ATV

Author: G.O.

  • Anulohet seanca e caktuar për sot në rastin Pjetër Shala, gjykimi rinis më 19 maj

    Anulohet seanca e caktuar për sot në rastin Pjetër Shala, gjykimi rinis më 19 maj

    Seanca e paracaktuar më 5 maj në rastin e Pjetër Shalës është anuluar dhe se gjykimi ndaj tij pritet të vazhdojë më 19 maj 2023.

    Kjo është bërë e ditur në faqen zyrtare të Dhomave të Specializuara të Kosovës (DhSK), raporton ‘‘Betimi për Drejtësi’’.

    ‘‘Pas vendimit gojor të Trupit Gjykues, gjykimi ndaj Pjetër Shalës përfundoi për ditën e sotme, ndërsa seanca e caktuar për nesër (më 5 maj) anulohet. Gjykimi do të rinis të premten, më 19 maj, në orën 09:30’’, thuhet në njoftimin e DhSK-së.

    Ndryshe, gjatë seancës së ditës së sotme, trupi gjykues i udhëhequr nga gjykatësja Mappie Veldt-Foglia gjatë seancës së të enjtes, ka nxjerrë pesë urdhra me gojë dhe ka paraqitur kalendarin për këtë çështje deri në janar të vitit 2024.

    Më 25 prill, Shala e ka dorëzuar dosjen paraprake për gjykimin që po zhvillohet ndaj tij.

    Ndryshe, gjatë muajit shkurt ka filluar gjykimi ku më 21 shkurt Prokuroria dhe mbrojtja e viktimave kanë paraqitur deklaratat e tyre hyrëse, kurse më 22 shkurt janë dëgjuar deklaratat hyrëse të mbrojtjes së Pjetër Shalës, si dhe deklarata pa betim e tij.

    Në mars ka filluar paraqitja e provave të Prokurorisë, ku deri më tani janë dëgjuar gjashtë dëshmitarë.

    Dëshmitari i parë ka filluar dëshminë e tij më 27 mars dhe e ka përfunduar më 28 mars, dëshmitarja e dytë ka filluar dëshminë më 28 mars dhe e ka përfunduar më 29 mars, dëshmitari i tretë ka filluar më dëshminë më 29 mars dhe e ka përfunduar më 30 mars, në të njëjtën ditë me dëshmitarin e katërt.

    Kurse, dëshmitari i pestë e filloi dëshminë më 1 maj, ndërsa e përfundoi më 2 maj, ku edhe filloi dëshmia e dëshmitarit të gjashtë, e cila përfundoi më 3 maj.

    Këta dëshmitarë ishin paraparë të dëgjoheshin për pesë seanca, por meqë të njëjtit kanë përfunduar dëshmitë për katër ditë, seanca e 31 marsit 2023 nuk është mbajtur.

    Ndryshe, Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës, raporton “Betimi për Drejtësi”.

    Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

    “Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.

  • Tetë të vrarë nga të shtënat masive në disa fshatra të Serbisë

    Tetë të vrarë nga të shtënat masive në disa fshatra të Serbisë

    Së paku tetë persona u vranë dhe disa të tjerë u plagosën nga të shtënat masive që ndodhën në disa fshatra të Mlladenovcit, në territorin e qytetit të Beogradit, njofton Radio Televizioni i Serbisë (RTS).

    Ministria e Punëve të Brendshme e Serbisë nuk iu përgjigj kërkesës së REL për koment të menjëhershëm.

    RTS raporton se të shtënat ndodhën në fshatrat Dubona, Mallo Orashje dhe Shepshin dhe se kërkimet për sulmuesin janë duke vazhduar.

    Sipas disa mediave lokale, sulmuesi, 21 vjeç, qëlloi mbi njerëz me një armë automatike, pasi pati një debat me një oficer të policisë, në një park në fshatin Dubona.

    Tre nga të plagosurit iu nënshtruan trajtimit urgjent mjekësor në një spital lokal, raportojnë korrespondentët e REL në terren.

    Instituti për Transfuzion të Gjakut në Serbi i tha REL-it se Ministria e Shëndetësisë u ka bërë thirrje qytetarëve që të dhurojnë gjak.

    Ministri i Brendshëm i Serbisë, Bratisllav Gashiq, e cilësoi incidentin si “akt terrorist”, shkruan portali serb i lajmeve, Telegraf.

    Forcat e xhandarmërisë me armë të gjata dhe patrulla të shumta policore janë në terren.
    Ministrja e Shëndetësisë e Serbisë, Danica Grujiçiç, dhe shefi i Shërbimit të Zbulimit, Aleksandar Vulin, raportohet se kanë udhëtuar në zonë.

    Këto janë të shtënat e dyta masive që ndodhën në Serbi këtë javë.

    Të mërkurën, një djalë 13 vjeç dyshohet se vrau tetë nxënës dhe një rojë të sigurisë në një shkollë në qendër të Beogradit.

    Sekretarja e përgjithshme e Këshillit të Evropës, Marija Pejçinoviq Buriq, shkroi në reagimin e saj në Twitter se “është tronditur nga të shtënat e tjera masive në Serbi”.

    “Mendimet e mia janë me viktimat, familjet e tyre dhe autoritetet në Serbi”, tha ajo.

    Të shtënat masive janë relativisht të rralla në Serbi, por zotërimi i armëve në vend është ndër më të lartit në Evropë.

  • Këshilli i Evropës mbush 74 vjet

    Këshilli i Evropës mbush 74 vjet

    Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës.

    Është themeluar më 5 maj 1949 për të arritur një bashkim më të madh midis vendeve anëtare mbi bazën e traditave të tyre të përbashkëta të lirisë politike.

    Ideologët më të mëdhenj të Këshillit të Evropës ishin Winston Churchill, Robert Shuman dhe Konrad Adenauer.

    Këshilli mbron lirinë e shprehjes dhe të mediave, barazinë dhe minoritetet në vendet anëtare.

    Kjo organizatë ka realizuar edhe fushata për mbrojtje të fëmijëve, kundër gjuhës së urrejtjes si dhe për të drejtat e romëve, të cilët përbëjnë komunitetin më të madh në Evropë.

    Këshilli i Evropës u ndihmon vendeve anëtare që të luftojnë korrupsionin dhe terrorizmin si dhe që të kryejnë reformat e duhura gjyqësore.

    Grupi i saj i ekspertëve për Kushtetutë, i njohur si Komisioni i Venecias, ofron këshilla ligjore për shtete të ndryshme në botë.

    Duke qenë organizatë ndërkombëtare, Këshilli i Evropës nuk mund të bëjë ligje, mirëpo ka aftësi të nxisë zbatimin e marrëveshjeve ndërkombëtare, të arritura nga vendet anëtare për tema të ndryshme.

    Dy trupat kyçë të Këshillit janë: Komiteti i Ministrave dhe Asambleja Parlamentare.

    Organizata ka 47 shtete anëtare, mbulon përafërsisht 820 milionë njerëz dhe vepron me një buxhet vjetor prej rreth 500 milionë euro. Këshilli i Evropës është një vëzhgues zyrtar i Kombeve të Bashkuara.

    Ndryshe nga BE, Këshilli i Evropës nuk mund të bëjë ligje detyruese, por ka fuqinë për të zbatuar marrëveshjet ndërkombëtare të përzgjedhura e të arritura nga shtetet evropiane për tema të ndryshme.

    Trupi më i njohur i Këshillit të Evropës është Gjykata Evropiane për të Drejtat e Njeriut, e cila zbaton Konventën Evropiane për të Drejtat e Njeriut.

    Anglishtja dhe frëngjishtja janë dy gjuhët zyrtare të saj.

    Komiteti i Ministrave, Asambleja Parlamentare dhe Kongresi gjithashtu përdorin gjuhën gjermane, italiane, ruse dhe turke për disa nga puna e tyre.

  • BE: Roli i Ekipit Menaxhues përfundon vetëm kur të miratohet statuti

    BE: Roli i Ekipit Menaxhues përfundon vetëm kur të miratohet statuti

    Roli i Ekipit Menaxhues për statutin e Asociacionit të komunave me shumicë serbe në Kosovë përfundon vetëm kur ai statut të miratohet, prandaj, sipas Bashkimit Evropian, vendimi i Qeverisë së Kosovës për ta shkarkuar atë është në kundërshtim me marrëveshjen.

    Kështu ka thënë të enjten në një konferencë për shtyp në Bruksel zëdhënësi i Bashkimit Evropian për politikë të jashtme dhe siguri, Peter Stano, duke u përgjigjur në disa pyetje lidhur me rolin e Ekipit Menaxhues.

    Ministri i Administrimit të Pushtetit Lokal në Qeverinë e Kosovës, Elbert Krasniqi, më 3 maj ka liruar nga detyra anëtarët e Ekipit Menaxhues.

