Author: G.O.

Administrata e presidentit amerikan, Donald Trump, ka pezulluar terminet për viza për aplikantët në mbarë botën.

Vendimi është pjesë e një fushate të vazhdueshme të Qeverisë amerikane për ashpërsimin e politikave të emigracionit gjatë mandatit të dytë të udhëheqësit republikan në Shtëpinë e Bardhë, transmeton Radio Evropa e Lirë.

Një zëdhënës i Departamentit amerikan të Shtetit tha se ka nisur një iniciativë për trajnimin e stafit në të gjitha ambasadat dhe konsullatat amerikane në mbarë botën dhe se terminet për shërbimet e vizave do të përshtaten për t’iu mundësuar punonjësve pjesëmarrjen në trajnim.

Trump ka ndjekur një politikë për dëbimin e emigrantëve dhe ashpërsimin e politikave të emigracionit, e cila përfshin revokimin e vizave dhe vizës së njohur si Green Card, si dhe refuzimin e aplikimeve për një sërë arsyesh, përfshirë qëndrimet politike dhe protestat propalestineze kundër fushatës ushtarake të Izraelit, aleatit të SHBA-së, në Gazë.

Ai argumenton se kjo fushatë synon përmirësimin e sigurisë së brendshme. Megjithatë, masat e ndërmarra nga administrata amerikane janë përballur me disa pengesa ligjore.

Ditë më parë, një gjykatë në SHBA rrëzoi një vendim të administratës Trump që pezullonte lëshimin e vizave për migrantët nga 75 shtete – përfshirë nga Kosova – duke thënë se një politikë e tillë përbënte tejkalim të kompetencave ligjore të sekretarit amerikan të Shtetit, Marco Rubio.

Departamenti i Shtetit nuk dha detaje për trajnimin që do të realizojë apo edhe afatet se kur do të mbahet, vetëm tha se ky trajnim synon t’i ndihmojë zyrtarët konsullorë të përjashtojnë aplikantët që vlerësohet se mund të bëhen të varur nga përfitimet publike në SHBA, si dhe të sigurojë që vlerësimi i aplikantëve për viza të bëhet “në mënyrë gjithëpërfshirëse dhe të njëtrajtshme”.

Pezullimi i termineve për viza u raportua fillimisht nga Financial Times, që tha se aplikantët për viza imigruese që kishin intervista të caktuara në ambasadat dhe konsullatat amerikane kishin pranuar email-e ku njoftoheshin se takimet e tyre po riplanifikoheshin dhe se do të njoftoheshin më vonë për një datë të re.

Trump gjatë fushatës presidenciale për mandatin e dytë në Shtëpinë e Bardhë premtoi se do të dëbonte miliona migrantë pa dokumente dhe administrata e tij ka ndërmarrë një sërë veprimesh që kur ai u kthye në Shtëpinë e Bardhë, masa që synojnë përshpejtimin e dëbimeve dhe uljen e numrit të kalimeve të paligjshme kufitare./REL

Një grua dyshohet se në vazhdimësi ka pësuar dhunë psikike dhe fizike nga bashkëshorti i saj.

Sipas raportit 24 orësh të Policisë së Kosovës bëhet e ditur se ngjarja ka ndodhur më 20.08.2026 rreth orës 23:00, në Skenderaj.

Tutje bëhet e ditur se viktima pas trajtimit mjekësor bashkë me fëmijët është dërguar në strehimore, ndërsa i dyshuari është sjellë në stacion dhe pas intervistimit është liruar në procedurë të rregullt.

“Skenderaj / 20.08.2026 – 23:00. Dyshohet (raportohet 25.08.2026) se në vazhdimësi viktima f/k ka pësuar dhunë psikike dhe fizike nga bashkëshorti i saj i dyshuari m/k. Viktima pas trajtimit mjekësor bashkë me fëmijët është dërguar në strehimore, ndërsa i dyshuari është sjellë në stacion dhe pas intervistimit, me urdhër të prokurorit është liruar në procedurë të rregullt”, thuhet në raport. /Telegrafi/

Irani dhe Omani kanë rënë dakord për krijimin e një korridori të përkohshëm lundrimi në Ngushticën e Hormuzit, pas një takimi në Teheran mes ministrit të Jashtëm të Omanit, Badr al-Busaidi, dhe homologut të tij iranian, Abbas Araghchi.

Në një deklaratë të përbashkët, dy vendet, të vendosura në anët e kundërta të kësaj ngushtice strategjike, njoftuan se kuadri i propozuar përfshin një rrugë të përbashkët të përkohshme për trafikun e anijeve, si dhe angazhimin për pastrimin e minave nga rruga ujore.

Deklarata shtoi se negociatat teknike do të vazhdojnë, me synimin për krijimin e një korridori të përhershëm detar dhe arritjen e një marrëveshjeje mbi administrimin e ardhshëm të ngushticës.

Zëvendësministri i Jashtëm iranian, Kazem Gharibabadi, deklaroi për televizionin shtetëror se është arritur një mirëkuptim për një rrugë të përkohshme, përmes së cilës trafiku nga Gjiri i Omanit drejt Gjirit Persik do të kalojë tërësisht nëpër ujërat iraniane, ndërsa rruga dalëse do të kalojë pjesërisht nëpër ujërat iraniane dhe pjesërisht në ujërat territoriale të Omanit.

