ATV

Blog

  • Myftiu i Kosovës uron besimtarët: Dashuri, lumturi për Fitër Bajram

    Myftiu i Kosovës uron besimtarët: Dashuri, lumturi për Fitër Bajram

    Në ditën e fundit të Ramazanit, Myftiu i Kosovës, Naim Tërnava, u është drejtuar besimtarëve.

    Në fjalimin e tij tradicional në prag të festës së Bajramit, ka uruar për paqe e harmoni.

    “Në këtë natë të madhe, në vigjilje të festës së Fitër Bajramit, lusim Zotin për mirësi, begati, paqe, harmoni, larg zënkave e konflikteve, sherreve e egove të dynjasë. Duke iu uruar e përgëzuar, lutem që në familjet tona, festa e Fitër Bajramit të na sjellë ngrohtësi, dashuri, harmoni e lumturi. Agjërim, lutje ibadete të pranuara. Me fat festa e Fitër Bajramit!”, tha Tërnava.

    Me këtë rast, ai ka komentuar edhe rreth sulmit fizik ndaj gazetarit Valon Syla, duke thënë se një gjë e tillë është e ndaluar me fenë islame.

    “Bashkësia Islame e Kosovës është dhe do të jetë kundër çfarëdo lloj dhune, qoftë asaj fizike që është e shprehur, ndaj kujtdo qoftë ajo. Bashkësia Islame e Kosovës në vazhdimësi, do të përkrahë, do të jetë kujdestare e fjalës e lirë. Bashkësia Islame e Kosovës respekton dhe nderon mendimin ndryshe”, theksoi Tërnava.

    Ndërkaq, për simbolet kombëtare dhe flamurin, Tërnava ka thënë se ato janë simbole identifikimi e kombëtare.

    “Unë jam Myfti i Republikës dhe gjithherë bazohemi edhe në librin tonë të shenjtë Kuranin. Flamuri është një shenjtëri në fenë islame”, tha Tërnava.

    Ai është lutur që solidariteti e veprat e mira të dëshmua gjatë këtij muaji të vazhdojnë edhe në ditët e muajt e tjerë. /atvlive.tv

  • Integrimi në BE dhe zotimet e dialogut, temë në vizitën e Billstromit

    Integrimi në BE dhe zotimet e dialogut, temë në vizitën e Billstromit

    Procesi integrues i Kosovës në Bashkimin Evropian ishte kryetemë në takimin e ministres për Punë të Jashtme, Donika Gërvalla, me homologun e saj suedez, Tobias Billstrom.

    Ministrja Gërvalla e vlerësoi si shumë të rëndësishme vizitën e Billstromit në Prishtinë, në cilësinë e përfaqësuesit të Presidencës Suedeze të Këshillit Evropian, një ditë pas nënshkrimit të vendimit për liberalizimin e vizave për kosovarët, nga 1 Janari 2024.

    “Natyrisht gjatë ditëve të ardhshme, javëve dhe muajve të ardhshëm, deri në atë kohë do të kemi një kampanjë të gjerë informuese, e cila do të tregojë se çfarë është dhe çfarë nuk është liberalizimi i vizave. Por në ndërkohë kemi të pranishëm ministrin Billstrom, si përfaqësues të Presidencës”, tha Gërvalla.

    Duke shmangur afatet, diplomati suedez tha se vendi i tij mbështet ambiciet e Kosovës për anëtarësim në Bashkimin Evropian.

    “Ne mbështesim procesin e integrimit të Kosovës në BE dhe përpjekjet për reforma lidhur me aplikimin e Kosovës për anëtarësim, ne po konsultohemi me të gjitha vendet anëtare të BE-së për rrugën përpara, si procedurë e rregullt”, tha ministri i Jashtëm i Suedisë, Tobias Billstrom.

    Pasi tha se presidenca suedeze do ta mbajë Ballkanin Perëndimor lart në agjendë, Billstrom foli për rëndësinë e zbatimit të marrëveshjes së Ohrit.

    “Kam qenë i qartë edhe në Beograd, edhe në Prishtinë, nëse zotoheni për një marrëveshje, ju duhet ta përmbushni atë. Kjo nënkupton që Serbia duhet të ndalen së penguari Kosovën, në anëtarësime në organizata ndërkombëtare. Kjo është e qartë. Këshilli i Evropës është një shembull. Në anën tjetër, është mirë të shohim Kosovën t’i përmbushë zotimet e saj, duke formuar Asociacionin e komunave”, tha Billstrom.

