Author: G.O.

Kryesuesi i Komisionit Qeveritar për Persona të Zhdukur, Andin Hoti, ka përkujtuar babanë e vet, veprimtarin e Lëvizjes Kombëtare Ukshin Hoti, në 24-vjetorin e zhdukjes.

Hoti, përmes një postimi në Facebook, tha se edhe pse ai nuk arriti të bëhej udhërrëfyes i jetës së të birit, u bë udhërrëfyes i popullit shqiptar.

“Nuk e pata fatin që të bëhesh udhërrëfyes i jetës time, por Ti u bëre udhërrëfyes i fatit të popullit tonë. 24 vjet dhimbje pa ty, 24 vjet me krenarinë që rritet çdo ditë”, ka shkruar Hoti në Facebook.

Kryeministri i Kosovës, Albin Kurti ka theksuar se Strategjia shtetërore për rini do të jetë reforme për politikë bërjen dhe dokument kryesor orientues karshi rinisë.

Sipas Kurtit, të jesh i ri është sfidë në vetvete, për çka shtoi se duhet të zhvillohen politika rinore të cilat ndihmojnë këto grup-mosha.

Kryeministri Kurti gjatë prezantimit të procesit hartues të Strategjisë Shtetërore për Rini 2024-2032 dhe Planit të veprimit 2024-2026, tha se në qendër do të jetë i riu.

“Përmes planifikimit të mirë duam që realizimi të jetë me kohë dhe efektiv. Planifikimi i mirë është veçanërisht i nevojshëm për zhvillimin e rinisë, si një çështje dhe kategori komplekse dhe ndër sektoriale. Takoj të rinj çdo ditë dhe çdonjëri ka ëndrra, mbase po aq sa ka edhe sfida. Të jesh i ri është sfidë në vetvete, prandaj dhe zhvillohen politikat rinore dhe jo le të themi politika për personat në mes-moshë. Edhe pse edhe kjo periudhë i ka krizat e veta. Të jesh i ri është të gjen vetën në tranzicion nga kujdesi familjar në pavarësim. Në këtë fazë i riu në një mënyrë kalon në kujdesin e shtetit që t’i ofrojë një vend pune, qasje në shërbime financiare, një vendbanim të sigurt dhe mundësi për të investuar, kursyer dhe planifikuar të ardhmen. Në këtë fazë, i riu apo e reja po merr vendimet më të rëndësishme”, ka thënë Kurti.

Në këtë fazë, siç tha Kurti, të rinjtë janë shpesh pa punë dhe të atakuar nga presioni dhe përdorues të substancave narkotike. Shefi i ekzekutivit ka theksuar se roli i shtetit është që t’i mbrojnë nga disavantazhet.

“Strategjia shtetërore për rini do të jetë dokumenti kryesor orientues afatgjatë karshi rinisë, ku secila ministri dhe institucion pritet të përcaktojë rolin e vet. Përveçse është strategji e cila na orienton drejt zhvillimit, do të jetë edhe një mjet reforme për politikë bërjen ndër sektoriale karshi rinisë. Në të kaluarën kemi pasur planifikim dhe zbatim të fragmentuar, e zaten kur ka pak planifikim, zbatimi është i fragmentuar, të pa konsoliduar dhe shpesh kontradiktor. Ato që janë deklaruar si prioritete, zakonisht nuk janë financuar dhe buxhetuar, por kjo nuk do të ndodhë më”, ka shtuar Kurti në prezantimin e strategjisë shtetërore për rini.

Kryeministri Kurti ka deklaruar se përmes programit “Super Puna”, janë punësuar mbi dy mijë të rinj.

Tutje, ministri i Kulturës, Rinisë dhe Sportit, Hajrulla Çeku ka thënë se politika e qeverisë për të rinjtë po përjeton transformim.

“Besojmë që ka ardhur koha të ketë planifikim të mirëfilltë, të ketë përfshirje më të madhe ndërinstitucionale dhe të rritet investimi. Investimi tek të rinjtë gjithmonë ka kthim imediat dhe të shumëfishtë…Kemi filluar punën për një dokument strategjik, ku në qendër është jo sektori rinor, por i riu. I riu i cili kërkon punë, kërkon drejtësi, mirëqenie dhe siguri dhe janë institucionet tona që kërkojnë vizion dhe qëndrueshmëri. Strategjia është menduar pikërisht për këtë qëllim, të na tregojë shtegun drejt zhvillimit të qëndrueshëm për të gjithë të rinjtë tanë pa dallim”, ka thënë ai.

Koordinatorja e UNKT-së, Arnhild Spence tha se ky dokument është me rëndësi për hartimin e politikave të reja, duke shtuar se përfshihen edhe nevojat e të rinjve.

“Kam përshtypje shumë të mira për këtë dokument dhe mënyrën se si keni artikuluar këtë në mënyrë shumë konstruktive, për zgjidhje për situatën e të rinjve që janë në Kosovë, nevojat e tyre dhe shpresat e tyre. Me qenë i ri nënkupton të gjitha aspektet e shoqërisë, politikat, të gjitha aspektet ndikojnë në jetën tënde. Jemi përballur me këtë lloj situate, ku diku 50 për qind e njerëzve që jetojnë në Kosovë janë të rinj, çka është një fuqi, i jep potencial të madh këtij vendi. Dhe kjo është në kërcënim, siç e thatë të rinjtë po largohen nga Kosova. Ne nuk e dimë sa, sepse nuk kemi pasur mundësi që të numërojmë njerëzit që largohen nga Kosova që nga viti 2011. Po shpresojmë që përmes këtyre politikave që të arrijmë të adresojmë këto problematika dhe këtë faktor që i motivojnë njerëzit”, ka thënë Spence.

Në prezantimin e sfidave të të rinjve, konsulentja për zhvillim social, Engji Susuri ka treguar të dhënat nga mbi 300 përgjigje të qytetarëve.

Madje ajo ka treguar për sfidat kryesore.

“Kjo është renditja sa i përket sfidave specifike. Numër 1 e kemi shëndetin mendor, për të vijuar më pas me qasjen në arsimin cilësor, numër 3 është qasja në punësim, pastaj kemi ngacmimet seksuale dhe dhunën në bazë gjinore. Në vendin e gjashtë është liria e shprehjes, në vendin e shtatë është përfshirja e personave me aftësi të kufizuara, në vendin e tetë është siguria publike, për të vijuar me cilësinë e punës dhe qasjen në punë praktike”, ka përfunduar Susuri.

Strategjia shtetërore për rini ka për synim përmirësimin e situatës së të rinjve të grup-moshave 15-24 vjeç. Po ashtu, kjo strategji synon të nxitë bashkëpunimin ndërmjet organizatave rinore, veprimtaria e të cilave lidhet me rininë, si dhe ndërmjet organizmave qendrorë dhe atyre komunal për të fuqizuar politikat dhe programet rinore.

Shkruan: Nefail Maliqi, Gjenevë, 16 maj – Kandidati i mbështetur nga presidenti Joe Biden do të marrë frenat e Organizatës Ndërkombëtare për Migracionin me qendër në Gjenevë.

Amerikania Amy Pope, e afërt me presidentin Joe Biden, do të bëhet gruaja e parë që do të drejtojë Organizatën Ndërkombëtare për Migracionin (IOM), në Gjenevë. Me zgjedhjen e saj, Shtetet e Bashkuara treguan forcën e tyre goditëse kundër evropianëve të hënën, njofton gazeta zvicerane në shqip Le Canton27.ch

Kjo grua 49-vjeçare, numri dy në institucion që nga viti 2021, nuk kishte nevojë të drejtohej në një fletëvotim të dytë. Pasi doli e para, ajo mundi të mbështetej në tërheqjen e portugezit në largim Antonio Vitorino, pranë Sekretarit të Përgjithshëm të OKB-së Antonio Guterres dhe u zgjodh me aklamacion.

Evropianët e zemëruar
Shtëpia e Bardhë do të ketë vënë peshën e saj për të rimarrë një mandat të mbushur tradicionalisht nga një shtetas amerikan. Diçka për të mërzitur evropianët.

Të përballur përsëri me një krizë migracioni, zoti Biden dhe sekretari i tij i Eta Antony Blinken thirrën javën e kaluar për të votuar për këtë ish-këshilltar të presidentit.

Në Dhomat e Specializuara të Kosovës në Hagë po vazhdon të dëgjohet edhe sot dëshmia e dëshmitarit të katërt të Zyrës së Prokurorit të Specializuar(ZPS), në gjykimin kundër ish-krerëve të Ushtrisë Çlirimtare të Kosovës.

Dëshmitari i mbrojtur i cili mban kodin 4748 ka filluar të merret në pyetje më 10 maj, ndërsa e gjithë dëshmia e tij ka vijuar në seancë private.

Në rastin ndaj Hashim Thaçit, Kadri Veselit, Jakup Krasniqit e Rexhep Selimit, deri tani kanë përfunduar dëshmitë e tre dëshmitarëve të prokurorisë.

Dëshmia e tyre nuk është bërë e ditur për publikun dhe të njëjtit kanë dëshmuar nën masa mbrojtëse.

Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.

Gjatë krejt kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm.

Presidentja Vjosa Osmani ka konfirmuar së do të marrë pjesë në ceremoninë e inaugurimit të presidentit të ri malazez, Jakov Millatoviq, e cila do të mbahet të shtunën në Podgoricë. Ekonomisti 36-vjeçar, i arsimuar në Perëndim, fitoi zgjedhjet presidenciale në raundin e dytë në Mal të Zi përballë presidentit në largim Milo Gjukanoviq.

Kandidatura e Millatoviq ishte parë me shumë dyshim në Prishtinë pasi ai u mbështet nga partitë pro-serbe dhe pro-ruse, me kryeministrin Albin Kurti që ishte deklaruar publikisht para zgjedhjeve se humbja e Gjukanoviqit do të çonte kombin malazez drejt shuarjes.

Gjithsesi, pas fitores, të paktën publikisht, presidentja Osmani nuk e uroi homologun e saj të ri malazez, ndryshe me sa vepron me liderë të tjerë.

Gjithsesi ajo do të jetë të shtunën në inaugurimin e presidentit Millatoviq, së bashku me presidentët e tjerë të rajonit.

“Në momentin e zgjedhjes së presidentit të ri të Malit të Zi janë ftuar pastaj për ceremoninë e inaugurimit të gjithë presidentët e rajonit. Tashmë kanë konfirmuar pjesëmarrjen shumica dërrmuese prej tyre, përfshirë edhe përfaqësues nga Shtetet e Bashkuara dhe natyrisht si presidente e Republikës së Kosovës e kam bërë konfirmimin në emër të Republikës së Kosovës”, deklaroi Osmani pas pyetjes së KosovaPress.

Presidenti i ri i Malit të Zi, Jakov Millatoviq, pas zgjedhjeve për televizionin “Nova” tha se rruga evropiane e Malit të Zi është e padiskutueshme, dhe se politika e jashtme – bazuar në marrëveshjet e nënshkruara ndërkombëtare – nuk do të ndryshojë.

I pyetur nga gazetarët nëse kjo do të thotë se nuk është reale të pritet tërheqja e njohjes së Kosovës, Millatoviq tha se “kjo është e qartë”.

“Ne mbështesim gjithçka për të cilën do të bien dakord Beogradi dhe Prishtina. Mendoj se normalizimi i marrëdhënieve midis Beogradit dhe Prishtinës është i rëndësishëm për të gjitha vendet në rajon, dhe Mali i Zi dëshiron të jetë një fqinj i mirë që do të promovojë marrëdhënie të mira fqinjësore”, tha Millatoviq.

Ndërsa, për të kthyer përgjigje kryeministrit Kurti, u përkujdes homologu i tij malazez Dritan Abazoviq që deklaroi se kombi malazez jo se nuk do të shuhet por do të jetë edhe më i fuqishëm.

Të martën, një grup aktivistësh organizuan një protestë në Tokio, duke i bërë thirrje Japonisë të braktisë planin e saj për të shkarkuar ujë të kontaminuar nga një termocentral bërthamor i dëmtuar nga cunami i vitit 2011.

Uji, i cili është trajtuar, por vazhdon të jetë radioaktiv, është planifikuar të shkarkohet këtë verë në Oqeanin Paqësor.

“Mos hidhni ujë të kontaminuar në det”, protestuesit brohorisnin jashtë selisë së Tokyo Electric Power Company Holding në Tokio (Kompania Elektrike e Tokios – TEPCO), duke mbajtur pankarta me kërkesat si “mos e bombardoni Paqësorin” dhe “Ndaloni ndotjen e detit”.

Ndërmarrja që operon uzinën e shkatërruar në fatkeqësinë e vitit 2011 në Fukushima pothuajse ka përfunduar ndërtimin e tubacioneve të nevojshme për shkarkimin e sasive masive të ujit.

“Edhe pas trajtimit, ka ende rrezatim në ujë”, tha një aktivist në protestë.

Në mars të vitit 2011, një tërmet dhe cunami dëmtuan sistemet e ftohjes së termocentralit bërthamor Fukushima Daiichi, duke rezultuar në lëshimin e ujit shumë radioaktiv nga tre reaktorë që rrjedhin në bodrumet e ndërtesës.

Ky ujë i ndotur aktualisht po mblidhet, trajtohet dhe ruhet në depozita që zënë një pjesë të madhe të uzinës.

Qeveria dhe TEPCO thonë se tanket duhet të hiqen për të krijuar vend për çaktivizimin e uzinës dhe për të minimizuar rrezikun e rrjedhjeve në rast të një fatkeqësie tjetër.

Plani për shkarkimin e ujit ka hasur në protesta të ashpra nga komunitetet lokale të peshkimit.

Vendet fqinje, duke përfshirë Korenë e Jugut, Kinën dhe vendet ishullore të Paqësorit, kanë shprehur gjithashtu pakënaqësi.

Zyrtarët japonezë janë zotuar se uji do të filtrohet shumë nën nivelet e lejuara ndërkombëtarisht, duke e bërë atë të padëmshëm./REL/

Ministri i Bujqësisë, Pylltarisë dhe Zhvillimit Rural, Faton Peci, tha se Kosova e Austria e kanë një të përbashkët, e që sipas tij, është rruga drejt lirisë, raporton Ekonomia Online.

Në ceremoninë e Themelimit të Shoqatës së Miqësisë Austriako-Kosovare, Peci tha se me themelimin e kësaj shoqate, janë hedhur themelet për partneritet më të begatë në sektorë të ndryshëm ndërmjet dyja vendeve.

Sipas tij, Kosova mund të marrë shembull nga përvoja e Austrinë në shumë sektorë. Peci shtoi se Kosova synon të arrijë në mesin e vendeve e kombeve evropiane, për të vazhduar për të kontribuuar në aspektin ekonomik.

“Duke organizuar ngjarje, konferenca dhe iniciativa të ndryshme, ju keni mbledhur ekspertë e aktorë të ndryshëm të vendimmarrjes nga të gjitha vendet, duke krijuar mundësi për bashkëpunim të mëtutjeshëm. Angazhimi juaj për të ndërtuar ura miqësie ka hedhur themelet për partneritet më të begatë në sektorë të ndryshëm ndërmjet dyja vendeve, duke përfshirë këtë rast edhe sektorin e bujqësisë”.

“Kosova dhe Austria ndajnë një histori plotë sfida. Austria ka ecur në rrugën e lirisë duke rifituar pavarësinë dhe sovranitetin e saj dhe më vonë duke qenë në qendër të integrimit evropian. Ashtu sikurse Austria edhe vendi jonë Kosova, synon ta arrijë integrimin e plotë në vlerat evropiane. Kosova synon të arrijë në mesin e vendeve e kombeve evropiane, për të vazhduar për të kontribuuar në aspektin ekonomik si pjesë ose element i paqes dhe stabilitetit dhe të zgjerojë mundësitë për qytetarët tanë”, u shpreh Peci.

“Si Austria edhe Kosova e kuptojnë rëndësinë e partneriteteve të forta. Prandaj, themelimi i shoqatës Kosovë-Austri shërben si një moment i rëndësishëm për Kosovën dhe ku mund të marrë frymë nga historitë e suksesit të Austrisë”, tha tutje Peci.

Oda Ekonomike Amerikane në Kosovë shpreh qëndrimin e saj se normalizimi i marrëdhënieve ndërmjet Kosovës dhe Serbisë do të sillte përfitime të konsiderueshme për komunitetin e biznesit në Kosovë, duke përfshirë rritjen e mundësive për tregti dhe investime, të cilat do të ndihmonin në krijimin e vendeve të punës dhe rritjen ekonomike. Oda Amerikane u bën thirrje të dyja shteteve që të angazhohen në dialog konstruktiv dhe të zbatojnë zotimet e të gjitha marrëveshjeve të mëparshme, nga të cilat do të përfitonin si Kosova, asht edhe Serbia.

Pavarësisht përpjekjeve të Kosovës për të tërhequr investime të huaja direkte, përmes ndërmarrjes së hapave të rëndësishëm viteve të fundit për të përmirësuar klimën e saj të investimeve duke reduktuar burokracinë dhe duke zbatuar reforma për lehtësimin e të bërit biznes, vendi është ballafaquar me vështirësi në tërheqjen niveleve të konsiderueshme të investimeve.

Tensionet e vazhdueshme politike ndërmjet Kosovës dhe Serbisë kanë pasur një ndikim të rëndësishëm në aftësinë e Kosovës për të tërhequr investime të huaja direkte. Çështjet e pazgjidhura mes dy vendeve kanë krijuar një mjedis të paqëndrueshëm që është dekurajues për bizneset e huaja të investojnë në Kosovë, pasi investitorët hezitojnë të investojnë paratë e tyre në një vend me një nivel të lartë të pasigurisë politike, i cili rrit rreziqet që lidhen me investimet e tyre. Përveç kësaj, mungesa e një marrëveshjeje formale ndërmjet Kosovës dhe Serbisë ka krijuar pengesa për bizneset në aspektin e logjistikës, transportit dhe tregtisë, gjë që i pengon edhe më tej investimet e huaja përgjatë rajonit.

Përveç kësaj, çështja e pazgjidhur me Serbinë ka çuar në humbjen e mundësive për bizneset kosovare, veçanërisht në aspektin e tregtisë dhe investimeve. Situata aktuale ka kufizuar mundësitë për bizneset kosovare që të arrijnë partneritet me investitorët e huaj dhe për të zgjeruar operacionet e tyre. Humbja e mundësive për investime ka penguar rritjen e bizneseve kosovare, gjë që ka pasur një efekt negativ në zhvillimin e përgjithshëm ekonomik të vendit.

