Blog

Polonia do të dërgojë avionët e saj luftarakë në Estoni pas inkursioneve të dronëve të humbur në Baltik.

Zëvendëskryeministri dhe ministër i Mbrojtjes, Wladyslaw Kosiniak-Kamysz, ka thënë se avionët luftarakë polakë do të plotësojnë boshllëqet që kanë hasur në misionin e policimit ajror në Estoni.

Gjatë muajve të fundit, dronët ukrainas janë përplasur në oxhakun e një termocentrali në Estoni, kanë goditur rezervuarët e zbrazët të karburantit në Letoni si dhe disa janë rrëzuar nga avionët luftarakë rumunë të stacionuar në Lituani.

Për herë të parë në një kryeqytet të NATO-s dhe Bashkimit Evropian, lituanezët u strehuar në parkingje nëntokësore në Vilnius të mërkurën, ndërsa autoritetet paralajmëruan për aktivitet të dronëve të paidentifikuar në Bjellorusinë fqinje.

Kosiniak-Kamysz ka thënë se Ukraina duhet të jetë më e saktë në operacionet e saj për të parandaluar Rusinë të shfrytëzojë situatën dhe të krijojë provokime.

Kosiniak-Kamysz ka folur gjithashtu rreth vendimit për vendosjen përfundimtare të trupave amerikane në Poloni për të cilin ka thënë se do të merret brenda dy javësh.

Ushtruesja e Detyrës së Presidentes së Republikës së Kosovës, Albulena Haxhiu, së bashku me Ministrin Xhelal Sveçla dhe Drejtorin e Përgjithshëm të Policisë, Gazmend Hoxha, kanë inauguruar sot nënstacionin e ri policor në Junakë të Zveçanit.

Sipas U.D. Presidentes Haxhiu, ky nënstacion forcon praninë institucionale, rrit sigurinë dhe fuqizon sovranitetin e Republikës së Kosovës.

“Vendosja e institucioneve të sigurisë në terren është dëshmi e shtrirjes së shtetit dhe e përkushtimit ndaj rendit, ligjit dhe sigurisë për të gjithë qytetarët, pa dallim. Prania e policisë mundëson reagim më të shpejtë, ofrim më efikas të sigurisë dhe forcim të besimit në institucionet shtetërore, si themel i stabilitetit dhe sigurisë së qëndrueshme”, ka theksuar U.D. Presidentja Haxhiu.

Ajo më tej ka thënë se do të vazhdojmë investimet në Policinë e Kosovës, në siguri dhe në forcimin e institucioneve tona shtetërore, për të mbrojtur sovranitetin, rendin kushtetues dhe për të ndërtuar një Kosovë më të zhvilluar e më të sigurt në çdo cep të saj.

Pjetër Shala ka kërkuar nga Gjykata Supreme e Dhomave të Specializuara të Kosovës (DhSK) në Hagë anulimin e vendimit të Gjykatës së Apelit, me të cilin u aprovua urdhri prej 208 mijë eurosh dëmshpërblim ndaj tetë viktimave.

Në kërkesën e parashtruar përmes mbrojtjes më 29 prill 2026 e cila u bë publike më 18 maj, Shala ka kërkuar që vendimi i Apelit të anulohet dhe të kthehet çështja para një paneli tjetër të gjyqtarëve, raporton “Betimi për Drejtësi“.

Fillimisht, në kërkesën e vet, mbrojtja thotë se Apeli gjatë marrjes së vendimit e interpretoi gabimisht ligjin, me arsyetimin se ka zbatuar të njëjtin standard që ka pasur për shqyrtimin e apelimeve të dënimeve penale me atë për dëmshpërblim.

Sipas kërkesës, kjo ka cenuar të drejtën e Shalës për qasje efektive në gjykatë.

Veç kësaj, thuhet se paneli i gjyqtarëve kanë bërë shkelje të procedurës duke cenuar të drejtën e Shalës për gjykim të drejtë. Kjo është thënë, duke argumentuar se procedurat për dëmshpërblim janë zhvilluar përpara se vendimi me burgim ndaj tij të marrë formën e prerë në Apel.

