ATV

Author: ATVLive

  • “Kosova A”, u konfirmua si pjesë e “Planit A”, për furnizim me energji elektrike edhe për një vit

    “Kosova A”, u konfirmua si pjesë e “Planit A”, për furnizim me energji elektrike edhe për një vit

    Përgatiti: Fatlum Jashari

    Në mungesë të kapaciteteve të reja prodhuese të energjisë elektrike, Termocentrali Kosova A, i vënë në funksion para më se gjysmë shekulli dhe i paraparë të mbyllej më 2017, u konfirmua si pjesë e “Planit A” të furnizimit edhe këtë dimër.

    Zyra e Rregullatorit për Energji ia vazhdoi licencën për prodhimin e energjisë edhe për një vit këtij termocentrali, i cili me tri njësi prodhuese arrin kapacitetin rreth 390 megavatë/orë, apo rreth 40% të totalit të kapaciteteve nga thëngjilli.

    Pasi tha se Kosova ka humbur mundësinë të ketë kapacitete të reja prodhuese me thëngjill, eksperti i ekonomisë, Safet Gërxhaliu, listoi disa probleme lidhur me mungesën e investimeve në këtë sektor.

    “Në anën tjetër, Kosova e ka humbur betejën përballë mafies energjetike dhe, si duket, lobimi i tyre ka qenë aq i fuqishëm sa që e ka pezulluar ose parandaluar fillimin e ndërtimit të kapaciteteve të reja. Dhe, kur krejt kësaj i shtohet burokracia sa i përket energjisë alternative, qoftë me erë – qoftë me panele solare, vërtet duket se Kosova është shtet i gjykuar që të jetë i varur nga importi i energjisë”, tha Gërxhaliu.

    Duke kritikuar politikat vendimmarrëse, ai theksoi se në vend të investimeve në kapacitete të reja, Kosova gjendet në një situatë sanuese.

    “Nëse bëhet një kalkulim i thuktë i investimeve në mirëmbajtjen e kapaciteteve aktuale energjetike, qoftë në Kosovën A apo B, që nga viti ‘99 e deri sot, e them me përgjegjësi morale dhe profesionale se Kosova ka shpenzuar më shumë sesa të ndërtojë dy apo tri termo-elektrana të reja, që do ta faktorizonin Kosovën në aspektin strategjik, sa i përket energjisë elektrike”, tha Gërxhaliu.

    Duke e vlerësuar të realizueshëm objektivin strategjik për kapacitete prej 1200 mw/h nga burimet e ripërtërishme deri më 2031, eksperti i energjisë, Naim Bujupi, theksoi se ndërtimi i tyre të lejonte mbylljen e Kosovës A.

    “Ideja është që termocentrali Kosova A të mbyllet. Në strategji është vendosur që të përdoret si kapacitet rezervë, që d.m.th. të përdoret vetëm gjatë dimrit kur kemi mungesë të energjisë. Ndërsa, në strategji është vendosur që në vitin 2024 të rivitalizohet një njësi e Kosovës A dhe po të njëjtin vit të vendoset kur mbyllen dy të tjerat”, tha Bujupi.

    Investimet për rivitalizim në vend se për kapacitete të reja, ai i arsyeton me periudhën kalimtare drejt energjisë së gjelbër dhe koston e përgjithshme.

    “Në fazën tranzitore, këto investime janë vetëm për të siguruar furnizimin me energji për një periudhë derisa të ndërtohen kapacitetet e reja të burimeve të ripërtërishme. Pra çështja është se gjithmonë te një projekt në sektorin e energjisë shikohet kost-efektiviteti i projektit. Pra, sigurisht rivitalizimi i njërës njësi na garanton energji me çmime më të ulëta”, tha Bujupi.

    Në strategjinë e energjisë është paraparë që për rivitalizimin e një njësie të termocentralit Kosova A, këtë vit dhe tjetrin, të investohen 120 milionë euro.
    Ndërsa, në total, nga ky vit deri më 2025, parashihen më shumë se 415 milionë euro për investimeve kapitale, në dy termocentralet ekzistuese me thëngjill.

  • Dështon tenderi për pajisjet e repartit për IVF në QKUK

    Dështon tenderi për pajisjet e repartit për IVF në QKUK

    Përgatiti: Armand Hoti

    Ministri i Shëndetësisë, Arben Vitia, premtoi se do të bëhet brenda vitit, por çiftet ende nuk mund të realizojnë fekondimin artificial në Qendrën Klinike dhe Universitare të Kosovës.

    Tenderi me vlerë prej 1.5 milion eurove, për sigurimin e pajisjeve që mundësojnë këtë shërbim, dështoi për të dytën herë.

    Sipas Ministrisë së Shëndetësisë, shkak për këtë është mungesa e ofertimit për disa pajisje.

    “Gjatë procesit tenderues janë pranuar shumë pyetje sqaruese dhe janë bërë korrigjimet e kërkuara, me qëllim të lehtësimit dhe mundësisë më të gjerë për ofertim. Por, meqenëse nuk kishte oferta të përgjegjshme, pritet që gjatë ritenderimit, të arrijmë t’i kontraktojmë”, thuhet në përgjigjen e MSH-së.

    Ndërkohë, në seancën plenare të ditës së sotme në Kuvendin e Kosovës, si rend dite ishte edhe votimi në parim i Projektligjit për shëndet riprodhues dhe fertilizim të asistuar mjekësor. Mirëpo, kjo pikë dështoi të trajtohet, duke u shtyrë për një datë tjetër.

    Në kuadër të këtij projektligji parashihet që edhe gratë e pamartuara mbi moshën 18-vjeçare, që janë në gjendje të mirë shëndetësore dhe sociale dhe të afta për fertilizim dhe për përkujdesje prindërore, të marrin shërbimin e IVF.

    Më parë, për shkak të kundërshtimit të disa deputetëve, ky projektligj nuk kaloi në Kuvend.

    Shërbimi në fjalë në Kosovë ofrohet vetëm në klinikat private.

    Ndërkaq, klinika në kuadër të QKUK-së, ku IVF pritet të ofrohet, sa i përket aspektit infrastrukturor është e gatshme, vetëm se mungojnë pajisjet.

    Muaj më parë, presidentja e Kosovës, Vjosa Osmani, u shpreh se në Kosovë çiftet kanë shpenzuar rreth pesë milionë euro për fekondim artificial në klinikat private.

  • Ekspertët, armët e konfiskuara mund të vihen në funksion të policisë

    Ekspertët, armët e konfiskuara mund të vihen në funksion të policisë

    Përgatiti: Arian Hajdaraj

    Një veturë që ishte e konfiskuar, së fundmi është vënë në funksion të Ministrisë së Punëve të Brendshme.

    Ndërkohë, 1600 armë të konfiskuara, patën tjetër fat: ato u shkatërruan.

    Sipas njohësve të fushës së drejtësisë, edhe armatimi mund të vihet në funksion të institucioneve të sigurisë, megjithëse Ministria e Punëve të Brendshme, të paktën deri në transmetimin e kësaj kronike, nuk ka treguar nëse mund të ndodhë diçka e tillë.

    “Pasi kanë përfundu procedurat e ekzaminimit, ankimimit, ato me lejen e Prokurorisë, Policia e ka të drejtën, edhe pse rregullativë ligjore nuk ka… sepse në ligjin e armëve nuk flitet për këtë çështje”, tha Rrahman Sylejmani, kolonel në pension.

    Koloneli tani në pension, Rrahman Sylejmani, thotë se të paktën në të kaluarën, Policia ka përdorur armë që ishin të konfiskuara.

    “Sidomos me armë të gjata ka ndodhur… siç janë AK47… që janë në dispozicion të Policisë Kufitare dhe njësisë speciale… Dhe ato janë marrë një sasi dhe nuk ka asgjë të keqe…”, tha Sylejmani.

    Megjithatë, para se të vihen në funksion të institucioneve të rendit, ka procedura.

    “Pas përfundimit të procesit gjyqësor dhe shqiptimit të dënimit për personin përkatës… Sigurisht duhet të përzgjidhen edhe kalibrat që na shërbejnë…”, tha Drizan Shala, njohës i sigurisë.

    Policia e Kosovës, në vit, mesatarisht konfiskon nga 1400 deri në 1600 armë pa leje. Të mërkurën, në një shkritore në Ferizaj, u shkatërruan afërsisht 1600 sosh.

  • Filloi faza e dytë testuese për ndotjen e ajrit nga automjetet

    Filloi faza e dytë testuese për ndotjen e ajrit nga automjetet

    Përgatiti: Pranvera Krasniqi

    Ministria e Mjedisit, Planifikim Hapësinor dhe Infrastrukturës, ka zhvilluar fazën e dytë për shkallën e ndotjes së ajrit nga automjetet.

