ATV

Author: ATVLive

  • ​Samir Mane, miliarderi i parë shqiptar në renditjen e Forbes

    ​Samir Mane, miliarderi i parë shqiptar në renditjen e Forbes

    Forbes, revista amerikane e biznesit, ka publikuar raportin e vitit 2025 ku tregon miliarderin më të pasur nga secili shtet në botë.

    Kosova nuk gjendet në këtë listë, mirëpo Forbes ka cilësuar Samir Mane, me vlerë neto 1.4 miliardë dollarë, si personin më të pasur në Shqipëri. Samir Mane është themeluesi dhe presidenti i Grupit BALFIN, një konglomerat investimesh me seli në Tiranë, Shqipëri.

    BALFIN është një nga grupet më të mëdha të investimeve në Ballkanin Perëndimor, duke zotëruar qendra tregtare, dyqane elektronike dhe lodrash, si dhe një bankë dhe projekte luksoze të pasurive të paluajtshme në Shqipëri, transmeton KosovaPress.

    Samir Mane u largua nga Shqipëria në vitin 1991 për t’i shpëtuar regjimit komunist dhe u vendos në Austri si refugjat. Në vitin 1993, ai nisi të tregtonte pajisje shtëpiake për tregun shqiptar. Në vitin 1998, ai themeloi Neptun, një zinxhir dyqanesh elektronike, ndërsa në 2005 u kthye në Shqipëri për të hapur qendrën e parë tregtare në vend.

    Grupi BALFIN ka gjithashtu pasuri të paluajtshme në SHBA, Kanada dhe Austri, si dhe investime në parqe logjistike dhe një universitet privat në Shqipëri. Ndërkohë raporti i Forbes tregon se më i pasuri në botë është Elon Musk, bashkëthemelues dhe kryeshef ekzekutiv i Tesla-s, me 342 miliardë dollarë. I lindur me dy shtetësi, të Afrikës së Jugut dhe Kanadasë, ai mori shtetësinë amerikane në vitin 2002 dhe ka pasur SHBA-në si vendbanim kryesor që nga atëherë.

  • Kurti takohet me Nenad Rashiqin, merr mbështetjen e tij për formimin e qeverisë

    Kurti takohet me Nenad Rashiqin, merr mbështetjen e tij për formimin e qeverisë

    Kryeministri në detyrë, Albin Kurti, në kuadër të konsultimeve për formimin e qeverisë së re,

    u takua me kryetarin e Partisë për Liri, Drejtësi dhe Mbijetesë, Nenad Rashiq.

    Ministri në detyrë Rashiq e përsëriti mbështetjen e tij ndaj kryeministrit Kurti për formimin e qeverisë së re dhe vazhdimit të bashkëpunimit të frytshëm edhe në mandatin e ardhshëm.

    Kryeministri Kurti e falënderoi kryetarin Rashiq për punën e madhe dhe kontributin e dalluar që ka dhënë për komunitetin serb në Kosovë për vetëm gjysmë mandati si ministër për Komunitete dhe Kthim.

    Ai shprehu gjithashtu vullnetin për vijimin e bashkëpunimit efikas dhe të frytshëm edhe në katër vjeçarin e ardhshëm për të arritur së bashku suksese të tjera dhe punë të mbara në shërbim të të gjithë qytetarëve, pa dallim.

  • Histori drithëruese/ Nëna i shkruan letër në emision vajzës së birësuar

    Histori drithëruese/ Nëna i shkruan letër në emision vajzës së birësuar

    Në emisionin STUDIO A në ATV, Zana Islami, një vajzë 19-vjeçare nga Mitrovica, rrëfeu me historinë e saj si një vajzë e adoptuar.

    Në një moment prekës gjatë emisionit, ajo lexoi letrën që ia kishte shkruar nëna adoptuese, në të cilën u zbulua dashuria dhe sakrifica që e kishte ndërtuar lidhjen mes tyre.

    Duke folur për dashurinë që ka marrë nga prindërit që e rritën, Zana nuk i mbajti dot emocionet teksa lexonte fjalët e nënës që e kishte birësuar.

    “Çika jem e vogël, sa shpejt u rrite e u bëre vajzë e madhe e mbarë. Nga momenti kur unë dhe babai yt vendosëm me të marrë, m’u duk sikur bota ime u bë më e plotë. Neve Zoti nuk na fali fëmijë, por ti na e plotësove ëndrrën më të madhe. Që nga ajo ditë, ti u bëre ilaçi i shpirtit tonë, lumturia jonë e përditshme… Por jeta nuk na lejoi që lumturia të zgjaste shumë. Kur babai yt iku, bota mu shemb. Por ti ishe arsyeja pse unë duhej të vazhdoja. Mos harro kurrë çika je jesh, kudo që të jesh, je në zemrën dhe mendjen time”, shkruan në letrën e nënës së saj adoptuese.

