Sot shënohen 27 vjet nga Beteja e Koshares, një nga përballjet më të rëndësishme të Ushtrisë Çlirimtare të Kosovës gjatë luftës për liri.
Këtë ditë e ka përkujtuar ish-presidentja e Kosovës, Vjosa Osmani përmes një fotografi të postuar në Facebook.
“Beteja e Koshares – flakadani që nuk shuhet kurrë”, ka shkruar ajo.
Kjo betejë, e cila zgjati deri më 10 qershor 1999, u zhvillua në kushte të vështira, por me një vendosmëri të jashtëzakonshme nga luftëtarët shqiptarë.
Ramush Haradinaj, kryetar i Aleancës për Ardhmërinë e Kosovës, ka shprehur ngushëllime për vdekjen e Xhevat Hasanmetajt, që vdiq dje në Deçan.
Haradinaj ka thënë se Hasanmetaj do mbahet mend si luftëtar i dalluar, dhe, me përkushtim të jashtëzakonshëm.
Postimi:
Me pikëllim mora lajmin për ndarjen tragjike nga jeta të bashkëluftëtarit, Xhevat Hasanmetaj.
Xhevati do të mbahet mend si luftëtar i dalluar dhe me përkushtim të jashtëzakonshëm.
Sot ndajmë dhembjen me familjarët dhe bashkëluftëtarët, të cilët duhet të ndihen krenarë për jetën, veprën dhe sakrificën e tij në shërbim të lirisë.
U prehtë në paqe!
Kryetari i Partisë Demokratike të Kosovës, Bedri Hamza, ka uruar qytetarët me rastin e Ditës së Kushtetutës së Republikës së Kosovës.
Hamza theksoi se Kushtetuta përbën aktin më të lartë juridik të shtetit, mbi të cilin mbështetet rendi demokratik dhe garantohet mbrojtja e të drejtave të çdo qytetari.
“Kushtetuta mbetet udhërrëfyesi ynë për ndërtimin e një shteti ligjor, të drejtë dhe të barabartë”, është shprehur Hamza.
Ai, po ashtu, theksoi domosdoshmërinë e zbatimit të plotë të Kushtetutës në çdo rrethanë.
“Në këtë ditë të rëndësishme, riafirmojmë përkushtimin e Partisë Demokratike të Kosovës për respektimin dhe mbrojtjen e këtij akti në çdo kohë dhe rrethanë. Gëzuar Dita e Kushtetutës!”, ka përfunduar Kryetari Hamza.
Kryeministri i Kosovës, Albin Kurti, pritet të marrë pjesë sonte në një diskutim të organizuar në Londër nga ODI Global, një institut për kërkime dhe politika zhvillimore.
Lajmi u bë i ditur nga koordinatorja e komiteteve në Lëvizjen Vetëvendosje, Dejona Mihali, e cila njoftoi përmes një postimi se tema e diskutimit do të jetë “Shtetformimi ekonomik dhe stabiliteti global”.
“Sonte në Londër. “Shtetformimi ekonomik dhe stabiliteti global”, diskutim në ODI Global në Londër. Pjesëmarrës në diskutim Kryeministri i Kosovës, Albin Kurti”, shkroi Mihali në një postim në Facebook.
Diskutimi në Londër do të jetë i hapur për pjesëmarrje fizike dhe online për publikun e interesuar, për të cilën gjë njoftoi edhe Mihali.
Deputeti Eman Rrahmani ka folur hapur për përkushtimin e tij ndaj fesë dhe ndikimin vendimtar që ka pasur familja në formimin e tij shpirtëror. Në emisionin “LIBERO”, ai theksoi se bazat e edukatës fetare i ka marrë që në fëmijëri, falë nënës së tij.
“S’ka hoxhë prej të cilit s’kam marrë mësime,” u shpreh Rrahmani, duke nënvizuar se rrugëtimi i tij fetar është ndërtuar si nga mësimet e dijetarëve fetarë, ashtu edhe nga edukimi i hershëm familjar.
Ai veçoi rolin e nënës si thelbësor në këtë proces, duke thënë: “Unë edukatën fetare, mësimet fetare dhe gjithçka që kam, e kam pikërisht prej nanës. Mua si fëmijë më ka eduku në frymë fetare – çka është e lejueshme dhe çka nuk është, çka është e dashur për Zotin, për nanën, për prindin, për secilin.”
Rrahmani shtoi se nga kjo edukatë ka mësuar parimet bazë të drejtësisë dhe të së mirës, duke e konsideruar këtë trashëgimi si themelin e karakterit dhe bindjeve të tij.
