Blog

Deri më tani, askush nuk ka arritur ta përkufizojë plotësisht stilin e lojës që e bën Edon Zhegrovën kaq të veçantë në botën e futbollit.

Sipas prestigjiozes italiane La Gazzetta dello Sport, dallimi kryesor i yllit kosovar qëndron te mënyra se si ai e prek topin – një detaj i vogël në pamje të parë, por vendimtar në efekt, që e veçon nga lojtarët e tjerë.

Zhegrova shquhet për teknikën e tij jashtëzakonisht të rafinuar, kontrollin e topit në hapësira të ngushta dhe aftësinë për ta mposhtur kundërshtarin me një veprim të vetëm. Pikërisht ky stil unik ka bërë që trajneri i Juventusit, Luciano Spalletti, t’i vendosë një nofkë të veçantë, të lidhur drejtpërdrejt me mënyrën e tij të lojës.

“Kam lindur me këtë aftësi,” ka deklaruar Zhegrova pas ndeshjes ndaj Pisan. “Trajneri më quajti ‘Zeppetta’. E falënderoj që më dha këtë emër.”

Termi “Zeppetta” nuk është i zakonshëm në fjalorin futbollistik italian, por përshkruan në mënyrë perfekte driblimet karakteristike të Zhegrovës, lëvizjet e shpejta dhe të paparashikueshme që thyejnë linjat mbrojtëse dhe krijojnë epërsi numerike për skuadrën.

Spalletti e ka vlerësuar vazhdimisht Zhegrovën si një lojtar vendimtar, të aftë për ta ndryshuar rrjedhën e ndeshjes me një prekje të vetme.

Dhe pikërisht “Zeppetta”, kjo mënyrë e veçantë e trajtimit të topit, është ajo që po e shndërron Edon Zhegrovën në një nga emrat më interesantë dhe më të respektuar në futbollin italian. /ATVLIVE.TV

Futbollisti i Kombëtares së Kosovës, Meriton Korenica, e ka shfrytëzuar në mënyrën më të bukur pushimin dimëror.

Mesfushori rahovecas ka gjetur partneren e jetës dhe është fejuar.

Këtë e ka konfirmuar vetë Korenica duke e bërë publike lidhjen e tij dhe duke zbuluar se e fejuara e tij quhet Fjolla Haska.

Aktualisht, Korenica është pjesë e skuadrës së Clujit në Rumani, ndërsa afati kalimtar i janarit mund të sjellë zhvillime të reja rreth së ardhmes së tij sportive. /ATVLIVE.TV

Berat Gjimshiti ishte protagonist negativ në ndeshjen ndaj Interit, duke gabuar në aksionin që i dha kundërshtarëve golin e fitores. Goli i vetëm i takimit që u shënua në minutën e 65-të, kur Lautaro Martinez përfitoi nga një kundërsulm i shpejtë.

Pas përfundimit të ndeshjes, trajneri i Atalantës, Raffaele Palladino, doli në mbrojtje të mbrojtësit shqiptar, duke theksuar se bëhet fjalë për një episod të izoluar.

“Në fund të ndeshjes e përqafova Gjimshitin, sepse ai zakonisht nuk bën gabime të tilla. Janë situata që ndodhin në futboll dhe nuk mund ta fajësoj për këtë,” deklaroi trajneri.

Tekniku i Atalantës pranoi gjithashtu se skuadra e tij nuk ishte mjaftueshëm e saktë në fazën përfundimtare. “Kemi gabuar në zgjedhjet tona në momentet vendimtare. Patëm disa raste, si ai i Samardziçit, por kundër skuadrave si Interi duhet t’i shfrytëzosh, sepse nuk të japin shumë mundësi,” përfundoi trajneri.

Golin e vetëm të këtij dueli e shënoi Lautaro Martinez, falë një aksioni që “lindi” prej gabimit të Berat Gjimshitit. Ndërkohë që mbrojtësi shqiptar ka reaguar sot në rrjetet sociale, duke kërkuar falje.

“U kërkoj falje të gjithë shokëve të ekipit dhe tifozëve për gabimin që ndryshoi lojën. Përpara Atalanta në çdo situatë”, shkruan Berat Gjimshiti në rrjetet sociale. /ATVLIVE.TV

Klubi rumun Cluj ka shprehur interes konkret për transferimin e mesfushorit Etnik Brruti, të cilin e sheh si pasues të Lindon Emërllahut, i transferuar ditë më parë te ekipi Polissya në Ukrainë për shumën prej 2 milionë eurosh.

Megjithatë, Malisheva nuk ka ndërmend ta lëshojë lehtë talentin 21-vjeçar. Klubi kosovar kërkon të paktën 800 mijë euro për kartonin e Brrutit, ndërsa synon të mbajë edhe 15 për qind të përfitimit nga një rishitje e mundshme në të ardhmen.

Kontrata e mesfushorit me Malishevën është e vlefshme deri në qershor të vitit 2026, çka e detyron klubin të negociojë me kujdes për të mos rrezikuar largimin e tij pa kompensim financiar.

Brruti ka qenë gjithashtu në qendër të vëmendjes në arenën ndërkombëtare, pasi disa muaj më parë vendosi të përfaqësojë Shqipërinë, duke u ndarë nga Kosova U21, me të cilën ishte aktiv më herët.

Në këtë sezon, 21-vjeçari është shndërruar në një nga shtyllat kryesore të Malishevës, duke realizuar katër gola dhe duke asistuar në tre të tjerë në 17 paraqitje zyrtare. /ATVLIVE.TV

Futbollisti legjendar uruguaian Edinson Cavani ka vendosur të mbyllë kapitullin e karrierës së tij të pasur, duke u tërhequr nga futbolli aktiv në moshën 38-vjeçare.

Vendimi u bë publik gjatë pushimit të kampionatit argjentinas, që zhvillohet nga 7 dhjetori deri në fund të janarit, periudhë në të cilën Cavani ndau edhe mesazhin e tij prekës të lamtumirës.

“Nëpërmjet futbollit u formova si njeri. Më sfidoi, më mësoi të ringrihem pas çdo rrëzimi dhe të vlerësoj çdo hap të rrugëtimit. Falë tij realizova ëndrra që dikur më dukeshin të paarritshme dhe njohja njerëz të jashtëzakonshëm,” shkroi Cavani.

Ai falënderoi familjen, miqtë, shokët e skuadrës, trajnerët dhe tifozët, duke theksuar se dashuria e tyre do ta shoqërojë përgjithmonë. “Po largohem i qetë, i bindur se kam dhënë maksimumin në çdo ndeshje dhe në çdo stërvitje, gjithmonë me respekt për këtë profesion,” shtoi ai.

I njohur me nofkën “El Matador”, Cavani, këto dy vite e gjysmë të fundit luajti me Boca Juniors, ndërsa kulmin e karrierës e arriti me klube si PSG, Napoli, Palermo dhe Manchester United.

Me Paris Saint-Germain ai zhvilloi 301 ndeshje dhe realizoi 200 gola, ndërsa me Napolin shënoi 104 gola në 138 paraqitje. Me kombëtaren e Uruguait, Cavani numëron 136 ndeshje dhe 58 gola, duke u renditur mes figurave më të mëdha të historisë së futbollit uruguaian. /ATVLIVE.TV