Blog

Prokuroria Speciale e Republikës së Kosovës (PSRK), ka bërë kërkesë për caktimin e paraburgimit ndaj kryeshefit të KEK-ut, Nagip Krasniqi, për shkak të dyshimit të bazuar se i njëjti ka kryer veprat penale “Keqpërdorimi i pozitës apo autoritetit zyrtar”, “Ushtrimi i ndikimit’’ dhe veprën penale “Konflikti i interesit”.

Krasniqi aktualisht ndodhet në mbajtje për 48 orë, derisa kujtojmë se dje Njësia e Veçantë e Hetimeve ka kryer bastisje dhe janë sekuestruar dokumente të ndryshme që ndërlidhen me rastin, pajisje elektronike si tre (3) kompjuter, një (1) llap-top, një (1) celular, një (1) USB, në cilësi të provave materiale që do të shërbejnë për procedurën e mëtejme.

Për arrestimin e Krasniqit ka pasur reagime të shumta.​ Madje edhe ish-kryeministri slloven, Janez Jansha, ka reaguar pas arrestimit të kryeshefit të KEK-ut, Nagip Krasniqi, i cili po dyshohet për tri vepra penale.

Arrestimin e Krasniqit të mërkurën nga Policia e Kosovës nën dyshimin se ka keqpërdorur detyrën e tij zyrtare, ish-shefi i qeverisë sllovene, Janez Jansha, e ndërlidh me hetimet në rastin e ambasadorit të Kosovës në Kroaci, Martin Berishaj, i cili po dyshohet po ashtu për shpëlarje parash. Jansha ka përmendur edhe kryeministrin aktual slloven, Robert Golob.

“Arrestimet dhe bastisjet e shtëpive në industrinë elektrike të Kosovës, me sa duket rezultat i gjetjeve në hetimet e rastit Berishaj, GEN-it dhe shefit të qeverisë së Golobit”, shkroi Jansha në rrjetin e tij social “Twitter”.

50 pako ushqimore dhe higjienike janë ndarë të enjten për pjesëtarët e komunitetit jo shumicë nga Ministria për Komunitete dhe Kthim, raporton Ekonomia Online.

Zëvendësministri i këtij dikasteri, Mevlud Sinani, nuk deshi të tregojë për prejardhjen e këtyre pakove ushqimore, ndonëse u vërejtën.

“Arsyeja përse kemi filluar me këto 50 pako është se nuk kemi mundur të fizikisht t’i përgatisim të gjitha, mirëpo të gjithë aplikuesit për pako ushqimore do të jenë përfitues”.

“Janë afër 360 përfitues dhe të gjithë do të jenë përfitues, mirëpo në ditët në vazhdim do të bëhet shpërndarja r pakove tjera”, tha ai. “Çka është më e rëndësishme se sot do të fillojmë me ndërtimin e 19 shtëpive në tërë territorin e Kosovës”, tha tutje ai.

Grupet Parlamentare opozitare, PDK, LDK dhe AAK kanë lëshuar sallën e Kuvendit të Kosovës.

Shefi GP të PDK-së, Abelard Tahiri ka thënë se nuk do të qëndrojnë në seancën e sotme plenare. Pas dështimit të mocionit për raportimin e ministres Artane Rizvanolli në lidhje me arrestimin e kryeshefit të KEK-ut, ai tha se opozitës po i mohohet e drejta për një debat parlamentar.

Ai theksoi se pas deklarimeve jashtë të rendit të ditës, deputetët e PDK-së nuk do të qëndrojnë në sallë për vijimin e pikave tjera të rendit të ditës. Tahiri ka konsideruar se është e dëmshme që të votohet kundër debatit me ministren Rizvanolli.

“Si Grup Parlamentar pas deklarimeve jashtë rendit të ditës, nuk do të vazhdojmë të qëndrojmë në këtë seancë, sepse është e pakuptimtë që të vazhdojmë debatin në çështje të tjera, përderisa neve si opozitë na mohohet një e drejtë fundamentale për një debat parlamentar për arrestimet e djeshme”, ka deklaruar Tahiri.

Sipas tij, partia në pushtet po e mbron kryeshefin e KEK-ut, Nagip Krasniqi. Ky i fundit është arrestuar gjatë ditës së djeshme.

“Ne kemi parë një tendencë të vazhdueshme të qeverisë për ta mbrojtur një person jashtëzakonisht të fuqishëm. Edhe në kuadër të komisionit dhe intervistimit që kemi pas me Krasniqi, ne kemi pa fuqinë e tij politike dhe atij nuk i bënte përshtypje fare as ZRRE-ja, as ministrja e energjisë, as debatet parlamentare të cilat ne i ngrisnim, sepse kishte një lidhje direkte me kryeministrin Kurti dhe ndjente një siguri të fuqishme, pikërisht në abuzimet të cilat i bënte në vazhdimësi. Kur ne i thoshim se si vepron një kryeshef i KEK-ut në kundërshtim me ZRRE-në, ai thoshte kështu jam unë, këto janë rregulla që përcaktoj unë, sepse drejtoj KEK-un. I njëjti sot është në paraburgim dhe ju sot na mohoni një debat parlamentar me ministren e cila e mbikëqyr punën pikërisht të personit në fjalë”, ka shtuar Tahiri.

Tahiri ka përsëritur se ditëve në vijim do të procedojnë denoncimet për kryeshefin Nagip Krasniqi.

“Ne në kuadër të komisionit tonë hetimor parlamentar që kemi punuar për gjashtë muaj, kemi nxjerrë në pah një mori të keqpërdorimeve dhe abuzimeve, pikërisht të kryeshefit ekzekutiv të KEK-ut, Nagip Krasniqi. Pra, i njëjti ka subvencionuar faturat e energjisë elektrike pa vendim të bordit që nuk mund të ndodhë, pra drejt një kompanie private siç është KESCO dhe KEDS-i, i njëjti ka negociuar tendera një burimor. Si drejtues i kompanisë energjetike më të madhe në vend të prodhimit të energjisë elektrike, pra i njëjti ka ushtruar ndikim mbi personat zyrtar, ka pas konflikt interesi, dhe të gjitha këto janë raportuar në kuadër të komisionit hetimor parlamentar të cilin në e kemi diskutuar”, ka shtuar ai.

Shefi i deputetëve të PDK-së shtoi se kupola e këtij keqmenaxhimi është ambasadori Martin Berishaj.

Komisioni Qendror i Zgjedhjeve ka akredituar rreth 360 vëzhgues për zgjedhjet e jashtëzakonshme që do të mbahen të dielën në veri të vendit.

Numri i vëzhguesve që përfaqësojnë subjektet politike është 75, në emër të organizatave jo-qeveritare numri është 109, ndërsa dy vëzhgues përfaqësojnë një ambasadë.

Për këtë proces zgjedhor janë akredituar edhe një numër i mediave vendore dhe ndërkombëtare, me më shumë se 170 përfaqësues.

Sipas KQZ-së funksionalizimi i kontejnerëve që do të shërbejnë si qendra të votimit do të marrë kohë deri të shtunën.

Kryeshefi i Sekretariatit, Burim Ahmetaj, ka bërë të ditur se dje ka përfunduar shtypja e fletëvotimeve dhe sot ato do të dërgohen në depo qendrore të KQZ-së.

Ai ka thënë se për votim përmes postës kanë pranuar vetëm një aplikim nga Gjermania, por që deri sot nuk është dërguar ndonjë zarf me fletëvotim nga ky votues.

“KQZ do të dërgojë ekipe për monitorimin e zgjedhjeve në katër komuna dhe kjo sigurisht që do të bëhet dhe do të miratohet në mbledhjen e ardhshme do të miratohet përbërja e ekipeve të cilat do t’i monitorojnë zgjedhjet në katër komunat. Në lidhje me shtypjen e vendvotimeve pra SKQZ e ka mbikëqyr procesin e shtypjes dhe printimin e fletëvotimeve që është bërë në Pejë më datën 17 prill, ka filluar procesi i shtypjes së fletëvotimit dhe broshurave dhe ka përfunduar me datën 19 prill pra ditën e djeshme ka përfunduar edhe shtypja e fletëvotimeve. Pas shtypjes ka përfunduar procesi i paketimit dhe pritet të përfundoj gjatë ditës së sotme kur do të bëhet edhe transportimi në depon qendrore të KQZ-së“, u shpreh ai.

