Author: ATVLive

Avokati i Popullit, Naim Qelaj, në një intervistë për Ekonomia Online ka thënë se brenda shtat muajve të këtij vit është vërejtur një rënie e ndjeshme në numrin e ankesave krahasuar me vitin e kaluar, ku kjo rënie ai ka thënë se ndërlidhet si rezultat i ngjarjeve që kanë ndodhur brenda viteve, ku gjatë vitit 2023 pati një fluks të madh ankesash për shkak të ndryshimeve ligjore, si ligji i pagave, që ndikuan në të drejtat e qytetarëve.

Qelaj ka thënë se me Ligjin për rritjen e pagës minimale, nuk është arritur të harmonizohet paga me koston e jetesës, inflacionin dhe rritjen e çmimeve, kështu duke ndikuar që qytetarët të jetojnë më keq se sa që kanë jetuar para disa viteve.

Qelaj ka thënë se për këtë vit ankesat që vazhdojnë të dominojnë janë për zvarritjet në procedurat gjyqësore.

“Këtë vit është vërejt një rënie e numrit të ankesave krahasuar me vitin paraprak, kjo vjen edhe si rezultat i ngjarjeve që kanë ndodhur brenda viteve. E zëmë se në vitin 2023 ka pasur një fluks të madh të ankesave në fillim të vitit, për shkak të ligjit të pagave dhe disa ndryshimeve të tjera ligjore që kanë afektuar dhe kanë prekur të drejtat e shumë qytetarëve dhe ka pas një numër jashtëzakonisht të madh të ankesave. Dhe këtë vit kemi rënë në nivelin normal të standardit të pranimit të ankesave si dhe para vitit 2023. Vazhdojnë të vijnë ankesa me çështje dhe shqetësime që lidhen me të drejtat e njeriut në sektorë dhe fusha, edhe vitet e tjera kemi pas më shumë ankesa, për nga natyra e ankesave vazhdojnë me dominuar ankesat për zvarritjet në procedura gjyqësore”, ka thënë ai.

Qelaj theksoi se, ndonëse ka një rënie në numrin e përgjithshëm të ankesave, shqetësimet e raportuara vazhdojnë të jenë të ndjeshme, sidomos në lidhje me zvarritjet në procedurat gjyqësore të cilat zgjasin me vite.

Ai tha se këto çështje lidhet edhe me reformën në drejtësi dhe me vetë performancën e gjyqësorit si dhe me performancën e autoriteteve publike, që në situata të caktuara kanë prodhuar numër të madh të rasteve gjyqësore për shkak të çështjeve që nuk janë zgjidhur në procedurë administrative mirë.

“Është një shqetësim shumë vjeçar që e kemi përsëritë vazhdimisht, këtë vit kemi nxjerr një numër të madh të raporteve sepse kemi parë që janë raste gjyqësore që kanë zgjatë shumë vite dhe nuk kanë marrë një epilogë dhe nuk ka një veprim të gjykatave në drejtim të procedimit të atyre çështjeve dhe në këto raste konstatojmë se ka diskriminim dhe kërkojë nga gjykata me i’u dhënë prioritet atyre rasteve dhe me filluar procedurat gjyqësore. Është inkurajuese fakti që gjykata vazhdimisht përgjigjet dhe është bashkëpunuese me institucionet e Avokatit të Popullit në këtë drejtim por që problemi në thelb nuk po zgjidhet edhe pse që shumë vite është si problematikë që e dinë të gjithë, dhe kjo ndërlidhet edhe me reformën në drejtësi dhe me vetë performancën e gjyqësorit si dhe me performancën e autoriteteve publike, që në situata të caktuara e kanë prodhuar numër të madh të rasteve gjyqësore për shkak të çështjeve që ndoshta nuk janë zgjidhur në procedurë administrative mirë, dhe kemi pas një numër shumë të madh të padive në procedurë gjyqësore për shkak të kontratës kolektive, mos zbatim të kontratës kolektive”, ka shtuar ai.

Avokati i Popullit tha se kanë pranuar ankesa nga qytetarët edhe shqetësimet e tyre në lidhje me ofrimin e shërbimeve shëndetësore, që lidhen me mungesa të barnave në listën esenciale, ku qytetarët detyrohen të paguajnë për terapitë që duhet të ishin falas.

Probleme me ofrimin e shërbimeve esenciale, sipas Qelajt, janë duke pasur edhe personat me aftësi të kufizuara.

“Një shqetësim tjetër që kemi mundur të kuptojmë nga ankesat që kemi pranuar e që është shqetësim i qytetarëve është ofrimi i shërbimeve shëndetësore, kryesisht mungesa e barnave në listën esenciale, barna që përshkruhen nga mjekët dhe qytetarët nuk arrijnë me i marrë falas edhe pse janë terapi të përshkruara dhe ata detyrohen me i paguar vetë. Shpeshherë këto janë shuma të papërballueshme për familjen dhe vendosin në një situatë shumë të rëndë, kemi informacion nga Ministria e Shëndetësisë që është bërë këtë vit shikimi i listës esenciale të barnave që kompensohen ose sigurohen nga shteti, por që një numër i madh i medikamenteve kanë mbetur jashtë kësaj liste dhe qytetarët detyrohen me i siguruar vetë dhe kjo i paraqet vështirësi shumë të madhe”.

“Përveç kësaj një shqetësim tjetër që mundemi me konstatuar nga ankesat e qytetarëve lidhet me ofrimet e shërbimeve esenciale sidomos për personat me aftësi të kufizuara, fëmijë dhe persona të tjerë kemi pas ankesa për shkak të mungesës së ofrimit të shërbimeve sociale nga ana e shtetit, pamundësimi me i marrë këto shërbime në organizata ose në forma të tjera dhe që në disa raste qytetarët kanë mbetur pa këto shërbime. Qytetarët në momentin që i shtjerrin këto mundësi dhe mjetet e tjera juridike dhe nuk arrijnë me i realizuar drejtat e tyre, ankohen edhe për raste të tjera nuk janë vetëm këto”, ka thënë ai.

Avokati ka theksuar se Ligji për rritjen e pagës minimale ka dëmtuar qytetarët dhe i ka lenë në një situatë të pa trajtuar mirë, sipas tij, si shkak i politikave jo të harmonizuara dhe të pamenduara ka bërë që grupe të caktuara që marrin kompensim nga shteti, pagat që marrin nuk janë të harmonizuar me koston e jetesës, me inflacionin e me rritjen e çmimeve duke bërë që këta qytetarë të jetojnë më keq se sa që kanë jetuar para disa viteve.

“Tek ofrimi i shërbimeve sociale mendoj që zvarritja e aprovimit të Ligjit për financimin e Pushtetit Lokal ku është përcaktuar edhe granit specifik për çështjen sociale, pastaj mos përfshirja me Ligj i rritjes së kompensimeve që e marrin kategoritë e financuara nga shteti. Përmes Ligjit për rritjen e pagës minimale besoj që i ka dëmtuar qytetarët dhe i ka lenë në një situatë të pa trajtuar dhe besoj që është dashtë me rregulluar çështja e këtyre qytetarëve pastaj me vazhduar me procedura për hartim të dispozitave që lejojnë edhe rritjen e pagës minimale. Aktualisht jemi në një situatë ku grupe të caktuara që financohen nga shteti ose marrin kompensim nga shteti për vite të tëra nuk ka pas një lëvizje që harmonizon ato mjete financiare që i marrin me koston e jetesës me inflacionin me rritjen e çmimeve dhe rritjen e standardit, dhe kjo e bënë që këta qytetarë me jetuar më keq se sa që kanë jetuar para disa viteve, pikërisht për shkak të politikave jo të harmonizuara dhe të pamenduara që të kemi mundësi me i trajtua këta qytetarë me dinjitetshëm dhe në proporcion me nevojat që ata i kanë”, ka thënë Qelaj për EO.

15 shtatori shënon Ditën Ndërkombëtare të Demokracisë.

Kjo datë është përcaktuar në vitin 2007, me rezolutën e Asamblesë së Përgjithshme të Kombeve të Bashkuara, e cila inkurajon qeveritë që të forcojnë programet kombëtare për promovimin dhe konsolidimin e demokracisë.

Kjo ditë në vende të ndryshme të botë shënohet me aktivitete të shumta.

Tema e kësaj dite për vitin 2024 është “Fuqizimi i brezit të ardhshëm”.

15 shtatori shënon Ditën Ndërkombëtare të Demokracisë.

Sot është Ditën Ndërkombëtare të Demokracisë, kjo datë është përcaktuar në vitin 2007, me rezolutën e Asamblesë së Përgjithshme të Kombeve të Bashkuara.

Tema e kësaj dite për vitin 2024 është “Fuqizimi i brezit të ardhshëm”.

Ministri i Mjedisit, Planifikimit Hapësinor dhe Infrastrukturës, Liburn Aliu, ka thënë për Ekonomia Online se janë në pritje të Maqedonisë së Veriut për fillimin e punimeve për ndërtimin e autostradës Prishtinë-Tetovë.

Ky investim sipas tij është në interes të të dyja shteteve, pasi zhvillon turizmin dimëror. Aliu ka thënë se detyrat që i takojnë si Qeveri i kanë përfunduar, sa i përket daljes nga autostrada “Ibrahim Rugova”.

“Rruga Prizren-Tetovë, pasi që kemi realizuar marrëveshjet mes dy qeverive dhe është nënshkruar prej dy kryeministrave asaj kohe, kemi filluar atëherë me fazat tjera, gjë që është dashur që të ratifikohen këto marrëveshje nëpër Kuvend të ndajmë edhe buxhet. Kemi filluar nga ana e Kosovës, që pjesën tonë të punës që i përket rruga nga dalja jugore autostradës ‘Ibrahim Rugova’ në Prizren, deri në afërsinë e tunelit e kemi filluar tashmë realizimit kanë përfunduar procedurat e tenderimit, është nënshkruar kontrata dhe kanë filluar punimet”, ka deklaruar Aliu.

Krahas kësaj rruge, Aliu ka thënë se janë edhe disa projekte tjera, siç është ajo që lidh Plavën me Deçanin. Për këtë, ka thënë se kanë zhvilluar takime me autoritetet malazeze.

“Kjo nuk do të jetë vetëm në interesin e Prizrenit dhe Tetovës, do të jetë në funksion edhe të zhvillimit të turizmit në të dyja anët. Mos të harrojmë që në atë anë është ‘Kodra e Diellit’ si zonë e skijimit këtej është Brezovica. Me planin e ri hapësinorë presin të dalin edhe zona të tjera të rëndësishme të skijimit të cilat të gjitha do të mundin të frekuentohen në të dyja anët po ashtu kjo do të lidhet edhe me autostradën ‘Ibrahim Rugova’ që do të lidh Tiranën me Prishtinën. Në Tetovë do të lidhet edhe me korridorin 8-të, gjë që i bie që do të shkurtohet rruga për një pjesë të madhe të qytetarëve. Ka qenë edhe projekt prej kohësh i menduar po e merr rrugën dhe po shkon drejt ndërtimit, na presin edhe projekte të tjera të cilat do ta lidhin Plavën me Deçanin, kemi pasur takim në Podgoricë me zëvendëskryeministrin dhe me ministrin e Jashtëm, në mënyrë që marrëveshjet që kemi pasur të zhvillojmë më tej për realizimin e kësaj rruge”, ka thënë Aliu, teksa ka folur edhe për ndërtimin e rrugëve në Kosovë.

Prioritet ka thënë se është ndërtimi i rrugës Prishtinë-Podujevë, ndërsa në të njëjtën kohë po vazhdojnë punimet edhe rruga Dollc-Zahaq. Për këto investime, Aliu ka thënë se po punimet me një dinamikë të përshpejtuar.

“Janë në proces të ndërtimit përderisa rruga Prishtinë-Podujevë, është në proces të rregullt dhe po shkon cdo gjë në kohë dhe është mjaftë i shpejtë i realizimit të punimeve. Po ashtu edhe rruga Prishtinë-Pejë ato segmete që janë filluar tashmë janë duke shkuar mirë. Kemi të hapur tenderin nga Zahaqi deri në Dolls e që shpresoj që shpejtë do të mund ta përmbyllin edhe këtë tender, me nënshkrimin e kontratave. Këto dy rrugë janë duke shkuar në proces mjaftë të shpejtë, kemi dinamikë të përshpejtuar edhe tek autostrada e Gjilanit, ku mund të themi se njëri ndër rrugët të cilat ka pasur probleme më së shumti, bashkë me rrugën e Dollc-Gjakovë, të cilat janë të dyja projekte që ka pasur pengesa të paparashikueshme, me aq shumë probleme të projektit, të shpronësimeve të cilat kemi pasur vështirësi për zgjidhjet e tyre por kemi arritur që t’i realizojmë dhe me i zgjidh në masë të madhe”, ka thënë Aliu.

Sot mbushen 26 vjet nga beteja e Kaqandollit.

Beteja e Kaqandollit është njëra ndër betejat më të lavdishme të UÇK-së, jo vetëm në Llap, por në tërë Kosovën.

Ajo ishte beteja e parë frontale në Llap që e zhvilloi UÇK-ja kundër forcave serbe. Gjatë kësaj beteje treditore nga radhët e UÇK-ës ranë shtatë dëshmorë të Ushtrisë Çlirimtare të Kosovës: Bekim Maliqi, Bekim Lushaku, Nazmi Zhegrova, Fadil Sejdiu, Habib Zeka, Islam Rekaliu dhe Selim Rekaliu.

Drejtori i Investimeve Kapitale në Komunën e Prishtinës, Krenar Xhaferi, ka shprehur shqetësimin për pengesat që u janë shkaktuar nga Ministria e Financave, në projekte e komunës, duke theksuar se vetëm në vitin 2023 si komunë janë penalizuar për 28.5 milionë euro.

Në një intervistë për Ekonomia Online, Xhaferi, ka thënë se për këtë vit, mbështetja financiare është vetëm 300 mijë euro nga qeveria në tri projekte.

Ai ka kërkuar që “Prishtina të mos shihet në prizma politik”, duke theksuar se Kryeqyteti nuk e meriton këtë logjik.

“Kemi lidhur edhe kontratat e intervenimeve emergjente për tri vite, janë mbi 7 milionë investime, ndërsa projekti i fundit i iniciuar bashkë me kryetarin është tek Santea një trajtim i komplet zonës. Më herët e kemi bërë edhe do të fillojë. Vetëm në vitin 2023 ne jemi penalizuar diku deri në muajin gusht për 28.5 milionë euro pra ka qenë një situatë kaotike me Ministrinë e Financave, kujtojë që kemi pasur ballafaqimin kryesor gjatë kësaj qeverisë dhe nuk e kuptoj logjikën e kanë ndjekur ata në relacion me Prishtinën. Sepse Prishtina nuk e meriton këtë logjik në çfarëdo situate, unë vet kam qenë pjesë e nivelit qendror dhe me Prishtinën kemi pasur relacione jashtëzakonisht të mira në kuptim të zhvillimit të qytetit sepse Prishtinën nuk guxon me pa në prizma politik”.

“Prej projekteve të cilat deri tani jemi mbështetur, jemi mbështetur me 300 mijë euro për sivjet, në tri projektin e unazës, e rrugës Kolovicë dhe Sofali edhe në projektin e Bajram Bahtiri të cilin e kemi për vazhdim të këtij projekti edhe dy kilometra të tjerë. Krejt mbështetja financiare për vitin që po flasim tani është 300 mijë euro. Kemi një marrëveshje bashkëpunimi me Ministrinë e Infrastrukturës për depërtimin e Veterrikut që jemi duke finalizuar projektin për me realizuar bashkë me të”, theksoi Xhaferri.

Xhaferi ka thënë se unaza e qytetit të Prishtinës, është duke hasur në vështirësi për shkak të mungesës së përkrahjes nga niveli qendror, kjo pasi sipas tij, nuk po aprovohet nga niveli qendror për zhvillimin e projektit.

Këto pengesa, sipas Xhaferit, janë bërë një nga sfidat më të mëdha për realizimin e projekteve të rëndësishme infrastrukturore dhe po ndikojnë në përparimin e tyre në Prishtinë. Ai ka shprehur nevojën për një bashkëpunim më të ngushtë me autoritetet qendrore për të siguruar që projektet e rëndësishme të avancojnë pa vonesa të panevojshme.

“Në pjesën e shtyrjes së projekteve, tek pjesë Agim Ramadani e kemi një kundërshtim me Ministrinë e Kulturës, sepse është pjesë e zonës historike dhe prape edhe aty kemi tendenca për bllokim të projekteve në kuptim të tenderimit të këtyre projekteve nuk ka pasur pengesa të niveli qendror. Por pengesat janë në zhvillim të projekteve, në fazën e tenderimit nuk janë pjesë e komunës por janë në zhvillimet e projektit. Ne kemi unazën e qytetit e cila pret përkrahjes prej nivelit qendror, pret garancionin dhe nuk aprovohet nga niveli qendror për zhvillimin e projektit. Në fillim unaza e qytetit ka kushtuar 250 milionë, kurse në fillimet e veta ka kushtuar 120 milionë, çdo ditë rritet vlera e kostos, tokës, dhe normalisht që kemi rritje edhe të çmimeve dhe kemi ardhur në këtë kosto”, ka thënë ai.

Xhaferi ka njoftuar se kanë shkëputur përmbi 18 kontrata të operatorëve të pa përgjegjshëm.

“Një pjesë e projekteve janë në 90 për qind të përmbushje disa në 70 për qind, shumica do të përmbyllen por projekte janë të mëdha. I kemi shkëputur përmbi 18 kontrata të operatorëve jo të përgjegjshëm, prapë kemi operator jo të përgjegjshëm sepse në terren ballafaqohen, kjo praktikë nuk ka qenë më herët për 10 vite nuk është shkëputur asnjë kontratë”, ka thënë ai.

Instituti Hidrometeorologjik i Kosovës ka bërë të ditur se sot do të mbajë mot i vranët dhe me intervale me diell, ku vranësirat vende-vende parashihen të sjellin riga shiu.

Sipas këtij instituti, gjatë ditës së sotme do të do të ketë temperatura maksimale deri në 15 gradë Celsius.

“Nga një industri e brishtë dhe relativisht e pazhvilluar prodhuese, Kosova sot është burim i produkteve cilësore, të cilat plasohen jo vetëm në tregjet e vendeve të CEFTA-s, por edhe më gjerë, në Bashkimin Evropian, në Shtetet e Bashkuara dhe në shtete të tjera”.

Kështu shprehet Arian Zeka, kryetar i Odës Ekonomike Amerikane në Kosovë, sipas të cilit të qenët pjesë e Marrëveshjes për Tregti të Lirë të Evropës Qendrore (CEFTA), i ka ndihmuar Kosovës të përmirësojë cilësinë e prodhimeve.

Palë të Marrëveshjes, e cila synon rritjen e tregtisë së mallrave dhe shërbimeve, eliminimin e barrierave tregtare mes palëve dhe tërheqjen e investimeve, janë gjashtë vendet e Ballkanit Perëndimor, plus Moldavia, që prej vitit 2006.

Nënshkrueset e mëparshme dhe themeluese të CEFTA-s janë larguar prej saj, pas anëtarësimit të tyre në BE. Zbatimi i Marrëveshjes është parakusht edhe për vendet e tjera që synojnë integrimin në bllokun evropian, shkruan Radio Evropa e Lire.

Si u aktualizua CEFTA?
Emri i saj është përmendur shpesh ditëve të fundit, pas kërkesës që iu bë Kosovës nga i dërguari i Gjermanisë për Ballkanin Perëndimor, Manuel Sarrazin, për heqje të ndalesës ndaj mallrave të prodhuara në Serbi, sepse një gjë e tillë është kundër parimeve të CEFTA-s.

Në këmbim, diplomati gjerman ka ofruar që Kosova të përfaqësohet në CEFTA me emrin e saj, me fusnotë, dhe jo përmes Misionit të Organizatës së Kombeve të Bashkuara në Kosovë (UNMIK).

Kryeministri i Kosovës, Albin Kurti, nuk është bindur.

Qeveria kosovare i ka ndaluar importet nga Serbia në qershor të 2023-tës, me arsyetimin se ato po rrezikojnë sigurinë e Kosovës, dhe se, përmes tyre, mund të hyjnë edhe armë në vend.

Megjithatë, autoritetet e Kosovës nuk kanë dalë asnjëherë me ndonjë raport vlerësues se si ka ndikuar kjo masë në nivelin e sigurisë.

Për Zekën, kjo masë ka goditur interesat komerciale të partnerëve të Kosovës.

“E kemi konsideruar masë paradoksale, duke marrë parasysh që të njëjtën kohë vijon importi i gjysmë-produkteve dhe lëndëve të para, ndërsa në anën tjetër, mallrat përfundimtare, të cilat në masë të madhe prodhohen nga ndërmarrjet që janë në pronësi të huaj në Serbi – po flasim për kapital amerikan dhe kapital evropian – nuk lejohet të hyjnë në territorin e Republikës së Kosovës”, konsideron Zeka.

Ai, po ashtu, thotë se përfitimet e Kosovës nga CEFTA janë shumëdimensionale, teksa përmend:

Përmirësimin e ofertës, ose rritjen e atraktivitetit të Kosovës në sytë e investitorëve të huaj;

Ndjekjen e reformave ekonomike;

Ndryshimin radikal në strukturën e eksporteve, në llojet e produkteve dhe në llojet e mallrave.