    Krahas procesit integrues në BE, temë në takim ishte edhe aplikimi i Kosovës për anëtarësim në Këshillin e Evropës, për çka ministrja Gërvalla tha se shpreson të ketë lëvizje pozitive.

    Ministri i Jashtëm i Suedisë, Tobias Billstrom, takoi edhe presidenten Vjosa Osmani dhe kryeministrin Albin Kurti. /atvlive.tv

  • Vendosen kontejnerët që do të përdoren si qendra votimi në veri

    Vendosen kontejnerët që do të përdoren si qendra votimi në veri

    Këta zyrtarë policorë patën një detyrë të veçantë gjatë ditës – mbikëqyrjen e vendosjes së kontejnerëve, që do përdoren si qendra të votimit.

    Në fakt, kjo është vetëm një nga pesë qendrat e votimit në Mitrovicën e Veriut. Tek Trerrokaqiejt do jetë një tjetër e improvizuar. ndërsa tri të tjera do mbahen në Shkollën në Kodrën e Minatorëve, në atë të Suhadollit dhe në komunën në Lagjen e Boshnjakëve.

    Njëkohësisht, një tjetër kamion, shpërndante kontejnerët në Zveçan.

    Këta (kontejnerët) u vendosën në qendër të qytetit, fare pranë stacionit policor. Ndërsa kjo në hyrje të fshatit Jashanicë.

    Skaj rrugës u vendosën edhe dy nga qendrat e votimit në Zveçan. Njëra në hyrje të fshatit Zhazhë, e tjetra në Banjskë.

    Pas vendosjes, nëpër secilën qendër të improvizuar qëndron nga një patrullë e policisë.

    Të njëjtit pritet të kenë angazhim edhe të dielën, meqë parashikohet situatë e tensionuar.

    “Sigurisht besoj se do jetë situate e tensionuar, POR, BESoj se policia do t’I marrë masat”, tha kandidati për kryetar të Mitrovicës së veriut, Nedzat Ugljanin.

    “Serbët nuk besoj se do marrin pjesë në zgjedhje fare. Dhe kjo nuk ndodh për shkak se nuk garon Lista Serbe. Por, këtu ndikojnë edhe proceset tjera që kanë ndodhur kohëve të fundit – siç kanë qenë vendosja e policëve special e të tjera”, tha drejtori ekzekutiv i organizatës joqeveritare “Aktiv”, Miodrag Milicevic.

    Në 4 komunat ku do zhvillohet procesi, janë gjithsej 19 qendra të votimit. /atvlive.tv

  • Pozita voton disa nga pikat e rendit të ditës, opozita lëshon sallën

    Pozita voton disa nga pikat e rendit të ditës, opozita lëshon sallën

    Me të filluar seanca e së enjtes, Partia Demokratike e Kosovës kërkoi plotësim-ndryshim të rendit të ditës.

    Kjo parti me anë të një mocioni kërkoi që pikë e parë e seancës të jetë raportimi i ministres së Ekonomisë, Artane Rizvanolli, mbi arrestimin e kryeshefit të Korporatës Energjetike të Kosovës.

    Mocioni i PDK-së mori 45 vota kundër, ndërsa 32 për, përfshirë edhe njërin nga deputetët e Lëvizjes Vetëvendosje.

    Me të përfunduar deklarimet jashtë rendit të ditës, PDK-ja lëshoi sallën.

    Ndërkaq, çështje tjetër bëri që sallën ta lëshojnë edhe dy partitë e tjera opozitare, LDK e AAK.

    “Sjellja e papërgjegjshme e ministrit të Financave duke tentuar me çdo kusht ta marrë buxhetin e komunave, na pamundëson që ne të jemi konstruktivë në seancat e Kuvendit”, tha deputeti i LDK-së, Arben Gashi.

    “Kuvendi i Kosovës është i bllokuar ose nëse ka një qasje strategjike politike për ta bllokuar, ose për shkak të mosdijes, moskonsultimit, mostrajtimit nga ministri i Financave”, tha deputeti i AAK-së, Besnik Tahiri.