Për ta dëgjuar intervistën e plotë të Eman Rrahmanit, klikoni linkun e mëposhtëm:
Çmimi maksimal i naftës (dizelit) në Kosovë është rritur për dy cent krahasuar me ditën e djeshme.
Sipas njoftimit nga Ministrisë së Industrisë, Ndërmarrësisë, Tregtisë dhe Inovacionit, çmimet e derivateve për sot 9 prill janë si vijon: Nafta (dizel): 1.91 euro/litër, Benzina: 1.46 euro/litër dhe Gas: 0.82 euro/litër.
Kjo rritje vjen në një periudhë ku çmimet e derivateve të naftës po shfaqin luhatje, duke ndikuar drejtpërdrejt në koston e transportit dhe jetesës në vend.
Ndërkaq çmimet globale të naftës kanë rënë ndjeshëm dhe tregjet e aksioneve janë rritur, pasi SHBA-të dhe Irani ranë dakord për një marrëveshje armëpushimi me kusht dyjavor.
Fotografi Gani Ibërdemaj në emisionin “LIBERO” ka ndarë një reflektim mbi transformimin drastik të artit të fotografisë ndër vite, duke krahasuar disiplinën e dikurshme me realitetin e sotëm digjital.
Ai kujtoi se në të kaluarën çdo fotografi kishte peshë dhe kosto:
“…Na, për dokumente, e kemi fotografu dikë vetëm një herë. Vetëm nëse e kemi vërejt që i ka mbyll sytë, e kemi bë edhe një tjetër. Sepse filmi, zhvillimi dhe letra kushtonin…”, u shpreh ai.
Sipas Ibërdemajt, sot fotografia është bërë e pakufizuar dhe shpesh pa kriter. Ai kritikon fenomenin e fotografimit të tepërt, sidomos me telefona mobilë:
“…Sot vajzat tona e kanë shndërru çdo WC e banjo hoteli në studio fotografie. Marrin telefonin dhe bëjnë 200-300 fotografi pa harxhu asgjë…”
Fotografi thekson se dikur suksesi në këtë profesion varej nga njohja e teknikave dhe rregullave bazë, ndërsa sot teknologjia e ka lehtësuar gjithçka, por edhe e ka zbehur vlerën e mjeshtërisë:
“Atëherë ose ke ditë me fotografu, ose s’ke ditë. Çdo profesion i ka rregullat e veta. Nëse nuk i ke ditë, kot je mundu.”
Rrrjetet sociale dhe teknologjia a e kanë ndryshuar raportin e njerëzve me fotografinë – nga një art i menduar mirë, në një aktivitet të përditshëm masiv?
Për ta dëgjuar intervistën e plotë të Gani Ibërdemajt, klikoni linkun e mëposhtëm:
Ushtria izraelite ka thënë se ka vrarë sekretarin e kreut të grupit militant Hezbollah të mbështetur nga Irani.
Forcat Mbrojtëse të Izraelit thanë se Ali Yusuf Harshi, nipi i Naim Qassem, u vra në një sulm ajror gjatë natës në Bejrut.
“Harshi ishte një bashkëpunëtor i ngushtë dhe këshilltar personal i Sekretarit të Përgjithshëm të Hezbollahut, Naim Qassem, dhe luajti një rol qendror në menaxhimin dhe sigurimin e zyrës së tij”, tha IDF.
“Gjatë natës, IDF goditi dy kalime kyçe të përdorura nga terroristët dhe komandantët e Hezbollahut për lëvizje nga veriu në jug të lumit Litani në Liban për të transferuar mijëra armë, raketa dhe lançues”, shtoi ajo.
Rreth 10 depo armësh, lansues dhe qendra komande u goditën gjithashtu në Libanin jugor, sipas IDF.
Siç raportohet, sulmet izraelite vranë të paktën 254 persona në të gjithë Libanin dje.
Bombardimet intensive goditën zonat e banuara, përfshirë Bejrutin, ku u vranë 91 persona.
Ekuipazhi i misionit Artemis II është në rrugën e kthimit drejt Tokës, pasi përfundoi me sukses fluturimin historik rreth Hënës, duke shënuar një nga arritjet më të rëndësishme në eksplorimin hapësinor në dekadat e fundit.
Siç shkruan BBC, katër astronautët në bordin e anijes “Orion” pritet të ulen në Oqeanin Paqësor, pranë brigjeve të San Diegos, mbrëmjen e së premtes.
Gjatë udhëtimit të kthimit, ata kanë ndarë me publikun emocionet dhe përvojat e këtij misioni unik, duke theksuar se kanë mbledhur shumë materiale dhe histori që do të publikohen pas rikthimit.
Piloti i misionit, Victor Glover, u shpreh se mezi presin të ndajnë me botën ato që kanë parë.
“Kemi shumë më tepër foto dhe histori për të treguar. Të gjitha ‘gjërat e mira’ po i sjellim me vete në Tokë.”, u shpreh ai.
Misioni Artemis II vendosi gjithashtu një rekord të ri për distancën më të madhe të përshkuar nga njerëzit në hapësirë, duke kaluar kufirin prej 400 mijë kilometrash nga Toka, një rekord që mbahej që nga viti 1970 nga Apollo 13.
Gjatë fluturimit, astronautët kaluan edhe nga ana e largët e Hënës, një zonë që nuk shihet kurrë nga Toka. Edhe pse kjo pjesë është fotografuar më parë nga satelitët, ekuipazhi i Artemis II ishte i pari që e pa drejtpërdrejt, duke vëzhguar krateret gjigante dhe fushat e lavës.
Menjëherë pas fluturimit, presidenti Trump foli me ekipin “Orion” dhe i përgëzoi: “Sot keni bërë histori dhe keni bërë gjithë Amerikën shumë krenare.”
Një nga momentet më të veçanta për ekuipazhin ishte periudha prej 40 minutash kur humbën kontaktin me Tokën. Sipas komandantit Reid Wiseman, kjo kohë u shfrytëzua për vëzhgime shkencore të rëndësishme, por edhe për reflektim personal.
Astronautët ndanë gjithashtu momente emocionale gjatë misionit. Wiseman tregoi se u prek thellë kur një krater në Hënë u emërua me emrin e bashkëshortes së tij të ndjerë, ndërsa Christina Koch theksoi se ajo që do t’i mungojë më shumë nga kjo eksperiencë është bashkëpunimi dhe shoqëria mes ekuipazhit.
Pas kthimit, astronautët do të përballen me fazën më kritike të misionit: hyrjen në atmosferën e Tokës me shpejtësi shumë të lartë dhe uljen në oqean, një proces që do të testojë teknologjinë e kapsulës dhe sistemet e sigurisë.
Në mbrëmjen e 8 prillit 2026, një tubacion shumë i rëndësishëm i naftës në Arabinë Saudite, i njohur si East‑West Pipeline, u godit nga një sulm me dronë.
Tubacioni shtrihet për 1 200 kilometra, duke lidhur fushat e naftës në Gjirin Persik me portin Yanbu në Detin e Kuq. Sulmi goditi një stacion pompues, i cili ka pësuar dëmtime të konfirmuara, ndërsa kompania shtetërore Aramco nuk ka dhënë koment zyrtar mbi ngjarjen.
Incidenti ndodhi rreth orës 1 të mëngjesit, në të njëjtën kohë kur presidenti Trump njoftonte një armëpushim 2-javor me Iranin. Ky tubacion është bërë një arterie jetike për eksportin e naftës saudite, pasi Ngushtica e Hormuzit është praktikisht e mbyllur për anijet tregtare.
Mbyllja e Hormuzit ka bllokuar shumicën e furnizimeve drejt Azisë dhe Evropës, duke e bërë tubacionin East‑West një “plan B” për sigurimin e rrjedhës së energjisë. Ai mund të transportojë rreth 5‑7 milionë fuçi naftë në ditë, dhe është i ndërtuar për të shmangur rreziqet e zonës së Gjirit Persik, ku tensionet me Iranin janë të larta.
Përgjegjësia e sulmit nuk është konfirmuar, por ekspertët përmendin si mundësi faktin se agresorët janë milicitë e Houthit nga Jemeni, të cilët kanë kryer sulme të ngjashme më parë.
Disa media nuk përjashtojnë mundësinë që sulmi të ketë lidhje me operacione të Iranit kundër infrastrukturave energjetike saudite, për shkak të tensioneve të vazhdueshme në rajon. Ndërkohë, ky sulm ka ngritur alarm në tregjet globale të energjisë, duke rritur shqetësimet për furnizimin e naftës dhe stabilitetin e çmimeve ndërkombëtare.
Tubacioni East‑West ishte ndërtuar në vitet ‘80 për të shmangur rreziqet e luftës Iran-Irak, dhe tani shërben si një alternativë kyçe për transportin e naftës drejt Detit të Kuq dhe tregjeve ndërkombëtare. Ngjarja vjen në një moment të ndjeshëm gjeopolitik, ku tensionet në Gjirin Persik, konflikti në Jemen, dhe marrëveshjet e fundit të tregtisë me Iranin ndikojnë drejtpërdrejt në sigurinë energjetike globale.