Blog

Mos anëtarësimi i Kosovës në Këshillin e Evropës po konsiderohet si shumë e dëmshme. Mos prania e Kosovës në këtë organizatë të rëndësishme evropiane do të pengojë qytetarët të realizojnë të drejtat e tyre duke iu drejtuar Gjykatës së Strasburgut. Po ashtu, anëtarësimi në KiE do të shënonte progres në demokraci dhe vendi do të fitonte reputacion duke qenë pjesë e një organizate të tillë.

Profesori universitar, Mazllum Baraliu në një intervistë për KosovaPress, thotë se marrja parasysh e kërkesës së Serbisë nga shtetet e fuqishme si Franca , Gjermania dhe Italia, që Kosovës t’i vihet kusht formimi i asociacionit, në mënyrë që të bëhej pjesë e KiE, mund të konsiderohet si dëm kolateral për vendin tonë.

“Humbin qytetarët e Kosovës, të cilët do të kishin mundësi, po të ishte anëtarësuar Kosova në Këshillin e Evropës, që atëherë kurdo në të gjitha instancat gjyqësore, institucionale të Kosovës nuk i realizojnë të drejtat e tyre, të mund t’i drejtohen gjykatës në Strasburg dhe atje do të mund t’i realizonin të drejtat e tyre. Pastaj, do të kishte mundësi që të zhvillohej më shumë dhe më intensivisht demokracia. Kjo është me rëndësi, shteti sigurisht që do të kishte reputacionin në një organizatë regjionale të rëndësishme më shumë. Të jetë anëtar Kosova, sepse kemi nevojë ende për afirmim të subjektivitetit tonë shtetëror në arenën ndërkombëtare. Por, sigurisht më vital është interesi i Kosovës që të mbrohet interesi shtetëror. Pra, të mos pranojë të vihen kushte jo parimore, të dëmshme për shtetin e Kosovës dhe perspektivën e tij”, tha Baraliu.

Kushtet e vendosura për Kosovën për t’u bërë pjesë e kësaj organizate, Baraliu i konsideron të panevojshme dhe si të tilla nuk do të duhej të kërkoheshin. Ai thotë se me këtë kërkesë, Evropa u turpërua, ngase sipas tij kjo e fundit po tregon mosinteresim për realizimin e të drejtave të njeriut.

“Është dëm kolateral ndoshta suksesi i Serbisë përmes disa shteteve të rëndësishme. Franca konkretisht, Gjermania, Italia të cilat e dëgjuan kërkesën e Serbisë dhe të Vuçiq dhe fatkeqësisht e dëmtuan Kosovën duke kërkuar kushte, të cilat nuk kërkohen, të jashtëzakonshme, të panevojshme që nuk kanë të bëjnë me Këshillin e Evropës. Aq më tepër, u turpërua Evropa mendoj unë, për arsye se Asambleja Parlamentare me 82 vota e votoi një zëri, e shprehu vullnetin për anëtarësimin e Kosovës në këtë këshill, ndërkohë që Komiteti i Ministrave nuk e futi në rend dite dhe kjo nënkupton mosinteresim real të Evropës për të drejtat e njeriut e aq më pak për të drejtat e minoriteve, për të cilat Këshilli i Evropës do të duhej të kishte kujdesin më të madh, për nga definicioni dhe kompetencat që ka”, potencon Baraliu.

Për KosovaPress, Baraliu thotë se Serbia nuk ka interesim real për avancimin e të drejtave të qytetarëve siç po pretendon, porse sipas tij qëllimi i saj është që të mos ketë stabilitet në Kosovë. Formimi i asociacionit, Baraliu thotë se nënkupton rrënimin e shtetit të Kosovës dhe futjen e Serbisë në Kosovë.

“Edhe Serbia po ashtu e cila po kërkon vazhdimisht kinse avancimin e të drejtave të komunitetit të vet dhe komuniteteve të tjera në Kosovë për të cilat në mënyrë paternaliste ajo interesohet kinse, edhe ajo ishte kundër dhe tregon që nuk e ka interesin real për avancimin e të drejtave të qytetarëve të vet, por e ka interesin territorial dhe hegjemon që në Kosovë të mos ketë stabilitet, përkundrazi që të rikthehet në Kosovë dhe ta ushtrojë hegjemoninë e saj…Kosova duhet ta mbrojë në radhë të parë dhe pavarësisht interesin shtetëror. Interesi shtetëror është që mos të formohet asociacioni me ato kompetenca që i ka në projekt-statutin euro-amerikan, për arsye se nënkupton rrënimin e shtetit të Kosovës, perspektivës së tij, futjen e një Serbie brenda Kosovës dhe futjen e Kosovës brenda Serbisë”, tha Baraliu për KosovaPress.

