Blog

Qeveria Kurti ka hyrë në vitin e fundit të këtij mandati, dhe derisa u premtuan reforma rrënjësore dhe u krijuan pritshmëri të larta, opozita po e kritikon Qeverinë për dështim.

Deputeti i Lidhjes Demokratike të Kosovës, Driton Selmanaj ka thënë për Ekonomia Online se fatkeqësisht janë vite të humbura për Kosovën në secilën sektor.

Ndërsa deputeti i Partisë Demokratike të Kosovës, Elmi Reqica ka deklaruar se Qeveria aktuale ka dështuar në të gjitha aspektet. Sipas tij në luftimin e krimit të organizuar, në raportet me miqtë ndërkombëtar, në marrëdhëniet ndërshqiptare shumë të tjera.

Deputeti i Lidhjes Demokratike të Kosovës, Driton Selmanaj ka theksuar se tash e tutje duhet të kemi shumë kujdes se kujt ia japim votën sepse po na humbin vitet.

“Fatkeqësisht janë katër vite po thuajse ose tri vite e ca të humbura për Kosovën, fatkeqësisht po them në secilën sektor, që njeriu prek sot qoftë në ekonomi, qoftë në arsim, qoftë në shëndetësi, qoftë në drejtësi, qoftë në drejtimin e infrastrukturës. Në çdo aspekt Kosova ka pasur stagnim total ose në fusha të caktuara edhe regres të madh, mos të flas për politikën e jashtme, që pothuajse Kosova nuk ka pasur fare politikë të jashtme. Prandaj për fatin e keq ashtu siç kemi thënë edhe në fillim që nuk duhet që njerëzit në Kosovë, votuesit të eksperimentojnë, sepse nëse mbani mend para tre vite e gjysmë njerëzit flisnin thonin hajt ta provojmë një ndryshim shteti nuk është arenë provash nuk është arenë eksperimentesh”.

“Do të kemi shumë kujdes se kujt ia japim votën sepse më pas humbin vite. Po them kështu sepse statistikisht kemi humbur tre vite e gjysmë me këtë qeveri aspektin e pasojave politike aspektin e pasojave të mëdha zhvillimit të këtij vendi janë pothuajse një dekadë sepse është ndal zhvillimi është ndal reforma në arsim reforma në shëndetësi, gjithçka është ndal dhe çka kemi ikje masive të njerëzve mungesë të shpresës për të jetuar këtë vend në  mungesë të investimeve të huaja. Mungesa, mungesa, mungesa…”, ka thënë Selmanaj.

Selmanaj mendon se kësaj qeverie po i vie fundi, por se ai ka një lutje për qytetarët që kurrë të mos e sjellin në pushtet një model dhe një logjikë të tillë qeverisjeje.

“Prandaj po them që rasti i kësaj Qeverie kur populistët vijnë në qeverisje duke folur fjalë më tepër se çka dëshiron populli dhe jo në fakt se çka ka kapacitet dhe mundësi që të bëj. Meqë është rasti i fundit ku njerëzit duhet ta kuptojnë që nuk bëhet shaka me shtetin duhet të kemi shumë kujdes njerëzit që i zgjedhim sepse më pas mund me vite të tana të ankohemi të vajtojmë ja çka i bëmë vetes ja çka i bëmë vetes. Mendoj që kësaj Qeveri mirë që po i vie fundi, por me një lutje me një kërkesë që kurrë një model i tillë një logjikë e tillë qeverisje mos të përsëritet për vendin. Në çdo përsëritje ose çdo reprizim të kësaj logjike qeverisje është edhe një dëm tjetër për Kosovën edhe një pasojë e madhe për Kosovën edhe një stagnim tjetër për Kosovën. Prandaj Kosova mendoj që është në një sahat ku duhet secili njeri të mendoj seriozisht për votën e tij në mënyrë që këto dëme që i janë sjell Kosovës tash e tri vite të ndalen dhe Kosova të merr një trajektore tjetër të zhvillimit të ecjes, konsolidimit në çdo sferë të jetës në Kosovë”, ka thënë tutje Selmanaj.

Ndërsa deputeti i Partisë Demokratike të Kosovës, Elmi Reqica ka thënë se Qeveria aktuale ka dështuar në të gjitha aspektet. Sipas tij në luftimin e krimit të organizuar, në raportet me miqtë ndërkombëtar,  në marrëdhëniet ndërshqiptare  shumë të tjera.

“Kjo Qeveri ka mbushur tri vite me 22 mars dhe realisht kanë kaluar edhe dy muaj dhe është kah fundi i mandatit të saj. Realisht unë nuk mund të gjej ndonjë pikë nga përpjekjet, programet dhe premtimet të cilat i ka realizuar kjo qeveri. Në të gjitha aspektet në luftimin e krimit të organizuar ka dështu në raportet me miqtë ndërkombëtar, ka dështu në marrëdhëniet ndërshqiptare, ka dështu në çështje sociale. Përveç strehimit dhe rregullimit të militantëve të tyre nëpër institucioneve të Kosovës, në asnjë segment tjetër nuk shoh asnjë rezultat asnjë sukses nga premtimet e bujshme në bazë të cilave i kanë marrë me 14 shkurt 50 për qind të votave”, ka thënë Reqica për Ekonomia Online.

Kryeministri i Republikës së Kosovës, Albin Kurti, priti në takim dje Ambasadorin e Mbretërisë së Bashkuar, Jonathan Hargreaves.

Rezultati i mbledhjes së djeshme në Këshillin e Evropës, çështjet bilaterale dhe rajonale si dhe projektet e përbashkëta ishin temë e diskutimit.

Kryeministri e falënderoi Mbretërinë e Bashkuar për qëndrimin e mbajtur dje gjatë takimit të komitetit të ministrave në mbështetje të anëtarësimit të Kosovës në Këshillin e Evropës. E falënderoi gjithashtu edhe për mbështetjen në projektet e përbashkëta, ku veçoi ndihmën për zgjerimin e projektit për verifikimin e diplomave për studentët nga komuniteti serb për qëllime punësimi në institucionet e Republikës së Kosovës.

Në takim u bisedua edhe për rezultatet e takimit e tretë të gjashtë vendeve të Ballkanit Perëndimor (BP6) për Planin e Rritjes që u zhvillua dje në Kotorr të Malit të Zi dhe Deklaratën e Përbashkët nga ky takim.

Kujtojmë që Deklarata e Përbashkët nga samiti i djeshëm në Kotor, mes tjerash bën thirrje për trajtim të barabartë në CEFTA, zbatim të plotë marrëveshjeve të arritura në Procesin e Berlinit si dhe kërkon që vendet e Ballkanit Perëndimor Gjashtë të bëhen pjesë e Autoritetit Kundër Pastrimit të Parave (AMLA) të Bashkimit Evropian për të rritur integritetin financiar dhe për të forcuar bashkëpunimin në luftën kundër krimit financiar.

Një burrë në Prizren, dyshohet se ka vdekur si pasojë e kontaktit me rrymën.

Rastin e ka konfirmuar Policia e Kosovës, përmes raportit 24-orësh, ku ka bërë me dije se tashmë ka nisur hetimet për rastin.

“HETIM I VDEKJES – Fsh. Hoq e Qytetit, Prizren 17.05.2024-19:30. Raportohet se viktima mashkull kosovar, ka humbur jetën si pasoj e kontaktit me rrymë. Vdekjen e viktimës e ka konstatuar ekipi mjekësor në vendim e ngjarjes. Me vendim të prokurorit trupi i pa jetë dërgohet në IML për obduksion”, thuhet në raport.

Moti sot parashihet të mbajë kryesisht me diell.

Temperaturat minimale do të lëvizin prej 9 deri në 13°C, ndërsa ato maksimale prej 25 deri në 28°C.

Vonë pasdite apo në mbrëmje, ka mundësi të ketë shtim të vranësirave, të cila mund të gjenerojnë ndonjë reshje të izoluar.

Pluhuri Saharian do të vazhdojë të jetë prezent.

Era do fryjë drejtimesh të ndryshme, e cila kohë pas kohe pritet të jetë e fuqishme, me shpejtësi prej 14-46 km/h.

Kryeministri i Kosovë, Albin Kurti ka uruar homologun e tij, Andrej Plenkoviq i cili fitoi edhe një mandat tjetër si kryeministër i Kroacisë.

Kroacia mori një qeveri të re të 16-të të kryesuar nga Andrej Plenkoviq i partisë Bashkimi Demokratik Kroat (HDZ).

Parlamenti kroat votoi për një qeveri të re me 79 vota, ndërsa një deputet abstenoi dhe 61 deputetë votuan kundër.

E kryeministri i vendit, Kurti me anë të një postimi në rrjetin social ‘X’ e uroi homologuën e tij, duke thënë se Kosova e vlerëson miqësinë me Kroacinë dhe mezi preisn që të vazhdojnë bashkëpunimin.

“Urime kryeministrit kroat @AndrejPlenkovic për mandatin tuaj të tretë dhe për qeverinë e sapoformuar. Kosova e vlerëson thellësisht miqësinë e saj me Kroacinë dhe ne mezi presim të vazhdojmë bashkëpunimin tonë të fuqishëm”, deklaroi ai.

Qeveria e re do të ketë 18 ministri dhe shtatë zëvendëskryeministra në vend të 16 sa ishin deri më tani.

Qeveria e re e Kroacisë u formua nga Bashkimi Demokratik Kroat (HDZ) dhe Lëvizja për Atdheun (PD), me mbështetjen e disa deputetëve të partive minoritare, por pa Partinë e Pavarur Demokratike Serbe (SDSS).

Kryediplomati i Maqedonisë së Veriut, Bujar Osmani, gjatë takimit të Komitetit të Ministrave në Strasburg, ka lobuar për anëtarësimin e Kosovës në Këshillin e Evropës.

Duke shtuar se Kosova e meriton të bëhet anëtare e Këshillit të Evropës, Osmani theksoi se anëtarësimi do të ndikojë edhe në stabilitetin e bashkëpunimit rajonal

“Është e një rëndësie të madhe që ne të mos i shmangemi përqafimit të anëtarëve të rinj që ndajnë vlerat dhe angazhimet tona. Kjo është arsyeja pse ne vazhdimisht e kemi mbështetur ofertën e Kosovës për anëtarësim në Këshillin e Evropës dhe mirëpresim opinionin që rekomandon Komitetin e Ministrave që ta ftojë Kosovën për anëtarësim në këtë organizatë”, tha Osmani.

“Besojmë se qytetarët e Kosovës meritojnë të mbrohen nga Konventa Evropiane për të Drejtat e Njeriut dhe instrumentet tjera dhe se anëtarësimi i hershëm do të lehtësojë vazhdimin e reformave dhe gjithashtu do të kontribuojë në stabilitetin dhe bashkëpunimin rajonal”

Kosova ka dështuar të jetë pjesë e agjendës së këtij takimi në Strasburg, për shkak të refuzimit nga Qeveria e Kosovës të kërkesave të Gjermanisë, Francës dhe Italisë për të ndërmarrë hapa konkretë për Asociacionin.

Ndërsa, gjatë ditës, kryesuesi aktual i Komitetit të Ministrave të Këshillit të Evropës, Dominique Hasler, ka bërë të ditur se ky komision është duke shqyrtuar se si të procedohet për pranimin e Kosovës në këtë organizatë.

Përgatiti: Arian Hajdaraj

Me 65 vota për, deputetët e miratuan në lexim të parë Projektligjin për të Drejtat Pronësore për Shtetasit e Huaj.

Nëse ai e kalon edhe fazën tjetër dhe bëhet ligj, më së shumti pritet t’u shërbejë qytetarëve të Luginës së Preshevës, të cilët do të kenë mundësi të bëhen titullarë të pronave, njësoj si çdo qytetar i Kosovës.

Kështu, ndryshimet ligjore konsiderohen të mirëseardhura në Luginë.

“Padyshim se është në vazhdën e ndryshimeve pozitive, duke ua siguruar të drejtën e plotë që të ndihen qytetarë të barabartë në Republikën e Kosovës”, tha kryetari i Komunës së Preshevës, Ragmi Mustafa.

“Nëse e shikojmë nga ana individuale, projektligji është mirë që është aprovuar, madje është me vonesë, sepse shumë shqiptarë të Luginës kanë blerë prona, por nuk kanë mundur t’i bartin në emrin e vet”, tha Nexhat Beluli tha Spektri TV.

Megjithatë, kjo situatë, sipas shoqërisë civile, e ka edhe një tjetër anë të medaljes.

“Nëse e shohim në aspektin nacional, veprimi nuk është i mirë sepse përshpejton shpërnguljen dhe zbrazjen e Luginës me shqiptarë, sepse do të nguten të blejnë prona në Kosovë duke i braktisur ato në Preshevë”, tha Beluli.

Por kështu nuk mendon kryetari i Preshevës, Ragmi Mustafa.

“Shqiptarët e Luginës nëse i kanë këto të drejta në Republikën e Kosovës, nuk d.m.th. se do të shpërngulen masivisht, por ata do kontribuojnë në zhvillimin ekonomik të Kosovës”, tha Mustafa.

Sipas regjistrimit të popullsisë më 2022, në Serbi jetojnë 61 mijë shqiptarë, shumica dërrmuese e të cilëve janë në Preshevë, Medvegjë e Bujanoc.