Si Zeka, ashtu edhe Naim Rashiti, drejtor i Grupit Ballkanik për Politika në Prishtinë, thonë për Radion Evropa e Lirë se Kosova duhet ta shfuqizojë sa më shpejt ndalesën për importet nga Serbia.

“Kosova duhet t’i heqë këto masa dhe duhet të sillet si një aktore kryesore, si një aktore e rëndësishme dhe e drejtë, dhe e besueshme në tregtinë e përbashkët rajonale”, shprehet Rashiti.

Në vend të ndalesës, Zeka e Rashiti besojnë se Kosova duhet t’i shfrytëzojë mekanizmat ligjorë të paraparë nga CEFTA, për t’u ankuar për barrierat tregtare që i vendosen asaj nga Serbia dhe Bosnjë e Hercegovina.

Për ndalimin e importeve nga Serbia, Kosova është kritikuar edhe në raportin e sivjetmë të Departamentit amerikan të Shtetit për klimën e të bërit biznes në Kosovë.

Aty është thënë se “ndalesa ka shkaktuar konfuzion të madh tek importuesit dhe ka ndikuar negativisht te kompanitë në pronësi të subjekteve të huaja në Kosovë, për shkak të ndërprerjes në zinxhirin e furnizimit”.

Në Raportin e Progresit për Kosovën, për vitin 2023, Komisioni Evropian ka thënë se ndalesa është në kundërshtim me frymën e Marrëveshjes së Stabilizim-Asociimit, që përbën marrëveshjen e vetme kontraktuale të Kosovës me BE-në.

Pse kërkesa po përsëritet tash?

Rashiti beson se insistimi gjerman qëndron te përgatitjet për takimin e radhës në kuadër të Procesit të Berlinit – platformë formale e politikës së BE-së ndaj rajonit të Ballkanit – dhe për marrëveshjet e reja rajonale që synohet të arrihen aty.

Procesi i Berlinit ka për qëllim të ndihmojë në zhvillimin e rajonit dhe në përgatitjen e tij për anëtarësim në bllokun evropian.

Ambasadori gjerman në Kosovë, Jorn Rohde, ka paralajmëruar se nëse është e nevojshme, vendet e Ballkanit do të ecin përpara drejt bashkëpunimit rajonal edhe pa Kosovën.

Rashiti thotë se këtë skenar e dëshirojnë disa vende të Ballkanit – Serbia, Bosnja dhe disa elementë brenda Malit të Zi – andaj Kosova nuk duhet të lejojë diçka të tillë.

“Procesi i Berlinit dhe të gjitha organizatat që kanë rrjedhur nga ai, apo i janë bashkuar rolit të Procesit të Berlinit, janë i vetmi instrument ku Kosova ulet e barabartë me vendet tjera. Kosova duhet, me çdo kusht, të bëjë më të mirën për të ruajtur vendin e saj dhe për t’i shtyrë agjendat e saj”, vlerëson Rashiti.

Për më shumë, sipas tij, ndonjë dështim eventual i Procesit të Berlinit ndihmon në shfaqjen apo ringjalljen e iniciativave tjera, si Ballkani i Hapur, që është kundërshtuar vazhdimisht nga Kosova.

Zeka frikësohet për “pasoja të paparashikuara” nga një izolim i tillë ekonomiko-politik i Kosovës, por nuk sheh gatishmëri të Qeverisë për heqje të bllokadës, duke marrë parasysh se zgjedhjet e ardhshme janë afër.

Donald Trump ka refuzuar të marrë pjesë në një debat të dytë presidencial me Kamala Harrisin përpara zgjedhjeve të nëntorit, raporton BBC.
Ai deklaroi të enjten, pas përballjes së parë mes tyre në Filadelfia, se Harris kërkon një rishfaqje vetëm sepse ai e kishte fituar qartësisht debatin.

Sondazhet e para treguan se publiku mendonte që Harris kishte performuar më mirë se Trump, megjithatë, ish-presidenti i kërkoi Harrisit të fokusohej te puna si nënkryetare.

Ndërkohë, Harris në një miting në Karolinën e Veriut theksoi se qytetarët meritojnë një debat të dytë, duke theksuar rëndësinë e zgjedhjeve të ardhshme.

Të dy kandidatët pretenduan fitoren pas debatit, por Trump akuzoi moderatorët për favorizim të Harrisit.

Edhe pse kishte diskutime për një debat të dytë më 25 shtator, Trump deklaroi se nuk është e nevojshme një përballje tjetër.