ATV

Blog

  • Aksidenti tragjik, pezullohen nga detyra krerët e Policisë së Durrësit

    Aksidenti tragjik, pezullohen nga detyra krerët e Policisë së Durrësit

    Policia e Shtetit ka pezulluar nga detyra tre drejtues të lartë të Policisë në Durrës, pas aksidentit të rëndë të ndodhur një ditë më parë, ku humbën jetën dy të mitur dhe u plagos një tjetër.

    Vendimi është marrë nga Drejtori i Përgjithshëm i Policisë së Shtetit, Skender Hita, i cili, në zbatim të rregullores, ka argumentuar pezullimet me “performancë të dobët në përmbushjen e detyrave”.

    Të pezulluarit janë: drejtori i Drejtorisë Vendore të Policisë Durrës, Afrim Tafa; zëvendësdrejtori për Rendin dhe Sigurinë Publike, Zija Sulaj; si dhe shefi i Sektorit të Policisë Rrugore, Kreshnik Skëndo.

    “Gjithashtu, menjëherë pas ngjarjes, Drejtori i Përgjithshëm i Policisë së Shtetit urdhëroi Drejtorinë e Policisë Rrugore për të ngritur një grup ekspertësh të cilët shkuan në vendngjarje për të analizuar shkaqet dhe rrethanat e aksidentit”, thuhet në njoftimin e policisë.

    Ndërkohë, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur hetimin disiplinor për të vlerësuar nëse ka apo jo përgjegjësi në radhët e punonjësve të Policisë, për këtë rast.

  • Dy ngjyrat e mureve që nuk duhet t’i përdorni kurrë në dhomën e gjumit

    Dy ngjyrat e mureve që nuk duhet t’i përdorni kurrë në dhomën e gjumit

    Dizajnerët e enterierit paralajmërojnë se disa nuanca mund ta bëjnë hapësirën më stimuluese, të nxisin ndjenja të forta dhe ta vështirësojnë gjumin

    Muret e dhomës së gjumit janë ndër gjërat e para që shihni kur zgjoheni në mëngjes dhe ndër të fundit para se të flini. Prandaj është e kuptueshme pse shumica e njerëzve dëshirojnë që ato të jenë të lyera me një ngjyrë që i fut butësisht në ditën e re dhe, njëkohësisht, i ndihmon të qetësohen në fund të ditës.

    Megjithatë, duket se ekzistojnë dy ngjyra që nuk e kryejnë mirë këtë rol. Vazhdoni të lexoni për të kuptuar cilat janë ato dhe cilat nuanca dizajnerët i pëlqejnë vërtet për dhomat e gjumit.

    Ngjyrat më të papërshtatshme për dhomat e gjumit

    Shumica e dizajnerëve të enterierit pajtohen se portokallia e ndezur dhe e kuqja janë dy ngjyra që nuk duhet të përdoren në dhomën e gjumit.

    “Dhomat e gjumit, në përgjithësi, duhet të jenë strehë të qeta, prandaj përpiqem të shmang lyerjen e sipërfaqeve të mëdha me ngjyra shumë stimuluese, si e kuqja e ndezur dhe portokallia”, shpjegon Madelaine Mayer, themeluese e ADROIT Architecture & Interior Design.

    Sipas Mayer, këto ngjyra shpesh lidhen me emocione të forta, si pasioni dhe zemërimi, por edhe me shenja paralajmëruese, si shenja “stop”, automjetet e zjarrfikësve dhe dritat e kuqe të semaforit.

    Megjithatë, rregullat gjithmonë mund të thyhen.

    “Kur bëhet fjalë për dhomat e gjumit të fëmijëve, nuk ka ngjyrë që nuk e kam përdorur, përfshirë edhe portokallinë dhe të kuqen”, shton Nina Seed nga Nina Seed Interiors.

    Ajo shpjegon se çelësi qëndron te përdorimi i kujdesshëm i ngjyrave të ndezura dhe në doza më të vogla. Seed thotë se tonet e forta i fut përmes detajeve në korniza dhe elemente dekorative, gjë që e konsideron zgjidhje më afatgjatë sesa lyerja e një muri të theksuar.

    A do të thotë kjo se duhet ta merrni menjëherë kovën me bojë portokalli? Jo domosdoshmërisht.

    “Një nuancë korale e ndezur mund t’i shtojë interes vizual dhe thellësi dhomës së gjumit me tone të errëta blu. Por mos e lyeni të gjithë murin me të”, thotë Mayer.