    Rrëfimin e plotë të Zana Islamit në emisionin STUDIO A, e gjeni në videon më poshtë:

  • ​Kallas: Dialogu Kosovë–Serbi ka ngecur, po shqyrtojmë mjete të tjera për normalizim

    ​Kallas: Dialogu Kosovë–Serbi ka ngecur, po shqyrtojmë mjete të tjera për normalizim

    Bashkimi Evropian është i interesuar për normalizimin e marrëdhënieve mes Kosovës dhe Serbisë, qoftë përmes dialogut apo ndonjë instrumenti tjetër, ka thënë shefja për Politikë të Jashtme e Bashkimit Evropian, Kaja Kallas, në një intervistë për Radion Evropa e Lirë.

    “Ndoshta është dialogu, ndoshta është një tjetër mjet. Jam e gatshme ta shqyrtoj këtë çështje, dhe do ta bëj këtë së bashku me Përfaqësuesin e Posaçëm në ditët në vijim”, tha Kallas, e cila pritet ta vizitojë Ballkanin Perëndimor javën e ardhshme.

    Kallas foli, po ashtu, për ndikimin e mundshëm të luftës tregtare mes BE-së dhe Shteteve të Bashkuara të Amerikës, si dhe për mundësinë e një armëpushimi në Ukrainë, duke theksuar nevojën për përfshirjen e Evropës në çdo negociatë për këtë çështje.

    Radio Evropa e Lirë: Sot hyjnë në fuqi tarifat e reja [të Shteteve të Bashkuara të Amerikës] prej 25 për qind për automjetet. Si do të përgjigjet Bashkimi Evropian dhe çfarë mendoni se tregon kjo për marrëdhëniet transatlantike?

    Kaja Kallas: Deri tani, njerëzit tanë të tregtisë po bashkëveprojnë me amerikanët, kështu që nuk e dinë saktësisht se çfarë po vjen. Ka deklarata që i shohim, por cilat janë veprimet reale? Nëse vjen një veprim i tillë, edhe ne kemi një plan të gatshëm, por ajo që dua të theksoj është se nuk ka fitues në luftërat tregtare.

    Në fund, çmimet rriten dhe konsumatorët paguajnë më shumë për këto produkte, dhe ky nuk është veprim i mençur. Prandaj, ende shpresoj që nuk do të fillojmë këtë luftë tregtare.

    Radio Evropa e Lirë: [Presidenti i Finlandës], Alexander Stubb, kur ishte në Amerikë së voni, foli për një armëpushim të mundshëm të plotë në luftë [mes Ukrainës dhe Rusisë] më 20 prill. A mendoni se kjo është e realizueshme?

    Kaja Kallas: Deri tani, Ukraina ka rënë dakord për një armëpushim që para tre javësh, dhe nuk kemi parë asnjë shenjë pozitive nga Rusia. Ata thjesht po luajnë lojëra.

    Mendoj se do të ishte shumë mirë t’u vihet një afat i qartë se deri kur duhet të përgjigjen, të tregojnë qëndrimin e tyre dhe të shfaqin vullnet të mirë se duan paqe.

    Është e qartë që ukrainasit e duan atë.

    Radio Evropa e Lirë: [Kirill] Dmitriev, një nga negociatorët e Kremlinit, pritet ta vizitojë Uashingtonin së shpejti. A do të dëshironit të flisnit me të? A mendoni se BE-ja duhet të negociojë me të?

    Kaja Kallas: Për Ukrainën, Ukraina duhet të negociojë me Rusinë. Kjo nuk mund të bëhet nga askush tjetër, sepse bëhet fjalë për Ukrainën dhe nuk mund të bëhet pa Ukrainën.

    Mendoj se kjo është jashtëzakonisht e rëndësishme. Kur bëhet fjalë për sigurinë evropiane, sigurisht që duhet të diskutojmë mes nesh dhe me aleatët tanë për mënyrën se si ta rregullojmë këtë çështje.

    Radio Evropa e Lirë: Por, a është BE-ja apo ndonjë vend evropian i gatshëm të diskutojë drejtpërdrejt me Moskën?

    Kaja Kallas: Kur bëhet fjalë për negociatat reale që lidhen me Evropën, mendoj se është e rëndësishme të kemi parasysh se Rusia nuk duhet të ketë ndikim mbi mënyrën se si ne organizojmë sigurinë tonë, sepse Evropa nuk po e sulmon Rusinë. Përkundrazi, Rusia ka sulmuar fqinjët e saj, prandaj ne po diskutojmë rreth aranzhimeve tona të sigurisë.

    Megjithatë, sa i përket negociatave për Ukrainën, është e qartë se Evropa duhet të jetë pjesë e tryezës, sepse rezultati i tyre na prek edhe neve. Dhe, çdo marrëveshje nuk mund të funksionojë pa zbatimin e saj nga ana e evropianëve.

    Radio Evropa e Lirë: Pra, a do të flisni për këtë me [sekretarin amerikan të Shtetit, Marco] Rubio, kur ai të jetë në Bruksel ditët në vijim?

    Kaja Kallas: Ne kemi folur për këtë edhe më parë, kur kishim takimet në kuadër të G7-tës në Kanada, dhe padyshim që do të flasim për këtë sërish. Është shumë e qartë se çfarë ka BE-ja në dorë – sanksionet janë vendosur nga Bashkimi Evropian, kemi misionin e trajnimit për ushtarët ukrainas, misionin civil në Ukrainë dhe gjithashtu procesin e zgjerimit të BE-së, që përfshin Ukrainën.

    Radio Evropa e Lirë: Si e shihni vizitën e [kryeministrit izraelit, Benjamin] Netanyahu, në Hungari, një shtet anëtar i BE-së? A jeni të shqetësuar se ndoshta persona të tjerë të kërkuar nga Gjykata Ndërkombëtare Penale mund të vijnë në BE? Sidomos udhëheqja ruse.

    Kaja Kallas: Shtetet anëtare janë palë të Konventës së Romës, që ka të bëjë me Gjykatën Ndërkombëtare Penale. Prandaj, u takon shteteve anëtare që të zbatojnë vendimet e Gjykatës Ndërkombëtare Penale dhe detyrimet që kanë marrë përsipër. Është e qartë se është e rëndësishme të ruhet besueshmëria e Gjykatës Ndërkombëtare Penale, dhe Bashkimi Evropian e mbështet këtë gjykatë në çdo mënyrë të mundshme.

    Radio Evropa e Lirë: Pra, nuk mund të përjashtohet mundësia që [presidenti rus, Vladimir] Putin të vizitojë një shtet anëtar të BE-së së shpejti, nëse BE-ja nuk zbaton konventën?

    Kaja Kallas: BE-ja e zbaton, por problemi është se BE-ja nuk është anëtare e konventës, janë shtetet anëtare. Prandaj, shtetet anëtare duhet ta zbatojnë atë – nëse një person hyn në territorin e tyre, ata duhet t’i zbatojnë vendimet e Gjykatës Penale Ndërkombëtare.

    Dialogu Kosovë–Serbi

    Radio Evropa e Lirë: Javën tjetër do të vizitoni Ballkanin Perëndimor. Çfarë mendoni për protestat që po shohim aktualisht në Serbi? A jeni të gatshëm të organizoni së shpejti një takim të nivelit të lartë, në kuadër të dialogut mes Kosovës dhe Serbisë?

    Kaja Kallas: Sa i përket protestave, kjo është demokracia – ndodh edhe në vendet anëtare të BE-së që njerëzit të lodhen nga qeveritë dhe të protestojnë. Kjo tregon se demokracia po funksionon.

    Lidhur me dialogun Kosovë-Serbi, ose dialogun Beograd-Prishtinë, unë kam emëruar një Përfaqësues të Posaçëm, me të cilin do të ulem për të parë të ardhmen. Ajo që na intereson është normalizimi i marrëdhënieve mes Kosovës dhe Serbisë. Qoftë përmes këtij dialogu, apo ndonjë instrumenti tjetër, ne do të mbledhim ide dhe do të dalim me një propozim.

    Radio Evropa e Lirë: Pra, a mund të jetë diçka tjetër, përveç dialogut?

    Kaja Kallas: Duket se dialogu ka ngecur pak, sepse palët vetëm po ankohen për njëra-tjetrën. Mendoj se duhet ta mbajmë qëllimin përfundimtar në mendje – normalizimin e marrëdhënieve mes tyre, në mënyrë që të mund të ecin përpara në rrugën evropiane.

    Ndoshta është dialogu, ndoshta është një tjetër mjet. Jam e gatshme ta shqyrtoj këtë çështje, dhe do ta bëj këtë së bashku me Përfaqësuesin e Posaçëm në ditët në vijim.

    Radio Evropa e Lirë: Dhe, për fund, lidhur me Gjeorgjinë, si i vlerësoni ndryshimet në Ligjin për agjentët e huaj dhe Ligjin për transmetimin? A ka ende BE-ja ndonjë ndikim mbi Gjeorgjinë?

    Kaja Kallas: Situata atje është jashtëzakonisht e vështirë. Dimë që shumica e popullit gjeorgjian mbështet fuqimisht Bashkimin Evropian, dhe dëshiron që Gjeorgjia t’i bashkohet BE-së.

    Por, kjo nuk është rruga që ka zgjedhur qeveria. Pyetja për ne është: çfarë mund të bëjmë realisht për ta ndihmuar? Kemi ridrejtuar fondet nga qeveria tek organizatat joqeveritare dhe shoqëria civile, për t’iu ndihmuar që të vazhdojnë rrugën evropiane.