    Ndërkohë, për dallim nga tri seancat e tjera që dështuan në mungesë të kuorumit, pozita, si parti në pushtet, e vetme arriti t’i votojë disa nga pikat e rendit të ditës.

    Por disa, jo.

    Kundërshtime nga vetë deputetët e Lëvizjes Vetëvendosje pati për ndryshimin dhe plotësimin e Ligjit për trajtimin e ndërtimeve pa leje.

    “Unë s’muj me çu dorën për një ligj që s’kemi asnjë analizë për asnjë ndërtesë”, tha deputeti i LV-së, Dimal Basha. /atvlive.tv

  • Kryeministri sulmon Blerim Isufajn, akuzon prokurorinë se ka disponim negativ ndaj Qeverisë

    Kryeministri sulmon Blerim Isufajn, akuzon prokurorinë se ka disponim negativ ndaj Qeverisë

    Gjuhë të ashpër ka përdorur kryeministri Albin Kurti nga foltorja e Kuvendit ndaj kryeprokurorit të Prokurorisë Speciale, Blerim Isufaj, i cili nga Këshilli Prokurorial është përzgjedhur kryeprokuror i shtetit.

    Kurti e ka akuzuar Prokurorinë dhe ka sulmuar Isufajn, duke ia bërë të ditur se atë nuk e dëshiron në pozitën e kryeprokurorit.

    Një ditë pas arrestimit të kryeshefit të Korporatës Energjetike të Kosovës, Nagip Krasniqi, kryeministri e ka akuzuar Prokurorinë se nuk i ka hetuar keqpërdorimet, që, sipas tij, janë bërë në të kaluarën në KEK.

    Prokurorinë e sulmuan edhe ministrja Artane Rizvanolli e deputetët e partisë në pushtet që udhëhiqet nga Kurti, Halil Thaçi, Arbër Rexhaj, Artan Abrashi e Adnan Rrustemi, duke thënë se arrestimi i Krasniqit është hakmarrje e Blerim Isufajt që nuk po dekretohet si kryeprokuror.

    Por, sipas shoqërisë civile, sulmet e tilla përbëjnë ndërhyrje të drejtpërdrejtë dhe presion në punën dhe pavarësinë e prokurorisë.

    Duke kritikuar ekzekutivin për standarde të dyfishta, monitorues të sistemit të drejtësisë, theksojnë se i vetmi reagim i Qeverisë, do të duhej të ishte shkarkimi i Krasniqit.

    “Qeveria është dashur të reagojë dhe reagimi të jetë shkarkimi i Krasniqit, për faktin që sa ka qenë në opozitë. LV-ja e ka ngritë parimin se me hajna nuk ka shtet dhe se të dyshuarit për korrupsion nuk duhet marrë pozita, andaj për këtë shkak ai duhet të shkarkohet”, tha analisti Arton Demhasaj.

    “Duke qenë se kemi të bëjmë me sisteme të ndara, sistemi duhet të veprojë në mënyrë të pavarur. Deklaratat e tilla janë të papranueshme dhe nuk duhet të ndodhin, por duhet të kërkohet luftimi i kësaj vepre”, tha ERANDA ZEKAJ nga IKD.

    Ndaj deklaratave të kryeministrit e zyrtarëve të Vetëvendosjes ka reaguar edhe Këshilli Prokurorial, duke thënë se ka konstatuar se disa zyrtarë të lartë shtetërorë po tentojnë të ndikojnë sistematikisht në punët e sistemit prokurorial.

    “Sa i përket rastit “Sopa”, është e vërtetë që z. Blerim Isufaj ishte prokuror i rastit në fazën fillestare të hetimeve, porse ju informojmë se ndërkohë këtë rast e ka marrë në trajtim një prokuror tjetër dhe është mirë që të pyetet prokurori i rastit, sepse vetëm ai mund të japë përgjigje adekuate. KPK-ja demanton deklaratat e pavërteta se ka pasur raste edhe me herët, por kinse nuk janë trajtuar, pra kjo deklaratë rezulton të jetë e pavërtetë dhe natyrisht se edhe për këtë rast, nëse ka informata të tilla, le të deklarohen ato publikisht dhe të dihet se cili rast ishte dhe kush e ka trajtuar atë”, thuhet në reagimin e Këshillit Prokurorial i Kosovës.