    Sipas zëvendësministrit të këtij dikasteri, Avni Zogiani, automjetet që lirojnë gazra mbi shifrën 5, do të marrin rekomandime të detyrueshme për t’iu nënshtruar kontrollit teknik sipas databazës.

    “Ky projekt është bërë në bashkëpunim fantastik me Policinë e Kosovës, natyrisht edhe me departamentet e ministrisë tonë dhe akterë të tjerë. Ne shpresojmë që shumë shpejt do të kemi të dhëna të sakta mbi burimin, mbi atë se çfarë mase janë automjetet kontribuuese në mungesën e kualitetit të ajrit në Kosovë”, tha Zogiani.

    Duke pasur parasysh ndotjen e ajrit nga numri i madh i automjeteve, Zogiani thekson rëndësinë e zëvendësimit të veturave me karburante, me ato elektrike.

    “Nëse automjetet janë ndotëse, mund ta supozojmë tashmë, por në çfarë mase do ta kuptojmë shpejt, ndotës shumë të mëdhenj. Atëherë duhet të marrim politika që të shkojmë kah zëvendësimi i automjeteve me karburante me mjete elektrike, me transport elektrik, ose zëvendësimi i makinave individuale me transport publik”, tha Zogiani.

    Në realizim të projektit ka kontribuar edhe qeveria japoneze.

    “Është Qeveria e Kosovës ajo që ka kërkuar asistencën nga Qeveria e Japonisë. Kosova është shtet i ri, 15-20 vjet kështu që ka nevojë ende për asistencë, dhe në të njëjtën kohë Japonia e ka pasur të njëjtën përvojë me ndotjen diku 40-50 vjet përpara, kështu që mund t’ia japim ekspertizën tonë Qeverisë së Kosovës, për të përmirësuar procedurat administrative“, tha Kuwahara Fumihiko, udhëheqës i projektit nga “JICA”.

    Kjo është faza e dytë e këtij projekti nga agjencia japoneze “JICA”, që ka filluar prej rreth një viti e gjysmë dhe parashihet të përfundojë në fund të vitit 2025.

  • Kuvendi do të hetojë dyshimet për rezervat shtetërore

    Kuvendi do të hetojë dyshimet për rezervat shtetërore

    Përgatiti: Krenare Mulliqi

    Pas debatit 4 orësh, Kuvendi arriti të themelojë Komisionin Hetimor për Rezerva shtetërore.

    Drejtues i këtij komisioni u zgjodh deputeti i PDK-së, Rashit Qalaj, derisa zëvendëskryesuese deputetja Valentina Bunjaku e LDK-së.

    Por votimit të këtij komisioni i parapriu një debat i nxehtë mes pozitës dhe opozitës.

    Kjo pasi kundër themelimit të këtij komisioni ishte Lëvizja Vetëvendosje.

    Mirëpo, fjalimi i Kusari-Lilës u tentua të pengohej nga ish-partiaku i saj, i cili lëshoi bisedën telefonike që deputetja e LV-së e kishte realizuar me deputetin serb Slavko Simiq.
    Pavarësisht kësaj, debati kishte vazhduar.

    Opozita krejt ndryshe argumentonte nevojën për themelimin e Komisionit hetimor për Rezerva Shtetërore.

    Ndërsa, deputeti i Lëvizjes Vetëvendosje, Dimal Basha, nuk e la pa i hedhur kunja opozitës.

    Debat më të ashpër pati mes deputetit Driton Selmanaj e deputetes Kusari-Lila, të cilët nuk e lanë pa ia përmendur të kaluarën njëri-tjetrit.

    Pjesë e këtij komisioni nga Lëvizja Vetëvendosje do të jenë pesë anëtarë, PDK-ja dhe LDK-ja me nga dy, derisa AAK-ja dhe grupet joshumicë do ta kenë vetëm nga një përfaqësues.

    Mandati i komisionit do të jetë 6 muaj.

    Në muajin e shkuar, Prokuroria Speciale arrestoi dy zyrtarë të Ministrisë së Industrisë, Tregtisë dhe Ndërmarrësisë dhe një biznesmen nën dyshime për ‘’Keqpërdorim të detyrës zyrtare’’, si dhe ‘’Dhënie të ndihmës në kryerjen e veprës penale të Keqpërdorimit të detyrës zyrtare’’.

