ATV

Blog

  • Truku i thjeshtë që largon njollat e vajit në rroba

    Truku i thjeshtë që largon njollat e vajit në rroba

    Nuk ka gjë më bezdisëse sesa të njollosësh rrobat e preferuara me vaj, sidomos kur njolla futet thellë në pëlhurë dhe nuk del lehtë.

    Njollat e vajit janë të vështira për t’u hequr sepse nuk përzihen me ujë dhe përhapen shpejt në material.

    Ekspertja e pastrimit Chantel Mila (e njohur si Mama Mila në TikTok) ka ndarë një mënyrë të thjeshtë dhe efektive për t’i larguar këto njolla, duke përdorur vetëm disa produkte që i keni në kuzhinë.

    Çfarë ju duhet:

    Sodë buke;

    Detergjent për enë;

    Letër pjekjeje.

    Si ta pastroni njollën:

    Vendosni një copë letre pjekjeje pas njollës (brenda rrobës);

    Hidhni sodë buke mbi njollë derisa ta mbuloni plotësisht;

    Vendosni një fletë tjetër letre pjekjeje sipër dhe kaloni lehtë me hekur. Nxehtësia ndihmon që soda të thithë vajin;

    Hiqni sodën e tepërt — do të vini re që njolla është zbehur ose zhdukur;

    Në fund, përdorni pak detergjent për enë për të pastruar mbetjet e yndyrës.

    Kjo metodë funksionon më mirë për njolla të freskëta. Për njolla më të vjetra, kombinimi i detergjentit dhe sodës së bukës mund të jetë më efektiv.

    Këshilla të rëndësishme:

    Veproni sa më shpejt — thithni vajin fillimisht me letër kuzhine.

    Kini kujdes me rrobat me ngjyra ose materialet delikate (si leshi, mëndafshi), pasi soda e bukës mund të zbehë ngjyrën.

    Kjo është një zgjidhje e shpejtë dhe praktike kur nuk keni kohë për një larje të plotë, por doni të hiqni njollën menjëherë.

  • Studimi i ri: Një gotë qumësht në ditë mund të ulë rrezikun për kancer të zorrës së trashë

    Studimi i ri: Një gotë qumësht në ditë mund të ulë rrezikun për kancer të zorrës së trashë

    Një studim i ri i Universitetit të Oxfordit ka rikthyer vëmendjen te rëndësia e kalciumit në ushqyerje, pasi ka treguar se një gotë e madhe qumësht në ditë mund të lidhet me rrezik më të ulët për kancer të zorrës së trashë

    Një gotë qumësht në ditë mund të ndihmojë në uljen e rrezikut për kancer të zorrës së trashë, tregon studimi më i fundit i madh.

    Konsumimi i rregullt i qumështit dhe i ushqimeve të tjera të pasura me kalcium mund të ketë efekt mbrojtës ndaj kancerit të zorrës së trashë, sugjeron studimi i madh i Universitetit të Oxfordit, i kryer mbi më shumë se 542.000 gra, të ndjekura mesatarisht për 16 vjet.

    Shkencëtarët zbuluan se 300 miligramë shtesë kalcium në ditë, që përputhen afërsisht me një gotë të madhe qumësht, lidhen me 17 për qind rrezik më të ulët për zhvillimin e kancerit të zorrës së trashë.

    Studimi është publikuar në revistën Nature Communications dhe është financuar nga Cancer Research UK. Autorët theksojnë se efekti mbrojtës nuk lidhet domosdoshmërisht vetëm me qumështin e lopës. I rëndësishëm është kalciumi, i cili mund të merret edhe nga jogurti, tofu, perimet me gjethe të errëta ose pijet bimore të pasuruara me kalcium.

    Çelësi duket se është kalciumi

    Mjekja e përgjithshme Rupa Parmar ka paralajmëruar se në ordinancë po sheh gjithnjë e më shpesh pacientë që i largojnë produktet e qumështit nga ushqimi, edhe pse nuk kanë arsye të konfirmuar mjekësore për këtë.

