Category: Lajme

Ambasador i Shteteve të Bashkuara të Amerikës në Kosovë, Jeffrey Hovenier, në emisionin CONTEXT në ATV, e ka dënuar ashpër sulmin ndaj kanalit të ujit të Ibër-Lepencit, i cili ka ndodhur në veri të Kosovës më 29 nëntor.

Ai tha se ky akt kishte potencialin të dëmtonte jetët e qytetarëve dhe të ndërpriste furnizimin me energji elektrike dhe ujë, duke cilësuar sulmin si të pajustifikuar dhe pa asnjë kuptim në shekullin e 21-të.

Hovenier theksoi se Shtetet e Bashkuara janë angazhuar për mbështetje të plotë në hetimin e këtij sulmi, ndërsa autoritetet kosovare janë duke kryer hetime të thella për të gjetur përgjegjësit.

Ai shtoi se, megjithëse ende nuk ka prova të plota, SHBA beson se do të gjenden prova të mjaftueshme për të atribuar përgjegjësinë për këtë akt.

“Ne e dënojmë plotësisht këtë sulm të tmerrshëm në infrastrukturën kritike në Kosovë që kishte potencialin të përmbyste ndjeshëm jetët dhe të dëmtonte njerëzit duke ndërprerë prodhimin e energjisë elektrike për një përqindje të caktuar të qytetarëve, duke ndikuar në furnizimin me ujë të një përqindje të qytetarëve. Thjesht, ky ishte sulm i pajustifikuar që nuk ka asnjë kuptim në shekullin e 21-të”, tha Hovenier.

Për ta parë intervistën e plotë të Ambasadorit Hovenier, shikoni videon më poshtë:

Përgatiti: Pranvera Krasniqi

Për veprimet e tyre gjatë seancës komunale të së hënës, të dy protagonistët u ndëshkuan.

Gëzim Sveçla, Shef i Grupit të Asamblistëve të Vetëvendosjes në Prishtinë, për shkuljen e mikronin të kryesuesit të kuvendit komunal, u dërgua në mbajtje për 48 orë.

Ndërkaq, Berat Lahun, njërin prej asamblistëve të LV-së, i cili votoi pro miratimit të buxhetit të vitit 2025 për kryeqytetin, e ndëshkoi vetë partia.

“Kemi mbajtë mbledhje të jashtëzakonshme, është procedua në komisionin disiplinor, meqë nuk e kemi ditë se ata do të marrin pjesë. Vendimi për një mikrofon ndukje nuk ka qenë i mirë, po prapë ka vazhdua seanca është ekzagjeruar, është politikë, organet e drejtësisë të merren me tendencat kriminale dhe ta mbrojnë Prishtinën përballë këtyre tendencave për përfitime të ngushta”, tha sekretari i LV-së në Prishtinë, Egzon Azemi.

Me t’u njoftuar me vendimin e partisë, Lahu reagoi menjëherë.

“Ata po më akuzojnë mua për pazare me oligarkë, që është një shpifje e pastër, në ndërkohë që kam qenë vetë unë që kam kundërshtuar realizimin e interesave të Devollëve në shumë raste, njësoj siç e kam kundërshtuar këmbimin e pronave në Badoc me prona në Prishtinën e re. Qendra e Prishtinës në vend se të bëjë akuza të pabaza kundër meje do të duhej të merrej me Egzon Azemin, i cili në seancën e djeshme, duke e ditur se kamerat kanë qenë të kthyera nga ne, është afruar me vetëdije dhe ka provokuar”, tha Lahu.

Ndërkaq, ndaj Edmond Azemit, asamblistit tjetër i cili po ashtu mbështeti LDK-në në votim, nuk ka ende ndonjë masë.

“Për rastin e dytë do ta trajtojmë, nëse përsëritet një shkelje e tillë do të procedohet edhe personi tjetër, tha Azemi”.

