Category: ZGJEDHJET

Kandidatja e NISMËS Socialdemokrate për kryetare të Vushtrrisë, Xhevahire Izmaku, u paraqit të premten nga një shkollë në fshatin Drurar, prej ku premtoi arsim të mirë.

Izmaku takoi edhe familjen e njërit prej kandidatëve të partisë për asamble.

“Familja Demiri, me vlerat dhe përkushtimin e saj, dëshmon se mbështetja për Remziun nuk vjen vetëm nga puna e tij, por edhe nga rrënjët e forta të besimit dhe sakrificës së një familjeje të nderuar”, shkroi ajo.

Bashkëpartiakja e saj që kandidon për komunën e Prizrenit, Albulena Balaj Halimaj, premtoi biçikleta publike për secilën lagje.

“Vendosja e stacioneve të biçikletave publike me qira simbolike në çdo lagje. Marrja dhe dorëzimi e biçikletave në çdo pjesë të qytetit, me pagesë të thjeshtë përmes aplikacionit online”, tha ajo.

Ajo një ditë më parë, u zotua edhe për shendetësi më të mirë për gratë Prizrenase.

Sipas saj ”çdo grua që kujdeset për shëndetin e saj, frymëzon një familje të tërë”.

Të enjten, ajo takoi edhe disa bujq, për çka tha se “bujqit e Atmaxhës janë forca e tokës sonë. Me mbështetje dhe kushte më të mira, prodhimi i tyre do të jetë krenaria e Prizrenit”.

Ndërsa, Ekrem Kastrati që synon të bëhet edhe një herë kryetar i Malishevës, promovoi një projekt që sipas tij po e bënë Malishevën Urbane.

Ndërsa mbrëmë Kastrati shkroi se u bind për fitoren më 12 tetor, pasi pa njerëzit e grumbulluar në tubimin e tij në Drenoc, ku qe edhe kryetari i partisë, Fatmir Limaj.

Kandidati për kryetar të Prishtinës nga Partia Demokratike e Kosovës, Uran Ismajli premton zhbllokimin e trafikut brenda 18 muajsh me shtimin e 60 semaforëve dhe rregullimin e parkingjeve për taksi, duke luftuar taksitë ilegale.

Kandidat për kryetar të Komunës së Gjilanit, Riad Rashiti theksoi rëndësinë e sigurisë publike dhe bashkëpunimin me sektorin privat të sigurimit gjatë vizitës në kompaninë profesionale të sigurimit SAS.

Në Fushë Kosovë, kandidati Rrahim Tërnava premton subvencione për qumështin dhe grante për investime bujqësore, si dhe ndihmën financiare për familjet me fëmijë.

Kandidati, Arian Tahiri në Mitrovicë përqendrohet në mbështetjen e grave në biznes dhe krijimin e mundësive për të rinjtë.

Në Lipjan, Shukri Buja theksoi nevojën për mbështetje të bizneseve lokale që kontribuojnë në zhvillimin ekonomik.

Kandidati, Edon Cana kritikoi qeverisjen aktuale lokale teksa prezantoi planin për zgjerimin e qytetit dhe Rahovecin e ri.

Në Pejë, kandidatja Arta Vokshi – Nallabani premtoi investime të mëdha për inkubator start-up, qendra inovacioni dhe parking nëntokësor.

Ndërkohë Shaqir Totaj i PDK-së që synon edhe një mandat në krye të Prizrenit premton vazhdimin e mbështetjes për fermerët.

Në Ferizaj, Agim Aliu premton që në mandatin e ri të ndërtoj infrastrukturë sportive moderne, përfshirë stadiumin e ri, palestrat dhe fushat ndihmëse sportive, si dhe promovimin e kulturës dhe trashëgimisë.

Sami Lushtaku, kandidat për kryetar të Skenderajt nga radhët e PDK-së, zotohet për një qeverisje të afërt me qytetarët.

Ferit Idrizi që kandidon edhe për një mandat të dytë në krye të Vushtrrisë, zhvilloi takime në bizeset lokale. Ai premtoi bashkëpunim të vazhdueshëm për të përmirësuar kushtet e biznesit vendor.

Kurse, Përparim Ramusa, kandidat për kryetar të Shtimes u zotua për për mbështetje të vazhdueshme ndaj fermerëve dhe zhvillimin e bujqësisë.

Kandidatja e Partisë Socialdemokrate për kryetare të Prishtinës, Besa Shahini, ka premtuar infrastrukturë të bollshme shkollore për fëmijët e komunës.

Shahini tha se ka vizion për shkolla moderne dhe të përshtatshme.

Ajo premton ndërtimin e 10 shkollave tw reja dhe zgjerimin e po aq shkollave ekzistuese me anekse të reja.

Ajo premtoi edhe transport shkollor për fëmijët e Prishtinës.

Me arsim u mor edhe bashkpartiakja e Shahinit, që garon për komunën e Deçanit, Natyra Kuçi.

Ajo premtoi bursa për studentët që vijnë nga kjo komunë.

Ndërkaq, Qëndron Kastrati që synon të kthehet në krye të Kamenicës, vizitoi një punëtori të vogël.

“Z. Mehmet është besnik ndaj punës së tij, të cilën e ushtron prej plot 45 vitesh. Me mjetin e tij të veçantë, të quajtur “drebong”, ai gdhend me kujdes dhe ndihmon zejtarët e Kamenicës në mirëmbajtjen e veglave të tyre të punës”, shkroi ai.

Ndërsa të enjten mbrëma ai takoi banorët e fshatit Roganë, të cilëve iu premtoi subvencione.

Ai foli për subvencione për aktivitete sportive, përfshirë turnirin e Roganës, dhe investime në infrastrukturë që sipas tij, e kthejnë Roganën në vend për kampe e trajnime verore të klubeve nga i gjithë Ballkani.

Këta janë kandidatët e vetëm të PSD-së, që i kanë hyrë garës për kryetar komune me numër 149.

Kandidati i Lëvizjes Vetëvendosje për kryetar të Prishtinës, Hajrulla Çeku teksa theksoi rëndësinë e prodhimit vendor dhe mbështetjen e sektorit privat për rritjen e punësimit, ka premtuar ndër të tjera një Park Industrial në Bërnicë dhe bashkëpunim me shkolla profesionale.

Në Gjakovë, kandidati Ardian Gola angazhohet për investime në prodhimin e dronëve, një sektor i ri që do të sjellë zhvillim ekonomik dhe hapje të vendeve të reja të punës për banorët e komunës.

Në Gjilan, Alban Hyseni, që kërkon mandat të dytë, premton vazhdimin e mbështetjes për organizatat e dala nga lufta.

Kandidati, Filiz Mustafa në Dragash premtoi mbështetje dhe kushte me të mira për tregtarët

Kandidati për kryetar komune në Mitrovicë, Faton Peci thekson nevojën për barazi dhe rikthim në prona, si dhe zhvillim të infrastrukturës dhe transportit publik për të dy komunat e qytetit.

Kandidati për kryetar komune në Lipjan, Ilir Qeriqi premton transformimi urban të qytetit, me zhvillimin e sheshit qendror si projekt kryesor.

Hysni Mehani në Skenderaj ngre pyetje për menaxhimin e fondeve publike dhe kritikon qeverisjen aktuale për mosqartësi në shpenzimin e mjeteve.

Qemajl Aliu, kryetar aktual i Shtimes që kërkon edhe një mandat premton mbështetje të vazhdueshme të sipërmarrësve dhe biznesve vendore për krijim të vendeve të punës dhe rritje të eksportit.

Kandidati i VV-së për Suharekë, Hamdi Bytyçi premton trajnime për mësimdhënësit në përdorimin e programeve të inteligjencës artificiale, duke përmirësuar arsimin në komunë.

