Category: Lajme

Përgatiti: Kastriot Tahiri

Alivanosje e fraktura nëpër gjymtyrë, ishin disa nga pasojat që i pësuan nxënës të shkollave të ndryshme, derisa u bënë pjesë e sfidës virale të platformës “TikTok” – “SUPERMENI”.

Së fundmi këtë sfidë e realizuan nxënës të shkollave të Vushtrrisë.

Për këtë shkak, të hënën 15 minutat e orës së parë iu kushtuan këtij fenomeni, i cili po vlerësohet të jetë i rrezikshëm për fëmijë.

“Në manual, ka pasë informata qysh nxënësit problematikë kërkojnë që të përfshihen të gjithë në atë lojë, e kemi pa të arsyeshme që klasat që nuk përfshihen janë me vetëdije të plotë”, tha Astrit Izmaku, drejtor i shkollës “SHMU1”.

Për parandalimin e kësaj sfide dhe veprimet e ardhshme që duhet të ndërmerren, përfaqësues të Drejtorisë së Arsimit në Vushtrri, të hënën janë takuar edhe me zyrtarë policorë.

Sipas drejtorit të arsimit, Albanez Tahiraj, problemi është më i thellë sa i përket përdorimit të rrjeteve sociale.
“Nxënësit po ndikohen edhe në ambiente familjare e fqinjësore, por ne po tentojmë që preventivën me e bë sa janë në shkollë”, tha Tahiraj.

Përfshirjen e fëmijëve nëpër këto sfida, psikologu Naim Telaku e sheh edhe si vetëmbrojtje të tyre. Sipas tij, frika dhe bullizimi janë disa nga arsyet pse ata bëhen pjesë e realizimit të këtyre sfidave.

“Fëmijët dhe adoleshentët e kanë trurin jo të mjaftueshëm, pa zhvilluar për ta ndaluar veten dhe disa impulse. Fëmijët më lehtë rrezikojnë me shëndetin e tyre, sesa me pas përjashtim social”, tha Telaku.

Kjo është sfida e tretë që provohet nga nxënësit e shkollave në vend, pas asaj të vetëlëndimit dhe të alivanosjes.

Madje, numri i saktë i përdorimit të kësaj platforme nga të miturit nuk dihet ngase, për qasje në Tik Tok, jo detyrimisht nevojitet një llogari.

Përdorimi i platformës TikTok është i ndaluar në institucionet qeverisëse.

Përgatiti: Pranvera Krasniqi

Kosova ka përqindje të ulët të përfshirjes së grave në ushtri, andaj si një shtet që synon anëtarësimin në NATO duhet të bëjë më shumë për të rritur pjesëmarrjen e grave në ushtri.

Kështu u tha në konferencën me temën “Avancimi i përfaqësimit dhe rolit të grave në ushtri: Një hap drejt barazisë më të madhe gjinore, paqes dhe sigurisë”.

Madje, Presidentja Vjosa Osmani, theksoi nevojën për hapjen e konkurseve dhe pranimin e grave në këtë institucion.
“Është esenciale që në ushtri të përfshihen kurrikula për të trajtuar këto. Është me rëndësi që në konkurse që do të hapen në të ardhmen, të kemi dispozita të veçanta ashtu siç e lejon edhe Kushtetuta, të kemi mjete afirmative që sa më shumë gra të konkurrojnë dhe të bëhen pjesë e ushtrisë tonë”, tha Osmani.

Duke përmendur kontributin e grave për lirimin e vendit, Ministri i Mbrojtjes, Ejup Maqedonci, tha se tashmë janë duke punuar në këtë drejtim.

“MB-ja ka krijuar infrastrukturë ligjore që krijon barazi gjinore të barabartë për të gjithë. Gratë ushtare sot operojnë në kushte më të mira. Të gjitha masat e ndërmarra janë shtysa dhe inkurajojmë për integrimin e grave në ushtri. Nuk ka dyshim që gratë janë kompetente për t’i kryer të gjitha detyrat”, tha Maqedonci.

Përfshirje më të madhe të grave në ushtri kërkuan edhe përfaqësues të NATO-s.

“Barazia gjinore dhe kjo agjendë reflekton detyrat dhe prioritetet e Aleancës që janë integrale për paqen. Politika e re e NATO-s i parasheh katër pika, e para që të fuqizohen lidershipi për reagim dhe llogaridhënie, e dyta që të rritet numri i grave në vendimmarrje”, tha Christian Nawra, gjeneral brigade “Nalt”.

Kjo konferencë u mbajt nën organizimin e Presidencës së Kosovës, në kuadër të Qendrës Rajonale të Ekselencës për Gratë, Paqen dhe Sigurinë në Kosovë.

Përgatiti: Besmire Kluna

Kryeministri Albin Kurti dhe ministri i Shëndetësisë, Arben Vitia, vizituan Klinikën e Radiologjisë ku thanë se po investohet në rritjen e kualitetit të diagnostikimit, si dhe në cilësinë e shërbimeve për pacientë.

Sipas Kryeministrit Kurti, në hollet e tri korridoreve të tri klinikave, asaj të Klinikës së Radiologjisë, Kirurgjisë dhe Biokimisë Mjekësore janë kryer me sukses mbi 90% të renovimeve në trajtimin e murit, plafonit, ndriçimit, ventilimit, klimatizimit dhe instalimeve elektrike.

“Këtu ku ndodhemi, kemi bërë adaptimin e korridoreve dhe pritoreve, përveç klinikës Radiologjisë, edhe në biokimi mjekësore dhe kirurgji, vlera e gjithmbarshme është hiç më shumë se 393 mijë euro’’, tha Kurti.

Ai tha se Shërbimi Klinik i Mjekisë Nukleare është pajisur edhe me aparaturën SPECT- CT, kostoja e të cilit është 850 mijë euro.

Ndërkaq, Ministri i Shëndetësisë, Arben Vitia, theksoi se këto investime po bëhet me synim për të arritur kualitetin e diagnostikimit dhe intervenimit sa me të lehtë të pacientëve.

“Po investojmë shumë edhe në aparatura në trajtim që sa me mënyrë cilësore dhe komode për profesionistët shëndetësorë, po njësoj sa me mënyrë cilësore edhe qytetarët tanë t’i marrin këto shërbime këtu, e tash në Klinikën e Radiologjisë siç po e shihni këtu është hapi i parë i intervenimeve në sportele’’, tha Vitia.

Qeveria ka investuar edhe në renovimin e Klinikës së Onkologjisë, në atë së Kardiokirurgjisë dhe në atë të Ortopedisë.

Përgatiti: Pranvera Krasniqi

Partia me më së shumti asamblistë në Komunën e Prishtinës, Lëvizja Vetëvendosje, të hënën ishte pakicë.

Në seancën e kuvendit komunal erdhën vetëm dy nga ta, por prezenca e tyre, bashkë me një asamblist të PDK-së, ishin dritë e gjelbër në miratimin e buxhetit për vitin 2025.

Kështu, pas 3 dështimeve radhazi, këtë herë me 25 vota për, një abstenim dhe asnjë kundër, buxheti prej 128 milionë euro për vitin e ardhshëm, u miratua.

Vota pro e asamblistëve të Vetëvendosjes, Berat Lahu dhe Edmond Azemi, e nervozoi shefin e asamblistëve të kësaj partie, Gëzim Sveçla.

Sveçla dhunshëm e ka shkulur mikrofonin e kryesuesit të Kuvendit Komunal të Prishtinës, Fehmi Kupina.

Pas këtij akti, ai iu drejtua asamblistëve të LV-së, me një ton të ashpër.

Mirëpo, një orë pas ngjarjes, Sveçla hodhi poshtë pretendimet se dëmtimi i mikrofonit u bë për shkak të miratimit të buxhetit.

Pas pauzës, mikrofoni u rregullua, por mbledhja nuk vazhdoi edhe gjatë.

Në rend dite ishin propozimi i vendimit për planin e hollësishëm të zonës ekonomike, plani zhvillimor 2024/2032, plani i hollësishëm për zhvillimet në Mati 1, si dhe caktimi i lokacioneve për ndërtimin e çerdhes dhe xhamisë në Shkabaj.

Mirëpo, në mungesë kuorumi, seanca u mbyll duke u shtyrë për një ditë tjetër.

Mosmiratimi i këtyre pikave, sipas Nënkryetarit të Prishtinës, Alban Zogaj, ndikon negativisht në jetën e qytetarëve të kryeqytetit. Dhe sipas tij, dështimi i mbajtjes së seancës është pasojë e situatës së krijuar nga Sveçla, veprim të cilin e quajti skandaloz.

Asamblistët e Vetëvendosjes më vonë gjatë të hënës vendosën në hyrje të Komunës edhe një baner me shkrimin “Komuna e Devollëve”, në shenjë proteste për projektet që kaluan në Kuvendin Komunal.

Seanca e radhës pritet të mbahet të mërkurën.

Përgatiti: Nora Luta

I pafajshëm është deklaruar ish-ministri i Drejtësisë, Hajredin Kuçi, ndaj aktakuzës së Speciales, konfirmimin e së cilës e ka quajtur si një nga momentet më të errëta në karrierën e tij.

Kuçi teksa ka thënë se nuk ishte takuar me asnjë dëshmitar as në kohën kur ishte pjesë e ekipit mbrojtës të Kadri Veselit, u shpreh i bindur se do të lirohet nga të gjitha akuzat.

Para gjyqtares së procedurës paraprake, Kuçi ka thënë se me ish-presidentin Thaçi kanë punuar gjithnjë në bazë të parimit të drejtësisë.

Zyra e Prokurorit të Specializuar i ka kërkuar gjykatës që t’ia ndalojë Kuçit komunikimin me Thaçin dhe personat e tjerë të përfshirë në aktakuzë dhe emra të tjerë jopublikë.

Ndërkohë, të hënën në gjykatë është paraqitur edhe Isni Kilaj.

Ish-kryetari i Malishevës, avokati i të cilit kërkoi që të lirohet nga paraburgimi, u deklarua i pafajshëm.

“Nuk ka fare bazë se situata ka ndryshuar dhe befas përballemi me një rrezik më të madh për shkak të konfirmimit të aktakuzës. Nuk ka asnjë provë inkriminuese”, tha Iain Edward, avokati i Isni Kilajt.

Kilaj po akuzohet së bashku me Hashim Thaçin, Bashkim Smakajn, Fadil Fazliun dhe Hajredin Kuçin për pengim të drejtësisë, duke u përmendur që vepruan në tri grupe për të ndikuar në dëshmitarë gjatë periudhës prill – nëntor 2023.

Sipas aktakuzës, Thaçi dyshohet se shpalosi informacion lidhur me dëshmitarët e mbrojtur, duke mos iu bindur vendimeve që ndalojnë shpalosjen e këtyre informatave.

Përgatiti: Nora Luta

Javën e kaluar u miratua një ndër ligjet kyçe që Qeveria i premtoi në kuadër të reformës në drejtësi.

Por, Ligji i ri për Byronë rrezikon të përfundojë sërish në Gjykatën Kushtetuese.

Kështu të paktën kanë paralajmëruar nga PDK-ja, të hënën gjatë publikimit të raportit nga IKD-ja, “Dështimi i reformës në drejtësi”.

Instituti i Kosovës për Drejtësi, në raport, ka theksuar se si Qeveria po e përfundon mandatin pa e zbatuar procesin e Vettingut, dhe pa strategji kundër korrupsionit.

Sipas IKD-së, Qeveria nuk i ka dhënë prioritet drejtësisë as në aspektin buxhetor.

Ndërkohë, deputeti i AAK-së, Besnik Tahiri, ka thënë se ekzekutivi përmes ligjeve ka tentuar të politizojë çdo institucion.

IKD-ja ka kritikuar Qeverinë edhe për mosmiratimin e Planit të ri të Veprimit, në kuadër të strategjisë për sundimin e ligjit.

Kjo qasje e Qeverisë, sipas IKD-së, ka rrezikuar efikasitetin e strategjisë dhe aktiviteteve që përcaktohen me anë të saj.

Kosova ka një Strategji për Sundimin e Ligjit për 2021 -2026, por Plani i Veprimit për vitet 2024 –2026 është vonuar.

Përgatiti: Fatlum Jashari

Mbledhja e informacioneve dhe fakteve nga terreni, janë qëllim i vizitës treditore të Raportuesit të ri për Kosovën të Parlamentit Evropian, Riho Terras.

Në mëngjesin e së hënës, në Prishtinë, ai i takoi ndaras presidenten Vjosa Osmani dhe kryeministrin Albin Kurti, me të cilët tha se bisedoi për situatën ekonomike dhe atë të sigurisë.

“Është hera ime e parë këtu, kam marrë shumë informacione për Kosovën dhe kam folur me shumë njerëz, por për mua më e rëndësishmja është të marr informacione të dorës së parë nga terreni. Jam këtu për të ndihmuar Kosovën në rrugën e saj drejt Bashkimit Evropian. Kosova ka qenë duke bërë reforma të suksesshme, duke bërë përparim të mirë dhe shpresoj që me një raport të drejtë dhe të informuar të Parlamentit Evropian, mund ta ndihmojmë Kosovën të bëhet pjesë e BE-së”, tha Terras.

Pas takimit me krye-parlamentarin, liderët e partive opozitare dhe përfaqësues të shoqërisë civile në kryeqytet, të martën Terras ka në agjendë një mini-tur në komunat me shumicë serbe në veri.

“Nesër do të vozisë drejt pjesës veriore të Kosovës, për të takime atje dhe për të vizituar vendin ku ndodhi sulmi i fundit në kanal. Ndjenjat e mia janë me popullin e Kosovës dhe jam i sigurt që autoritetet e Kosovës do të jenë në gjendje të identifikojnë njerëzit prapa këtij sulmi. Gjithashtu, kam takime me liderët ekonomikë dhe organizatat joqeveritare, për të biseduar për aspektet sociale dhe situatën aktuale ekonomike”, tha Terras.

Ndonëse kryesisht shprehu rezerva në deklarime, para se të kryejë vizitën, politikani estonez pati një kërkesë lidhur me sulmin në kanalin e “Ibër-Lepencit”.

“Të gjithë kriminelët duhet të sillen para drejtësisë. Por, ju lutem më jepni mundësinë të krijojë fotografinë time. Unë jam Gjeneral, dhe para se të kem të gjithë situatën dhe informacionin, nuk bëj plane. Kështu që le ta kuptojmë situatën dhe informacionet nga terreni, po ashtu”, tha Terras.

Në Nëntor, Parlamenti Evropian emëroi deputetin nga radhët e Partisë Popullore të Evropës – EPP, Riho Terras, në detyrën Raportues të Përhershëm për Kosovën, në një mandat pesëvjeçar.

Paraprakisht, në pesë vjetët e kaluara, këtë detyrë e kishte kryer politikania gjermane, Viola Von Cramon.

Në kuadër të Ditës Ndërkombëtare Kundër Korrupsionit dhe në prag të Ditës së të Drejtave të Njeriut, Shtetet e Bashkuara të Amerikës kanë ndërmarrë masa të reja për të luftuar korrupsionin dhe shkeljet e të drejtave të njeriut në mbarë botën.

Në Maqedoninë e Veriut, janë sanksionuar dy zyrtarë të lartë për përfshirjen e tyre në korrupsion, thuhet në njoftimin e uebfaqes zyrtare të Departamentit Amerikan të Shtetit, përcjell ATV.

Ish-zëvendëskryeministri Artan Grubi dhe gjyqtari Enver Bexheti akuzohen se kanë marrë ryshfet për të ndikuar në rastin gjyqësor të Sasho Mijalkovit, ish-drejtor i Sigurimit dhe Kundërzbulimit.

Për këtë arsye, atyre dhe familjeve të tyre u është ndaluar hyrja në Shtetet e Bashkuara.

Veç Maqedonisë së Veriut, për shkak të korrupsionit dhe abuzimeve me të drejtat e njeriut, SHBA ka ndërmarrë masa edhe kundër zyrtarëve dhe individëve të tjerë në vende si Sri Lanka, Jemen dhe Zimbabve. /atvlive.tv

Tifozët izraelitë dhe protestuesit u përleshën gjatë natës së mbrëmshme pas ndeshjes mes Ajaxit dhe Maccabi Tel Aviv, tha policia holandeze të premten.

Autoritetet holandeze thanë se sulmuesit i sulmuan tifozët izraelitë në mënyrë sistematike.

Nuk është e qartë se si filloi dhuna. Liderët e Izraelit dhe Holandës e dënuan dhunën duke e cilësuar si antisemitike. Videot nga Amsterdami gjithashtu shfaqin tifozët izraelitë duke brohoritur thirrje antiarabe në rrugët e qytetit.

Kryetarja e Amsterdamit, Femke Halsema, tha para gazetarëve të premten se vëzhguesi kundër terrorizmit i Holandës theksoi se nuk kishte kërcënime konkrete ndaj tifozëve izraelitë të futbollit para ndeshjes.

Peter Holla, shefi në detyrë i policisë së qytetit, tha në një konferencë për media se tifozët “u sulmuan qëllimshëm”.

Policia e Amsterdamit tha në rrjetet sociale se ka filluar një hetim të madh ndaj incidenteve të shumta të dhunës. Ajo nuk dha më shumë hollësi për të lënduarit apo të arrestuarit gjatë dhunës të enjten mbrëma, pas ndeshjes mes Ajaxit dhe Maccabi Tel Avivit në Ligën e Evropës.

Ende nuk është e qartë se kur dhe ku shpërtheu dhuna pas luftës.

“Në disa pjesë të qytetit u sulmuan tifozët. Policia u detyrua të ndërhyjë disa herë, për t’i mbrojtur tifozët izraelitë dhe për t’i shoqëruar ata në hotele”, tha policia.

Dhuna shpërtheu megjithëse ishte ndaluar një protestë propalestineze në afërsi të stadiumit. Halsema nuk kishte dhënë leje për protestë nga frika se do të shpërthenin përleshje mes protestuesve dhe tifozëve të klubit izraelit.

Para ndeshjes nuk kishte incidenteve ku përfshiheshin tifozët.

Transmetuesi holandez NOS raportoi se një flamur palestinez u bë copa-copa në një ndërtesë në qendër të qytetit dhe se policia nuk i lejoi mbështetësit propalestinezë të marshonin drejt stadiumit ku po zhvillohej ndeshja.

Izraeli fillimisht urdhëroi dërgimin e dy avionëve në kryeqytetin holandez për t’i kthyer izraelitët në shtëpi, por më vonë zyra e kryeministrit Benjamin Netanyahu tha se do të punojë “për të gjetur një zgjidhje për kthimin e qytetarëve tanë përmes aviacionit civil”.

Kryeministri i Holandës, Dick Schoof, tha në X se ishte i “tmerruar” nga raportimet për dhunë në Amsterdam.

“Sulme plotësisht të papranueshme antisemitike ndaj izraelitëve. Jam në kontakt me të gjithë të përfshirët”, tha ai, duke shtuar se bisedoi me Netanyahun dhe “theksova se përgjegjësit do të ndiqen dhe do të përballen me drejtësi”.

Presidentja e Komisionit Evropian, Ursula von der Leyen, tha se i dënon sulmet ndaj tifozëve të ekipit izraelit të futbollit në Amsterdam.

“I dënoj fuqishëm këto akte të papranueshme. Antisemitizmi nuk ka vend në Evropë. Ne jemi të vendosur t’i luftojmë të gjitha format e urrejtjes”, tha ajo.

Politikani antimysliman, Geert Wilders, i cili është lider i partisë më të madhe në Qeverinë holandeze, i dënoi sulmet e raportuara në Amsterdam.

“Ndihem i turpëruar se kjo mund të ndodhë në Holandë. E papranueshme”, shkroi ai në X.

Presidentja e Kosovës, Vjosa Osmani, ka takuar kryeministrinë e Britanisë së Madh, Keir Starmer, me të cilin kanë diskutuar për marrëveshjen e fundit për emigracionin mes dy vendeve, si dhe bashkëpunimin për sigurinë dhe mbrojtjen.

Ata janë takuar gjatë vizitës që po bën Osmani në Budapest.

“Mirënjohës për mbështetjen e palëkundur të Mbretërisë së Bashkuar për Kosovën”, ka shkruar Vjosa Osmani.

Kujtojmë, se me herët ishte raportuar se Mbretëria e Bashkuar synon që të arrijë marrëveshje me Kosovën, Serbinë dhe Maqedoninë e Veriut për të luftuar trafikimin e qenieve njerëzore.

Kështu kishte raportuar media britanike Independent, teksa ka pasqyruar pjesëmarrjen e kryeministrit Keir Starmer në samitin e Komunitetit Politik Europian në Hungari.

Qeveria britanike kishte njoftuar se këto marrëveshje synojnë të rrisin shkëmbimin e informacionit dhe ekspertizës për të goditur rrjetet kriminale të trafikimit.