ATV

Blog

  • Stacionet policore në Istog e Fushë-Kosovë me mungesë të spërkatësve e jelekëve antiplumb

    Stacionet policore në Istog e Fushë-Kosovë me mungesë të spërkatësve e jelekëve antiplumb

    Përgatiti: Nora Luta

    Të paktën në dy vitet e fundit zyrtarët policorë në Istog e në Fushë-Kosovë ballafaqohen me mungesë të uniformës. Përveç veshmbathjeve adekuate, Inspektorati Policor gjatë inspektimit ka hasur në mungesë të jelekëve antiplumb, spërkatësve kimikë dhe radio-lidhjeve.

    Në raportet e publikuara për dy stacionet veç e veç, IPK-ja ka dhënë pothuajse vërejtjet dhe rekomandimet e njëjta.

    “Zyrtarët policorë kanë mungesë të këpucëve dhe çizmeve për punë. Zyrtaret policore, në mungesë të këmishëve adekuate, janë të detyruar të veshin këmishë për meshkuj. IPK-ja i rekomandon Drejtorisë së Logjistikës që në koordinim më Stacionin Policor të Fushë-Kosovës, të ndërmarrë veprime urgjente në furnizimin e zyrtarëve me uniforma policore. Për arsye të sigurisë, IPK-ja rekomandon furnizimin e stacionit me spërkatës kimikë, jelekë antiplumb dhe radiolidhje” thuhet në njoftimin e IPK-së.

    Sipas ish-togerit të Policisë, tani avokat, kushtet e tilla të punës përveç që ndikojnë në performancë, rrezikojnë drejtpërdrejt jetën e zyrtarëve policorë.

    Sipas Rudarit, Policia detyrohet t’i marrë parasysh vërejtjet e IPK-së.

    IPK-ja, gjithashtu, ka vërejtje sa iu përket dhomave për ruajtjen e dëshmive, duke rekomanduar të respektohen rregullat mbi paketimin e dëshmive të konfiskuara në material adekuat varësisht prej specifikave të tyre.

    Ndërkohë, Drejtoria e Përgjithshme e Policisë, e cila ka kompetencë për furnizim, e as Ministria e Punëve të Brendshme nuk kanë kthyer përgjigje, nëse kanë filluar të ndërmarrin ndonjë veprim rreth rekomandimeve dhe vërejtjeve të IPK-së.

    Më shumë detaje i gjeni në Edicionin Qendror të lajmeve në videon më poshtë:

  • Mitrovica agon me nacionalizmin serb në mure

    Mitrovica agon me nacionalizmin serb në mure

    Përgatiti: Armand Hoti

    Grafite me përmbajtje nacionaliste serbe ka gjithandej Mitrovicës së Veriut.

    Megjithatë, tash mureve të qytezës iu shtuan edhe dy të reja, të lokalizuara fare pranë sheshit kryesor.

    Si autor të mbishkrimeve në çirilicë, ka dalë hapur Brigada e Veriut, të cilën qeveria e Kosovës e ka shpallur organizatë terroriste.

    Njohësi i sigurisë, Arben Dashevci, thotë se dikush ka interes që veriu të ketë tensione, andaj edhe bëhen grafitë të tilla urrejtje-nxitëse.

    “Këtu është vetëm një tentim i vogël që ta mbajnë situatën nën tension, pork jo është paksa ndryshe pasi Policia e Kosovës ka kapacitete të polta në veprim, e përmenda 24 shtatorin dhe asgjë nuk është njëjtë pas 24 shtatorit…Grupi terrorist Brigada e Veriut dhe Mbrojta civile nuk janë më në Kosovë dhe nëse vijnë do të arrestohen sikurse në çdo shtet tjetër demokratik”, tha Dashevci.

    Sipas Dashevcit, dy grupet e përmendura, nuk gëzojnë autoritetin që kanë pasur dikur në popullatën serbe në veri të Ibrit.

    “Unë nuk e besoj që do mundë të mbajnë situatën nën tension, pasi faktet janë krejt ndryshe…Mendimi im në aspekt sigurie është se këta nuk e kanë më atë famë siç e kanë pas para 24 shtatorit, mirëpo a do të tentojnë në vazhdimësi, gjithsesi se po. Por, fakti është ndryshe sepse rezultatet do t’i kenë më të dobëta thuasje zero sepse vetëdijësimi qytetar matan lumit ibër është për 80-85% më i lartë ngase ka qenë para 24 shtatorit”, tha Dashevci.

    Policia ka konfirmoi për ATV-në, se tashmë është hapur rast për nxitje të urrejtjes, ndërsa ende nuk ka të dyshuar apo të arrestuar.

    Grafitet u bënë në kohën kur hyri në fuqi rregullorja e Bankës Qendrore, që nuk e njeh dinarin si valutë për pagesa, gjë e cila ka ngjallur reagime të serbëve lokal, por edhe faktorit ndërkombëtar.

    Brigada e Veriut dhe Mbrojtja Civile janë shpallur organizata terroriste nga autoritetet në Prishtinë, në fund të qershorit të vitit të kaluar, pas protestave të dhunshme kundër kryetarëve shqiptarë, në të cilat u lënduan dhjetra ushtarë të KFOR-it.

    Më shumë detaje i gjeni në Edicionin Qendror të lajmeve në videon më poshtë:

  • Gjithçka në euro, Kurti u drejtohet serbëve në gjuhën serbe

    Gjithçka në euro, Kurti u drejtohet serbëve në gjuhën serbe

    Ashtu sikurse kishte paralajmëruar në seancën e KS të OKB-së në Nju Jork, kryeministri i Kosovës Albin Kurti u është drejtuar sot komunitetit serb përmes një videoje në Facebook në gjuhën serbe ku sqaron rregulloren e BQK-së për euron si valutë të vetme për pagesë nga 1 shkurti dhe heqjen e dinarit.

    Ai ka bërë me dije qytetarët serbët se Kosova nuk ka ndaluar dinarin, ashtu siç nuk ka ndaluar as valutat e tjera përfshirë dollarin, funtën dhe frangun zviceran, dhe se rregullorja e BQK-së nuk e ndalon Serbinë të ndihmojë financiarisht qytetarët e komunitetit serb në Kosovë.

    Ai ka theksuar se viteve të fundit kanë bërë të pamundurën për të luftuar krimin dhe për të vendosur rendin e ligjin, duke respektuar të drejtat e njeriut dhe qytetarit, e cila u njoh edhe nga Freedom House, Transparency International dhe World Justice Project.

    Kurti tha se Kosova është shtet multietnik, e angazhuar për paqe e prosperitet, andaj nevojitet një besim ndëretnik për të luftuar dukuritë si krimet, urrejtja fetare, racore e etnike, ndarja e shoqërisë, lajmet e rreme për qëllime nacionaliste e shoviniste.

    Për më tepër, Kurti ua ka përkujtuar serbëve të Kosovës propagandën të cilën po e shpërndanë Beogradi me në krye presidentin Aleksandar Vuçiq kinse për përndjekje sistematike ndaj këtij komuniteti, duke thënë se e gjitha kjo është një fushatë e ngritur mbi baza të rreme.

    Ai ka theksuar se vendosja e valutës euro si mjet i vetëm pagese ndalon pastrimin e parave dhe pasurimin ilegal me qëllim të financimit të terroristëve dhe pengimin e paqes, andaj vendosja e shtetit ligjor është e pashmangshme.

    Kurti ka folur edhe për skemat e asistencës financiare dhe ndihmës sociale për familjet në nevojë, gratë lehona dhe nënat me fëmijë, për të cilën tha se do të rritet në të ardhmen në përputhje me rritjen ekonomike dhe planifikimin buxhetor.

    Ai ka përkujtuar se çdo muaj, më shumë se 33.000 pjesëtarë të komunitetit serb marrin pensione nga Kosova, 2.205 familje marrin ndihmë sociale, 4.244 familje marrin ndihmë për fëmijë dhe 1.372 familje marrin ndihmë për gratë lehona dhe nënat me fëmijë.

  • Komentet e Trumpit për NATO-n priten me kritika nga perëndimi

    Komentet e Trumpit për NATO-n priten me kritika nga perëndimi

    Zyrtarë të lartë të Perëndimit e kanë kritikuar ish-presidentin amerikan, Donald Trump, të dielën, pasi ai ka sugjeruar se Shtetet e Bashkuara mund të mos i mbrojnë aleatët e NATO-s – që nuk janë duke ndarë mjaftueshëm para në mbrojtje – nga një pushtim potencial prej Rusisë.

    “Çdo sugjerim që aleatët nuk do të mbrojnë njëri-tjetrin, dëmton sigurinë e të gjithëve, përfshirë atë të SHBA-së, dhe i rrezikon ushtarët amerikanë dhe ata evropianë”, ka thënë Sekretari i Përgjithshëm i NATO-s, Jens Stoltenberg, përmes një deklarate me shkrim.

    “Çdo sulm ndaj NATO-s do të rezultojë me një përgjigje të përbashkët dhe të fuqishme”, ka thënë ai.

    Trump ka gjasa të fitojë nominimin e republikanëve në garën presidenciale, që do të mbahet në nëntor të këtij viti.

    Ministri polak i Mbrojtjes, Wladyslaw Kosiniak-Kamysz, ka reaguar, po ashtu.

    “Motoja e NATO-s është ‘një për të gjithë, të gjithë për një’, dhe ky është përkushtim konkret. Minimi i kredibilitetit të shteteve aleate nënkupton dobësim të gjithë NATO-s”, ka thënë ai në X, platformë e njohur më parë si Twitter.

    “Asnjë lloj i fushatës nuk është arsyetim për të luajtur me sigurinë e aleancës”.

    Ministria e Jashtme e Gjermanisë ka postuar një mesazh “Një për të gjithë, të gjithë për një’ me thirrjet “Së bashku më të fortë”, gjithashtu, në X, pas komenteve të Trumpit.

    Presidenti i Këshillit Evropian, Charles Michel ka thënë se “deklaratat për sigurinë e NATO-s dhe Aktin 5, u shërbejnë vetëm interesave të [presidentit rus, Vladimir] Putin”.

    Artikulli 5 i traktatit të NATO-s përcakton se një sulm i armatosur kundër një anëtari të aleancës konsiderohet sulm kundër të gjitha vendeve dhe nxit mbrojtje të përbashkët.

    Trump, duke e rikujtuar një takim me liderë të NATO-s, gjatë një marshi politik në Karolinën e Jugut, e ka cituar presidentin e një “shteti të madh”, që nuk ia ka përmendur emrin, duke e pyetur atë, “Zotëri, nëse ne nuk paguajmë, dhe sulmohemi nga Rusia, a do të na mbroni?”

    “I kam thënë: ‘Nuk keni paguar? Jeni delikuent?’ Ai ka thënë: ‘Po, kështu ka ndodhur’. Jo, nuk do t’ju mbroj juve. Në fakt do t’i inkurajoja ata të bëjnë çfarë të duan. Duhet të paguani”.

    “Ne e kemi dëgjuar këtë më parë… asgjë e re”, ka thënë Komisionari i Bashkimit Evropian për Treg të Brendshëm, Thierry Breton, në një intervistë për televizionin francez LCI.

    “Ai ndoshta ka probleme me kujtesën, mirëpo në fakt ka qenë një presidente, jo një shtet, por Bashkimi Evropian”, ka thënë Breton, duke iu referuar një bisede që ka pasur presidentja e Komisionit Evropian, Ursula von der Leyen me Trumpin, më 2020.

    Zëdhënësi i Shtëpisë së Bardhë, Andrew Bates, i pyetur për komentet e Trumpit, ka thënë se “inkurajimi i pushtimit të aleatëve tanë të ngushtë nga regjimet vrasëse, është i tmerrshëm dhe i pavarur – e rrezikon sigurinë kombëtare amerikane, stabilitetin global dhe ekonominë në shtëpinë tonë”.

    Të 31 vendet anëtare të NATO-s janë pajtuar që të ndajnë të paktën 2 për qind të Bruto Prodhimit të Brendshëm në fushën e mbrojtjes, mirëpo të dhënat e NATO-s kanë treguar e vetëm 11 prej tyre janë duke vepruar ashtu.

  • Publikohet logoja zyrtare për shënimin e përvjetorit të pavarësisë së Kosovës

    Publikohet logoja zyrtare për shënimin e përvjetorit të pavarësisë së Kosovës

    Qeveria e Kosovës ka bërë tashmë publike logon me të cilën pritet të shënohet përvjetori i 16-të i pavarësisë së shtetit.

    “Kosovë, ne të dalim zot!”, mbishkruhet në logon e pavarësisë, të cilën qeveria e ka shpërndarë në faqen zyrtare në ‘Facebook’.

    Qeveria ka ndarë edhe agjendën për 17 shkurt, ku pritet të ngrihet flamuri i Kosovës fillimisht, homazhe tek ish-presidenti Ibrahim Rugova, tek komandanti legjendar Adem Jashari.

    Po ashtu, nga ora 12:00 do të mbahet një seancë solemne në nder të përvjetorit të pavarësisë së Kosovës.

    Qeveria ka ndarë agjendën edhe për nder të 26-vjetorit të Epopesë së UÇK-së (5,6 dhe 7 mars) dhe 25-vjetorit të çlirimit të Kosovës (12 qershor).

  • Përfundon Festivali i Këngës në San Remo, ja kush është përfaqësuesja e Italisë në Eurovision

    Përfundon Festivali i Këngës në San Remo, ja kush është përfaqësuesja e Italisë në Eurovision

    Angelina Mango u shpall fituese e Festivalit të 74-të të Këngës në San Remo herët të dielën, duke triumfuar me një këngë të quajtur – La Noia (Mërzia).