    Radio Evropa e Lirë: Por, a ka diçka më konkrete ndaj qeverisë? Sanksionet nuk funksionuan, a ka diçka tjetër?

    Kaja Kallas: Ne duhet të kemi marrëveshje në mes të 27 vendeve anëtare. Dhe, ky është problemi këtu. Prandaj, ne ende po punojmë për opsionet që mund të kemi. Kemi vendosur kërkesën për viza për pasaportat diplomatike, por vazhdimisht po diskutojmë se çfarë tjetër mund të bëjmë.

  • ​Inaugurohet lapidari për dëshmorët Naser Hajrizi dhe Asllan Pireva

    ​Inaugurohet lapidari për dëshmorët Naser Hajrizi dhe Asllan Pireva

    Sot u inaugurua lapidari në nderim të dëshmorëve të parë të demonstratave të vitit 1981, Naser Hajrizi dhe Asllan Pireva. Në këtë ceremoni u vlerësuan lart sakrifica e tyre për çështjen kombëtare.

    Fazli Veliu, ish-kryetari i LPK-së, tha se dëshmorët Naser Hajrizi dhe Asllan Pireva me veprën e tyre treguan shembullin se si mbrohet atdheu, duke zgjedhur rrugën e betimit të madh – liri ose vdekje.

    “Për dy faktorë këta dy djem ranë këtu, një ishte atdhedashuria, që e kanë dashur ata deri në Sarandë, edhe me Ulqinin dhe hapësirën shqiptare. E dyta ishte domosdoshmëria për t’u vetëmbrojtur, nuk kishte tjetër rrugë dalje. Si njëri dhe tjetri zgjodhën rrugën e betimit të madh të vdesin për lirinë, rrugën e madhe liri a vdekje. Janë të pabarabartë në hapësirën shqiptare këta dy djem, dhe të gjithë ata që bënë historinë e lavdishme të asaj kohe”, potencoi Veliu.

    Shefik Sadiku, kryetar i shoqatës së burgosurve politikë, tha se rruga e lirisë që filluan dëshmorët Hajrizi e Pireva vazhdoi deri te themelimi i Ushtrisë Çlirimtare të Kosovës.

    “U tërbua politika jugosllave në krye të cilës qëndronte kryesia e RSFJ-së, përgjegjëse për të gjitha krimet bashkë me komitetet qendrore të lidhjes komuniste jugosllave. Fashizmi dhe racizmi ishte pikërisht tek ata, ndërsa populli shqiptar luftonte kërkonte rrugën e lirisë. Këta demonstrues dhe masa që ishin në këtë vend i tërboi pushtuesit dhe i goditën, dhe i vranë edhe Naser Hajrizin dhe Asllan Pireven. Prandaj, ne me përkushtim të madh i nderojmë jo vetëm këta, por edhe shokët e tyre të cilët u vranë në të njëjtën ditë”, tha ai.

    Bujar Hajrizi, vëllai i dëshmorit Naser Hajrizi, tha se dëshmorët e dinin se rruga e lirisë kishte shumë sakrifica, por asnjëherë nuk hoqën dorë.

    “Vendin më meritorë e zënë dëshmorët, sepse ata dhanë gjithçka nga vetja e tyre, duke mos kursyer as jetën. Dashuria ndaj atdheut matet me sakrificë, dhe në emër të kësaj dashurie ata bënë sakrificë sublime. Ata u brumosën dhe u ushqyen me ndjenjat patriotike duke formuar karakterin luftarak dhe çlirimtar, ata mëshironin shpirtin kryengritës të përcjellë nga brezat e shumtë të traditës së lëvizjes shqiptare. Dëshmorët e dinin se lufta drejt lirisë ishte e vështirë dhe me plot sakrifica, por ishin të bindur në përfundimin fitimtar të saj”, tha ai.

    Demonstratat e 11 dhe 26 marsit 1981 ishin vazhdimësi e përpjekjeve të pandërprera që nga orët e para të lëvizjes për liri dhe pavarësi kombëtare. Këto ngjarje shënuan një hallkë të rëndësishme në përpjekjet për çlirimin e popullit shqiptar të Kosovës dhe të viseve të tjera shqiptare nën ish-Jugosllavi. Vetëm pesë ditë më pas, më 1 dhe 2 prill, me kërkesat e demonstruesve u solidarizua i gjithë populli./kp

  • Osmani: Mediat e mbështetura nga Rusia dezinformuan për zgjedhjet në Kosovë

    Osmani: Mediat e mbështetura nga Rusia dezinformuan për zgjedhjet në Kosovë

    Rusia dhe Serbia kanë promovuar aktivisht dezinformimin dhe narrativat përçarëse për ta minuar besueshmërinë në proceset demokratike në Kosovë. Kështu u tha gjatë publikimit të raportit rreth gjuhës së urrejtjes dhe dezinformimit gjatë fushatës për zgjedhjet parlamentare të 9 shkurtit në Kosovë nga Zyra e Bashkimit Evropian në Kosovë dhe Rrjeti Ballkanik për Gazetari Hulumtuse, Birn Kosova, raporton KosovaPress.

    Në Ditën Ndërkombëtare të Verifikimit të Fakteve, shefi i Zyrës së BE-së në Kosovë, Aivo Orav tha se dezinformimi është më shumë se thjesht përmbajtje mashtruese. Ai shtoi se dezinformomi manipulon opinionin publik, nxit ndarjen dhe minon besimin tek institucionet.

    Orav tha se çdo individ mund të bëhet objektiv i manipulimit të informacionit.

    “Dezinformimi është më shumë se thjesht përmbajtje mashtruese. Ai përbën një kërcënim të drejtpërdrejtë për vetë thelbin e demokracisë. Manipulon opinionin publik, nxit ndarjen dhe minon besimin tek institucionet. Ajo që është gjithashtu kritike për çdo proces zgjedhor është integriteti i informacionit dhe qasja e votuesve në informacion të saktë, të besueshëm dhe autentik… Siç ka thënë autori dhe producenti i njohur televiziv Peter Pomerantsev, ‘kur informacioni është një armë, të gjithë janë në luftë’. Çdo individ mund të bëhet objektiv i manipulimit të informacionit. Gjetjet e sotme, të bazuara në një analizë të gjerë të kryer nga BIRN Kosovo, do të shpjegojnë se si ky fenomen u manifestua gjatë periudhës zgjedhore, kush ishte pas tij dhe ndikimin e gjerë që pati në procesin demokratik”, tha Orav.

    Ndër të tjera, Orav potencoi se raporti në fjalë zbulon se narrativat dezinformuese u përhapën jo vetëm nga aktorët politikë vendorë, por edhe nga forca të jashtme, me qëllimin për të destabilizuar besimin e publikut në procesin zgjedhor të Kosovës, shkruan KosovaPress.

    “Raporti zbulon se narrativat dezinformuese u përhapën jo vetëm nga aktorët politikë vendorë, por edhe nga forca të jashtme, me qëllimin për të destabilizuar besimin e publikut në procesin zgjedhor të Kosovës. Përhapja e gjuhës së urrejtjes dhe e gjuhës së dehumanizimit ishte alarmuese, me grupe dhe individë të caktuar që u shënjestruan në mënyrë disproporcionale, veçanërisht gratë në pozita me ndikim”, potencoi Orav.

    Orav tha se Bashkimi Evropian mbetet thellësisht i përkushtuar në mbështetjen e lirisë së medias, gazetarisë së bazuar në fakte dhe përpjekjeve për të luftuar dezinformimin.

    Presidentja e Kosovës, Vjosa Osmani tha se dezinformimi nuk është vetëm sfidë por rrezik real për stabilitetitin, integritetin tonë si shtet dhe demokracinë. Ajo shtoi se në kontekstin e sigurisë shtetërore mosverfikimi i fakteve nuk është thjeshtë një problem etik apo profesional i medias, por sipas saj shndërrohet në kërcënim serioz ndaj shtetit.

    Osmani, shkruan KosovaPress, theksoi se Serbia dhe Rusia kanë promovuar dezinformimin për ta minuar procesin e demokracisë në Kosovë dhe nxitjen e tensioneve në rajon.

    “E vërteta është arma më e fortë e demokracisë. Ka qenë gjithnjë, mbetet edhe sot. Prandaj, kur sulmohet e vërteta, sulmohet vetë liria, vetë vlerat demokratike mbi të cilat është ndërtuar shteti ynë me shumë mund e sakrificë… Në epokën në të cilën po jetojmë, lajmi i rremë tonë mund të përhapet më shpejtë sesa e vërteta. Prandaj, kjo nuk është vetëm një sfidë, por një rrezik real edhe për stabilitetin tonë, për integritetin tonë si shtet, për demokracinë, por mbi të gjitha për sigurinë kombëtare… Gazetaria qytetare ndihmuar nga zhvillimi marramendës teknologjik, përfshirë dhe zhvillimet në IA e kanë bërë verifikimin e fakteve më të vështirë dhe më sfidues se çdo herë tjetër…Aktorë të huaj, veçanërisht Rusia dhe Serbia, siç e dini, kanë promovuar aktivisht dezinformimin dhe narrativat përçarëse për ta minuar besueshmërinë në proceset demokratike në Kosovë. Mediat, të mbështetura nga Rusia, kanë luajtur një rol në përhapjen e dezinfomatave mbi integritetin zgjedhor të Kosovës dhe nxitjen e tensioneve në rajonin tonë, tha Osmani.

    Ndërkaq, të gjeturat kryesore të raportit rreth gjuhës së urrejtjes dhe dezinformimit gjatë fushatës për zgjedhjet parlamentare të 9 shkurtit në Kosovë i shpalosi Kreshnik Gashi nga Birn Kosova.

