Blog

Një aksident mes një veture dhe një biçiklete ka ndodhur në Dobërdelan të Suharekës mbrëmjen e së shtunës.

Si pasojë ka pësuar lëndime të rënda i mituri që po ngiste biçikletën, i lindur në vitin 2010.

Rastin e ka bërë të ditur zëdhënësi i policisë për rajonin e Prizrenit, Vesel Gashi.

“Një aksident rreth orës 19:25 ka ndodhur në Dobërdelan të komunës së Suharekës, ku janë përfshirë një veturë dhe një biçikletë. Si pasojë e kësaj ka pësuar lëndime të rënda çiklisti, i lindur në vitin 2010. Me rastin për merret njësia e trafikut rajonal”, tha Gashi.

Një burrë është gjetur i vdekur në hapësirën e shtëpisë së tij në Gjakovë.

Në vendngjarje kanë shkuar njësitet policore dhe ekipi mjekësor, ku edhe është konstatuar vdekja e viktimës.

“Viktima mashkull kosovar është gjetur pa shenja jete në shtëpinë e tij. Njësitet policore dhe ekipi mjekësor kanë dalë në vendin e ngjarjes ku është konstatuar vdekja e viktimës”, thuhet në raportin e policisë.

Me urdhër të prokurorit, trupi i pajetë i viktimës është dërguar në IML për obduksion, ndërsa rasti është duke u hetuar.

Shërbimi shtëpiak në Prishtinë po konsiderohet si një nga shërbimet më të nevojshme për qytetarët dhe tash në praktikë po e tregon edhe rëndësinë e tij. Kështu ka thënë për Ekonomia Online, drejtori i Shëndetësisë në Komunën e Prishtinës, Izet Sadiku.

Sadiku ka thënë se ky shërbim ka qenë i domosdoshëm për të gjithë qytetarët, një nevojë më të veçantë sipas tij ka qenë për të moshuarit.

“Shërbimet paliative, janë shërbime për persona që janë në fazën terminare të jetës por që janë të obliguar më i dhënë deri në ditën e fundit të njeriut, më i dhënë shërbim mjekësor për më ia bë jetën më të dinjitetshme”, ka thënë Sadiku.

Sadiku ka deklaruar se ky shërbim ofrohet në kryeqytet për 12 orë në shtatë ditë të javës dhe punohet çdo ditë të vitit. Sipas tij, ky shërbim për qytetarët ofrohet edhe gjatë festave e vikendeve, ndërsa sa i përket ekipeve mjekësore gjatë javës janë katër ekipe, ndërsa vikendeve rritet deri edhe në një ekip.

“Prej marsit të vitit 2022, më shumë se dy vjet i ka tash ne kemi bë këtë shërbim 12 orë, në shtatë ditë të javës, çdo ditë 365 ditë të vitit ky shërbim garantohet, shtunë diele festa, vikende punon 12 orë kemi rritje mjekësore dhe gjatë ditëve të javës janë katër ekipe mjekësorë, ndërsa për vikend janë edhe nga një ekip mjekësor ndërsa për vikende janë edhe nga një ekip mjekësor”, tha Sadiku për Ekonomia Online.

Kurse sa i përket numrit të shërbimeve që ofrohen janë rreth 200 shërbime në ditë që kryhen, ndërsa rreth 6 mijë vizita janë kryer në muajn e fundit.

“Mbi 200 shërbime në ditë jepen në kryeqytet të qytetarët, në muajin e fundit kemi pas diku mbi 6 mijë vizita të shërbimit mjekësor që janë bërë për një muaj, që i ka ra mbi 211 vizita mjekësore në ditë”, deklaroi për EO drejtori i shëndetësisë.

Krahas punës së vazhdueshme dhe angazhimit me pacientë, Sadiku ka deklaruar se përballen edhe mungesë të stafit. Llogaritur numrin e rasteve të qytetarëve që kanë nevojë për shërbim shtëpiak, Sadiku ka thënë se duhet shtuar edhe numri i stafit.

“Mangësia është se duhet me pas staf edhe më shumë duhet me rrit atë staf se po shihet se nga 6 shërbime janë bërë 200 shërbime dhe mendoj se qytetarët duhet më pas ende nevojë për këtë shërbim dhe ne duhet me e rrit stafin dhe përparësi është që ky shërbim iu krijon njerëzve që me u ndi të dinjitetshëm me shërbimin shëndetësor që krijohet në vendin e vetë se ne kemi sot të moshuar të cilët janë mosha e tretë themi ne mbi 65 vjet që ata kanë nevojë me shku me e marr një infuzion ose një injeksion por për ta më problem është me shku në institucion shëndetësor se më marrë shërbimin për shkak të moshës munden me u rrëzu lëndu me pas pasoja më të mëdha për shëndetin së sa vetë shërbimi që marrin për këtë arsye ne edhe atyre iu kemi krijuar mundësi që me shku në shtëpi”, tha Sadiku për EO.