Mes tjerash, Azemi tha se prezenca dhe njëkohësisht pjesëmarrja në votim edhe e një asamblisteje nga radhët e PDK-së, reflekton korrupsion.

Mirëpo, këto akuza i hodhi poshtë zëdhënësi i komunës së Prishtinës, Donat Lushaku.

“Ne vetëm jemi duke u munduar t’i hedhim në votim disa pika të rëndësishme që kanë mbetur pezull, secili e din rëndësinë e votimit të atyre pikave, votojnë me vetë dëshirë…”, tha Lushaku.

Ndërkaq, për shkak të zhvillimeve të fundit në kuvendin komunal të Prishtinës, seanca e radhës që pritej të mbahej të mërkurën, u shty për një ditë tjetër.

Përgatiti: Benita Zeneli

Punën e pushtetit që e bënë deri në orët e vona të mbrëmjes, deputetët e partisë më të madhe opozitare, do ta dërgojnë për vlerësim të kushtetutshmërisë.

Rreth 20 projektligjet që u miratuan në seancën e 5 dhjetorit vetëm me prezencën e deputetëve të Vetëvendosjes, Partia Demokratike pritet t’i dërgojë në Gjykatën Kushtetuese.

Edhe nga Instituti i Kosovës për Drejtësi vlerësojnë se të enjten Kuvendi nuk iu përmbajt rregullores.

Ndërkohë që për t’i dërguar këto ligje në Kushtetuese, deputetët kanë afat brenda tetë ditësh nga dita e miratimit.

Por, këto pretendime po kundërshtohen nga deputetët e Vetëvendosjes. Deputeti Halil Thaçi thotë se gjithçka ka shkuar sipas rregullores së Kuvendit, derisa vlerëson se nëse bëhet një veprim i tillë nga opozita, do t’u bëhet dëm qytetarëve.

“PDK-ja është e interesuar të mos ketë sigurime shëndetësore. Janë ligje të rëndësishme dhe jetike. Keni parasysh që kemi 25 vite pas çlirimit dhe tash kemi arritur ta votojmë një ligj që qytetari të bëhet me sigurime shëndetësore. Gjithë seanca ka qenë sipas rregullores dhe edhe në legjislatura të tjera ka pasur raste kur një projektligj është miratuar në mes dy leximeve në një seancë”, tha Thaçi.

Në mesin e projektligjeve që u miratuan në seancën e javës së kaluar janë ai për banim e përballueshëm dhe social, Projektligji për sigurimin e detyrueshëm të kujdesit shëndetësor, për Byronë Shtetërore për Verifikimin dhe Konfiskimin e Pasurisë së Pajustifikueshme, Projektligjin për financimin e menaxhimit të resurseve ujore e të tjerë.

Përgatiti: Armand Hoti

Trainkos së fundmi ka kuptuar se i janë vjedhur afro 19 mijë euro.

Të dyshuarit kryesorë për menaxhmentin, janë konduktorët që punojnë në vagonët e udhëtarëve.

ATV-ja ka kuptuar se ndërmarrja ka porositur edhe inspektimin e disa pajisjeve fiskale.

Referuar vlerësimeve të kompanisë private të angazhuar për analizën e pajisjeve fiskale, dëmtimet mes tjerash ndërlidhen me dëmtim të bllombave dhe manipulim të të dhënave.

“Gjatë periudhës së kontrollit, janë dorëzuar gjithsej 17 pajisje fiskale për të përcaktuar nëse ka ndonjë manipulim nga ana e punonjësve të “Trainkos” Sh.A. Pas analizës dhe kontrollit të
detajuar, u konstatuan shkelje në disa pajisje, duke përfshirë: dëmtime të bllombave, dështime të memorieve fiskale, dëmtime të memorieve fiskale, manipulim i të dhënave, pajisje me gabime në të dhëna dhe pajisje të dëmtuara fizikisht”, thuhet në përgjigjen nga ENTERNET.

Kryeshefi i ndërmarrjes, Agron Statovci, konfirmon dyshimet për hajni.

Ai thotë se për rastin është njoftuar edhe Administrata Tatimore e Kosovës dhe Ministria e Ekonomisë.

“Dëmi i mundshëm mund të arrijë shifra të larta, duke përfshirë një gamë të gjerë rastesh, përkatësisht deri në 15 raste të dyshuara. Me datën 30.11.2024, kemi raportin zyrtar nga ENTERNET nga 17 arkat e dërguar për kontroll 15 nga këto nuk kanë bllomba, ndërsa 3 nga këto arka është konstatuar dhe dëmi kap shumën 18,908.32 €. Në ditët në vazhdim, do t’i pranojmë edhe raportet
përfundimtare, pasi edhe ato janë të manipuluara”, tha Statovci.

Për tre rastet ku keqpërdorimi u evidentua, punëtorët janë ndëshkuar.

Këto raste, janë adresuar edhe në njësitin për krime ekonomike të Policisë së Kosovës.

“Duhet të presim raportin përfundimtar, por këto manipulime duken se janë bërë për një periudhë prej afër 8-9 vitesh ose që nga koha e fiskalizimit 2015-2016. Për tre rastet për të cilat kemi raportet përfundimtare, janë në procedurë disiplinore në bazë të rregullores së brendshme. Po respektojmë çdo procedurë pa nguti, dhe me pranimin e raporteve të tjera do të merren masa konform ligjeve dhe rregulloreve në fuqi për secilin rast veç e veç”, tha Statovci.

Ndërmarrja posedon 25 arka fiskale në total. Inspektimi i tetë të tjerave pritet të bëhet së shpejti.

Sidoqoftë, që nga themelimi i “Trainkosit” si ndërmarrje publike, afarizmi me udhëtarë nuk ka prodhuar profit për kompaninë.

Përgatiti: Fatlum Jashari

Derisa marrëveshja e parë nga dy sish, në kuadër të Planit të Rritjes të BE-së për Ballkanin Perëndimor, është nënshkruar e është miratuar nga Qeveria, dhe po pret ratifikimin në Kuvend, tjetra nuk është firmosur ende.

Pa dhënë detaje kohore, në Qeveri thanë se marrëveshja e dytë, ajo për kredi, e cila duhet të nënshkruhet me Komisionin Evropian, është duke u finalizuar.

“Hapat e nevojshëm nga ana e qeverisë janë përmbushur tashmë dhe për të vijuar tutje presim finalizimin e Marrëveshjes për Hua nga ana e Komisionit Evropian, për të vazhduar me dorëzimin dhe ratifikimin e të dyjave në Kuvendin e Republikës, çka do të mundësojë më tej edhe marrjen e fondeve për Kosovën”, tha Klisman Kadiu, këshilltar i zëvendëskryeministrit për Integrim.
Por, ratifikimi në Kuvend, i cili është parakusht për përfitimin e fondeve, rrezikon të vonohet për disa muaj.

Kjo pasi, seanca e pasmesnatës në Kuvend javën e kaluar, në të cilët pushteti, pa opozitën, miratoi një mori ligjesh, u konsiderua mbase e fundit e kësaj legjislature.

Derisa krahas Planit të Rritjes, një mori marrëveshjesh të tjera ndërkombëtare mbesin të paratifikuara, shefja e grupit parlamentar të Lëvizjes Vetëvendosje, Mimoza Kusari-Lila tha se një seancë e re varet nga vullneti politik i të gjitha partive.

Në një përgjigje për ATV-në, ajo tha se do të përpiqen të thërrasin një seancë për marrëveshjet ndërkombëtare.

Në anën tjetër, partitë opozitare në Tetor thanë se do të mbështesin ratifikimin e dy ujdive nga Plani i Rritjes.

