ATV

Author: G.O.

  • Amerikania lë ShBA-në për Pakistanin, rrëfen aventurën

    Amerikania lë ShBA-në për Pakistanin, rrëfen aventurën

    Samantha Shea nuk kishte qenë kurrë jashtë Amerikës përpara se të fillonte kolegjin në 2014-ën.

    Pas diplomimit më 2019-ën, ajo vizitoi për herë të parë Indinë dhe Pakistanin.

    E pas këtij udhëtimi, në vitin 2021 ajo vendosi të zhvendosej në Luginën Hunza të Pakistanit, ku jeton aktualisht.

    Samantha tregon se kur u tha familjarëve të saj se vendosi të mos ikte më kurrë nga Pakistani, ata ishin të tronditur pasi e mendonin këtë vend fiks si një shkretëtirë.

    Por, ajo thotë se u ka dërguar vazhdimisht fotot mahnitëse të vargmalit Karakoram mbuluar me borë dhe fshatin piktoresk ku sot ka shtëpinë.

    Dikur jetonte në Majami, e ndërsa sot shijon jetën 8500 metra mbi nivelin e detit në kufi me Kinën Perëndimore.

    “Në Hunza, energji elektrike ka vetëm disa orë në ditë, nuk bëhen dërgesa online dhe jo gjithmonë ka ujë të nxehtë. Por pavarësisht këtyre, lugina është shtëpia ime. Rinovimi i fundit i shtëpisë më kushtoi vetëm 3 mijë dollarë”, shprehet Samantha.

    SHBA-ja gjithmonë i udhëzon qytetarët e saj që nëse udhëtojnë në Pakistan, duhet të shmangin provincën Balochistan, kufirin e Pakistanit me Indinë pasi ka rrezik për sulme terroriste dhe konflikte të armatosura.

    Por, sipas Samanthë-s deri më sot nuk është ndjerë e pasigurt.

    Mediat e huaja kanë shkruar me detaje për vendimin ekstrem të kësaj vajze të re për t’u zhvendosur nga SHBA në një vend shumë më të varfër.

    “Dashuria ime për udhëtimet filloi në kolegj. E doja plazhin dhe verën e Florida-s, por nga ana tjetër më shqetësonin zhurmat dhe ritmi i shpejtë i këtyre qyteteve. Kam bërë 3 punë teksa isha në universitet, që të kurseja për këto aventura. Pas diplomimit në 2019, u nisa përsëri për në Indi, duke udhëtuar nëpër vend dhe më pas në Pakistanin fqinj. Pavarësisht shqetësimeve nga familja dhe miqtë, nuk u ndjeva aspak nervoze kur kalova kufirin e Indisë. Zbulova se Pakistani nuk ishte i ndotur dhe rrugët ishin në gjendje të mirë. Pas pandemisë, mësova gjuhën kombëtare të Pakistanit. Hapa një blog dhe u angazhova duke shkruar përmbajtje në mediat sociale për udhëtimet”, deklaroi Samantha.

    Ajo në prill të 2021-it, kishte udhëtuar në kryeqytetin e Pakistanit, Islamabad.

    “Nuk kisha një plan të qartë por qëndrova disa net në një bujtinë. Këtë udhëtim timin në shumë zona, njerëzit që më njihnin e konsideruan çmenduri, por unë isha e vendosur”, thotë Samantha.

    Sipas saj Lugina Hunza është një zonë e largët në veri të Pakistanit.

    “Lumenjtë blu Gatorade dhe malet e mbuluara me borë e bëjnë Hunzën një destinacion popullor turistik. Komuniteti lokal është i njohur për mikpritjen e tij dhe menjëherë u ndjeva si në shtëpinë time – diçka që nuk e kisha ndjerë kurrë në Amerikë”, rrëfen Samantha.

    Ajo thotë se në këtë zonë ka një kulturë shumë më liberale ndaj grave, duke përmendur se shumë prej tyre zotërojnë restorante, dyqane dhe kanë arsim të lartë.

    Samantha thekson se asnjëherë s’ka pasur frikë për sigurinë e saj.

    Madje ajo ndan dhe një episod kur udhëtoi e vetme 5 milje dhe nuk dinte si të kthehej.

    Një bari shpjegon ajo, i sqaroi rrugën e kthimit dhe i mbajti çantën.

    “Një muaj akomodim këtu kushton 150 deri në 250 dollarë. Në fillim kam qëndruar në disa hotele ku paguaja 15 dollarë natën”, shton ajo më tej.

    Për Samanthën, kjo eksperiencë i ka shërbyer pozitivisht pasi ajo ka pasur fryte në karrierën e saj si freelance.

    Ajo publikon historitë në Instagram dhe Youtube, duke frymëzuar shumë njerëz të tjerë për të vizituar luginën.

    E në këtë vend, ajo ka njohur dhe dashurinë e jetës, i cili quhet Fareed. Atë e njohu disa muaj pasi u stabilizua në Hunza.

    Aktualisht ajo nuk ka asnjë plan që të ikë nga Lugina, madje aty mendon të kalojë gjithë jetën ku pret të ndërtojë një familje të bukur me Fareed./atvlive.tv/

    Për më shumë ndiqni videon e mëposhtme:

  • Parashikimi i motit me Diellza Dakën

    Parashikimi i motit me Diellza Dakën

    Dita e sotme në vendin tonë do të jetë kryesisht me vranësira dhe intervale të lehta me diell.

    Temperaturën minimale do e mbajë Gjakova me 7 gradë Celsius, ndërsa atë maksimale Ferizaj me 20 gradë Celsius.

    Edhe dita e nesërme në Kosovë do të jetë kryesisht me intervale të lehta me diell.

    Temperaturën minimale do e mbajë Gjakova me 9 gradë Celsius, ndërsa atë maksimale Ferizaj me 24 gradë Celsius.

    Ndërkohë, në Shqipëri do të ketë mot kryesisht të kthjellët, ku temperaturën minimale do e ketë Korça me 8 gradë Celcius, ndërsa ajo maksimale do të jetë në Berat me 27 gradë Celcius. /atvlive.tv/

    Parashikimin e plotë të motit, për rajon dhe Evropë, mund ta gjeni në videon e mëposhtme:

  • Sot betohet kryetari i ri i Mitrovicës së Veriut, të tjerët s’dihet kur do ta marrin detyrën

    Sot betohet kryetari i ri i Mitrovicës së Veriut, të tjerët s’dihet kur do ta marrin detyrën

    Sot fillon betimi i kryetarëve të rinj të 4 komunave në veri të Kosovës.

    Erden Atiq do ta bëjë i pari betimin nga gjithsej 4 kryetarët që dolën nga zgjedhjet në veri.

    Betimi i kryetarit të ri do të bëhet në objektin e Komunës së Mitrovicës së Veriut dhe nuk ka pikë tjetër në rendin e ditës.

    Dje, shtetet e Quint’it, Franca, Italia, Gjermania, Mbretëria e Bashkuar dhe Shtetet e Bashkuara të Amerikës, kanë thënë se zgjedhjet e 23 prillit në katër komunat e veriut të Kosovës janë mbajtur në përputhje me kërkesat kushtetuese dhe ligjore të Kosovës.

    Megjithatë, këto shtete thonë se si pasojë e bojkotit nga komuniteti serb, rezultatet e tyre nuk janë zgjidhje afatgjata politike për këto komuna.

    “Më 23 prill, në veri të Kosovës u mbajtën katër palë zgjedhje për kryetar komune dhe dy palë zgjedhje për asamble komunale, në përputhje me kërkesat kushtetuese dhe ligjore të Kosovës. Megjithatë, pas bojkotit nga një pjesë e konsiderueshme e komunitetit serb, rezultatet nuk janë zgjidhje politike afatgjatë për këto komuna”, thuhet në deklaratën e përbashkët të këtyre shteteve.

    Shtetet e Quint’it u kanë bërë thirrje të gjithë aktorëve që urgjentisht të punojnë së bashku midis të gjitha palëve të interesuara, përfshirë komunitetet lokale, drejt një zgjidhjeje që siguron demokraci të qëndrueshme përfaqësuese pjesëmarrëse në këto komuna.

    “Nuk duhet të ketë veprime apo iniciativa – përfshirë kryetarët e sapozgjedhur të komunave dhe kuvendet komunale – që nuk i shërbejnë popullit ose që mund të rrisin tensionet. Kjo përfshin ushtrimin e më shumë se kompetencave administrative dhe procesin e marrjes së detyrës pasi nuk kërkohet që kryetarët e komunave të bëjnë betimin në zyrat komunale. Të gjitha palët duhet të përmbahen nga përdorimi i forcës ose veprimet që ndezin tensionet ose nxisin konfliktin”, thonë shtetet e Quint-it.

  • 24 vjet nga masakra në Burgun e Dubravës

    24 vjet nga masakra në Burgun e Dubravës

    24 vjet më parë në Burgun e Dubravës ka filluar të kryhet njëra nga masakrat më të mëdha në Kosovë kundër shqiptarëve nga regjimi i kriminelit i Sllobodan Millosheviq.

    19 vite më parë, brenda burgut janë vrarë 160 të burgosur shqiptarë dhe janë plagosur më shumë se 300 të tjerë.

    Masakra e Burgut të Dubravës është kryer prej 19 deri më 24 maj të vitit 1999.

    Brenda Burgut të Dubravës gjendet një pllakë përkujtimore me emrat e të gjithë atyre që janë vrarë në këtë masakër, që konsiderohet si një nga masakrat më të mëdha të regjimit serb të kryer ndaj shqiptarëve.

    Ende për këtë masakër nuk është dënuar askush.

  • Miratohet marrëveshja për ndërtimin e urës së Bunës që lidh Shqipërinë me Malin e Zi

    Miratohet marrëveshja për ndërtimin e urës së Bunës që lidh Shqipërinë me Malin e Zi

    Kuvendi i Shqipërisë ka miratuar sot (e enjte) marrëveshjen mes Shqipërisë dhe Malit të Zi, për ndërtimin e urës mbi Bunë.

    Projektligji “Për ratifikimin e marrëveshjes ndërmjet Këshillit të Ministrave të Republikës së Shqipërisë dhe qeverisë së Malit të Zi, për ndërtimin e urës ndërkufitare mbi lumin Buna/Boiana”, u miratua me 97 vota pro, asnjë kundër dhe asnjë abstenim.

    Plani i Shqipërisë dhe Malit të Zi është që, deri në vitin 2024, së bashku të ndërtojnë një urë mbi lumin Buna, e cila do të lidhë Ulqinin – komunën më jugore të Malit të Zi dhe vendpushimin e Velipojës në Shqipëri.

    Gjatësia e urës do të jetë 310 metra, ajo do të ketë dy korsi të gjera më pak se katër metra dhe do të përfshijë trotuare dhe shtigje për biçikleta.

    Lartësia mesatare e urës në raport me nivelin më të lartë të ujit do të jetë rreth 10 metra për të mos ndërhyrë në qarkullimin lumor. I gjithë projekti do të kushtojë nëntë milionë euro dhe ndërtimi do të zgjasë rreth 18 muaj.

    Zëvendëskryeministrja dhe ministrja e Infrastrukturës, Belinda Balluku, pati thënë se ura do të përshkohet vetëm në dy minuta.

    “Me ndërtimin në Urën e Bunës, një urë që është 310 metra, do të përshkohet vetëm në 2 minuta, duke ju dhënë mundësi vizitorëve që janë numra të konsiderueshëm. Bëhet fjalë për mbi 360 mijë turistë që lëvizin dhe mbi 170 mijë qytetarë nga Mali i Zi që vizitojnë Shqipërinë. Kjo është një punë dhe një investim që do të bëhet duke e ndarë investimin mes 2 vendeve. Parashikohet që investimi të shkojë rreth 1,5 miliardë lekë, që do të ndahen 50 me 50 mes vendeve tona. Keni nisur nga puna që projektimi, dokumentacioni dhe çdo gjë tjetër të kryhet nga FSHZH-ja sa më shpejt”, pati thënë Balluku ditë më parë.

    Ura do të vendoset mbi degën e lumit Buna në dy degë që formojnë vendbanimin ekskluziv turistik të Ada Buna në Mal të Zi.

  • Arrestohet një person në Gjilan, dyshohet se ushtroi dhunë fizike e psikike ndaj gruas shtatzënë

    Arrestohet një person në Gjilan, dyshohet se ushtroi dhunë fizike e psikike ndaj gruas shtatzënë

    Policia e Kosovës ka bërë të ditur se ka arrestuar një person pasi dyshohet se ka ushtruar dhunë fizike dhe psikike ndaj bashkëshortes, pastaj i dyshuari ka kërkuar që gruaja të shkojë te familja e vajzërisë.

    Rasti ka ndodhur në Gjilan, të mërkurën në ora 17:30.

    “Është arrestuar i dyshuari mashkull kosovar nën dyshimin se ka ushtruar dhunë fizike dhe psikike ndaj bashkëshortes së tij, viktimës femër kosovare, pastaj i dyshuari ka kërkuar që viktima të shkojë te familja e vajzërisë”, thuhet në raport.

    Viktimës iu është ofruar tretman mjekësor pasi që e njëjta edhe është shtatzënë.

    Me vendim të prokurorit i dyshuari është dërguar në mbajtje, rasti vazhdon të hetohet.

  • Naser Kelmendi dënohet me 4 vjet e 8 muaj burg

    Naser Kelmendi dënohet me 4 vjet e 8 muaj burg

    Gjykata Themelore në Prishtinë, ka shpallur aktgjykim dënues ndaj të akuzuarit për trafikim me narkotikë, Naser Kelmendi, duke e dënuar me 4 vjet e 8 muaj burgim.

    Aktgjykimi ndaj të akuzuarit Kelmendi, është shpallur të enjten, nga kryetarja e trupit gjykues, Suzana Çerkini, raporton “Betimi për Drejtësi“.

    Sipas aktgjykimit, koha e kaluar në privim lirie, do t’i llogaritet në shqiptimin e dënimit.

    Sipas gjykatëses Çerkini, lidhur me nxjerrjen e këtij aktgjykimi, gjykata ka vlerësuar rrethanat lehtësuese dhe rënduese.

    Si rrethanë rënduese, gjykata ka marrë përfshirjen e shumë personave, metodat e sofistikuara për fshehjen e narkotikëve, ndërsa si rrethanë lehtësuese është marrë koha e kaluar që nga kryerja e veprës penale, nga e cila kohë nuk është gjetur ndonjë vendim i formës së prerë që i akuzuari ka kryer ndonjë veprë të njëjtë apo të ngjashme.

    Në pajtim me dispozitat ligjore të KPRK-së, i akuzuari Kelmendi është i detyruar të paguajë shumën prej 300 euro për paushallin gjyqësor dhe 100 euro për fondin për kompensimin e viktimave të krimit.

    Aktgjykimi u shpall në mungesë të të akuzuarit Kelmendi.

    Gjykata Themelore në Prishtinë, më 1 shkurt 2018, kishte shpallur aktgjykimin ndaj të akuzuarit Naser Kelmendi, i cili akuzohej për disa vepra penale. Kelmendi ishte dënuar me gjashtë vjet burgim, vetëm për pikën 8 të aktakuzës, pasi ishte shpallur fajtor për trafikim me narkotikë.

    Ndërsa, ishte shpallur i pafajshëm për veprat tjera penale që lidhen me vrasjen e Ramiz Delaliqit, për krim të organizuar si dhe për pikat tjera të aktakuzës, që lidhen me shitjen dhe prodhimin e substancave narkotike.

    Në arsyetimin e këtij aktgjykimi, kryetarja e trupit gjykues, Anna Adamska Galant, kishte thënë se gjykata kishte vendosur ta lirojë nga këto pika, pasi nuk është provuar se Naser Kelmendi ka kryer këto vepra penale. Sipas saj, gjykata kishte vlerësuar se nuk kishte prova për të mbështetur akuzën për vrasje.

    Në dënimin e shqiptuar, atij i ishte llogaritur edhe koha e kaluar në paraburgim, ndërsa ishte obliguar që t’i paguajë shpenzimet procedurale pjesërisht në vlerë prej 5 mijë euro. Gjykata kishte vendosur ta caktojë edhe masën e paraburgimit ndaj tashmë të dënuarit Kelmendi, pasi sipas saj, dënimi është mbi pesë vjet.

    Por, Gjykata e Apelit e kishte anuluar aktgjykimin e shkallës së parë dhe rastin e kishte kthyer në rigjykim,

    Prokuroria kishte ngritur aktakuzë në korrik të vitit 2014, kundër Naser Kelmendit, të cilin e ngarkonte me 9 pika të aktakuzës.

    Kelmendi, i cili është gjykuar nga një trup gjykues me shumicë të gjyqtarëve të EULEX-it, ishte arrestuar në maj të vitit 2013, ndërsa nga ajo kohë kishte qëndruar në paraburgim deri më 28 shkurt 2017, kur iu zëvendësua kjo masë me atë të arrestit shtëpiak.

    Më pas, Gjykata e Apelit e kishte kthyer prapë në paraburgim, ndërsa më 17 mars 2017, ishte liruar nga paraburgimi përsëri nga Gjykata Themelore në Prishtinë. Ndaj këtij vendimi ishte ankuar prokurori, ndërsa Gjykata e Apelit e kishte miratuar ankesën e tij duke e kthyer në paraburgim prapë të akuzuarin Kelmendi.

    Më vonë, Kelmendi, në qershor të vitit 2017, prapë është liruar nga paraburgimi për t’u mbrojtur në liri, gjë që e bën edhe tani pasi që ndaj tij, nuk ka të caktuar ndonjë masë për sigurimin e prezencës së tij në gjykatë, pasi që u është përgjigjur rregullisht ftesave të gjykatës.

    Prokuroria Speciale, Naser Kelmendin e ka ngarkuar me veprat penale: krim i organizuar, vrasje e rëndë, blerje, posedim, shpërndarje dhe shitje e paautorizuar e narkotikëve të rrezikshëm dhe substancave psikotropike dhe prodhim e përpunim i paautorizuar i narkotikëve të rrezikshëm dhe substancave psikotropike, të përmbledhura në 9 pika të aktakuzës.

    Prokuroria pretendonte se Kelmendi në bashkëkryerje me Fahrudin Radonçiqin, Ekrem Lekiqin, Muhamed Ali Gashin, Milovan Jeremiqin, Lubisha Buhan “Çume”, Milan Ostojiqin, “Sandokanin”, Naser Oriqin, Senad Sahinpasiqin, Nebojsha Vukomanoviqin, Raseta Stranjan, Benjamin Halimoviqin, Edin Ahmetshahiqin dhe të tjerë, ka organizuar, formuar, mbikëqyrur, udhëhequr dhe apo drejtuar grupin kriminal të organizuar dhe të strukturuar, apo ka marrë pjesë aktivisht në këtë grup të organizuar kriminal që kanë kontribuar në kryerjen e krimeve të rënda, e që veçohet vrasja e “kryegangsterit rival” Ramiz Delaliq- “Çelo”, në vitin 2007.

