Category: Lajme

Përgatiti: Egzona Mema

Pjesë të veturave dhe shenjat nga aksidenti që ndodhi mëngjesin e mërkurës mes disa veturave kanë mbetur ende në vendin e ngjarjes.

Mirëpo, ky nuk është aksidenti i vetëm që ndodh në këtë udhëkryq të qytetit të Vushtrrisë.

Nga Komuna e Vushtrrisë, thonë se sinjalizimi joadekuat bashkë me disa arsye tjera, janë shkaku i aksidenteve të shpeshta në vendin e njëjtë.

“Është si pasojë e infrastrukturës mbitokësore, elektrikës, dhe një pjesë e madhe nga pakujdesia e vetë vozitësve. Është një frekuentim shumë i madh i veturave. Ajo lagje është e mbingarkuar krahasuar me nevojën për qasje në rrugë, përveç semaforëve shumë ma mirë kish qenë me u siguru një qasje tjetër në rrugë”, tha menaxheri për Projekte Kapitale, Nexhat Merovci.

Lidhur më këtë problem, Merovci, thekson se Komuna i ka ofruar një zgjidhje Ministrisë së Infrastrukturës.

“Të kalon në kompetencë të Komunës për mirëmbajtje komplet kjo rrugë duke filluar nga ndriçimi, sinjalizimi, deri tash nuk kemi përgjigje nga Ministria”, tha Merovci.

Neglizhenca e rifunksionalizimit të semaforëve po shqetëson vushtrriasit.

“Shumë rrezik është, qaty e kam edhe mbesën që shkon në shkollë, është katastrofë e madhe ajo, përpara kanë punu tash se di pse jo, pasi janë s’di pse s’pi lëshojnë”, tha Miran Vllahi, qytetar.

“Nëse nuk punojnë semaforat po bohen tollovi, po hynë njerëzit duke menduar që kanë të drejtë”, tha Enver Maxhuni, qytetar.

Vetëm pak metra tutje në Vushtrri janë edhe një palë semaforë, gjithashtu jo funksional.

Urdhri ekzekutiv i presidentit të SHBA-së Donald Trump për të pezulluar të gjitha fondet mbështetëse të qeverisë amerikane ka prekur edhe SPAK-un dhe GJKKO në Shqipëri.

Top Channel ka parë letrën që ambasada amerikane në Tiranë i ka dërguar qeverisë shqiptare përmes Ministrisë për Evropën dhe Punët e Jashtme.

“Ambasada e Shteteve të Bashkuara të Amerikës i shpreh përshëndetjet e saj Ministrisë për Evropën dhe Punët e Jashtme të Qeverisë së Republikës së Shqipërisë dhe dëshiron të informojë Qeverinë e Republikës së Shqipërisë për qëllimin e Urdhrit Ekzekutiv të Qeverisë së SHBA-së për të pezulluar zbatimin, detyrimet e reja dhe shpërndarjen e fondeve në pritje të një rishikimi të të gjitha programeve të ndihmës së huaj”, thuhet në hyrje të letrës.

Në katër faqet e saj renditen të gjitha institucionet të cilat deri më tani përfitonin fonde nga qeveria amerikane dhe që pas fitores së urdhrit nga Trump, ato pezullohen.

Në faqen e tretë të letrës ku renditen institucionet e drejtësisë, fondet e të cilave janë pezulluar, përmendet edhe Struktura e Posaçme kundër korrupsionit dhe Krimit të Organizuar (SPAK) dhe Gjykata Speciale për Korrupsion dhe Krim të Organizuar (GJKKO).

Në listën e institucioneve që nuk do të marrin më fonde të taksapaguesve amerikanë deri në rishikimin e të gjitha programeve, janë edhe disa ministri, institucione të të gjitha niveleve të drejtësisë si dhe disa drejtori të rëndësishme si OSHEE, AKSHI, AKSK, SASPAC si dhe qeverisja vendore.