Ai shtoi se negociatat pritet të zgjasin nga 30 deri në 60 ditë, me synimin për të arritur një marrëveshje për një rrugë të re të përhershme dhe të qëndrueshme.

Ngushtica e Hormuzit ka qenë një pikë kyçe e tensioneve në rajon. Para se Shtetet e Bashkuara dhe Izraeli të sulmonin Iranin më 28 shkurt, rreth një e pesta e naftës së tregtuar globalisht kalonte përmes kësaj rruge ujore.

Ende nuk dihet nëse Uashingtoni do ta pranojë marrëveshjen e re të arritur mes Teheranit dhe Muskatit.

Ndërkohë, presidenti iranian dhe zyrtarë të tjerë të lartë kanë zhvilluar bisedime me një delegacion pakistanez, i cili u largua nga Teherani të martën pas diskutimeve për ringjalljen e negociatave që synojnë t’i japin fund konfliktit mes Iranit dhe SHBA-së, sipas ushtrisë pakistaneze.

Çmimet maksimale të lejuara për shitjen e derivateve të naftës kanë pësuar ndryshime sot, krahasuar me një ditë më parë.

Sipas vendimit të Ministrisë së Industrisë, Ndërmarrësisë, Tregtisë dhe Inovacionit (MINT), çmimi maksimal i naftës (dizelit) sot është 1.78 euro për litër, nga 1.79 euro sa ishte dje.

Ndërkohë, benzina sot mund të shitet deri në 1.54 euro për litër, duke u rritur nga 1.53 euro sa ishte më 25 gusht.

Edhe çmimi maksimal i gazit ka shënuar rritje, nga 0.62 euro në 0.63 euro për litër.

Çmimet e reja kanë hyrë në fuqi sot në orën 10:00.

Qendra Emergjente e Qendrës Klinike Universitare të Kosovës (QKUK) ka ofruar 331 shërbime emergjente për qytetarët gjatë 24 orëve të fundit.

Sipas njoftimit të QKUK-së, fluksi i pacientëve në Qendrën Emergjente vazhdon të jetë i njëjtë, ndërsa rastet janë trajtuar në njësitë përkatëse.

Në Reanimim janë trajtuar 79 pacientë, në Emergjencën Internistike 111 pacientë, në Emergjencën Kirurgjike 56 pacientë, ndërsa në Emergjencën Ortopedike 62 pacientë.

Ndërkaq, në Sallën e Vogël janë trajtuar 23 pacientë, të cilëve u janë ofruar shërbime për qepje, përpunim dhe pastrim të plagëve.

Në mesin e rasteve të trajtuara janë evidentuar edhe 3 persona të përfshirë në përleshje fizike, si dhe 25 persona të lënduar si pasojë e aksidenteve në trafik.

“Me angazhim, përkushtim dhe përgjegjësi, puna në Qendrën Emergjente po vazhdon pandërprerë, me qëllim që çdo pacient të marrë kujdesin dhe shërbimin e nevojshëm në kohën e duhur”, thuhet në njoftimin e QKUK-së.

Gjatë 24 orëve të fundit janë realizuar edhe 36 pranime për trajtim në klinika të ndryshme të QKUK-së.

Deputetja e PDK-së, Blerta Deliu-Kodra, ka deklaruar se 16 shtatori po afrohet dhe se me afrimin e kësaj date ndihet gjithnjë e më shumë pesha e saj.

Ajo ka thënë se në Hagë pritet të shpallet aktgjykimi ndaj Hashim Thaçit, Kadri Veselit, Rexhep Selimit dhe Jakup Krasniqit, duke theksuar se barrën kryesore të këtij procesi prej vitesh e kanë bartur familjet e tyre.

Sipas Deliu-Kodrës, procesi ka prekur edhe bashkëluftëtarët, PDK-në dhe shoqërinë në Kosovë.

“Nuk e dimë çfarë do të sjellë ajo ditë, por e dimë se pas saj shumëçka nuk do të jetë njësoj”, ka deklaruar ajo.

Deliu-Kodra ka vlerësuar se Kosova po i afrohet këtij momenti të ndjeshëm pa institucione të konsoliduara, me Kuvend jofunksional dhe në një krizë të vazhdueshme politike.

Ajo ka kërkuar që në një periudhë të tillë shteti të ketë institucione funksionale, përgjegjësi dhe maturi, si dhe një zë institucional që, sipas saj, ta përfaqësojë Kosovën me dinjitet.

Postimi i saj i plotë:

“Pas 16 shtatorit, as Kosova dhe as PDK-ja nuk do të jenë krejt të njëjta”, ka thënë Deliu-Kodra.16 shtatori po afrohet dhe, sa më shumë afrohet, aq më shumë e ndiejmë peshën e asaj date.

