Ambasadori i Kosovës në Gjermani, Faruk Ajeti ka treguar se deputeti gjerman, Knut Abraham nga radhët e CDU-së, ka shprehur mbështetjen e tij për sundimin e ligjit që Qeveria e Republikës së Kosovës që synon të zbatojë.
“… duke rikujtuar se „nuk duhet harruar se një shtet po përpiqet të zbatojë të drejtat e tij në territorin e tij për’, ka shkruar ai.
Kryetari i Listës Serbe, Goran Rakiq ka folur sot pas ngjarjeve të fundit në veri të Kosovës, ku kryetarët e rinj e komunave kanë kryer detyrat sipas ligjeve të vendit.
Kryetari i Listës Serbe, Goran Rakiq, në një konferencë për media në Mitrovicën e Veriut ka thënë se pas situatës në veri ka kërkuar prej presidentit serb, Aleksandar Vuçiq ndërprerjen e dialogut deri siç tha në tërheqjen e “kryetarëve fiktivë të Kurtit” nga veriu i Kosovës dhe tërheqjen e forcave speciale.
“Duke pasur parasysh të gjitha, ne përfaqësuesit politikë të popullit serb nga Kosova, si dhe i gjithë populli serb, kërkojmë nga presidenti ynë, Vuçiq dhe nga e gjithë lidershipi shtetëror që të pezullojnë menjëherë çdo pjesëmarrje të mëtejshme të Beogradit në dialog me Prishtinën. Ne besojmë se çdo bisedë e mëtutjeshme me Prishtinën në rrethanat aktuale është jo vetëm e palogjikshme, por edhe kundërproduktive. Me fjalë të tjera, vazhdimi i bisedimeve me regjimin e Kurtit pas terrorit të djeshëm do t’i dërgonte atij një mesazh se një veprim i tillë është mjaft fitimprurës”, pohoi fillimisht ai, raporton b92.
“Nga kjo perspektivë, në veçanti kërkojmë nga lidershipi shtetëror që vendimi për ndalimin e përkohshëm të pjesëmarrjes së zyrtarëve shtetërorë në dialog të hiqet vetëm pas Prishtina të tërheq të gjitha forcat speciale të policisë ROSU nga veriu i Kosovës dhe të tërheq të gjitha organet dhe forcat e saja si dhe të largohen nga ndërtesat e administratave komunale në veri të Kosovës”, tha ai.
Kryeministri i vendit, Albin Kurti sot në orët e mëngjesit iu drejtua qytetarëve, një ditë pas situatës së tensionuar në veri të vendit.
Kurti në një postim në Facebook bën të ditur se të gjitha rrugët që dërgojnë në veri të vendit janë të lira, ndërsa thekson se shkuarja e kryetarit të komunës në vendin e tij të punës do duhej të ishte gjëja më normale e mundshme dhe se objekti i ndërtesës së komunës është vendi ku u shërbehet qytetarëve mbi bazën e ligjit e kushtetutës.
Ministri i Punëve të Brendshme, Xhelal Sveçla është deklaruar për media pas takimit që ka pasur me kryetarin e komunës së Leposaviqit, Lulzim Hetemi.
Sveçla ka pohuar se me kryetarin Hetemi janë pajtuar që të punojnë për të mirën e qytetarëve.
“I dëshirova punë të mbarë, shpreha mbështetjen tonë dhe u pajtuam që të gjitha institucionet të punojnë për të mirën e qytetarëve. Përkundër vështirësive ne jemi të bindur që të gjitha vështirësitë do t’i tejkalojmë”, tha Sveçla.
Ministri Sveçla edhe ditën e premte ka deklaruar se kryetarët e katër komunave veriore do të vazhdojnë mandatin e tyre dhe do të jenë në shërbim të të gjithë qytetarëve pa dallim.
Gjithashtu, ai ka përgëzuar Policinë e Kosovës për profesionalizimin e treguar.
“Pas ceremonive të djeshme të betimit të Kryetarëve të komunave veriore, kryetarët e komunave Zveçan, Zubin Potok dhe Leposaviq sot janë vendosur në zyret e tyre në objektet komunale. Ata do të vazhdojnë mandatin e tyre duke qenë në shërbim të të gjithë qytetarëve pa dallim. Përgëzoj Policinë e Kosovës për profesionalizmin e treguar në ballafaqimin me grupe të organizuara kriminale, që kishin për qëllim pengimin e këtij procesi. 5 pjesëtarë të policisë janë lënduar nga sulmet e këtyre grupeve por që fatmirësisht lëndimet janë të lehta, ata ndihe
Ndryshe, kryetari i Komunës së Leposaviqit, Lulzim Hetemi, ka hyrë sot në objektin e komunës pa ndonjë problem, gjersa situata u tha se është e qetë.
Hetemi ka hyrë në komunë rreth orës 10:00, ndërkaq i shoqëruar ishte nga Policia e Kosovës.
Ndryshe, të premten u tensionua situata në veri të vendit pasi kryetarët e rinj tentuan të hyjnë në zyrat e tyre të punës.
Pas tensionimit të situatës në veri pati edhe reagime të ndërkombëtarëve.
Aleanca Veri-Atlantike ka bërë sot thirrje institucioneve të Kosovës që të shtensionojnë situatën në veri.
Zëdhënësja e NATO-s, Oana Lungescu u ka bërë thirrje po ashtu palëve që çështja të zgjidhet përmes dialogut.
“I nxisim institucionet në Kosovë që të shtensionojnë situatën menjëherë dhe u bëjmë thirrje të gjitha palëve që çështjen ta zgjidhin përmes dialogut. NATO, KFOR mbetet vigjilent dhe do të sigurojë një mjedis të sigurt dhe të sigurt”, shkruan Lungescu në Twitter.
Të premten në veri të vendit u tensionua situata pasi kryetarët e sapo zgjedhur të Zveçanit, Zubin Potokut e Leposaviqit tentuan të hyjnë në zyrat e tyre të punës.
Situata u tensionua pasi grupe të qytetarëve serbë u tubuan për të ndaluar hyrjen e zyrtarëve në vendet e tyre të punës.
Megjithatë, kryetari i Zubin Potokut dhe ai i Zveçanit arritën të hyjnë në objektet e komunës nën përcjelljen e Policisë së Kosovë.
Nga situata e krijuar të premten në veri u lënduan pesë policë, u dogj një veturë e Policisë dhe u dëmtuan disa të tjera.
Policia e Kosovës ditën e premte ka pranuar një telefonatë kinse në Stacionin e Autobusëve në Prishtinë ishte e vendosur një mjet shpërthyes, lajmërim i rrejshëm ky nga një qytetar.
Policia kishte evakuar qytetarët edhe personelin e cili ishte në objektin e stacionit, dhe se nuk kishte gjetur asgjë e dyshuar.
“Njësitë policore kanë pranuar një telefonat nga një i dyshuar i pa njohur se në objektin e stacionit të autobusëve është i vendosur një mjet shpërthyes. Njësitë policore kanë evakuar qytetarët si dhe personelin i cili ishte në objektin e stacionit. Pas kontrollit të kryer nga njësitë relevante policore nuk është gjetur asgjë e dyshuar”, thuhet në njoftim.
Rasti është duke u hetuar nga njësitet relevante.
Në gjykimin e të akuzuarve në rastin e vrasjes së politikanit serb të Kosovës, Oliver Ivanoviq, në Gjykatën e Prishtinës sot ka dëshmuar bashkëshortja e ve e të ndjerit, Milena Popoviq.
Dëshminë ajo e ka dhënë përmes video-linkut. Në dëshminë e saj, Popoviq rrëfeu se si kishte rrjedhur ngjarja sipas perspektivës së saj në ditën kritike të 16 janarit 2018, kur bashkëshorti i saj u vra përpara selisë së partisë së tij në Mitrovicë.
”E kam telefonuar por nuk është lajmëruar, në një moment është hapur lidhja telefonike dhe e kam dëgjuar një zhurmë që kam menduar se është ndonjë tubim me njerëz, pas një kohe më ka thirrur dikush nga zyra dhe më kanë thënë se Oliveri është rrëzuar dhe është dërguar në spital” – ka deklaruar ajo e përlotur.
