Category: ZGJEDHJET

Koalicioni për Familjen ka nisur zyrtarisht fushatën për zgjedhjet e përgjithshme që do të mbahen më 9 shkurt 2025.

Në fushatë po merr pjesë edhe ambasadori William Walker.

Lidhja Demokratike e Kosovës (LDK) ka nisur sot zyrtarisht fushatën për Zgjedhjet e Përgjithshme të 9 shkurtit, raporton Ekonomia Online.

Kandidati për kryeministër, Lumir Abdixhiku, theksoi se ky moment shënon një kapitull të ri dhe një kryengritje të djathtë kombëtare, që do të mbahet mend për breza.

“Jemi mbledhur sonte këtu, jo vetëm si pjesëtarë të një Lidhje të fortë politike, por si një shtëpi e bashkuar e njerëzve që ëndërrojnë për Republikën tonë, të ardhmen tonë, të ardhmen e një vendi që duhet të qëndrojë krenar, të qëndrojë i fortë, të qëndrojë prijetar. Sonte, shënojmë fillimin e një kapitulli të ri për Kosovën. Sonte shënojmë një moment definues të historisë së popullit tonë. Sonte, shënojmë kryengritjen e djathtë kombëtare – si thirrje monumentale e popullit të Kosovës. Dhe ju them, ju premtoj, zotohem, se çfarë kemi nisur sot këtu, do të kushtrojë fort e do të mbahet në mend gjatë, jo vetëm gjatë këtij muaji elektoral, por do të kushtrojë fort e gjatë, për gjenerata të tëra që do të vijnë pas. Do të shikojmë me mburrje në këtë 11 janar, e do të kuptojmë, se ndryshimi i shkurtit nisi mu në këtë sallë! Nga kjo sallë LDK është ngritur në këmbë”, ka deklaruar Anbdixhiku.

Ai e renditi LDK-në si një forcë që promovon demokracinë dhe tolerancën, duke e kritikuar ndarjen dhe përçarjen brenda vendit, dhe duke e angazhuar për një shtet ku korrupsioni dhe sulmet ndaj mediave nuk kanë vend.

“Zgjedhjet për LDK-në, janë dhe kanë qenë gjithmonë festë e demokracisë dhe tolerancës. Këtë herë, po hymë në festë të madhe të demokracisë nën sanksione të Perëndimit. Për një kohë të gjatë kemi parë vendin tonë, shtetin tonë të ndërtuar me plot mund, teksa humbet mundësitë e destinuara nga historia, teksa zhytet në ndarje, përçarje e zymtësi të brendshme. Në këtë ndarje e përçarje, në këtë urrejtje kaq të madhe të brendshme, ne shikojmë te tjetri jo shtyllën e forcës e bashkimit, jo mikun, fqinjin e bashkëqytetarin me të cilin ndajmë të njëjtat halle, të njëjtat brenga, të njëjtat fate – nën një tokë, nën një qiell, nën një atdhe; por shikojmë kundërshtarin që duhet ta mundim e mposhtim me çdo çmim. Ta shtypim e poshtërojmë thuajse s’kemi kundërshtarë të tjerë të jashtëm bashkërisht”, ka thwnw Abdixhiku.

Abdixhiku apeloi për bashkim dhe vlerësim të lirisë, duke e theksuar rëndësinë e një të ardhmeje të ndershme dhe të drejtë për Kosovën.

“Në Republikën tonë Kryeministri nuk vendoset mbi prokurorinë, Kryeministri nuk mbron hajninë! Në Republikën tonë pushteti nuk sulmon mediat, gazetarë e fjalën e lirë. Jemi popull i lirë, e duam lirinë, do ta mbrojmë lirinë. Në Republikën tonë propaganda nuk zëvendëson realitetin me tabela fiktive përplot mashtrime. Në Republikën tonë, tabela e vetme është ajo e familjeve kosovare që jetojnë, punojnë e përpiqen për një jetë të dinjitetshme e të ndershme. Në Republikën tonë, Qeveria nuk e shkelë Kushtetutën 10 herë për t’u mburrur e jo skuqur 10 herë; e hajnia, vjedhja e krimi nuk maten me kutin e krahasimit me të shkuarën, se a janë më shumë apo më pak se dikur, por dënohen sepse hajnia është hajni, vjedhja është vjedhje, e futja e duarve në bukën e Kosovës do të dënohet edhe para vendit, edhe para Zotit, edhe para shtetit”, theksoi ai.