    Për vrasjen e Delaliqit, sipas prokurorisë, Naser Kelmendi, në vitin 2006, ka bërë një sërë takimesh në Sarajevë, me Fahredin Radonçiqin, Ekrem Lekiqin, Muhamed Ali Gashin, Senad Sahipasiqin, Naser Oriqin dhe me të tjerë, për të planifikuar dhe për të bërë komplotin dhe për të vrarë, Ramiz Delaliq.

    Prokuroria pretendonte se si rezultat i këtyre takimeve të organizuara, Naser Kelmendi është ofruar dhe ka pranuar përgjegjësi për të identifikuar dhe punësuar varësit që do të kryenin vrasjen e Ramiz Delaliqit, për kryerjen e kësaj vrasje prokuroria ka thënë se Kelmendi ka angazhuar me pagesë Strahinja Raseta dhe Nebojsha Vukomanoviq nga Serbia, për të vrarë Ramiz Delaliqin, më 27 qershor 2007 në Sarajevë rreth orës 23:30.

    Tutje, sipas aktakuzës, së paku nga viti 2000 deri më 2012, Naser Kelmendi si kreu dhe drejtuesi i grupit të gjerë kriminal të strukturuar dhe të organizuar, ka menaxhuar dhe drejtuar blerjen, përgatitjen, transportin, shitjen dhe shpërndarjen e një sasie të madhe heroine, ekstazie, spind dhe droga të tjera, nëpërmjet një rrjeti të organizuar kriminal të themeluar mirë, që përfshinte dëshmitarin K1- përgjegjës për menaxhimin dhe përzierjen e narkotikëve për Naser Kelmendin, K2, i cili ka udhëhequr dërgesat ndërmjet Turqisë, rajonit të Ballkanit dhe Holandës, K3-shpërndarës i drogës në Beograd, Liridon Kelmendin, menaxher i shpërndarjes së drogës për në Serbi dhe për në vendet tjera evropiane, Mehanoviq Haris – vozitës dhe truprojë, Sead Akeliq – vozitës, Zelko Boziq – automekanik, i cili krijonte hapësira të fshehta në automjete për drogat, Hakija Kreliq që mbante kontakte në Turqi, Ilir Kastrati – që mbante kontakte në Turqi, Asmir Kalac – koordinator i dërgesave të drogës, dhe të tjerë.

    Prokuroria pretendonte se përmes rrugëve të koordinuara mirë për trafikimin e narkotikëve, dërgesave të mëdha me ekstazi janë marrë nga Holanda dhe janë transportuar për në Bosnjë- Hercegovinë dhe Kosovë, ku janë ripaketuar dhe transportuar më tej për në Stamboll dhe Droga e marrë në Stamboll u transportua përsëri përmes Bosnjës dhe Hercegovinës dhe Kosovës dhe më pas u dërgua dhe iu shit tregtarëve dhe shpërndarësve në të gjithë Evropën.

    Naser Kelmendi akuzohej se në bashkëkryerje me Kl, K2, K3, Liridon Kelmendi, Haris Mehanovic, Sead Akeljic, Zeljko  Bozic, Hakija  Krlic, Iljier Kastrati, Asm_jr Kalac dhe të tjerët pa autorizim, kanë kultivuar, prodhuar, përpunuan ose përgatitën substanca, të deklaruara si droga të rrezikshme narkotike me qëllim të shitjes, shpërndarjes ose ofrimit të tyre për shitje.

  • Rivali i Erdoganit: Të gjithë migrantët do t’i dërgoj në shtëpi

    Rivali i Erdoganit: Të gjithë migrantët do t’i dërgoj në shtëpi

    Lideri i opozitës turke, Kemal Kilicdaroglu, është zotuar të enjten se do t’i kthejë nëpër vendet e tyre miliona migrantë, në rast se fiton në balotazhin e 28 majit.

    Ai është në garë me presidentin aktual, Recep Tayyip Erdogan.

    Këto janë deklaratat e para të tij, prej mbajtjes së zgjedhjeve më 14 maj, kur janë mbajtur zgjedhjet parlamentare dhe presidenciale.

    Në rundin e parë, asnjëri kandidat nuk ka arritur të fitojë mbi 50 për qind të votave për pozitën e presidentit.

    Megjithatë, performanca e Kilicdaroglut ka qenë më e mira e një kandidati opozitar, përgjatë dy dekadave të fundit.

    Kilicdaroglu, 74-vjeçar, ka folur të enjten në favor të votuesve të krahut të djathtë.

    Ai, po ashtu, pritet të takohet edhe me Sinan Oganin – figurë e të djathtës ekstreme, i cili i ka fituar 5.2 për qind të votave, në garën për president.

    Të enjten, ai ka folur me ton më të ashpër, sesa në fazën e parë të fushatës.

    “Erdogan, ju nuk i keni mbrojtur kufijtë dhe nderin e shtetit”, ka thënë Kilicdaroglu, ish-shërbyes civil.

    “Ju keni sjellë me qëllim mbi 10 milionë refugjatë në këtë shtet. Sapo të jem në pushtet, do t’i dërgoj të gjithë në shtëpi”.

    Ogan ka thënë se ai do të mbështesë vetëm kandidatin që merret me çështjen e migrantëve dhe e lufton “terrorizmin” – referencë në Turqi për militantët kurdë.

  • Alpinisti 84-vjeçar u shpëtua nga mali në Nepal teksa synonte rekord

    Alpinisti 84-vjeçar u shpëtua nga mali në Nepal teksa synonte rekord

    Një alpinist 84-vjeçar që përpiqej të bëhej personi më i vjetër që arrinte majat më të larta të botës, u shpëtua të enjten nga një mal në Nepal, ku u lëndua.

    Alpinisti spanjoll Carlos Soria po përpiqej të ngjitej në malin Dhaulagiri, por u lëndua gjatë rrugës për në majë.

    Me një helikopter shpëtimi ai u dërgua në një spital në Katmandu për trajtim, transmeton Klankosova.tv.

    Udhëzuesit sherpa dhe alpinistët e tjerë e kishin ndihmuar atë të zbriste nga mali në kampin bazë, pasi u plagos të mërkurën.

    Soria ishte ngjitur në 12 nga 14 malet më të larta në botë mbi 8,000 metra duke përfshirë malin Everest, i cili është më i larti nga të gjithë, raporton Associated Press.

    Qindra alpinistë dhe udhërrëfyesit e tyre përpiqen të ngjiten në majat më të larta në Nepal gjatë sezonit popullor të alpinizmit pranveror, kur kushtet e motit në male janë më të favorshme.

    Sezoni fillon në mars dhe përfundon në maj, pas së cilës moti përkeqësohet, duke e bërë të rrezikshëm qëndrimin në mal.

  • Hapet panairi EXPKOS, Hajdari: Kosova ka shumë potencial për investime

    Hapet panairi EXPKOS, Hajdari: Kosova ka shumë potencial për investime

    Është hapur në Prishtinë edicioni i 22-të i panairit ndërkombëtar “EXPOKOS”, në të cilin po marrin pjesë biznese të sektorit të ndërtimit, energjisë, makinerisë, mbrojtjes dhe sigurisë. Panairi do të qëndrojë i hapur edhe nesër në sallën “1 Tetori”.

    Përveç bizneseve vendore, ky panair ka sjellë në vend edhe biznese nga Bashkimi Evropian, të cilët po prezantojnë bizneset e tyre.

    Ministrja e Industrisë, Ndërmarrësisë dhe Tregtisë, Rozeta Hajdari, deklaroi se Kosova ka shumë potenciale për investime falë fuqisë punëtore.

    Hajdari tha se synojnë që Kosova të integrohet më shpejtë në Bashkimin Evropian.

    “Kosova ka shumë potenciale, sidomos për investime falë fuqisë punëtore të njeriut, falë resurseve tona njerëzore, por edhe falë resurseve natyrore, megjithatë resursi njeri është kryesor për zhvillim ekonomik. Jam e lumtur të ndajë shumë suksese nga bizneset e Kosovës që po rrisin investimet, po rrisin eksportet, por edhe investimet nga vendet evropiane e më larg që po vinë në Kosovë për shkak të mundësive që ka vendi. Është resursi, njeri, taksat, ligjet që kemi shtyrë për të bërit biznes, që përmirësojnë ambientin për të bërit biznes. Me këtë vizion ne synojmë që Kosovën ta integrojmë më shpejtë, industrinë tonë globalisht me prodhim në vlerë të lartë të shtuar dhe me ofrim për punësim të denjë për të rinjtë tanë. Kështu dalëngadalë duke u integrua sa më shpejtë në Unionin Evropian, aty vërtetë ku jemi Evropë ”, theksoi Hajdari.

    Hajdari mes tjerash tha se kanë nënshkruar marrëveshje për programin e tregut të përbashkët në unionin evropian, ku Kosova do të ketë mundësinë të marrë pjesë në të gjitha aplikacionet e programit që janë në vlerë me 4.2 miliardë euro, duke përfshirë bizneset e vogla e të mesme

    Organizatori i panairit, Bekim Xhafa bëri të ditur se këtë vit numri i prodhuesve është në rritje.

    “Këtë vit jemi mirë sepse numri i prodhuesve është në rritje dhe kemi shumë prodhues nga vendi të cilët janë në panair për të shtrirë dhe për të hapur dyer edhe jashtë kufijve të Kosovës dhe me disa prej tyre kemi filluar që t’i bëjmë edhe marrëveshjet dhe partneret adekuat. Këtë vit kemi edhe një mysafir që ka bërë një rrugë më të gjatë, një institucion gjerman, është asociacioni për ndërmarrje të mesme në Gjermani, që kanë në ombrellën e tyre 900 mijë anëtarë të cilët janë në Prishtinë dhe kanë një stendë këtu që është në shërbim të bizneseve kosovare për të krijuar lidhje në tregun gjerman”, tha Xhafa.

    Se panairet janë mundësi e mirë për të promovuar bizneset e thonë edhe përfaqësuesit e bizneseve.

    Elmedina Kelmendi, financiere, tha se falë panairit po promovojnë biznesin e tyre dhe po lidhin bashkëpunim me biznese tjera.

    “Për neve si fabrikë është hera parë që po marrim pjesë në panair, i cili po na mundëson promovimin dhe bashkëpunimin edhe me biznese tjera. Shpresojmë që ky panair të jetë një vegzë bashkëpunimi edhe me ndërkombëtarë e me biznese vendore”, tha Kelmendi.

    Ndërsa, Ylber Pllana, pronari i një nga biznesi në vend, u bëri thirrje institucioneve përkatëse të organizojnë më shumë panaire të tilla.

    “Ky është panairi i parë që ne marrim pjesë. Po prezantojmë mjete të reja, dhe inovative që janë në Kosovë. Në këto panaire ne si për produkte vendore e të importura, nëse janë të mira duhet të promovohen sa ma shumë…7:14 Bëjmë thirrje që të ketë panaire sa më shumë për promovimin e këtyre produkteve”, tha Pllana.

    Edhe Fatmir Muja, i cili po promovon produktet e kompanisë, tha se panairet e tilla ndihmojnë në rritjen e klientëve.

    “Çdo panair, promovim sjellë një risi të re, krijon një njohje me klientët tanë e të rinj, të cilët e vizitojnë stendën tonë dhe i shohin produktet e reja. Dhe gjithmonë duke avancuar edhe ne në produktet tona kemi arrit një sukses të madh edhe në BE dhe jemi shumë atraktiv në tregun e Kosovës”, tha Muja.

    Panairi do të jetë i hapur dy ditë, sot dhe nesër në sallën 1 tetori në kryeqytet.