Në Hagë do të shpallet aktgjykimi ndaj Hashim Thaçit, Kadri Veselit, Rexhep Selimit dhe Jakup Krasniqit. Prej vitesh, barrën më të rëndë të këtij procesi e kanë bartur familjet e tyre, por ai ka prekur edhe shumë më gjerë: bashkëluftëtarët, PDK-në dhe gjithë Kosovën.

Nuk e dimë çfarë do të sjellë ajo ditë, por e dimë se pas saj shumëçka nuk do të jetë njësoj. Kosova po shkon drejt një momenti kaq të ndjeshëm pa institucione të konsoliduara, me Kuvend jofunksional dhe me një krizë politike që po vazhdon.

Në ditë të tilla, shteti duhet të jetë aty. Duhet të ketë institucione që funksionojnë, përgjegjësi, maturi dhe një zë që e përfaqëson Kosovën me dinjitet.

Pas 16 shtatorit, as Kosova dhe as PDK-ja nuk do të jenë krejt të njëjta.

Prandaj kemi nevojë për institucione. Jo nesër. Sot.

Ministria e Mbrojtjes ka shpallur konkurs për rekrutimin e personelit profesional, teknik dhe mbështetës që do të angazhohet në Kompleksin për Prodhimin e Municioneve në Jahoc të Gjakovës.

Sipas një njoftimi për media thuhet se ky konkurs përfshin fusha të ndryshme, si: inxhinieri, teknikë, prodhim, mirëmbajtje, kontroll i cilësisë, siguri, logjistikë, si dhe fusha të tjera të nevojshme për funksionimin e kompleksit.

“Përzgjedhja e aplikantëve do të bëhet në përputhje me legjislacionin në fuqi dhe parimet e transparencës, meritokracisë dhe profesionalizmit. Aplikantët e përzgjedhur, para se të angazhohen në detyrë, do të ndjekin trajnimet e nevojshme profesionale. Hapja e këtij konkursi shënon një hap të rëndësishëm drejt funksionalizimit të Fabrikës së Municioneve dhe zhvillimit të kapaciteteve vendore për industrinë e mbrojtjes”.

Tutje në njoftim thuhet se ftohen të gjithë të interesuarit që plotësojnë kriteret për të aplikuar dhe për t’u bërë pjesë e këtij procesi të rëndësishëm.

“Afati për aplikim është nga data 24–30 gusht 2026”.

Aplikimi realizohet duke klikuar në linkun: https://konkursi.rks-gov.net/jobs?servant=4…

Prishtinë – Prokuroria Speciale e Kosovës ka ngritur aktakuzë ndaj 21 personave, të cilët i akuzon për krime lufte kundër popullsisë civile shqiptare në Reçak, më 15 janar 1999.

Sipas aktakuzës, të pandehurit, si pjesëtarë të forcave policore dhe ushtarake serbe, dyshohet se në bashkëkryerje morën pjesë në një operacion gjatë të cilit u vranë 42 civilë të Reçakut.

Sipas Prokurorisë, operacioni nisi rreth orës 06:00, me granatimin e fshatit nga pozicionet “Pishat”, “Gështenjat”, “Çesta” dhe “Guri i Shpumës”. Më pas, forcat serbe dyshohet se hynë në fshat me automjete të blinduara dhe nisën kontrollimin e shtëpive.

Në aktakuzë përshkruhen edhe raste konkrete të vrasjeve. Sipas Prokurorisë, në oborrin e shtëpisë së Rashit Rashit u vra Banush Kameri, ndërsa pretendohet se më pas atij iu pre koka.

Në vendin e quajtur “Vrella”, sipas aktakuzës, u vranë Haki Metushi, Sabri Syla dhe Arif Metushi. Ndërsa në oborrin e shtëpisë së tij u vranë Ahmet Mustafa dhe fqinji i tij, Hajriz Jakupi.

Prokuroria përshkruan edhe vrasjen e Skender Halilit dhe Hanumshahe Mujotës, ndërsa gjatë largimit të disa civilëve drejt malit, pretendohet se policia serbe hapi zjarr ndaj tyre, duke vrarë Halim, Riza dhe Zenel Beqirin. Në këtë rast, sipas aktakuzës, u plagosën Aziz, Zuhra dhe Fetije Beqiri.

Operacioni, sipas Prokurorisë, vazhdoi edhe në lagjen “Emini”, ku Ismet Emini u plagos në këmbë, ndërsa vëllai i tij, Ajet Emini, u vra.

Në aktakuzë pretendohet se gjatë operacionit në Reçak civilët u vranë, u keqtrajtuan dhe u torturuan, ndërsa u shkatërruan prona dhe u dëbuan banorët shqiptarë. Sipas Prokurorisë, rreth 20 mijë civilë nga Reçaku dhe fshatrat përreth u dëbuan.

Rasti po trajtohet në Departamentin Special të Gjykatës Themelore në Prishtinë, ndërsa ndaj 21 të pandehurve është kërkuar zhvillimi i procedurës në mungesë.

Të gjitha të dhënat për vrasjet dhe veprimet e të pandehurve janë pretendime të Prokurorisë të paraqitura në aktakuzë. Fajësia e tyre duhet të vërtetohet përmes një vendimi gjyqësor.