Këshilli i Evropës nuk e vendosi Kosovën në agjendën e paralajmëruar për anëtarësim më 17 maj, pas letrës së tre liderëve evropianë dërguar kryeministrit Albin Kurti në të cilën kushtëzohet hyrja e Kosovës në këtë organizatë evropiane me formimin e asociacionit të komunave me shumicë serbe.

Komandanti i KFOR-it, gjenerali Ozkan Ulutash, në një aktivitet të mbajtur sot ka thënë se ngjarjet e ndodhura gjatë vitit të kaluar në Kosovë e kanë ndikuar negativisht situatën e sigurisë në rajon.

Ulutuas në fjalën e tij ka thënë se për këtë arsye, NATO ka dërguar 1 mijë trupa shtesë pas tensioneve. Duke folur për batalionin turk, Ulutas ka thënë se ushtarët turq që kanë ardhur në kuadër të forcave shtesë, janë duke thënë kontribut në mënyrë profesionale dhe që do të bëjë ndryshimin.

Ai gjithashtu ka thënë se ata janë të trajnuar shumë mirë dhe se kjo i jep besim forcës së KFOR-it.

“Siç e dini, batalioni ynë komando nga Turqia po shërben në fushën e operacioneve si njësi rezervë. Në rastin e batalionit tonë turk, ushtarët tanë po japin një kontribut që do të bëjë ndryshimin këtu në një mënyrë profesionale, shumë të trajnuar. Kjo na jep besim”, ka deklaruar Ulutas.

Gjykata Supreme e Kosovës ka kthyer në rigjykim çështjen penale ndaj të akuzuarit P.K i ngarkuar me veprën penale “dhunim”e për të cilën vepër ishte dënuar nga Gjykata e Apelit me 2 vite burgim.

Vendimi i Supremes del të jetë marrë më 16 prill 2024 nga gjykatësit: Mejreme Memaj-kryetare, Agim Maliqi dhe Rasim Rasimi anëtarë raporton “Betimi për Drejtësi”.

Fillimisht Gjykata e Qarkut në Pejë (atëkohë) të akuzuarin P.K e kishte dënuar me 2 vite burgim për veprën penale të dhunimit dënim të cilin Gjykata Apelit e kishte kthyer në rigjykim.

Tutje, në procedurë të rigjykimit, Gjykata Themelore në Pejë me 15 korrik 2021 të akuzuarin P.K e dënon me 8 muaj e 8 ditë burgim dhe sërish Apeli me 6 korrik 2023 çështjen e kthen në rigjykim.

Pas kthimit në rigjykim sërish nga Apelit, Themelorja në Pejë tash të akuzuarin P.K e dënon me 5 vite e 6 muaj burgim për veprën e njëjtë penale, por tash Apelit ndryshon këtë aktgjykim dhe P.K e dënon me 2 vite burgim.

Mbi këtë aktgjykim të fundit të Apelit, mbrojtja e të akuzuarit P.K paraqet kërkesë për rishikim të procedurës penale Gjykatës Themelore në Pejë me pretendimin se në çështjen penale ndaj P.K janë paraqitur prova të reja.

Por kjo Gjykatë refuzon kërkesën e mbrojtjes së të akuzuarit P.K për rishikim të procedurës me arsyetimin se rishikimi i procedurës penale mund të kërkohet vetëm në rastet kur kemi aktgjykim të formës së prerë e i cili sipas Themelores në Pejë nuk ekziston, raporton “Betimi për Drejtësi”.

Dhe del se ky vendim i Themelores në Pejë të jetë i aprovuar edhe nga ajo e Apelit me arsyetimin se vendimi është i drejtë dhe i ligjshëm andaj Supremja e kthen çështjen në rivendosje Apelit që të vlerësojë saktë kërkesën e mbrojtjes për rishikim të procedurës.

Por Apeli edhe në rivendosje sërish refuzon kërkesën e mbrojtjes për rishikim por se sipas Supremes nga një vendim i tillë i Apelit rezulton se nuk janë aplikuar udhëzimet se si të veprohet në rivendosje nga ana e Apelit.

Sipas Supremes në rastin konkret është paraqitur një situatë specifike pasi që bazë për rishikim të procedurës është shkalla e dytë dhe krejt kjo pasi qe sipas ankesës është paraqitur provë e re konkretisht nënshkrimi në ankesën e paraqitur nga pala e dëmtuar ishte i falsifikuar duke nënkuptuar se ankesa është paraqitur nga një person i paautorizuar.

Përmes ekspertizës së ekspertit S.G del se ankesa e paraqitur kundër aktgjykimit të Gjykatës Themelore në Pejë ku P.K ishte dënuar me 8 muaj e 8 ditë burgim nuk është paraqitur nga ana e të dëmtuarës, pra nënshkrimi në ankesë nuk është i palës së dëmtuar.

Kësisoj sipas Supremes në rigjykim Apeli duhet të shqyrtojë lejueshmërinë e ankesës së paraqitur nga pala e dëmtuar ndaj aktgjykimit të Themelores në Pejë ku i akuzuari P.K ishte dënuar me burgim dhe kjo në raport me ekspertizën e ekspertit të grafologjisë S.G.

Lidhur me këtë, më 27 tetor 2021, kryetari i Gjykatës Supreme të Kosovës, Enver Peci kishte kërkuar nga kryetari i Gjykatës Themelore në Pejë, Armend Berisha që të ndërmarrë veprimet ligjore për të adresuar përgjegjësinë disiplinore lidhur me këtë rast.

Për këtë rast, edhe kryeprokurori i Prokurorisë Themelore të Pejës, Agim Kurmehaj ka iniciuar procedurë disiplinore ndaj prokurores Lirije Morina.

Kurse, më pas Kurmehaj, pas vlerësimit të shkresave të lëndës, ka filluar inicimin e procedurës disiplinore ndaj prokurores për të mitur, Lirije Morina, përkitazi me rastin e dhunimit të 15 vjeçares.

Ndërsa, Këshilli Gjyqësor i Kosovës (KGJK) në mbledhjen e 270-të të mbajtur më 27 tetor 2021, me dyer të mbyllura, ka marrë vendim për suspendimin e gjykatëses së Gjykatës Themelore në Pejë, Florije Zatriqi, e cila shqiptoi tetë muaj e tetë ditë burgim ndaj P.K., për dhunimin e të miturës.

Këtë vendim e konfirmoi edhe Supremja, me vendimin e marrë më 6 dhjetor 2021, ku rezulton se është refuzuar ankesa e ushtruar nga gjykatësja Zatriqi, ndaj vendimit të KGJK-së për suspendim.

Por, Këshilli Gjyqësor i Kosovës (KGJK), më 28 prill 2022, ka nxjerrë vendim për degradimin dhe transferimin e përhershëm të gjyqtares Florije Zatriqi, në Departamentin e Përgjithshëm-Divizionin e Kundërvajtjes në kuadër të Gjykatës Themelore në Pejë.

Ndryshe, Gjykata e Apelit, më 13 mars 2014 e kishte kthyer këtë rast në rigjykim, për shkak të mosarsyetimit të zbutjes së dënimit ndaj kryesve të veprës.

Ndryshe, sipas aktakuzës të ngritur më 26 mars 2012 nga Prokuroria Themelore në Pejë, i akuzuari P.K, ngarkohet se në ditë të pacaktuara të muajit janar 2021, në një shtëpi të pabanuar, së bashku me të miturit F.H dhe A.I, kanë kryer dhunimin e të miturës N.N, e moshës 15 vjeçare.

Sipas aktakuzës, pasi e mitura kishte dalë nga spitali, i pandehuri P. së bashku me të miturin A.I, përmes dhunës e nën kërcënimin e thikës nga i mituri A.I, e kishin dërguar në një shtëpi të pabanuar e pastaj i mituri A.I e kishte thirr të miturin F.H, i cili kishte shkuar në shtëpinë në fjalë dhe aty gjatë tërë natës i pandehuri dhe të miturit kishin kryer veprën penale të dhunimit ndaj të miturës, pastaj e mitura në orët e hershme të mëngjesit, kishte ikur nga shtëpia dhe kishte paraqitur rastin në polici.

Me këtë, të akuzuarit kanë kryer veprën penale të “dhunimit”, nga neni 193, par.3 pika 5 lidhur me par.4 të KPP, për të cilin parashihet dënimi prej 5 vite deri në 20 vite burgim.

Lidhur me këtë aktakuzë, fillimisht Gjykata e Qarkut në Pejë më 6 nëntor 2012, e kishte dënuar të pandehurin P.K, me dënim në kohëzgjatje prej 1 viti, kurse ndaj të miturve kishte shqiptuar dënim me burgim për të mitur në kohëzgjatje prej 1 viti.

Më pas, ky vendim ishte prishur nga Gjykata e Apelit më 13 mars 2014 dhe rastin e kishte kthyer në rivendosje në Gjykatën e Pejës.

Tutje, në rigjykim, pas veçimit të procedurës ndaj të pandehurit P.K, gjykatësja e çështjes, Florije Zatriqi, me kërkesën e mbrojtësit të akuzuarit, avokatit Idriz Daci kishte caktuar seancën e rishqyrtimit gjyqësor më 17 korrik 2021, në të cilin ishte prezent, i akuzuari dhe mbrojtësi i tij, mirëpo nuk ishin prezent e dëmtuara, as përfaqësuesi për Mbrojtjen e Viktimave, Rauf Pozhegu, i cili mungesën nuk e kishte arsyetuar.

Në këtë seancë të rigjykimit, pas leximit të aktakuzës nga prokurorja Lirije Morina, i akuzuari është deklaruar fajtor për akuzën që i vihet në barrë.

Për këtë pranim të fajësisë, gjykatësja e çështjes, të pandehurin e ka gjykuar me 8 muaj e 8 ditë burgim.

Në arsyetimin e këtij dënimi, gjykatësja nuk kishte gjetur asnjë rrethanë rënduese, mirëpo vetëm rrethana lehtësuese.

“I akuzuari ka treguar sjellje korrekte gjatë shqyrtimit fillestar, e për më tepër e ka pranuar fajësinë dhe ka shprehur keqardhje për veprën penale që e ka kryer. Tani ka krijuar lidhje jashtëmartesore dhe nga kjo lidhje ka një fëmijë vajzë 4 muajshe, se nga kryerja e veprës kanë kaluar gati 10 vite, si rrethanë lehtësuesi gjykata pati parasysh se në kohën e kryerjes, i akuzuari ka qenë madhor i moshës 21 vjet, e po ashtu karakteristikat personale të akuzuarit se në atë kohë, është shoqëruar me dëshmitarit F.H dhe A.I, të cilët kanë qenë të mitur dhe i ka pasur shokë, këto rrethana flasin për pjekurinë e tij psikike në kohën e kryerjes së veprës penale si dhe deklaratën e të dëmtuarës të dhënë në polici dhe në prokurori ku kishte deklaruar se në rastin e marrëdhënieve seksuale, nuk ka pasur lëndime”, thuhet në arsyetimin e gjykatëses Zatriqi. /BetimipërDrejtësi

Kryeministri Albin Kurti dhe ministri i Financave, Punës dhe Transfereve, Hekuran Murati morën pjesë në shënimin e fillimit të pilotimit të skemës për reformën e asistencës sociale në Kosovë, raporton Ekonomia Online.

Kurti gjatë prezantimit të punës së Qeverisë që ai drejton tha se kemi rritje e zhvillim në çdo aspekt të jetës.

“Qysh në shtator të viti 2021 ndihmuam me shtesat për lehona e fëmijë. Deri më tani kemi mbi 400 mijë fëmijë që përfitojnë nga këto skema. Ndamë mbi 100 milion euro për të mbështetur pensionistët dhe për skemat tjera sociale”, ka thënë Kurti.

“Si Qeveri nuk u ndalëm por vazhduam me ndihma në disa sektorë. Fokusi ynë ishte reformimi rrënjësor i sistemeve e politikave që ishin keq të dizajnuara. Dizajni i skemës aktuale sociale është diskriminues sepse në momentin që fëmija në një familje mbushur moshën 5-vjeçare atij i është ndërprerë ndihma”,  shtoi tutje ai.

 

Nënkryetari i LDK-së, Lufti Haziri thotë se kryeministri Albin Kurti nuk ka guxim që draftin e Asociacionit ta dërgojë në Gjykatë Kushtetuese.

“Një kryeministër që nuk guxon ta dërgojë vendimin e vet në Gjykatë Kushtetuese, nuk mund ta dërgojë, nuk guxon”, tha ai.

“S’po guxon një vendim të qeverisë ta dërgojë në Gjykatë, të ia besojë burrave dhe grave që janë niveli më i lartë i drejtësisë që lidhet me kushtetutën”, shtoi Haziri.

Ish-kryetari i Gjilanit, kështu u shpreh në një konferencë për media të cilën e mbajti në Zyrat e LDK-së në qytetin të cilin Haziri dikur e udhëhiqte.

Agjencia e Statistikave e Kosovës nëpërmjet një komunikate ka falënderuar të gjithë qytetarët e Republikës së Kosovës që me pjesëmarrjen e tyre gjatë këtyre javëve bashkëpunuan afër me regjistruesit për një projekt të tillë madhor dhe të rëndësishëm për Kosovën.

Gjithashtu, ASK-ja ka bërë të ditur se tashmë regjistrimi i popullsisë është shtyrë deri më 24 maj, duke dhënë detaje mbi planin e veprimit.

“Meqenëse regjistrimi i popullsisë në terren, sipas vendimin të qeverisë të datës 21 nëntor 2023 ishte deri më 17 maj 2024, bazuar në kërkesat e disa komunave dhe duke u bazuar në sistemin monitorues që ka ngritur Agjencia e Statistikave e Kosovës (ASK) për ta monitoruar ecurinë e procesit, vlerësuam se mund të ketë individë, ekonomi familjare ose edhe ata që kanë refuzuar (për momentin) dhe kërkuam nga qeveria një shtyrje të afatit të regjistrimit të popullsisë (ReKos2024) deri më 24 maj 2024 që është aprovuar nga qeveria”, thuhet në njoftimin e ASK-së.

ASK-ja thotë se gjatë kësaj periudhe, regjistrimi do të bëhet në çdo zonë regjistruese (fshat e komunë) të Kosovës dhe do të zhvillohen vetëm nga stafi i Agjencisë së Statistikave të Kosovës.

Po ashtu ASK-ja bën thirrje për qytetarët që nuk janë regjistruar të kërkojnë të regjistrohen, duke inkurajuar ata që t’i kontaktojnë zyrtarët e Agjencisë së Statistikave të Kosovës.

Personi i akuzuar për tentim-vrasje të kryeministrit sllovak, Robert Fico, ka arritur të shtunën në gjykatë, e cila do të vendosë për masën e paraburgimit.

Siç raporton AP, i akuzuari, i identifikuar nga mediat sllovake si Juraj Cintula, 71-vjeçar, e ka qëlluar me armë Ficon, pas një takimi qeveritar të mërkurën.

Para gjykatës të shtunën janë parë shumë forca policore.

Cintula ka shtënë pesë herë me armë kundër Ficos, ndërsa e ka qëlluar katër herë – përfshirë goditjen në abdomen – teksa kryeministri ka qenë në afërsi të mbështetësve të tij, pas takimit qeveritar të zhvilluar në qytezën Handlova.

Fico është dërguar në spital me helikopter dhe i është nënshkruar një operimi për pesë orë.

“Nëse do të goditej vetëm disa centimetra më lart, do të goditej mëlçia e kryeministrit”, ka thënë ministri i Brendshëm sllovak, Matus Sutaj Estok për mediat lokale.

Fico, i cili është në pushtet prej kur partia e tij popullsite e qendrës, Smer, i ka fituar zgjedhjet e përgjithshme në vjeshtën e vitit të kaluar, e ka pasur edhe një tjetër operim dyorësh të premten.

“Pacientit i është kthyer vetëdija, gjendja e tij është stabile, mirëpo është ende në zonën për kujdes intensiv” kanë thënë zyrtarë të spitalit në qytetin sllovak Banska Bystrica.

Gjykata në Pezinok do të shqyrtojë kërkesën e prokurorit që Cintula të jetë në paraburgim, pasi është akuzuar për tentim-vrasje me paramendim.

Sekretarja e Përgjithshme e Partisë Demokratike të Kosovës(PDK), Vlora Çitaku, thotë se Kuvendi i Kosovës duhet të shpërndahet në muajin maj në mënyrë që t’i hapet rrugë zgjedhje të parakohshme më së largu deri në javën e parë të korrikut. Çitaku paralajmëron se koordinim me partitë opozitare për ta çuar vendin në zgjedhje, derisa thekson se në bazë të qeverisjes aktuale të Lëvizjes Vetëvendosje do të ketë të vështirë të lidhin koalicion pas zgjedhor.

Zyrtarja e PDK-së në një intervistë për KosovaPress thotë se zgjedhjet e parakohshme kanë kuptim të mbahen deri në 50 ditët e ardhshme, pasi nëse shkohet nga vjeshta e tutje do të hyhet në cikël normal zgjedhor.