    Ai theksoi se zgjedhjet në Kosovë u karakterizuan me gjuhë të urrejtjes dhe dezinformata nga Kremlini dhe Serbia.

    Po ashtu, Gashi tha se pati gjuhë të urrejtjes dhe dehumanizim për kundërshtarët politik brenda vendit.

    Në zgjedhjet e 9 shkurtit sipas këtij raporti pati përdorim të lartë të rrjeteve sociale në multiplifikimin e gjuhës së urrejtjes dhe narrativave dezinformuese.

    “Është shumë e qartë se gjatë zgjedhjeve të fundit në Kosovë ka pasur një fushatë dezinformuese dhe me materiale të urrejtjes e cila është nisur dhe krijuar nga Kremlini, pra nga qeveria ruse. Kemi pasur një fushatë dehumanizuese dhe një fushatë të urrejtjes, e cila e ka pasur burimin tek njerëzit të cilët kanë rol në qeverinë e Serbisë apo në shtetin serb. Rrjetet sociale konstatohen si problem shumë serioz, për shkak se kanë krijuar mundësi të multiplifikimit të narrativave dezinformuese, të gjuhës së urrejtjes, por edhe në raste të krijimit të saj varësisht prej teknikës që është përdorur. Ose ka qenë politikani burim i gjuhës së urrejtjes ose ka qenë media sociale që e ka zhvilluar gjuhën e urrejtjes. Ajo që është problematike për neve dhe në raport identifikohet është faktori që institucionet e shtetit ose mekanizmat rregullues të mediave në vendit tonë kanë dështuar në rregullimin e audiencës”, tha Gashi.

    Rritje të përdorimit të inteligjencës artificiale në dezinformim, prani të influencës kineze në artikuj të sponzorizuar e transparencë e ulët e financimit të fushatës, janë ndër karakteristikat e zgjedhjeve parlamentare sipas raportit të publikuar të mërkurën./kp

  • Sveçla: Vrasja e policit Lika, sulm ndaj institucioneve të Kosovës

    Sveçla: Vrasja e policit Lika, sulm ndaj institucioneve të Kosovës

    Ministri i Punëve të Brendshme nw detyrw, Xhelal Sveçla, tha se vrasja e policit Muhamed Lika në Kaçanik është sulm i drejtpërdrejtë ndaj rendit, institucioneve dhe sigurisë së Kosovës, duke shtuar se aparati shtetëror është i mobilizuar të arrestojë dorasin.

    Ai ka shkruar në Facebook të mërkurën se kontributi i rreshterit Lika si në çlirimin e Kosovës, ashtu edhe në garantimin e rendit “do të mbetet shembull për secilin zyrtar policor në shërbim”.

    “Sulmi ndaj çdo pjesëtari të Policisë së Kosovës është sulm i drejtpërdrejtë ndaj rendit, institucioneve dhe sigurisë së Republikës së Kosovës. Vrasja e mbrëmshme e Rreshterit të Policisë së Kosovës Muhamed Lika ka prekur rëndë secilin prej nesh dhe gjithë Policinë e Kosovës. Që nga momenti që kam marrë lajmin jam në komunikim të vazhdueshëm me Policinë, me kërkesën që sa më parë të zbulohet vrasësi dhe të gjitha rrethanat e këtij krimi”, tha Sveçla.

  • ​Haxhiu iu bën thirrje institucioneve të kryejnë obligimet ndaj personave me ndihmë sociale

    ​Haxhiu iu bën thirrje institucioneve të kryejnë obligimet ndaj personave me ndihmë sociale

    Në konferencën e mbajtur nga Zyra për Qeverisje të Mirë për nder të Ditës Botërore të Autizmit, ministrja në detyrë e Drejtësisë, Albulena Haxhiu u bëri thirrje institucioneve qendrore dhe komunave që të kryejnë obligimin që kanë ndaj personave me ndihmë sociale, raporton KosovaPress.

    Ajo theksoi se Ministria e Drejtësisë po vazhdon të merret me reformën për shërbime sociale dhe familjare ne aspektin legjislativ dhe buxhetimit të këtyre shërbimeve me qëllim të krijojë një sistem që ësh gjithëpërfshirës.

    “Në këto tre vitet e fundit Ministria Drejtësisë dhe qeveria e Kosovës ka ndarë 6.3 milionë euro për shërbime sociale dhe familjare. Unë do të doja qe fokusi dhe përkushtimi i nivelit qendror kundrejt shërbimeve sociale dhe familjare ta ketë edhe niveli lokal. Duhet ta them dhe ta përsërisë se kemi shumë sfida në bashkëpunimin me komuna. Kudo që ne kemi shkuar ne vizita, në organizata që veprojnë në komuna në kuadër të Republikës se Kosovës themi se nuk po mbështeten në raport me sfidat që i kanë nga komunat. Është përgjegjësi. Thërras që secili nga institucionet si lokal qendror të kryej obligimet që kanë”, tha Haxhiu.

