ATV

Blog

  • Detajet për rastin që përfundoi tragjikisht në familjen Kokollari në Shtime

    Detajet për rastin që përfundoi tragjikisht në familjen Kokollari në Shtime

    Konflikti në familjen Kokollari në Shtime që ndodhi mbrëmjen e 19 majit ka përfunduar me fatalitet. Si pasojë e rrahjes mes dy anëtarëve të familjes, djalit dhe babait, ky i fundit nuk ka arritur të mbijetojë. Pas trajtimit për disa javë, ai vdiq në Qendrën Klinike Universitare të Kosovës.

    Pasi Polici mori informacionin mëngjesin e së shtunës se Dema Kokollari ka humbur jetën në Klinikën Intensive, rasti mori kthesë tjetër dhe djali i tij u arrestua sërish.

    Trupi i pajetë i viktimës është dërguar në IML për obduksion, teksa me urdhër të Prokurorit të Shtetit, i dyshuari është intervistuar.

    Sinjali ka mësuar se i dyshuari që u ndalua lidhur me rastin është Shpend Kokollari.

    Ai është intervistuar, ku ka deklaruar se qëndron pas deklaratës që ka dhënë ditën kritike ku ka ndodhur rasti dhe më pas me urdhër të Prokurorit është dërguar në mbajtje për 48 orë.

    Incidenti në familjen Kokollari që përfundoi tragjikisht

    Siç merr vesh Sinjali, në dosjen e Prokurorisë për këtë rast thuhet se fillimisht Dema Kokollari, tashmë i ndjerë ishte kapur me bashkëshorten e tij.

    Debati verbal mes çiftit në orët e mbrëmjes të 19 majit eskaloi edhe më shumë dhe viktima dyshohej se e kishte kërcënuar gruan se do ta pësojë keq.

    E njëjta, sipas burimeve brenda Prokurorisë, ka kërkuar ndihmën e djalit të saj, i cili pasi ka arritur në dhomë, ka ndërhyrë, duke e larguar nënën e tij nga babai.

    Por, asgjë nuk kishte mbaruar këtu, pasi babë e bir u përleshën mes vete, ashtu që Dema i ndjerë dyshohet se kishte goditur djalin me tavolinë, e më pas ky i fundit e shtynë derisa ai rrëzohet dhe e humb vetëdijen.

    Ka qenë djali, tashmë i dyshuari, Shpendi, i cili kishte kërkuar ndihmën e Policisë, duke e raportuar rastin.

    Palët atë ditë janë dërguar për trajtim mjekësor e më pas kanë dhënë deklaratat e tyre para hetuesve policorë, ku kanë dëshmuar për atë që ka ndodhur.

    I ndjeri ishte dërguar më pas në QKUK për trajtim mjekësor, por që nuk arriti t’iu bëjë ballë plagëve.

    Ndryshe, brenda afatit ligjor pritet të ushtrohet edhe kërkesa për masën e sigurisë ndaj të dyshuarit./sinjali

  • Macron shpërndan Parlamentin francez pas fitores së të djathtës ekstreme

    Macron shpërndan Parlamentin francez pas fitores së të djathtës ekstreme

    Presidenti francez, Emmanuel Macron, e ka shpërndarë Parlamentin francez dhe ka shpallur zgjedhje të parakohshme, pas fitores së madhe të partisë së të djathtës ekstreme në zgjedhjet për Parlamentin Evropian.

    Sondazhet në Francë kanë treguar që lista e partisë së Marine Le Pen-it, Marshi Kombëtar, e udhëhequr prej Jordan Bardellas, ka dalë e para, me mbi 30 për qind të votave.

    Kjo parti nuk ka shënuar asnjëherë më parë një rezultat kaq të lartë.

    Lista e partisë së Macronit, Rilindja, e udhëhequr prej Valerie Hayer, ka dalë e dyta me 15.2 për qind të votave.

    Dalja në këto zgjedhje në Francë ka qenë rreth 51 për qind, pak më shumë se më 2019 – 50.12 për qind.

    Partitë e së djathtës ekstreme duket se kanë shënuar rritje të konsiderueshme edhe në Gjermani e Austri.

    Kështu, këto vende i bashkohen Holandës, çka jep shenjat e para se kthimi kah e djathta do të ndodhë në këtë institucion të BE-së.

    Partia e qendrës së djathtë, Partia Popullore Evropiane (EPP) pritet të jetë sërish grupi më i madh politik në Parlamentin Evropian, dhe që kandidatja e tij, Ursula von der Leyen të ketë edhe një mandat në krye të BE-së.

    Megjithatë, asaj do të mund t’i duhet mbështetja e nacionalistëve të krahut të djathtë, sikurse ajo e partisë italiane, Vëllezërit e Italisë, e kryeministres italiane, Giorgia Meloni për të siguruar shumicën në Parlament.

    Votimet për Parlamentin Evropian kanë nisur të enjten në Holandë dhe në disa shtete tjera të premten dhe të shtunën, por pjesa më e madhe e banorëve të BE-së kanë votuar të dielën.

    Parlamenti Evropian voton për legjislacione që janë kyçe për qytetarët dhe bizneset në bllokun me 27 vende anëtare. /REL

  • Kurti në 25-vjetorin e Marrëveshjes së Kumanovës: Kosova nuk i fal krimet e Serbisë

    Kurti në 25-vjetorin e Marrëveshjes së Kumanovës: Kosova nuk i fal krimet e Serbisë

    Kryeministri Albin Kurti, ka kujtuar 25-vjetorin e nënshkrimit të Marrëveshjes së Kumanovës, e cila i dha fund luftës në Kosovë, në rrafshin ushtarak e teknik dhe në atë juridik e ndërkombëtar.

    “Sot u bënë 25 vite nga dita e nënshkrimit të Marrëveshjes së Kumanovës, e cila i dha fund luftës në Kosovë, në rrafshin ushtarak e teknik dhe në atë juridik e ndërkombëtar. Më 9 qershor 1999, në Kumanovë u nënshkrua Marrëveshja Tekniko-Ushtarake mes Forcës Ndërkombëtare të Sigurisë (KFOR) dhe qeverive të Republikës Federative të Jugosllavisë dhe Republikës së Serbisë”, shkroi ai në Facebook.

    Shefi i qeverisë, tha se shteti dhe populli i Kosovës janë mirënjohës për ndihmën dhe mbështetjen ndërkombëtare, teksa nuk harrojnë dhe nuk i falin krimet e Serbisë.

    “Pas shumë vuajtjesh nën regjimet e Serbisë pushtuese, Kosova u çlirua dhe populli i saj nisi ndërtimin e një etape krejt të re historike. Duke i kujtuar ditët e fundit të luftës në Kosovë dhe ditët e para të çlirimit të Kosovës nga Serbia pushtuese. Sepse populli dhe shteti i Kosovës janë mirënjohës e falënderues për ndihmën dhe mbështetjen ndërkombëtare teksa nuk harrojnë dhe nuk falin krimet e Serbisë!”, u shpreh Kurti.

  • Pak interesim për blerje në tregun e veturave në Prishtinë

    Pak interesim për blerje në tregun e veturave në Prishtinë

    Përgatiti: Kastriot Tahiri

    Edhe këtë të diel në tregun e veturave erdhën me shpresën se dikush nga qytetarët do tua blejë veturat.

    Por një gjë e tillë nuk ndodhi ngase qytetarët, sidomos çmimet e veturave po i cilësojnë të pa përballueshme.

    “Kam ardhur të shikoj për një veturë…Një “Pasat” desha ta shikoj…Gjeta dy, por shumë shtrenjtë janë”, thotë një qytetar.

    Qytetarë të tjerë thonë se po vërejnë po ashtu numër të ulët të shitësve.

    “Mirëpo ka më pak shitës, kerret shtrenjtë shumë… Tash me telefon dhe në sallone të veturave po blejnë krejt. Mirëpo ka më pak shitës, kerret shtrenjtë shumë… Tash me telefon dhe në sallone të veturave po blejnë krejt”, thotë një tjetër qytetar.

    Por ata shitës që ishin, çmimet po i konsiderojnë normale.

    “Unë kam dalë të shes makinën, i kemi tre “Golf”-a…Më së shumti ka interesim për ta, pak më të lirë me çmim, këto tjerat është mungesë e lekëve…Ka blerës më pak…Pak ka ndikuar liberalizmi i vizave”, tha një shitës.

    Rënie të interesimit për blerje nuk pati vetëm për shitësit e automjeteve. Për interesim të ulët u ankuan edhe ata që ekspozuan mallra të tjera të ndryshme.

  • OSHP-ja pa IT që katër muaj, kishte dështuar edhe konkursi

    OSHP-ja pa IT që katër muaj, kishte dështuar edhe konkursi

    Përgatiti: Arton Hamiti

    Organi Shqyrtues i Prokurimit, tash e 4 muaj është pa zyrtar të teknologjisë informative. Madje, edhe konkursi i hapur për këtë pozitë dështoi meqë asnjëri nga kandidatët e paktë nuk i kishte marrë pikët e nevojshme.

    Mungesa e IT-së në një organ kaq të rëndësishëm, sipas atyre që e monitorojnë OSHP-në, krijon shumë problematika.

    “Mungesa e një specialisti të IT-së në këtë organ po shkakton probleme, në theks të veçantë ndikon direkt në transparencën e punës së këtij organi. Vendimet në uebfaqe tanimë në disa raste publikohen me vonesë, disa nga ekspertizat e ekspertëve nuk ngarkohen, mungojnë linqet e seancave dëgjimore dhe ka gabime në datat e publikimeve që shkaktojnë konfuzion te palët e interesit”, tha Dardan Gashi nga Demokraci Plus.

    Me këtë problematikë, po përballen edhe disa institucione të tjera publike. Sipas njohësve të kësaj fushe, sektori i IT-së preferon më shumë kompanitë private, kryesisht për shkaqe financiare.

    “Sektori privat ka avancuar tepër shumë krahas atij publik. Kjo nënkupton avancimin në karrierë, pra mundësi për me u zhvillu ma tutje kompensime financiare që institucionet qeveritare nuk kanë mujtë me e ndjekë këtë temp”, tha Çelik Nimani, drejtor menaxhues për Evropë Juglindore për KIN+CARTA.

    “Arsyeja më e madhe është ajo financiare. Tregu privat dhe ai shtetëror kanë dallim shumë të madh në paga. Nëse i krahasojmë atëherë raporti në rastin më të mirë është 1 me 3”, tha Kastriot Fetahaj, inxhinier i sigurisë kibernetike.

    Njohësit bëjnë thirrje që specialistët e teknologjisë informative të trajtohen me koeficient të veçantë.

    “Një prej hapave më urgjent që duhet të ndërmarrë Qeveria është trajtimi me një koeficient të veçantë për këtë sektor shumë të rëndësishëm për vendin”, tha Nimani.

    “Mendoj që një prej gjërave që duhet të bëhen është që sektori i IT-së të ketë kontrata specifike, duhet të ketë pagesa specifike”, tha Fetahaj.

    Koeficienti i pagës për zyrtarët e teknologjisë informative është 5.2, ku me vlerën aktuale të koeficientit prej 110 eurove, ata paguhen 572 euro në muaj.

  • Nga viti i ardhshëm Kosova forcon kapacitete ajrore ushtarake

    Nga viti i ardhshëm Kosova forcon kapacitete ajrore ushtarake

    Përgatiti: Fatlum Jashari

    Më 2025, Forca e Sigurisë së Kosovës hyn në fazën e tretë të planit dhjetëvjeçar gjithëpërfshirës të tranzicionit, e cila parasheh investime prej qindra miliona eurosh në pajisje ushtarake ajrore dhe tokësore.

    Deri në përmbyllje të transformimit, fazë që do të zgjasë së paku pesë vjet, parashihet blerja e helikopterëve të lehtë ushtarak dhe atyre të mesëm transportues, si dhe autoblindave e tankeve.

    Pa dhënë detaje për armët dhe pajisjet, të cilat i parasheh plani, Ministria e Mbrojtjes konfirmoi se do të fokusohen në ngritjen e kapaciteteve ajrore.

    “Dronët Bajraktar e sistemi OMTASH janë vetëm disa nga pajisjet, të cilat FSK-ja tashmë i ka në dispozicion, përderisa jemi duke vazhduar procesin për blerjen e sistemit Javelin dhe sistemeve të tjera. Pas përfundimit të fazës së dytë të PGJT-së, në vitin 2025 do të fokusohemi në ngritjen e kapaciteteve ajrore, duke përmbyllur kësisoj planin dhjetëvjeçar për të vazhduar pastaj në vazhdimësi investimet konform planeve operacionale të FSK-së, si një Forcë profesionale dhe multietnike”, thuhet në përgjigjen nga Ministria e Mbrojtjes.

    Pasi përmendi rëndësinë e koordinimit me SHBA-në, që nga hartimi dhe miratimi i ligjit dhe planit, profesori Mensut Ademi theksoi se, fillimisht, FSK-ja ka ngritur kapacitetet humane.

    “Së pari djemtë dhe vajzat tona, të rinj, kanë arritur shkëlqyeshëm të kenë trajnime adekuate për përdorimin e armatimit… Ata janë duke mbajtur dhe arritur trajnime adekuate qoftë në SHBA, Turqi, Britani apo shtete të tjera mike”, tha Ademi.

    Armatimi në të cilin do të investojë Kosova, sipas ekspertëve, do të jetë kryesisht për qëllime mbrojtje.

    “Armatim për parandalim, paralizim, pengim të pajisjeve apo armatimit që na rrezikon neve, në këtë rast nga Republika e Serbisë. P.sh. ne kemi parë ‘iron-dome’ në Izrael dhe ne kemi shumë mundësi të kemi një të tillë, sepse për momentin rrezikun më të madh nga Serbia, përpos aspektit tokësor, e shohim në atë ajror, e cila është ajo – jo aviacioni, por dronët, sidomos ata kamikazë”, tha Ademi.

    “Janë helikopterët, sistemi i dronëve të ndryshëm, sistemi anti-raketor. Janë tri komponentët kryesorë, me të cilët sipas të gjitha gjasave FSK-ja do të përmbyllë në fazën e tretë sa më parë… edhe sistemi anti-dron sipas të gjitha gjasave në fazat në vijim do të jetë në shfrytëzim të strukturave të sigurisë dhe mbrojtjes të Republikës së Kosovës, meqenëse Serbia ka avancuar me sistemet e dronëve”, tha Drizan Shala, ekspert i sigurisë.

    Ministria e Mbrojtjes njoftoi se në tri vjetët e fundit janë investuar rreth 200 milionë euro.

    Muajin e kaluar, presidentja Vjosa Osmani vizitoi kompaninë e helikopterëve Bell në SHBA, ndërsa kryeministri Albin Kurti fabrikën e dronëve Bajraktar në Turqi.

  • Mesatarisht 13 minuta llogaritet koha e reagimit të Policisë

    Mesatarisht 13 minuta llogaritet koha e reagimit të Policisë

    Përgatiti: Driton Sadiku

    Thirrje të tilla, policia pranon me mijëra gjatë ditës.

    Ata janë të parët që u përgjigjen qytetarëve kur janë në telashe.

    Posa pranojnë thirrjen, menjëherë e nisin patrullën më të afërt të policisë për në vendngjarje.

    “Pasi ta pranojmë informatën, varësisht nga lokacioni i incidentit caktohet stacioni përgjegjës për atë rast, p.sh nëse është në Prishtinë, Prishtina i ka tri stacione dhe varet nga rasti ku ka ndodhë, ai stacion angazhohet dhe e angazhon njësinë përkatëse për intervenim”, tha Rreshter Ramë Kryeziu, U.D. i udhëheqësit të “Qor Alfa Kontroll”.

    E atyre iu duhen mesatarisht 13 minuta prej kur marrin detyrën për të mbërritur në destinacion, megjithëse për këtë ndikojnë disa faktorë.

    “Për kohën e reagimit ndikojnë shumë faktorë, varet se kur ka ndodhur rasti, p.sh. a ka ndodhur ditën, periudha kur është fluksi më i madh”, tha Kryeziu.

    Mesatarja prej 13 minutave vlerësohet si reagim i shpejtë edhe nga njohës të çështjeve të sigurisë.

    “Duke e ditur faktin se në rrugët e Kosovës, sidomos në kryeqytet ka kolona të vazhdueshme, arritja në vendin e ngjarjes si mesatare për 13 minuta tregon një performancë cilësore, një shkathtësi, gatishmëri dhe një përgjegjësi të policisë që ti përgjigjet thirrjeve, denoncimeve të qytetarëve”, tha Fatmir Qollakaj, profesor i lëndëve të sigurisë.

    Në nivel vendi, policia ka 8 qendra të thirrjeve 192, që mbulojnë të gjitha regjionet.

  • Më shumë vizitorë se sa blerës në “Panairin e Librit 2024”

    Më shumë vizitorë se sa blerës në “Panairin e Librit 2024”

    Përgatiti: Kastriot Tahiri

    Tituj librash të ndryshëm u ekspozuan edhe këtë të diel, në ditën e fundit të edicionit të 24-të të Panairit të Librit. Por libradashësit thonë se nuk po mund të blejnë aq sa dush.

    Sipas tyre, çmimet e librave janë të larta, ndërsa as ofertat nuk janë aq joshëse.

    “Sa herë mbahet vij dhe nuk shpëtoj pa ble ndonjë libër, por çmimet çdo vit po rriten nga pak”, tha Edon Mustafa, vizitor.

    “Librat e mirë po çmimet kanë qenë tek disa libra që mendoj që janë më të mirë pak sa të shtrenjta”, tha Fahri Avdiu, vizitor.

    Edhe shtëpitë botuese pohojnë se nuk pati interesim sa pritej.

    “Pritjet ishin më të mëdha por këtë vit ka pas ndryshime, ka pas vizitor më pak e po ashtu edhe blerës”, tha Urim Sallauka nga Shtëpia Botuese AAB.

    “Viteve të fundit është vërejtur një rënie graduale e vizitorëve t panairit të librit”, tha Ylli Mollaj nga Shtëpia Botuese “Bot Art”.

    Megjithatë për numrin e vogël të vizitorëve, organizatorët kanë një arsyetim.

    “Vërehet një rënie, e kjo na shpie në bindje se formati i arritjes së librit deri te lexuesi ka ndryshuar, por kjo nuk do të thotë se ka lexues më pak”, tha Edon Zeneli, organizator.

    Në ditën e fundit të panairit, u organizua edhe ceremonia e ndarjeve të çmimeve.

    Çmimin për veprimtarinë e jetësore e mori autori Rexhep Qosja, ani pse u desh pak insistim nga ana e jurisë, meqë ai këmbëngulte se një çmim të tillë duhet të jepej për një autor të ri.

    Ndërkaq çmime pati edhe për autorin e vitit, romanin më të mirë, poezinë si dhe për letërsinë e fëmijëve.

  • Liqeni i Batllavës, atraksion pa investime e me mbeturina

    Liqeni i Batllavës, atraksion pa investime e me mbeturina

    Përgatiti: Armand Hoti

    Edhe këtë verë, Nuh Ibishi po lundron me varkën e tij në ujin e kthjellët të Liqenit të Batllavës.

    Për 15 vjet me radhë, Ibishi priti e përcolli shumë pushues në mjetet e tij të lundrimit, që ditët e nxehta, i kalojnë në njërin nga liqenet më të mëdhenj të Kosovës.

    Me këtë punë, thotë se e siguron bukën e gojës.

    “Biznes i mirë është, por mundë edhe të mos jetë i mirë, por kur nuk ke zgjidhje tjetër, duhet të merrem me këtë. E dua këtë punë”, tha Ibishi.

    Sipas tij, viteve të fundit ka rënë numri i pushuesve. Prandaj, ai kërkon më shumë investime këtu.

    “Po të kishte qeveri siç duhet, këtu krejt do mbushej rërë, nga atje deri tek plepat aty, në mënyrë që të mos shkojmë as në Shqipëri as në Mal të Zi, këtu do kishim punë, s’do kishte nevojë të shkonim atje”, tha Ibishi.

    Të dielën vendosi ta kalojë këtu edhe Isa Ramadani. Por ky shprehet i zhgënjyer me pushuesit që, sipas tij, po e ndotin ambientin.

    “Kisha lut që këta të cilët vijnë këtu dhe pushojnë këto mbeturina mos t’i hedhin por le t’i dërgojnë në vend të caktuar”, tha Ramadani.

    Mirëpo, buzë liqenit, nuk ka kontejnerë.

    “I kisha lut këta kush e ka përgjegjësinë, t’i sjellin kontejnerët sa më shpejtë, t’i vendosin që mbeturinat të shkojnë aty aty dhe jo në këtë vend aq të bukur”, tha Ramadani.

    Madje, këtu nuk ka as banjo publike.

    Liqeni i Batllavës përdoret në raste edhe për gara sportive.

  • Kuvendi gjithëserb, mesazh i rrezikshëm për Kosovën

    Kuvendi gjithëserb, mesazh i rrezikshëm për Kosovën

    Përgatiti: Haris Ademi

    Unifikimi i politikës, akademisë dhe kishës serbe, në Kuvendin Mbarëserb të shtunën në Beograd, po shihet si një nga mesazhet më të rrezikshme në drejtim të shtetit Kosovës.

    Në deklaratën e përbashkët shkruhet se Kosova e Metohia është pjesë e patjetërsueshme e Serbisë, ndërsa përkrah Serbinë në përpjekjen e ruajtjes së integritetit territorial.

    Ndërsa thuhet që serbët e Kosovës dhe qytetarët tjerë besnik të Serbisë, duhet t’i mbrojnë me të gjitha mjetet manastiret, kishat, pronat privat dhe varrezat.

    “Kjo paraqet një rrezik serioz për Kosovën, meqë fjala është për një zotim institucional të cilin po ashtu”, tha Jusuf Buxhovi, historian.

    Historiani Jusuf Buxhovi vlerëson se qeveria Serbisë dhe e Republika Srpskas në Bosnje e Hercegovinë, e kanë bërë qëllimshëm këtë organizim, që t’i deponojë kartat më ekstreme anti-Kosovë.

    “Serbia e din se me këtë nuk mund të luftohet shteti i Kosovës, sepse është i pranuar ndërkombëtarisht, dhe është fryt i aleancës veriatlantike me amerikanët dhe interes i tyre gjeostrategjik, por dëshiron që sa më shumë ta defunksionalizojë”, tha Buxhovi.

    Buxhovi thotë se institucionet kosovare duhet të insistojnë të ndërkombëtarët që diskursi qortues të drejtohet tashmë kah Beogradi. Përndryshe, propozon që Kosova të vendos njëanshëm në dy çështje me shumë rëndësi.

    “Kosova në mënyrë të njëanshme t’i zgjidh problemet që dalin prej zotimeve të Ahtisaarit, si Asociacioni i Komunave Serbe, por pa obligime ekzekutive, dhe në të njëjtën kohë, ta aprovojë Ligjin për Bashkësitë Fetare në Kosovë, sepse e detyron Kishën Ortodokse Serbe, me gjithë ato privilegje të Pakos Ahtisaarit, ta fus në kornizën e bashkësive fetare të Kosovës”, tha Buxhovi.

    Për Kuvendin Gjithëserb ka alarmuar edhe Lidhja Demokratike e Kosovës.

    “Alarmi i djeshëm në Beograd, për ne që i njohim shpërthimet e tyre fashiste në vazhdimësi, është kurdisje e një bombe që mund të shpërthejë në çdo çast!”, thuhet në reagimin e LDK-së.

    Deklarata e përbashkët pritet të miratohet brenda 90 ditëve në Kuvendin e Serbisë dhe të Republika Srpskas.