Mbikalimi në afërsi të shkollës fillore “Mihal Grameno” në Fushë-Kosovë, shfrytëzohet minimalisht nga qytetarët.
Mbeturinat e shumta dhe kundërmimi, janë disa nga arsyet që shtyjnë që banorët të mos e shfrytëzojnë atë.
“Ky mbikalim asnjëherë nuk është mbajtur i pastër nga përgjegjësit e nga komuna. Në Fushë Kosovë në përgjithësi nuk ka mirëmbajtje të mirë, ka shumë papastërti, andaj për këtë arsye nuk e përdori këtë mbikalim”, thotë një qytetar.
“Është e tmerrshme pasi që ky mbikalim përmban shumë mbeturina dhe është jo i pastër, ka erë të keqe, lë për të dëshiruar”, tha një tjetër qytetar.
Në këtë mbikalim, po ashtu, ka edhe mbishkrime e grafite banale.
Në lidhje me këtë situatë, Drejtoria e Shërbimeve Publike në Fushë-Kosovë thotë për ATV-në, se përgjegjëse për mirëmbajtjen e mbikalimit është Ministria e Infrastrukturës.
“Mirëmbajtja e rrugës M9 me të gjitha pjesët përcjellëse aty është nën kompetencën e Ministrisë së Infrastrukturës, përveç rrethi dhe pjesës nga rrethi nëpër qytet të vjetër e deri te stacioni i trenit ku janë kompetencë e Komunës së Fushë Kosovës”, thuhet në përgjigjen nga Komuna e Fushë-Kosovës.
Televizioni ka tentuar të marrë përgjigje në Ministrinë përkatëse në lidhje me këtë çështje, mirëpo deri në transmetimin e kësaj kronike, nuk ka pasur përgjigje.
Sidoqoftë, ky projekt është realizuar ndërmjet Komunës së Fushë-Kosovës, në bashkëpunim me Fondin e Zhvillimit të Komunitetit dhe Bankën Botërore, i cili ka kushtuar afro 104 mijë euro. Pas përfundimit të tij, përgjegjësia për mirëmbajtjen e tij ka kaluar nën kompetencën e Ministrisë së Infrastrukturës.
Me qëllim lehtësimin e qasjes së qytetarëve në shërbimet publike komunale, përmes platformës shtetërore “E-Kosova”, Ministria e Administrimit të Pushtetit Lokal të premten lansoi platformën “E-Komunat”.
Sipas kryeministrit Albin Kurti, përmes kësaj strategjie qytetarët do të marrin shërbime më të mira dhe do të jenë më të informuar për zhvillimet në komunat e tyre.
“E kur flasim për shërbime, qëllimi nuk është vetëm digjitalizimi, por shërbimet duhet të ridizajnohen që ta kenë në fokus qytetarin. Parimi themelor gjatë ofrimit të shërbimeve është ai i gjithëpërfshirjes. Duhet të sigurohemi që asnjë qytetarë të mos mbetet mbrapa. Ne jemi të përkushtuar që ky proces transformues të jetë edhe i sigurt”, tha Kurti.
Ndërkaq, Ministri i Administrimit të Pushtetit Lokal, Elbert Krasniqi, shtoi se përmes kësaj platforme do të rritet interaksioni mes qytetarëve dhe organeve komunale.
“Disa nga shërbimet që planifikohen në fazën e parë janë: Transmetimi i mbledhjeve të asambleve komunale, raportimi i problemeve në komunat përkatëse, informacionet mbi komunat, qasja te pasuria e zyrtarëve komunalë, inicimi dhe pjesëmarrja në debatet publike. Përmes këtyre shërbimeve qytetarët kanë mundësi të adresojnë më lehtë kërkesat e tyre të organet komunale. Në fazën e dytë do të përfshihen edhe shërbime të tjera”, tha Krasniqi.
Në ceremoninë e organizuar për lansimin e platformës “E-Komunat” morën pjesë edhe kryetarët e Leposaviqit, Mitrovicës së Veriut dhe Zubin Potokut. Por, të pranishëm nuk ishin shumica e kryetarëve të komunave të tjera të Kosovës.