    Kurti e deputetët e tij akuzuan Isufajn, i cili është prokuror i rastit rreth hetimeve për keqpërdorime në KEK, ku nën dyshimin për korrupsion e keqpërdorim të detyrës zyrtare, u arrestua kryeshefi ekzekutiv Nagip Krasniqi.

    Krasniqi i cili u emërua në këtë pozitë në Qeverisjen Kurti 2, në tetor të vitit 2021, ishte më parë drejtues i Komitetit për Energji në Lëvizjen Vetëvendosje. /atvlive.tv

  • DhSK: Thaçit dhe Veselit do t’ iu vazhdohet masa e paraburgimit

    DhSK: Thaçit dhe Veselit do t’ iu vazhdohet masa e paraburgimit

    Michael Doyle, zëdhënës i Dhomave të Specializuara të Kosovës (DhSK) në Hagë, të enjten, ka thënë se ish-krerëve të UÇK-së Hashim Thaçi dhe Kadri Veseli do të u vazhdohet masa e paraburgimit, pasi që trupi gjykues ka konstatuar se ekziston rreziku që ndërprerja e masës së paraburgimit ndaj tyre mund të pengojnë ecurinë e procesit.

    “Trupi Gjykues konstatoi se vazhdon të ekzistojë rreziku që z. Thaçi dhe z. Veseli të pengojnë ecurinë e procesit dhe/ose të kryejnë vepra penale të tjera. Trupi Gjykues konstatoi gjithashtu se këto rreziqe mund të zvogëlohen mjaftueshëm përmes kornizës për monitorimin e komunikimeve që përdoret në objektin e paraburgimit të DHSK-së. Duke qenë se si z. Thaçi ashtu dhe z. Veseli, kanë qëndruar në paraburgim për një periudhë kohe të konsiderueshme”, ka thënë Doyle.

    Ndërsa, lidhur me ecurinë e çështjes gjatë kësaj jave ai tha se ka përfunduar dëshmia e dy dëshmitarëve të parë, ndërkaq dëshmia e dëshmitarit të tretë po vazhdon në seancë të mbyllur.

    “Dy dëshmitarët e parë të thirrur nga Prokuroria në gjykimin e Hashim Thaçit, Kadri Veselit, Jakup Krasniqit dhe Rexhep Selimit i përfunduan dëshmitë e tyre. Ata dëshmuan me masa mbrojtëse dhe kryesisht në seancë private dhe që të dyve iu bënë pyetje nga ekipet e Mbrojtjes, dhe njërit prej tyre edhe nga mbrojtësi i viktimave. Dëshmia e dëshmitarit të tretë po vazhdon dhe po kryhet në seancë të mbyllur”, tha Doyle.

    Ai tutje tha se në çështjen gjyqësore ndaj Pjetër Shalës, më 13 prill, trupi gjykues autorizoi dhënien e dëshmisë nga tre dëshmitarë përmes video-lidhjes.

    Trupi Gjykues konstatoi se teknologjia ekzistuese mundëson që dëshmitarët të pyeten me të njëjtat kushte si në sallën e gjyqit dhe do t’u mundësojë këtyre dëshmitarëve që të dëshmojnë pa ankth, çka do të përmirësojë cilësinë e dëshmisë së tyre dhe do të jetë në të mirë të mirëqenies së tyre fizike dhe psikologjike”, ka thënë si.

    Sipas tij, trupi gjykues urdhëroi Zyrën Administrative të bëjë përgatitjet e nevojshme për të siguruar respektimin e masave mbrojtëse për dëshmitarët, ai shtoi se në të njëjtën çështje gjyqësore, më 14 prill, ZPS-ja dorëzoi versionin publik të redaktuar të dosjes paraprake të saj, në zbatim të urdhrit të trupit gjykues.

    Ndryshe, seanca vijuese në këtë çështje gjyqësore është caktuar të fillojë të hënën, më 1 maj, në orën 9:30.

    Seancat e gjykimit në këtë çështje do të vazhdojnë gjatë gjithë javës, nga 1 deri më 5 maj.

    Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë. /BetimipërDrejtësi.

  • KPK i reagon Kurtit, mohon pretendimet për kryeprokurorin Blerim Isufaj

    KPK i reagon Kurtit, mohon pretendimet për kryeprokurorin Blerim Isufaj

    Këshilli Prokurorial i Kosovës (KPK) ka reaguar lidhur me deklaratat e kryeministrit të vendit, Albin Kurti në seancën e Kuvendit.

    KPK në një reagim ka njoftuar se janë ndërmarrë të gjitha veprime e nevojshme hetimore dhe procedurale nga ana e prokurorit të çështjes dhe pas vlerësimit të gjendjes faktike është dhënë informacioni në kohë reale lidhur me këtë rast.

    “Këshilli Prokurorial i Kosovës, lidhur me diskutimet e zhvilluara gjatë ditës së sotme në Kuvendin e Kosovës, posaçërisht nga Kryeministri i Republikës së Kosovës, që kanë të bëjnë me punën e Kryeprokurorit të Prokurorisë Speciale të Republikës së Kosovës, deklaron se, sa i përket rastit të tanimë të ndjerit z. Dino Asanaj, informojmë opinion se janë ndërmarrë të gjitha veprime e nevojshme hetimore dhe procedurale nga ana e prokurorit të çështjes dhe pas vlerësimit të gjendjes faktike është dhënë informacioni në kohë reale lidhur me këtë rast”, thuhej në reagim.

    Gjithashtu KPK ka ftuar të gjithë ata që kanë informacione lidhur me rastin duke përfshirë edhe kryeminsitrin Kurti t’i ofrojnë ato,

    “KPK-ja thekson se për hir të transparencës para opinionit publik dhe në zbatim të ligjit, fton këdo që ka informacione të tjera lidhur me këtë rast, përfshirë edhe vetë Kryeministrin e Republikës së Kosovës, Albin Kurti, ministrat dhe deputetët e Kuvendit, si dhe zyrtarët e tjerë shtetërorë dhe qytetarët e vendit, që të vijnë dhe të ofrojnë informacionet lidhur me këtë rast pikërisht në institucionin ku është vendi të jepen detajet që mund të jenë të panjohura deri tashti”, thuhej tutje.

    KPK-ja thekson se institucionet prokuroriale janë të gatshme plotësisht dhe të përkushtuara që ligjërisht të trajtojnë secilin informacion me interes për ndriçimin e të gjitha rasteve në fjalë.

    Rrjedhimisht, Këshilli Prokurorial i Kosovës, informon publikun e gjerë se, sa i përket rastit “Sopa”, është e vërtetë që tashmë Kryeprokurori i PSRK-së, z.Blerim Isufaj, ishte prokuror i rastit në fazën fillestare të hetimeve, porse ju informojmë se ndërkohë këtë rast e ka marrë në trajtim një prokuror tjetër dhe është mirë që të pyetet prokurori i rastit, sepse vetëm ai mund të japë përgjigje adekuate.

    Gjithashtu, KPK-ja demanton deklaratat e pavërteta se ka pasur raste edhe me herët por kinse nuk janë ka trajtuar, pra kjo deklaratë rezulton të jetë e pavërtetë dhe natyrisht se edhe për këtë rast, nëse ka informata të tilla, le ta deklarohen ato publikisht dhe të dihet se cili rast ishte dhe kush e ka trajtuar atë.

    KPK-ja deklaron se mbështet dhe mbron me të gjitha mjetet juridike në dispozicion punën profesionale të të gjithë prokurorëve të Republikës së Kosovës dhe në ketë rast edhe punën e PRSK-së dhe të prokurorëve të saj, të cilët angazhohen dhe punojnë që të zbatohen ligjet e vendit dhe që të mos atakohen pa fakte në çdo situatë dhe për agjenda që nuk janë në domenin e institucionit të Prokurorit të Shtetit.

  • Një muaj paraburgim për drejtorin e KEK-ut, dyshohet për tri vepra penale

    Një muaj paraburgim për drejtorin e KEK-ut, dyshohet për tri vepra penale

    Gjykata Themelore në Prishtinë ka caktuar masën e paraburgimit prej një muaji për kryeshefin Ekzekutiv të Korporatës Energjetike të Kosovës, Nagip Krasniqi, i cili u arrestua dje nën dyshimet për korrupsion.