    22-vjeçarja, vajza e kantautorit Giuseppe Mango, i cili vdiq në moshën 60-vjeçare në vitin 2014, është artistja e parë femër që mbizotëron në festivalin shumë të dashur që kur Arisa fitoi me Controvento 10 vjet më parë.

    Kjo fitore i jep asaj të drejtën për të përfaqësuar Italinë në Eurovision Song Contest.

  • Ish-futbollisti i Zvicrës: Shaqiri dhe Xhaka mund të mos shkojnë në Beograd për t’u përballur me Serbinë

    Ish-futbollisti i Zvicrës: Shaqiri dhe Xhaka mund të mos shkojnë në Beograd për t’u përballur me Serbinë

    Ish-futbollisti i kombëtares së Zvicrës, Milaim Rama ka qenë i ftuar në emisionin ‘A PLAY’ në ATV.

    Rama përmes një lidhje skype nga Zvicra e ka komentuar shortin e kombëtares helvetike.

    Ai ka deklaruar që në grupin ku ndodhet Zvicra, favorite është kombëtarja e Spanjës, por Rama ka thënë që edhe ndeshja me Serbinë për Zvicrën nuk pritet me qenë e lehtë, pasi që sipas tij pritja nga serbet sidomos për lojtarët shqiptarë që aktivizohen te kombëtarja e Zvicrës nuk do të jetë e mirë.

    ‘Unë them që Shaqiri dhe Xhaka mund të mos shkojnë në Beograd për t’u përballur me Serbinë pasi dihet se çfarë atmosfere te keqe krijojnë tifozët serb. Ndoshta Zvicra nuk i merr fare me veti, njëjtë siç kishte vepruar Liverpool para disa viteve kur nuk e kishte marrë me vete Shaqirin në Beograd në një ndeshje përballë Zvezdës’ tha Rama

    Intervistën e plotë të Milaim Ramës ku flet për kombëtaren  Kosovës dhe Zvicrës mund ta ndiqni më poshtë.

  • Rrahmani, Asllani apo Hyseni cili është pasardhësi i Vedat Muriqit te Kosova, ja çfarë thotë ish-sulmuesi i njohur Rexha

    Rrahmani, Asllani apo Hyseni cili është pasardhësi i Vedat Muriqit te Kosova, ja çfarë thotë ish-sulmuesi i njohur Rexha

    Ish sulmuesi i disa skuadrave në Kosovë, Kastriot Rexha i ftuar në emisionin ‘A PLAY’ në ATV, ka folur për kundërshtarët e kombëtares së Kosovës në Ligën e Kombëve.

    Rexha ka vlerësuar lartë Rumaninë, por ka thënë që Kosova i ka gjitha kualitetet për të mposhtur këtë kombëtare.

    Rexha po ashtu ka treguar se Albion Rrahmani është sulmuesi i cili mund të jetë pasardhës i Vedat Muriqit të kombëtarja e Kosovës.

    ‘Albion Rrahmani është sulmues i cili më pëlqen shumë. Rrahmani po tregon kualitetin e tij edhe te Rapidi. Hyseni është e ardhmja poashtu, por unë them që Albioni është futbollist i cili mund të zëvendësojë Murqin’ tha Rexha.

    Kur jemi te Albion Rrahmani, ai deri me tani këtë sezon ka shënuar tetë gola në 10 takime në elitën e futbollit rumun.

  • Shkrimi jo i mirë i mjekëve, farmacisti: I thërras dhe i pyes çfarë ke shkruar

    Shkrimi jo i mirë i mjekëve, farmacisti: I thërras dhe i pyes çfarë ke shkruar

    Përshkrimi i barnave nga mjekët në mënyrë elektronike po konsiderohet si nevojë e domosdoshme. Kjo meqë vlerësohet se lehtëson barrën e pacientëve, punën e farmacistëve dhe të vetë doktorëve. Të njëjtit thonë për KosovaPress, se digjitalizimi i recetës mjekësore do të ndikonte në zvogëlimin e mundësisë që pacientëve t’u jepen terapi të gabuara, si pasojë e shkrimit jo të mirë me dorë.

    Zëvendësdrejtori i Qendrave Kryesore të Mjekësisë Familjare (QKMF-ve) në Prishtinë, Bujar Gashi tha se funksionimi i mangët i Sistemit Informativ Shëndetësor, po shkakton vështirësi të vazhdueshme, duke përfshirë edhe ngecjen e procesit të digjitalizimit të recetës mjekësore.

    Gashi për KosovaPress potencoi se ka disa vite që ekziston ky problem, për çka shtoi se rënia e sistemit u shkakton telashe infermierëve e mjekëve për ta kryer punën e tyre.

    Ai shtoi se janë bërë mbi gjashtë muaj prej kur në të gjitha QKMF-të në Prishtinë, janë tërhequr printerët nga kompania përkatëse, kështu duke u pamundësuar doktorëve përshkrimin e terapive në mënyrë elektronike.

    Se digjitalizimi i recetës mjekësore është i nevojshëm e thotë edhe farmacisti përgjegjës në një nga barnatoret në kryeqytet, Arbnor Alidema, i cili thotë për KosovaPress, tregon se shumë shpesh detyrohen që të thirrin mjekun që ka përshkruar terapinë për ta pyetur rreth saj, ngase nuk mund ta kuptojnë shkrimin.

    Ai shton se një gjë e tillë do të lehtësonte edhe punën e farmacistëve.

    Njëjtë mendon edhe kryetari i Shoqatës për të Drejtat e Pacientëve, Besim Kodra, derisa thotë se shkruarja e recetës mjekësore në mënyrë klasike i dëmton pacientët. Sipas tij, jo gjithmonë ato që shkruhen nga mjekët, jepen nga farmacistët, si shkak i shkrimit jo të kuptueshëm nga këta të fundit.

    Ndërkaq, qytetarët thonë se shkrimi i recetës mjekësore në mënyrë elektronike është dashur të bëhet që moti. Sipas tyre, kjo do të ndikonte në minimizimin e ngatërrimit të ilaçit, si shkas i dorëshkrimit jo të mirë.

    Qytetari Gani Gashi thotë për KosovaPress, se në këtë botë të digjitalizuar, kjo gjë do të duhej të rregullohej kohë më parë. Sipas tij, si pasojë e “shkarravitjes” së mjekëve në receta mjekësore, pacientët mund të dëmtohen.

    Edhe Haki Kasumi vlerëson se duhet të ndryshojë mënyra klasike e shkrimit nga mjekët, për çka thotë se kjo do të zvogëlonte gabimet e mundshme.

  • Federatat i gëzohen liberalizimit: Shpëtojmë mijëra euro

    Federatat i gëzohen liberalizimit: Shpëtojmë mijëra euro

    Liberalizimi i vizave do të krijojë lehtësira të mëdha edhe për sportistët dhe federatat sportive në Kosovë.

    Angazhimet në garat ndërkombëtare krijonin shpenzime të mëdha për federatat për shkak të obligimit për t’u pajisur me viza, kosto e cila ka shkuar deri në dhjetëra mijëra euro.

    Sekretari i Federatës së Karatesë, Nazmi Gashi ka thënë se heqja e vizave lehtëson barrën financiare të federatës pasi që një pjesë e madhe e buxhetit duhet të shpenzohej pikërisht për pajisjen me viza.

    Ndërsa, Sekretari i Federatës së Hendbollit, Izet Gjinovci ka thënë për KosovaPress, se kjo federata shpenzonte rreth 40 mijë euro në vit vetëm për pajisjen e sportistëve me viza.

    Shpenzimet e tilla preknin fuqishëm edhe Federatën e Volejbollit. Në çdo garë ndërkombëtare që volejbollistët merrnin pjesë, FVK duhej të shpenzonte mbi 15 mijë euro në vit.

    Karateisti Elhami Shabani ka thënë se në shumë raste shpenzimet për viza i ka paguar vet dhe se kjo ishte një maltretim i madh për të.

    Edhe Kushtrim Krasniqi, nga Komiteti Olimpik i Kosovës thotë për KosovaPress, se pajisja me viza i penalizonte tej mase federatat dhe sportistët në aspektin financiar.

    “Përveç kohës që na është marrë për ta kompletuar dokumentacionet e shumta që është dashur vazhdimisht t’i kemi, na ka marrë kohë edhe na ka penalizuar edhe me shpenzime që është dashur të paguhen për secilin sportist shpenzimet e vizës. Madje, shpeshherë është dashur që të shkojmë edhe në Shkup në mungesë të ambasadës në Kosovë të shkojmë edhe në Shkup apo vende të tjera për të marr dhe aplikuar për vizë, sidomos për ato vende që nuk e njohin Kosovës, por edhe vendeve jashtë Evropës”, u shpreh Krasniqi.

    Drejtuesit e federatave kanë thënë se këto mjete tani e tutje do të orientohen në investime dhe përkrahje edhe më të madhe për sportistët e rinj.