Mirëpo edhe pse ky shërbim shton nevojën e përballjes me sfida të llojllojshme, ai u shpreh se ky shërbim duhet ta bëjë krenarë profesionistin shëndetësor.

“Duke ditur për ngarkesën dhe për shqetësimet që atyre iu bëhen çdo ditë presionin që kanë ata sepse përfshijnë banorët e të gjithë territorit të kryeqytetit jo vetëm të qytetit por edhe fshatrat e largëta që janë me 30 40 kilometra nga Prishtina ata japin shërbime dhe realisht kanë presione të vazhdueshme për me dhënë shërbime. Ky shërbim e ka bë me u ndje krenarë punëtorin shëndetësor”, u shpreh Sadiku.

Ikja e fuqisë punëtore jashtë vendit ua ka vështirësuar situatën bizneseve të cilat nuk po kanë punëtorë, raporton Ekonomia Online.

Kryetari i Federatës Sindikale të Punëtorëve të Sektorit Privat, Jusuf Azemi, ka thënë se pagat duhet të rriten në sektorin privat, sepse ikja e punëtorëve për shkak të kushteve të këqija, po i lë bizneset pa ta.

Azemi per Ekonomia Online ka theksuar se i vjen keq për bizneset të cilat nuk po gjejnë punëtorë, porse sipas tij, vetë e kanë sjellë këtë situatë, për shkak të mos krijimit të kushteve me të mira për ta.

“Kanë hezituar që të ofrojnë kushte minimale dhe tani unë nuk e kam menduar kurrë se do të më vije keq për biznesmen, për punën që ai ka bërë. Megjithatë, po them se edhe ne kemi shpirt seriozisht, po them se më vjen keq për pozitën e biznesmenëve çfarë kanë ra në mungesë të punëtorëve, por këta e kanë bërë vetë, pronarët e kompanive së bashku me politikat e qeverisë së Kosovës”, ka thënë Azemi.

Ai shtoi se fokusi i tij si kryetar i FSPTSPK-së, do të jetë përmirësimi i pagave të punëtorëve në markete.

“Tani mund të flasim për punëtorët në tërësi, nuk dua të them diçka çka nuk është në realitet. Punëtorët e ndërtimtarisë e kanë një gjendje tepër më të mirë seea kanë qenë më herët. Për çdo ditë jam me ta. Mesatarisht një punëtor i thjeshtë që nuk e njeh asnjë lami të punës, tani paguhet 30 euro ditën, paguhet ushqimi dhe ka transport, që në një formë pak a shumë është një gjë që mund të themi se është solide. Përderisa të tjerat, është një gjendje shumë e rëndë. Kemi punëtorë nëpër markete që ende marrin 250 deri 300 euro…”

“50 për qind të projektit që duhet të kryen në vitin 2024 edhe ma shumë do të mbesin pa u realizuar për shkak të mungesës së punëtorëve”, ka thënë ai.

Mosngritja e pagave, kushtet e dobëta të punës, puna e stërzgjatur, ka bërë që të rinjtë të ikin nga Kosova dhe shumë biznese po rrezikohen të mbyllen si pasojë e mungesës së punëtorëve.

Madje, ka raste kur bizneset marrin punëtorë edhe nga Bangladeshi.

Një rrahje mes familjarëve ishte raportuar më 19 maj të këtij viti në Shtime. Si pasojë e kësaj rrahje, tre nga ta kishin përfunduar në spital për tretman mjekësor. Njëri nga ta ka humbur jetën gjatë ditës së djeshme.

Lajmin e ka bërë të ditur Policia e Kosovës me anë të raportit ditor, ku thuhet se viktima ka vdekur në Qendrën Klinike Universitare të Kosovës (QKUK), shkruan Gazeta Insajderi.

Sipas policisë, pas vdekjes është arrestuar djali i viktimës dhe është dërguar në mbajtje.

“LËNDIM I RËNDË TRUPOR ME PASOJË VDEKJEN- Shtime / 19.05.2024-19:30. Më datën e cekur në rastin dhunë në familje, viktima mashkull kosovar kishte pësuar lëndime trupore dhe deri më tani kishte qenë në QKUK në tretman mjekësor. Më datë 08.06.2024 nga QKUK është konfirmuar se viktima ka ndërruar jetë. Me vendim të prokurorit, trupi i pajetë dërgohet në IML për obduksion, ndërsa i dyshuari mashkull kosovar-djali i viktimës është arrestuar dhe pas intervistimit është dërguar në qendrën e mbajtjes”, thuhet në njoftimin e PK’së.

Më 19 maj të këtij viti, Policia e Kosovës njoftonte për rrahjen mes familjarëve, ndonëse shkaqet që çonin deri tek konflikti fizik nuk diheshin.