    Ekipi në fjalë, i përbërë nga katër serbë nga Kosova, mori pjesë në takimin e fundit të dialogut në nivel të lartë, ku edhe paraqiti draftin e parë të statutit të Asociacionit të komunave me shumicë serbe, propozim i cili menjëherë u hodh poshtë nga kryeministri i Kosovës, Albin Kurti.

    Për më tepër, Kurti tha se koordinatorja e këtij ekipi, Danijella Vujiçiq, “është në konflikt interesi”, sepse ajo ka dhënë betimin si deputete në Kuvendin e Republikës së Serbisë.

    I pyetur se pjesë e cilit delegacion ishte Ekipi Menaxhues në takimin e fundit, Stano tha se ai ekip mori pjesë “si delegacion më vete” dhe se “ishin ftuar të vijnë dhe t’i bashkohen takimit për një pikë të rendit të ditës”.

    “Ata nuk ishin pjesë e asnjërit delegacion, as të Serbisë e as të Kosovës”, deklaroi Stano.

    Zëdhënësi i BE-së tha se përbërja e këtij ekipi “është në përputhje me marrëveshjen e dialogut”.

    “Palët ishin pajtuar rreth përbërjes së Ekipit Menaxhues. Anëtarët e Ekipit Menaxhues janë propozuar nga Serbia dhe zyrtarisht janë emëruar nga Kosova”, sqaroi Stano.

    Sipas BE-së, tha Stano, “marrëveshjet e dialogut qartë thonë se ekipet menaxhuese duhet të ekzistojnë derisa të miratohet statuti i Asociacionit”.

    “Ekipi Menaxhues propozoi dhe paraqiti draftin e parë, që do të thotë se nisën procesin e jo që procesi mori fund. Prandaj, vendimi për ta shkarkuar Ekipin Menaxhues shkel tekstin dhe frymën e marrëveshjes”, theksoi Stano.

    Pati edhe disa pyetje të gazetarëve rreth asaj se deri kur mund të vazhdohet në këtë mënyrë dialogu, me refuzime të njëpasnjëshme të palëve.

    “Jeta është e vështirë, e dialogu është edhe më i vështirë”, u përgjigj zëdhënësi i BE-së duke përsëritur se arritja e marrëveshjes është e domosdoshme që palët të ecin para në procesin e integrimit evropian dhe se, në rast të dështimit, do të ketë pasoja, përfshirë edhe ato financiare.

    Në pyetjen se a mund të thuhet se ekziston marrëveshja në tërësi, pasi presidenti i Serbisë, Aleksandar Vuçiq, ka përsëritur se ai “ia ka bërë të qartë BE-së se nuk do t’i zbatojë të gjitha pikat e marrëveshjes”, Stano ritheksoi se “Marrëveshja ekziston“ dhe se “përfaqësuesi i lartë, Joseph Borrell, e ka bërë të qartë se “Deklarata e lëshuar nga BE-ja, është parë dhe është pranuar edhe nga presidenti i Serbisë, Aleksandar Vuçiq, edhe nga kryeministri i Kosovës, Albin Kurti, dhe nga kjo buron edhe obligimi i palëve për ta zbatuar”.

    Ky zëdhënës i Bashkimit Evropian përmendi edhe Deklaratën për të Zhdukurit si dëshmi të progresit në dialog dhe shprehu bindjen e Bashkimit Evropian se palët do të punojnë për ta zbatuar këtë marrëveshje dhe për të zbuluar fatin e personave të zhdukur gjatë luftës.

    Kosova dhe Serbia kanë arritur marrëveshje për formimin e Asociacionit në vitin 2013, ndërsa për parimet e tij janë dakorduar në vitin 2015.

    Në vitin 2016, Ministria e atëhershme e Administrimit të Vetëqeverisjes Lokale në Kosovë ka emëruar Ekipin Menaxhues për hartimin e draft-statutit.

    Por, marrëveshja për Asociacion nuk është zbatuar kurrë, për shkak të këmbënguljes së Beogradit që ai të ketë kompetenca të gjera. Prishtina i ka refuzuar ato, me arsyetimin se mund ta kërcënojnë funksionalitetin e shtetit./REL/

  • Dështon gjykimi ndaj 29 të akuzuarve për pastrim parash dhe bixhoz të paligjshëm

    Dështon gjykimi ndaj 29 të akuzuarve për pastrim parash dhe bixhoz të paligjshëm

    Në mungesë të të akuzuarit Burim Sadikut, ka dështuar të mbahet gjykimi ndaj 29 të akuzuarve për pastrim të parave dhe organizim të skemave piramidale e bixhozit të paligjshëm.

    Bashkë me Sadikun po akuzohen edhe Safet Kyqyku, Armend Danqeli, Ardian Kuqi, Zenun Zenuni, Besnik Aliu, Burim Bytyqi, Blerim Blakaj, Flakron Maqani, Naser Pervetica, Nexhat Ejupi, Nehat Ejupi, Hasan Ejupi, Besim Bllaca, Trimor Dushkaja, Driton Shabani, Arber Hoti, Agron Limani, Blerim Imeri, Petrit Neziri, Avni Berisha, Afrim Rifati, Idriz Jakupi, Istref Veliqi, Sabri Brahimi, Sami Baliu, Ramadan Nebija, Burim Makiqi dhe Bekim Kyqyku, të cilët ngarkohen për kryerjen e veprave penale “Pastrimi i parave”, “Organizimi i skemave piramidale dhe bixhozit të paligjshëm” si dhe për veprën penale “Ndihma”.

    Lidhur me mungesën e të akuzuarit Sadiku, mbrojtësi i tij, avokati Adnan Sadiku tha se i njëjti për shkaqe familjare nuk ka mundur të jetë i pranishëm.

    Po ashtu në këtë seancë nuk ishte i pranishëm as i akuzuari Ejupi, për të cilin kryetari i trupit gjykues, gjykatësi Kujtim Krasniqi tha se mbrojtësi i tij, avokati Gazmend Rexhepi i ka parashtruar gjykatës kërkesë të mbahet gjykimi në mungesë të të mbrojturit të tij dhe ka dhënë arsyet pse nuk prezanton.

    Gjykatësi Krasniqi ka thënë se pasi që mungon i akuzuari Sadiku janë në një situatë tjetër dhe nuk kanë mundësi as me shqyrtuar kërkesën as me vazhduar me seancën.

    Ndërkaq, avokati Rexhepi ka deklaruar se për seancat e radhës i mbrojturi i tij Ejupi do të jetë i pranishëm.

    Gjithashtu nuk ishte i pranishëm as dëshmitari Mentor Meqani për të cilin gjykatësi Krasniqi ka thënë se ftesën e ka pranuar, mirëpo i njëjti nuk është paraqitur.

    Meqenëse nuk kishte kushte për mbajtjen e gjykimit, seancat e radhës janë caktuar për 22 qershor, 19 dhe 20 korrik 2023.

    Gjykatësi Krasniqi ka deklaruar se për seancën e radhës gjykata do të lëshoj urdhëresë për sjellje me shoqërim ndaj të akuzuarit Sadiku dhe dëshmitarit Meqani.

    Të akuzuarit Safet Kyqyku, Armend Danqeli, Ardian Kuqi, Zenun Zenuni, Besnik Aliu, Burim Bytyqi, Blerim Blakaj, Flakron Maqani, Naser Pervetica, Nexhat Ejupi, Nehat Ejupi, Hasan Ejupi, Besim Bllaca, Trimor Dushkaja, Driton Shabani, Burim Sadiku, Arber Hoti, Agron Limani, Blerim Imeri, Petrit Neziri, Avni Berisha, Afrim Rifati, Idriz Jakupi, Istref Veliqi, Sabri Brahimi, Sami Baliu, Ramadan Nebija, Burim Makiqi dhe Bekim Kyqyku po përballen me akuzat e Prokurorisë Speciale të Republikës së Kosovës (PSRK), për kryerjen e veprave penale “Pastrimi i parave”, “Organizimi i skemave piramidale dhe bixhozit të paligjshëm” si dhe për veprën penale “Ndihma”.

    Sipas aktakuzës së PSKR-së, të ngritur më 27 tetor 2020, thuhet se të pandehurit duke vepruar veç e veç apo në bashkëkryerje, nga data e pacaktuar në vazhdimësi deri më 15 dhjetor 2017, duke vepruar me dashje dhe dijeni, gjithnjë me qëllim që vetit t’i sjellin përfitim të kundërligjshëm të dobisë pasurore, kanë organizuar lojëra të fatit për të cilat nuk ka qenë e dhënë licenca, leja apo koncesioni i organit kompetent. Aty thuhet se me rastin e kontrollimit nga ana e inspektoreve të ATK-së dhe pjesëtareve të PK-së/DHKO, në lokalet poshtëshënuara te të pandehurit janë gjetur dhe konfiskuar automate, për të cilat thuhet se nuk kanë pasur licencë nga organi kompetent apo kanë vepruar në kundërshtim me licencën e dhënë, apo nuk kane pasur leje nga komuna për ushtrimin e asaj veprimtarie.

    Tutje, në aktakuzë thuhet se të akuzuarit Safet Kyqyku, Armend Danqeli, Zenun Zenuni, Besnik Aliu, Burim Bytyqi, Blerim Blakaj po akuzohen se nga koha e papërcaktuar e në vazhdimësi, e deri më 9 qershor 2016, në lokalin e lojërave të fatit “TipSport 365” që gjendet në Prishtinë, i akuzuari Safet Kyqyku duke vepruar në kundërshtim me nenin 69 të Ligjit për Lojëra të Fatit, iu ka mundësuar pjesëmarrësve të ndryshëm të lojërave të fatit përdorimin e automateve të palicencuara të tipit “Kayot”, për të cilën veprimtari po ashtu nuk ka poseduar leje pune nga Komuna e Prishtinës.

    Aty thuhet se nga koha e papërcaktuar e në vazhdimësi, e deri më 8 tetor 2016, në lokalin e lojërave të fatit “TipSport 365” që gjendet në Rahovec, i akuzuari duke vepruar në kundërshtim me nenin 69 të Ligjit për Lojëra të Fatit iu ka mundësuar pjesëmarrësve të ndryshëm të lojërave të fatit përdorimin e tri automateve, të cilat ishin të licencuara për lokacionin në Suharekë dhe atë tre aparateve të tipit “Kayot”, si dhe thuhet se nuk kanë pasur leje pune nga komuna.

    Tutje, thuhet se nga koha e papërcaktuar e në vazhdimësi, e deri më 10 shkurt 2017, në lokalin e lojërave të fatit “TipSport 365” që gjendet në Mitrovicë, duke vepruar në kundërshtim me nenin 69 të Ligjit për Lojëra të Fatit, iu ka mundësuar pjesëmarrësve të ndryshëm të lojërave të fatit përdorimin e tetë aparateve të tipit “Kayot” dhe “Admiral”, si dhe thuhet se nuk kanë pasur leje pune nga komuna.

    Aty thuhet se nga koha e papërcaktuar e në vazhdimësi, e deri më 10 shkurt 2017, në lokalin e lojërave të fatit “TipSport 365” që gjendet në Mitrovicë, duke vepruar në kundërshtim me nenin 69 të Ligjit për Lojëra të Fatit, iu ka mundësuar pjesëmarrësve të ndryshëm të lojërave të fatit përdorimin e tetë aparateve të tipit “Kayot” dhe “Admiral”, si dhe thuhet se nuk kanë pasur leje pune nga Komuna.

    Në aktakuzë thuhet se të akuzuarit Safet Kyqyku dhe Armend Danqeli koha e papërcaktuar e në vazhdimësi, e deri më 10 shkurt 2017, në lokalin e lojërave te fatit “TipSport 365” që gjendet në Prizren, i cili lokal ishte i mbyllur nga ATK-ja, më 18 tetor 2016 të akuzuarit e kishin rihapur përsëri, të cilët duke vepruar në bashkëkryerje iu kanë mundësuar pjesëmarrësve të ndryshëm të lojërave të fatit përdorimin e 11 aparateve.

    Sipas aktakuzës, i akuzuari Armend Danqeli në kohë të papërcaktuar e në vazhdimësi, e deri më 6 prill 2016, në lokalin e lojërave të fatit “TipSport 365” që gjendet në Prizren, pas rihapjes ka vazhduar ushtrimin e lojërave të fatit edhe pse nuk plotësoheshin kushtet kërkuara për ushtrimin e lojërave të fatit automate, ndërkohë qe leja nga ATK është lëshuar vetëm për baste, ashtu që bashkë me të lartpërmendurit u kanë mundësuar pjesëmarrësve të ndryshëm të lojërave të fatit përdorimin e 10 automateve.

    Tutje, thuhet se koha e papërcaktuar e në vazhdimësi, të akuzuarit e lartcekur në lokalin e lojërave te fatit “TipSport 365”, duke vepruar në bashkëkryerje, iu kanë mundësuar pjesëmarrësve të ndryshëm të lojërave të fatit përdorimin e 12 aparateve.

    Me këto veprime, të lartpërmendurit akuzohen se kanë kryer veprën penale “Organizimi i skemave piramidale dhe bixhozit të paligjshëm” nga neni 300, paragrafi 2 lidhur me nenin 82 të KPRK-së.

    Tutje sipas aktakuzës, i pandehuri Aridian Kuqi duke vepruar me dashje dhe dijeni ka ndihmuar të pandehurin Armend Danqeli, pronar i biznesit “Euro Garne”, në kryejnë e veprës penale të përshkruar te diapozitivi i parë i kësaj aktakuze, ashtu skukrse edhe të pandehurin Safet Kyqyku si pronar në biznesin “TipSport365”. Aty thuhet se Kuqi iu ka ndihmuar atyre në sigurimin e mjeteve për kryerjen e veprës penale “Organizimi i skemave piramidale dhe bixhozit të paligjshëm”, të cilat biznese në këto pika ushtronin veprimtarin e lojërave të fatit në kundërsulmim me nenin 69 të Ligjit për Lojëra të Fatit.

    Me këtë, ai akuzohet se ka kryer veprën penale “Ndihma” nga neni 33, paragrafi 2 lidhur me veprën penale “Organizimi i skemave piramidale dhe bixhozit të paligjshëm” nga neni 300, paragrafi 2 dhe nenin 81, paragrafi 1, nën paragrafët 1.2, 1.3, 1.4 dhe 1.5 të KPK-së.

    Tutje, sipas aktakuzës, të pandehurit Naser Pervetica si menaxherë të biznesit “Casino-Merkur” dhe Flakron Maqani si pronar në biznesin “Merkur-Kajot” që gjendet në Prishtinë, duke vepruar në kundërshtim me ligjin, iu kanë mundësuar pjesëmarrësve të ndryshëm të lojërave të fatit përdorimin e automatëve lojërave të fatit, të cilat ishin në kundërshtim me licencën e dhënë, si dhe thuhet në atë mënyrë që me rastin e kontrollimit nga ana inspektoreve i janë gjetur dhe konfiskuar këto automate. Për këtë veprimtari thuhet se nuk kishte poseduar as leje pune të lëshuar nga komuna.

    Tutje, në aktakuzë thuhet se të akuzuarit Nexhat Ejupi, Nehat Ejupi, Agron Limani, Trimor Dushkaja, Driton Shabani, Burim Sadiku dhe Arbër Hoti, në lokalin e lojërave të fatit “Lumi Sport”, duke vepruar në bashkëkryerje, iu kanë mundësuar pjesëmarrësve të ndryshëm te lojërave të fatit automate të tipit “Merkur”, si dhe nuk kanë poseduar leje nga komuna.

    Me këto veprime, të njëjtit po akuzohen se në vazhdimësi, në bashkëkryerje, kanë kryer veprën penale “Organizimi i skemave piramidale dhe bixhozit të paligjshëm” nga neni 300 i KPRK-së.

    Sipas aktakuzës, të akuzuarit Blerim Imeri, Petrit Neziri, Avni Berisha, Afrim Rafati, Idriz Jakupi, në lokalin e lojërave të fatit “Matriks”, duke vepruar në bashkëkryerje, iu kanë mundësuar pjesëmarrësve të ndryshëm të lojërave të fatit automate të tipit “Merkur”, si dhe nuk kanë poseduar leje nga komuna.

    Me këto veprime, të njëjtit po akuzohen se në vazhdimësi, në bashkëkryerje, kanë kryer veprën penale “Organizimi i skemave piramidale dhe bixhozit të paligjshëm” nga neni 300 i KPRK-së.

    Në aktin akuzues thuhet se të akuzuarit Sabri Brahimi dhe Istref Veliqi, në lokalin e lojërave të fatit “Game Plus”, duke vepruar në bashkëkryerje, iu kanë mundësuar pjesëmarrësve të ndryshëm të lojërave të fatit automate të tipit “Merkur”, si dhe nuk kanë poseduar leje nga komuna.

    Me këto veprime, të njëjtit po akuzohen se në vazhdimësi, në bashkëkryerje, kanë kryer veprën penale “Organizimi i skemave piramidale dhe bixhozit të paligjshëm” nga neni 300 i KPRK-së.

    Po ashtu, të akuzuarit Nexhat Ejupi, Nehat Ejupi, Hasan Ejupi, Safet Kyqyku, Sami Baliu, Burim Bytyqi, Petrit Neziri, Armend Danqeli, Ramadan Nebija, Flakron Maqani, Burim Makiqi dhe Bekim Kyqyku akuzohen se nga koha e pa caktuar përmes llogarive të bizneseve të tyre apo llogarive personale, duke vepruar veç e veç, kanë bërë pastrimin e parave të fituara me veprën penale organizim i skemave piramidale dhe bixhozit të paligjshëm duke ju mundësuar pjesëmarrësve të ndryshëm të lojërave të fatit përmes automatëve, monitorëve dhe pajisjeve të tjera kompjuterike.

    Me këto veprime, ata akuzohen se në bashkëkryerje kanë kryer veprën penale “Pastrimi i parave” nga neni 308 i KPRK-së dhe nenit 56 të Ligjit mbi Parandalimin e Pastrimit të Parave dhe Luftimin e Terrorizmit, lidhur me veprën penale “Organizimi i skemave piramidale dhe bixhozit të paligjshëm”. /BetimipërDrejtësi

  • ShKK-ja largon nga puna një mbikëqyrës në burgun e Dubravës, dyshohet për keqpërdorim detyre dhe ryshfet

    ShKK-ja largon nga puna një mbikëqyrës në burgun e Dubravës, dyshohet për keqpërdorim detyre dhe ryshfet

    Shërbimi Korrektues i Kosovës, njoftoi se e ka larguar nga puna një mbikëqyrës në Qendrën Korrektuese të Dubravës.

    “Shërbimi Korrektues i Kosovës njofton opinionin publik se ka larguar nga puna, Sh.G, Mbikëqyrës në Qendren Korrektuese të Dubravës”, thuhet në njoftim.

    Sipas ShKK-së ai dyshohet për keqpërdorim të detyrës zyrtare dhe marrje të ryshfetit.

    “Vendimi për largim nga puna është marr nga Komisioni Disiplinor i SHKK-së. Shërbimi Korrektues i Kosovës mbetet i përkushtuar në luftimin e këtyre dukurive negative dhe do të ndërmerr të gjitha veprimet ligjore ndaj secilit individ, i cili është i përfshirë në veprime të tilla korruptive, pavarësisht rolit dhe funksionit që ka”, thuhet mes tjerash në njoftim./atvlive.tv/

  • Të shtëna me armë zjarri në një lokal në Prishtinë, plagoset një person

    Të shtëna me armë zjarri në një lokal në Prishtinë, plagoset një person

    Një person është plagosur sot në Prishtinë nga arma e zjarrit, në një lokal në rrugën “Ahmet Krasniqi”.

    Rastin e ka konfirmuar Flora Ahmeti, zëdhënëse e policisë për rajonin e Prishtinës.

    Ahmeti tha se personi i dyshuar aktualisht ndodhet në arrati, ndërsa personi i lënduar është dërguar për trajtim mjekësor.

    Tutje, ajo theksoi se lidhur me rastin po zhvillohen hetimet dhe po punohet për arrestimin e të dyshuarit.

  • Haxhiu: Me nënshkrimin e deklaratës, Serbia për herë të parë pranon krimet e kryera në Kosovë

    Haxhiu: Me nënshkrimin e deklaratës, Serbia për herë të parë pranon krimet e kryera në Kosovë

    Ministrja e Drejtësisë, Albulena Haxhiu, konsideron se me nënshkrimin e deklaratës për të pagjeturit në Bruksel, Serbia për herë të parë pranon krimet e kryera gjatë luftës në Kosovë.

    “Për herë të parë çështja e personave të zhdukur po trajtohet me prioritet dhe seriozisht nga qeveria e republikës së Kosovës. Nënshkrimi i deklaratës për të zhdukurit e bën Serbinë përgjegjëse për krimin e zhdukjes me forcë të qytetarëve tanë”, tha ajo.

    Haxhiu, në Kuvend, tha se me nënshkrimin e kësaj deklarate Serbia po ashtu obligohet që të japë informacione për varreza masive.

    “Për herë të parë përmes një dokumenti zyrtar Serbia pranon për krimin e bërë dhe obligohet të jap informacione për varreza masive që po i mbanë qytetarët tanë. Po ashtu obligohet të mos pengoj gërmimet siç ka ndodhur në vazhdimësi – me atë deklaratë pranon krimet shtetërore mbi popullin e Kosovës dhe qytetarët tanë”.“Për mua është e papranueshme që një deputet i kuvendit, zonja hoxha thotë që Serbinë nuk e obligon ky dokument, e pranueshme pasi kjo është ajo që Serbia dëshiron të dëgjojë që të mos obligohet nga një deklaratë që e ka nënshkruar presidenti i Serbisë”, u shpreh Haxhiu.

  • Selmanaj: Me dakordimin për personat e zhdukur, Kosova ia mundëson Serbisë të heq përgjegjësinë penale e juridike-shtetërore

    Selmanaj: Me dakordimin për personat e zhdukur, Kosova ia mundëson Serbisë të heq përgjegjësinë penale e juridike-shtetërore

    Deputeti i Lidhjes Demokratike të Kosovës, Driton Selmanaj ka kritikuar kryeministrin e Kosovës për deklaratën rreth personave të zhdukur për të cilën Kurti u dakordua me Vuçiqin në Bruksel.

    Sipas Selmanajt, përmes pajtimit për një deklaratë të tillë, Kosova ia mundëson Serbisë që të heq përgjegjësinë penale juridiko-shtetërore për zhdukjet e dhunshme.

     “Me dakordimin e deklaratës për të zhdukurit, Kosova i mundëson Serbisë që të heq përgjegjësinë penale juridiko-shtetërore për zhdukjet e dhunshme sipas Nenit 2 të Konventës së OKB-së”, ka thënë Selmanaj.

    Deputeti i LDK-së thotë se heqja e fjalisë “të zhdukur me dhunë” tregon se Kurti ka për qëllim tejkalimin dhe jo adresimin e krimeve.

    “Po ua citoj nenin 2. Zhdukje me dhunë konsiderohet çdo arrestim ndalim nga agjentë të shtetit apo grupe personash nën autorizimin e shtetit. Heqja e fjalisë të zhdukur me dhunë rrezikon brutalisht që përmes devijimit të terminologjisë ta konfirmoj që se ka për qëllim adresimin por tejkalimin”, ka shtuar tutej Selmanaj.

  • 26 aktakuza kundër 31 personave, për vepra të ndryshme penale

    26 aktakuza kundër 31 personave, për vepra të ndryshme penale

    Prokurori i Shtetit njofton opinionin publik se gjatë 24 orëve të fundit, janë ngritur njëzet e
    gjashtë (26) aktakuza kundër tridhjetë e një (31) personave, për vepra të ndryshme penale.

    Po ashtu, me urdhër të Prokurorit të Shtetit janë ndaluar dymbëdhjetë (12) persona të dyshuar, janë paraqitur katër (4) kërkesa për caktim të paraburgimit ndaj gjashtë (6) personave të dyshuar se kanë kryer vepra të ndryshme penale, janë bërë dy (2) kërkesa për caktimin e masës së arrestit shtëpiak ndaj tre (3) personave, si dhe është parashtruar një (1) kërkesë për sekuestrim të përkohshëm të sendeve.

    Prokuroria Speciale e Republikës së Kosovës (PSRK), ka ngritur një (1) aktakuzë kundër një (1) personi.

    Prokuroria Themelore në Prishtinë, gjatë 24 orëve të fundit, me urdhër të prokurorit ka ndaluar dy (2) persona, ka paraqitur dy (2) kërkesa për caktimin e masës së paraburgimit ndaj tre (3) personave, dy (2) kërkesa për caktimin e masës së arrestit shtëpiak ndaj tre (3) personave, si dhe ka ngritur njëzet (20) aktakuza kundër njëzetetre (23) personave për vepra të ndryshme penale.
    Prokuroria Themelore në Prizren, gjatë 24 orëve të fundit, pranë gjykatës kompetente ka parashtruar një (1) kërkesë për caktim të paraburgimit ndaj një (1) personi. Ndërsa, nga kjo prokurori janë ngritur tri (3) aktakuza kundër tre (3) personave, për vepra të ndryshme penale.

    Prokuroria Themelore e Pejës gjatë 24 orëve të fundi, ka ndaluar katër (4) persona të dyshuar dhe ka ngritur një (1) aktakuzë kundër tre (3) personave. Prokuroria Themelore në Gjilan, me urdhër të prokurorit, në dy raste të ndara ka ndaluar dy (2) persona, në kohëzgjatje prej 48 orëve dhe ka ngritur një (1) aktakuzë kundër një (1) personi.

    Prokuroria Themelore në Gjakovë, gjatë 24 orëve të fundit, me urdhër të prokurorit kujdestar, ka ndaluar një (1) person në kohëzgjatje prej 48 orësh, për kryerjen veprës penale.

    Prokuroria Themelore në Mitrovicë, gjatë 24 orëve të fundit, ka ndaluar një (1) person të dyshuar. Prokuroria Themelore në Ferizaj, gjatë 24 orëve të fundit, me urdhër të prokurorit kujdestar, ka ndaluar dy (2) persona të dyshuar dhe ka parashtruar një (1) kërkesë për caktimin e masës së paraburgimit kundër dy (2) personave.