Policia ka gjetur një kallashnikov, municion dhe veshje ushtarake në një shtëpi të pabanuar në fshatin Dren të Leposaviqit.
Pas një informacioni të pranuar, njësitë policore kanë kontrolluar objektin, ku kanë konfiskuar një AK-47, dy karikatorë të zbrazët dhe 119 fishekë të kalibrit 7.62 milimetra.
Në shtëpi janë gjetur edhe pantallona ushtarake, një kapelë dhe një termos ushtarak.
Për rastin është njoftuar edhe prokurori.
Kryetari i PDK-së, Bedri Hamza, ka thënë se Presidentja e Republikës së Kosovës duhet ta ushtrojë rolin e saj brenda përgjegjësive kushtetuese dhe ligjore, ndërsa partitë politike duhet të përmbushin përgjegjësitë e tyre.
Hamza ka theksuar se Presidentja ka rol unifikues, ndërsa partitë në pushtet dhe ato në opozitë kanë detyra të ndryshme politike.
“Jo, mendoj që presidentja lun rolin e vet brenda përgjegjësive kushtetuese edhe ligjore, rolin e vet unifikues, ndërsa partitë politike i kanë punët e veta. Ata që janë në pozitë, qeveria duhet me kry punë, ne që jemi në opozitë duhet me dhanë alternativa, po edhe me i kritiku normalisht dhe me i thënë që ky vend s’po shkon mbarë. Po do të thotë që kemi edhe kritika”, tha ai.
I pyetur nëse PDK-ja kishte biseduar me presidenten Justina Shiroka-Pula para se ajo ta pranonte postin, Hamza tha se nuk kishte pasur komunikime me të, ndërsa emri i saj nuk ishte diskutuar zyrtarisht brenda partisë.
“Nuk kemi pas shumë kohë me bisedu. Po do të thotë e kanë thirr, jo unë, në telefon edhe i kanë thënë zonja Pula, profesoresha e kam pas, do të thotë jemi në mundësi me të propozu edhe me qenë presidente, normalisht që pas atyre bisedave e ka pranu dhe ne jemi pajtu. Asnjëherë në Partinë Demokratike të Kosovës zyrtarisht nuk është diskutu emri i profesoreshës Justina Pula Shiroka për me qenë presidente”, tha ai.
Hamza është deklaruar edhe për miratimin e ligjit, duke thënë se Kuvendi e ka përmbushur përgjegjësinë e tij dhe se ligjet e miratuara duhet të zbatohen nga institucionet përkatëse.
“Shiko, Kuvendi ka kry punën e vet. Deputetët kanë kry punën e vet. Një prej detyrave edhe përgjegjësive kryesore të Kuvendit është me aprovu ligje. Kuvendi i aprovon ligjet, ndërsa ata të cilët janë të detyruar me i zbatu, duhet me i zbatu ligjet. Ne konsiderojmë që Kuvendi e ka aprovu ligjin në mënyrë të rregullt procedurale dhe e kemi thënë që ligjet është i zbatueshëm për të gjithë. Kundrejt kësaj, Kuvendi ka të drejtë edhe me ndërru kushtetutën, ka të drejtë edhe me shfuqizu marrëveshjet ndërkombëtare, edhe me bë marrëveshje ndërkombëtare, Kuvendi i ka detyrat e veta”, tha ai.
Zëvendëspresidenti amerikan JD Vance deklaroi se Irani duhet të reduktojë ndjeshëm kapacitetin e pasurimit të uraniumit, në mënyrë që të arrihet një marrëveshje për t’i dhënë fund luftës shtatë-mujore mes dy vendeve.
Vance tha se Shtetet e Bashkuara mbeten të hapura për një marrëveshje me Teheranin, por kërkojnë lëshime konkrete në çështjen bërthamore.
“Nëse nuk do një armë bërthamore, atëherë pse të duhet 60% karburant i pasuruar? Dhe nëse dëshiron të tregosh angazhim për të mos ndërtuar një armë bërthamore, mos ndërto karburant shumë të pasuruar. Kjo është një çështje shumë bazike,” tha Vance, duke shtuar se Irani duhet të tregojë angazhimin e tij përmes veprimeve konkrete dhe jo vetëm përmes deklaratave.
Sipas tij, çdo marrëveshje duhet të përfshijë një reduktim të konsiderueshëm të kapacitetit iranian për pasurimin bërthamor.
SHBA-ja dhe Irani kanë shkëmbyer propozime gjatë javëve të fundit, në përpjekje për t’i dhënë fund konfliktit dhe për të rihapur ngushticën e Hormuzit, një rrugë jetike për transportin global të energjisë.
Presidenti Donald Trump ka refuzuar propozimin e fundit të Teheranit dhe ka paralajmëruar mundësinë e intensifikimit të operacioneve ushtarake.
Deputeti i Partisë Demokratike të Kosovës, Përparim Gruda, ka komentuar reagimin e Bashkimit Evropian lidhur me votimin e Projektligjit për ndryshimin e Ligjit për Dhomat e Specializuara, duke thënë se duhet të vlejë ajo që presidentja e Komisionit Evropian deklaroi gjatë vizitës së saj në Kosovë.
Gruda ka theksuar se Kosova ka të drejtë të miratojë ligje, ndërsa sa i përket reagimit të Gjykatës Speciale se nuk është konsultuar për ndryshimet e ligjit, ai ka thënë se Kuvendi i Kosovës nuk ka pse ta pyesë Gjykatën Speciale për nismat e veta ligjore.
“Deklarimet e sotme nga një siç citohet – zëdhënës i BE-së nuk i kam parë më faqen zyrtare të Bashkimit Evropian. Por mund të them që presidentja e Komisionit Evropian ka deklaruar në Prishtinë që nuk është problem që Kosova miraton një ligj, pra është e drejtë e Kosovës. Reagimin e Gjykatës Speciale nuk e kam parë ende por Kuvendi i Kosovës nuk ka pse ta pyes Gjykatën Speciale për nismat e veta ligjore. Nëse dikush ka dilema për kushtetushmërinë e këtij ligji e ka një adresë: Gjykatën Kushtetuese të Kosovës ku mund ta dërgojë”, ka deklaruar Gruda.
Ai tutje ka thënë se amendamenti e përforcon atë që Dhoma Kushtetuese në Hagë nuk mund të kontrollojë vendimet e Kuvendit të Kosovës.
Gruda ka shtuar se ka ekzistuar një draft për këtë çështje dhe se amendamenti e saktëson nenin 23, në mënyrë që ligji në fjalë të mos mund të dërgohet në Dhomën Kushtetuese në Hagë.
“Amandameti e saktëson që Dhoma Kushtetuese në Hagë mund të kontrollojë vendimet, urdhrat dhe aktgjykimet që dalin nga vendimet nga puna e Dhomave Paraprake dhe Zyrës së Prokurorit të Specializuara por jo vendimet e Kuvendit të Kosovës. Vendimet si ky ligj mund të kontrollohen vetëm nga Gjykata Kushtetuse në Prishtinë sepse Kosova nuk i ka dy Gjykata Kushtetuese. Në amendament ne vetëm e kemi përforcuar nenin 23 dhe e kemi saktësuar që nuk mund të shkojë ky ligj në Dhomën Kushtetuese në Hagë. Nuk është ndryshim është vetëm përforcim. Ka qenë draft por vetëm e kemi bërë më të qartë”, është shprehur Gruda.
Në konferencën për media, Gruda e ka cilësuar miratimin e ndryshimeve të Ligjit për Specialen si triumf të përpjekjes për drejtësi.
Ai ka falënderuar deputetët që e votuan projektligjin, ndërsa ka shprehur mirënjohje edhe për qytetarët që protestuan për tri javë.
Presidentja e Sllovenisë, Nataša Pirc Musar, e ka uruar Justina Shiroka-Pulën për zgjedhjen e saj në postin e presidentes së Republikës së Kosovës.
Përmes një postimi në platformën X, Pirc Musar ka shprehur gatishmërinë për bashkëpunim të mirë dhe konstruktiv ndërmjet Sllovenisë dhe Kosovës, si në nivelin bilateral, ashtu edhe në kuadër të Procesit Brdo-Brioni.
“Urimet e mia të sinqerta për Justina Shiroka Pulën për zgjedhjen e saj presidente e Republikës së Kosovës. Pres me padurim bashkëpunim të mirë dhe konstruktiv ndërmjet Sllovenisë dhe Kosovës, si në nivelin bilateral, ashtu edhe në kuadër të Procesit Brdo-Brioni. Ju uroj çdo sukses në mandatin tuaj të rëndësishëm”, ka shkruar ajo.
Kryeakademikja Justina Shiroka-Pula është zgjedhur presidente e Republikës së Kosovës me 81 vota për, në raundin e parë të votimit, në seancën e Kuvendit të nisur më 6 tetor.
Hungaria ka hequr të mërkurën veton ndaj hapjes së dy kapitujve të tjerë të negociatave për anëtarësimin e Ukrainës në Bashkimin Evropian, duke i hapur rrugë një përparimi të ri në procesin e integrimit të Kievit.
Megjithatë, hapi i radhës varet nga miratimi nga parlamenti ukrainas i një ligji për forcimin e të drejtave të pakicave kombëtare, veçanërisht të komunitetit hungarez në Transkarpati.
Pas një marrëveshjeje të arritur në nivel ekspertësh, parlamenti ukrainas, Verkhovna Rada, pritet ta miratojë ligjin të hënën. Nëse kjo ndodh, Hungaria pritet të japë miratimin për hapjen e kapitujve të dytë dhe të tretë në Këshillin e Çështjeve të Përgjithshme në Luksemburg të martën.
Kjo do të largonte një prej pengesave kryesore përpara samitit të ardhshëm të Këshillit Evropian dhe do t’i lejonte edhe Moldavisë të avanconte në procesin e anëtarësimit, pasi dy proceset janë ndjekur paralelisht.
Të mërkurën, Budapesti lejoi gjithashtu nisjen e përgatitjeve teknike për letrat që Këshilli duhet t’ia dërgojë Ukrainës, për t’i kërkuar paraqitjen e qëndrimeve të saj negociuese. Ky është një hap formal drejt hapjes së kapitujve.
Më parë, Hungaria kishte bllokuar edhe këtë fazë përgatitore, ndaj vendimi i së mërkurës shihet si një sinjal i fortë se Budapesti është gati ta heqë plotësisht veton, nëse Kievi miraton ligjin për të drejtat e pakicave.
Kapitujt mund të hapen zyrtarisht gjatë një konference ndërqeveritare të martën e ardhshme.
Hungaria kishte kërkuar prej kohësh garanci më të forta për të drejtat arsimore, kulturore dhe gjuhësore të rreth 100 mijë hungarezëve etnikë në Ukrainë.
Në fillim të tetorit, në parlamentin ukrainas u regjistrua një projektligj që synon të forcojë të drejtën për arsimim në gjuhët e pakicave kombëtare dhe të zhbllokojë hapjen e kapitujve të rinj të negociatave me BE-në.
Procesi, megjithatë, mund të pengohet sërish, pasi ligji ende nuk është miratuar dhe qeveria e Kievit duhet të sigurojë një shumicë të qëndrueshme në Rada.
Nëse marrëveshja realizohet, ajo mund t’i hapë rrugë edhe takimit të parë dypalësh mes kryeministrit hungarez Péter Magyar dhe presidentit ukrainas Volodymyr Zelenskyy. Të dy kishin planifikuar të takoheshin më herët, por Magyar e kishte kushtëzuar takimin me përparimin në çështjen e të drejtave të pakicave.
Dy kapitujt e rinj lidhen me tregun e brendshëm dhe konkurrueshmërinë.
Në ceremoninë e inaugurimit, ushtruesja e detyrës së presidentes, Albulena Haxhiu, ia ka dorëzuar Kushtetutën presidentes së re, duke shënuar zyrtarisht fillimin e mandatit të saj.
Shiroka-Pula u zgjodh presidente me 81 vota të deputetëve, në votimin e zhvilluar në mesnatën mes të martës dhe të mërkurës, në ditën e fundit të afatit kushtetues për zgjedhjen e presidentit.
Ajo e siguroi postin e presidentes pas marrëveshjes politike ndërmjet Lëvizjes Vetëvendosje dhe Partisë Demokratike të Kosovës.
Federata Turke e Futbollit (TFF) ka marrë vendimin për t’i dhënë fund bashkëpunimit me Vincenzo Montellan, pas një serie rezultatesh zhgënjyese të kombëtares turke.
Sipas mediumit të njohur turk “Milliyet”, drejtuesit e federatës kanë vendosur të ndërpresin kontratën me trajnerin italian, duke e konsideruar të nevojshëm një ndryshim në drejtimin e skuadrës.
Turqia ka kaluar një periudhë të vështirë në Ligën e Kombeve, ku ka regjistruar katër humbje radhazi. Disfata e fundit, 1-3 ndaj Italisë, ka shtuar edhe më shumë presionin mbi Montellan, i cili është kritikuar nga tifozët dhe analistët.
TFF vlerëson se kombëtarja ka nevojë për një qasje të re dhe për ndryshime të menjëhershme për t’i rikthyer skuadrës rezultatet pozitive.
Në ditët e ardhshme pritet të përmbyllen procedurat financiare për ndërprerjen e kontratës, ndërsa më pas federata turke pritet të zyrtarizojë trajnerin e ri të kombëtares.
Montella mori drejtimin e Turqisë në shtator të vitit 2023 dhe gjatë mandatit të tij pati edhe momente të rëndësishme. Italiani e udhëhoqi skuadrën deri në çerekfinale të Euro 2024 në Gjermani, duke lënë përshtypje të mira me paraqitjet e ekipit.
Megjithatë, forma e dobët dhe rezultatet e fundit kanë ndryshuar situatën, duke bërë që rrugëtimi i Montellas në stolin e Turqisë të marrë fund më herët nga sa ishte planifikuar.
Tashmë vëmendja është te pasuesi i italianit dhe te emri që do të marrë përsipër detyrën për ta rikthyer kombëtaren turke në rrugën e rezultateve pozitive.
Lionel Messi ka zhvilluar ndeshjen e fundit me fanellën e Argjentinës, duke i dhënë fund një kapitulli 21-vjeçar me kombëtaren që e shndërroi në një prej figurave më të mëdha të historisë së futbollit.
Në stadiumin Monumental të Buenos Airesit, përballë rreth 85 mijë tifozëve, Argjentina triumfoi 3-0 ndaj Beninit në një ndeshje miqësore, por vëmendja ishte e gjitha te kapiteni dhe numri 10.
Messi u largua nga kombëtarja me një rekord mbresëlënës: 208 paraqitje dhe 126 gola, ndërsa në vitet e tij me Argjentinën fitoi Kupën e Botës 2022 dhe dy herë Kupën e Amerikës.
Në përfundim të takimit, stadiumi u ngrit në këmbë për t’i dhënë lamtumirën legjendës. Bashkëlojtarët, stafi teknik, trajneri Lionel Scaloni dhe mijëra tifozë e rrethuan Messin në një moment të mbushur me emocione.
“Ka qenë një krenari e madhe të vesh këtë fanellë për më shumë se 20 vjet. Nuk kam pushuar kurrë së luftuari dhe nuk kam pushuar kurrë së dhëni më të mirën time. Do të doja shumë të kthehesha përgjithmonë, sepse të luash për ekipin kombëtar të Argjentinës është gjëja më e bukur që mund të të ndodhë”, u shpreh Messi para tifozëve.
Edhe në ndeshjen e tij të fundit, 39-vjeçari la gjurmën e tij. Argjentina kaloi në avantazh në minutën e 48-të, kur nga një goditje këndi e ekzekutuar nga Messi, Nicolás Otamendi realizoi me kokë.
Në minutën e 61-të, ishte sërish Messi protagonist, këtë herë duke asistuar për talentin e ri Nico Paz, i cili shënoi me të majtën. Dhjetë minuta më vonë, vetë Messi vulosi rezultatin 3-0 nga pika e bardhë.
Emocionet nisën që në minutat e para të takimit. Vetëm dhjetë minuta pas startit, gjyqtari ndali lojën për t’i dhënë mundësinë stadiumit të nderonte kapitenin argjentinas.
Për këtë sfidë të veçantë, Messi veshi një fanellë speciale të Argjentinës, me vija vertikale më të gjera, një diell të madh në dizajn dhe numrin e artë 10 në shpinë.
Më 31 gusht, Messi kishte njoftuar se do t’i jepte fund paraqitjeve të tij me kombëtaren, duke e mbyllur kështu një rrugëtim të jashtëzakonshëm që për vite me radhë ishte shoqëruar me pritshmëri, zhgënjime, triumfe dhe në fund me lavdinë e shumëpritur në Katar.
Pas ndeshjes, kapiteni argjentinas falënderoi bashkëlojtarët për gjithçka që kishin arritur së bashku dhe u bëri thirrje për unitet.
“Ne duhet të ndërtojmë një grup të fortë dhe të bashkuar, sepse ka njerëz që duan që ekipi kombëtar të dështojë dhe ne nuk duhet t’u japim atyre këtë kënaqësi”, tha Messi.
Por lamtumira e tij nuk nisi në fushën e Monumentalit. Përpara ndeshjes, Messi u nderua edhe me një doktoraturë nderi nga Universiteti i Buenos Airesit, një prej institucioneve më të rëndësishme publike të Argjentinës.
Vlerësimi iu dha në kompleksin stërvitor të kombëtares, në periferi të Ezeizës, për kontributin e tij të jashtëzakonshëm me fanellën e Argjentinës dhe ndikimin që ka pasur brenda dhe jashtë fushës.
Pas më shumë se dy dekadash, 208 ndeshjesh, 126 golash dhe trofesh historikë, Messi i ka thënë lamtumirën Argjentinës.
Një epokë u mbyll në Monumental. Por historia e numrit 10 do të mbetet përgjithmonë pjesë e futbollit argjentinas.
Vetëm një grup prej së paku dhjetë deputetësh mund ta kontestojë drejtpërdrejt në Gjykatën Kushtetuese zgjedhjen e Presidentes, ka sqaruar Eugen Cakolli nga Instituti Demokratik i Kosovës.
Sipas tij, kërkesa duhet të parashtrohet brenda tetë ditësh nga miratimi i vendimit në Kuvend, në të kundërtën kjo mundësi mbyllet.
Cakolli thekson se dërgimi i një njoftimi të thjeshtë, si ai i avokatit Arianit Koci, nuk prodhon efekt pezullues ndaj zgjedhjes.
Sipas Cakollit, afati për një kontestim të tillë do të ishte deri më 14 tetor.
“Kjo nënkupton, bazuar në parimin e llogaritjes se çdo vendim është kushtetues derisa të vërtetohet e kundërta, pra ky prezumimi i kushtetutshmërisë, zgjedhja e zonjës Justina Pula si presidente është plotësisht kushtetuese, përveç nëse dikush do ta kontestojë në gjykatë brenda afatit tetë ditor, që i bie më së voni deri më 14 tetor, dhe eventualisht gjykata do ta anulojë të njëjtën”, tha ai.
Cakolli ka folur edhe për njoftimin për moszbatim në Gjykatën Kushtetuese, duke thënë se ai nuk e pezullon procedurën.
“Në anën tjetër, edhe dërgimi në Gjykatë Kushtetuese i njoftimit për moszbatim, nuk ka asnjë efekt të drejtpërdrejtë në pezullimin e procedurës si të tillë. Për shkak se gjykata ka mekanizma të brendshëm për ta bërë kontrollin e zbatimit të vendimeve të saj, përmes formimit të disa komisioneve të brendshme. Sidoqoftë nuk ka kuptim që të them gjykata ta bëjë vlerësimin e zbatimit ose moszbatimit, sepse nuk ka pikë të aktgjykimit që nuk është zbatuar”, tha ai për Ekonomia Online.
Ai ka thënë se pretendimi për moszbatim të aktgjykimit, sipas tij, nuk prodhon efekt mbi procedurën e zgjedhjes së presidentes.
“Pra gjykata ka përcaktuar pasojën që nënkupton se e vetmja mënyrë për ta kontestuar këtë procedurë është nëse ndiqet procedura sipas nenit 113 të Kushtetutës së Kosovës dhe ligjit për Gjykatën. Andaj, ndonëse e drejta e çdokujt që të pretendojë se po arrin që ta dërgojë një rast, kjo absolutisht nuk qëndron dhe në fakt më shumë duket si përpjekje për vëmendje por që përmbajtësisht nuk ka asnjë efekt mbi procedurën e zgjedhjes së presidentit”, tha ai.
Cakolli ka thënë se mënyra e përfundimit të votimit për presidenten mbetet e diskutueshme, pasi votimi kishte nisur në minutat e fundit të 6 tetorit dhe kishte vazhduar edhe pas mesnatës.
“Zgjedhja e presidentit, përkatësisht presidentes mbrëmë, normalisht mbetet e diskutueshme për mbylljen e procedurës, por që në anën tjetër, ka praktika sidomos ndërkombëtare por edhe mënyra se si janë interpretuar normat në Kosovë, bazuar edhe në vetë jurisprudencën e Gjykatës Kushtetuese, është që normat të interpretohen në funksion të mundësimit të formimit të institucioneve, e jo që dispozitat të interpretohen mekanikisht për një gjë të tillë”, tha ai.
Sipas tij, fakti që votat kanë qenë në kuti para përfundimit të 6 tetorit mund të jetë relevant në interpretimin e përfundimit të procedurës.
“Unë besoj që meqenëse procedura ka nisur dhe ka qenë në përmbyllje, pra votat kanë qenë në kuti, do të jetë problematike që të konstatohet se ka dështuar zgjedhja e presidentit brenda afatit sepse, në anën tjetër nuk ka interpretim taksativ se çfarë nënkupton zgjedhja e presidentit. Pra, a zgjidhet presidenti vetëm kur ta konstatojë këtë kryetarja, kur të numërohen votat, apo kur të njëjtat janë në kuti?”, tha ai.
Cakolli ka bërë analogji me procesin zgjedhor, duke thënë se data e zgjedhjeve mbetet ajo në të cilën është zhvilluar procesi, edhe nëse rezultatet certifikohen më vonë.
“Sepse të gjitha kanë relevancën e tyre dhe ta zëmë në analogji me procesin zgjedhor, zgjedhjet bëhen në një datë të caktuar, ta zëmë në rastin e fundit më 7 qershor, dhe edhe nëse rezultatet certifikohen një ditë pas, dy ditë pas, dy javë pas, data e zgjedhjeve mbetet 6 apo 7 qershori. Dhe seanca e djeshme, pra presidenti i vendit në kuptimin e gjerë të fjalës është zgjedhur në seancën e mbajtur më 6 tetor, jo më 7 tetor, sepse nuk ka pasur seancë të thirrur për datën 7 tetor. Andaj, besoj që ka mundësi që kjo çështje të tejkalohet, nëse vetëm se do të ketë kërkesë për interpretim, por që unë besoj që nuk është e dobishme që të ketë interpretim kaq të ngushtë të normës kushtetuese deri në sekonda në këtë kuptim”, tha ai.
Ndërkohë, avokati Arianit Koci ka njoftuar se të mërkurën ka depozituar në Gjykatën Kushtetuese njoftimin për moszbatimin e aktgjykimit në rastet KO256/26 dhe KO258/26.
Koci ka thënë se Gjykata kishte përcaktuar që procedura për zgjedhjen e presidentit duhej të përfundonte deri më 6 tetor 2026 dhe se votimi kishte vazhduar edhe pas mesnatës.
“Sot kam depozituar në Gjykatën Kushtetuese njoftimin për moszbatimin e aktgjykimit në rastet KO256/26 dhe KO258/26. Gjykata kishte përcaktuar qartë se procedura për zgjedhjen e Presidentit duhej të përfundonte deri më 6 tetor 2026. Sipas të dhënave publike, votimi ka vazhduar edhe pas mesnatës. Gjykata në nenin 226 të aktgjykimit, e ka theksuar edhe pasojën juridike në rast se afati nuk respektohet: shpërndarja e Kuvendit. Vendimet e Gjykatës Kushtetuese janë të detyrueshme. Pa zbatimin e tyre, nuk ka shtet e shoqëri”, ka shtuar Cakolli, në një intervistë për Ekonomia Online.