Pas këtij urdhri ajo që mbetet për t’u parë është fakti se si do të vijojë funksionimi i këtyre institucioneve të ngritura në zbatim të reformës në drejtësi, ku përveç buxhetit të akorduar nga shteti, ato merrnin edhe fonde nga qeveria amerikane.

Zëvendëskryeministri i Maqedonisë së Veriut Arben Fetai ka kritikuar ministrin për Marrëdhënie mes Bashkësive Ivan Stoilkoviq për lejimin e deklarimeve antiBE dhe antiNATO, njëherësh pro-ruse dhe pro-serbe të kreut të Republikës së Serbisë Milorad Dodik.

Deklarimet nxitëse të Dodik ishin bërë para dy ditësh në një ceremoni të organizuar nga ministri Stoilkoviq në Shkup.

Fetai duke mos e përmendur Stoilkoviq, shkruan se t’i japësh tribunë Dodik në Shkup është vendim i gabuar dhe i papranueshëm.

“Dodik është një politikan që nxit konflikt, mohon gjenocidin në Srebrenicë, minon sovranitetin e Bosnjë-Hercegovinës dhe mbështet politika që destabilizojnë rajonin. Për më tepër, ai është i sanksionuar nga SHBA-të dhe Mbretëria e Bashkuar për korrupsion dhe veprime që kërcënojnë paqen dhe stabilitetin në Ballkanin Perëndimor. Një person i tillë nuk mund dhe nuk duhet të marrë hapësirë në vendin tonë. Shkupi është dhe duhet të mbetet qytet i dialogut, bashkëpunimit dhe paqes, jo platformë për promovimin e ideve antiBE, antiNATO dhe antidemokratike që kërcënojnë të ardhmen e rajonit”, tha Fetai.

Kreu i Lëvizjes Besa Bilall Kasami thotë se nuk është hera e parë që persona të caktuar uzurpojnë institucione për të shprehur qëndrimet e tyre personale. Ai thotë se bartësit e funksioneve publike duhet të kenë ndjeshmërinë e institucionit që përfaqësojnë.

“Uroj që këto të jenë komente të fundit të ministrit në fjalë sepse ai përveç që duhet të ketë përgjegjësinë e pozitës që e mban, duhet të ketë edhe ndjeshmërinë e konceptit multietnik që përfaqëson Maqedonia. Ai nuk është vetëm ministër i pakicës serbe, por është ministër i të gjitha komuniteteve, duke nisur nga maqedonasit, shqiptarët, turqit, etj. Uroj që të sillet kështu”, tha Kasami.

Veprimin e Stoilkoviq, dhënien e dekoratës “Vojvoda Vuk” për zëvendsëskryeministrin dhe fjalimin e Dodik në Shkup, nga BDI-ja e cilësojnë provokim dhe të papranueshëm.

“Kjo tregon hapur se për kë punon ky ministër dhe kush i drejton sot institucionet e shtetit, andaj në emër të rinisë së BDI-së por edhe si të rinj shqiptarë që jemi kërkojmë dorëheqjen e menjëhershme të këtij ministri dhe distancimin e qartë të qeverisë nga agjendat antishqiptare dhe antiperëndimore. Ky shtet nuk mund të jetë terren për glorifikimin e gjenocidit dhe rikthimin e projekteve të errëta që duan të përçajnë popujt e rajonit. Kërkojmë kthimin e harmonisë ndëretnike në vend duke mos lënë hapësirë për provokime të tilla nga askush dhe duke garantuar barabarësi dhe respekt të ndërsjellë nga të gjitha etnitë në vend”, tha Valon Sadiku, BDI.

Stoilkoviq në të kaluarën e ka quajtur Kosovën “Kosova dhe M.” Ai nuk e ka fshehur asnjëherë afërsinë e tij me politikanët serb dhe qarqet ruse.