    Lajmin e ka konfirmuar Mirlinda Gashi, zëdhënëse e Gjykatës Themelore në Prishtinë.

    Sipas Prokurorisë Speciale, Krasniqi dyshohet se ka kryer tri vepra penale: “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”.

  • Digjet një veturë në Veternik

    Digjet një veturë në Veternik

    Një veturë është kapluar nga zjarri në Veternik të Prishtinës, afër Albi Mall
    .
    Në videon e siguruar nga ATV, vetura e kapluar nga zjarri shihet se është e braktisur.

    Rasti ka ndodhur rreth orës 17:00 të ditës së sotme.

  • Shqiptarët në Zvicër për dy orë mblodhën 2 milionë CHF për xhaminë e re në Friburg

    Shqiptarët në Zvicër për dy orë mblodhën 2 milionë CHF për xhaminë e re në Friburg

    Bernë, 20 prill -Jemi dëshmitarë se diaspora e sotme shqiptare, kryesisht nga Kosova që jetojnë  dhe veprojnë në territorin helvetik, janë viktime e politikave diskriminuese të regjimit jugosllav dhe Serbisë së diktatorit serb Millosheviq, ku ky i fundit, shqiptarëve iu kishte shkatërruar gjithçka para viteve 1999, përfshirë këtu shkolla e xhamia.

    Por sot këta ish-emigrantë e sot qytetarë të Zvicrës  janë shembull integrimi në territorin helvetik, të cilët janë bërë të njohur dhe të suksesshëm jo vetëm në futboll, por edhe në arsim, të cilët sot në Zvicër kanë 100 shkolla dhe 100 xhami, në të cilat po ruhet dhe kultivohet kultura dhe gjuha shqipe, ku në xhamia, ligjëratat dhe lutjet bëhen edhe në gjuhen shqipe, shkruan gazeta zvicerane në shqip Le Canton27.ch.

    Sipas Zyrës Federale për Statistika (OFS) në Zvicër, aktualisht jetojnë dhe veprojnë 389.444 myslimanë apo 8% sipas regjistrimit të vitit 2021 nga popullsia rezidente e përhershme e moshës mbi 15 vjeç.

    Sipas shifrave të fundit nga Zyra Federale e Statistikave (FSO) që datojnë nga viti 2019, 5.5% e banorëve të moshës 15 vjeç e lartë deklarojnë se janë myslimanë në Zvicër, pra rreth 390,000 njerëz. Por numri i tyre këto katër vitet e fundit është rritur në afro 400 mije.

    Imami i Gjenevës Rijad Aliu uron festen e Bajramit komunitetit shqiptare dhe të huaj në gjuhen shqipe dhe tri gjuhë të tjera të Zvicrës

    Imami i Gjenevës prof. Rijad Aliu, mbrëmë para qindra besimtarëve në Xhaminë e Gjenevës “Dituria” ka uruar Fitër Bajramin komunitetit shqiptarë dhe jo shqiptarë në gjuhën shqipe dhe në tri gjuhë tjera në Zvicër.

    “Vëllezër dhe motra të nderuara, në emri tim personal dhe të Xhamisë sonë ‘Dituria’ në Gjenevë, të gjithë besimtarëve anë e mbanë botës islame ua uroj këtë festë të Bajramit, duke e lutur të Madhin Allah që harmonia, dashuria, solidariteti dhe toleranca të mbretëroje në mesin tonë këtu në Zvicër dhe paqja në botë”, është shprehur imami Aliu.

    Njëkohësisht, me një mesazh drejtuar komuniteti shqiptarë në Zvicër iu është drejtuar me urime edhe imami i njohur Mehas Alija, kryetar i Unionit të Bashkësive Islame Shqiptare në Zvicër, duke kërkuar që në mesin tonë të kenë paqe dhe tolerancë pavarësisht nga religjioni, gjuha, raca apo origjina.

    Shumica e myslimanëve në Zvicër vijnë nga vendet e ish-Jugosllavisë (42%) kryesisht shqiptarë nga Kosova, Maqedonia Veriore dhe Lugina e Preshevës, kurse nga Turqia (14%). Një e teta kanë kombësi zvicerane (mbi 30%, krahasuar me 12% në vitin 2000).