Mbrojtja në kërkesë thotë se kjo gjë ka shkelur të drejtën e Shalës për t’u prezumuar i pafajshëm derisa të provohet fajësia e tij.

Po ashtu, thuhet se sipas mbrojtjes së Shalës, gjatë marrjes së vendimit është kryer shkelje substanciale e procedurës pasi që nuk janë kërkuar të dhëna mbi shpenzimet mjekësore që ka pasur një viktimë (viktima W04733) gjatë përcaktimit për dëmin material që kanë pësuar viktimat e tërthorta.

Pra, mbrojtja pretendon se Paneli Gjykues gjatë përcaktimit të dëmshpërblimit ndaj viktimave, është mbështetur kryesisht në deklarata të viktimave dhe familjarëve të tyre. Sipas saj, Gjykata thjesht “supozoi” ekzistencën e kostove mjekësore pa prova të mjaftueshme.

Po ashtu, mbrojtja argumenton se Gjykata nuk ka sqaruar cilat probleme shëndetësore të W04733 lidhen drejtpërdrejt me ngjarjet në Fabrikën e Metalit në Kukës dhe në çfarë mase ato ndikuan në gjendjen e tij shëndetësore apo aftësinë për të punuar.

Në përfundim, mbrojtja kërkon që Gjykata Supreme ta anulojë vendimin e Apelit për dëmshpërblimin dhe ta kthejë çështjen për rishqyrtim nga një panel tjetër, ose të marrë çdo masë tjetër që e konsideron të nevojshme për mbrojtjen e ligjshmërisë dhe drejtësisë së procedurës.

Vendimi për dëmshpërblim ndaj Pjetër Shalës ishte marrë më 29 nëntor 2024 me ç’rast u urdhërua që të paguajë një shumë prej 208 mijë eurosh. Ky vendim ishte konfirmuar nga Apeli më 29 janar 2026.

Prokuroria Themelore e Pejës ka njoftuar se i dyshuari A.B., është ndaluar për 48-orë nën dyshimin se ka kryer veprën penale “Materialet me përmbajtje të shfrytëzimit dhe keqpërdorimit seksual të fëmijëve”.

Sipas njoftimit, arrestimi i të dyshuari erdhi pas një pune intensive hetimore ndërmjet Prokurorisë Themelore të Pejës në koordinim me Policinë e Kosovës, përkatësisht Njësitin për Luftimin e Krimeve Kibernetike.

Gjatë realizimit të operacionit bëhet e ditur se janë sekuestruar edhe pajisje elektronike, për të cilat dyshohet se janë përdorur për kryerjen e veprës penale të lartcekur.

“Brenda afatit ligjor, Prokurori i Shtetit do t’i ndërmarrë të gjitha veprimet e nevojshme hetimore dhe procedurale, në koordinim me Policinë e Kosovës, me qëllim të ndriçimit të plotë të këtij rasti penal. Prokuroria Themelore në Pejë mbetet e përkushtuar në luftimin e të gjitha formave të kriminalitetit, veçanërisht veprave penale që cenojnë integritetin dhe sigurinë e fëmijëve”, thuhet në njoftim.

Sipas një raporti të Washington Post, Shtetet e Bashkuara fillimisht refuzuan të lejonin një mjek amerikan të infektuar me Ebola të kthehej në shtëpi.

Gazeta citon pesë burime të njohura me çështjen.

Si rezultat, evakuimi i mjekut u vonua përpara se ai të transportohej përfundimisht me aeroplan në Gjermani.

Mirëpo, Shtëpia e Bardhë e hodhi poshtë këtë rrëfim, duke e quajtur atë “absolutisht të rremë”.

Dr. Peter Stafford, një mjek misionar, kishte punuar në Bunia në Republikën Demokratike lindore të Kongos kur trajtoi një pacient me dhimbje të forta barku.

Rasti fillimisht u besua të ishte një fshikëz e tëmthit e inflamuar, por kjo diagnozë u përjashtua më vonë.

Pacienti vdiq të nesërmen, me shumë mundësi nga Ebola, dhe u varros para se të kryhej një test.

Tetë ditë më vonë, vetë Dr. Stafford filloi të shfaqte simptoma jo specifike, duke përfshirë ethe, dhimbje, dridhje dhe lodhje ekstreme.