Enver Haliti në Ferizaj premton përfshirjen e personave me nevoja të veçanta, me politika për barazi sociale dhe përmirësim të infrastrukturës në hapësirat publike.

Sylejman Meholli në Vushtrri premton mbështetje rekorde për bujqësinë dhe fermerët, duke investuar në mekanizma të rinj mbështetës bujqësorë.

Valon Hoti në Malishevë zotohet për sigurimin e furnizimit të qëndrueshëm me ujë për banorët, duke denoncuar keqmenaxhimin e projekteve të mëparshme.

Kandidati i Lëvizjes Vetëvendosje për kryetar të Junikut, Jetmir Tofaj, premtoi grante për ta stimuluar sektorin e bujqësisë në komunë.

“Politikat tona për bujqësinë parashohin krijimin e granteve për pajisje bujqësore për fidane për fara e kështu me rradhë. Subvencionimin e qumështit në veçanti”, tha ai.

Ndiqni intervistën:

Kandidati i Lëvizjes Vetëvendosje për kryetar të Junikut, Jetmir Tofaj, premtoi mësim gjithëditor për nxënësit e komunës së Junikut.

“prioritet i yni është edhe arsimi, edukimi i brezave të rinjë. Në këtë aspekt, kemi menduar aplikimin e mësimit tërëditor, si një modul i veçantë. Edhe këtë do ta fillojmë me një fazë testuese, duke shtuar dy orë jashtë planprogramit që është miratuar edhe kurikula e Ministrisë së Arsimit”, tha ai.

Ndiqni intervistën:

Kandidati i Lëvizjes Vetëvendosje për kryetar të Junikut, Jetmir Tofaj, ishte i vetmi prezent nga të gjithë kandidatët që synojnë postin në krye të komunës.

Tofaj kritikoi kundërkandidatët e tij si të papërgjegjshëm për mospjesëmarrje në debat.

“E shoh si një mungesë të përgjegjësisë ndaj qytetarit”, deklaroi Tofaj.

Ndiqni intervistën:

Kandidati i Bashkimit Demokratik të Prizrenit për kryetar të Prizrenit, Zafir Berisha, kritikoi kryetarin aktual të komunës, Shaqir Totaj, për mosgatishmëri për debat.

“Shaqa ia humbi kuptimin e përballjes së ideve, vizionit të kandidatëve karshi qytetarëve të Prizrenit. Nuk qëndron ajo se janë shumë kandiadat sepse edhe para katër viteve kanë qenë po kaq kandidat, por ka marë pjesë në debat sepse atëherë ka qenë në opozitë”, tha Berisha.

Kryetari aktual i Prizrenit, Shaqir Totaj nga PDK-ja, që synon edhe një mandate në krye të Prizrenit, ka deklaruar se po i refuzon debatet për shkak të numrit të madhë të kandidatëve.

Ndiqni debatin:

Kandidati i Lëvizjes Vetëvendosje për kryetar të Prizrenit, Artan Abrashi, ka deklaruar se komuna e Prizrenit ka hyrë në borxhe prej 57 milionë eurosh, duke iu referuar të dhënave nga Ministria e Financave.

Abrashi ka thënë se për këtë borxh, dëshironte ta pyeste vetë kryetarin aktual, Shaqir Totaj.

“Këtu do të doja ta kisha përball zotrin Totaj, për ta pyeter edhe unë, si, çfarë”, tha ai.

Ndiqni debatin:

Kandidati i Lidhjes Demokratike të Kosovës për kryetar të Prizrenit, Driton Selmanaj, ka kritikuar kundërkandidatët e tij nga Lëvizja Vetëvendosje dhe Partia Demokratike e Kosovës, për mosgatishmëri për debat.

“Më lejo të shpreh të them kështu, mospajtimin tim për mosgatishmërinë e kundërkandidatëve të mi, zotrin Totaj dhe zotrin Abrashi, që të debatojmë, që të zhvillojmë debat të mirëfillt dhe më pas njerëzit mund të na analizojnë krahasojnë”, tha ai.

Ndiqni debatin: