Author: G.O.

Dy persona kanë vdekur dhe të paktën katër rezultojnë të zhdukur, pas shirave të rrëmbyer që përfshinë veriun e Italisë.

Një burrë në Forli u gjet i pajetë dhe një tjetër humbi jetën në Ronta di Çezena.

Viktima e parë ka ndërruar jetë, ndoshta i mbytur, në katin përdhes të shtëpisë, pranë brigjeve të lumit Montone, ku jetonte me bashkëshorten. Ajo u shpëtua nga ekipet e shpëtimit dhe tha se ai kishte mbetur në katin përdhes, ku u gjet i pajetë,s hkruan ANSA.

I dyti, një burrë rreth të 70-tave, humbi jetën për shkak të përmbytjes së lumit Savio dhe reshjeve të dendura që kanë goditur rajonin që prej ditës së djeshme.

E zhdukur rezulton bashkëshortja e tij.

Në total, të paktën katër persona janë të zhdukur në provincën e Forli-Çezena.

Sipas asaj që mësohet nga ekipet e shpëtimit, një person mësohet se është zhdukur në Çezena dhe tre në Forli.

“Sistemi rrugor është kompleks, me shumë rrugë të përmbytura, udhëtimi është i vështirë nëse jo me mjete të pajisura, probleme ka edhe në sistemin rrugor kombëtar, këshillohet shmangia e disa rrugëve arteriale dhe lëvizjet nga jugu nuk rekomandohen. Operacionet e shpëtimit mund të jenë komplekse”, tha nënkryetari i Departamentit të Mbrojtjes Civile, Titti Postiglione.

Personat me nevoja të veçanta kanë protestuar para objektit të Qeverisë për shkak se pagesa mujore që marrin u është ulur nga 375 në 150 euro, ngase janë zhvendosur nga kategoria e parë në të dytën.

Madje ata u shprehën se do të hyjnë në grevë deri në plotësimin e kërkesave të tyre.

Kryetarja e Komisionit për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, Duda Balje, e cila i takoi protestuesit u premtoi se çështja do të adresohet në Komision.

Misioni i OSBE-së në Kosovë do të publikojë sot Udhëzuesin për punë efektive të mekanizmave koordinues komunal kundër dhunës në familje (MKKDHF), të mbështetur nga Qeveria e Francës, me qëllim të përmirësimit të bashkëpunimit ndërinstitucional në rastet e tilla të dhunës dhe reagimin e politikave institucionale në nivel lokal.

Në njoftim bëhet e ditur se udhëzuesi, i cili do të jetë në dispozicion në gjuhën shqipe, serbe dhe turke, është mjet praktik për të lehtësuar reagimet efektive dhe të koordinuara ndaj dhunës në familje në nivel lokal.

“Ai mbulon bazën ligjore dhe qëllimin e MKKDHF-ve, rëndësinë e një qasjeje shumë-institucionale dhe të koordinuar, mbledhjen dhe raportimin e të dhënave, si dhe trajnimin dhe ngritjen e kapaciteteve për anëtarët e MKKDHF-ve. Udhëzuesi vjen si rezultat i një sërë konsultimesh me anëtarët e MKKDHF-ve të themeluara në mbarë Kosovën, duke përfshirë MKKDHF-të e Prishtinës, Graçanicës, Mitrovicës së Jugut dhe Mamushës”, thuhet po aty.

Fjalët hyrëse do t’i mbajnë Michael Davenport, Shef i Misionit të OSBE-së në Kosovë, Ministrja e Drejtësisë Albulena Haxhiu dhe Ambasadori Francez Olivier Guérot.

Tenderi për insulinat i kritikuar nga kryeministri Albin Kurti, sipas Organit Shqyrtues të Prokurimit (OShP) është vendim i atakuar nga vet Ministria e Shëndetësisë, pasi sipas këtij organi i njëjti është vërtetuar nga Gjykata Themelore e Prishtinës dhe nga Gjykata e Apelit e Kosovës.

Kështu sipas OShP-së, vendimi për insulinat, në rastin konkret i ka tiparet e një akti të plotfuqishëm si rezultat i juridiksionit gjyqësor, kurse efektet juridike të tij kanë efekt detyrues, jo për shkak të OSHP, por për shkak të legjislacionit në fuqi.

Nga OSHP në një përgjigje me shkrim për KosovaPress thonë po ashtu se vazhdimisht, deri më tani, ky Bord ka ruajtur dhe do ta ruajë pavarësinë e plotë në ushtrimin e funksioneve parësore të tij.

Pas kritikave të kryeministrit Albin Kurti dhe kërkesës së tij për shkarkimin e anëtares së Bordit të OShP-së, Kimete Gashi, në një përgjigje për KosovaPress nga OShP-ja kanë thënë se Qeveria e Kosovës, sikurse që ka të drejtë ta iniciojë procedurën e emërimit të anëtareve të Bordit të OSHP, ka të drejtë ta iniciojë po ashtu edhe procedurën e shkarkimit.

Sipas tyre, kjo është çështje e cila i takon pikëpamjeve, gjykimeve dhe fushëveprimit të saj si ekzekutiv.

Përkitazi me këtë, sot në Komisionin parlamentar për Buxhet do të shqyrtohet vendimi i Qeverisë së Kosovës për shkarkimin e Kimete Gashi, anëtare e Bordit të Organit Shqyrtues të Prokurimit.

OShP jep më tej sqarime për KosovaPress lidhur me tenderin për insulina.

“OSHP apriori nuk i komenton deklaratat e Kryeministrit, sepse natyrisht ato i referohen mendimit të Tij. Mirëpo në këtë kontekst, OSHP e ndjen si një detyrim etik dhe profesional që për hire të opinionit ta shpjegoj ketë rast një fakt parimor. Ju kujtojmë se çdo akt përfundimtar i organeve të administratës shtetërore, i nënshtrohet direkt kontrollit gjyqësor mbi ligjshmërinë e tyre. Vendimi për Insulinat është atakuar nga vet Ministria e Shëndetësisë, kurse është vërtetuar nga Gjykata Themelore e Prishtinës dhe nga Gjykata e Apelit e Kosovës (gjithsej 6 vendime nga gjykatat) do të thotë se vendimi në rastin konkret i ka tiparet e një akti të plotfuqishëm si rezultat i juridiksionit gjyqësor, kurse efektet juridike të tij kanë efekt detyrues, jo për shkak të OSHP, por për shkak të legjislacionit në fuqi”, thuhet në përgjigjen e OShP-së.

OShP-ja konsideron po ashtu se nuk ka nevojë të komentojë as vendimet e Qeverisë, as iniciativat apo iniciativën e ndonjë organizate joqeveritare sa i përket inicimit për shkarkimin e anëtares së Bordit, Kimete Gashi.

“Qeveria e Kosovës, sikurse që ka të drejtë ta inicioj procedurën e emërimit të anëtareve të Bordit të OSHP, ka të drejtë ta inicioj po ashtu edhe procedurën e shkarkimit. Kjo është çështje e cila i takon pikëpamjeve, gjykimeve dhe fushëveprimit të sajë si ekzekutiv, kurse OSHP konsideron se nuk ka nevojë ti komentoj as vendimet e Qeverisë, as iniciativat apo iniciativën e ndonjë organizate jo qeveritare. Në fakt, kontrolli për ligjshmërinë e punës, të veprimeve dhe vendimeve të këtij Organi, bije nën juridiksionin e drejtë për drejtë të organeve gjyqësore, të cilat deri më tani kanë vërtetuar pjesën dërmuese të vendimeve të këtij Institucioni. Përderisa, procesi i raportimit për rezultatet lidhur me arritjen e qëllimeve dhe/ose misionit të OSHP, natyrisht i takon Parlamentit të Kosovës. Dhe në secilin rast, nga cili do autoritet i cituar si më sipër, OSHP i respekton vendimet, vërejtjet dhe udhëzimet lidhur me ushtrimin e kompetencave të saja. Megjithatë, krahas fakteve dhe rrethanave të shpjeguara shkurtimisht si më sipër, duhet theksuar se ky Bord, në ketë përbërje, pothuajse që nga data e emërimit të tij vazhdimisht është përballur me një vëllim të konsiderueshëm të obligimeve, posaçërisht në procesin e vendimmarrjes. Por vazhdimisht, deri më tani, ky Bord ka ruajtur dhe do ta ruaj pavarësinë e plotë në ushtrimin e funksioneve parësore të tij”, thuhet në përgjigjen e OShP-së për KosovaPress.

Në mbledhjen e fundit të qeverisë, të mërkurën e kaluar, Qeveria ka propozuar shkarkimin e anëtares së Bordit të OSHP-së, Kimete Gashi, për shkak se si kryetare e Panelit për rastin e një tenderi të insulinave, votoi për kontraktimin e tyre pa garancitë e kompanisë për cilësinë e barit.

Menjëherë pas kësaj mbledhjeje, ministri i Shëndetësisë, Arben Vitia, ka theksuar se institucioni që ai e drejton ndodhet nën presion për nënshkrimin e jashtëligjshëm të këtij tenderi.

Kurse, nga Shoqëria Civile kishin deklaruar se nuk duhet iniciuar shkarkimi vetëm i Kimete Gashi, por edhe i anëtarëve të tjerë që votuan për këtë vendim

Anëtarja e Bordit të OShP-së, Kimete Gashi, që në vitin e kaluar është rekomanduar për këtë pozitë nga Qeveria Kurti, rrezikon që të shkarkohet me propozim të po kësaj qeverie.

Shkarkimi i Gashit mund të bëhet nga Kuvendi i Kosovës pas procedimit të vendimit nga Komisioni për Buxhet, që sot e ka në rend dite për shqyrtim.

Kryetari i Prishtinës, Përparim Rama, në një prononcim për Ekonomia Online tha se në takimin koordinues e mbajtur të hënë ndërmjet kryeministrit Albin Kurti dhe kryetarëve të​ Komunave, në njëfarë mënyre janë dakorduar që të hyrat vetanake të i’u kthehen komunave.

Ai tha se të hyrat vetanake me ligj i takojnë komunave që t’i përdorin në të mirë të qytetarëve dhe se ato nuk mund që të tjetërsohen.

Madje ai thotë se do ta luftojnë çdo tentim që mjetet të u merren, duke shtuar se kjo formë është jo ligjore.

“Mendoj që të hyrat vetanake me ligj faktikisht i takojnë komunave, pra të hyrat vetanake të kryeqytetit janë të kryeqytetit janë të qytetarëve të kryeqytetit edhe nuk munden që të tjetërsohen ato. Çdo tentim normal që është jo ligjor edhe ne do ta luftojmë çdo tentim. Patëm një takim të mirëfillte edhe me kryeministrin edhe me ministrin e Financave ku edhe në një farë mënyre u dakorduan që të hyrat vetanake të i’u kthehen, të lejohen për përdorim për projekte të cilat janë duke pritur për të mirën e kryeqytetit”.

“Shpresoj që kjo çështje do të marr fund për të mirën e qytetarëve dhe të gjitha komunave po shpresoj për brenda javës do t’i kemi ato të hyra vetanake që t’i përdorim për projekte të shumta të cilat i pret kryeqyteti edhe qytetarët këtu. Jam optimist që këtë çështje e kemi zgjedhur”, tha ai.

Ai shtoi se për këtë çështje Asociacioni i Komunave të Kosovës, i është drejtuar Qeverisë më një letër, duke pohuar që pritet që të lehtësohet procesi i bartjes së mjeteve të komunave, raporton EO.

“Tash e kanë kërkuar një letër të cilën unë personalisht, ne si kryeqytet i kemi dërguar para dy javësh tash po e kërkojnë një letër tjetër prej Asociacionit të Komunave  të Kosovës, edhe atë e kemi dërguar, i kemi kërkuar Asociacionit që ta dërgojë. Besoj që do të shlirohet procesi i bartjes së mjeteve te komunat përkatëse”, tha ai.

Me Projektligjin e Buxhetit për vitin 2023 Qeveria ka paraparë që nëse të hyrat vetanake të një komune nuk shpenzohen gjatë një viti, ato do t’i merren dhe t’i dhurohen komunave tjera ose të përdoren në nivelin qendror.