Blog

Për herë të parë që nga Lufta e Ftohtë, Gjermania ka përditësuar planet e saj në rast lufte në Evropë.

Ministrat federalë shohin një kërcënim në Rusi dhe në përputhje me rrethanat ndryshuan udhëzimet në dokumentin 67 faqesh, i njohur si Direktiva Kuadër për Mbrojtjen Totale. Versioni i fundit u publikua javën e kaluar dhe parashikon një transformim të plotë të jetës së qytetarëve gjermanë në rast lufte.

Tashmë është e qartë se Gjermania, e cila ka mbajtur një qëndrim antimilitarist qe nga fundi i Luftës së Dytë Botërore, është detyruar nga një kombinim rrethanash të rregullojë politikën e sigurisë dhe ushtarake në dritën e konfliktit rus në Ukrainë.

Në kushte lufte do të rivendosej rekrutimi i detyrueshëm në ushtri dhe do të merrnin pjesë punëtorë të kualifikuar mbi 18-vjeç duke bërë punë të ndryshme. Ekspertiza profesionale e mjekëve, psikologëve, infermierëve dhe veterinerëve mund të ridrejtohet në shërbimin ushtarak.

Dokumenti përmend gjithashtu racionalizimin e burimeve dhe ushqimit si një nga hapat në rast të një gjendje lufte.

Në rast të mungesës së ushqimit, qeveria do të siguronte furnizime për t’i siguruar çdo qytetari një vakt të ngrohtë në ditë për një periudhë të pacaktuar.

Burimet kryesore si nafta dhe benzina do të racionalizoheshin me kuponë dhe masat e mbrojtjes civile përfshijnë kthimin e metrosë në bunkerë dhe përgatitjen e spitaleve për një fluks pacientësh, shkruan CNN.

Magjistralja Podujevë – Prishtinë është ngarkuar shumë kohëve të fundit, sidomos pasi që kanë filluar punimet në disa pjesë të kësaj magjistrale në të njëjtën kohë. Përveç ngarkesave të shumta, pluhuri dhe vonesat janë bërë të padurueshme për bizneset në këtë magjistrale.

EO ka biseduar me disa pronarë të bizneseve ngjitur kësaj rruge, të cilët shprehen të zhgënjyer me vonesat.

Disa prej tyre apelojnë tek institucionet që punimet të kryhen sa më shpejt.

Sami Azemi, banor i fshatit Shakovicë të Podujevës, ka thënë se shkak i pluhurit nga punimet, ka rënë puna e bizneseve.

Ndonëse është i kënaqur me nisjen e punimeve, ankesat i ka ndaj kompanisë për shkak të pluhurit.

“Siç po e shihni për momentin është tmerr i zotit. Po shpresoj që kjo bahet për të mirën e krejt këtij nacionaliteti dhe besoj që do jetë shumë më mirë, edhe pse fluksi i punës siç duke veç ka rënë pak nuk jemi shumë të kënaqur me punën, por besoj që mirë është prapë, pluhur ka shumë sidomos pas orarit të punës se këta punojnë deri diku në ora 17 mbrëmje dhe nuk po i rrinë gati me këtë pompën me e largu pluhurin, ajo është koha më e keqe për neve, siç po e shihni shtëpitë janë shumë afër rrugës, pluhuri është ekstrem i madh, besoj që po, ka me përfundua ka me qenë për të mirën tonë, sidomos këta që udhëtojnë Podujevë-Prishtinë”.

“Ka me qenë shpëtim për ta, veç dashtë Zoti behet sa me shpejt. Këto punimet në rrugë tash për tash shumë po i pengojnë bizneset edhe pse edhe në të ardhmen kanë me i pengu sepse do behet me barrikadën në mes shembull, ka me qenë shumë problem për bizneset, për momentin s’po flasim hiç, puna ka rënë më shumë se 50 për qind nëpër secilin biznes e kafiteri, po kurrgjë mos të bëfshin ujë kemi me shpenzu tri herë më shumë se zakonisht, duhet me ujit këndej përpara edhe pse është shumë pa efekt sepse pluhuri bartet prej pjesës tjetër na gjuhet këtu prapë veç do Zoti i dhënë zor më shumë dhe e kryejnë në afat të caktuar”, u shpreh ai.

Por ndryshe nga Azemi mendon qytetari tjetër, Safedin Elezi, i cili ngjitur në këtë rrugë ka një biznes familjar.

Ai ka thënë se punimet po e pengojnë në të bërit biznes, teksa apelon që këto punime të kryhen sa më shpejt.

“Sa i përket rrugës, mirë është duke shkuar shumë. Një herë për një herë, edhe janë duke punuar shpejt edhe mirë, për biznes po na pengon po s’kemi çka të bëjmë. Më mirë të rregullohet njëherë e përgjithmonë se çdo vjet me mbet duke pas probleme me rrugë e aksidente. Po ujisin si e dhe e patë por në biznes na ka pengue fort, shumë sivjet, s’mundesh me mbajt kurrë e as asgjë prej pluhurit, nuk kanë faj nuk është problemi i tyre por i zgjerimit të rrugës që po bëhet ka shumë pluhur, kishim bërë apel tek Qeveria edhe pse mirë është duke punuar shumë por kishim thënë që sa të është e mundur me punu më shpejt që me i liru bizneset, por ajo nuk varet prej neve, varet prej tyre, varet prej kushteve klimatike prej të gjithave, se firma është duke punuar mirë”, u shpreh ai.

E gjithë Europa është e kërcënuar nga Rusia, aksionet janë shumë të larta. Joe Biden e tha këtë në një konferencë shtypi në Paris me presidentin francez Emmanuel Macron, duke falënderuar “aleatët evropianë” për punën e bërë deri më tani dhe mbështetjen për Ukrainën.

“Putini nuk do të ndalet në Ukrainë. E gjithë Europa do të kërcënohet, ne nuk do ta lejojmë këtë të ndodhë. Shtetet e Bashkuara po qëndrojnë fort me Ukrainën. Ne nuk do të largohemi”, u tha Biden gazetarëve gjatë vizitës së tij shtetërore në Francë .

Nga ana e tij presidenti francez e falënderoi homologun amerikan për besnikërinë dhe respektin ndaj europianëve.

“Unë ju falënderoj zoti President, që jeni presidenti i fuqisë numër një në botë, por që e bëni këtë me besnikërinë e një partneri që i pëlqen dhe respekton evropianët”.

Të dy liderët Biden dhe Macron të premten u takuan me presidentin ukrainas Volodymyr Zelensky në Paris, duke u zotuar për mbështetje për kauzën ukrainase.

Franca dhe Shtetet e Bashkuara gjithashtu do të dyfishojnë përpjekjet e tyre të përbashkëta për të shmangur rritjen e mëtejshme të tensioneve në Lindjen e Mesme , veçanërisht për të ulur tensionet midis Izraelit dhe Hezbollahut në Liban, u tha Macron gazetarëve.

Macron tha se Parisi dhe Uashingtoni kishin parë përshkallëzim nga Irani në rajon dhe se të dy vendet ishin të vendosura për të ushtruar presionin e nevojshëm për të ndaluar këtë prirje.

Presidenti amerikan ndodhet në Francë që nga e mërkura dhe mori pjesë në përkujtimet e kësaj jave që shënuan 80-vjetorin e zbarkimit të Ditës D që ndryshuan rrjedhën e Luftës së Dytë Botërore .

Të premten, Biden paralajmëroi për nevojën për të ruajtur demokracinë amerikane dhe tërhoqi paralele midis Luftës së Dytë Botërore dhe pushtimit rus të Ukrainës.

Asambleja Kombëtare e entitetit serb të Bosnje-Hercegovinës, Republikës Sërpska, do të mbajë një seancë në fillim të korrikut, për të ratifikuar Deklaratën e “Kuvendit gjithëserb”, të nënshkruar më 8 qershor.

Kështu ka thënë kryetari i Asamblesë, Nenad Stevandiq.

“Kuvendi gjithëserb” është mbajtur më 8 qershor në Beograd.

Përgjatë takimit, Qeveria e Serbisë dhe ajo e Republikës Sërpska, e kanë nënshkruar Deklaratën për mbrojtje të të drejtave kombëtare dhe politike dhe për të ardhmen e përbashkët të popullit serb.

Presidenti serb, Aleksandar Vuçiq, ka thënë se dokumenti i referohet Marrëveshjes së Dejtonit – që i ka dhënë fund luftës në Bosnje – dhe nuk përmend përçarjet aty.

Ky dokument duhet të miratohet nga parlamentet e dy palëve brenda 90 ditëve.

Stevandiq i ka thënë Radiotelevizionit të Serbisë, më 9 qershor, se dokumenti i miratuar nuk ka të bëjë me ndonjë “Serbi të madhe”, por për mbrojtjen e të drejtave të serbëve në të gjitha vendet.

Në organizimin e 8 qershorit kanë marrë pjesë edhe pjesëtarë të Listës Serbe, partisë më të madhe të serbëve në Kosovë, e cila gëzon mbështetjen e Beogradit zyrtar.

Presidenti serb ka thënë se ky dokument përmend edhe Kosovën edhe Rezolutën 1244.

“E kemi përmendur qartë edhe dialogun si rrugë thelbësore për zgjidhje të problemeve mes nesh dhe shqiptarëve. Nuk ka zgjidhje tjetër përveç dialogut”, ka thënë ai.

Përgjatë takimit është insistuar në, siç është thënë, “përdorimin e emrit të plotë të provincës jugore serbe – Kosova dhe Metohija” – si referencë për shtetin e Kosovës.

Çfarë thuhet për Kosovën?

Përveç pjesës për emrin, në Deklaratë përmendet edhe që Kosova “është pjesë e patjetërsueshme e Serbisë”, dhe që Kuvendi gjithëserb mbështet përpjekjet e Republikës së Serbisë për ruajtjen e integritetit territorial dhe sovranitetit, të garantuar me ligjin ndërkombëtar, Rezolutën 1244 dhe rezolutat tjera të Këshillit të Sigurimit të Kombeve të Bashkuara.

Mes tjerash përmendet që serbët në Kosovë, si dhe gjithë qytetarët tjerë që janë besnikë të Serbisë, duhet të mbrojnë manastiret, kisha, pronat private, varrezat dhe objektet tjera të rrezikuara.

Nënshkruesit e Deklaratës i kanë dënuar edhe ato që i kanë konsideruar kushte të patolerueshme të jetesës së serbëve në Kosovë, të krijuara prej autoriteteve të Prishtinës, por pa përmendur ndonjë fakt konkret.

Në një pikë tjetër është përmendur edhe nevoja e krijimit të Asociacionit të komunave me shumicë serbe në Kosovë, dhe vazhdimi i dialogut Kosovë-Serbi në Bruksel, si mënyra e vetme e qëndrueshme për zgjidhje të problemit.

Serbia nuk e njeh pavarësinë e Kosovës dhe angazhohet vazhdimisht në fushata lobuese kundër Kosovës.

Dy vendet dialogojnë në Bruksel, për normalizim të marrëdhënieve, qysh prej vitit 2011.

Palët kanë nënshkruar një mori marrëveshjesh, por jo të gjitha janë zbatuar. /REL

Shërbimi i Kërkim-Shpëtimit Malor të Kosovës ka nisur një operacion të kërkim-shpëtimit në malet e Sharrit dje.

Pas identifikimit të pozicionin e tij gjeografik anëtarë nga stacioni i Prizrenit dhe i Gjilanit menjëherë janë nisur për kërkimin e tij.

Pas një kohë të shkurtë është bërë lokalizimi i personit të humbur, i cili kishte mbetur i bllokuar në një greminë ndër majën e Livadheve.

Gjendja e tij shëndetësore ka qenë stabile, por në mungesë të veshmbathjes adekuate ka patur të ftohtë.

Të humburit i është dhëna ndihma e parë duke e ngrohur dhe ushqyer, pastaj është evakuar deri te patrulla e policisë në qendrën skitare të Brezovicës.

Postimi i plotë:

KOMUNIKATË Në orët e vona të mbrëmjes së datës 08.06.2024 ShKShMK ka pranuar një thirrje emergjente nga një shtetas i huaj.Personi në fjalë gjatë një aktiviteti bjeshkatar në zonën e qendrës skitare të Brezovicës ( luginën e majës së Livadheve) , në llogaritje jo të duhur të kohës dhe mungesë të pajisjeve adekuate, shkaku i erësirës kishte humbur orientimin.

Një ekip i ShKShMK i përbërë me anëtarë nga stacioni i Prizrenit dhe i Gjilanit menjëhërë kanë identifikuar pozicionin e tij gjeografik dhe janë nisur për kërkimin e tij.Pas një kohë të shkurtë është bërë lokalizimi i personit të humbur, i cili kishte mbetur i bllokuar në një greminë ndër majën e Livadheve.

Fatmirësisht gjendja e tij shëndetësore ka qenë stabile, por në mungesë të veshmbathjes adekuate ka patur të ftohtë.Të humburit i është dhëna ndihma e parë duke e ngrohur dhe ushqyer, pastaj është evakuar deri te patrulla e policisë në qendrën skitare të Brezovicës.

Apelojmë te gjithë bjeshkatarët dhe vizitorët e maleve në RKS dhe rajon që të kenë kujdes në planifikimin e aktiviteteve të tyre dhe të posedojnë pajisje adekuate.E falenderojmë Policinë e Kosovës për bashkëpunim dhe gatishmërinë e treguar.

Mësimdhënësit në Kosovë kanë arritur t’i marrin mjetet e tyre që u takojnë përmes kontratës kolektive, ndërsa dëmi për komunat llogaritet të jetë dhjetëra milionësh.

Nga Sindikata e Bashkuar e Arsimit, Shkencës dhe Kulturës (SBAShK), kanë thënë për Ekonomia Online se mësimdhënësit kanë filluar t’i marrin mjetet, ndërsa nga Asociacioni i Komunave të Kosovës, këtë vendim e quajnë të “dëmshëm për komunat”.

Kryetari i SBAShK-ut, Rrahman Jasharaj, ka thënë se fajtor për këtë vendim është niveli qendror, ndërsa ndjen keqardhje për komunat që duhet t’i paguajnë këto mjete.

“Duke e parë që komunat që fatkeqësisht iu bie barra dhe që fatkeqësisht niveli qendror nuk iu ndihmoi për të realizuar obligimet që i kanë me kontratë, atyre iu ka ra barra në buxhetet e tyre por kolegët e mi, punëtorët e çerdhes dhe të arsimit parauniversitar e t[ë universiteteve, të drejtat që iu siguru kontrata kolektive i kanë arrit përmes gjykatave dhe dua të them me plotë përgjegjësi që çdo lëndë deri tani që ka shkuar në Gjykatë, kanë sjellë vendim pozitiv për anëtarët tanë dhe ata i kanë marrë, qoftë shujtat, qoftë tri pagat me rastin e pensionimit, qoftë pagat jubileare. Tash është një risi. Kanë filluar gjykatat të vendosin për dallimin ndërmjet ngritjes profesionale që iu është dhënë dikur por që nuk iu ishte dhënë pjesa tjetër, ngase vendimi dhe kontrata thotë se është me përqindje dhe bazohet në pagën ekzistuese”, ka thënë Jasharaj.

Krahas marrjes së tri paga me rastin e pensionimit, Jasharaj ka thënë se mësimdhënësit po i marrin mjetet edhe për ndryshimet për ngritje profesionale.

“Këta (mësimdhënësit) kanë kërkuar përmes avokatëve që ndryshimi për ngritje profesionale të jetë i bazuar në pagën e fundit dhe janë duke i realizuar, që është goxha është një kosto dhe po ju kushton komunave. Ne po ndihemi po ndihemi shumë keq së bashku me komunat, ne me komunat kemi mirëkuptimin e plotë dhe fatkeqësisht po themi se niveli qendror po i dënon komunat sepse ato para ishte dashtë t’ua jap me kohë në mënyrë që komunat t’i realizonin sepse i kanë punëtorë të tyre”, ka thënë tutje Jasharaj, raporton Ekonomia Online.

Por, nga Asociacionit i Komunave të Kosovës thonë se miliona euro do të mirren nga investimet kapitale të komunave. Andaj, drejtori ekzekutiv i AKK-së, Sazan Ibrahimi, ka bërë apel tek institucionet që këto mjete të mos i paguajnë komunat.

“Komunat këtë vit por edhe viteve të kaluara, janë dëmtuar me dhjetëra miliona euro. Asociacioni i Komunave i Kosovës që nga fillimi kur janë nënshkruar kontratat kolektive ka kërkuar Qeveria që ta marrë barrën financiare sepse nënshkruesit e kontratave kolektive është niveli qendror dhe jo komunat, dhe komunat janë duke humbur me dhjetëra miliona euro por këto miliona po merren nga vijat buxhetore në shumicën absolute të rasteve për investime kapitale dhe qytetarët e komunave të Kosovës nuk po mund t’i gëzojnë këto të mira sepse po merren për kontrata kolektive”, ka thënë Ibrahimi.

Që nga vendimi i vitit 2022, kur Gjykata Themelore në Prishtinë vendosi në favor të mësimdhënësve, dëmi i shkaktuar ndaj komunave është 35 milionë euro, ndërsa shifra në total që pritet t’i mirren komunave mund të shkojë deri në 70 milionë euro.

“Asociacioni i Komunave të Kosovës në asnjë rast nuk ka qenë dhe nuk është kundër kontratave kolektive por është kundër marrjes së mjeteve financiare nga komunat sepse komunat nuk janë nënshkruese të kontratave kolektive. Komunat e Kosovës kanë kërkuar edhe përmes Gjykata që këto mjete tu kthehen në buxhetet e tyre sepse niveli qendror është nënshkrues i kontratave kolektive. Deri në vitin 2022 kur komunat kanë kërkuar përmes Gjykatës Themelore të Prishtinës që të rimbursohen, dëmi financiar ka qenë rreth 35 milionë euro, pra para dy viteve. Tani, janë edhe me dhjetëra miliona euro dhe po besojmë që në total shifra e cila do t’i merren komunave, do të jetë mbi 70 milionë euro”, u shpreh Ibrahimi.

Zëdhënësja e Bashkimit Evropian në Kosovë, Ioanna Lachana, thotë në një intervistë për The Geopost se në Kosovë, Rusia përpiqet të përhap narrativa pro-Kremlinit dhe të hedh çdo gjë që është pro-perëndimore në një dritë negative.

“Ajo që po shohim, sidomos në Kosovë, është kjo narrativë ruse anti-perëndimore. Ata po përpiqen të përhapin këto narrativa pro-Kremlinit dhe të hedhin çdo gjë që është pro-perëndimore në një dritë negative”, tha ajo.

“Pra, ajo që shohim këtu është se Rusia po përpiqet të prishë rrugën e qartë të BE-së të të gjashtë partnerëve të Ballkanit Perëndimor dhe të ngjall frikë dhe urrejtje në mënyrë që më shumë njerëz të mbështesin rrugën e BE-së ose partnerët e Ballkanit Perëndimor më pak”.

Po ashtu, ajo ka theksuar se ndikimi i Rusisë po përhapet në të gjithë rajonin, megjithëse në shkallë të ndryshme.

“Për shembull, ne e dimë shumë mirë që në Beograd kemi RT Balkans dhe Sputnik Serbia. Këto media, natyrisht, përhapin propagandën e Kremlinit dhe e portretizojnë çdo gjë që është perëndimore si negative”, shtoi.

“Por as Kosova nuk është imune ndaj propagandës ruse. Siç e përmenda më herët, ka disa narrativa, narrativa ruse të bazuara në Kremlin, për shembull për dialogun e sponsorizuar nga BE, se marrëveshja e Ohrit ishte diçka si shantazh, le të themi. Kështu është paraqitur në mediat ruse”.

Megjithatë, Lachana thekson se në Kosovë ka shumë mbështetje për integrimin në BE dhe natyrisht një popullatë properëndimore.

Derisa thotë se ndikimi i Rusisë po përhapet në të gjithë rajonin, zëdhënësja e BE-së në Kosovë thekson se e njëjta përdor taktika të ndryshme.

Ajo tërheq vëmendjen për kujdes, pasi thekson se dezinformatat ruse, sidomos në Kosovë, mund të nxisin tensione.

“Ata përdorin llogari të rreme, bot, përdorin shumë rrjetet sociale, përdorin shumë inteligjencën artificiale, por edhe përkthimin me makinë, në mënyrë që produkti i tyre të bëhet i disponueshëm për gjithnjë e më shumë audienca. Në momentin që propaganda përsëritet, mund të ketë njerëz që fillojnë të ushqejnë ndjenjat anti-perëndimore propagandë lidhur me tensionet ndëretnike se këtu mund të shpërthejë një luftë e re”.

Për strategjinë e re të SHBA-së për të luftuar dezinformimin në Evropë, veçanërisht në Ballkan, Lachana potencon se përfshinë mbështetjen e demokracive, mbështetjen e mediave të lira si dhe mbrojtjen e të drejtave të njeriut./ap