    Një mbështetje e fuqishme nga Kuvajti, Katari dhe Turqia. Xhamitë shqiptare financohen nga vet organizimi, në baza vullnetare

    Një nga bashkëbiseduesit tanë ka deklaruar se “gjithçka çfarë na ka shkatërruar Miloshiviqi me tanke në vendlindje, po përpiqemi t’i kemi sot këtu pran nesh në Zvicër..”. Sipas tij, sot në Zvicër, shqiptarët kanë mbi 200 qendra shkollore, mësim në gjuhen shqipe, po ashtu edhe mbi 100 xhami, qendra këto për falje, shkruan gazeta zvicerane Le Canton27.ch

    Më 1 qershor 1978, mbreti Khaled erdhi nga Arabia Saudite për të inauguruar xhaminë e Gjenevës, më e madhja në vend. Mbretëria financoi ndërtimin e ndërtesës prestigjioze.

    Ceremonia ishte zhvilluar në prani të Këshilltarit Federal Pierre Aubert, Kryetarit të Bashkisë së Gjenevës Pierre Raisin si dhe përfaqësuesve të kishave.

    E vendosur në Petit-Saconnex, Xhamia e Madhe e Gjenevës përbëhet nga katër ndërtesa: Xhamia, një shkollë për mësimin e Kuranit, një bibliotekë dhe një laborator gjuhësor.

    Xhamia e Madhe e Gjenevës është ndërtuar në vitin 1978 në rrethin e institucioneve ndërkombëtare në Grand-Saconnex. Është xhamia më e madhe në Zvicrën frankofone dhe e vetmja që ka një minare. Është gjithashtu e vetmja që njihet nga jashtë, xhamitë e tjera në Zvicrën frëngjisht folëse janë në ndërtesa civile.

    Për 300 mijë shqiptarë në Zvicër 100 xhami janë pakë a shumë?.. Pas Xhamisë së Bernit, Gjenevës, Will-it, Spreitenbach dhe Reinach, shqiptarët e Zvicrës së shpejti edhe me një xhami në Friburg.

    Me rritjen e numrit të shqiptarëve në Zvicër rreth (300 mijë) po rriten edhe shkollat dhe xhamitë në këtë vend. Themi kështu sepse para 4 vitesh, në prag të Ramazanit në Zvicër u hapën dy objekte fetare, u bë inaugurimi i dy xhamive të mëdha (Will dhe Gjenevë) për komunitetin shqiptar në këtë vend demokratik dhe tolerant. Dy imamët e këtyre xhamive kane falënderuar autoritetet zvicerane për këtë mundësi.

    Ne Qershorin e vitit 2017, shqiptarët në Zvicër kishin ndërtuar dy xhami me një shumë prej 8 milionë CHF. Për katër vite, katër xhami në Zvicër, që kjo i bie se shqiptaret në Zvicër sikur ndërtojnë thuajse për çdo dy vite nga një xhami. Sipas imamëve dhe organizatoreve, në mesin e qindra kontribuuesve, sponsorëve shqiptarë e myslimanë, kishte edhe donatorë katolikë dhe zviceranë.

    Shqiptarët në Zvicër bëhen me 100 shkolla dhe 100 xhami. Së shpejti shqiptarët e Friburgut më xhami të re “Assotiation Culturell Islamic Albanaise”

    Sipas gazetës zvicerane në shqip Le Canton27.ch, në Zvicër janë mbi 100 xhami të shqiptareve. Shumica e xhamive shqiptare në Zvicër janë me imamë të rregullt, të punësuar. Numri më i madh i besimtarëve është prezent ditëve të premte, por edhe ditëve të pushimeve sidomos gjatë  muajit të Ramazanit dhe ditëve të festave të  Bajramit të Vogël dhe të Madhit, kurse ditëve tjera, xhamitë më pak frekuentohen për shkak të angazhimeve të besimtarëve me punë të përditshme dhe obligime familjare.

    Është e vështirë të numërohet numri i objekteve të adhurimit mysliman në Zvicër. Vlerësimet variojnë nga rreth 300 xhami. Në Zvicër, vetëm katër kanë minare (Gjenevë, Cyrih, Winterthur dhe Wangen bei Olten). Pa muezin, janë rreth 200 imamë që predikojnë në Zvicër, prej të cilëve mbi 100 janë me angazhim të plotë.