Tutje, ajo shpjegoi se si kishte shkuar menjëherë në spital, ku kishte qëndruar deri sa e kishin njoftuar se bashkëshorti i saj ka ndërruar jetë.
“Aty i kam takuar disa miq, i kam pyetur se çfarë ka ndodhur dhe më kanë treguar se kanë gjuajtur me armë në drejtim të Oliverit” – tha tutje ajo.
Dëshmitarja deklaroi në pyetjen e prokurorit se nuk kishte njohuri se kush e ka vrarë bashkëshortin e saj.
“Po ta kisha ditur unë, do ta kishit ditur edhe ju, edhe e gjithë bota. Qëndroj pas asaj që do të paguajnë të gjithë ata që qëndrojnë pas kësaj” – shtoi Milena Popoviq.
“Dikush këto fjalë do t’i dëgjojë, dhe unë atë ditë që ta kuptoj këtë, unë do ta tregoj dhe do ta drejtoj gishtin nga ai edhe nëse është vëllai im” – ishin fjalët e saj.
Popoviq u përgjigj edhe në lidhje me sulmin fizik që ajo kishte përjetuar gjatë thyerjes së banesës së saj kohë më parë, ngjarje e cila nuk është zbardhur akoma nga drejtësia.“Mua më ka sulmuar fizikisht një person me shuplakë, dhe më ka thënë se kjo është për burrin tënd” – rrëfeu ajo.
Lidhur me këtë, në pyetjen e kryetarit të trupit gjykues, Valon Kurtaj, se a e kishte parë dëshmitarja personin që e kishte sulmuar ndonjëherë jashtë kësaj ngjarjeje, ajo u përgjigj se jo, nuk e ka parë dhe nuk e njeh por se e kujton se ka pasur një theks të serbishtes së Malit të Zi.
Gjatë seancës së sotme u diskutua rreth kamerave të sigurisë që ndodheshin në vendin e ngjarjes – përballë zyrës së të ndjerit, e të cilat në ditën kritike nuk kishin qenë të aktivizuara.
Lidhur me këtë avokati Mahmut Halimi, mbrojtësi i të akuzuarit Marko Roshiq, e pyeti dëshmitaren se sipas njohurive të saj, a kishte lejuar Ivanoviqi që kamerat të mos punojnë në ditët që i paraprinë vrasjes.
Popoviq ishte përgjigjur se “ai nuk kishte lejuar, dhe për këtë arsye janë vendosur këto kamera – që të incizojnë non-stop.”
Sipas aktakuzës së Prokurorisë Speciale, e dyshuar për fikjen e kamerave në ditën kritike është e akuzuara Silvana Arsoviq, sekretarja e Oliver Ivanoviqit.Në pyetjen e trupit gjykues për raportet mes Ivanoviqit dhe Arsoviqit, dëshmitarja deklaroi se kanë pasur raporte shumë të ngushta.
“Kanë pasur raporte vëllazërore, si vëllai me motër… Ajo ka qenë dora e tij e djathtë” – tha Popoviq.Ndër të tjera, dëshmitarja deklaroi se të akuzuarit në këtë procedurë nuk i njeh, përveç Arsoviqit, për të cilën u shpreh se është padrejtësi e madhe se po akuzohet me një akuzë të tillë.
Kurse rreth Milan Radojiçiqit, i cili është i përfshirë në akuza por që gjendet në arrati, dëshmitarja tha se ky i fundit me Ivanoviqin kanë qenë kundërshtarë politikë.
Trupi gjykues i parashtroi pyetje edhe rreth makinës, targat e së cilës pas vrasjes së Ivanoviqit janë gjetur të shkruara në një letër në kuletën e tij.
Pas hetimeve është konstatuar se kjo makinë i përkiste të akuzuarit Marko Rashiq.“Në kuletën e tij e kam gjetur një letër që ai e ka shënuar gjatë një ngjarje që ka ndodhur në zyrën e tij kur ka vizituar A.S, unë kam vërejtur një veturë që shpesh kalonte aty pranë dhe shpesh ishte e parkuar aty, ai besoj që e ka shënuar regjistrimin e asaj veture” – ishte shprehur ajo rreth kësaj çështjeje.
Lidhur me këtë, avokati mbrojtës i Marko Roshiqit, Muhamet Halimi, ka thënë se nuk e kontestojnë që makina në fjalë ishte pronë e familjes Roshiq.
Halimi iu drejtua dëshmitares me pyetjen se a ka qenë ajo në dijeni se banesa e të mbrojturit të tij është rreth 100 metra nga selia e partisë dhe se rruga ku është parë makina, është rrugë e përditshme e qarkullimit për të akuzuarin. Popoviq u përgjigj se nuk e njeh personalisht të akuzuarin dhe se nuk ka njohuri se ku i njëjti jeton.
Edhe pse gjykimi ishte i hapur për publikun, trupi gjykues kërkoi që mediat të fikin kamerat, të ndalojnë incizimin dhe fotografimin e dëshmisë për shkak të ndjeshmërisë së rastit.
Seancat e radhës janë caktuar të mbahen më 31 korrik, dhe 1 dhe 2 gusht.Sipas aktakuzës, Marko Roshiq, Silvana Arsoviq, Nedelko Spasojeviq, Rade Basara, po akuzohen se si grup kriminal të udhëhequr nga Millan Radojiçiq dhe Zvonko Veselinoviq, kishin kontribuar në forma të ndryshme në vrasjen e Oliver Ivanoviqit.
Së fundmi për këtë rast është arrestuar Milan Mihajloviq i cili është i njohur me emrin “Popi”. Në këtë rast akuzohen edhe dy zyrtarë policorë, Dragisha Markoviq dhe Zharko Jovanoviq, të cilët sipas Prokurorisë kishin manipuluar me prova të rastit.
Sipas aktakuzës, secili nga të lartcekurit në ditën kritike kanë kryer veprime konkrete, të cilat kanë dërguar deri te vrasja e Oliver Ivanoviqit.Politikani serb i Kosovës, Oliver Ivanoviq, u vra më 16 janar të vitit 2018 para hyrjes së objektit të partisë së tij.
Dënojmë fuqishëm veprimet e Qeverisë së Kosovës që po përshkallëzojnë tensionet në veri dhe po shtojnë jostabilitetin. I bëjmë thirrje kryeministrit të Kosovës, Albin Kurti që të ndalojë menjëherë këto masa të dhunshme dhe të rifokusohet në dialogun e lehtësuar nga Bashkimin Evropian.
Kështu e ka nisur analizën e tij, profesori amerikan, Daniel Serwer, i cili i është referuar reagimit të shefit të diplomacisë amerikane, Anthony Blinken pas zhvillimeve në veri të Kosovës.
“Ky dënim ishte një kundërpërgjigje ndaj Qeverisë së Kosovës që vendosi kryetarë të zgjedhur të komunave në katër komuna me shumicë serbe në veri të Kosovës. Popullsia serbe pothuajse tërësisht i bojkotoi zgjedhjet, nën presionin e Beogradit. Amerikanët i kishin mbështetur zgjedhjet pa kritikuar Beogradin, por më pas kundërshtuan marrjen e detyrës nga kryetarët (shqiptarë). Ndërsa senatori Murphy ka pohuar se lëvizja e Kurtit ishte e papritur, kryeministri e bëri të ditur këtë dy ditë më parë”, pohoi profesori i Universitetit Johns Hopkins School.
Asnjë dënim nga SHBA për lëvizjet e Serbisë
Ai më tutje ka folur rreth lëvizjeve të presidentit serb, Aleksandar Vuçiq, i cili ka mbajtur një tubim në Beograd dhe ka bartur me autobusë qytetarët serbë të Kosovës dhe kjo nuk u dënua prej amerikanëve.
“Autobusët po transportonin serbët nga Kosova për në Beograd, pa pengesa, për tubimin e presidentit Vuçiq. Në të njëjtën kohë, Beogradi i ka vënë forcat e saja të armatosura në gatishmëri, në kundërshtim të qartë me marrëveshjen e normalizimit të sponsorizuar nga BE-ja që supozohet se e ka pranuar. Ajo gjithashtu ka mobilizuar banditë e saj në veri të Kosovës për të penguar fizikisht ardhjen e kryetarëve të zgjedhur atje”, pohoi ai.
Analisti ka deklaruar se SHBA-ja nuk i dënoi këto lëvizje të shtetit serb, por vetëm të autoriteteve kosovare.
“Nuk ka pasur asnjë dënim të SHBA-së për lëvizjet e Serbisë, por vetëm të Kosovës. Uashingtoni në thelb ka braktisur çdo pretendim të neutralitetit dhe ka miratuar disa nga prioritetet e Beogradit si të tijat. Kjo nuk është e vërtetë vetëm për vendosjen e kryetarëve të komunave, por edhe për Asociacionin e propozuar të Komunave me Shumicë Serbe brenda Kosovës dhe iniciativën e Ballkanit të Hapur që Serbia po promovon për të zgjeruar kontrollin e saj mbi serbët në vendet fqinje. Mbështetja e synimeve etno-nacionaliste të ‘botës serbe’ të Beogradit është bërë politika e Uashingtonit për Ballkanin.
Kurti e ka logjikën, por a ka aftësi?
Nuk jam i vetëdijshëm për mendimin aktual të kryeministrit Kurti për çështjen specifike të kryetarëve të komunave. Por, ai është një liberal demokrat i vdekur që beson në të drejta të barabarta sipas ligjit. Ai është gjithashtu ajo që unë do ta quaja një “sovranist”. Kurti beson se Kosova është dhe duhet të veprojë si një shtet sovran. Këto dy karakteristika e bëjnë vendosjen e kryetarëve të bashkive një lëvizje logjike, deklaron ai.
“Megjithatë, logjika e vetme nuk mund të diktojë politikën. Aftësia gjithashtu ka rëndësi. Ai është i kufizuar në dy mënyra: Kosova ka forca të kufizuara policore në dispozicion për t’u marrë me dhunën serbe kundër kryetarëve të komunave dhe padyshim që ka shumë të kufizuar mbështetjen ndërkombëtare për instalimin e tyre. Një vend i vogël si Kosova nuk mund të përballojë të veprojë pa vetëdije për kufizimet e veta”, pohoi profesori amerikan.
Amerikanët kanë aftësi, por u mungon logjika
“Amerikanët mund t’ia vështirësojnë jetën Kurtit. Por, pozicioni i tyre mungon në logjikë. Si i mbështesni zgjedhjet dhe jo rezultatet e tyre legjitime? Si i përkrahni të drejtat e barabarta, por si e kundërshtoni vendosjen e zyrtarëve të zgjedhur për shkak të përkatësisë së tyre etnike? Si e dënoni veprimin e policisë për të mbrojtur kryetarët e zgjedhur, por jo rebelët që i sulmuan? Si pretendoni se marrëveshja e normalizimit, e cila përfshin një zotim për të mos përdorur forcën ushtarake, është ligjërisht e detyrueshme, por nuk e pengon mobilizimin serb të forcave të saj të armatosura në përgjigje të një konflikti politik brenda Kosovës?”, ka pyetur Serwer.
“Shtetet e Bashkuara pretendojnë se mbështesin të drejta të barabarta dhe respekt për sovranitetin dhe integritetin territorial të të gjitha shteteve ekzistuese në Ballkan. Duhet të nxjerrë përfundime logjike”, përfundoi ai.
Kryeministri Albin Kurti ka thënë se është i vetëdijshëm dhe se i kupton shqetësimet e ngritura nga partnerët ndërkombëtarë për zhvillimet e djeshme në veri, por se çdo opsion tjetër, do të ishte mos përmbushje e obligimeve
Ai ka ftuar qytetarët serbë të Kosovës që të bashkëpunojnë me kryetarët e rinj dhe kabinetet e tyre.
“Ne jemi të vetëdijshëm dhe i kuptojmë shqetësimet e ngritura nga partnerët tanë ndërkombëtarë. Por, çdo opsion tjetër, do të ishte mos përmbushje e obligimeve kushtetuese të Qeverisë sonë ndaj kryetarëve të rinj; do të ishte mos përmbushje e obligimeve dhe detyrimeve të kryetarëve të rinj ndaj qytetarëve të Republikës; dhe, do të pamundësonte ofrimin e shërbimeve bazike komunale për qytetarë.
