Blog

John Robertson, anësori legjendar i Nottingham Forest dhe i ekipit kombëtar skocez, i cili dikur u përshkrua nga trajneri Brian Clough si “Pikaso i lojës sonë”, ka ndërruar jetë në moshën 72-vjeçare.

Lajmi për vdekjen e tij ka tronditur botën e futbollit dhe ish-klubi i tij ka dhënë një homazh të ndjerë:

“Me zemra të thyera njoftojmë vdekjen e legjendës dhe mikut të dashur të Nottingham Forest, John Robertson. Talent i pakrahasueshëm, përulës dhe besnik ndaj klubit, dy herë fitues i Kupës së Evropës, John do të mbetet gjithmonë në kujtimet tona. Pusho në paqe, Robbo.”

Ish-lojtari i Celtic, Alan Thompson, për të cilin Robertson ishte mentor, gjithashtu shprehu ngushëllimet e tij:

“Sapo dëgjova lajmin e trishtueshëm për humbjen e ish-ndihmës trajnerit tim te Celtic. Mendimet dhe lutjet e mia janë me familjen e tij të mrekullueshme.”

Cristian Chivu bën bilancin e vitit 2025, një vit që ka qenë vendimtar për karrierën e tij si trajner dhe për afirmimin e tij në Serie A.

Trajneri i Interit u vlerësua me çmimin e trajnerit më të mirë rumun të vitit, duke konfirmuar jo vetëm karrierën e tij të spikatur si lojtar, por edhe aftësinë për t’u afirmuar në një rol krejtësisht tjetër, atë të drejtimit të një prej klubeve më të mëdha italiane.

Chivu filloi karrierën e tij si trajner te Parma, ku mori një skuadër në vështirësi dhe arriti ta shpëtojë rënien nga Serie A, duke treguar aftësi të shkëlqyera taktike dhe udhëheqëse. Pas kësaj, u emërua në krye të Interit, pas finales së Champions League me PSG, duke marrë përsipër një sfidë krejt tjetër dhe më të madhe.

Vera e tij nuk ishte aspak e qetë. Pas shpëtimit të Parmës, Chivu pritej të rinovonte kontratën, por thirrja e Interit ndryshoi gjithçka:

“Do të kisha qëndruar te Parma, isha në negociata për rinovimin. Por Interi më kërkoi, sepse Inzaghi u largua dhe pata fatin të bëhesha trajner këtu,” ka thënë ai.

Në pak ditë, jeta e tij ndryshoi plotësisht, duke u rikthyer në një ambient që e njihte si lojtar, por tash nën një presion krejt tjetër si trajner: “Asnjëherë nuk ke paqe, je gjithmonë nën presion për rezultatet. Luan çdo tri ditë dhe nuk ke kohë as për stërvitje. Kam pasur një përvojë të ngjashme si lojtar, tani si trajner.”

Chivu ka treguar se aftësitë e tij taktike dhe karakteri i fortë janë të njëjta si në kohën e futbollistit, duke e bërë një nga trajnerët më premtues dhe më të respektuar të brezit të tij.

Shumë e shohin vitin 2025 si një pikë kthese në karrierën e tij drejt niveleve më të larta të futbollit europian. /ATVLIVE.TV

Luka Modrić ishte i gatshëm të bënte gjithçka për të vazhduar aventurën e tij te Real Madridi, madje edhe të pranonte një ulje page, vetëm për të qëndruar edhe një sezon tjetër në “Santiago Bernabéu”.

Sipas raportimeve të “Mundo Deportivo”, mesfushori kroat shprehu hapur dëshirën për të rinovuar kontratën, ndërsa edhe trajneri Xabi Alonso ishte i hapur për ta pasur në skuadër, duke e vlerësuar rolin e tij si lider, përvojën dhe ndikimin në dhomat e zhveshjes.

Megjithatë, vendimi përfundimtar erdhi nga drejtuesit e klubit, të cilët zgjodhën të mos vazhdojnë bashkëpunimin me 38-vjeçarin, duke mbyllur kështu një kapitull të artë në historinë e Real Madridit.

Largimi i Modrićit dhemb jo vetëm për tifozët, por edhe për vetë futbollin, pasi bëhet fjalë për një nga mesfushorët më elegantë dhe më besnikë të epokës moderne. Një lojtar që dha gjithçka për fanellën e bardhë, fitoi gjithçka që mund të fitohej dhe u shndërrua në simbol të suksesit dhe profesionalizmit.

Jo çdo legjendë largohet siç e meriton, por trashëgimia e Luka Modrićit te Real Madridi do të mbetet e pashlyeshme. /ATVLIVE.TV

Ekipi, AS Roma ka hedhur një hap të madh drejt realizimit të stadiumit të saj të ri, duke dorëzuar zyrtarisht projektin që parashikon ndërtimin e impiantit në zonën e Pietralatës, në pjesën lindore të kryeqytetit italian.

Sipas klubit verdhekuq, stadiumi do të karakterizohet nga një Curva Sud monumentale, e cila synon të jetë më e madhja në Europë, si dhe nga një arkitekturë unike që ndërthur traditën romake me elemente moderne, duke ruajtur një lidhje të fortë me identitetin dhe territorin lokal.

Impianti i ri është konceptuar si një hapësirë multifunksionale, që do t’u shërbejë tifozëve dhe qytetit jo vetëm gjatë ditëve të ndeshjeve, por edhe për aktivitete të tjera gjatë gjithë vitit.

Projekti përfshin gjithashtu përmirësime të ndjeshme në infrastrukturë, mobilitet urban, shërbime publike dhe qëndrueshmëri mjedisore.

Dorëzimi i projektit përfundimtar konsiderohet një moment kyç në procesin e nisjes së punimeve dhe tregon qartë ambicien e AS Romës për të ndërtuar një stadium modern, të qëndrueshëm dhe ekonomikisht funksional, që pritet të kthehet në një simbol krenarie për tifozët dhe qytetin e Romës.

Klubi ka falënderuar kryetarin e Bashkisë së Romës, Roberto Gualtieri, si dhe institucionet dhe palët e përfshira për bashkëpunimin e vazhdueshëm. Stadiumi i Pietralatës është përfshirë gjithashtu në listën e impianteve potenciale për organizimin e ndeshjeve të Euro 2032.

“E ardhmja e shtëpisë sonë po afrohet gjithnjë e më shumë. Forza Roma”, përfundon njoftimi zyrtar i klubit. /ATVLIVE.TV

Espanyoli duket se ka lënë pas vitet e errëta dhe këtë sezon është rikthyer si një rival serioz, duke synuar kualifikimin në garat evropiane. Ky rikthim i ka dhënë edhe më shumë peshë derbit të
Katalonjës ndaj Barcelonës, një ndeshje që tradicionalisht shoqërohet me emocione të forta dhe tension të lartë.

Megjithatë, këtë herë vëmendja nuk është vetëm te rivaliteti sportiv. Në qendër të polemikave ndodhet portieri, Joan Garcia, që gjatë verës u largua nga Espanyoli për t’iu bashkuar Barcelonës – një vendim që ka zemëruar tifozët bardhekaltër.

Përkrahësit e Espanyolit e shohin këtë lëvizje si një tradhti, çka ka shtuar frikën për incidente gjatë ndeshjes. Si pasojë, klubi ka vendosur të rrisë masat e sigurisë në stadium, duke shtuar numrin e stjuardëve për të garantuar rend dhe qetësi.

Derbi do të luhet më 3 janar dhe do të shënojë ndeshjen e parë të vitit 2026 për të dyja skuadrat, në një përballje që pritet të jetë jo vetëm futbollistike, por edhe emocionale. /ATVLIVE.TV

Kryetari i Fenerbahçes, Sadettin Saran, u lirua më 25 dhjetor nën kontrolle gjyqësor, pas ndalimit që iu bë pasi në test droge rezultoi pozitiv.

Rasti është pjesë e një hetimi të gjerë që ka tronditur Turqinë javët e fundit, ku janë ndaluar prezantues televizivë, gazetarë, këngëtarë, aktorë dhe influencerë, nën akuza për prodhim dhe trafikim të narkotikëve.

Saran u mor fillimisht në pyetje më 20 dhjetor dhe iu nënshtrua testeve toksikologjike. Ai u ndalua më 24 dhjetor, pasi ekspertët mjeko-ligjorë gjetën gjurmë kokainë në mostrat e flokëve të tij, ndërsa testet e gjakut, urinës dhe thonjve rezultuan negative.

Deklarata e tij para autoriteteve më 25 dhjetor zgjati rreth dy orë. Nën kontrolle gjyqësor, Saran është i detyruar të paraqitet dy herë në javë pranë autoriteteve.

Anëtari i bordit të Fenerbahçes, Ertan Torunoğulları, së bashku me tifozë, shprehën solidaritet për Saranin para Gjykatës Çağlayan në Stamboll, ndërsa bordi ekzekutiv i klubit zhvilloi një mbledhje të jashtëzakonshme për të rishikuar situatën.

Klubi publikoi një deklaratë duke shprehur mbështetje të plotë për Saranin dhe duke garantuar tifozët se aktivitetet e Fenerbahçes do të vazhdojnë pa ndërprerje. /ATVLIVE.TV