ATV

Blog

  • Manchester City mund të luajë në Ligën e Kampionëve edhe nëse dënohet me rënie nga kategoria

    Manchester City mund të luajë në Ligën e Kampionëve edhe nëse dënohet me rënie nga kategoria

    Manchester City mund të ruajë në mënyrë befasuese të drejtën për të luajtur në Ligën e Kampionëve edhe sezonin e ardhshëm, madje edhe nëse Premierleage e ndëshkon rëndë klubin, deri në pikën e rënies nga kategoria.

    Figura të rëndësishme të futbollit janë gjithnjë e më të shqetësuara se klubi anglez mund të shfrytëzojë një boshllëk në rregulloren e licencimit të UEFA-së për të vazhduar pjesëmarrjen në garat evropiane.

    Pavarësisht rrezikut të një ndëshkimi të rëndë në futbollin vendas, drejtues të lartë të këtij sporti besojnë se City mund të luajë sërish në Ligën e Kampionëve sezonin e ardhshëm. Sipas BBC Sport, skuadra mund të sigurojë kualifikimin duke fituar këtë sezon kompeticionin më prestigjioz evropian për klube.

    Aktualisht, nuk ekziston asnjë mekanizëm automatik që përjashton një klub nga garat evropiane nëse ai kualifikohet falë rezultateve sportive. Kjo mundësi ka shkaktuar shqetësim te drejtuesit e futbollit, të cilët e konsiderojnë të papranueshme që City të përfitojë të ardhura të mëdha nga pjesëmarrja në elitën e futbollit evropian, nëse ndaj tij shqiptohet një ndëshkim i rëndë.

    Çështja kryesore lidhet me licencën e UEFA-së, e cila është e domosdoshme për pjesëmarrjen në garat evropiane. Sipas raportimit të GiveMeSport, licenca e Manchester Cityt është ngritur si një çështje serioze shqetësimi. Burimi thekson se zgjidhja e situatës do të kërkonte një koordinim mes palëve, i cili deri më tani ka munguar.

    Federata Angleze e Futbollit (FA) është përgjegjëse për dhënien e licencave evropiane, por këtë detyrë ia ka deleguar Ligës Premier. Megjithatë, organi drejtues nuk mund t’ia refuzojë licencën një klubi nëse ai përmbush të gjitha kriteret minimale të përcaktuara.

    Kjo situatë ngre pikëpyetje mbi mënyrën se si do të trajtohej pjesëmarrja e Manchester Cityt në garat evropiane në rast të një ndëshkimi të rëndë në futbollin anglez.

     

  • Albi Mall Superliga e Kosovës vazhdon sot me dy ndeshje të xhiros së tetë

    Albi Mall Superliga e Kosovës vazhdon sot me dy ndeshje të xhiros së tetë

    Albi Mall Superliga e Kosovës vazhdon sot (e shtunë) me dy përballje në kuadër të xhiros së tetë, ku Vushtrria pret Gjilanin, ndërsa Drenica përballet me Feronikeli ’74.

    Pas dy ndeshjeve të së premtes, ku u përballën Llapi me Ballkanin dhe Drita me Malishevën, kampionati kosovar vazhdon sot me dy duele të tjera.

    Ndeshja e parë zhvillohet nga ora 14:00, ku Vushtrria do të jetë nikoqire e Gjilanit në stadiumin “Zahir Pajaziti” në Podujevë. Të dyja skuadrat synojnë të marrin pikë të rëndësishme për të përmirësuar pozitat e tyre në tabelën e klasifikimit.

    Ndërkohë, vëmendja do të zhvendoset në Skenderaj, ku nga ora 18:00 Drenica përballet me Feronikeli ’74 në stadiumin “Bajram Aliu”. Kjo përballje pritet të jetë e rëndësishme për të dyja ekipet, të cilat synojnë të shfrytëzojnë këtë xhiro për të avancuar në kampionat.

    Xhiroja e tetë e Albi Mall Superligës do të përmbyllet të dielën me ndeshjen mes Prishtinës dhe Dukagjinit, e cila do të zhvillohet nga ora 18:00 në Kampin Nacional në Hajvali.

  • U rrah me tre të mitur, përfundon i lënduar dhe i arrestuar

    U rrah me tre të mitur, përfundon i lënduar dhe i arrestuar

    Të premten në Podujevë një person është përleshur me tre të mitur.

    Ai ka pësuar lëndime gjatë përleshjes, si dhe pas arrestimit është dërguar në mbajtje.

    “Raportohet se pas një mosmarrëveshje janë përfshirë në një rrahje një i dyshuar mashkull kosovar dhe tre të dyshuar tjerë të mitur”, thuhet në Raportin e Policisë së Kosovës.

    “I dyshuari për shkak të lëndimeve të pësuara gjatë përleshjes me të miturit ka pranuar trajtim mjekësor dhe nga i njëjti është sekuestruar një thikë”.

    “Me vendim të prokurorit i dyshuari është arrestuar dhe dërguar në mbajtje ndërsa të dyshuarit e mitur janë liruar”.

  • Marc Marquez triumfon në garën sprint në Indonezi dhe merr kreun e renditjes botërore në MotoGP

    Marc Marquez triumfon në garën sprint në Indonezi dhe merr kreun e renditjes botërore në MotoGP

    Piloti spanjoll i Ducati, Marc Marquez, triumfoi të shtunën paradite në garën sprint të zhvilluar në Indonezi, duke marrë edhe kreun e renditjes botërore në MotoGP, me 3 pikë më shumë se ndjekësi i tij më i afërt.

    Një fitore që nuk ishte aspak e lehtë për spanjollin, i cili fillimisht përfitoi nga një problem me gomat në motorin e bashkatdhetarit të tij, Jorge Martin, që garon me Aprilia. Më pas, ky i fundit bëri edhe një gabim gjatë duelit me Marquez, duke e mbyllur garën në vendin e katërt.

    Nga gabimi i Jorge Martin, aktualisht i dyti në renditjen botërore, përfituan edhe japonezi Ai Ogura, me Trackhouse, dhe italiani Fabio Di Giannantonio, me VR46, të cilët u renditën përkatësisht në vendin e dytë dhe të tretë.

    Një garë për t’u harruar kjo për italianin Marco Bezzecchi, me Aprilia, i cili u rrëzua që në kthesën e parë pas një kontakti me Raul Fernandez.

    Të dielën në mëngjes do të zhvillohet gara e Çmimit të Madh të Indonezisë në MotoGP.

  • Shqipëria mbyll edhe një kapitull në rrugën drejt BE-së, Rama flet për objektivin historik

    Shqipëria mbyll edhe një kapitull në rrugën drejt BE-së, Rama flet për objektivin historik

    Kryeministri i Shqipërisë, Edi Rama, ka bërë të ditur se vendi ka marrë dritën jeshile nga Bashkimi Evropian për mbylljen e negociatave për Kapitullin 20, që lidhet me politikat industriale dhe të ndërmarrjeve.

    Përmes një postimi në rrjetet sociale, Rama e ka cilësuar këtë zhvillim një hap drejt objektivit historik të Shqipërisë për anëtarësim në BE.

    Sipas tij, mbyllja e negociatave për këtë kapitull forcon perspektivën për investime, inovacion, konkurrueshmëri dhe punësim.

    “Shqipëria mbyll kapitullin e katërt, nis numërimi mbrapsht i kohës drejt objektivit historik.

    Drita jeshile nga BE-ja për mbylljen e negociatave të Kapitullit 20 forcon perspektivën për investime, inovacion, konkurrueshmëri dhe punësim”, ka shkruar Rama.

  • Kurti takon ambasadorin hungarez, diskutojnë për bashkëpunimin ekonomik

    Kurti takon ambasadorin hungarez, diskutojnë për bashkëpunimin ekonomik

    Kryeministri i vendit, Albin Kurti, ka pritur në takim ambasadorin e Hungarisë në Kosovë, László István Dux, i cili e ka uruar për zgjedhjen e presidentes së re, Justina Shiroka-Pula.Gjatë takimit, Kurti shprehu mirënjohje për angazhimin e Hungarisë në Kosovë, duke theksuar rolin e saj në proceset integruese, si dhe në ruajtjen e paqes dhe sigurisë rajonale përmes kontributit me trupa në kuadër të KFOR-it.

    Sipas njoftimit të zyrës për informim të Kryeministrit, në takim u diskutua edhe për marrëdhëniet dypalëshe dhe mundësitë e zgjerimit të bashkëpunimit ekonomik e tregtar, përmes organizimeve të përbashkëta që mund të nxisin investimet dhe të forcojnë lidhjet ndërmjet bizneseve.

    Gjithashtu u bë e ditur se numri i bursave të programit hungarez Stipendium Hungaricum për studentët nga Kosova është rritur në 75 në vit, për studimet bachelor, master dhe doktoraturë.

    Ndërkohë, kryenegociatori i Kosovës me Bashkimin Evropian, Jeton Zulfaj, ndodhet në vizitë zyrtare në Budapest, ku pritet të takohet me zyrtarë të lartë të qeverisë së Hungarisë.

  • Vrasja e dyfishtë në Gjilan, të dyshuarit i bastisen shtëpitë e pronat, i gjenden armë pa leje

    Vrasja e dyfishtë në Gjilan, të dyshuarit i bastisen shtëpitë e pronat, i gjenden armë pa leje

    Policia e Kosovës sot ka dhënë detaje shtesë nga vrasja e dyfishtë që ndodhi dje në Gjilan. Policia tha se pas rastit të rëndë që la edhe një person tjetër të plagosur, kanë bastisur shtëpitë dhe pronat e të dyshuarit ku gjetën armë pa leje.

    Në fshatin Livoç të Ulët të Gjilanit burri dyshohet se vrau bashkëshorten e tij dhe vëllain e saj, si dhe plagosi djalin e axhës të viktimave, i cili po trajtohet në QKUK.

    I dyshuari tashmë gjendet në mbajtje, ndërsa trupat e pajetë janë dërguar në IML për obduksion.

    “Me urdhër të prokurorit janë kryer bastisje në shtëpitë dhe pronat e të dyshuarit ku janë gjetur dhe sekuestruar dy armë të gjata me leje të skaduar, një pistoletë pa leje, një armë pneumatike, 520 fishekë kalibrash të ndryshëm dhe 1600 diabolla të pushkës pneumatike. Gjithashtu si prova materiale janë sekuestruar edhe disa telefona celularë dhe DVR të kamerave”, tha policia.

    Raporti i plotë:

    Fsh. Livoç i Ulët, Gjilan 09.10.2026 – 14:26. Është arrestuar i dyshuari mashkull kosovar, pasi që i njëjti ka qëlluar me armë zjarri tre viktimat, një femër-bashkëshorten e tij, një mashkull- vëllai i bashkëshortes dhe viktimën tjetër mashkull-djali i axhës së bashkëshortes. Si pasojë, dy viktimat e para kanë ndërruar jetë, ndërsa i treti ka mbetur i plagosur dhe është transportuar në Spitalin e Gjilanit. Në vendin e ngjarjes kanë dalë njësitë përkatëse policore që i kanë ndërmarrë veprimet e nevojshme hetimore. Në dy vende të ngjarjes janë sekuestruar katër fishekë, njëzetenjë gëzhoja dhe pesë predha si dhe brenda veturës së të dyshuarit është sekuestruar një pistoletë me të cilën dyshohet se është kryer vepra për të cilën i dyshuari kishte leje të skaduar.

    Me urdhër të prokurorit janë kryer bastisje në shtëpitë dhe pronat e të dyshuarit ku janë gjetur dhe sekuestruar dy armë të gjata me leje të skaduar, një pistoletë pa leje, një armë pneumatike, 520 fishekë kalibrash të ndryshëm dhe 1600 diabolla të pushkës pneumatike. Gjithashtu si prova materiale janë sekuestruar edhe disa telefona celularë dhe DVR të kamerave. Me urdhër të prokurorit i dyshuari është dërguar në mbajtje, ndërsa dy trupat e pajetë janë dërguar në IML për obduksion.

  • Përgjaket burgu në Meksikë, përleshjet mes grupeve kriminale lënë 12 të vrarë

    Përgjaket burgu në Meksikë, përleshjet mes grupeve kriminale lënë 12 të vrarë

    Dy të burgosur u vranë të premten gjatë një përleshjeje në një burg në qytetin turistik të Mazatlanit, në shtetin meksikan të Sinaloas, vetëm një ditë pasi dhuna në të njëjtin institucion la të vdekur 10 persona, përfshirë një fëmijë që po e vizitonte burgun.

    Sipas autoriteteve, ushtria dhe policia ndërhynë sërish dhe arritën ta vinin situatën nën kontroll. Shkaqet e përleshjes së fundit ende nuk janë bërë të ditura.

    Sinaloa është përfshirë nga konflikte të përgjakshme mes fraksioneve rivale të kartelit të drogës, të cilat kanë shkaktuar mbi 1,000 viktima që nga viti 2024.

    Ky është incidenti i tretë i këtij lloji në burgjet e shtetit gjatë këtij viti. Më 31 maj, shtatë të burgosur u vranë në një burg në Culiacan, kryeqytetin e Sinaloas.

