnë promovimin e praktikave të sigurisë ushqimore në të gjitha nivelet e zinxhirit të furnizimit ushqimor.

Qeveritë, organizatat ndërkombëtare dhe grupet e shoqërisë civile punojnë së bashku për të përforcuar mesazhin e sigurisë ushqimore dhe për të zbatuar masa për të reduktuar rreziqet që vijnë nga ushqimi.

Ushqimi i sigurt ka një rëndësi qenësore për promovimin e shëndetit dhe eliminimin e urisë – dy qëllimet kryesore të Agjendës për vitin 2030.

Sëmundjet lidhur me ushqimin jo të sigurt zakonisht shkaktohen nga baktere, viruse, parazitë ose substanca kimike të cilat i fusim në organizëm përmes ushqimit ose ujit të kontaminuar.

600 milionë njerëz ose 1 në 10 njerëz në botë sëmuren si pasojë e konsumimit të ushqimit të kontaminuar dhe në vit vdesin rreth 420.000. Në këtë grup, fëmijët deri në moshën 5-vjeçare marrin pjesë me 40% në ngarkesën me sëmundjet që burojnë nga ushqimi jo i sigurt ose 125.000 raste të vdekjes në vit.

Zgjedhja për të pasur ose jo fëmijë është krejtësisht personale. Sipas “Psychology Today” një zgjedhje e tillë nuk duhet marrë kurrë me lehtësi, sidomos kur çiftet nuk ndihen të gatshëm për t’u bërë prindër.

Në “Libero” u diskutua pikërisht për këtë temë, duke u bërë ndërlidhja edhe me krijimin e familjes sipas aspektit tradicional martesës  – ku çiftet në të kaluarën janë  “detyruar” që të bëhen me fëmijë, porsa janë martuar!

Këtë dukuri, sociologu Blerim Shabani nuk e trajtoi si problematikë derisa theksoi se ka teoricienë të caktuar që e përkrahin idenë e të bërit prindër sa më herët!

“…Ka teoricienë që e përkrahin idenë e të bërit prind sa më herët sepse mund të ketë një fokus, mund të ketë kujdes më të shtuar, vëmendje më të shtuar ndaj rritjes së fëmijëve dhe kjo mund të kaloj shumë më lehtë fazën e rritjes së fëmijëve…”, tha ai.

Ndërkohë, në aspektin gjinekologjik, ekziston një “kohë e duhur” për t’u bërë prindër, dhe kjo përcaktohet me shtatzëninë e gruas. Në lidhje me këtë, gjinekologia Jasmina Tolaj, tha se sa më vonë që gratë mbesin shtatzënë, aq më shumë komplikime do të ketë.

“…Mosha më e mirë për lindje te gratë është prej viteve 20-të deri 30-35 vjeç, kjo është periudha më e mirë për me lindë fëmijë sepse organikisht je e shëndoshë, vezët e femrës janë të shëndosha dhe sëmundje përcjellëse nuk ka…”, deklaroi Tolaj.

Mirëpo, në aspektin psikologjik, disa nga arsyet pse njerëzit nuk ndihen të gatshëm për t’u bërë prindër janë: Karriera, mjedisi jo i sigurt, gjendja financiare, dëshira për të udhëtuar etj. Në artikullin e “Healthline” thuhet se gatishmëria emocionale dhe financiare për të krijuar një familje, janë faktorë shumë të rëndësishëm që duhet marrë parasysh domosdoshmërisht!

Në lidhje me këtë temë, vlen të ceket edhe videoja virale që  krijoi stuhi debatesh në mbarë  botën nga producentja e “The Daily Show”, Chelsea Handler e cila theksoi rëndësinë e ndjesisë për t’u bërë prindër. Sipas saj: “Nëse njerëzit ndihen të lirë të bëjnë zgjedhjen për të pasur ose jo fëmijë, do të kemi më pak njerëz që do të rriten nga prindër që nuk i duan ose janë inatosur me praninë e tyre…”, thotë Handler.

Për të marrë më shumë informacione rreth kësaj teme, klikoni në linkun e mëposhtëm:

Sytë janë të brishtë e të rrezikuar nga një sërë problemesh shëndetësore që shkaktojnë dhimbje e probleme me shikimin.

Një prej problemeve në fjalë ka të bëjë me ndjesinë e presionit të fortë në sy që shoqërohet me dhimbje të mprehta e të forta.

Presioni në sy ka të bëjë me ndjesinë e tendosjes së fortë brenda syve.

Në këtë artikull të AgroWeb.org do të mësoni më shumë për këtë problem, shkaqet dhe trajtimet e mundshme.

Shkaqet e presionit në sy
Ekspertët thonë se një gjë e tillë mund të shkaktohet nga dhimbjet e kokës, problemet me sinozitin, dhimbjet e dhëmbit apo dëmtimi i nervit optik.

Infeksionet e sinuseve
Një nga shkaqet më të zakonshme janë infeksionet e sinuseve që shkaktohen nga baktere të ndryshme që zaptojnë zonën pas hundës, syve dhe mollëzave.

Infeksione të tilla shoqërohen me dhimbje në këto zona, bllokim të hundëve, sekrecione, kollë, dhimbje të kokës dhe veshit por edhe plogështi e temperaturë.

Dhimbjet e kokës
Dhimbjet e kokës mund të nxisin ndjesinë e presionit në sy por jo vetëm kaq.

Dhimbjet e kokës shoqërohen me pezmatim të muskujve të qafës e shpatullës, skuqje të syve, ënjtje të fytyrës, rënie të qepallave etj.

Sëmundjet autoimunitare
Sipas të dhënave të AgroWeb.org, sëmundjet autoimunitare mund të shkaktojnë ënjtje apo inflamacion në zonën pas syrit.

Kësisoj ato dëmtojnë nervin optik që transmeton informacionet vizive nga sytë tek truri.

Në raste të tilla, njeriu mund të përjetojë humbje të shikimit, probleme me dallimin e ngjyrave, dhimbje të syve dhe dhëmbëve.

Dhimbjet e dhëmbit
Një problem me dhëmbët ose nofullën mund të tensionojë muskujt e fytyrës.

Një gjë e tillë nxit dhimbjet e kokës, falë të cilave presioni tek syri bëhet më i ashpër.

Kur duhet të konsultoheni me mjekun
Një konsultë me mjekun është e nevojshme kur ju keni temperaturë të lartë, turbullim apo rënie të shikimit, dhimbje të forta të kokës apo humbje të ndjeshmërisë në trup.

Trajtimet në kushtet e shtëpisë
Ekspertët rekomandojnë zbatimin e një regjimi të shëndetshëm ushqimor.

Ata këshillojnë konsumin e ushqimeve të pasura me vitaminat C, E, A por edhe me bakër, selenium dhe zink

Sipas tyre, njeriu duhet të tregojë kujdes me pirjen e sasive të mëdha të kafeinës e cila shton presionin në sy.

Konsumi i bollshëm i lëngjeve është i domosdoshëm thonë ekspertët.

Sa i përket gjumit, ju duhet të flini me kokën lehtas të ngritur që të zbusë presionin ndërsa ju flini.

Nëse përdorni medikamente ose solucione për sytë, qëndroni striktë ndaj dozave të rekomanduara.

Në të kundërt mund të dëmtoni nervin optik./AgroWeb.org