    “Në ordinancë e shoh vazhdimisht. Shprehja intolerancë ndaj produkteve të qumështit përdoret shumë lehtë dhe shumë njerëz ia vendosin vetes këtë diagnozë. Kur bëjmë testet, shpesh del se në fakt nuk e kanë këtë gjendje”, tha ajo.

    Ajo shtoi se ushqimi pa produkte qumështi është bërë një lloj trendi, sepse disa njerëz i shohin ato si ushqime që shtojnë peshë trupore.

    “Heqja dorë nga produktet e qumështit është bërë trend, sepse njerëzit mendojnë se shëndoshin, por shpesh i bëjnë vetes më shumë dëm sesa dobi kur i shmangin”, tha Parmar.

    Shkencëtarët supozojnë se kalciumi mund të lidhet me substanca të dëmshme në zorrë, përfshirë acidet biliare dhe acidet yndyrore, duke ulur kështu efektin e tyre potencialisht kancerogjen.

    Rezultatet treguan se ushqimet e pasura me kalcium, veçanërisht qumështi dhe jogurti, kishin lidhjen më të qartë me rrezik më të ulët. Megjithatë, ky efekt nuk u pa në të njëjtën mënyrë te të gjitha produktet e qumështit. Djathi dhe akullorja nuk treguan lidhje të qartë me uljen e rrezikut për kancer të zorrës së trashë.

    “Çelësi është kalciumi, dhe ai mund të vijë nga burime të ndryshme: qumështi, jogurti, por edhe tofu ose pijet bimore të pasuruara me kalcium”, tha Parmar.

    Ekspertët theksojnë se kjo nuk do të thotë se qumështi është mbrojtje mrekullibërëse ndaj sëmundjes. Bëhet fjalë për një lidhje të vërejtur në një studim të madh vëzhgues, prandaj rezultatet duhet të interpretohen në kontekstin e mënyrës së përgjithshme të jetesës dhe ushqyerjes.

    Alkooli dhe mishi i përpunuar rrisin rrezikun

    I njëjti studim tregoi edhe anën tjetër të zakoneve ushqimore: alkooli, mishi i kuq dhe mishi i përpunuar lidhen me rrezik më të lartë për kancer të zorrës së trashë.

    Sipas përmbledhjes së studimit, çdo 20 gramë shtesë alkool në ditë lidhej me 15 për qind rritje të rrezikut, ndërsa çdo 30 gramë mish të kuq ose të përpunuar me 8 për qind rritje të rrezikut.

    “Është e rëndësishme të kuptohet se faktorët e rrezikut janë pjesë e një tabloje më të gjerë. Përqendrimi në mënyrë të shëndetshme jetese, përfshirë ushqyerjen e balancuar dhe aktivitetin e rregullt fizik, është mënyra më e mirë për uljen e rrezikut nga çdo lloj kanceri”, tha Parmar.

    Ajo shtoi se ndërprerja e duhanit dhe ulja e konsumit të alkoolit janë ndër hapat më të rëndësishëm në parandalimin e kancerit të zorrës së trashë.

    “Gjithçka është te masa dhe te zgjedhjet e shëndetshme”, theksoi ajo.

    Mjekët paralajmërojnë se është e rëndësishme t’u kushtohet vëmendje shenjave të mundshme të kancerit të zorrës së trashë, si gjaku në jashtëqitje, humbja e pashpjegueshme e peshës trupore, dhimbja ose parehatia e vazhdueshme në bark, si dhe ndryshimet në jashtëqitje që nuk kalojnë.

    Diagnoza e hershme mund t’i rrisë dukshëm gjasat për trajtim të suksesshëm, prandaj ekspertët këshillojnë që te simptomat e pazakonshme ose afatgjata të mos shtyhet vizita te mjeku.