“Aty ku gjeni ndarje, urrejtje e përçarje, jepuni dorën e zgjatur për përbashkim! Jepuni dy gishta të ngritur lart me plot krenari”, ka thënë kandidati për kryeministër.

Partia Demokratike e Kosovës zyrtarisht ka nisur fushatën e saj zgjedhore, për zgjedhjet qendrore të 9 shkurtit.

Qindra qytetarë, përkrahës të partisë, janë tubuar në sallën “1 Tetori” në Prishtinë, për të ndjekur nga afër shpalosjen e programit në krye me Bedri Hamzën, si dhe prezantimin e kandidatëve për deputet, nga radhët e kësaj partie.

Brohoritjet si “UÇK”, dhe “PDK”, po dëgjohen përgjatë tubimit, shkruan IndeksOnline.

Në tubim s’kanë munguar as fotografitë e figurave emblematike të kësaj paritë, Kadri Veseli dhe Hashim Thaçi, të cilët po gjykohen nga Gjykata Speciale në Hagë.

Partia Demokratike e Kosovës sot ka hapur fushatën në Komunën e Prishtinës për zgjedhjet e 9 shkurtit, raporton Ekonomia Online.

Në fjalimin e tij, kryetari i kësaj partie, Memli Krasniqi, theksoi fillimin e fushatës për zgjedhjet e 9 shkurtit, duke shprehur besimin në fitoren e madhe të PDK-së.

Ai e përshkroi këtë fushatë si një “festë”, duke shtuar se më 9 shkurt, pas zgjedhjeve, do të bëhet formimi i një Kuvendi të ri dhe një Qeverie të re, që do të sigurojë një të ardhme më të mirë për qytetarët e Kosovës.

Krasniqi shprehu besimin se Kosova ka nevojë për një qeverisje të re dhe se kjo mund të arrihet vetëm me Bedri Hamzën në krye.

“Festën që po e nisim sot do ta përmbyllim bashkë në mbrëmjen e 9 shkurtit anembanë Kosovës, ku do të mblidhmi përsëri për fitoren e madhe të PDK-së. Pas një muaji do ta zgjidhim një kuvend të ri dhe pas kuvendit Kosova do ta ketë një qeverisje të re. Jam i bindur që do të jetë një rezultat i një qeverie të re. Kosova meriton dhe mundet ma mirë ku çdo qytetarë mund të jetoj dinjitet dhe më mirë të cilët do ta bëjë Bedri Hamza me ekipin e tij. Sot qëndroj para jush për t’iu siguruar se ne ofrojmë një program komplet dhe të realizueshëm i cili do të përmirësojë cilësinë e jetës së qytetarëve për ta bërë Kosovën më të mirë, kjo është arsye pse e zgjodhëm Bedri Hamzën. Bedri Hamza është kryeministri më i mirë që mund ta ketë Kosova sot”, ka deklaruar Krasniqi.

Ai theksoi se Hamza dhe ekipi i tij janë ata që mund të sjellin ndryshime të dukshme dhe përmirësim të cilësisë së jetës për qytetarët e Kosovës.

“Qytetarët kërkojnë që persona që tu besojnë dhe Kuvendi dhe Qeveria e re do të jenë shumë më të mira se këto që i kemi sot. Rrugëtimi ynë politikë nuk ka qenë fare e lehtë por i kemi tejkaluar të gjitha furtunat. Sidoqoftë ja ku jemi sot më të fortë. PDK-ja është e fuqishme testament i qëndrueshmërisë dhe guximit dhe adaptimit për ndryshimin e mirë të vendit. I nderojmë dhe i përshëndesim udhëheqësit e Ushtrisë Çlirimtare të Kosovës që janë në Hagë, Hashim Thaqi, Kadri Veseli, Jakup Krasniqi dhe Rexhep Selimi”, ka theksuar ai.