Mungesa e një marrëveshjeje formale mes dy vendeve ka rezultuar në barriera tregtare duke e bërë të vështirë për bizneset kosovare që të eksportojnë mallra dhe shërbime në Serbi, si dhe duke penguar aftësinë e tyre për të konkurruar me bizneset serbe në rajon. Kjo ka çuar në humbjen e mundësive afariste për firmat kosovare, gjë që ka penguar rritjen dhe zhvillimin ekonomik të vendit.

Oda Amerikane beson fuqishëm se normalizimi i marrëdhënieve do të krijonte një mjedis politik më të parashikueshëm, i cili do të rriste besimin e investitorëve dhe do të inkurajonte më shumë investime të huaja direkte, gjë që është kritike për rritjen dhe zhvillimin ekonomik të vendit. Në anën tjetër, kjo do të krijonte mundësi punësimi, do të përmirësonte standardet e jetesës dhe do të zvogëlonte më tej varfërinë, nga e cila do të përfitonte populli i Kosovës.

Oda Ekonomike Amerikane në Kosovë rithekson se normalizimi i marrëdhënieve do të rriste integrimin tregtar dhe ekonomik mes dy shteteve, gjë që do të krijonte mundësi të reja për bizneset në Kosovë për të hyrë në tregje më të mëdha, duke përfituar nga ekonomitë e shkallës. Kjo do të ndihmonte në diversifikimin e ekonomisë së Kosovës dhe zvogëlimin e varësisë së saj nga sektori i shërbimeve dhe remitancat nga diaspora. Krejt në fund, normalizimi i marrëdhënieve do të kishte edhe përfitime të rëndësishme politike dhe sociale duke ulur tensionet dhe duke promovuar stabilitetin rajonal, gjë që do të përmirësonte cilësinë e jetës për të gjithë njerëzit në rajon.

Drejtori i Bujqësisë në Komunën e Prishtinës, Plator Gërdovci, i ftuar në emisionin e mëngjesit “Alarm”, në ATV ka folur rreth tregut mobil në këtë komunë por edhe për investimet dhe grantet në sektorin e bujqësisë.

Gërdovci tha sektori i bujqësisë në komunën e Prishtinës është i zhvilluar krahas vitit paraprak, shkaku i inflacionit, derisa përmendi se edhe të rinjtë e vendit janë të interesuar për tu marr me bujqësi.

“Unë jam gjatë gjithë kohës në terren dhe mendoj se bujqësia është pjesë shumë e rëndësishme për zhvillimin e vendit dhe çdo vit po shkon po bëhet më profitabile. Mendoj që edhe të rinjtë dhe të rejat po merren me bujqësi, nuk do të thoja me numër shumë të madh por e shoh se në të ardhmen do të merren edhe më shumë me këtë sektor”, tha ai.

Para disa ditësh është hapur tregu mobil në lagjen “Dardania”, në Prishtinë, e për këtë Gërdovci thotë se i ka hapur mundësi të mirë fermerëve por edhe konsumatorëve.

“Tregu mobil ka për qëllim promovimin e produkteve vendore, pra të fermerëve të Prishtinës dhe rajonit të Prishtinës, që i bie Komunave përreth dhe kemi pasur një interesim të jashtëzakonshëm të fermerëve, të cilët janë përzgjedhur në disa kritere të përcaktuara, dhe interesi ka qenë që të promovohen sa më shumë produktet vendore bujqësore. Mendoj që është një mundësi e mirë për fermerët tanë por edhe për konsumatorët që t’i provojnë produktet vendore, kuptohet këtu që për fermerët ka qenë një mundësi ende më e mirë, për shkak se nuk kanë paguar asgjë, ata që e kanë një shtang për të punuar, sepse është një mundësi që ne si Komunë ua kemi ofruar atë mundësi”, tha ai.

Tutje, Gërdovci tha se shumë shpejt pritet të hapet afati për aplikim për grante për sera, derisa foli edhe për mungesën e fuqisë punëtore./atvlive.tv/

Për më shumë ndiqni videon e mëposhtme: