Category: ZGJEDHJET

Kandidati për Kryeministër i Partisë Demokratike të Kosovës, Bedri Hamza, sot do të jetë për vizitë në Drenas, kurse tubimin qendror të partisë me qytetarë do ta mbajë në Skenderaj

Partia Demokratike e Kosovës ka njoftuar për agjendën e kandidatit për kryeministër, Bedri Hamza, për të enjten, ditën gjashtë të fushatës elektorale për zgjedhjet e 9 shkurtit.

Në orën 14:30, Hamza do të vizitojë “Flutura Academy” në Drenas (Rruga Shaban Shala nr. 99), ku do të takohet me përfaqësues të kësaj akademie dhe do të diskutojë mbi mundësitë e zhvillimit të sektorit arsimor në Kosovë.

Pas kësaj, në orën 17:00, Hamza do të zhvillojë një tubim qendror me qytetarët e Skenderajt në Palestrën “Ilaz Kodra”.

Ky tubim elektoral është pjesë e fushatës për zgjedhjet e 9 shkurtit dhe synon të shpalosë programin e PDK-së.

Kandidati për Kryeministër i Lidhjes Demokratike të Kosovës, Lumir Abdixhiku, këtë të enjte në kuadër të fushatës zgjedhore për ditën e gjashtë, do të jetë në Gjakovë, Rahovec, Suharekë dhe Veternik.

Në orën 15:00, Abdixhiku do të vizitojë biznesin “Ronifer” në Gjakovë.

Pas kësaj, në orën 16:00, ai do të vizitojë Lidhjen Bonevet, ku do të ketë mundësinë të takohet me përfaqësues të këtij organizimi.

Në orën 16:45, Abdixhiku do të shëtisë nëpër çarshinë e Gjakovës, për t’u takuar me qytetarët dhe për të dëgjuar shqetësimet dhe propozimet e tyre për zhvillimin e vendit.

Në orën 18:00, Abdixhiku do të mbajë një tubim elektoral në Shtëpinë e Kulturës “Mensur Zyberaj” në Rahovec, ku do të prezantojë programin e LDK-së.

Pas Rahovecit, në orën 19:30, Abdixhiku do të zhvillojë takime me banorët e fshatit Vraniq në Suharekë, në restorantin “Loshi”, dhe më pas do të udhëtojë drejt fshatit Mushtisht për një tjetër takim me qytetarët, në Shkollën fillore “Edit Durham”.

Kandidati për kryeministër nga Lëvizja Vetëvendosje, Albin Kurti, ka “sulmuar” Lidhjen Demokratike të Kosovës (LDK), duke e quajtur “dokrratike” dhe “lodhje” e jo lidhje.

Para qytetarëve të Podujevës, Kurti, i cili është edhe kryeministër i Kosovës, tha se opozita s’ka shpresë për zgjedhjet e 9 shkurtit, dhe se garojnë për vendin e dytë.

“Ldkyhi, Lidhja Demokratike e Kosovës, nuk është lidhje, por është lodhje. Dhe nuk është demokratike, por është dokrratike. Në përgjithësi, me nder me thënë, opozita po i japin zor ‘mule andej e mule këndej’ për vend të dytë. E kanë pa që s’ka ymyt”, ka thënë ai para elekoratit në Podujevë.

Para disa ditësh Kurti e ka krahasuar me “mizë” Lidhjen Demokratike të Kosovës.

Këtë deklaratë ai e bëri gjatë një tubimi elektoral në Pejë, ku kishte thënë se “në partinë e Lumir Abdixhikut po lavdërohen se njerëzit po e presin me duartrokitje”, mirëpo sipas tij, “duartrokitjet tregojnë shumë mirë se çka janë duke provuar t’i bëjnë asaj mize”.

Ky i fundit i është kundërpërgjigjur duke e ftuar në një ballafaqim publik, siç ka thënë ai, për “të matur idetë për të ardhmen”. /kp

Ambasada e Kosovës në Gjermani ka bërë një njoftim të rëndësishme për procesin e votimit nga diaspora.

Në njoftim është bërë e ditur adresa ku mund të dërgohen zarfet e mbyllura me fletëvotime.

“Njoftim me rëndësi! Të gjithë shtetasit e Kosovës të regjistruar për votim me postë në Gjermani, zarfet e mbyllura me fletëvotime sipas udhëzimeve të Komisionit Qendror të Zgjedhjeve të dërgohen në kutinë postare të hapur në adresën si më poshtë:KQZ-ZGJEDHJET Deutsche Post Filiale 502 Toli Post und Büroshop Senefelderstraβe 49 70176 Stuttgart”, thuhet në njoftim.

Ndryshe, sipas të dhënave të KQZ-së, numri i qytetarëve me të drejtë vote në vendvotime, në Republikën e Kosovës, është: 1 milion e 970 mijë e 944 votues, ndërkaq, numri i qytetarëve që janë regjistruar për të votuar jashtë Kosovës, është 104 mijë e 924.

Zgjedhjet parlamentare do të mbahen më 9 shkurt.