  • Si praktikohet teknika e tokëzimit: Mund të ulë stresin, tensionin e gjakut dhe të përmirësojë gjumin

    Si praktikohet teknika e tokëzimit: Mund të ulë stresin, tensionin e gjakut dhe të përmirësojë gjumin

    Tokëzimi është praktikë që nënkupton kontaktin e drejtpërdrejtë të trupit me tokën, për shembull duke ecur zbathur në bar, rërë apo dhe, ose duke përdorur produkte të posaçme që lidhen me tokëzimin elektrik

    Sipas mbështetësve të kësaj praktike, trupi lidhet me ngarkesën natyrore elektrike të tokës dhe mund të thithë elektrone, të cilat besohet se ndikojnë në uljen e inflamacionit, stresit dhe përmirësimin e gjumit. Megjithatë, provat shkencore janë ende të kufizuara, prandaj tokëzimi nuk duhet të përdoret kurrë si zëvendësim i trajtimit mjekësor.

    Si mendohet se funksionon?

    Sipërfaqja e tokës është e pasur me elektrone. Teoria e tokëzimit thotë se, për shkak të jetës moderne dhe kontaktit të pakët me tokën, trupi grumbullon ngarkesa pozitive statike, të cilat mund të neutralizohen përmes kontaktit të drejtpërdrejtë me tokën.

    Përkrahësit e kësaj qasjeje besojnë se elektronet e përthithura veprojnë si antioksidantë natyralë, duke ndihmuar në neutralizimin e radikaleve të lira dhe në mbështetjen e proceseve natyrore të organizmit.

    Tokëzimi mund të praktikohet në mënyrë të thjeshtë, duke ecur zbathur në natyrë, duke qëndruar në tokë, duke hyrë në ujë natyror, si liqen apo det, ose përmes produkteve të posaçme si dyshekë, çarçafë, çorape, këpucë apo shirita tokëzues.

    Produktet për tokëzim

    Në treg gjenden disa produkte që pretendojnë se mundësojnë kontaktin elektrik të trupit me tokën. Dyshekët apo matet tokëzuese vendosen nën këmbë, në tavolinë ose përdoren gjatë meditimit. Çarçafët dhe mbulesat për dyshek përmbajnë materiale përçuese, zakonisht argjend ose karbon, dhe lidhen me një prizë të tokëzuar ose drejtpërdrejt me tokën.

    Çorapet, këpucët dhe shiritat ngjitës për lëkurë kanë të njëjtin qëllim: të mundësojnë përçimin e elektroneve drejt trupit.

    Nëse përdoren produkte që lidhen në prizë, është e domosdoshme të kontrollohet nëse priza është e tokëzuar siç duhet. Për këtë përdoren pajisje kontrolluese, të cilat shpesh ofrohen bashkë me produktin ose mund të blihen veçmas.

    Sa shpesh duhet praktikuar?

    Nuk ka një kohë të përcaktuar saktë. Disa burime sugjerojnë 10 deri në 20 minuta në ditë, ndërsa disa studime kanë raportuar ndryshime pas rreth 30 minutash kontakti me tokën.

    Në përgjithësi, mbështetësit e tokëzimit këshillojnë që kjo praktikë të bëhet rregullisht, por pa teprime dhe gjithmonë me kujdes.

    Përfitimet e mundshme

    Disa studime të vogla kanë raportuar se tokëzimi mund të ndikojë në disa procese të trupit, por ende nuk ka prova të mjaftueshme për të thënë se parandalon ose shëron sëmundje.

    Inflamacioni është një nga fushat më të përmendura. Disa të dhëna tregojnë se indikatorët e inflamacionit mund të ulen më shumë te personat që praktikojnë tokëzim, krahasuar me ata që nuk e praktikojnë. Po ashtu, disa studime kanë vërejtur përmirësim të qarkullimit të gjakut dhe ulje të viskozitetit të tij, gjë që mund të ketë rëndësi për shëndetin kardiovaskular.

    Tokëzimi është lidhur edhe me gjumë më të mirë. Një studim ka treguar se personat që e praktikonin kishin nivele më të rregulluara të kortizolit gjatë natës, hormon që ndikon në stres dhe ritmin ditor të trupit.

    Disa të dhëna të hershme përmendin edhe ndikim të mundshëm në uljen e stresit dhe ankthit, si dhe në përmirësimin e ndryshueshmërisë së ritmit të zemrës, një tregues i rëndësishëm për funksionimin e sistemit nervor dhe kardiovaskular.

    Megjithatë, këto rezultate duhen interpretuar me kujdes, sepse shumica e studimeve janë të vogla dhe kërkojnë konfirmim më të gjerë shkencor.

    Rreziqet dhe kujdesi

    Tokëzimi konsiderohet relativisht i sigurt për shumicën e njerëzve, por ka disa rreziqe praktike. Ecja zbathur mund të shkaktojë lëndime, infeksione, pickime ose rënie, sidomos në terren të pabarabartë. Në ditët e nxehta duhet pasur kujdes me hidratimin.

    Produktet që lidhen në prizë nuk duhet të përdoren gjatë stuhive me rrufe, sepse mund të rrisin rrezikun nga goditja elektrike. Po ashtu, instalimet elektrike të dëmtuara ose prizat pa tokëzim të rregullt mund të jenë të rrezikshme.

    Para se të filloni tokëzimin, këshillohet të konsultoheni me mjekun, sidomos nëse jeni shtatzënë, keni alergji, probleme me imunitetin, dëmtime nervore, diabet, plagë në këmbë ose probleme të tjera shëndetësore.

    Nëse gjatë praktikës ndieni mpirje, therje, dobësi, simptoma të ngjashme me gripin ose përkeqësim të gjendjes, ndërpriteni dhe kërkoni këshillë profesionale.

    Përfundim

    Tokëzimi është një praktikë e thjeshtë që synon rikthimin e kontaktit të drejtpërdrejtë me tokën. Mund të ndihmojë disa njerëz të ndihen më të qetë, të flenë më mirë ose të kenë më pak stres, por nuk ka prova të mjaftueshme që shëron sëmundje apo zëvendëson kujdesin mjekësor.

    Më e sigurta është të shihet si një formë e lehtë mirëqenieje, jo si terapi mjekësore.

  • Hiqni njollat nga rrobat e bardha me këtë truk interesant

    Hiqni njollat nga rrobat e bardha me këtë truk interesant

    Me ardhjen e pranverës dhe afrimin e verës, garderoba fillon të ndryshojë. Rrobat e trasha lihen mënjanë dhe në përdorim hyjnë këmishat dhe bluzat e lehta. Pikërisht në këtë periudhë, shumë njerëz vërejnë se rrobat e bardha nuk janë më si dikur – ato bëhen gri ose zverdhen, sidomos në jakë dhe në zonën e sqetullave.

    Shkaku nuk është vetëm papastërtia, por edhe grumbullimi i proteinave nga djersa dhe yndyra e trupit.

    Për këtë problem, ekziston një zgjidhje e thjeshtë dhe ekonomike: përdorimi i aspirinës. Ajo përmban acid salicilik, i cili ndihmon në shpërbërjen e këtyre njollave dhe rikthimin e bardhësisë së rrobave.

    Për ta përdorur këtë metodë, rekomandohet të shtypen pesë tableta aspirine dhe të treten në ujë të nxehtë.

    Rrobat e zverdhura ose të zbehura vendosen në këtë përzierje dhe lihen të njomen për të paktën tetë orë, në mënyrë që acidi të depërtojë mirë në fijet e pëlhurës. Më pas, ato lahen normalisht në lavatriçe. Për një efekt shtesë, mund të shtohen edhe disa tableta të tjera gjatë larjes.

    Në rastet e njollave më të forta, si ato nga djersa, mund të përgatitet një pastë me aspirinë dhe pak ujë, e cila aplikohet drejtpërdrejt mbi zonën e prekur dhe lihet të veprojë për rreth 30 minuta përpara larjes.

    Kjo metodë është jo vetëm efektive, por edhe shumë më e lirë krahasuar me produktet e shtrenjta zbardhuese.

    Për më tepër, është më e butë për rrobat, sidomos për materialet delikate si pambuku, të cilat mund të dëmtohen nga përdorimi i zbardhuesve të fortë.

  • Zbulohet plani, çfarë përfshin propozimi me 14 pika i Iranit për SHBA-në për t’i dhënë fund luftës

    Zbulohet plani, çfarë përfshin propozimi me 14 pika i Iranit për SHBA-në për t’i dhënë fund luftës

    Teherani ka paraqitur një propozim me 14 pika për përfundimin e luftës, përmes ndërmjetësimit të Pakistanit, ndërsa administrata Trump vijon të mbajë në fuqi bllokadën detare, të shqyrtojë opsione ushtarake dhe të miratojë paketa të mëdha armatimi për aleatët në Lindjen e Mesme. Presidenti amerikan, Donald Trump ka lënë të kuptohet se propozimi i ri vështirë se do të pranohet.

    Sipas agjencisë gjysmëzyrtare Tasnim, Teherani ka dorëzuar një përgjigje me 14 pika ndaj një plani amerikan me nëntë pika për përfundimin e konfliktit.

    Propozimi iranian thekson përfundimin e plotë të armiqësive, duke refuzuar idenë e një “ngrirjeje” të përkohshme apo armëpushimi dy-mujor, dhe kërkon zgjidhjen e çështjeve themelore brenda 30 ditëve. Sipas Iranit, prioritet duhet të jetë përmbyllja përfundimtare e luftës dhe jo zgjatja e një armëpushimi të përkohshëm.

    Plani iranian përfshin kërkesa për garanci kundër veprimeve ushtarake, tërheqjen e forcave amerikane nga zonat përreth Iranit, heqjen e bllokadës detare dhe të sanksioneve ekonomike, zhbllokimin e aseteve të ngrira iraniane, pagesën e kompensimeve, si dhe ndërprerjen e armiqësive në disa fronte, përfshirë edhe Libanin. Gjithashtu, propozohet një kuadër i ri për funksionimin e Ngushticës së Hormuzit, një korridor kyç energjetik që mbetet i mbyllur që nga fillimi i konfliktit më 28 shkurt.

    “Topi është në fushën e SHBA-ve”, deklaroi Ministria e Jashtme e Iranit, duke theksuar se vendi është i gatshëm si për rifillimin e negociatave, ashtu edhe për rikthimin në operacione ushtarake.

    Pakistani ka luajtur një rol qendror në ndërmjetësim, duke kontribuar në arritjen e një armëpushimi në fillim të prillit dhe në organizimin e bisedimeve në Islamabad, me synimin për të ruajtur këtë rol deri në përfundimin e krizës.

    Nga ana tjetër, reagimi i presidentit Donald Trump ishte i rezervuar. Përmes platformës Truth Social, ai deklaroi se do ta shqyrtojë planin iranian, por shtoi se e konsideron të vështirë pranimin e tij. “Nuk mund të imagjinoj se do të jetë i pranueshëm, pasi nuk kanë paguar mjaftueshëm për atë që kanë bërë ndaj njerëzimit dhe botës gjatë 47 viteve të fundit”, u shpreh ai.

  • ”Nuk harroi me më thirrë në dasmë”, -Rrëfimi prekës i Vlorës për dasmën e Luanit

    ”Nuk harroi me më thirrë në dasmë”, -Rrëfimi prekës i Vlorës për dasmën e Luanit

    Ish-ambasadorja Vlora Çitaku ka publikuar disa fotografi nga dasma e Luan Haradinajt, djalit të Shkëlzen Haradinajt.

    Ajo ka ndarë edhe një rrëfim emocional lidhur me Luanin, duke kujtuar një moment para shumë vitesh gjatë një ngjarjeje në Dukagjin, kur i kishte thënë që të mos harronte ta ftonte në dasmën e tij.

    Sipas Çitakut, Luani e kishte mbajtur mend këtë premtim dhe e kishte ftuar në ditën e tij të veçantë.

    “Me shumë dashuri mora pjesë në dasmën e Luanit, djalit të Shkëlzenit e Syzanës. Luanit që u rrit pa e njohur babanë dhe axhën, por që me krenari mban emrin e tij. Një emër që nuk është vetëm kujtim, por përgjegjësi, dinjitet dhe vazhdimësi.

    Nuk e harroj kurrë një moment shumë vite më parë, në shënimin e Epopesë së Dukagjinit. Luani i ri na priste pranë vendit ku pushojnë heronjtë, krah bacës Hilmi. Ishte veç një fëmijë, por me një pjekuri që të linte pa fjalë. Stoik, i qetë, me një qëndrim që i kishte hije burrave të rritur mes legjendash.

    Atë ditë i pata thënë: ende je i vogël, por kur të rritesh e ta gjesh dashurinë, mos harro me më thirrë në dasmë. Ndër vite, jam mbushur me krenari teksa e kam parë me uniformën e Ushtrisë së Kosovës. Taman oficer ushtrie.

    Dhe ja, pas më shumë se një dekade, më erdhi ftesa. Nuk kishte harruar Luani. U trashëgofsh, Luani i Kosovës ❤️”, ka shkruar Çitaku.

  • Kontratat kolektive, Rama: Rreth 12 milionë euro i janë marrë kryeqytetit për vendime gjyqësore

    Kontratat kolektive, Rama: Rreth 12 milionë euro i janë marrë kryeqytetit për vendime gjyqësore

    Vendimet gjyqësore si pasojë e kontratave kolektive në Kosovë janë bërë një burim i madh i barrës financiare për buxhetin e komunave.

    Kjo pasi që këtyre të fundit po u merren shuma të konsiderueshme parash.

    Kryetari i komunës së Prishtinës, Përparim Rama, në një përgjigje për Ekonomia Online, këtë dukuri e ka quajtur të padrejtë, duke shtuar se po bëhet qëllimshëm nga niveli qendror.

    “Është definitivisht diçka që është bërë, që duket që është bërë qëllimshëm nga niveli qendror vetëm për me i pamundësu komunave për me i zhvillu projektet e tyre. Pra diçka që ministria e ka për përgjegjësi, një kontratë kolektive që ministria e ka nënshkruar, që ata ishte dashur me i pagu, që gjithsesi që të gjithë qytetarët i meritojnë ato paga të cilat nuk janë të paguara, mirëpo diçka që ishte dashur me e parë përgjegjësi qeveria, ajo e ka bë këtë barrë të komunave në mënyrë të padrejtë. Edhe si rezultat kemi një numër të madh të komunave që kanë mbet edhe pa zhvillu projekte shumë të rëndësishme në infrastrukturë, në shëndetësi, në arsim e të tjera, e të tjera për shkak të kësaj padrejtësie”, tha Rama për EO.

    Kryetari Rama deklaroi se nga vendimet gjyqësore si komunë kanë paguar rreth 12 milionë euro, e që për kryeqytetin është një barrë e madhe.

    “Deri tash m’duket që kemi pagu diku rreth 12 milionë, domethënë është një barrë shumë e madhe, po po them Prishtina ndoshta edhe e ka mundësinë me e tejkalu këtë barrë sepse kemi mënyra të ndryshme ku ne edhe rrisim fonde, mirëpo komuna ka disa komuna të tjera që varen prej këtyre fondeve edhe i ka blloku totalisht. Pra është një gjë e padrejtë edhe ndaj këtij qyteti, ndaj komunës së Prishtinës po edhe ndaj të gjitha këtyre komunave të tjera. Është një çështje që e ka nënshkru ministria, ministria është dashur me e marrë përgjegjësinë, ministria është dashur me e bë pagesën, e këta e kanë bë të kundërtën, pra ja kanë bart barrën komunave në mënyrë të padrejtë”, tha Rama.