    Ndërsa, drejtori i Zyrës për Qeverisje të Mirë, Habit Harjedini shtoi se së bashku me organizatat e tilla, kanë zhvilluar dhe finalizuar strategjinë nacionale për personat me aftësi të kufizuara. Strategji e cila ka për qëllim gjithë përfshirjen, shërbimet shëndetësore dhe qasjen adekuate te tyre.

    “Ne së bashku kemi zhvilluar dhe kemi finalizuar strategjinë nacionale për personat me aftësi të kufizuara, e cila ka për qëllim gjthëpërfshirjen, shërbimet sociale, arsimim cilësor, shërbimet shëndetësore, qasja adekuate për persona me aftësi të kufizuara dhe shumë objektiva të tjera”, shtoi Hajredini.

    E udhëheqësja e shoqatës “Autizmi” Hatixhe Hoxha ka folur rreth sfidave që kanë personat me autizëm.

    Hoxha, kërkon intervenim të hershëm tek personat me autizëm.

    “Ne edhe sot vazhdojmë që të përballemi me forma dhe vështirësi të ndryshme, si në fushe arsimore, shëndetësore dhe jo vetëm. Vështirësitë vazhdojnë që nga mos njoha e plotë apo e kufizuar, diagnozën e vonuar, mungesë e mbështetës pas kësaj diagnoze që jepet. Vështirësi në akses, në arsim shërbime sociale dhe shëndetësore, tranzicione shumë të vështira. Ne duke i njohur familjet e persona me çrregullim autik, shohim çdo ditë se ata bartin sistematikisht ngarkesa të konsiderueshme emocionale, ekonomike dhe të kujdesit. Dua të nënvizoj nevojën e ngutshme për një trupë multidicilpinare për diagnostfikimin e fëmijëve me autizëm në mosha të hershem. Nevojë për intervenimim e hershme”, u shpreh Hoxha.

    Dita Botërore e Autizmit synon të rrisë ndërgjegjësimin lidhur me çrregullimet e spektrit të autizmit dhe përmirësimin e jetës së atyre që jetojnë me autizëm. Vlerësohet se 1% e popullatës globale është autike.

    Autizmi është një çrregullim kompleks që prek hapësira të shumëfishta të zhvillimit duke përfshirë ndërveprimin social, komunikimin verbal dhe joverbal, imagjinatën, sjelljet dhe interesat. Simptomat e këtij çrregullimi shfaqen shpejt në jetë, ndonjëherë në foshnjëri, por përgjithësisht përpara moshës 3-vjeç./kp

  • ​Lammy në Prishtinë, mbështetje për Kosovën dhe thirrje për dialog me Serbinë

    ​Lammy në Prishtinë, mbështetje për Kosovën dhe thirrje për dialog me Serbinë

    Sekretari i Shtetit për Punë të Jashtme të Mbretërisë së Bashkuar, David Lammy, ka kërkuar normalizim dhe paqe të qëndrueshme mes Kosovës dhe Serbisë, raporton KosovaPress.

    Ai gjatë vizitës zyrtare në Kosovë të mërkurën, tha se shpreson që qeveria e ardhshme të ketë angazhim të fuqishëm në dialog. Kryediplomati britanik, David Lammy në një konferencë për medie pas takimit me presidenten Vjosa Osmani, tha se vendi i tij është mbështetës i palëkundur i Kosovës dhe një partner kyç. Ndërkaq, nënvizoi nevojën që sa më shpejt të formohet qeveria e re në Kosovë.

    “Duam normalizim të qëndrueshëm dhe paqësor mes Kosovës dhe Serbisë. Mbretëria e Bashkuar është padyshim kontribuues i madh në KFOR, kam vizituar KFOR-in herën e fundit kur kam qenë dhe do ta vizitoj prapë. Është qenësor për sigurinë tuaj dhe shpresoj që qeveria e ardhshme do t’i adresojë nevojat e të gjithë qytetareve, duke përfshirë progresin në integrimin e serbëve të Kosovës dhe angazhimin në dialogun e udhëhequr nga Bashkimi Evropian”, theksoi Lammy.

    Në anën tjetër, nikoqirja e takimit, presidentja Vjosa Osmani, tha se Kosova është palë konstruktive në dialog dhe e përkushtuar për paqe dhe stabilitet, pavarësisht obstruksioneve dhe provokimeve nga ana e Serbisë.

    Përkitazi me këtë, Vjosa Osmani tha se është e domosdoshme që Serbia t’i vendosë para përgjegjësisë autorët e aktit të agresionit serb në shtator të vitit 2023, shkruan KosovaPress.

    “Kosova mbetet një palë konstruktive dhe përkushtuar për paqe dhe stabilitet, pavarësisht se vazhdimisht përballemi me obstruksione dhe provokime nga ana e Serbisë, përfshirë edhe sulmet e njëpasnjëshme që kanë filluar vite më herët dhe po vazhdojnë edhe tani. Është e domosdoshme që të ketë llogaridhënie dhe vënie të autorëve para përgjegjësisë nga ana e Serbisë, por fatkeqësisht s’po shohim se s’ka asnjë lëvizje në këtë drejtim. As sa i përket aktit të agresionit të shtatorit 2023 dhe as sa i përket sulmit të ushtarëve të NATO-s dhe as për veprimet e fundit që kanë ndodhur në veri të vendit”, theksoi Osmani.

    Krahas kësaj, e para e vendit, bëri të ditur se ka propozuar thellimin strategjik të bashkëpunimit ndërmjet Kosovës dhe Mbretërisë së Bashkuar, në fushën e mbrojtjes dhe ekonomisë.

    “Kam bërë propozimin për lidhjen e marrëveshjes për thellimin strategjik të bashkëpunimit ndërmjet Kosovës dhe Mbretërisë së Bashkuar që në veçanti do të mbulojë fushën e mbrojtjes dhe fushën e ekonomisë. Sot kemi diskutuar gjerë e gjatë për thellimin e bashkëpunimit strategjik në këto fusha, të cilat pastaj do të vazhdojnë me diskutime ndërmjet dy ekipeve tona. Vlerësoj faktin se keni mirëpritur për zgjerim të partneritetit”, deklaroi Osmani.

    Avancimin e partneritetit strategjik ndërmjet dy vendeve e përmendi edhe sekretari britanik, David Lammy, sidomos në fushën e mbrojtjes, teknologjisë, inovacionit dhe energjisë së pastër.

    Ai theksoi edhe nevojën për progres të Kosovës në rrugën e saj euro-atlantike.

    “Është e rëndësishme që të shohim Kosovën duke bërë progres në rrugëtimin e saj euro-atlantik që e diskutuam këtë mëngjes. Me mbështetjen e Mbretërisë së Bashkuar shpresoj që të anëtarësoheni në Këshillin Evropian. Procesi i Berlinit është i rëndësishëm për t’i lidhur lidhjet brenda këtij rajoni dhe pjesës tjetër të Evropës. Do të bëjmë gjithçka të mundshme për të mbështetur atë progres në muajt e ardhshëm”, theksoi Lammy.

    Kryediplomati britanik ka arritur në Prishtinë të martën mbrëma, ku është takuar me kryeministrin në detyrë, Albin Kurti dhe disa prej anëtarëve të kabinetit të tij.

    Ai po qëndron në vizitë zyrtare në Kosovë, në kuadër të një turneu në Ballkanin Perëndimor, ku do të vizitojë edhe vendet të tjera rajonale.

  • Taslakov njofton MPJ-në për ndalimin e automjeteve bullgare në Maqedoni

    Taslakov njofton MPJ-në për ndalimin e automjeteve bullgare në Maqedoni

    Kryetari i Komitetit Parlamentar për Politikat për Bullgarët Jashtë, Stojan Taslakov, ka kërkuar formalisht nga Ministria e Punëve të Jashtme një raport mbi ndalimin e më shumë se 20 automjeteve me targa bullgare nga policia në Kavadarci, Maqedoni e Veriut, njoftoi Komiteti të mërkurën.

    Kërkesa kërkon informacion mbi bazat ligjore të ndalimit, numrin e saktë të automjeteve të përfshira dhe veprimet diplomatike të ndërmarra për të mbrojtur të drejtat e qytetarëve bullgarë, shkruan agjencia bullgare e lajmeve BTA, transmeton KP.

    Një përgjigje pritet nga Ministria e Punëve të Jashtme e Bullgarisë, e cila mund të kërkojë gjithashtu një qëndrim zyrtar nga autoritetet e Maqedonisë së Veriut. Do të kërkohet gjithashtu një reagim në nivelin e Bashkimit Evropian për të parë nëse parimet themelore të Marrëveshjes për Miqësinë, Fqinjësinë e Mirë dhe Bashkëpunimin ndërmjet dy shteteve fqinje po shkelen.

    Kryetari i Komitetit shprehu shqetësimin se rastet në të cilat po shkelen të drejtat e qytetarëve bullgarë janë në rritje në Maqedoninë e Veriut dhe madje edhe deputetëve u është mohuar hyrja në vend.

    Taslakov theksoi se, nëse masat e nevojshme dhe të duhurat nuk merren në kohë dhe nuk i jepet fund gjuhës së urrejtjes dhe ngacmimit nga autoritetet e Republikës së Maqedonisë së Veriut, ekziston një rrezik i madh që të drejtat e qytetarëve bullgarë të shkelën përsëri dhe përsëri, duke vënë në dyshim parimet e sundimit të ligjit dhe vlerat evropiane në rajon.