Në maj 2023, Stoilkoviq mori pjesë në Samitin e 11 të Sigurisë në Moskë në shoqëri të drejtorit të BIA-s serbe, Aleksandar Vulin, ministrit të Jashtëm serb Ivica Daçiq dhe presidentit të Republikës Serbe. Në fotografinë kolektive duket edhe shefi i Shërbimit Sekret të Federatës Ruse, Sergej Naryshkin.

Stoilkoviq njihet edhe mik i afërt i ish-agjentit serb Goran Zhivaljeviq i cili më 27 prill 2017 ishte futur gjatë dhunës në Kuvend, incident diplomatik pas të cilit u tërhoq nga BIA serbe.

Gjenocidin e Srebrenicës, në një postim në profilin e tij në rrjetet sociale e quajti “Diznilend nekrofil”, në periudhën kur ishte deputet në Kuvend.

Ndaj tij, dy subjekte boshnjake të vendit, Bashkimi Demokratik Boshnjak dhe shoqata e Këshillit Nacional Boshnjak kanë ngritur kallëzim penal për mohimin dhe tallje me gjenocidin në Srebrenicë.

Stoilkoviq kishte thurur lavde për terroristët e vrarë serbë në Banjskë të Zveçanit.

Ai ishte i vetmi që refuzoi pjesëmarrjen në mbledhjen e përbashkët të qeverive Kosovë-Maqedoni.

Milorad Dodik, i cili është listën e zezë amerikane për shkak të aktiviteteve korruptive dhe destabilizuese në rajon, është i njohur edhe si mbështetës fanatik i politikave të Moskës zyrtare.

Dodik në ceremoninë e organizuar në Shkup ka thurur elozhe Rusisë dhe është shprehur kundër NATO-s dhe BE-së. Nga fjalimi i Dodik u distancua kryeministri Hristijan Mickoski. “Nuk prisja që ai të keqpërdorte ngjarjen,” tha Mickoski, raporton Alsat.

Në ngjarje, i pranishëm ishte edhe ambasadori rus Sergej Bazdnikin, si i ftuar i veçantë në akademinë e organizuar nga Stoilkoviq.

Kandidati për deputet nga radhët e Aleancës për Ardhmërinë e Kosovës, Besnik Tahiri, përmes një postimi të bërë në rrjetin social në Facebook, ka thënë se në përfaqësimin e Kosovës në Këshillin e Evropës, gjithherë ka folur për interesat shtetërore.

Tahiri ka shtuar se këtë e ka bërë në frymë uniteti, duke u ngritur mbi dallimet politike të brendshme.

‘‘Për tri vite radhazi në përfaqësimin e Kuvendit, pra Republikës së Kosovës, në Këshillin e Evropës, në çdo rast, gjithmonë në frymë uniteti, kam folur për interesat tona kombëtare e shtetërore, duke dalë dhe duke u ngritur mbi dallimet tona politike të brendshme.

Për shtet duhet dinjitet!’’, ka shtuar ai.

Qeveria izraelite ka marrë një listë të pengjeve izraelite të planifikuar për t’u liruar nga Gaza nesër, sipas një deklarate nga Zyra e Kryeministrit izraelit, të raportuar nga mediat izraelite.

Ky është shkëmbimi i tretë i pengjeve dhe të burgosurve sipas armëpushimit aktual në Gaza.

Zyra e Benjamin Netanyahu njoftoi se gjithsej tetë pengje – tre izraelitë dhe pesë shtetas tajlandezë – do të lirohen nesër nga Gaza.

U publikuan edhe emrat e pengjeve izraelitë: Arbel Yehud, Agam Berger dhe Gadi Moses.

Marrëveshja e armëpushimit filloi para më shumë se një jave dhe faza fillestare pritet të përfshijë lirimin javor të pengjeve, me gjithsej 33 pengje që do të dorëzohen gjatë 42 ditëve deri në fillim të marsit në këmbim të qindra të burgosurve palestinezë.

Shtetet e Bashkuara, Katari dhe Egjipti, vendet që negociuan armëpushimin, po monitorojnë zbatimin e tij.

Si pjesë e marrëveshjes, Izraeli gjithashtu do të lirojë të burgosurit palestinezë çdo javë.

Kohë më parë autoritetet izraelite liruan 200 të burgosur, duke përfshirë disa të burgosur të përjetshëm, nga të cilët 70 iu dorëzuan Egjiptit dhe ata do të kenë zgjedhjen të qëndrojnë ose të lëvizin në një vend tjetër. Ndërsa Hamas liroi katër pengje.

Ndryshimi i qasjes së kryeministrit të Kosovës, Albin Kurti sa i përket Marrëveshjes së Uashingtonit po konsiderohet si përshtatje me presidentin e ri amerikan, Donald Trump. Përkundër që këtë ujdi – kur ishte arritur në vitin 2020, Kurti e kishte quajtur të dëmshme, së fundmi ai tha se e njëjta promovon stabilitet. Ndryshimi i pozicionit të Kurtit vlerësohet se po bëhet me qëllim të përafrimit me administratën e re amerikane dhe tejkalimin e qëndrimeve të kaluara.

Marrëveshja për normalizimin e marrëdhënieve ekonomike ndërmjet Kosovës dhe Serbisë, u nënshkrua më 4 shtator të vitit 2020 në Shtëpinë e Bardhë, ndërmjet ish kryeministrit Avdullah Hoti dhe presidentit të Serbisë, Aleksandër Vuçiq, në praninë e presidentit të atëhershëm amerikan Donald Trump, i cili tani është zgjedhur edhe për një mandat në krye të SHBA-se.

Kurti ka folur në gazetën spanjolle “El Mundo” – publikuar të hënën – për raportet me administratën Trump. Ai ka thënë se Marrëveshja e Uashingtonit e arritur në vitin 2020 ka promovuar stabilitet.

Analisti politik, Seb Bytyqi thotë për KosovaPress se nën administratën aktuale të Trumpit mund ketë sërish përpjekje për ndonjë marrëveshje ndërmjet Kosovës dhe Serbisë që fokus e ka bashkëpunimin ekonomik.

Sipas tij, secili shtet tani është duke u përshtatur me presidencën e re të Trumpit dhe se njësoj po vepron tani edhe kryeministri Albin Kurti.

“Fokusi i asaj marrëveshje ka qenë kryesisht ekonomik, me qëllim që të bëhet një progres në dialogun që kishte stagnuar në atë kohë. Ngjashëm edhe gjatë këtij mandati të presidentit Trump mund të presim përpjekje për eventualisht ndonjë marrëveshje tjetër që prap e ka fokus bashkëpunimin ekonomik. Sido që të jetë të gjitha shtetet janë duke u përshtatur me presidencën e re të zotëri Trump, dhe ngjashëm edhe Kosova duhet që patjetër të përshtatet me situatën e re. Për Kosovën është me prioritet që t’i ruaj ato përparimet që i ka bërë në shtrirjen e autoritetit në veri. Mos t’i rrezikojë ato përmes nxitjes së krizave dhe të jetë syhapur që të parandalojë ndonjë krizë të mundshme që mund të nxitet nga Beogradi”, thekson ai.

Mirëpo, ish-diplomati, Blerim Canaj, deklaron për KosovaPress se përkundër përpjekjeve të kryeministrit Kurti për të krijuar një diskurs të ri me republikanët, në krye me presidentin Trump, një gjë e tillë do të jetë shumë e vështirë, duke ditur diferencat e mëdha që i kanë pasur gjatë administratës së parë të presidentit Trump.

Kurti në vitin 2020 ka akuzuar ish-emisarin e ShBA-së për Ballkanin Perëndimor, Richard Grenell, se ka ndikuar në rrëzimin e qeverisë Kurti I. Grenell tani është i zgjedhuri i Trumpit si përfaqësues për misione speciale.

“Kurti veçse është duke parë se Administrata Trump do të ketë një qasje tjetër. Një Trump dhe një Grenell në Amerikë, dhe një Albin Kurti në Kosovë, nuk është një shenjë e mirë. Si duket do të tentojë Kurti të ndryshojë diskurs, mirëpo kjo më duket se është tepër vonë pasi hiqe Marrëveshjen e Uashingtonit, ne e dimë edhe sjelljen e Kurtit dhe militantëve të tij në raport me këto dy figura, Trump dhe Grenell. Tani me siguri duke pasur parasysh edhe fushatën zgjedhore, po ashtu edhe faktin se në një fushatë zgjedhore ftohja e marrëdhënieve me SHBA-të ka kosto…Kjo është një situatë që Kurti dëshiron të përfitojë, por kjo nuk do të thotë se do të ndryshohet mendimi dhe qasja e kabinetit qeverisës në raport me qeverinë e Kosovës”, thekson Canaj.

Në lidhje me deklaratën e kryeministrit Kurti për Marrëveshjen e Uashingtonit ka reaguar edhe ish-kryeministri Avdullah Hoti, i cili ka thënë se “ky është një rast i pastër i mashtrimit politik, i një lideri që për vite ka manipuluar qytetarët e Kosovës për përfitime të ngushta politike”.

Disa prej pikave të marrëveshjes nuk janë zbatuar nga palët, derisa Hoti ka thënë se moszbatimi i saj ka shkaktuar dëm të pallogaritshëm për vendin tonë – nga humbja e mundësive ekonomike, deri te dëmtimi i marrëdhënieve me partnerët ndërkombëtarë.

Kosova dhe Serbia, me lehtësimin e Bashkimit Evropian kanë arritur një marrëveshje tjetër për normalizimin e marrëdhënieve në vitin 2023, mirëpo e njëjta nuk ka gjetur zbatim në praktikë./KP

Një sondazh zbuloi se 85% e grenlandezëve nuk duan që ishulli i tyre, një territor gjysmë autonom danez, të bëhet pjesë e Shteteve të Bashkuara, me pothuajse gjysma që e shohin interesin e presidentit Donald Trump si një kërcënim.

Trump tha në fillim të këtij muaji se Grenlanda është jetike për sigurinë e SHBA-së dhe se Danimarka duhet të heqë dorë nga kontrolli i ishullit.

Një sondazh nga agjencia Verian, me kërkesë të gazetës daneze Berlingske dhe gazetës grenlandeze Sermitsiaq, tregoi se vetëm 6% e grenlandezëve mbështesin idenë që ishulli të bëhet pjesë e SHBA-së, ndërsa 9% ishin të pavendosur.

Sondazhi zbuloi se 45% e konsideronin interesin e Trump në Grenlandë një kërcënim, ndërsa 43% e panë atë si një mundësi dhe 13% ishin të pavendosur.

Grenlanda gëzon shumë nga të njëjtat përfitime sociale si Danimarka, të tilla si kujdesi shëndetësor universal dhe arsimi falas. Vetëm 8% e të anketuarve thanë se do të ishin të gatshëm të ndryshonin shtetësinë e tyre daneze në amerikane, 55% thanë se do të preferonin të mbeten shtetas danezë dhe 37% ishin të pavendosur.

Grenlanda, e cila ka sipërfaqe më të madhe se Meksika dhe një popullsi prej 57 mijë banorësh, ka autonomi të gjerë, duke përfshirë të drejtën për të shpallur pavarësinë nga Danimarka përmes një referendumi.

Kryeministri i Grenlandës Mute Egede, ka përsëritur disa herë se ishulli nuk është në shitje dhe se i takon popullit të tij të vendosë për të ardhmen e tij.