Sidoqoftë, dështimi eventual për ratifikim para zgjedhjeve të 9 Shkurtit rrezikon të vonojë nisjen e projekteve, për të cilat mund të fitohet financimi, deri në vjeshtën e 2025-tës.
Kjo pasi, procedurat dhe afatet e prokurimit marrin kohë.

Praktikat, sipas Ilazit, tregojnë se ankesat dhe shqyrtimi i tyre janë element shtesë në vonesa.

Në kuadër të Planit të Rritjes, Kosova mund të përfitojë deri në 882 milionë euro në formë grantesh dhe kredish – nëse do të ketë vonesa ose jo, varet kryekëput nga veprimet e të zgjedhurve të popullit në Kuvend.

Përgatiti: Fatlum Jashari

Një ditë pasi nga Prishtina kërkoi që autorët e sulmit në kanalin e “Ibër Lepencit” të vihen para drejtësisë, Raportuesi për Kosovën i Parlamentit Evropian, Riho Terras, vizitoi vendngjarjen e 29 Nëntorit.

Në qëndrimin e tij, në Varagë të Zubin Potokut, ai ishte i shoqëruar nga zëvendësdrejtori i Policisë për Rajonin Mitrovicë – Veri, Veton Elshani.

Politikani estonez në terren pa punimet për sanimin e kanalit të dëmtuar nga shpërthimi, por nuk foli.

Paraprakisht, ai qëndroi në Mitrovicë të Veriut.

Aty, prapa dyerve të mbyllura, takoi përfaqësuesit të partive politike nga komuniteti serb.

Pas takimit, Lista Serbe lëshoi një njoftim në të cilin, siç thuhet, e ka informuar Terrasin për “dhunën institucionale dhe fizike të regjimit në Prishtinë”.

Euro-deputeti që ka për detyrë të shkruajë një raport për gjendjen në terren, takoi edhe përfaqësues të tjerë të komunitetit serb në veri.

Për pak minuta ai qëndroi edhe në urën kryesore mbi lumin Ibër, ndërmjet jugut dhe veriut të Mitrovicës, por as aty nuk foli para mediave.

Në kryeqytet, në ditën e parë të vizitës treditore, Terras takoi krerët shtetërorë presidenten, kryeministrin dhe kryeparlamentarin.

Përgatiti: Arian Hajdaraj

Personi i cili ka urdhër nga gjykata të qëndrojë larg viktimës, në këmbë apo në dorë, do t’i vendoset kjo pajisje elektronike.

Në momentin kur ai i afrohet personit që ka urdhër mbrojtjeje, pajisja do të sinjalizojë direkt në stacionin më të afërt të policisë, zyrtarët e së cilës duhet të ndërhyjnë menjëherë.

Projekti i cili u lansua të martën, nga kryeministri e ministrja e Drejtësisë u vlerësua si fort i rëndësishëm posaçërisht për sigurinë e grave.

“Një hap gjigant në mbikëqyrje të të gjithë këtyre personave, të cilët na i kanë mbushur lajmet në këto vitet e fundit me rastet e dhunës në familje dhe kanë tronditur mbarë shoqërinë dhe kanë këputur jetë ose i kanë bërë ato të mjerueshme nëpër familjet e tyre”, tha kryeministri Albin Kurti.

“Ky është një ndër projektet më të rëndësishme për të mbrojtur jetën dhe dinjitetin e tyre”, tha ministrja e Drejtësisë, Albulena Haxhiu.

Mbikëqyrjen e personave të dyshuar, sidomos recidivistëve, do ta bëjë Polica.

“Ne kemi krijuar një ekip të posaçëm për të negociuar dhe për të hartuar projektin dhe gjatë këtij viti kemi arritë që projektin ta kompletojmë”, tha drejtori i Përgjithshëm i Policisë së Kosovës, Gazmend Hoxha.

“Ky sistem patjetër që do të shfrytëzohet edhe për raste të tjera, në parandalim të veprave të ndryshme penale, por roli primar është do të thotë parandalimi i përsëritjes së dhunës ndaj grave tona”, tha ministri i MPB-së, Xhelal Sveçla.

Megjithatë, ende nuk dihet sasia e hallkave, të cilat mund të vendosen që në fillim të projektit.

Në fakt, ligji për mbikëqyrje elektronike ishte miratuar qysh në vitin 2015.

Që nga ajo kohë, qeveritë njëra pas tjetrës nuk arritën ta zbatonin fare. Tek në 2022, pas vrasjes së Hamide Magashit, ministrja Haxhiu njoftoi për ndarjen e disa qindra mijëra eurove për blerjen e hallkave, të cilat u blenë dy vjet më vonë.

Për këto arsye, njohës të çështjeve juridike vlerësojnë se vonesa e zbatimit të ligjit, ka shkaktuar mjaft pasoja.

“Më mirë vonë se kurrë. Por, shumë gra janë vrarë tash e disa vite në mungesë të këtij sistemi. Ato nuk kthehen më në jetë”, tha Fehmije Gashi – Bytyqi, avokate.

Veç kësaj, edhe zbatimi i projektit pritet të ketë sfida.

Në muajin gusht, Ministria e Punëve të Brendshme nënshkroi tenderin për blerjen e hallkave të para elektronike.

Deputeti i Kuvendit të Kosovës, Burim Meta, i cili drejton degën e partisë GUXO në Ferizaj, në një prononcim për ATV-në, theksoi se në të ardhmen mund të ketë përçarje të reja mes GUXO-së dhe qeverisë, sidomos lidhur me ministren Donika Gërvalla.

Ai tha se këto përçarje mund të ndodhin kur Donika Gërvalla nuk të jetë më ministre e Punëve të Jashtme dhe Diasporës.

“Ne në të ardhmen do të kemi një përçarje tjetër, tani mes partisë GUXO dhe qeverisë, kur ministrja Gërvalla natyrisht nuk do të jetë ministre e Punëve të Jashtme të Diasporës, për shkak se nuk duhet të jetë ministrie e Punëve të Jashtme dhe Diasporës”, tha Meta.

Meta la të kuptohet se ky qëndrim mund të sjellë mosmarrëveshje të reja mes partnerëve në qeveri, duke vënë në pikëpyetje edhe rolin e Gërvallës në skenën diplomatike.

Prononcimin e plotë të Burim Metës për ATV-në, e gjeni në videon më poshtë:

Deputeti i Kuvendit të Kosovës, Burim Meta, i cili drejton degën e partisë GUXO në Ferizaj, në një prononcim për ATV-në, tha se kjo parti ka marrë një drejtim që po dëmton identitetin dhe kauzën për të cilat është krijuar.

Ai vlerësoi se mospërfshirja e strukturave dhe veprimet e bashkëkryetarëve po minojnë besimin e anëtarësisë.

“Është një mbyllje e partisë, është dëmtim i kauzës përmbi të cilat është krijuar partia GUXO, është largim nga identiteti dhe dinjiteti i saj politik partiak. Është rrënim i maksimës apo motës që e ardhmja i u takon atyre që guxojnë, të cilët pikërisht dy bashkëkryetarët, Peci dhe Gërvalla, nuk guxuan asnjëherë që të merren me partinë, që të merren me strukturat e partisë”, tha Meta.

Meta paralajmëroi se pakënaqësi të ngjashme po shfaqen edhe në degë tjera si Peja, duke ngritur shqetësime për drejtimin e ardhshëm të GUXO-s.

Prononcimin e plotë të Burim Metës për ATV-në, e gjeni në videon më poshtë:

Televizioni ATV ka shpallur konkurs për punësimin e dy grimerëve.

Kandidatët e interesuar mund të aplikojnë duke dërguar CV-në e tyre në adresën [email protected].

Afati për aplikim është deri më 15 dhjetor 2024.