    Drejtori i Asociacionit të Komunave të Kosovës, Sazan Ibrahimi, ditë më herët njoftoi se mbi 344 milionë euro tashmë janë humbur nga komunat gjatë periudhës 2022–2026, kryesisht si pasojë e vendimeve gjyqësore që lidhen me kontratën kolektive.

    Sipas tij, vetëm në muajt e parë të vitit 2026 janë ekzekutuar rreth 55 milionë euro.

  • Zbulohet një rrugë më e shkurt për të shkuar në Mars – brenda 153 ditësh

    Zbulohet një rrugë më e shkurt për të shkuar në Mars – brenda 153 ditësh

    Një studim i ri sugjeron se udhëtimi drejt Mars mund të bëhet shumë më i shpejtë se sa mendohej deri më tani, duke reduktuar kohën e një misioni vajtje-ardhje në vetëm 153 ditë.

    Aktualisht, me teknologjinë ekzistuese, një udhëtim njëdrejtimësh drejt Planetit të Kuq zgjat rreth nëntë muaj, ndërsa një mision i plotë mund të zgjasë deri në tre vite.

    Por studiues nga State University of Northern Rio de Janeiro kanë identifikuar një mundësi të re që mund të shkurtojë ndjeshëm këtë kohë.

    Ky skenar bazohet në një fenomen astronomik të quajtur “opozita e Marsit”, që ndodh rreth çdo 26 muaj, kur Toka dhe Marsi ndodhen në të njëjtën anë të Diellit dhe në distancën më të afërt mes tyre.

    Studiuesit analizuan opozitat e ardhshme, përfshirë ato të viteve 2027, 2029 dhe 2031, për të parë nëse mund të shfrytëzohen për një udhëtim më efikas.

    Një rol kyç në këtë “shkurtore” luan asteroidi 2001 CA21, trajektorja e të cilit kryqëzon orbitat e Tokës dhe Marsit. Sipas llogaritjeve, gjatë opozitës së vitit 2031, një anije kozmike mund të përdorë këtë rrugë për të arritur në Mars në rreth një muaj.

    Sipas planit teorik, nisja do të bëhej më 20 prill, mbërritja në Mars më 23 maj, qëndrimi do të zgjaste 30 ditë dhe kthimi në Tokë do të përfundonte më 20 shtator – duke e çuar kohëzgjatjen totale të misionit në 153 ditë.

    Megjithatë, shkencëtarët theksojnë se ky skenar është ekstrem dhe kërkon energji shumë të lartë, duke e bërë atë më shumë një model teorik sesa një plan të menjëhershëm realizimi. Një alternativë më e realizueshme, sipas tyre, është një mision prej rreth 226 ditësh, i cili balancon më mirë kohën dhe kërkesat energjetike.

    Ky zhvillim mund të jetë me interes për NASA, e cila synon të dërgojë njerëz në Mars në fillim të viteve 2030. Eksplorimi i këtij planeti mbetet një nga objektivat kryesore, pasi mund të ndihmojë në kuptimin e historisë së Tokës dhe në kërkimin e jetës jashtë saj.

  • Paralajmërimi i Nobelistit për të ardhmen e njerëzimit – fundi i botës nuk është larg

    Paralajmërimi i Nobelistit për të ardhmen e njerëzimit – fundi i botës nuk është larg

    Fizikani teorik amerikan David Gross, fitues i Çmimit Nobel në Fizikë, ka dhënë një paralajmërim të fortë për të ardhmen e njerëzimit, duke sugjeruar se rreziqet globale mund ta çojnë atë drejt një krize ekzistenciale shumë më shpejt sesa mendohet.

    Gross, i cili u vlerësua me Nobelin në vitin 2004 për zbulime në fushën e fizikës teorike, thekson se kërcënimet më të mëdha sot janë lufta bërthamore dhe zhvillimi i pakontrolluar i inteligjencës artificiale.

    Sipas tij, probabiliteti për një konflikt bërthamor global mbetet shqetësues dhe është rritur në dekadat e fundit.

    Në një intervistë të fundit, ai sugjeroi se mundësia që një individ të jetojë edhe 50 vite të tjera është relativisht e ulët, duke përmendur një vlerësim të përafërt prej rreth 35 vitesh për shkak të rrezikut të luftës bërthamore.

    Ai shtoi se, nëse trendet aktuale vazhdojnë, një katastrofë globale mund të ndodhë edhe brenda këtij shekulli.

    Gross thekson se situata është përkeqësuar pas shpërbërjes së marrëveshjeve për kontrollin e armëve bërthamore dhe përshkallëzimit të tensioneve ndërkombëtare, përfshirë konfliktet dhe rivalitetet mes fuqive të mëdha dhe vendeve me kapacitete bërthamore.

    Një tjetër shqetësim madhor sipas tij është roli në rritje i teknologjive të avancuara, veçanërisht inteligjencës artificiale. Ai paralajmëron se automatizimi i sistemeve ushtarake dhe përdorimi i AI në vendimmarrje të shpejtë mund të krijojnë situata të rrezikshme dhe të paparashikueshme.

    Në skenarë ekstremë, vendime kritike për përdorimin e armëve bërthamore mund të delegohen te sistemet inteligjente, të cilat megjithëse të avancuara, nuk janë të pagabueshme dhe mund të prodhojnë rezultate të pasakta.

    Megjithatë, në përfundim, fizikani thekson se armët bërthamore janë krijim i njerëzimit – dhe si të tilla, eliminimi i tyre mbetet në dorën e vetë njerëzve.

  • Arrestohet një person në Austri, hodhi helm për minj në ushqimin për fëmijë HiPP

    Arrestohet një person në Austri, hodhi helm për minj në ushqimin për fëmijë HiPP

    Një burrë 39-vjeçar është arrestuar në Austri nën dyshimin se ka hedhur në ushqimin për foshnje helm minjsh, në një përpjekje për të zhvatur para nga kompania gjermane HiPP.

    Sipas prokurorisë në Eisenstadt, i dyshuari akuzohet se ka ndërhyrë në produkte të shpërndara në disa vende, ndërsa detaje të tjera mbi identitetin dhe motivet e tij nuk janë bërë publike.

    Autoritetet konfirmuan se pesë kavanoza të kontaminuara janë zbuluar në Austri, Republikën Çeke dhe Sllovaki.

    Në një prej tyre, një kavanoz 190 gramësh me karrota dhe patate, u gjetën rreth 15 mikrogramë helm për minj.

    Një hetim shtesë po zhvillohet për një kavanoz të dytë të dyshuar, ndërsa kompania HiPP theksoi se incidenti nuk lidhet me proceset e saj të prodhimit, por është rezultat i një “ndërhyrjeje të jashtme kriminale”.

    Kompania bëri të ditur se kishte marrë një e-mail kërcënues javën e kaluar nga personi i dyshuar, duke kërkuar para në këmbim të ndalimit të kontaminimit.

    Pas marrjes së mesazhit, HiPP njoftoi menjëherë policinë dhe aktivizoi një ekip të brendshëm për menaxhimin e krizës.

    Autoritetet dhe kompania nuk kanë bërë publike kërkesat e sakta të shantazhuesit, ndërsa hetimet vijojnë për të përcaktuar nëse ka produkte të tjera të prekura dhe për të garantuar sigurinë e konsumatorëve.