“Qe nga korriku i vitit të kaluar PDK-ja në mbledhjen e Këshillit Drejtues ka marrë të mos votojë asnjë nismë ligjore të Qeverisë dhe ka kërkuar që vendi të shkojë sa më parë në zgjedhje. Sigurisht, modeli jonë i preferuar ka qenë dorëheqja apo shkarkimi, mirëpo meqenëse votat na mungojnë për një procedurë të tillë, ne jemi në opsionin të dytë për shpërndarjen e Kuvendit. Ne nuk e kemi monopolin për këtë proces, por ne duam të bashkëpunojmë me parti të tjera opozitare…Mënyra e vetme për t’i dhënë Kosovës një alternativë të re është duke shkuar në zgjedhje dhe duke i fituar ato. Ne nuk kemi shtiza për kolegët tanë në opozitë, ne duam që bashkërisht të kemi një mocion përmes së cilit bëhet shpërndarja e Kuvendit. Kjo ka kuptim të bëhet deri në fund të qershorit, eventualisht java e parë e korrikut. Pastaj zgjedhjet e parakohshme s’kanë asnjë lloj logjike, pasi nga vjeshta e tutje hynë në cikël normal zgjedhor”, thekson Çitaku.

Sipas saj, PDK-ja nuk do të bëjë veprime të njëanshme në Kuvend, por do të ketë koordinim me partitë opozitare në mënyrë që mocioni eventual i mos besimit ndaj Qeverisë Kurti të rezultojë i suksesshëm.

“Ne nuk do të bëjmë veprime të njëanshme. Ne do të vazhdojmë të komunikojmë me kolegët tanë në opozitë dhe shpresojmë të gjejmë një gjuhë të përbashkët dhe të kemi një mocion, i cili do të ishte i suksesshëm. Ne nuk jemi në këtë përpjekje për bajraktarizëm. Ne nuk e kemi bërë tërë këtë përpjekje tash e një vit as për të bërë një fjalim të zjarrtë në Kuvend dhe për të rezultuar me një mocion që dështon. Ne duam që mocioni të jetë i suksesshëm dhe do të bëjmë përpjekje dhe do të vazhdojmë komunikimin me kolegët tanë opozitarë”, thotë ajo.

Sa i përket koalicioneve pas zgjedhore, Çitaku thotë se është ende herët që ato të diskutohen, por në bazë të qeverisjes aktuale e kanë të vështirë të bashkëpunojnë me partinë në pushtet.

“Për koalicione flet kandidati ynë për kryeministër Bedri Hamza pas zgjedhjeve. Nuk është koha të flasim për koalicione. Megjithatë, është e qartë se ne duam t’i japim vendit një qeverisje tjetër. Një qeveri që ofron stabilitet, parashikueshmëri, zhvillim, që e ka në qendër qytetarin e Kosovës dhe përmirësimin e jetës së kualitetit të tij, një qeveri që rikthen urat e bashkëpunimit me aleatët tanë ndërkombëtarë. Kam drojën se këtë lloj agjende e kemi vështirë të përmbushim me Lëvizjen Vetëvendosje si partner”, deklaron ai.

Duke folur për takimin e kryetarit të PDK-së Memli Krasniqi dhe kryeministrit Albin Kurti, ajo thotë se i njëjti ishte vetëm për t’u dakorduar për zgjedhjet e parakohshme.

Sipas saj ndryshimi i qëndrimit të PDK-së për votimin e marrëveshjeve ndërkombëtare nuk ka dalë nga ai takim, por ka ardhur si kërkesë e kandidatit për kryeministër të PDK-së Bedri Hamza.

“Kandidati ynë për kryeministër Bedri Hamza, qe nga fillimi i prillit, menjëherë pas nominimit për kryeministër, ka kërkuar nga PDK-ja që të ndryshojë qëndrim për marrëveshjet ndërkombëtare. Në fund të fundit, ato nuk janë dokumente të qeverisë, por marrëveshje të Kosovës me mekanizma të ndryshëm ndërkombëtarë. Ka bërë përpjekje serioze dhe këtë e ka bërë të ditur. Pra, qëndrimi jonë për marrëveshjet ndërkombëtare është rezultat i përpjekjeve të Bedri Hamzës që disa procese në parlament t’i përmbyllim dhe mos të humbin kohë në mënyrë që të hapet dera për të shkuar në zgjedhje. Vendimi për marrëveshje ndërkombëtare nuk është i ndërlidhur me takimin e kryeministrit Kurti me kryetarin Krasniqi”, përfundon ajo.