Andaj, si Kryeministër i të gjithë qytetarëve, ftoj të gjithë, veçanërisht qytetarët serbë të Kosovës, që të bashkëpunojnë me kryetarët e rinj dhe kabinetet e tyre, të cilat do të jenë multi-etnike, multi-kulturore, multi-gjuhësore dhe multi-partiake. Ata janë të zgjedhur dhe nuk janë kundër askujt, por në shërbim të të gjithëve”, ka shkruar Kurti.
Kurti ka bërë me dije se të gjitha rrugët në veri janë të kalueshme, derisa ka falenderuar pjesëtarët e Policisë së Republikës së Kosovës “për qëndrimin e tyre profesional, shtetëror dhe në mbrojtje të sundimit të ligjit”.
“Ata, siç dëshmojnë çdo ditë, e dëshmuan edhe dje, që janë të gatshëm për t’i shërbyer rendit, ligjit e Republikës si profesionistë, të patrembur e dinjitozë, në afirmimin e një ambienti multi-etnik të sigurisë, pavarësisht kushteve të rënda që shkaktuan grupet e menaxhuara nga struktura parapolitike në atë pjesë të vendit”, thuhet në postimin e Kurtit.
Misioni i NATO-s në Kosovë, KFOR, e ka cilësuar tejmase të rrezikshme situatën që ka mbizotëruar të premten në veri të Kosovës, pas tensioneve që përcollën futjen e kryetarëve të rinj të komunave veriore në objektet e komunave.
Në një komunikatë për media në mbrëmje, KFOR-i ka dënuar “veprimet e njëanshme” dhe ka bërë thirrje për përmbajtje.
“KFOR-i është duke e monitoruar me kujdes situatën në komunat në veri të Kosovës, ku një seri përplasjesh janë shkaktuar nga hyrja me forcë e kryetarëve të sapozgjedhur në ndërtesat e komunave. Kjo është tejmase e rrezikshme për procesin e normalizimin dhe rrezikon përshkallëzim të mëtejmë të tensioneve. KFOR-i dënon me vendosmëri këto veprime të njëanshme dhe u bën thirrje të gjitha palëve që të përmbahen nga dhuna që mund të kërcënojë sigurinë në Kosovë. Koordinimi midis të gjithë akterëve është thelbësor për ta shmangur përshkallëzimin e mëtejmë. Prioritet i parë i KFOR-it mbetet sigurimi i një mjedisi të sigurt, në përputhje me mandatin e Këshillit të Sigurimit të OKB-së. Dialogu dhe diplomacia janë e vetmja rrugë drejt paqes dhe sigurisë së qëndrueshme në Kosovë”, thuhet në reagim.
Gjykata e OKB-së mbi krimet e luftës në Hagë, më 27 maj të vitit 1999 ka konfirmuar se ka paditur presidentin jugosllav, Slobodan Milosheviq, si kriminel lufte.
Më 1 prill të vitit 2001, Millosheviqi është arrestuar në Beograd. Ndërsa, me urdhrin e qeverisë serbe, me 28 qershor është ekstraduar për në Hagë, pasi paraprakisht është bërë publike aktakuza për krime lufte në Kosovë.
Më vonë, Millosheviqi është akuzuar për krime edhe në Kroaci dhe gjenocid në Bosnje-Hercegovinë.
Gjykimi kundër Millosheviqit në Hagë ka filluar me 12 shkurt të vitit 2002.
Nxjerrja e dëshmive për krime në Kosovë e Kroaci dhe për gjenocid në Bosnje – Hercegovinë, ka zgjatur deri me 25 shkurt të vitit 2004. Mbrojtja e tij ka filluar me në fund të gushtit të atij viti.
Gjykimi kundër Millosheviqit është ndërprerë me dhjetëra herë për shkak të problemeve kardiovaskolare dhe tensionit të lartë të gjakut.
Më 11 mars të vitit 2006 në orën 9:30, Slobodan Milosheviq është gjetur i vdekur në qelinë e tij.