Blog

Deputeti i LDK-së, Paris Guri, i është përgjigjur kryetarit të Mitrovicës së Jugut, Faton Peci, i cili sot pas intervistimit nga Prokuroria Speciale si i pandehur për disa grante të Ministrisë së Bujqësisë, akuzoi Gurin se “kallëzimi i rrejshëm penal” i tij e çoi atë në Prokurori.

“E përshëndes veprimin e Prokurorisë së Kosovës për intervistimin e Ministrit të Bujqësisë, Faton Peci, pas kallëzimit penal që ia kemi bërë për keqpërdorim të detyrës zyrtare dhe keqpërdorim të buxhetit të shtetit. Shpresoj që ky intervistim të mos mbetet me kaq, por të vazhdohet deri në dënimin e merituar për të dhe për të gjithë ata që i kanë futur duart në buxhetin e shtetit. E mirëpres edhe kallëzimin penal të tij ndaj meje për kinse fushatë të orkestruar kundër tij. I vetmi orkestrim në atë rast ka qenë orkestrimi i tij për të shpërndarë paratë e buxhetit te familjarët e eksponentëve të VV-së”, ka shkruar Guri.

Në reagimin e tij, Peci tha se do të dorëzojë kallëzim penal ndaj Gurit për, siç tha ai, shpifjen ndaj tij.

Për këtë Guri tha se mezi e pret përballjen me të në gjykatë.

“Mezi po e pres ftesën e Prokurorisë dhe përballjen me ty në gjykatë. S’ka me u ndale asnjëherë duke i denoncu të gjitha hajnitë që i keni bërë”.

Përveç kësaj, Peci e akuzoi Gurin se fitoi ulëse në Kuvend me vota të vjedhura.

Edhe për këtë çështje Guri u përgjigj duke i renditur votat e minusuara për disa kandidatë të Lëvizjes Vetëvendosje, përfshirë kryetarin Albin Kurti, nga procesi i rinumërimit të KQZ-së, i cili nxori në pah vjedhje masive të votave.

“Sa i përket vjedhjes së votave, vetëm një rikujtim për Pecin:

Taulant Kelmendi – 918 vota të vjedhura

Arbër Rexhaj – 623 vota të vjedhura

Rea Krasniqi – 540 vota të vjedhura

Albin Kurti – 485 vota të vjedhura

Dafina Elshani – 433 vota të vjedhura

Paris Guri – 564 vota të hequra deri më tash”.

Ministri i Mbrojtjes Vllado Misajlovski tha se 42 automjete luftarake Stryker duhet të mbërrijnë në vend këtë vit, si pjesë e marrëveshjes së nënshkruar me Shtetet e Bashkuara. Duke shpjeguar informacionin, Misajllovski theksoi se bëhet fjalë për një ndryshim teknik.

Ai thekson se 17 automjete janë tashmë në portin e Greqisë dhe nevojitet një marrëveshje teknike që të miratohet me kërkesë të Shteteve të Bashkuara si një amendament për instalimin e të gjitha pajisjeve që mbërrijnë.

“Është një marrëveshje teknike, domethënë, ky është një amendament teknik sepse e dini që është nënshkruar një marrëveshje për 42 automjete luftarake të tipit “Stryker” me Shtetet e Bashkuara. Këtë vit të gjitha po mbërrijnë. Tashmë janë 17 në portin e Greqisë dhe nevojitet një amendament teknik që të miratohet me kërkesë të Shteteve të Bashkuara si një amendament për instalimin e të gjitha pajisjeve që mbërrijnë, etj. Përdoruesi përfundimtar është Ministria e Mbrojtjes dhe duhet të bëhet trajnimi i plotë.

Ky është një (amendament) teknik, siç kërkojnë Shtetet e Bashkuara, për të bërë një marrëveshje që të gjithë ata t’i marrin më pas dhe të mbeten plotësisht me Ushtrinë. Nuk ka asgjë shtesë, Marrëveshja është në rregull. Këtë vit të gjitha do të mbërrijnë”, tha Misajllovski.

Qendra Kombëtare për Menaxhim Kufitar ka bërë të ditur se ka filluar qarkullimi i mauneve dhe mjeteve transportuese në kufirin me Serbinë, i cili ishte i bllokuar që nga data 26.01.2026.

Edhe Shoqata e Transportuesve të Malit të Zi një ditë më parë tha se ka vendosur t’i japë fund bllokimit të pikave kufitare për mallra me Bashkimin Evropian, e cila ka prekur edhe bizneset në Kosovë.