    Ngjyrat e preferuara për dhomat e gjumit, sipas dizajnerëve të enterierit

    Ekzistojnë disa ngjyra që dizajnerët i miratojnë pothuajse gjithmonë.

    “Bluja mund të jetë qetësuese, prandaj funksionon mirë, por tonet e ngrohta janë gjithmonë më të këndshme”, thotë Sarat Scales nga studioja Sarah Scales Design Studio.

  • Sukses i jashtëzakonshëm – “The Devil Wears Prada 2” kryeson me mbi 230 milionë euro

    Sukses i jashtëzakonshëm – “The Devil Wears Prada 2” kryeson me mbi 230 milionë euro

    Filmi “The Devil Wears Prada 2” ka shpërthyer duke siguruar mbi 230 milionë euro në fundjavën e parë të shfaqjes.

    Sipas të dhënave, filmi u rendit i pari në arkëtimet e Amerikës së Veriut pas debutimit, me rreth 71 milionë euro të ardhura në ShBA dhe Kanada si dhe rreth 144 milionë euro në total në mbarë botën.

    “The Devil Wears Prada 2” u shfaq në 4.150 kinema në Amerikën e Veriut dhe, sipas anketës së PostTrak, gratë përbënin rreth 76 për qind të publikut.

    Ndërkohë, 74 për qind e shikuesve thanë se do ta rekomandonin patjetër filmin te miqtë.

    Kritikat për vazhdimin kanë qenë të ndara, ndërsa në histori Anne Hathaway, në rolin e Andy Sachs, rikthehet sërish në ambientin e punës së Meryl Streep (Miranda Priestly) në revistën “Runway”.

    Produksioni i filmit ka kushtuar rreth 92 milionë euro, shumë më tepër se buxheti i filmit të parë të vitit 2006, i cili ishte rreth 32 milionë euro.

    Regjisori David Frankel ka thënë për AP se, pasi paguhen yjet më të mëdha të filmit, për xhirimet në fund mbetet praktikisht i njëjti buxhet si te filmi i parë.

    Meryl Streep, Anne Hathaway, Emily Blunt dhe Stanley Tucci e kanë promovuar filmin për javë të tëra në Tokio, Londër dhe New York.

    Fushatës iu bashkua edhe Anna Wintour, e cila u shfaq me Hathaway në ceremoninë e Oscars dhe me Streep në kopertinën e revistës “Vogue”.

    Në vendin e dytë u rendit mjuzikali biografik “Michael”, me rreth 50 milionë euro në fundjavën e dytë të shfaqjes në Amerikën e Veriut, ndërsa fitimet e tij globale u rritën në rreth 390 milionë euro.

    Sezoni veror i kinemasë u shoqërua edhe me filmat: “The Super Mario Galaxy Movie” me rreth 11 milionë euro, “Project Hail Mary” me rreth 8 milionë euro dhe horror-i “Hokum” me rreth 5.9 milionë euro.

  • Mos i shtrydhni puçrrat në këtë pjesë të fytyrës: Pse “trekëndëshi i rrezikut” kërkon kujdes të veçantë

    Mos i shtrydhni puçrrat në këtë pjesë të fytyrës: Pse “trekëndëshi i rrezikut” kërkon kujdes të veçantë

    E ashtuquajtura zonë e rrezikut shtrihet nga hunda deri te cepat e gojës. Mjekët paralajmërojnë se infeksionet në këtë pjesë, edhe pse rrallë, mund të përhapen më thellë dhe të bëhen të rrezikshme

    Edhe pse, kur përmenden trekëndëshat, shumica mendojnë fillimisht për format gjeometrike, shenjat e komunikacionit ose ushqimet me formë trekëndëshi, në fytyrën e njeriut ekziston një zonë e veçantë që kërkon shumë kujdes.

    Bëhet fjalë për pjesën ku nuk rekomandohet të shtrydhen puçrrat, sepse në raste të rralla mund të hapet rrugë për infeksione serioze.

    Çfarë është “trekëndëshi i rrezikut” në fytyrë?

    Pjesa e fytyrës që shtrihet nga ura e hundës deri te cepat e buzëve në mjekësi njihet si “trekëndëshi i rrezikut”. Në media shpesh quhet edhe “trekëndëshi i vdekjes”, por ky është një emërtim më dramatik.

    Arsyeja pse kjo zonë konsiderohet më e ndjeshme nuk ka të bëjë me pamjen estetike, por me anatominë e enëve të gjakut, të cilat e lidhin këtë pjesë të fytyrës me struktura më të thella brenda kafkës.

    “Pjesa e fytyrës që lidh hundën me cepat e gojës konsiderohet veçanërisht e rrezikshme për shkak të afërsisë me trurin”, ka shpjeguar për revistën Health dr. Joshua Zeichner, profesor i asociuar i dermatologjisë në spitalin Mount Sinai në New York.

    Pse kjo zonë është më e rrezikshme?

    Rreziku lidhet me sinusin kavernoz, një rrjet venash që ndodhet thellë pas syve dhe merr pjesë në qarkullimin e gjakut nga zona e trurit. Ndryshe nga disa vena të tjera në trup, venat në këtë pjesë të fytyrës mund të mos kenë mekanizma të fortë mbrojtës që pengojnë kthimin e gjakut në drejtim të kundërt.

    Për këtë arsye, një infeksion që mund të shfaqet pas shtrydhjes së puçrrës, pas dëmtimit të lëkurës ose pas një shpimi të pasigurt në hundë, teorikisht mund të përhapet drejt strukturave më të thella.

    Dr. Alok Vij, dermatolog në Cleveland Clinic, paralajmëron se çdo traumë ose infeksion në këtë zonë duhet marrë seriozisht, sepse, edhe pse rrallë, mund të shkaktojë komplikime që nuk mbeten vetëm në sipërfaqe të lëkurës.

    A mund të jetë vërtet e rrezikshme shtrydhja e një puçrre?

    Mundësia që një puçërr e zakonshme të shkaktojë komplikime të rënda është e vogël. Megjithatë, mjekët theksojnë se rreziku ekziston, sidomos kur lëkura dëmtohet, puçrra shtrydhet me thonj të papastër ose kur infeksioni përhapet.

    Infeksioni i një puçrre në hundë ose në zonën përreth saj ka një rrugë më të afërt drejt strukturave të thella të kokës. Prandaj, çdo infeksion në këtë pjesë të fytyrës bart pak më shumë rrezik sesa në zona të tjera.

    Fatmirësisht, komplikimet e tilla janë të rralla, por sa herë që lëkura dëmtohet dhe vjen në kontakt me baktere, ekziston mundësia e infeksionit.

    Nga një puçërr e thjeshtë deri te komplikimet serioze

    Në raste të rralla dhe të rënda, infeksioni i fytyrës mund të çojë në trombozë septike të sinusit kavernoz. Kjo është gjendje kur formohet një mpiksje e infektuar e gjakut, e cila mund të pengojë qarkullimin normal të gjakut dhe të shkaktojë komplikime serioze.

    Ndër ndërlikimet e mundshme janë:

    • abscesi i trurit, grumbullim i qelbit që mund të shkaktojë ënjtje të indit të trurit
    • meningjiti, inflamacion i cipave mbrojtëse që rrethojnë trurin dhe palcën kurrizore
    • dëmtimi i nervave të fytyrës, përfshirë nervat që kontrollojnë lëvizjen e syve
    • goditja në tru, për shkak të çrregullimit të qarkullimit të gjakut
    • embolia septike, kur mpiksjet e infektuara mund të përhapen përmes qarkullimit të gjakut

    Shenjat që kërkojnë kujdes të menjëhershëm mjekësor

    Para zbulimit të antibiotikëve, infeksionet në këtë zonë të fytyrës konsideroheshin shumë më të rrezikshme. Sot, falë mjekësisë moderne, trajtimi është shumë më efikas, por njohja e hershme e simptomave mbetet shumë e rëndësishme.

    Shenjat që kërkojnë konsultë urgjente me mjekun janë:

    • temperaturë
    • dhimbje e fortë koke
    • ënjtje rreth syve
    • dhimbje ose skuqje që përhapet
    • vështirësi në lëvizjen e syve
    • ndjenjë e përgjithshme e rënduar, ethe ose të dridhura

    Është e rëndësishme të ndiqet gjendja e përgjithshme në ditët pas shfaqjes së një infeksioni në fytyrë, sepse shenjat e përhapjes mund të paraqiten disa ditë pas irritimit të parë.

    Nëse infeksioni fillon të zgjerohet, nëse fytyra ënjtet, shfaqen ethe, të dridhura ose ndiheni të sëmurë në gjithë trupin, duhet të kërkoni ndihmë mjekësore sa më shpejt.

    Pse nuk duhet të shtrydhen puçrrat?

    Përveç rrezikut nga infeksioni, shtrydhja agresive e puçrrave dëmton edhe vetë lëkurën. Kur ushtrohet presion me thonj, bakteret, qelizat e vdekura dhe yndyra mund të shtyhen më thellë në pore.

    Rezultati mund të jetë ënjtje më e madhe, skuqje më e fortë, dhimbje dhe inflamacion më i theksuar. Në disa raste, mund të mbeten edhe njolla të errëta ose shenja në lëkurë.

    Dr. Alok Vij këshillon që, në përgjithësi, shtrydhja e puçrrave duhet shmangur, sepse mund të shkaktojë inflamacion, hiperpigmentim pas inflamacionit, shenja dhe infeksion.

    Si të trajtohen puçrrat pa rrezik?

    Specialistët rekomandojnë metoda më të sigurta për trajtimin e puçrrave, veçanërisht në zonën e rrezikut:

    • Kompresa të ngrohta: Një leckë e pastër, e lagur me ujë të ngrohtë, mund të mbahet mbi zonën e inflamuar për 10 deri në 15 minuta. Nxehtësia mund të ndihmojë që përmbajtja të dalë më natyrshëm dhe të lehtësohet shërimi.
    • Ngjitëse për puçrra: Nëse puçrra është hapur vetë, ngjitëset për akne mund të ndihmojnë në thithjen e lëngut dhe në mbrojtjen e zonës nga bakteret e jashtme.
    • Trajtime lokale: Produkte me acid azelaik, peroksid benzoili ose acid salicilik mund të ndihmojnë në uljen e baktereve dhe yndyrës së tepërt.
    • Ndihmë profesionale: Dermatologu mund ta trajtojë ndryshimin në lëkurë në mënyrë të sigurt dhe, në raste të caktuara, të përdorë trajtime që ulin shpejt inflamacionin.

    Nëse nuk i rezistoni dot tundimit

    Më e sigurta është që puçrrat të mos shtrydhen fare, sidomos në zonën nga hunda deri te cepat e gojës. Por nëse dikush megjithatë vendos ta bëjë këtë në zona të tjera të fytyrës, duhet të ketë shumë kujdes.

    Duart duhet të lahen mirë me sapun, thonjtë duhet të jenë të shkurtër dhe të pastër, ndërsa fytyra duhet pastruar paraprakisht. Mund të përdoret edhe kompresë e ngrohtë për të zbutur lëkurën.

    Nuk duhet të përdoren thonjtë për ta çarë puçrrën. Në vend të kësaj, nëse përmbajtja nuk del lehtë me një presion shumë të butë, duhet ndalur menjëherë. Shtypja e fortë vetëm sa mund ta përkeqësojë inflamacionin dhe të rrisë rrezikun për shenja.

    Pas çdo dëmtimi të lëkurës, zona duhet mbajtur e pastër. Nëse shfaqen skuqje që përhapet, dhimbje e fortë, ënjtje, temperaturë ose gjendje e përgjithshme e rënduar, duhet kërkuar ndihmë mjekësore.

  • 8-vjeçari i lënduar në aksidentin në Durrës ndodhet jashtë rrezikut për jetë

    8-vjeçari i lënduar në aksidentin në Durrës ndodhet jashtë rrezikut për jetë

    Një lajm i mirë vjen pas tronditjes që përjetoi qyteti i Durrësit një ditë më parë, ku sipas burimeve nga bluzat e bardha, 8-vjeçari i plagosur në aksidentin e ndodhur në zonën e ish-Kënetës ka kaluar momentalisht gjendjen e rëndë dhe është jashtë rrezikut për jetën.

    Ai pritet të kalojë në pavion por do të vijojë të ndiqet nga mjekët e Spitalit të Traumës për trajtimin e dëmtimeve të marra nga aksidenti.

    Kujtojmë se pasditen e së dielës, një aksident tragjik i mori jetën dy fëmijëve, Kles Nikolli, 9 vjeç dhe Enea Muçaj, 12 vjeç, ndërsa i plagosur mbeti shoku i tyre 8-vjeçar.

    Ata u përplasën nga automjeti i drejtuar nga 57-vjeçari Nikoll Radaçi, i cili dyshohet se ishte në gjendje të dehur në momentin e ngjarjes./euronews/

  • Çfarë duhet të dini rreth hantavirusit – Virusi i rrallë që përhapet nga brejtësit

    Çfarë duhet të dini rreth hantavirusit – Virusi i rrallë që përhapet nga brejtësit

    Një burrë britanik që ishte në bordin e anijes MV Hondius është në kujdes intensiv në Johannesburg, i infektuar me hantavirus, me pesë raste të dyshuara që ende nuk janë konfirmuar.

    Sipas Organizatës Botërore të Shëndetësisë, virusi përhapet kryesisht nga brejtësit, por mund të transmetohet edhe midis njerëzve në raste të rralla.

    Njerëzit zakonisht infektohen kur virusi në jashtëqitjet e brejtësve, pështymë dhe urinë, përhapet në ajër.

    Çfarë sëmundjesh mund të shkaktojë?

    Është një familje virusesh që mund të shkaktojnë dy sëmundje, njëra që prek kryesisht mushkëritë dhe tjetra që sulmon veshkat.

    E para – sindroma pulmonare e hantavirusit, që gjendet më shpesh në SHBA- ka një shkallë të lartë vdekshmërie prej rreth 40%.

    Është e rrallë: sipas qeverisë kanadeze, rreth 200 raste të sëmundjes pulmonare të shkaktuar nga hantavirusi ndodhin çdo vit në të gjithë botën.

    Tre të vdekur, shpërthen Hantavirusi në anijen turistike në Atlantik

    Por bëri bujë në media kur pianistja Betsy Arakawa, gruaja e aktorit Gene Hackman, vdiq nga sëmundja në New Mexico në vitin 2025, sipas rezultateve të autopsisë.

    Cilat janë simptomat?

    Hantavirusi zakonisht fillon me simptoma të ngjashme me gripin, të tilla si lodhje dhe ethe, një deri në tetë javë pas ekspozimit, sipas Qendrave të SHBA-së për Kontrollin dhe Parandalimin e Sëmundjeve.

    Katër deri në dhjetë ditë më vonë, shfaqet kollë, frymëmarrje e vështirësuar, dhe lëng në mushkëri.

    Nuk ka terapi specifike për infeksionin hantavirus, kështu që trajtimi përqendrohet në kujdesin mbështetës, duke përfshirë pushimin.

    Pacientët mund të kenë nevojë për mbështetje të frymëmarrjes, siç është oksigjeni.

    Ekspertët thonë se ekspozimi ndaj hantavirusit mund të minimizohet duke penguar dhe eliminuar brejtësit nga zonat ku ndodhen njerëzit.

  • Trump i çon mesazh Iranit me letra ‘Uno’: Të gjitha kartat i kam unë

    Trump i çon mesazh Iranit me letra ‘Uno’: Të gjitha kartat i kam unë

    Shtëpia e Bardhë ka publikuar një imazh të Donald Trump duke mbajtur karta Uno, të shoqëruar me mesazhin “Unë i kam të gjitha kartat”, një veprim që po interpretohet si demonstrim force ndaj Iran në mes të tensioneve të vazhdueshme për programin bërthamor dhe situatën në Ngushtica e Hormuzit.

    Pak orë më herët, Trump njoftoi në platformën Truth Social se Shtetet e Bashkuara do të nisnin një mision për shoqërimin e anijeve në rajon, të cilin e quajti një operacion humanitar me emrin “Projekti Liria”. Ai shtoi se ka zhvilluar “biseda shumë pozitive” me Teheranin, pa dhënë detaje të mëtejshme.

    Në deklaratat e tij të fundit publike, Trump ka theksuar se objektet bërthamore iraniane janë dëmtuar rëndë nga sulmet amerikane, duke paralajmëruar se çdo përpjekje për rifillimin e aktivitetit do të përballet me reagim të fortë ushtarak.

    “Ne i kemi të gjitha kartat, ata nuk kanë asnjë”, u shpreh presidenti amerikan, duke nënvizuar se negociatat po zhvillohen nga një pozicion force.

  • Roberti flet sërish për Tunën: Sjelljet e saj s’kanë qenë të mira me nënën time që ishte me kancer

    Roberti flet sërish për Tunën: Sjelljet e saj s’kanë qenë të mira me nënën time që ishte me kancer

    Robert Berisha i është rikthyer sërish raportit të tij me Tunën.

    Ai theksoi sërish se sjelljet e Tunës nuk kanë qenë të mira me nënën e tij, e cila siç tha ai ishte me kancer.