Ramush Haradinaj, kandidati për kryeministër i koalicionit AAK, Nisma, Lista Konservatore dhe Forumi Intelektual E-30, ka hapur fushatën zgjedhore për zgjedhjet nacionale të 9 shkurtit 2025.

Ai fushatën e hapi duke bërë homazhe në Kompleksin Memorial “Adem Jashari”.

Haradinaj ka thënë se nga Prekazi niset për “Kosovën Fituese” me numrin 137.

“Prekazi është vendi që na bashkon. Prekazi është betimi ynë për shtet e atdhe, liri e demokraci.

“Nga këtu nisemi për Kosovën Fituese me numrin 137. Rroftë Kosova!”, ka thënë Haradinaj.

Nga sot më 11 janar ka nisur zyrtarisht fushata zgjedhore e partive politike për zgjedhjet e 9 shkurtit.

Kandidati për kryeministër nga Partia Demokratike e Kosovës, Bedri Hamza, ka njoftuar se do të hiqen tarifat doganore për importin e makinave elektrike dhe do të subvencionohen stacionet private të mbushjes, shkruan Ekonomia Online.

Hamza gjithashtu paralajmëroi krijimin e vendeve të veçanta për parkimin e makinave elektrike në qytete dhe zëvendësimin gradual të flotës zyrtare me makina elektrike, duke kontribuar në një mjedis më të pastër.

“Çdo makinë elektrike në rrugët e Kosovës është një hap përpara drejt një mjedisi më të pastër dhe më të mirë. Ne do t’i heqim tarifat doganore për importin e makinave elektrike dhe do ta subvencionojmë instalimin e stacioneve private të mbushjes, duke e bërë më të lehtë qasjen dhe qarkullimin e tyre në vendin tonë. Në qytete do të krijojmë vende të veçanta të parkimit për makinat elektrike. E ardhmja e transportit është elektrike dhe gradualisht do ta bëjmë edhe zëvendësimin e flotës zyrtare me makinat elektrike”, ka thënë Hamza.

Kandidati i PDK-së për Kryeministër, Bedri Hamza, ka vizituar kompaninë “Muqa Solar Group” në Suharekë, e cila ka thënë se është dëshmi se energjia solare është edhe një mundësi e mirë ekonomike.

Hamza ka thënë se do ta krijojë një agjenci One-Stop-Shop për t’i përshpejtuar dhe lehtësuar dhëniet e lejeve për investitorët privatë në energjinë e rinovueshme. Kjo agjenci, Hamza ka thënë se do t’u shërbejë edhe qytetarëve që duan të instalojnë panele diellore për shtëpitë, bizneset apo fermat e tyre, duke u ofruar zgjidhje të lehtë dhe të shpejtë.

“Energjia e ripërtërishme është perspektiva, është e ardhmja dhe potencialet ekzistojnë. Ajo që duhet të bëjmë është t’i thjeshtojmë procedurat. Duhet të krijojmë një agjenci one-stop-shop. Sot, për të pasur kapacitete të reja gjeneruese në fushën e energjisë së ripërtërishme, nevojiten 26, 27 apo edhe 28 dokumente. Pse të mos i thjeshtojmë këto? Pse të mos i bëjmë në një vend? Gjithashtu, duhet t’i japim mundësi sektorit privat që të investojë, në mënyrë që të kemi kapacitete të mjaftueshme të energjisë elektrike, sidomos të energjisë së ripërtërishme dhe të rrisim potencialin e investimeve në sektorin privat”, ka thënë Hamza.

Ambasada e Kosovës në Gjermani ka lëshuar një njoftim të rëndësishëm për shtetasit e Kosovës që janë regjistruar për të votuar me postë për zgjedhjet parlamentare.

Sipas njoftimit, të gjithë ata që janë të regjistruar për votim jashtë Kosovës, duhet të dërgojnë fletëvotimet në kutitë postare të Komisionit Qendror të Zgjedhjeve në Kosovë ose jashtë saj, duke ndjekur disa hapa të thjeshtë.

Ambasada ka shpjeguar edhe procedurën e votimit dhe dërgimit të fletëvotimit me postë.