Raportohet se gjatë shpërthimit të Ebolës në Afrikën Perëndimore në vitin 2014, dy pacientët e parë amerikanë u dërguan me aeroplan në Atlanta për trajtim.

Në atë kohë, presidenti amerikan, Donald Trump, e kritikoi vendimin, siç tregohet në një postim në gusht 2014 në X (atëherë Twitter).

Sipas njerëzve të njohur me situatën, shqetësimet në lidhje me reagimin e publikut ndaj një rasti të mundshëm të Ebolës që hyn përsëri në Shtetet e Bashkuara ishin një faktor në diskutimet e Shtëpisë së Bardhë, raporton gazeta.

Zëdhënësi i Shtëpisë së Bardhë, Kush Desai, hodhi poshtë pretendimin se administrata nuk donte ta sillte Peter Stafford përsëri në Shtetet e Bashkuara.

“Kjo është absolutisht e gabuar dhe një arsye tjetër pse Washington Post nuk ia vlen më”, deklaroi Stafford.

“Prioriteti mbizotërues dhe i vetëm i administratës Trump është shëndeti dhe siguria e popullit amerikan. Charite në Gjermani njihet ndërkombëtarisht si një nga qendrat kryesore në botë për trajtimin dhe përmbajtjen e sëmundjeve virale si Ebola dhe është në të njëjtin nivel me klinikat kryesore në Shtetet e Bashkuara”, shtoi ai.

Satish Pillai, një shkencëtar amerikan në Universitetin e Kalifornisë, San Francisko, tha se çështja kryesore ishte sigurimi i trajtimit të shpejtë dhe të përshtatshëm.

Gjermania ishte zgjedhur si vendi i parë i trajtimit sepse Evropa është më afër Afrikës sesa Shtetet e Bashkuara dhe ofron qasje në kujdes mjekësor të klasit të parë.

Sëmundja mund të çojë në shok dhe dështim të shumëfishtë të organeve brenda pak ditësh.

Gruaja dhe katër fëmijët e mjekut amerikan të infektuar tani ndodhen gjithashtu në spitalin Charite të Berlinit.

Ndryshe, shpërthimi i Ebolës është konfirmuar si lloji Bundibugyo i virusit, i cili ka një shkallë vdekshmërie prej rreth 25 deri në 50%.

Nuk ka vaksina ose trajtime të synuara në dispozicion për këtë lloj.

Deri më tani ka pasur pothuajse 600 raste të dyshuara dhe 139 vdekje në Republikën Demokratike të Kongos, dhe numri i rasteve pritet të vazhdojë të rritet.

Megjithatë, numri i vërtetë i infeksioneve ka të ngjarë të jetë më i lartë.

Gjendja e mjekut amerikan që u infektua me Ebolën dhe që tani po trajtohet në Charite po fillon të përmirësohet. Thuhet se tani ai është në gjendje të hajë përsëri. /Telegrafi/

 

Ushtruesja e Detyrës së Presidentes së Republikës së Kosovës, Albulena Haxhiu, ka përuruar sot strehimoren e parë institucionale në veri, të renovuar me një investim prej 634 mijë eurosh.

U.D. Presidentja Haxhiu ka thënë se vizitën në pjesën veriore të Mitrovicës e nisëm aty ku shihet qartë dallimi mes shtetit që rikthen ligjin dhe krimit që ka dashur ta mbajë peng.

“Kjo është strehimorja e parë në rajon sipas standardeve të Konventës së Stambollit. Asokohe si ministre e Drejtësisë, bashkë me ish-kryetarin e Mitrovicës së Veriut, Erden Atiq, dhe ministrin Xhelal Sveçla, e ridestinuam këtë objekt në strehimore për viktimat e dhunës në familje”, ka thënë U.D. Presidentja Haxhiu.

U.D. Presidentja Haxhiu ka thënë se sot çelësat iu dorëzuan Ministrit, Andin Hoti, që kjo hapësirë të vihet plotësisht në shërbim të atyre që kanë nevojë për siguri, kujdes dhe dinjitet.

Kryetari i Aleancës për Ardhmërinë e Kosovës, Ramush Haradinaj, mori pjesë sot në zbulimin e pllakës përkujtimore të Heroit Myrtë Zeneli në Zllapek, në përvjetorin e rënies së tij heroike gjatë betejës së 21 majit 1998.