Kryetari i Lidhjes Demokratike të Kosovës, Lumir Abdixhiku, ka mbajtur tubim elektoral në Novobërdë, raporton EO.

Para të pranishmëve, kreu i LDK-së premtoi investime për banorët e kësaj ane, me theks investime në fushën e turizmit.

“Sot jemi bashkë drejt ndryshimit srwjt fitores së madhe më shkurt, për një Kosovë drejt zhvillimit ekonomik e jo të një Kosovë kur rinia ikën. Para jush nuk jam për tu ankuar sikurse bëjnë të tjerët e as për t’u bërë bashkë në ankesat siç bëjnë të tjerët. Jam këtu që të shpalos disa zotime të ‘Rugës së Re’, për të gjitha kategoritë në nevojë. Prandaj zgjedhja për të dalë nga kjo gjendje është prpgrami ynë”.

“Kosova jonë ndpdhet në udhëkeyq insitutucional për shkak të politilave të një qeverisje populiste dhe ju banorë nga kjo anë duhet ta dini peshën e këtyre zgjedhje. Kjo qeverisje u ka lënë pa një urë dhjetëra metërshe. Ata nuk i shohin hallet e juaja, nuk i shohin brengat tuaja dhe më 9 shkirt duhet t’u tregojmë që dimë ndryshe. Për gjithë zyrtarët publikë, përfshirë policë, mjekë, e mësimdhënës e të tjerë do të kenë 150 euro vlerën e koeficientit. Pra që në javën e parë, koeficienti do të bëhet 150 euro”, u shpreh Abdixhiku, teksa përmendi edhe ndërtimin e Spitalit të Ri në Kosovë me një shifër prej 500 milionë euro.

Ndërsa kryetari i degës së Novobërdës, Bajrush Ymeri, deklaroi që qeverisja aktuale nuk ka bërë asnjë investime për banorët e kësaj ane.

Duke qenë kandidati i vetëm i kësaj komune, Ymeri kërkoi votë nga qytetarët pa dallim partie, pasi “asnjë nga partitë s’kanë propozuar kandidatë për deputetë”.

Kryetari i Lidhjes Demokratike të Kosovës, Lumir Abdixhiku në një konferencë së bashku me kryetarin e Prishtinës, Përparim Rama ka folur lidhur për planet e LDK-së për kryeqytetin.

Abdixhiku përmes një postimi në Facebook së bashku me Ramën foli për planet për infrastrukturë, sport, kulturë, shëndetësi, energjetikë e arsim!

“Do t’i ndajmë plot 200 milionë euro, në katër vite, për mësimin gjithëditor në të gjithë Komunën e Prishtinës. Edhe 28 mijë fëmijë të tjerë, të klasave 1 deri në 5 do të përfitojnë nga kjo reformë. Shujta të ngrohta, klasë e shkolla moderne, digjitalizim e qëndrim 8 orë në Prishtinë!

Plot 120 milionë euro do të ndahen për Qendrën Kombëtare të Sportit në Bërnicë, në 60 hektarët tashmë të projektuar nga Komuna e Prishtinës. Në këtë Qendër do të vendoset Stadiumi Kombëtar me 25-30 mijë ulëse, Pallati i Sporteve me Dorë, Pisha Olimpike, Gaming Hall, Fusha e Tenisit, Fakulteti i Edukatës Fizike si dhe kompleksi i qëndrimit!”, tha ai.

Kryetari i LDK-së po ashtu tha se ngjitur me Qendrën Sportive, në 60 hektarë të tjerë, sipas planifikimit komunal, do të ndërtohet parku teknologjik, me Qendrën Kombëtare të Inteligjencës Artificiale të vendosur aty dhe sipas tij për këtë do të ndahen 45 milionë euro.

“Unaza e Jashtme e Kryeqytetit, në 29 kilometra gjatësi, do të mbështetet nga Qeveria Qendrore. Fillimisht duke ndarë garancionin për marrëveshjen tashmë të arritur mes Komunës dhe Bankës Evropiane për Rindërtim e Zhvillim – kredi e butë prej 206 milionë eurove – e më pas dhe duke siguruar në plotni të 154 milionë eurot e vlerësuara për shpronësimin e trasesë!

Mbi 100 milionë euro do të ndahen për Kulturë. Në bashkëpunim me Kryeqytetin, do të identifikohen lokacionet e duhura për ndërtimin e Teatrit të Ri Kombëtar, Teatrit të Operas dhe Baletit, Muzeut të Artit Bashkëkohorë, e Muzeut të Paqes e Rezistencës. 100 milionë euro vetëm për kulturë!

Plot 120 milionë euro, tashmë të siguruara për projektin e kogjenerimit dhe dyfishimin e kapaciteteve aktuale të ngrohjes në Prishtinë, nëpërmjet Termokos. Ngrohje e lirë, më pak konsum energjetik, më shumë pastërti!”, tha ai.

Kryetari i LDK-së tutje ka folur edhe për Spitalin e Prishtinës.