Sipas Ahmetaj përveç një tubimi politik nga Lëvizja Vetëvendosje raportet e KKZ-ve dhe Policisë së Kosovës tregojnë se nuk janë mbajtur tubime tjera.

Anëtari i KQZ-së nga radhët e PDK-së, Ilir Gashi është interesuar të dijë se a janë vendosur qendrat alternative për votim në komunat ku do të zhvillohet procesi zgjedhor.

“Qendrat alternative ku do të vendosen kontejnerët a janë dërguar nëse jo si e keni paraparë dërgimin dhe kush do t’i dërgoj kontejnerët si qendra alternative”, pyeti Gashi.

Ndërsa, kryeshefi i Sekretariatit të KQZ-së ka deklaruar se aktualisht ndodhen në procesin e rregullimit të hapësirave dhe deri tek funksionalizimi i këtyre qendrave do të marr kohë deri ditën e shtunë.

Ai ka thënë se nga Ministria e Punëve të Brendshme janë mbështetur jo vetëm për sigurim të kontejnerëve por edhe për rregullimin e lokacionit.

“Sa i përket funksionalizimit të qendrave të votimit ky proces është në proces të rregullimit të hapësirave se ku do të vendosen qendrat e votimit dhe është në koordinim edhe me Policinë e Kosovës dhe ministrinë e Punëve të Brendshme. Vendosja e kontejnerëve në qendra në nuk mund të bëhet përnjëherësh sepse janë 26 kontejnerë të cilët duhet të vendosen edhe për shkak të rrethanave dhe koordinimit të Policisë e Kosovës kemi shkuar gradualisht t’i vendosim komunë për komunë në mënyrë që të jenë funksional të kenë hapësirë e mjaftueshme dhe statik të vendosur dhe pastaj shkojmë për secilin kontejnerë se është vendosur sipas parametrave dhe kërkesave që KQZ kërkon…është proces që nuk mund të kryhet brenda ditës por do të na merr kohë deri të shtunën qoftë në vendosjen e tyre qoftë në sistemin e tyre dhe me shenjëzimin e tyre dhe informatave të tjera”, tha ai.

Drejtori i Zyrës për Regjistrim, Certifikim dhe Kontrollin Financiar të Subjekteve Politike Besnik Buzhala, ka thënë se rreth 360 është numri i vëzhguesve për të vëzhguar zgjedhjet e së dielës.

“Gjithsej kanë aplikuar 37 organizata vëzhguese duke përfshirë subjektet politike, përfaqësues të vendeve të huaj në Kosovë, shtëpi mediatike dhe OJQ…. Zyra konstaton se 6 OJQ nuk përmbushin kushtet ose kriteret ligjore për tu akredituar si vëzhguese për shkak se nuk janë të specializuara në zgjedhjeve dhe në fushën e mbrojtjes së të drejtave të njeriut…Në total do të jenë 31 organizata që do të marrin pjesë në procesin e vëzhgimit me gjithsej 357 vëzhgues”, tha ai.

Në këtë mbledhje të KQZ-së është miratuar edhe dizajni i vulës së fletëvotimit për zgjedhjet për kryetar komune në Mitrovicë të Veriut, Zubin Potok, Leposaviq dhe Zveçan.

KQZ ka miratuar 49 komisionerë në Leposaviq, 22 në Zubin Potok 22, në Zveçan, 28 komisionerë, ndërsa në Mitrovicë të Veriut 63 komisionerë.

Më 23 prill, pritet të mbahen zgjedhje të jashtëzakonshme për kryetar të komunave në Mitrovicë të Veriut, Zveçan, Zubin Potokut dhe Leposaviq si dhe zgjedhje të parakohshme për dy kuvendet komunale, në Zveçan dhe Leposaviq.

Në garë për kryetar të këtyre komunave janë 11 kandidatë nga katër subjekte politike, prej të cilëve vetëm dy janë të komunitetit serb, ndërsa nuk merr pjesë Lista Serbe.

Qytetarët me të drejtë vote në komunat veriore ku do të mbahen zgjedhjet e jashtëzakonshme do të mund të votojnë në 19 qendra të votimit, prej tyre 13 do të jenë alternative.