Blog

Shpërndarje të mbeturinave po ndodhin në gjithë Prishtinën për shkak të erërave të forta. Qytetarët kanë dërguar një video nga rruga B, ku vërehet shpërndarja e mbeturinave nga kontejnerët dhe rreth tyre, por njëkohësisht shihet fuqia që kanë erërat në këto momente.

Gjithashtu, tek komuna e re, në lagjen “Arbëria”, në kryeqytet, vërehet se si janë shpërndarë mbeturinat, madje erërat lëvizin edhe semaforët.

Komuna e Prishtinës ka paralajmëruar qytetarët se sot do të ketë erëra të forta nga 20 deri në 80 km/h, prej të cilave do të ketë edhe dëme materiale. /kp

Myftiu i Kosovës, Naim Tërnava, ka dalë në terren për të parë punimet rreth ndërtimit të xhamisë qendrore në Prishtinë.

Në njoftimin e Bashkësisë Islame të Kosovës (BIK) është thënë se është betonuar një pjesë e pllakës së xhamisë.

“Kryetari i Bashkësisë Islame të Kosovës, myftiu Naim ef. Tërnava, ka parë nga afër punimet në ndërtimin e xhamisë qendrore në Prishtinë, ku edhe është betonuar një pjesë e pllakës së kësaj xhamie. Ai u njoh për së afërmi me ecurinë e punimeve në ndërtimin e kësaj xhamie. Gjatë kësaj vizite, bashkë me myftiun Tërnava ishte edhe atasheu për Çështje Fetare pranë Ambasadës së Turqisë, z. Bunjamin Albayrak”, ka njoftuar BIK-u.

Inspektoratit Policor të Kosovës ka publikuar raportin vjetor të punës për vitin 2023.

Sipas këtij raporti, Departamenti i Hetimeve në kuadër të IPK-së, vitin e kaluar ka hetuar 156 punonjës policorë dhe 22 qytetarë, shprehur në përqindje 1.8% e numrit të përgjithshëm të punonjësve policorë që janë hetuar nën dyshimin se janë përfshirë në veprimtari penale.

“IPK-ja në ketë periudhe raportuese, ka realizuar gjithsej 35 arrestime (21 punonjës të Policisë së Kosovës dhe 14 qytetarë) nën dyshimin e arsyeshëm se kanë qenë të përfshirë në veprimtari penale si dhe kanë rekomanduar suspendimin e 71 punonjësve policorë”, thuhet në raportin e IPK-së.

2023 konsiderohet i suksesshëm për Drejtorinë e Hetimeve në IPK, bazuar në të dhënat lidhur me numrin e rasteve të trajtuara, numrin e kallëzimeve penale, numrin e të arrestuarve, të suspenduarve etj.

“Në vitin 2023, DH-ja ka pranuar 540 raste përmes DMA-së në kuadër të IPK-së, ndërsa 334 raste kanë vazhduar trajtimin nga vitet paraprake në vitin 2023, kurse D.H pas zhvillimit të hetimeve penale 2 raste i ka iniciuar për hetim disiplinore. D.H ka trajtuar gjithsej 876 raste, duke përfshirë rastet e bartura nga vitet paraprake si dhe rastet e pranuara në këtë vit”, thuhet në raportin e IPK-së.

Policia e Kosovës ka gjithsej 8826 punonjës, nga të cilët 7958 janë zyrtarë policorë me grada të ndryshme, ndërsa 868 janë personel civil pa autorizime policore.

Gjatë vitit 2023 sipas raportit të IPK-së, janë hetuar 2 major, 3 kapiten të policisë, 7 toger, 15 rreshter, 120 zyrtarë policorë, 1 kadet dhe 8 shërbyes civil.

Gjatë vitit 2023 janë hetuar 107 punonjës policor të angazhuar në drejtoritë rajonale, ku DRP – Prishtina prinë nga të gjitha drejtoritë me numrin më madh të hetuarve nga radhët e saj, duke pasur edhe numrin më të madh të punonjësve të shpërndarë në stacione policore.

Kryeministri i Shqipërisë, Edi Rama, tha se në mbledhjen e sotme të Asamblesë së Partisë Socialiste do të kryhet një analizë dhe riorganizim i kësaj “familjeje politike”.

“Kjo është një mbledhje pune, raportimesh, diskutimesh në lidhje me hapat e tjerë që do të ndiqen në funksion të objektivit për të riorganizuar tërësisht Partinë Socialiste dhe për ta bërë gati për fitoren e radhës”, tha Rama.

Ai theksoi më tej se këtë të diel nuk do ketë ndryshime në radhët e partisë, por lëvizje në të mirë të punës së përbashkët.

“Sot nuk kemi asnjë plan për të bërë ndryshime, jemi për të bërë një analizë dhe për të ndërmarrë veprime të tjera. Fjala ndëshkim nuk i shkon organizimit të një familjeje politike, riorganizim nënkupton lëvizje në të mirë të bërjes së punës”, përfundoi Rama.

Në fokus të kësaj mbledhjeje do të jetë gjendja e çdo baze dhe strukturave të PS-së, ndërsa pritet të mbajë një fjalim Rama, por ajo do të jetë me dyer të mbyllura drejtuar vetëm asamblistëve. Pritet që Rama të ketë edhe mesazhe politike krahas porosive.

Sot në katër komunat veriore të Kosovës janë parë grafite “Kur të kthehet ushtria në Kosovë… jeton Brigada e Veriut”.

Pas kësaj ka reaguar njohësi i çështjeve të sigurisë, Agim Musliu.

Musliu përmes rrjetit social Facebook, ka shkruar se grafite të ngjashme janë shkruar edhe para sulmit të 24 shtatorit në Banjskë.

“Gjersa, krejt Evropa dhe SHBA janë këtë vit në zgjedhje, e ndoshta edhe Kosova, Serbia tashmë s’e ka këtë hall, sepse i ka vjedhë zgjedhjet. Putini po siguron mandat jetësor! Perëndimi në gjumë, e Kosova ku?”, ka shkruar Musliu.

Postimi i plotë:

Qeveria e Republikës së Serbisë, me konkretisht Ministria e të Drejtave të Njeriut dhe të Pakicave e Serbisë ka reduktuar me mbi 1 milion dinarë buxhetin për Këshillit Kombëtar Shqiptarë në Luginën e Preshevës për vitin 2024.

Ish-kryetari i Këshillit Kombëtar të Shqiptarëve në Serbi, Ragmi Mustafi se shqiptarët në Serbi janë të diskriminuar.

Ai i bëri thirrje Ministrisë së Jashtme të Shqipërisë, që ashtu siç është e shkruar në Kushtetutë, të kujdeset për shqiptarët jashtë trojeve duke krijuar një fond të posaçëm për shqiptarët e Luginës.

“Ne konsiderojmë që Ministria e Punëve të Jashtme duhet të përkujdeset, në bazë të kushtetutës, dhe të përmbushë nevojat për t’u kujdesur për shqiptarët jashtë trojeve, në veçanti ata të Preshevës, që janë të diskriminuar. Shqipëria në anën tjetër duhet të krijojë fondin e nevojshëm, siç ka krijuar republika e Kosovës për të ndihmuar shqiptarët e Luginës së Preshevës”, tha Mustafi.

Rreth tre milionë euro ishin paraparë që t’u dedikohen zyrtarëve policorë.

Por, dy tenderët për furnizim me uniforma operacionale dhe uniforma për detyra taktike janë anuluar nga Policia e Kosovës në muajin janar me arsyetimin se asnjëra ofertë nuk ka qenë e përgjegjshme.

Kështu, janë bërë afro tri vite që pjesëtarët e kësaj organizate sigurie nuk janë pajisur me uniforma zyrtare.

Për këtë çështje, tëvë1 ka adresuar pyetje në këtë institucion, por që të njëjtit nuk i janë përgjigjur interesimit të televizionit.

E mungesa e kushteve të punës, sipas njohësve të fushës së sigurisë është shqetësuese.

Hartuesi i Ligjit për Policinë, Nuredin Ibishi thekson se deri te këto probleme kanë ardhur për shkak të procedurave në Organin Shqyrtues të Prokurimit.

Teksa shton se për shkak të natyrës së veçantë të punës për policët, procedura të tilla të tejkalohen.

Kurse, ish.zv-ministri i Punëve të Brendshme, Valdet Hoxha vlerëson se këto ndikojnë në kryerjen e detyrave zyrtare por edhe paraqet imazh negativ të këtij institucioni.

Ndryshe, gjatë vitit të kaluar pjesëtarë të Njësive Speciale e njësi tjera të Policisë kishin protestuar dy herë para objekti të Qeverisë duke kërkuar përmirësim të kushteve të punës.

Kryetari i Komisionit për Buxhet, Punë dhe Transfere, Armend Muja, ka deklaruar se shkalla e investimeve kapitale për vitin 2023 ka arritur në rreth 70 për qind, raporton EO.

Pavarësisht se nga rreth 820 milionë eurot e ndara për projekte kapitale në Kosovë për vitin 2023, u shpenzuan vetëm 560 milionë euro, Muja thotë që janë investimet më të larta kapitale të ndodhura ndonjëherë në Kosovë.

Muja thotë se viti 2024 do të jetë vit i investimeve në ujësjellës e vit i investimeve në projekte të energjisë së ripertritshme.

Deputeti i VV-së thotë se ngecja e investimeve kapitale lidhet edhe me komunat, pasi sipas tij, komunat janë një prej implementuesve kryesor të zbatimit të projekteve kapitale.

Sipas tij, një nga institucionet që për nga vlera monetare ka ngecur më shumë në nivelin lokal është Komuna e Prishtinës, për të cilën thotë se në vitin 2023 ka pasur një bilanc të pashpenzuar prej 44 milionë eurosh.

“Ky vit me terma absolut vlerë monetare viti 2023 ka pasur një shkallë të realizimit dikund 68 / 69 për qind aty duhet të jetë ose 70% në bazë të raportimeve. Do presim saktësisht sa ka qenë po e rëndësishme është se me terma absolut ka qenë vlera më e lart e investimeve kapitale që është bërë ndonjëherë në Kosovë. Vetëm një vit tjetër ka pas dikund 537 milionë në vitin 2014 kjo është vlera më e lart që është zbatuar kjo është e vërteta. E dyta është çështja se ku po ngecin investimet kapitale, kjo çështje do të shtrohet mirëpo një çështje që duhet ta kemi parasysh është kjo, e para është komunat janë një prej implementuesve kryesor të zbatimit të projekteve kapitale”.

“Këtu duhet ta nënvizojë ngecjen e komunës së Prishtinës. Komuna e Prishtinës vitin e kaluar ka pasur një bilanc të pashpenzuar prej 52 milionë euro këtë vit e ka një bilanc të pashpenzuar prej 44 milionë euro, d.m.th një nga institucionet për nga vlera monetare që ngec më shumë në nivelin lokal është komuna e Prishtinës”, thotë ai.

Muja thotë se si qeveri kanë trashëguar borxhe të mëdha që u është dashur t’i paguajnë, e që pavarësisht kësaj ai thotë se viti i kaluar ka qenë një vit relativisht i mirë sa i përket investimeve kapitale.

“Pastaj projektet e vjetra të cilat në momentin ky është bërë planifikimi nuk e ka pasur elaboratin e shpronësimit, pra do të thotë në rast se ti investon në një projekt kapital për rrugë në shumë raste është parapa financim për rrugë për shpronësimin e asaj rruge sepse traseja do të ketë një, nuk mund të vendoset në prona private. Dhe kemi trashegu një borxh prej 185 milionë euro nga shpronësimet, atë e kemi la një pjesë të madhe në dy vitet e fundit. E treta që është e rëndësishme ka pas fatura të papaguara ne kemi trashëguar diku rreth 300 milionë euro fatura të papaguara nga e kaluara dhe të gjitha këto përfshirë edhe ngritjen e çmimeve në vitin 2022 ka pasur një rritje të çmimeve të materialit ndërtimor dhe pastaj ne kemi pas ndërhy përmes ligjit për financimin ose deri 20 për qind kompensim për pronë publike për t’i mundësua përshpejtimin e investimeve kapitale dhe kjo ka qenë. Unë besoj se ky vit është mirë ka hapësirë ende që të përshpejtohet zbatimi i projekteve kapitale por që mendoj që një vit ka qenë relativisht i mirë sa i përket investimeve kapitale”, tha ai.

Deputeti Muja ka thënë se qeveria ka bërë investime të mëdha kapitale kanë qenë rrugë, hekurudha, impiante të ujërave të zeza.

Sipas tij, qeveria ka bërë investime të mëdha në histori në ndërmarrjen KEK.

“A din tash po du me tregu investimet e mëdhaja kapitale kanë qenë rrugë, hekurudha, impiante të ujërave të zeza këto kanë qenë kryesisht këto kanë qenë investime të larta kapitale edhe pastaj investime kapitale të cilat nuk hynë në kuadër të buxhetit të shtetit por rregullohen nga zyra e rregullatorit të energjisë të zëmë për KEK-un, ose për ndërmarrje tjera publike që hynë në domenin e rregullatorëve, ato nuk hynë në kuadër të buxhetit të shtetit mirëpo sa i përket investimeve kapitale si tërësi unë mendoj që nëse e shikoni plus me investimet kapitale në KEK mendoj që ka pas investime kapitale më të mëdhaja që janë bo në histori”, deklaroi Muja.

Ndërsa për autostradën Prishtinë-Podujevë, dhe atë për Tetovë, Muja është i bindur se do të përfundojnë këtë vit. Ndërsa pret të përfundojnë punimet edhe në hekurudhën nga Hani i Elezit për në Mitrovicë.

“… sa i përket rrugëve tjera që janë akset kryesore nacionale unë besoj se ato përgjithësisht nga dinamika e punëve vlerësoj se këtë vit do të përfundohen pjesa më e madhe e tyre, rruga Prishtinë-Gjilan unë besoj se do të përfundoj, po ashtu rruga Prishtinë-Podujevë, po ashtu do të përfundoj hekurudha që është nga Hani i Elezit deri në Mitrovicë është duke ec me ritme shumë të shpejta është një nga akset kryesore më të rëndësishme të transporteve rrugore edhe për ekonominë e vendit po ashtu është duke ecur me hapa të shpejt edhe është me projekt ka shku shumë afër Mitrovicës tash. Rruga Prishtinë-Mitrovicë po ashtu do të fillojë me ritme të shpejta këtë vit dhe unë besoj se do të përfundojë edhe ju i pat njoftimet sa i përket rrugës Prishtinë-Pejë edhe rrugës Prishtinë-Tetovë, mendoj se janë në fazën finale të tenderimit dhe shpronësimit unë besoj që deri në fund të këtij viti dhe në fillim të vitit të ardhshëm do zbatohen disa nga projektet më të mëdha që janë bërë që nga shpallja e Pavarësisë. Është e vërtetë se në të kaluarën nëse i pyet qeveritë e kaluara sepse ne i kemi regjistrat tonë thonë se kanë bërë investime kapitale”, u shpreh ai.

Muja e ka quajtur 2024-ën si vit i investimeve në ujësjellës e vit i investimeve në projekte të energjisë së ripertritshme.

“Por është e rëndësishme që të rimendohet edhe njëherë se natyra e investimeve kapitale tash do të ndryshojë sepse kemi nevojë për diga kemi nevojë për investime në ujësjellës. Ky vit do të jetë vit i ujësjellësve ta zëmë, do të jetë vit i hekurudhave po ashtu krahas atyre nacionale dhe do të jetë vit i investimeve në projekte të energjisë së ripertritshme dhe rehabilitimit të Kosovës A dhe Kosovës B te KEK-u. Mendoj se këto janë investime të rëndësishme për ekonominë e vendit dhe ky është fokusi. Tash ne nuk është së kemi dhënë një premtim të madh sa i përket asfaltimeve, premtimet tona kanë qenë që pas përfundimit të akseve dhe mirëmbajtjes së tyre orientimet tona do të fokusohen aty ku ka vlerë të shtuar për ekonominë e vendit dhe unë besoj që ne duhet të mësohemi gradualisht me këtë”, tha ai.