“Spitali i ri i Kosovës, në një lokacion të ri, në Prishtinë. Plot 500 milionë euro për Spitalin e Ri, me 150 mijë metra katrorë të reja, 38 klinika të integruara në të – e pajisje të reja. Lokacioni i ri do të përcaktohet sipas nevojave të shtetit. Do të mbështesim po ashtu dhe ndërtimin e Spitalit të Kryeqytetit, një projekt i ndarë ky!”, tha ai.

Kandidati për deputet nga Partia Demokratike e Kosovës dhe ish-ministri i Punëve të Jashtme, Enver Hoxhaj, përmes një videoje të postuar në rrjetet sociale, ka theksuar rëndësinë e anëtarësimit të Kosovës në NATO në një kohë kur rajoni dhe bota përballen me sfida serioze të sigurisë.

“Në një botë të pasigurt, kur lufta është rikthyer në Evropë dhe politika hegjemoniste serbe po kërcënon sërish Ballkanin, anëtarësimi i Kosovës në NATO është më i rëndësishëm se kurrë,” u shpreh Hoxhaj.

Ai përmendi dy incidente serioze që kanë ndodhur vitin e kaluar: agresioni serb mbi territorin e Kosovës, në Banjskë dhe sulmi terrorist mbi kanalin e Ibër Lepencit, duke i cilësuar si kërcënime direkte ndaj stabilitetit të vendit.

Sipas Hoxhajt, Kosova duhet të zhvillojë një dialog strategjik me Shtetet e Bashkuara të Amerikës dhe të nënshkruajë një Plan të Veprimit për t’u anëtarësuar në NATO. “Është jetike të bisedohet edhe me shtetet mos-njohëse brenda NATO-s,” shtoi ai.

Hoxhaj theksoi se Partia Demokratike e Kosovës është partneri më i besueshëm për të siguruar mbështetjen e SHBA-së dhe vendeve evropiane në këtë proces.

“Në një situatë të tillë, nuk ka asgjë më të rëndësishme për Kosovën sesa anëtarësimi i Kosovës në NATO. Në këtë drejtim, Kosovës i duhet që ta ndjekë një dialog strategjik me Shtetet e Bashkuara të Amerikës. Që ta nënshkruajë një Plan të Veprimit për ta anëtarësuar Kosovën në NATO. Që të bisedon me shtetet mos-njohëse brenda për brenda NATO-s. Unë jam i bindur që një parti politike e cila është një garancë e sigurtë për një partneritet të ri me amerikanët dhe me evropianët. Për të arritur një gjë të tillë është Partia Demokratike e Kosovës.”, ka thënë Hoxhaj.

Në fund të videos, Hoxhaj paralajmëroi se në komunikimin e tij të ardhshëm do të flasë për njohjen e Kosovës nga pesë shtetet e Bashkimit Evropian që ende nuk e kanë bërë këtë hap.

Pasi Partia Demokratike e Kosovës (131) nisi fushatën zgjedhore me dy tubime madhështore në Prishtinë dhe Ferizaj, zëdhënësi i fushatës, Blerand Stavileci, në një konferencë për media, ka thënë se këtë fundjavë, ka filluar një kapitull i ri shprese, vendosmërie dhe uniteti për Kosovën.

Stavileci duke falënderuar qytetarët për përkrahjen dhe pjesëmarrjen masive në tubimet e PDK-së në Prishtinë dhe Ferizaj, u ka kërkuar falje të gjithë atyre që mbetën jashtë sallave për shkak të hapësirave të kufizuara.

“Të shtunën në Prishtinë dhe të dielën në Ferizaj, mijëra qytetarë u bashkuan krah për krah, brenda dhe jashtë sallave, për të përcjellë dhe për të përçuar një mesazh të qartë: Kosova është gati për një të ardhme Ma të Mirë. Kjo nuk është thjesht një fushatë. Ky është një mision dhe, mbi të gjitha, një rrugëtim i pandalshëm i atyre qytetarëve që besojnë se “Kosova Mundet Ma Mirë”.”, ka thënë ai.

Sipas Stavilecit, Kosova po flet me porosi të qartë se është koha për ta rikthyer dinjitetin, se është koha për Ma Mirë.

“Ta shkruajmë së bashku kapitullin tjetër të madh të shtetit dhe të ardhmes sonë. Prandaj, për çdo qytetar, bashkohuni me ekipin fitues të PDK-së dhe të Bedri Hamzës. Të ecim përpara, të bashkuar dhe të pandalshëm, drejt një Kosove Ma të Mirë. Fushata ka nisur. Vrulli është i pandalshëm.

“Kosova mundet Ma Mirë” dhe me përkrahjen tuaj, do ta bëjmë Ma Mirë!” ka kërkuar ai.

Lëvizja Vetëvendosje ka hapur zyrtarisht fushatën për zgjedhje që pritet të mbahen më 9 shkurti 2025.

Lëvizja Vetëvendosje hapjen e fushatës e ka bërë në sallën “Shani Nushi” në Gjakovë.

Nga atje VV-ja ka prezantuar 110 kandidatët për deputetë.

Atje vetëvendosja prezantoi me sloganin “Cep më Cep”.