“Rreth orës 19:33, policia e stacionit në Shtime ka pranuar një informate për një rrahje në rrugen ,,12 Qershori” ne Shtime. Patrullat e policisë menjëherë kanë dalë në vendin e ngjarjes dhe aty kanë mësuar se tre persona anëtarë të familjes, dyshohet për dhunë në familje, kanë pësuar lëndime trupore dhe pas marrjes së ndihmës së parë në Qendrën e Mjekësisë Familjare në Shtime, për tretman të mëtutjeshëm mjekësor janë dërguar në Qendrën Emergjente në Ferizaj”, njoftonte zëdhënësi i Policisë për rajonin e Ferizajt, Kanun Veseli.

Rrjeti i Organizatave Jo-Qeveritare AVONET ka njoftuar se Ministria e Shëndetësisë e ka anuluar vendimin e komisionit të caktuar nga vetë Ministria për caktimin e çmimeve të produkteve medicinale.

AVONET thotë se ky proces vjen si kërkesë e Ligjit për çmimet e produkteve medicinale, i cili ka hyrë në fuqi me 18 gusht të vitit 2023, ku në dispozitat e këtij ligji, konkretisht në nenin 19 të tij parashihet që lista e çmimeve të barnave të publikohet për herë të parë 4 muaj pas hyrjes në fuqi, e zbatimi i tij të fillojë 6 muaj pas.

Mirëpo, sipas këtij rrjeti të OJQ-ve, Ministria e Shëndetësisë është vonuar në zbatimin e kësaj kërkese ligjore, ku vetëm në janar të këtij viti ka formuar komisionin për caktimin e çmimeve të produkteve medicinale.

Në këtë drejtim, AVONET thotë se me datë 15.05.2024 përmes vendimit me nr.prot. 05-3676, të ministrit të Ministrisë së Shëndetësisë, është aprovuar propozimi i komisionit për caktimin e çmimeve të barnave në tregun faramaceutik të Republikës së Kosovës.

“AVONET pas publikimit të vendimit në faqet zyrtare të AKPPM-së dhe MSH-së, ka analizuar në tërësi vendimin e cekur më lartë, me theks të veçantë ka analizuar caktimin e çmimeve për shitjen e produkteve medicinale, ku kemi vërejtur se komisioni me rastin e caktimit të çmimeve nuk ka zbatuar plotësisht metodologjinë që parashihet edhe në dispozitat e ligjit përkatës. Sipas nenit 8.2 të Ligjit për çmimet e produkteve medicinale, referencë për caktimin e çmimeve të produkteve medicinale duhet të jenë publikimet e raporteve zyrtare më të reja të kohës, në portalet zyrtare në rrjetet e institucioneve përgjegjëse zyrtare të këtyre shteteve referente: Shqipërisë, Maqedonisë së Veriut, Malit të Zi, Kroacisë dhe vendit të origjinës së produktit. Deri te ky konstatim AVONET ka arritur pas konsultimit me ekspertë të fushës farmaceutike dhe pronarë të barnatoreve që operojnë në tregun farmaceutik të Republikës së Kosovës”, thotë AVONET në njoftimin për media.

Pas kësaj analize, AVONET thotë se ka ndërmarrë hapa konkretë në drejtim të trajtimit të kësaj çështjeje, ku me datë 21.05.2024, duke shfrytëzuar dispozitat e ligjit pozitiv për qasje në dokumente publike, ka kërkuar qasje në të gjitha shkresat e komisionit, me qëllim analizimin e plotë të punës së këtij komisioni, me theks të veçantë analizimin e metodës se si kanë arritur deri te caktimi i këtyre çmimeve.

“Sipas analizës tonë, shohim se çmimet e propozuara nga komisioni dhe të materializuara përmes vendimit të ministrit të MSh-së, në shumicën e rasteve janë dukshëm më të larta se çmimet aktuale në tregun farmaceutik në vendin tonë. Megjithatë, nga zyrtarët përgjegjës të MSh-së, kemi hasur në neglizhencë në drejtim të trajtimit brenda afatit kohor ligjor të kërkesës për qasje në dokumente publike, me arsyetimin e vetëm se jemi në proces të mbledhjes së dokumentacionit, ku ende deri më sot nuk kemi pranuar dokumentet e kërkuara”.

“Mirëpo, me datë 07.06.2024 përmes vendimit nr.prot. 05-4289 të ministrit të MSh-së, u anulua vendimi me nr.prot. 05-3676, ku edhe u obligua komisioni për caktimin e çmimeve të produkteve medicinale, të hartojë një listë të re ku duhet të ketë parasysh edhe udhëzimet e dhëna nga komisioni i ankesave pranë MSh-së”, ka thënë AVONET.

Rrjeti i Organizatave Jo-Qeveritare AVONET vlerëson se ky është një hap i duhur i marrë nga ministri i Shëndetësisë, “për faktin se me këtë veprim po mbrohet interesi i përgjithshëm qytetar, duke siguruar një çmim real sipas tregut dhe nivelizim në tërësi të çmimeve, që janë edhe qëllime të Ligjit për caktimin e çmimeve të produkteve medicinale”.