    Pjesa dërmuese e xhamive në Zvcër mbështeten nga Kuvajti, Katari dhe Turqia. Kurse, xhamitë shqiptare financohen nga vet organizimi spontan i shqiptareve, në baza vullnetare.

    “Të dashur vëllezër dhe motra, me datë 17.04.2023 ditë e hënë (nata e Kadrit në muajin Ramazan), u bë aksion për grumbullimin e mjeteve për ndërtimin e Xhamisë së re në Fribourg. Shuma e tubuar 1 814 400 CHF, masha’Allah. Allahu i shpërbleftë të gjithë kontribuuesit. Vetëm besimi në Allahun arrin të bën çudira”, thuhet ne web faqen e xhamisë së shqiptarëve në Friburg, transmeton gazeta zvicerane Le Canotn27.ch, ku në vazhdim prezantohet edhe në video ku shihet maketi i xhamisë se re në Friburg, të cilin kanton jetojnë mbi 20 mijë shqiptarë, kryesisht nga Kosova, Maqedonia Veriore dhe nga Lugina e Preshevës.

    Drejtuesi i Xhamisë në ndërtim Bedrudin Sadullahu, duke falënderuar besimtarët për këtë solidaritet dhe kontribut, ka thëne për gazetën zvicerane në shqip Le Canton27.ch se “pjesa e dërmuse e mjeteve janë tubuar për xhaminë e re në Friburg,  falë gatishmërisë dhe bujarisë së komunitetit tonë në kantonin tonë dhe në Zvicër”.

    “Xhamia e jonë në Friburg për të qenë në funksion, nevojiten 2 500 500 CHF. Deri më tani janë grumbulluar 1 830 000 CHF. Objekti do të ketë bibliotekën, salla leximi, restorant të madh prej 350 m2 si dhe lokale për aktivitete të tjera kulturore e sportive, por edhe këndin për lojë për fëmijë”, ka thënë Sadulli.

    “Së pari falënderoj autoritetet zvicerane që na kanë mundësuar lokacionin. Çështjen administrative e kemi kryer, po ashtu projektin e kemi të gatshëm dhe mjetet gati-gati po bëhen. Çka inshalla xhamia jonë në Friburg do jetë e gatshme për Ramazanin e vitit të ardhshëm, ku do të kemi dy festa, Bajrmin dhe xhaminë re”, ka treguar Sadullahu duke uruar festen e Bajramit komunitetit myslimanë në Friburg dhe Zvicër.

    Më shumë se 350 shoqata myslimane dhe objekte kulti, të rrymave të ndryshme, janë të përhapura në të gjithë Zvicrën. Asnjë xhami nuk pretendon hapur se ka një tendencë xhihadiste. Në Zvicër, shumica e myslimanëve vijnë nga Ballkani. Vendet ku ata luten janë gjithashtu vende takimi ku transmetohen traditat e vendeve të tyre të origjinës.

    “Myslimanët shqiptarë kanë përvojë të bashkëjetesës ndërfetare”, tha Arlinda Amiti, koordinatore e programit të doktoratës “Islami dhe Shoqëria: Studime Islame-teologjike” në Qendrën Zvicerane për Islamin dhe Shoqërinë (CSIS).

    Se sa janë të integruar shqiptarët, në këtë rast femrat shqiptare, dëshmon edhe një fakt se zonja prof.dr.Arlinda Amiti (me shami) është shqiptarja e parë doktore e shkencave në Zvicër, e cila pos shqipes, zotëron edhe 7 gjuhë të huaja.

    Zvicra sot ka rreth 400,000 myslimanë të cilët në vitin 1970 ishin vetëm 16,000. Sipas gazetës zvicerane në shqip Le Canton27.ch, ky numër i madh i myslimanëve në Zvicër të cilët janë kryesisht nga Ballkani,  janë edhe për shkak të politikave diskriminuese të regjimit të Millosheviqit, i cili kishte dëbuar më dhunë qindra mijëra shqiptarë dhe boshnjakë nga viset e tyre si nga Kosova po ashtu edhe nga Bosnja.