Nga sot, Kryesimin e Komitetit të Ministrave të Këshillit të Evropës, për gjashtë muajt e ardhshëm e mori Lituania.
Në deklaratën e miratuar nga ky Komitet, me rastin e 75-vjetorit të themelimit të kësaj organizate, Kosova nuk përmendet asnjëherë.
Lidhur me aplikimin e Kosovës për anëtarësim në këtë organizatë, u deklarua Kryesuesja e deritanishme e Komitetit të Ministrave të Këshillit të Evropës, Dominique Hasler, Ministre e Jashtme e Lihtenshtajnit.
“Pranimi i Kosovës u përmend disa herë sot në kuadër të deklaratave kombëtare të ministrave. Ne kemi pranuar letër nga Asambleja Parlamentare e Këshillit të Evropës me rekomandimin për pranimin e Kosovës dhe ne bëmë gjithçka brenda Presidencës sonë për të avancuar procesin, së bashku me shtetet anëtare. Ndaj Komiteti i Ministrave tashmë ka nisur diskutimet për çështjen dhe aktualisht po shqyrton se si të procedojë”, ka thënë Hasler.
Aplikimi i Kosovës kishte kaluar në Asamble Parlamentare dhe duhej vetëm edhe votimi në Komitet të Ministrave për pranim në Këshill të Evropës.
Shtetet që përkrahën Kosovën në këtë proces kishin një kërkesë të qartë – dërgimin e statutit të Asociacionit të Komunave me Shumicë Serbe për shqyrtim në Gjykatën Kushtetuese.
Në një përpjekje të minutave të fundit, Ministrja e Jashtme Donika Gërvalla dje nënshkroi një letër, ku u zotua se Kosova do të dërgojë në Gjykatë Kushtetuese një projekt-statut të Asociacionit të Komunave me Shumicë Serbe, deri në fund të majit.
Ky hap edhe hapat e tjerë, siç ishte takimi i Kryeministrit Kurti me nënkryetarët e komunave të veriut, u cilësuan të pamjaftueshëm për anëtarësim të Kosovës në Këshill të Evropës nga Presidenti i Francës, Kancelari i Gjermanisë dhe Kryetarja e Këshillit të Ministrave të Italisë.
Kështu, vetëm një ditë më vonë, Qeveria e Kosovës, gjegjësisht Ministrja Gërvalla u tërhoq nga zotimi që vetë e pranoi dhe nënshkroi.
Ajo pohoi se zotimi që e bëri dje ka humbur tashmë relevancë dhe se disa vende anëtare të Këshillit të Evropës e mbështetën fushatën e Serbisë dhe u vunë në anën e padrejtësive.
“Megjithatë, në vend të Opinionit të Asamblesë Parlamentare të Këshillit të Evropës dhe një propozimi të arsyeshëm e serioz nga Qeveria e Kosovës, disa vende anëtare zgjodhën t’i dalin në krah padrejtësive dhe t’i japin mbështetje fushatës lobuese të Serbisë, kundër anëtarësimit të Kosovës, duke privuar kështu qytetarët e Republikës së Kosovës nga të drejtat dhe mundësitë që ofrojnë mekanizmat e kësaj organizate, veçanërisht për komunitetet e pakicës etnike dhe komunitetet e tjera të margjinalizuara”, tha Gërvalla.
Presidentja Vjosa Osmani, e cila nuk ka qenë e konsultuar për zotimin që Qeveria e dhe dje dhe e tërhoqi sot, përdori gjuhë më diplomatike dhe shprehu bindjen se anëtarësimi i Kosovës në këtë organizatë është vetëm çështje kohe.
“Republika e Kosovës do të jetë anëtarja e 47-të e Këshillit të Evropës. Është thjesht çështje kohe. Në këtë rrugë, ne nuk do të cenojmë vlerat që përbëjnë themelin e vendit tonë. Pasi të arrijmë aty, ne do të vazhdojmë të qëndrojmë për shtyllat që përcakton Këshilli i Evropës: të drejtat e njeriut, demokracia dhe shteti i së drejtës. Ne nuk do të shërbejmë si dorë e zgjatur e Rusisë apo si model i sjelljes autokratike”, ka thënë Osmani.
Këshilli i Evropës është organizata më serioze ndërkombëtare ku Kosova ka pasur gjasa të pranohet viteve të fundit. Që nga viti 2021, Kosova nuk ka asnjë njohje të re dhe as anëtarësim në organizata financiare ose politike ndërkombëtare.
Rreth 50 mijë banorë më shumë rezulton t’i ketë Prishtina tani, sesa 13 vjet më parë kur u bë regjistrimi i popullsisë.
Kështu të paktën bëhet e ditur në të dhënat e Agjencisë së Statistikave të Kosovës, në ditën e fundit të procesit të regjistrimit, ku figurojnë të regjistruar rreth 250 mijë qytetarë.
Mirëpo, shifra aktuale befasoi udhëheqësinë e Komunës së Prishtinës, pasi ajo priti numër më të lartë të banorëve.
“Kemi pritë që numri i banorëve të jetë më i madh, sepse ne jemi këtu çdo ditë edhe e shohim çfarë numri të makinave, të mbeturinave edhe sa numër të banorëve kemi në përgjithësi, andaj pritjet kanë qenë më të larta. Një gjë që ka ndodhë është se shumë prej rezidentëve që jetojnë në Prishtinë gjatë javës e shkojnë në vikend në vendlindje, janë regjistruar në vendlindje dhe ky është një gabim”, tha nënkryetari i Prishtinës, Alban Zogaj.
Të njëjtin mendim ka edhe demografi Besim Gllopeni, teksa shton se këtu ka ndikuar edhe ikja e qytetarëve në vendet perëndimore.
“Shumica e qytetarëve që vijnë nga komunat e tjera akoma nuk janë regjistruar si qytetarë të Prishtinës dhe kjo natyrisht që ka efekte shumëdimensionale, si për qytetarët ashtu edhe për institucionin. Prishtina sillet rreth 250 mijë banorë, kjo edhe për faktin që numri i popullsisë gjithmonë po shkon duke rënë për shkak të faktorëve mekanikë që janë migrimet”, tha Gllopeni.
Sidoqoftë, nga komuna thonë se do të penalizohen përsëri, veçanërisht tek ndarja e buxhetit për komuna.
“Penalizimi në fakt është me miliona euro, kështu që ke edhe arsimtar sa mundemi me angazhu, edhe mjek edhe punëtor të ndërmarrjeve publike e administratës të gjitha na varen nga regjistrimi i popullsisë”, tha nënkryetari i Prishtinës, Alban Zogaj.
Sipas regjistrimit të 2011-tës, Prishtina kishte 198.897 banorë të regjistruar.
Nën moderimin e Elita Rudit, me opinionistin Nderim Neziri përkrah, nga kjo e diel duke filluar nga ora 21:30, nisë transmetimin në ATV projekti më i ri “The Elite Way”.
Ky emision sjell figurat më të njohura në vend në një dimension tjetër, përmes lojërave, diskutimeve e shumë të thënave ekskluzive.
Këtë të diele të ftuar në emisionin “The Elite Way” mes shumë rrëfimesh, debatesh të forta dhe shumë të qeshurave, do të jenë Gjiko, Melinda Ademi, Egzon Sahiti, Mak Zogaj, dhe Xhuliana Nuraj.
“The Elite Way”, pritet ta pasurojë edhe më shumë skemen televizive të ATV-së dhe të jetë një alternativë e mirë për ta dëgjuar lajmin, marrë emocionon dhe për tu argëtuar pafund. /atvlive.tv
Anëtarësimi i Kosovës në Këshillin e Evropës, dukej si punë e kryer derisa nuk u kushtëzua me Asociacionin e komunave me shumicë serbe. Teksa nuk ishte as në agjendë këtë të premte, Ministrat e Jashtëm të Këshillit të Evropës, nuk morën as vendim për thirrjen e një mbledhjeje të jashtëzakonshme.
Njohës të procesit, vlerësojnë se një mundësi tjetër zor që do të vijë brenda këtij viti.
“Në raport me Kosovën, përkundër asaj që i ka plotësuar të gjitha kriteret siç e ka vërtetuar edhe Asambleja Parlamentare tani e kemi edhe një kusht nga trupi vendimmarrës e që është dërgimi i draftit në gjykatën kushtetuese. Qëndrimet i kemi pa, kryeministri Kurti ka qëndrim të prerë që nuk mund të kërkohet vetëm Asociacioni, por pakoja në tërësi që i bie marrëveshja e Brukselit, marrëveshja e Ohrit dhe drafti i Asociacionit. Serbia, në anën tjetër, çdo ditë dëshmon se nuk dëshiron t’i zbatojë këto marrëveshje, prandaj unë nuk pres lëvizje pozitive në këtë drejtim”, tha Taulant Kryeziu, njohës i integrimeve evropiane.
Kryeziu nuk pret që ekzekutivi të bëjë lëvizje drejt formimit të Asociacionit para zgjedhjeve.
Për Valon Murtezajn, profesor i diplomacisë në Paris, mosanëtarësimi i Kosovës në Këshill të Evropës është fakt i dhimbshëm.
“Kjo është një mundësi e humbur, e dhimbshme për dy palët, edhe për Republikën e Kosovës edhe për Bashkimin Evropian. Qytetarët e Kosovës e meritojnë ta kenë një mundësi që të sigurohen se të drejtat e tyre nuk po shkelen, por kjo mundësi sot u mohua. Ajo çka mbetet në muajt e ardhshëm është që të krijohet edhe një mundësi tjetër që ky komitet i ministrave që është instanca më vendimmarrëse për anëtarësim të mblidhet por kjo është shumë e vështirë dhe aspak e thjeshtë”, tha Murtezaj.
Ish-zëvendësministri i punëve të jashtme, thotë se Asociacioni i komunave me shumicë serbe nuk duhet të ndërlidhet vetëm me anëtarësimin në një organizatë.
“Qëndrimi i Kosovës sa i përket Asociacionit, nuk duhet të ndërlidhet vetëm me një anëtarësim në një organizatë ndërkombëtare, por duhet të jetë qëndrim stabil në përgjithësi dhe në relacion me faktorin ndërkombëtar dhe situatën e brendshme të Kosovës. Kosova duhet të vendosë se a dëshiron ta formojë Asociacionin ose jo”, tha Murtezaj.
Ndryshe, në lidhje me zhvillimet e fundit rreth anëtarësimit të Kosovës në Këshillin e Evropës, kryeministri Albin Kurti nuk është deklaruar gjatë ditës, pavarësisht tentimit të gazetarëve.
Që nga viti 2021 kur u premtuan 160 çerdhe, vetëm 9 prej tyre janë finalizuar, kurse 35 të tjera janë në ndërtim e sipër.
Ministrja e Arsimit, Arbërie Nagavci, fajin për mosndërtimin e çerdheve të reja ua hodhi komunave.
“U kam dërguar sot një ftesë për bashkëpunim, atë shkresë i kam ftuar drejtoritë përkatëse që të bashkëpunojnë për ndërtimin e çerdheve…”, tha Nagavci.
Njësoj si Nagavci edhe zëvendësi i saj, Taulant Kelmendi, tha se Komunat duhet të ndajnë parcela, për ndërtimin e çerdheve.
Mirëpo, sipas njohësit të arsimit, Argjend Osmani, komunat nuk janë fajtore për mosndërtimin e çerdheve. Sipas tyre, ka munguar vullneti i nivelit qendror të merret me këtë çështje.
“Kjo qeveri ka dhënë numra mbresëlënës, por me punë askund, vetëm po merren me meremetime, nuk mund ta hedhë topin askund tjetër, përveç në oborrin e vet, sikur të ishin serioz në punën që bëjnë, do ishte më mirë, nuk ka qenë e gatshme ta menaxhojë këtë fushë”, tha Osmani.
Aktualisht, Ministria e Arsimit është duke i shqyrtuar 5 kërkesa për ndërtimin e çerdheve, në Prizren, Suharekë, Ferizaj, Gjilan e Junik.
Për letrën që ministrja Donika Gërvalla ia dërgoi Këshillit të Evropës, për hartimin e një draft-statuti të ri për asociacionin para fundit të muajit, presidentja Vjosa Osmani të enjten u njoftua nga mediat.
Për njohësit politikë, moskonsultimi ndërmjet liderëve të institucioneve, po vlerësohet si i qëllimshëm dhe me prapavijë e cila buron kohë më parë.
“Mosnjoftimi i Presidentes rreth letrës ma shumë më duke si xhelozi e kryeministrit në adresë të Presidentes, sepse ne e kemi dëgjuar z. Escobar, i cili ka thënë se Presidentja Osmani është garantuesja e raporteve mes Kosovës dhe SHBA-së. Me këtë veprim, Kurti ka menduar se do të marrë përgjigje pozitive…”, tha Fidan Ukaj, njohës i politikës.
Madje, sipas njohësit të marrëdhënieve diplomatike, Arbnor Sadiku, mosdakordimi me Presidenten Vjosa Osmani, për dërgimin e letrës në Këshillin e Evropës, është mesazh përçarjeje ndërmjet Qeverisë e Presidencës.
“Mospasja e raporteve të mira mes presidentes dhe udhëheqëses së Listës Guxo sigurisht mund të ketë përçarje…”, tha Sadiku.
Vetëm një ditë para takimit të Këshillit të Ministrave në Strasburg, Qeveria i dërgoi letër të re zotimi Këshillit të Evropës, për hartimin e një draft-statuti të ri për Asociacionin para fundit të muajit.
Ministria e Mbrojtjes shpall konkurs për vitin akademik 2024/2025 për pranim të kadetëve të FSK-së nga data 3 qershor deri më 17 qershor 2024.
Kadetët e pranuar do të studiojnë në Qendrën për Studime Universitare e FSK-së – Universiteti Amerikan në Kosovë; Republika e Shqipërisë/Akademia Ushtarake – Teknologji Informative në fushën e mbrojtjes, Marrëdhënie Ndërkombëtare në fushën e mbrojtjes, Shkenca Komunikimi në fushën e mbrojtjes; Republika e Turqisë – Akademia Ushtarake Tokësore dhe Akademia Ushtarake Mjekësore; Republika e Kroacisë- Akademia Ushtarake/Universiteti i Zagrebit- Lidershipi dhe Menaxhmenti Ushtarak.
Rinia e Turqisë përbënte 15.1% të popullsisë së saj në fund të vitit 2023, sipas shifrave zyrtare të publikuara të premten.
Në vend kishte gjithsej 12.87 milionë të rinj, të moshës nga 15 deri në 24 vjeç, 51.3% e të cilëve ishin meshkuj dhe 48.7% femra, tha byroja e statistikave e vendit TurkStat.
Raporti i të rinjve në popullsinë e përgjithshme pritet të jetë 14% në vitin 2030, 13.4% në 2040, 11.8% në 2060 dhe 11.1% në 2080.
Krahina me përqindjen më të madhe të të rinjve ishte Hakkari, me 21.5%, në vitin 2023, i ndjekur nga Sirnak dhe Siirt me 21.1% secili dhe Bayburt me 20.2%.
“U pa se përqindja e popullatës së të rinjve të Turqisë me 15,1% ishte më e lartë se ajo e 27 vendeve anëtare të Bashkimit Evropian (BE),” vuri në dukje byroja e statistikave.
Mesatarja e BE-së e përqindjes së popullsisë rinore ishte 10.6% në vitin 2023. /AA/