Ndryshe, ditë më parë shoferët kanë bllokuar terminalet për mallra për shkak të ashpërsimit të procedurave për të hyrë në Zonën Schengen.

Ata kishin thënë se procedurat tani janë më të komplikuara dhe mund t’ua shkurtojnë kohën e qëndrimit në vendet e Bashkimit Evropian.

Ata kërkonin që qëndrimi i tyre në Bashkimin Evropian të rritet në katër muaj, në krahasim me tre që është tani, brenda gjashtë muajve.

Me urdhër të Prokurorisë Speciale të Republikës së Kosovës, është ndaluar për 48 orë i dyshuari B.Sh, që po hetohet për keqpërdorim në prokurim publik.

Sipas njoftimit, i njëjti dyshohet për veprën penale “Keqpërdorim i pozitës apo autoritetit zyrtar nga neni 414 paragrafi 1, lidhur me nenin 31 të KPRK-së” dhe “Mbajtja në pronësi, kontroll ose posedim të paautorizuar të armëve”.

B.Sh., është arrestuar në kuadër të hetimeve që Prokuroria Speciale e Republikës së Kosovës është duke i zhvilluar lidhur me dyshimet për një aktivitet të prokurimit.

Policia e Kosovës ka identifikuar pesë persona të dyshuar për përfshirje në disa raste vjedhjeje në territorin e Suharekës.

Gjatë kësaj jave, Sektori i Hetimeve i Stacionit Policor të Suharekës, përmes hetimeve intensive dhe bashkëpunimit të ngushtë me stacionet policore të Obiliqit dhe Fushë-Kosovës, ka arritur të identifikojë pesë persona të dyshuar për vepra penale të vjedhjes dhe vjedhjes së rëndë.

Në një nga rastet, është intervistuar i dyshuari E.B. nga Fushë-Kosova, i cili në prani të avokatit mbrojtës ka pranuar plotësisht kryerjen e veprës penale.

Po ashtu, në një rast tjetër të vjedhjes së rëndë, hetuesit policor kanë identifikuar dy të dyshuarit O.S. dhe A.D. Të njëjtit, pas intervistimit në prani të avokatit mbrojtës, kanë pranuar përgjegjësinë për veprën e kryer.

Ndërkohë, për një rast tjetër të vjedhjes së rëndë, janë identifikuar edhe dy persona të tjerë si të dyshuar, për të cilët hetimet janë në vazhdim.

“Policia e Kosovës, po dëshmon se është e vendosur dhe e palëkundur në luftën kundër krimit. Me profesionalizëm dhe përkushtim, hetuesit policor po punojnë pa u lodhur për të identifikuar, lokalizuar dhe arrestuar kryesit e veprave penale – sidomos ata që kryejnë vjedhje dhe vjedhje të rëndë, një sfidë e madhe për rendin dhe sigurinë publike“, thuhet në njoftim.

Ministrja në detyrë e Arsimit, Arbërie Nagavci, u ka bërë thirrje mësimdhënësve që të kontribuojnë në procesin e rishikimit të kurrikulave lëndore dhe programeve mësimore për klasat nga 1 deri në 9.

Ministria e Arsimit, Shkencës, Teknologjisë dhe Inovacionit më 28 janar ka marrë vendim për rishikimin e kurrikulave lëndore dhe programeve mësimore për arsimin fillor dhe arsimin e mesëm të ulët.

Përmes një thirrjeje publike, Nagavci ka bërë të ditur se gjatë muajit të ardhshëm do të hapet një debat i gjerë dhe gjithëpërfshirës për kurrikulat lëndore, duke ftuar mësimdhënësit që të bëhen pjesë aktive e këtij procesi.

“Të dashur mësimdhënës, gjatë muajit të ardhshëm do të hapim një debat të gjerë e gjithëpërfshirës mbi kurrikulat lëndore për arsimin fillor dhe arsimin e mesëm të ulët. Ju ftoj të bëheni pjesë e këtij procesi dhe të jepni kontributin tuaj në mënyrë që të kemi kurrikula bashkëkohore, mësimdhënie cilësore dhe rezultate të larta për nxënësit tanë”, ka shkruar Nagavci.

Raporti final dhe rekomandimet për kurrikulat pritet të dorëzohen më së largu deri më 30 prill të këtij viti.