Haradinaj kujtoi se Heroi Myrtë Zeneli ra në betejën treditore në Grabanicë, Qeskovë, Dollovë, Kpuz e Bokshiq, bashkë me bashkëluftëtarët Faruk Elezaj, Arben Krasniqi, Xhezair Syla, Qaush Fazlija dhe Isuf Morina, ndërsa po atë ditë për lirinë e vendit ra edhe Heroi Arben Haliti.

Haradinaj theksoi se emrin e Myrtë Zenelit “me krenari në fitore të njëpasnjëshme nëpër beteja do ta mbante Brigada 132 e Zonës Operative të Dukagjinit”.

Ai vlerësoi edhe kontributin e familjes Ahmetaj, duke e cilësuar si një familje me traditë të fuqishme atdhetare, e rreshtuar në kohët më të vështira përkrah Ushtrisë Çlirimtare të Kosovës, me vëllezër që i dolën zot atdheut.

Haradinaj shprehu respekt e mirënjohje edhe për tre vëllezërit Mehmet Rexhaj, Ajet Rexhaj dhe Hetem Rexhaj nga Jabllanica e Madhe e Pejës, duke theksuar se sakrifica e tyre mbetet porosi për brezat për çmimin e lirisë dhe përkushtimin ndaj atdheut.

Një gjykatë në Vilnius ka dënuar ish-Shefin e Mbrojtjes së Lituani, Valdemaras Rupšys, me një gjobë prej 20 mijë eurosh për mashtrim, shpërdorim detyre dhe falsifikim dokumentesh.

Rupšys u përball me akuzat pasi kishte përdorur fonde ushtarake për të paguar dy implante dentare me vlerë rreth 4 mijë euro. Ai kishte deklaruar më herët se dëmtimi dentar ishte shkaktuar gjatë një vizite te trupat lituaneze në Gjermani në korrik të vitit 2022.

Sipas hetimeve, incidenti ishte njohur zyrtarisht si i lidhur me shërbimin ushtarak, çka bëri që trajtimi të mbulohej nga fondet e mbrojtjes kombëtare.

Përveç gjobës, gjykata vendosi që ish-shefit të mbrojtjes t’i ndalohet ushtrimi i funksioneve në shërbimin civil për pesë vjet.

Valdemaras Rupšys drejtoi ushtrinë lituaneze nga viti 2019 deri në vitin 2024 dhe nuk ishte i pranishëm gjatë shpalljes së vendimit.

Ndërkohë, mjeku ushtarak Šarūnas Ratkus u gjobit me 15 mijë euro, i akuzuar për falsifikim dokumentesh dhe ndihmë në mashtrim. Ratkus deklaroi se do ta apelojë vendimin.

Në Gjilan është vënë gurthemeli i repartit të ri të Pediatrisë, projekt që synon modernizimin e shërbimeve për fëmijët dhe krijimin e kushteve më të mira për trajtim dhe kujdes shëndetësor.

Në ceremoninë e gurthemelit morën pjesë kryetari i Komunës së Gjilanit, Alban Hyseni, kryeministri në detyrë Albin Kurti dhe ministri i Shëndetësisë, Arben Vitia.

Sipas Hysenit, projekti përfshin investim rreth 1 milion euro dhe pritet të sjellë rritje të kapaciteteve dhe kushte më funksionale për pacientët e vegjël.

“Investimi prej afro 1 milion eurosh përfshin laborator modern, rritje të kapaciteteve me më shumë shtretër, ambiente funksionale dhe kënd lojërash për më të vegjlit”, ka deklaruar Hyseni.

Kryetari i Gjilanit ka thënë se, paralelisht me këtë projekt, po vazhdojnë me ritëm të përshpejtuar edhe punimet për çerdhen e re në lagjen “Tregu i Gjelbër”, të cilën e cilësoi si pjesë e zotimeve të komunës.

Në fund, Hyseni ka falënderuar kryeministrin Kurti dhe ministrin Vitia për mbështetjen, duke thënë se ajo po reflektohet në projekte konkrete për qytetin e Gjilanit.