  • Në Kuvend votohen disa projektligje, dështon miratimi i marrëveshjeve ndërkombëtare

    Në Kuvend votohen disa projektligje, dështon miratimi i marrëveshjeve ndërkombëtare

    Përgatiti: Benita Zeneli

    Për herë të parë ishte në rend dite në prill e pas më shumë se 5 muajve u arrit që të votohet për të.

    Megjithatë, rezoluta e propozuar nga opozita për punën dyvjeçare të Qeverisë Kurti u hodh poshtë, pasi nuk i mori votat e mjaftueshme për miratim.

    Për të votuan 19 deputetë, kundër ishin 49, kurse tre abstenuan.

    Ndërkohë, në rend dite në seancën e së enjtes, pati edhe marrëveshje ndërkombëtare.

    Ani pse pati mbështetjen e Lidhjes Demokratike të Kosovës, nuk pati kuorum të mjaftueshëm për ta votuar ratifikimin e Marrëveshjes së financimit mes Kosovës dhe Bankës Evropiane për Investime, për projektin “Rehabilitimi i linjës hekurudhore 10 B”.

    “Do të lejoj operimin e kësaj hekurudhe deri në 100 km/h në shumicën e seksioneve të linjës, në përputhje me standardet e Bashkimit Evropian”, tha ministri i Financave, Hekuran Murati.

    “Ne si grup parlamentar e mbështesim këtë marrëveshje ndërkombëtare, ky projekt ka shtatë-tetë vjet që ka nisur të realizohet. Më vjen mirë që po shkon drejt finalizimit, së paku pjesës së financimit”, tha deputeti i LDK-së, Avdullah Hoti.

    “Jemi vend i sanksionuar, jemi vend që po izolohemi çdo ditë e më tepër dhe nuk ka kurrfarë kuptimi të marrim pjesë në votimin e kësaj marrëveshjeje”, tha deputeti i PDK-së, Abelard Tahiri.
    Ndërkohë, LDK-ja përkundër dy partive të tjera opozitare, PDK e AAK, u dha përkrahje edhe disa projektligjeve.

    Me 62 vota për, u miratua në lexim të dytë Projektligji për parandalimin dhe mbrojtjen nga dhuna në familje, dhuna ndaj grave dhe dhuna në baza gjinore.

    Gjithashtu, në seancë, me 66 vota për u miratua edhe Projektligji për të drejtat e autorit dhe të drejtat e përafërta.

  • Një muaj paraburgim për tre të dyshuarit serbë për krime, Luftekostiq e Elezoviq dyshohen për vrasje

    Një muaj paraburgim për tre të dyshuarit serbë për krime, Luftekostiq e Elezoviq dyshohen për vrasje

    Përgatiti: Nora Luta

    Rruga nëpër të cilën kaluan mijëra civilë shqiptarë të dëbuar me forcë nga shtëpitë e tyre, 23 vjet pas ka marrë tjetër pamje. Por, për Musli Ukën nga Vushtrria sa herë kalon në Studime përjetimet janë të njëjta.

    Përveç rrugëve të këtij fshati, Uka dyshon se Ilija Elezoviq bashkë me disa serbë të tjerë, u prinë e u treguan rrugët paramilitarëve serbë, në ofensivën ku kishin mbetur të vrarë qindra civilë shqiptarë të kësaj komune.

    E nën dyshimet për krime lufte pikërisht në territorin e kësaj Komune, Elezoviq që është emër i njohur edhe për banorët e tjerë, bashkë me Dragan Milloviq, dhe Zoran Kostiqin, do të qëndrojnë në burg të paktën për një muaj.

    Ata një ditë pasi u arrestuan u sollën në Departamentin Special të Gjykatës Themelore në Prishtinë, për të marrë pjesë në seancën për caktimin e masës së paraburgimit.

    Por, dolën të pakënaqur me vendimin, e të indinjuar u panë edhe familjarët që qëndruan në oborrin e Pallatit të Drejtësisë, më shumë se katër orë.

    “Për fat të keq, gjykatësi pranoi një kërkesë të pabazuar mirë për caktimin e masës së paraburgimit dhe më duhet të them se për fat të keq prokuroria speciale as nuk ka fuqi e ndoshta as dëshirë, që këto raste t’i kryejë në përputhje me ligjin”, tha Ljubomir Pantoviq, avokat i Ilija Elezoviqit.