  • Dy senatorë amerikanë do ta vizitojnë Kosovën, në fokus siguria dhe marrëdhëniet me ShBA-në

    Dy senatorë amerikanë do ta vizitojnë Kosovën, në fokus siguria dhe marrëdhëniet me ShBA-në

    Senatorët amerikanë Dick Durbin dhe Jeanne Shaheen do ta vizitojnë Kosovën në kuadër të një turneu në Ballkanin Perëndimor, gjatë të cilit do të diskutojnë për sigurinë rajonale, institucionet demokratike, zhvillimin ekonomik dhe marrëdhëniet me Shtetet e Bashkuara të Amerikës.

    Durbin, zëvendëskryetar i grupit demokrat në Senatin amerikan, dhe Shaheen, demokratja më e lartë në Komitetin e Senatit për Marrëdhënie me Jashtë, e kanë përfunduar vizitën në Bosnjë e Hercegovinë, ndërsa të premten kanë nisur qëndrimin në Mal të Zi.

    Përveç këtyre dy vendeve, në kuadër të turneut, senatorët do të vizitojnë edhe Shqipërinë, Kroacinë dhe Kosovën. Gjatë qëndrimit në vendet e rajonit, ata do të takohen me zyrtarë qeveritarë, përfaqësues diplomatikë amerikanë, pjesëtarë të shoqërisë civile dhe liderë të rinj.

    Sipas njoftimit për vizitën, në fokus të diskutimeve do të jenë proceset e anëtarësimit në Bashkimin Evropian, bashkëpunimi me NATO-n, diversifikimi i burimeve të energjisë, si dhe zbatimi i Aktit për Demokracinë dhe Prosperitetin e Ballkanit Perëndimor, i miratuar si pjesë e Ligjit për Autorizimin e Mbrojtjes Kombëtare për vitin fiskal 2026.

    Shaheen ka deklaruar se gjatë vizitës do të takohet me zyrtarë, liderë të rinj dhe përfaqësues të shoqërisë civile, me të cilët do të diskutojë për çështjet e sigurisë, mundësitë ekonomike dhe marrëdhëniet e vendeve të rajonit me Shtetet e Bashkuara.

    Gjatë qëndrimit në Bosnjë e Hercegovinë, delegacioni kishte planifikuar edhe një vizitë në Qendrën Përkujtimore dhe Varrezat e Srebrenicës në Potoçari, si dhe pjesëmarrjen në një performancë të grupit artistik “House of Good Tones”.

    Kjo do të jetë vizita e fundit e Durbin në rajon si pjesë e një delegacioni kongresional në cilësinë e senatorit amerikan. Ai e ka vizituar Ballkanin Perëndimor edhe në vitet 1999 dhe 2009.

    Turneu i senatorëve amerikanë në Ballkanin Perëndimor pritet të përfundojë më 13 tetor.

  • Ballkani triumfon në Podujevë, Albin Berisha vendos fatin e ndeshjes ndaj Llapit

    Ballkani triumfon në Podujevë, Albin Berisha vendos fatin e ndeshjes ndaj Llapit

    Ballkani ka shënuar fitore të rëndësishme në udhëtim ndaj Llapit, duke triumfuar me rezultat 1-0 në ndeshjen e vlefshme për javën e tetë të Albi Mall Superligës së Kosovës.

    Skuadra e drejtuar nga Sami Sermaxhaj arkëtoi tri pikë të rëndësishme në stadiumin “Zahir Pajaziti”, duke mposhtur ekipin e Tahir Batatinës në ndeshjen e parë pas pushimit trejavor për shkak të angazhimeve të kombëtareve.

    Pjesa e parë u karakterizua me lojë të baraspeshuar nga të dyja skuadrat, por pa raste të shumta shënimi, me ç’rast ekipet shkuan në pushim me rezultat të bardhë, 0-0.

    Në pjesën e dytë, ritmi i lojës u rrit dhe të dyja skuadrat krijuan më shumë mundësi për të shënuar. Megjithatë, ishin mysafirët nga Suhareka ata që arritën ta gjenin rrjetën.

    Goli vendimtar erdhi në minutën e 60-të, kur Albin Berisha shënoi për rezultatin 0-1, duke i dhënë epërsinë Ballkanit. Pavarësisht përpjekjeve të Llapit për të reaguar deri në fund të takimit, rezultati nuk ndryshoi dhe Ballkani u largua nga Podujeva me pikët e plota.

    Me këtë fitore, Ballkani ngjitet në pozitën e tretë në tabelë me 13 pikë, ndërsa Llapi mbetet në vendin e nëntë, me vetëm tri pikë të grumbulluara.

    Në xhiron e ardhshme, Ballkani do të përballet me Dritën në shtëpi, kurse Llapi do të luajë në udhëtim ndaj Feronikelit ’74.