Blog

Presidenti amerikan Donald Trump ka njoftuar se Shtetet e Bashkuara do të dërgojnë 5 mijë trupa shtesë në Poloni, vetëm pak ditë pasi Pentagoni kishte pezulluar një vendosje të planifikuar forcash në vendin aleat të NATO-s.

Në një postim në platformën e tij Truth Social, Trump deklaroi se vendimi lidhet me marrëdhëniet e ngushta me presidentin aktual të Polonisë, Karol Nawrocki.

“Bazuar në zgjedhjen e suksesshme të Presidentit të tanishëm të Polonisë, Karol Nawrocki, të cilin isha krenar ta mbështesja, dhe marrëdhënien tonë me të, jam i kënaqur të njoftoj se Shtetet e Bashkuara do të dërgojnë 5,000 trupa shtesë në Poloni”, shkroi Trump.

Njoftimi konsiderohet një kthesë e fortë politike, pasi vetëm pak ditë më parë Pentagoni kishte bërë të ditur se do të vononte rotacionin e rreth 4 mijë trupave amerikane në Poloni, si pjesë e një rishikimi të pranisë ushtarake amerikane në Evropë.

Zëvendëspresidenti amerikan JD Vance e kishte mbrojtur vendimin fillestar, duke deklaruar se Evropa duhet të marrë më shumë përgjegjësi për mbrojtjen e saj. Ai theksoi se “Polonia është e aftë të mbrojë veten me shumë mbështetje nga Shtetet e Bashkuara”.

Megjithatë, pezullimi fillestar i vendosjes së trupave kishte shkaktuar shqetësim në Varshavë, mes frikës për kërcënimin rus dhe luftën e vazhdueshme në Ukrainë. Vendimi u kritikua gjithashtu edhe në Kongresin amerikan.

Zhvillimi vjen vetëm disa orë përpara takimit ministror të NATO-s në Suedi, ku sekretari amerikan i shtetit Marco Rubio pritet të marrë pjesë mes tensioneve të vazhdueshme midis Uashingtonit dhe aleatëve evropianë.

Rubio deklaroi se Trump është “shumë i zhgënjyer” nga disa vende të NATO-s që nuk kanë lejuar përdorimin e bazave të tyre për operacionet amerikane, duke veçuar Spanjën.

“Keni vende si Spanja që na mohojnë përdorimin e këtyre bazave – atëherë pse jeni në NATO? Kjo është një pyetje shumë e drejtë”, tha Rubio.

Prej kohësh, Trump ka kritikuar aleatët e NATO-s për mosrritjen e kontributit në sigurinë kolektive dhe ka ngritur pikëpyetje mbi angazhimin e SHBA-së ndaj aleancës.

Ndërkohë, Polonia vazhdon të konsiderohet një nga aleatët më të afërt të SHBA-së në Evropë, duke qenë ndër vendet me shpenzimet më të larta ushtarake në NATO dhe një mbështetëse aktive e operacioneve amerikane në Irak dhe Afganistan.

Sot do të mbahet një protestë në Prishtinë, para objektit të Ministrisë së Mjedisit dhe Planifikimit Hapësinor, në shenjë kundërshtimi ndaj vendimit për pezullimin e mallrave dhe shërbimeve ndërtimore në Rugovë.

Protesta do të organizohet nën moton “Rugova nuk hesht – Rugova kërkon drejtësi!”.

Sipas organizatorëve, nisja e transportit të organizuar do të bëhet nga lokali “Peja City”, nga ora 09:30 ku qytetarët do të udhëtojnë me autobusë drejt kryeqytetit.

Organizator i protestës është Idriz Kurtbogaj, ndërsa pjesëmarrësit janë ftuar që protesta të zhvillohet në mënyrë të qetë dhe dinjitoze, me synim mbrojtjen e të drejtave të banorëve të Rugovës.

Sot, në Burgun e Dubravës mbahen homazhe përkujtimore në nderim të viktimave, të plagosurve dhe të mbijetuarve të Masakrës së Dubravës, një nga krimet më të rënda të kryera ndaj të burgosurve shqiptarë gjatë luftës në Kosovë. Aktiviteti organizohet në 27-vjetorin e ngjarjeve tragjike të periudhës 19–24 maj 1999.