    Megjithatë, në dosjen e Prokurorisë Speciale të siguruar nga ATV-ja, tre të arrestuarit dyshohet se morën pjesë në dëbimin me forcë të rreth 50 mijë civilëve, në Komunën e Vushtrrisë, gjatë muajit maj të vitit 1999.

    “Pasi i urdhëruan të ulen, me mjete të forta i goditën nëpër trup dhe kokë. Më pas i ndanë burrat nga pjesëtarët e tjerë të familjes dhe i vendosën në kamionë. Fillimisht i dërguan në sallën e sporteve në Vushtrri ku u urdhëruan të dorëzojnë gjithçka që kishin, me premtimin se do të liroheshin. Ata të cilët dorëzuan gjësendet që i posedonin nuk janë liruar, por janë rrahur në mënyrë çnjerëzore e më pas u vendosën në burgun e Smrekonicës”, thuhet në dosjen e Prokurorisë.

    Sipas dosjes, Zoran Kostiq ishte përgjegjës edhe për masakrën ndaj familjes Ujkani, ndërsa Ilija Elezoviq dyshohet se në Nadakoc kishte plagosur një person.

    “Më 24 shkurt 1999, i akuzuari Illija Ellezoviq, i uniformuar, bashkë me disa persona të tjerë të paidentifikuar, në rrugën nga Vushtrria deri në fshatin Nadakoc, rreth orës 18, me veturë të bardhë të llojit Opel, i armatosur me armën snajper, qëlloi viktimën Sabit Ferizi, duke e plagosur në këmbë të majtë. Në mars të vitit 1999, në fshatin Reznik, në shtëpinë e Shaip Zenelit, ishte i stacionuar një grup i policëve dhe paramilitarëve serbë. Këtë grup e udhëhiqte Zoran Kostiq, i cili ishte komandant i tyre dhe secilin aksion të forcave serbe të organizuar në shtëpinë e Shaip Zenelit e udhëhoqi Zoran Kostiq, siç ishte masakra ndaj familjes Ujkani”, thuhet në dosjen e Prokurorisë.

    Prokuroria tutje ka kërkuar që të dyshuarit të mbahen në burg, pasi ka theksuar se të arrestuarit posedojnë pasaporta të shtetit serb dhe mund të arratisen.
    Tre të akuzuarit, të gjithë ishin pjesëtarë të MUP-it serb, ndërkaq, Dragan Milloviq ishte edhe pjesëtar i Policisë së Kosovës që nga viti 2013.

  • Rama qartëson realitetin e pavarësisë së Kosovës në KS të OKB-së

    Rama qartëson realitetin e pavarësisë së Kosovës në KS të OKB-së

    Përgatiti: Armand Hoti

    Për herë të parë, Shqipëria kryesoi mbledhjen e Këshillit të Sigurimit të Kombeve të Bashkuara.

    Duke drejtuar sesionin me temë “Ruajtja e Paqes dhe e Sigurisë së Ukrainës”, kryeministri Edi Rama tha se Rusia nuk mund ta përdorë pavarësinë e Kosovës si arsyetim për të pushtuar territore të huaja.

    “Rusia dhe të tjerë janë përpjekur ta keqpërdorin realitetin e ndryshuar të Ballkanit Perëndimor e sidomos lindjen e Republikës së Kosovës, për të justifikuar ëndrrat e tyre apo makthet e tyre që kanë eksportuar. Pavarësisht sa përpiqeni pavarësia e Kosovës është sanksionuar nga Gjykata Ndërkombëtare Penale, kreu 14 i kësaj Karte të OKB-së. Gjykata Ndërkombëtare Penale nuk mund të shërbejë si pretekst për rrëmbim territoresh, apo aneksim të paligjshëm”, tha Rama.

    Por për paralelet e Ramës mes Kosovës dhe luftës në Ukrainë, njohës të politikës ndajnë qëndrime të ndryshme.

    Profesori Basri Muja thotë se Shqipëria ka humbur një rast të rrallë për ta tematizuar çështjen e Kosovës në organizatën më të rëndësishme në botë.

    “Mendoj se Shqipëria do të duhej që çështjen e Kosovës ta problematizonte më shumë. Nuk mendoj që kryeministri Rama e shfrytëzoi këtë skenë aq sa duhet për ta problematizuar çështjen e Kosovës. Nuk mendoj se Shqipërisë do t’i vijë më ky rast”, tha Muja.

    Kurse, sipas analistit Arbnor Sadiku, deklarata e Ramës, para liderëve botërorë, ishte pozitive në kontekst të qartësimit të legjitimitetit të pavarësisë së Kosovës.

    “Është vendim i drejtë dhe i qëlluar, këtë gjë e ka konfirmuar edhe Gjykata e Drejtësie ndërkombëtare në vitin 2010, ku ka theksuar më tej se Kosova e ka shpallur në mënyrë të drejtë pavarësinë e saj”, tha Sadiku.

    Në këtë mbledhje të Këshillit të Sigurimit, për herë të parë fizikisht ishte i pranishëm edhe presidenti ukrainas, Volodymyr Zelensky.

  • “Ti falesh? Jo bre mos bon hajgare”, llafet kur Kaltrina vendosi të mbulohet

    “Ti falesh? Jo bre mos bon hajgare”, llafet kur Kaltrina vendosi të mbulohet

    Në emisionin STUDIO A në ATV, ishte e ftuar aktorja Kaltrina Zeneli. Ajo në këtë emision bëri një rrëfim për jetën e saj private, por edhe për atë profesionale, sidomos pas kohës kur kishte vendosur ta vë mbulesën islame.

    Ajo ka treguar se është falur edhe para se ta vë mbulesën, madje njerëzit nuk e kanë besuar se ajo bënë namaz.

    “Njerëzit e kanë pa që unë falna, me kanë thënë ‘ti falesh?’, iu ka dukur pak e pamundur”, tregon Kaltrina.

    Në emision, ajo ka zbuluar edhe reagimin e babait të saj kur ia ka kumtuar lajmin se ka vendosur të mbulohet.

    Se si reagoi babai i saj kur e kuptoi se ajo kishte vendosur të mbulohet, mund ta zbuloni në videon e më poshtme:

  • ​Bullgaria dëbon një shtetas rus dhe dy bjellorusë për zbatimin e strategjisë hibride

    ​Bullgaria dëbon një shtetas rus dhe dy bjellorusë për zbatimin e strategjisë hibride

    Një shtetas rus dhe dy bjellorusë janë dëbuar nga Bullgaria, iu është hequr e drejta e qëndrimit dhe iu është ndaluar hyrja në Bullgari për një periudhë prej pesë vjetësh me urdhër të kryetarit të Agjencisë Shtetërore për Sigurinë Kombëtare (SANS), thuhet në një deklaratë për shtyp të SANS të enjten.

    Masat administrative shtrënguese janë vendosur në lidhje me një veprimtari të kryer nga të tre personat kundër sigurisë dhe interesit kombëtar të Bullgarisë, saktësoi Agjencia. “Është marrë informacion për veprimet e personave në fjalë që përfshijnë zbatimin e elementeve të ndryshme të strategjisë hibride të Federatës Ruse për ndikimin e qëllimshëm të proceseve socio-politike në Republikën e Bullgarisë në favor të interesave gjeopolitike ruse”, thuhet në deklaratën për shtyp.

    SANS identifikoi tre të dëbuarit me inicialet: shtetasi rus N.Z. dhe shtetasit bjelloruse E.P. dhe V.B.

    Ambasada ruse në Sofje tha në një postim në Faceook të enjten se “autoritetet bullgare ndërmorën veprimin e vrazhdë, flagrant të dëbimit nga vendi i rektorit të Podvorye të Kishës Ortodokse Ruse në Sofje, Arkimandrit Vassian dhe dy ministrave të Kishës së Shën Nikollës së Mirës”.

    “Ne jemi të indinjuar me faktin dhe formatin e vendimit të marrë nga pala bullgare. Është e qartë se lidershipi aktual bullgar i ka vënë detyrë vetes të shkatërrojë jo vetëm lidhjet socio-politike, kulturore dhe humanitare midis shteteve tona, por edhe për ndërprerjen e marrëdhënieve ndërmjet kishës ortodokse ruse dhe bullgare simotra dhe për hidhërimin e popujve rus dhe bullgar kundër njëri-tjetrit. Veçanërisht tregohet se ky hap është ndërmarrë në festën e Lindjes së Virgjëreshës së Bekuar, një ditë e shenjtë dhe e pastër për famullitë e Kishës Ortodokse Ruse.

    “Ne theksojmë se përgjegjësia për degradimin e shpejtë të bashkëpunimit dypalësh i takon tërësisht palës bullgare”, thuhet në postimin e ambasadës.

    Emri laik i Arkimandritit Vasian është Nikolai Zmeev dhe është përfaqësues i Patriarkut Rus në Bullgari. /BTA/