Category: Lajme

Në ditën e zgjedhjeve, një furrë në Gjakovë ka përjetuar një rritje të madhe të kërkesave për samuna.

Pronari i furrës, Zekë Temaj, tha për ATV-në se sot ka pasur më shumë klientë se zakonisht, të cilët kanë ardhur për të blerë samuna, një traditë e njohur në këtë qytet.

“Sot ka pas pak më shumë interesim për samuna, ndoshta për shkak të zgjedhjeve. Kur ka lëvizje të mëdha njerëzish, edhe puna jonë shtohet”, u shpreh ai.

Furra, e cila zakonisht nis punën herët në mëngjes dhe vazhdon deri në orët e pasdites, ka qenë e angazhuar për të përmbushur kërkesën e shtuar të qytetarëve që, pas votimit, nuk kanë harruar të ndalen për të marrë samuna të freskëta. /atvlive.tv

Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:

Deputeti i Bundestagut gjerman, Michael Roth, ka shkruar për zgjedhjet që po mbahen në Kosovë.

“Kosova tani është një nga shtetet më ambicioze në Ballkanin Perëndimor në rrugën e saj drejt anëtarësimit në BE. Në të njëjtën kohë, asnjë vend tjetër nuk e ka kaq të vështirë, sepse disa njerëz e mohojnë sovranitetin e tij. Sot është dita për të zgjedhur demokracinë dhe shtetin e së drejtës. Thuaj jo nacionalizmit dhe urrejtjes”, ka shkruar deputeti gjerman në ‘X’.

Presidentja e Kosovës, Vjosa Osmani ka mbërritur në qendrën e votimit në Fakultetin Teknik për të votuar në zgjedhjet e sotme parlamentare.

Për shkak të numrit të madh të votuesve ajo vendosi të pres në radhë për ta shfrytëzuar të drejtën e saj demokratike.

Kryetari i NISMA Socialdemokrate, Fatmir Limaj ka votuar në shkollën fillore “Faik Konica”, në Prishtinë.

Limaj tha se sot një ditë e rëndësishme për demokracinë në Kosovë. Ai theksoi se duhet që të jemi krenar për demokracinë funksionale.

“Sot është një dite e rëndësishme për demokracinë kosovare. Ne, çdo qytetar i Kosovës jemi krenar që kemi një demokraci funksionale, ku respekton rregullat dhe ligji. Një demokraci ku qytetaria vjen lirshëm pas një fushate të përbashkët. Sot qytetarët do të japin drejtim për katër vjet Kosovës nga do ta qojnë”, tha ai.

Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:

Një mërgimtar nga Zvicra ka udhëtuar drejt Kosovës për të marrë pjesë në zgjedhjet parlamentare, duke shprehur shqetësimin e tij për mundësinë e manipulimit të votës.

“Kam pasë mundësi të votoj nga ambasada, por frika e manipulimit më bëri të vij personalisht për të votuar”, tha ai për ATV-në.

Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:

Kryetari i Partisë Demokratike të Kosovës, Memli Krasniqi, ka hedhur votën e tij në shkollën “Hasan Prishtina”.

Ai ishte i shoqëruar edhe nga bashkëshortja e tij Meliza Krasniqi.

Krasniqi ka ftuar të gjithë qytetarët që të dalin në votime për të zgjedhur kryetarin e ri të komunës.

“Unë jam udhëheqës i opozitës, por sot këtu para së gjithash jam banor i Prishtinës dhe ky obligim qytetar dhe kjo botë bëhet si qytetar i Prishtinës që e dëshiron më të mirën e vendit të tij, duke shpresuar që qytetarët të shfrytëzojë të drejtën e tyre dhe të zgjedhin kandidatin që besojnë”.

“Këto zgjedhje janë për qytetarët para së gjithash dhe jo për politikanët, andaj shpresoj të jemi në një ditë të mirë ku demokracia të fitojë”, tha Krasniqi.

Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:

Kryesuesi i Komisionit Qendror të Zgjedhjeve, Kreshnik Radoniqi, ka përdorën të drejtën e votës në një qendër në Pejë.

Po ashtu Radoniqi ka dhënë edhe informacione rreth votimit në diasporë, po ashtu ai ka bërë thirrje për një proces të qetë e demokratik.

“Dje është votuar në diasporë. Procesi në diaspora ka shkuar për së mbari, pa asnjë problem. Të gjithë të interesuarit kanë votuar. Tashmë i kemi të dhënat edhe për Amerikë e Kanada. Diku mbi 15 mijë kanë votuar diasporë në në përfaqësi diplomatike. Për sot çdo gjë është gati. KQZ-ja është në detyrë e shpresojmë për një ditë festive” – tha Radoniqi pasi votoi në Pejë.

ATV mëson se një incident ka ndodhur në një qendër votimi në Podujevë, ku një person është arrestuar pasi fotografoi një votues dhe më pas sulmoi zyrtarët policorë.

Ngjarja ndodhi në shkollën fillore “Xheladin Rekaliu” rreth orës 07:40, menjëherë pas hapjes së vendvotimeve.

Sipas drejtoreshës së shkollës, Arjeta Bashota, situata eskaloi kur policia kërkoi fshirjen e fotografive dhe njëri nga të përfshirët u bë agresiv, duke sulmuar forcat e rendit.

Si pasojë e incidentit, dy zyrtarë policorë kanë pësuar lëndime, ndërsa i dyshuari u neutralizua dhe u arrestua nga policia. Hetimet për rastin po vazhdojnë. /atvlive.tv

Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë: