Blog

Trajneri i mirënjohur boshnjak, Adis Beciragic, ka dhënë dorëheqjen nga posti i selektorit të Kombëtares së Bosnjës dhe Hercegovinës, pas një periudhe të suksesshme me ekipin përfaqësues.

Beciragic, i cili është aktualisht trajner i Trepçës, skuadrës kampione nga Kosova, ka vendosur t’i përkushtohet tërësisht klubit mitrovicas, duke lënë pas angazhimin e dyfishtë me përfaqësuesen boshnjake.

55-vjeçari mori drejtimin e Bosnjës në verën e vitit 2022, duke zëvendësuar Vedran Bosnic, dhe arriti ta çonte ekipin në një nga sukseset më të mëdha të historisë së tyre në Eurobasket, ku përfunduan në pozitën e 13-të, rezultati i dytë më i mirë ndonjëherë për Bosnjën.

Pas këtij cikli të suksesshëm, ai vendosi të largohet nga stoli i kombëtares për t’u fokusuar në projektin ambicioz me KB Trepçën, skuadër që synon dominimin në Superligën e Kosovës dhe pjesëmarrje të denjë në garat evropiane.

Dorëheqja e tij shihet si një mundësi për Trepçën që të përfitojë maksimalisht nga përvoja dhe vizioni i një trajneri me karrierë të gjatë në arenën ndërkombëtare.

Bashkimi, bindshëm e ka zënë vendin e Parë dhe vitin e ardhshëm, së bashku me Shkollën e Prishtinës, do të jenë anëtarë të rinj të Superligës. Bashkimi e ka fituar derbin ndaj Shkollës me 3:1 në xhiron e fundit dhe vetëm e ka vërtetuar titullin dhe kalimin në Superligë. Megjithë humbjen nga Bashkimi, Shkolla ka arritur ta ruajë pozitën e dytë dhe me meritë kualifikohet për Superligë, pasi pati bilanc më të mirë në duelet direkte me Gani Malokun që përfundoi me pikë të njëjta si Shkolla. E katërta, ka dalur Ahmet Hoxha, kurse garë shumë e bukur është zhvilluar edhe për vendin e 6-të, i cili siguronte qëndrimin në Ligë. Tri skuadra ishin pjesë e këtij trilleri sportiv, pasi përfunduan me pikë të njëjta Ahmet Hoxha MK, KVPP Prizreni dhe Drita M. Pas kalkulimit të ndeshjeve të ndërsjella, prizrenasit dhe ferizajasit dolën më mirë se gjilanasit, të cilët vitin e ardhshëm do të detyrohen të jenë pjesë e Ligës së Dytë. E fundit ka përfunduar Llapusha, që bashkë me Dritën bien në rang më të ulët të garave.

Në grupin C të Ligës së Dytë, janë luajtur ndeshjet e javës së fundit. Istogu dhe Maestro nga Peja i kanë siguruar dy pozitat e para, madje Istogu me pikë maksimale dhe javën e ardhshme do të jenë pjesë e play-offit të Ligës së Dytë, me shpresa për të kaluar në Ligën e Parë.

Dukagjini, ka pësuar dy humbje në javën e fundit dhe e ka humbur garën për vendin e dytë madje janë tejkaluar edhe nga Shqiponjat e zeza që renditen në vendin e tretë me 19 pikë. Fitorja Klina është e pesta me 13 pikë, sa ka edhe Shqiponjat Pejë, kurse Vitomirica e mbyllë renditjen me 12 pikë. /ATVLIVE.TV

Këtë fundjavë janë zhvilluar ndeshjet e javës së 9-të për femra dhe të 11-të për meshkuj në Superligën e ping pongut.

Në Superligën e femrave, Gjilani ka bërë edhe një hap drejt titullit, pasi e ka mundur Ahmet Hoxhën me 4:0. Fitore të njëjtë ka shënuar edhe rivali direkt i gjilanaseve Prishtina, e cila e ka mundur Junikun për ta lënë çështjen e titullit të kampionit për xhiron e fundit kur do të ndeshet me Dritën. Fitore (4:0) ka shënuar edhe Gjilani ndaj Shpresës për ta përforcuar vendin e katërt në tabelë, kurse Juniku dhe Shpresa pa gjasa për të mbetur në elitë edhe për një vit.

Edhe Superliga e meshkujve po hyn në fazën finale, kur do të ballafaqohen mes vete skuadrat e kreut të renditjes. Lidhja e Prizrenit ka hasur në rezistencë të fortë të Prishtinës, të cilën e ka mundur vetëm me 4:3. Fitore jo të lehtë (4:2) ka shënuar edhe Liria e vendit të dytë, në duelin ndaj rivalit lokal Shkolla Prizreni. Pripingu ka shënuar fitoren e radhës, kësaj here ndaj Vushtrrisë me rezultatin 4:1, kurse Dardania e ka mundur Hasan Prishtinën me 4:0. Rezultatet e kësaj xhiroje, si pasojë e fitoreve të favoritëve, nuk e kanë ndryshuar as kreun e renditjes as pjesën e poshtme të tabelës. /ATVLIVE.TV

Trajneri i Dukagjinit, Ismet Munishi, ka shprehur mendimin e tij sa i përket politikës në Kosovë. Sipas tij, ata kanë bërë shumë pak për sportin dhe në këtë drejtim atë po e mbajnë gjallë mbajnë gjallë trajnerët, klubet dhe pasioni.

Postimi i 51 vjeçarit:

“Sporti në Kosovë dhe politika
Politika në Kosovë ka bërë shumë pak për sportin.
Përveç njohjes ndërkombëtare dhe disa rinovimeve stadiumesh, gjithçka tjetër është lënë në harresë.
Buxheti për sportin mbetet minimal, infrastruktura mungon, ndërsa shumë vendime merren për interesa politike, jo për zhvillim.
Sot sportin në Kosovë nuk e mban gjallë shteti –
por trajnerët, klubet dhe pasioni i njerëzve që jetojnë për ngjyrat e tyre.

Ylli brazilian i Real Madridit, Rodrygo Goes, ka dërguar një mesazh të fortë përpara El Clásicos së ardhshme kundër Barcelonës, duke theksuar se skuadra e tij është e vendosur të hakmerret për sezonin e kaluar.

Në një deklaratë për mediat spanjolle, sulmuesi madrilen u shpreh me tone të ashpra:

“Duhet ta mposhtim Barcelonën në El Clásico! Sezoni i kaluar kundër tyre ishte thjesht i tmerrshëm për ne.”

Rodrygo theksoi gjithashtu rëndësinë e ndeshjes që do të zhvillohet në “Santiago Bernabéu”:

“Kjo nuk mund të ndodhë më. Jemi në shtëpinë tonë dhe duhet të tregojmë kush jemi në të vërtetë.”

El Clásico mes Real Madridit dhe Barcelonës pritet të zhvillohet me tension të lartë, pasi të dyja skuadrat po luftojnë për kreun e La Ligës, ndërsa ky duel mund të ketë ndikim të madh në ecurinë e sezonit.

Atletico Madrid ka emëruar zyrtarisht Mateu Alemany si drejtorin e ri të futbollit për ekipin e meshkujve.

Sipas njoftimit të klubit madrilen, Alemany do të jetë pjesë e strukturës drejtuese të futbollit, nën drejtimin e Carlos Bucero, drejtori i përgjithshëm i futbollit. Ai do të ketë përgjegjësi për të gjitha çështjet që lidhen me ekipin e parë dhe aspektet profesionale të akademisë së Atletico Madrid.

Alemany nisi menjëherë detyrën, duke vizituar qendrën stërvitore në Majadahonda dhe duke u takuar me trajnerin Diego Simeone si dhe me lojtarët që po stërviten.

Ish-drejtori sportiv i Barcelonës, ku shërbeu për rreth dy vite deri në vitin 2023, Alemany ka qenë pjesë e disa nga transferimet më të rëndësishme të klubit katalanas, përfshirë Jules Kounde, Robert Lewandowski, Raphinha dhe Ferran Torres — lojtarë kyç në skuadrën e Hansi Flick. /ATVLIVE.TV

Ylli francez, Ousmane Dembélé, ka ndarë një moment prekës nga periudha e tij te Barcelona, duke përmendur një kujtim të veçantë me legjendën Lionel Messi.

Në një intervistë së fundmi, gazetari e pyeti Dembelén: “Cila është fotoja juaj e preferuar?” — dhe përgjigjja e tij ishte e papritur.

“Çuditërisht, është imazhi i Messit që më ngushëllon kur u lëndova kundër Dortmundit në Ligën e Kampionëve 2019,” – tha ai.

Kur u pyet pse pikërisht ajo foto, Dembélé shtoi:

“Për shkak të asaj që më tha: ‘Mos u shqetëso, do të jesh mirë’. Në atë fazë të hershme të karrierës sime, më duhej shumë ai ngushëllim. Ai gjithmonë më inkurajonte.”

Ky rrëfim tregon edhe një herë lidhjen e fortë dhe ndikimin që Messi kishte në dhomën e zhveshjes së Barcelonës, veçanërisht tek lojtarët e rinj si Dembélé, i cili shpesh është përballur me dëmtime të shumta gjatë karrierës së tij në “Camp Nou”.

Njoftimi misterioz i LeBron James, i bërë dje (të hënën) në rrjetet sociale dhe i quajtur “Vendimi i të gjitha vendimeve. 7 tetor” – apo siç po përmendet ndryshe “Vendimi i Dytë” – ka shkaktuar një reagim të menjëhershëm në tregun e biletave të Los Angeles Lakers.

Sipas ESPN, përpara këtij njoftimi, bileta më e lirë për një ndeshje të Lakers që do të zhvillohet në prill të vitit të ardhshëm kushtonte 82 dollarë. Mirëpo menjëherë pas publikimit, çmimet u rritën ndjeshëm, duke arritur deri në 580 dollarë për një biletë të vetme.

Ndërkaq, për ndeshjen e planifikuar më 12 prill 2026, kur Lakers do të përballen me Utah Jazz, një çift biletash kushton së paku 760 dollarë.

Burime nga ESPN theksojnë se arsyeja kryesore për këtë rritje të çmimeve janë spekulimet se ky mund të jetë sezoni i fundit në karrierën e legjendës së basketbollit, LeBron James.

Për kujtesë, James po përgatitet për sezonin e tij të 23-të në NBA – një rekord historik – dhe prej tetë vitesh është pjesë e Lakers, me të cilët ka fituar edhe një titull kampioni.