1 mijë e 888 gjoba trafiku janë shqiptuar në 24 orët e fundit në vendin tonë.
Sipas statistikave të përgjithshme të policisë, gjatë kësaj periudhe kanë ndodhur 8 aksidente me të lënduar dhe 25 me dëme material.
Në 24 orëshin e fundi gjithashtu janë arrestuar 16 persona dhe 13 janë dërguar në mbajtje
Një aksident tragjik pak ditë më parë në aksin Librazhd-Përrenjas i mori jetën shtetasit kinez Li Jianhong, si dhe la të plagosur 6 persona të tjerë.
Në lidhje me këtë aksident kanë shkruar mediat kineze, përmes të cilave është zbuluar se viktima ishte një nga biznesmenët më të fuqishëm atje. Ditën e aksidentit tragjik ai udhëtonte me disa shtetas të tjerë kinez për një vizitë pune që lidhej me biznesin në vendin tonë.
Li Jianhong, 60 vjeç, njihej si një sipërmarrës i suksesshëm në rajonin e Xinjiangut. I lindur në dhjetor të 1965, Li Jianhong ishte president i Xinjiang Grand Scape Group si dhe themelues i resortit të njohur të skive “Silkroad Mountain Resort” në Urumqi, një nga projektet më të rëndësishme të turizmit dimëror në Kinë.
Ai e nisi karrierën në sektorin e telekomunikacionit, përpara se në vitin 1993 të linte punën në një institut në Guangzhou dhe të kthehej në Xinjiang për të ndërtuar aktivitetin e tij privat.
“Xinjiang Grand Scape Group”, që ai drejtonte, u zhvillua në një kompani të madhe me aktivitet në telekomunikacion, turizëm dhe menaxhim investimesh, duke arritur asete rreth 1.4 miliardë juanë dhe mijëra të punësuar. Në vitet e fundit, grupi ka regjistruar qarkullim të lartë dhe është renditur ndër kompanitë më të rëndësishme private në rajon.
Në vitin 2002, kompania ishte ndër themelueset e “Xinjiang International Grand Bazaar”, një nga simbolet më të njohura të qytetit të Urumqit, ndërsa më pas u tërhoq nga projekti në vitin 2017
Përveç aktivitetit të tij në biznes, Li Jianhong njihej edhe si sportist i apasionuar pas alpinizmit dhe skive. Ai ka përfunduar “Explorer’s Grand Slam”, duke ngjitur shtatë majat më të larta të botës dhe duke arritur në të dy polet.
Në vitin 2018, në moshën 53-vjeçare, ai arriti majën e Everestit, si dhe ngjitjen e Lhotse-s, duke u renditur mes alpinistëve me arritje të veçanta në nivel ndërkombëtar./TCH
Pas konfirmimit të 8 rasteve me fruth, Instituti Kombëtar i Shëndetësisë Publike dhe institucionet shëndetësore po e monitorojnë situatën epidemiologjike duke qenë në gatishmëri të plotë për menaxhimin e saj.
Kjo përmes identifikimit të fëmijëve të pa vaksinuar dhe angazhimin e ekipeve mobile për vaksinim në zonat me mbulueshmëri më të ulët.
Sipas Institutit të Shëndetësisë Publike, të gjitha rastet e konfirmuara janë fëmijë të pavaksinuar me vaksinën kundër fruthit.
Sipas Institutit të Shëndetit Publik, fruthi është një sëmundje serioze dhe konsiderohet rreth 6 herë më ngjitëse se gripi. Sipas tyre, 1 në 5 persona të infektuar me fruth mund të zhvillojnë komplikime serioze shëndetësore.
Simptomat përfshijnë: temperaturë, rrjedhje të hundës, kollë, sy të skuqur dhe të përlotur, si dhe skuqje në fytyrë dhe në gjithë trupin.
Për të ulur rrezikun nga përhapja e fruthit, vaksinimi mbetet mënyra më efektive dhe më e sigurt për mbrojtjen e shëndetit publik.
“Vaksinimi ul rrezikun e komplikimeve dhe ndihmon në forcimin e imunitetit te fëmijët që kanë imunitet të dobësuar. Ndikon edhe në parandalimin e përhapjes së ndonjë epidemie. Kryesisht prek grupmoshat prej 0-12 muajsh, që është edhe periudha kur bëhet vaksinimi me këtë vaksinë. Efektet kryesore janë që prek sistemin respirator, shkakton skuqje në trup dhe dobësim të imunitetit”, tha për RTK, Besim Murseli, shef i Mjekësisë Familjare nr. 1, Prishtinë.
Gjithashtu, rekomandohet që të shmangen kontaktet e panevojshme me persona të dyshimtë në fruth.
IKSHPK rikujton se çdo vonesë në vaksinim e rrit rrezikun për përhapje të mëtejshme dhe komplikime serioze, veçanërisht te fëmijët dhe personat me imunitet të dobësuar./RTK
Ministria e Industrisë, Ndërmarrësisë, Tregtisë dhe Inovacionit, ka publikuar çmimin maksimal të lejuar për shitjen e derivateve në tregun vendor, për sot dhe nesër.
Për datat 03-04.05.2026, çmimet maksimale të lejuara janë si vijon:
• Nafta (dizel): 1.69 euro/litër;
• Benzina: 1.49 euro/litër
• Gas: 0.84 euro/litër.
Postimi i plotë:
Të gjitha partitë politike që aktualisht janë të regjistruara në Kosovë, janë obliguar nga Komisioni Qendror i Zgjedhjeve që ta njoftojnë këtë institucion për pjesëmarrje apo mospjesëmarrje në zgjedhjet e parakohshme për Kuvendin e Kosovës, të cilat do të mbahen më 7 qershor 2026.
Partitë politike janë të obliguara që ta njoftojnë KQZ-në në rast se duan të marrin pjesë në këto zgjedhje përmes koalicionit.
Zëdhënësi i KQZ-së, Valmir Elezi, ka shpjeguar për KosovaPress, se njoftimi i pjesëmarrjes apo mospjesëmarrjes në zgjedhje është obligim vetëm për 53 partitë politike që aktualisht janë të regjistruara dhe aktive në Kosovë.
Po ashtu, Elezi tregoi se deri më 7 maj, partitë politike kosovare kanë afat që të njoftojnë KQZ-në në rast se duan të marrin pjesë në zgjedhje përmes koalicionit. Ai kujtoi se ligji ka bërë disa rregullime se për të drejtat dhe detyrimet e partive politike kur hyjnë në koalicion.
Në zgjedhjet e rregullta parlamentare të shkurtit të vitit 2025, morën pjesë 28 subjekte politike, prej të cilave 20 parti politike, 5 koalicione, 2 nisma qytetare dhe 1 kandidat i pavarur.
Ndërkaq, në zgjedhjet e parakohshme parlamentare që u mbajtën në fund të dhjetorit, garuan 24 subjekte politike, prej të cilave 18 parti politike 3 koalicione; 2 iniciativa qytetare dhe 1 kandidat i pavarur./KP
Malisheva ka arkëtuar pikët e plota në udhëtim te Prishtina, në sfidën e zhvilluar në Hajvali.
Mysafirët triumfuan me rezultat minimal 0-1, ndërsa heroi i ndeshjes ishte sulmuesi Altin Aliu.
Pjesa e parë përfundoi ashtu siç nisi, pasi asnjëra nga skuadrat nuk arriti t’i konkretizojë rastet. Prishtina ishte më kërkuese gjatë kësaj pjese, megjithatë edhe Malisheva zhvilloi disa kundërsulme të rrezikshme.
Në pjesën e dytë loja u bë më dramatike, kur Prishtina mbeti me një lojtar më pak pasi Samatic u ndëshkua me kartonin e dytë të verdhë dhe u përjashtua nga loja.
Golin e fitores për Malishevën e shënoi Altin Aliu në minutën e fundit shtesë (90+5’), duke realizuar pas një topi të kthyer nga goditja e një bashkëlojtari.
Me këtë fitore, Malisheva vazhdon fuqishëm garën për Evropë, duke u renditur e treta me 52 pikë, ndërsa Prishtina mbetet në pozitën e katërt me 45 pikë.
1. FC Heidenheim ka shkaktuar befasi në Bundesliga duke marrë një barazim 3-3 ndaj Bayern Munich në Allianz Arena.
Skuadra që renditet në fund të tabelës ishte shumë afër fitores, pasi mbajti epërsinë 2-3 deri në minutën e 100-të. Megjithatë, një autogol i portierit Diant Ramaj në çastet e fundit vulosi rezultatin përfundimtar 3-3.
Budu Zivzivadze kaloi mysafirët në epërsi në minutën e 22-të, duke përfituar nga një top i kthyer. Në minutën e 31-të, Marnon Busch dyfishoi rezultatin pas asistimit të Eren Dinçi.
Bayerni reagoi para pushimit, kur Leon Goretzka shënoi një supergol nga goditja e lirë në minutën e 44-t.
Në pjesën e dytë, trajneri Vincent Kompany aktivizoi lojtarë si Michael Olise, Joshua Kimmich, Harry Kane dhe Luis Díaz për të përmbysur rezultatin.
Goretzka realizoi sërish në minutën e 57-të pas asistimit të Olise, duke barazuar shifrat. Por, në minutën e 76-të, Arijon Ibrahimović asistoi për Zivzivadzen, i cili me një veprim të bukur riktheu epërsinë për Heidenheimin në 2-3.
Kur gjithçka dukej e mbyllur, Bayerni arriti të shmangë humbjen falë autogolit të Ramajt në minutat shtesë, duke siguruar vetëm një pikë në një ndeshje dramatike.
Drita ka arritur një fitore minimale me rezultat 1-0 në udhëtim ndaj Prishtinës së Re në kuadër të javës së 32-të në Albi Mall Superligë.
Pjesa e parë nisi me një ritëm të ngadaltë, me Dritën që dominonte në aspektin e posedimit, por pa krijuar raste të qarta shënimi. Megjithatë, situata ndryshoi drejt fundit të pjesës së parë, kur mysafirët goditën traversën me Jorgo Pëllumbin, duke dhënë sinjalet e para për rritjen e rrezikshmërisë.
Në minutën e 39-të, Kristal Abazaj u pengua brenda zonës dhe nga penalltia Besnik Krasniqi realizoi për 1-0, rezultat që doli të mbetej përfundimtar.
Në pjesën e dytë, Drita menaxhoi mirë epërsinë e krijuar, ndërsa Prishtina e Re, pavarësisht disa rasteve të rrezikshme, nuk arriti të barazojë shifrat.
Me këtë fitore, Drita shkon në kuotën e 63 pikëve, tetë më shumë se Ballkani në vendin e dytë, i cili ka një ndeshje më pak të luajtur. Ndërkohë, Prishtina e Re mbetet në pozitën e fundit në tabelë me vetëm 28 pikë të grumbulluara.
Në orët e fundit është bërë virale një foto në rrjetet sociale ku një tifoz shfaqet pranë një personi që duket se është Gonzalo Higuaín. Por pse ka dyshime mbi autenticitetin e saj?
Personi i supozuar si Higuaín shfaqet në një gjendje fizike ndryshe nga pamjet e tij të fundit publike, duke bërë që ndjekësit të mos jenë të sigurt nëse fotoja është reale ose e manipuluar me inteligjencë artificiale. Fotografia, e shkrepur brenda një dyqani me artikuj sportivë në Miami, tregon një person me disa kilogramë më shumë krahasuar me peshën e Higuaín në momentin e tërheqjes nga futbolli në 2022. Ai ka mjekër të dendur dhe të pakujdesur, pak flokë në kokë, pantallona të shkurtra dhe sandale – një ndryshim look-u që ka befasuar shumë tifozë.
Gonzalo Higuaín mbylli karrierën e tij si futbollist në 2022, pas periudhave me River Plate, Real Madrid, Napoli, Juventus dhe Inter Miami. Në një intervistë për “La Nación” në prill 2021, Higuaín kishte folur për ndryshimet në pamjen e tij dhe për gëzimin që nuk gjykohet nga të tjerët: “As media, as tifozët nuk të gjykojnë nëse je i shëndoshë, i dobët apo pa flokë. Kam lënë mjekrën të rritet dhe u bëra lajm, por askush nuk flet për mua për futbollin. Që kur lindi vajza ime, kam ndryshuar ndjeshmërinë.”
Kjo foto duket se pasqyron pikërisht këto ndryshime në stil dhe pamje, duke shpjeguar pse duket ndryshe nga imazhet e njohura të futbollistit.
Real Madridi ka marrë një tjetër goditje para fazës përmbyllëse të sezonit, pasi Dani Carvajal është përjashtuar zyrtarisht për shkak të lëndimit. Klubi spanjoll ka publikuar një komunikatë mjekësore, duke konfirmuar shkallën e problemit të mbrojtësit dhe duke shtuar shqetësime në një sezon tashmë të vështirë.
Edhe pse njoftimi zyrtar nuk jep një afat rikuperimi, mediat spanjolle sugjerojnë se Carvajal mund të mungojë rreth dy javë. Bazuar në këtë periudhë, ai pritet të humbasë ndeshjet e rëndësishme ndaj Espanyolit, Barcelonës dhe Real Oviedos, ndërsa përballja me Sevillën mbetet gjithashtu e pasigurt.
Megjithatë, ekziston mundësia që ai të rikthehet në kohë për ndeshjen e fundit të sezonit kundër Athletic Bilbaos, një takim që mund të ketë rëndësi të veçantë, pasi mund të përfaqësojë paraqitjen e tij të fundit me klubin.
Minutat e kufizuara kanë reduktuar tashmë ndikimin e tij këtë sezon, me mbrojtësin që ka regjistruar vetëm 885 minuta në të gjitha garat. Nën drejtimin e Alvaro Arbeloas, mundësitë kanë qenë të pakta, dhe kjo mungesë e fundit vetëm sa ia shton vështirësitë ekipit.