    “Unë edhe kur kanë qenë bashkë (me vëllain) e kom vendos, nuk kam dashtë marrëdhënie me të fare. Ajo e ka stilin e jetës së vet dhe sjelljet e saj, le të vazhdon kudo, por jo me nënën time që e kam pasur me kancer, sjelljet e saj s’kanë qenë të mira. I dëshiroj suksese dhe jetë të gjatë asaj dhe fëmijëve. S’kisha pas qef kurrë me dëgju keq diçka për të”, tha Roberti në Andale.

    Ai tha se raporti i tij me Tunën nuk ka ndikuar në atë me vëllain e tij, Patrisin.

  • Dua Lipa refuzon të performojë në duelin e boksit Joshua-Fury

    Dua Lipa refuzon të performojë në duelin e boksit Joshua-Fury

    Pop-ylli botëror, Dua Lipa, nuk pritet të performojë në mbrëmjen e duelit të madh të boksit, Anthony Joshua-Tyson Fury, që do të mbahet më vonë gjatë vitit.

    Britanikët Joshua e Fury do të përballen në meçin e shumëpritur në fund të vitit.

    Gjithsesi kryetari i Autoritetit të Përgjithshëm të Argëtimit të Arabisë Saudite, Turki Al-Sheikh, ka sugjeruar se meçi rrezikohet nëse Dua Lipa nuk pranon të performojë si pjesë e promovimit të ngjarjes.

    Është e paqartë nëse komenti ishte dhënë me qasje serioze apo me shaka, por BBC Sport ka raportuar të premten se yllit me rrënjë nga Kosova i është kërkuar të performojë, por e ka refuzuar ofertën dhe nuk pritet të jetë e përfshirë në ngjarje.

    Dua Lipa është një prej yjeve më të mëdha të botës në muzikë.

    Vendi i meçit Fury-Joshua nuk është caktuar ende, edhe pse raportohet se stadiumi Wembley në Britani është i preferuari për muajin tetor.

    Viteve të fundit është shtuar prania e yjeve muzikore në organizime sportive.

    Reperi Eminem e shoqëroi Terence Crawfordin në meçin ndaj Errol Spence Jr. Ndërkaq frontmeni i Oasis, Liam Gallagher, performoi disa këngë para meçit Daniel Dubois – Anthony Joshua më 2024. E reperi 50 Cent performoi gjatë hyrjes së Chris Eubankut për rimeçin ndaj Conor Bennit.

  • Amsterdami ndalon reklamat publike për mishin dhe karburantet fosile

    Amsterdami ndalon reklamat publike për mishin dhe karburantet fosile

    Amsterdami është bërë kryeqyteti i parë në botë që ndalon reklamat publike për mishin dhe produktet e karburanteve fosile.

    Që nga 1 maji, reklamat për hamburgerë, vetura me benzinë dhe linja ajrore janë hequr nga billboard-et, stacionet e tramvajit dhe metrotë.

    Në një nga ndalesat më të frekuentuara të tramvajit në qytet, pranë një rrethrrotullimi të gjelbëruar me daffodilë të verdhë dhe tulipanë portokalli, peizazhi i reklamave ka ndryshuar dukshëm.

    Tani aty promovohen Rijksmuseum, muzeu kombëtar i Holandës, dhe një koncert pianoje. Deri javën e kaluar, në të njëjtat hapësira reklamoheshin nuggets pule, SUV dhe pushime me kosto të ulët, shkruan BBC.

    Politikanët e qytetit thonë se kjo lëvizje synon të harmonizojë hapësirat publike të Amsterdamit me objektivat mjedisore të qeverisjes lokale.

    Këto synime parashohin që kryeqyteti holandez të bëhet neutral ndaj karbonit deri në vitin 2050, si dhe që banorët të përgjysmojnë konsumin e mishit gjatë kësaj periudhe.

    “Kriza klimatike është shumë urgjente,” tha Anneke Veenhoff nga Partia GreenLeft. “Nëse dëshironi të jeni lider në politikat klimatike dhe në të njëjtën kohë jepni me qira hapësirat publike për reklama që promovojnë të kundërtën, atëherë çfarë po bëni?

    “Shumica e njerëzve nuk e kuptojnë pse komuna duhet të fitojë para duke dhënë me qira hapësirat tona publike për diçka që ne po përpiqemi ta luftojmë me politika,” shtoi ajo.