Me fillim nga ora 11:00, sot në Burgun e Dubravës do të mbahen homazhe përkujtimore në nderim të të vrarëve, të plagosurve dhe të mbijetuarve të Masakrës së Dubravës, një nga krimet më të rënda të kryera ndaj të burgosurve shqiptarë gjatë luftës në Kosovë.

Aktiviteti përkujtimor organizohet në 27-vjetorin e masakrës që ndodhi gjatë periudhës 19–24 maj 1999, kur dhjetëra të burgosur shqiptarë u vranë dhe qindra të tjerë u plagosën brenda Burgut të Dubravës.

Organizatorët kanë ftuar ish-të burgosurit, familjarët e viktimave, të mbijetuarit e masakrës dhe qytetarët e interesuar që të marrin pjesë në ceremoninë përkujtimore.

Hyrja në hapësirat e Burgut të Dubravës do të nisë nga ora 11:00.

Masakra e Dubravës mbetet një nga ngjarjet më tragjike të luftës në Kosovë dhe një simbol i vuajtjeve të shqiptarëve gjatë regjimit serb.

Nesër në Kosovë pritet të mbajë mot i paqëndrueshëm, me vranësira e intervale kohore me diell dhe reshje lokale shiu. Nuk përjashtohet mundësia për rrebeshe lokale me vetëtima dhe bubullimë, por reshjet do të jenë të karakterit lokal dhe nuk do të kapin tërë territorin. Në disa rajone priten rrebeshe intensive me vetëtima dhe bubullimë.

Temperaturat pritet të luhaten nga 10 minimalja deri në 24 gradë Celsius ajo maksimale.

Në Shqipëri, Maqedoninë Veriore, Luginë të Preshevës dhe Mal të Zi dita e Premte pritet të kushtëzojë mot me diell dhe vranësira të shpeshta lokale. Rrebeshe më të përhapura shiu me vetëtima dhe bubullimë parashihen në jug, qendër dhe lindje të Shqipërisë dhe në shumë pjesë të Maqedonisë së Veriut. Vende-vende priten rrebeshe intensive.

Gjatë fundjavës na pret mot i paqëndrueshëm, me intervale kohore me diell dhe zhvillime të shpeshta të vranësirave ku vende-vende, herë pas here priten rrebeshe të izoluara shiu me vetëtima dhe bubullimë. Reshjet nuk do të kapin të gjitha viset, megjithatë orëve të pasdits në disa rajone parashihen rrebeshe intensive./MeteoBallkan

Nesër, më 22 maj, në orën 09:30, do të mbahet një protestë në Prishtinë, përpara Ministrisë së Mjedisit dhe Planifikimit Hapësinor, kundër vendimit për ndalimin e mallrave dhe shërbimeve ndërtimore në Rugovë.
Protesta do të mbahet në sloganin “Rugova nuk hesht – Rugova kërkon drejtësi!”

Transporti i organizuar do të nisë nga lokali “Peja City” me autobusë. Organizatori i protestës është Idriz Kurtbogaj.

Protestuesit ftohen të marrin pjesë në mënyrë paqësore dhe dinjitoze për të mbrojtur të drejtat e banorëve.

Kryetari i Lidhjes Demokratike të Kosovës dhe kandidati për kryeministër, Lumir Abdixhiku, ka folur për rëndësinë e ndarjes dhe balancimit të pushteteve në Kosovë, duke e cilësuar si të rrezikshme përqendrimin e gjithë kontrollit shtetëror në duart e një personi të vetëm.

Abdixhiku tha se funksionimi i një shteti demokratik nuk duhet të lidhet me emra të përveçëm, por me parime kushtetuese dhe me ruajtjen e balancave që garantojnë demokracinë.

“Qëllimi ishte të faktorizohej një pozitë e rëndësishme kushtetuese. Nuk ishte dallimi i emrave të përveçëm, por i natyrës së funksionimit të shtetit. A duam një shtet kur një njeri pyetet për diçka, apo që të ketë balancë demokratike?”, ka deklaruar Abdixhiku.

Kreu i LDK-së shtoi se tendenca për të kontrolluar çdo institucion krijon një ambient të pasigurt për vendin, prandaj dhe nevoja për kontroll dhe balancë mbetet jetike.

“Është e rrezikshme një njeri me kontrollu gjithë shtetin, është e frikshme, prandaj balancat janë të rëndësishme”,tha ai në emisionin “Pressing” në T7.