Category: SPORT

Milot Rashica mund të jetë pranë fundit të aventurës së tij te Besiktasi, pavarësisht se sulmuesi i Kosovës ka ende një vit kontratë me klubin turk.

E ardhmja e 30-vjeçarit në Stamboll është vënë në pikëpyetje nga zhvillimet e fundit në merkato. Sipas mediave turke, përfshirë Milliyet, Besiktasi po shqyrton mundësinë e transferimit të një tjetër futbollisti për krahun e djathtë të sulmit.

Një lëvizje e tillë do të komplikonte situatën e Rashicës, pasi klubi do të kishte tre futbollistë të huaj për të njëjtin pozicion.

Në këtë skenar, Rashica mund të jetë lojtari që do t’i hapte rrugë përforcimit të ri, duke bërë që aventura e tij te gjiganti turk të përfundojë më herët se sa ishte planifikuar.

Drejtuesit e Besiktasit raportohet se janë të kënaqur me Vaclav Cernyn, i cili shihet si një nga opsionet që mund të ketë përparësi në krahun e djathtë.

Nëse klubi arrin marrëveshje edhe me një tjetër lojtar për këtë repart, atëherë mundësia e largimit të Rashicës do të bëhej edhe më konkrete.

Reprezentuesi i Kosovës është pjesë e Besiktasit prej disa sezonesh dhe ka zhvilluar 119 paraqitje, duke kontribuar me 13 gola dhe 25 asistime.

Tani mbetet të shihet nëse Rashica do të vazhdojë në Stamboll edhe në sezonin e ardhshëm, apo do të nisë një kapitull të ri në karrierën e tij.

Nick Kyrgios është përballur me një goditje të rëndë, pasi tenisti australian është pezulluar përkohësisht pas rezultatit pozitiv në një test antidoping për kokainë.

Agjencia Ndërkombëtare e Integritetit të Tenisit (ITIA) ka konfirmuar se mostra e dhënë nga Kyrgios më 22 qershor, gjatë turneut të Mallorcas, përmbante benzoilekgoninë, një metabolit të kokainës.

Sipas BBC, 31-vjeçari është nën pezullim të përkohshëm që nga 4 gushti, çka e ka lënë atë jashtë aktiviteteve të organizuara nga ATP dhe WTA.

Vetë Kyrgios ka reaguar përmes rrjeteve sociale, duke pranuar shkeljen dhe duke kërkuar falje për atë që e cilësoi si një “gabim shumë të madh”.

“Doja që këtë ta dëgjonit fillimisht nga unë. Së fundmi, dështova në një test antidoping në Mallorca, pasi rezultova pozitiv për kokainë. Kam bërë një gabim shumë të madh dhe marr përgjegjësi të plotë për të”, ka shkruar australiani.

Kyrgios u ka kërkuar falje tifozëve, familjes, sponsorëve dhe veçanërisht fëmijëve që e ndjekin, duke pranuar se është thellësisht i zhgënjyer me veten.

Pezullimi i përkohshëm nënkupton se tenisti nuk mund të garojë, të punojë si trajner apo të marrë pjesë në turnetë Grand Slam dhe në garat e tjera të zhvilluara nën autoritetin e ATP dhe WTA.

ITIA ka bërë të ditur se Kyrgios ka të drejtë ta apelojë vendimin. Deri tani, australiani nuk e ka ushtruar këtë të drejtë.

Tashmë mbetet të shihet se cili do të jetë vendimi përfundimtar dhe sa do të ndikojë kjo çështje në të ardhmen e karrierës së tenistit kontrovers australian.

Barcelona ishte e gatshme ta shiste Raphinhan këtë verë, veçanërisht drejt Arabisë Saudite. Këtë e ka zbuluar gazetari i njohur Romain Molina, duke hedhur dritë edhe mbi arsyen e transferimit të Jesse Bisiëut nga Club Brugge.

Sipas Molinës, drejtuesit e Barcelonës kishin përgatitur një plan edhe në rast të largimit të brazilianit, ndërsa Bisiëu shihej si një alternativë në krahun e sulmit.

“Bordi ishte shumë i hapur për largimin e Raphinhas, sidomos drejt Arabisë Saudite. Kjo është edhe arsyeja pse Barcelona nënshkroi me një tjetër sulmues të ri anësor. Gjithçka ishte planifikuar paraprakisht”, deklaroi Molina.

Raphinha prej kohësh ka qenë në radarët e klubeve saudite dhe për të nuk kanë munguar ofertat e majme. Megjithatë, situata duket se ka ndryshuar.

Molina nuk e përjashton mundësinë që Arabia Saudite të rikthehet me një ofertë të re para mbylljes së afatit kalimtar, por aktualisht largimi i brazilianit duket i vështirë.

Raphinha konsiderohet një nga lojtarët kryesorë të Hansi Flick dhe rëndësia e tij për Barcelonën u theksua edhe me emërimin e tij si kapiten i përkohshëm.

Për Barcelonën, shitja e tij do të kishte një ndikim të madh financiar dhe do t’i krijonte hapësirë klubit për të investuar në një sulmues të ri.

Për momentin, megjithatë, gjithçka tregon se Raphinha do të vazhdojë në Camp Nou. Por nëse nga Arabia Saudite vjen një ofertë e jashtëzakonshme, situata mund të ndryshojë sërish.

Paul Pogba dhe Monaco kanë ndarë rrugët, pasi të dyja palët kanë rënë dakord për ndërprerjen e kontratës me marrëveshje të përbashkët.

Mesfushori francez kishte kontratë me klubin nga Principata deri në qershor të vitit 2027, por aventura e tij përfundoi para kohe, vetëm pak kohë para startit të sezonit të ri.

Monaco ka bërë të ditur se vendimi erdhi pasi objektivat e vendosura në fillim të bashkëpunimit u realizuan vetëm pjesërisht.

“Pas një vlerësimi të përbashkët se objektivat e përcaktuara fillimisht ishin realizuar vetëm pjesërisht, Monaco dhe Paul Pogba kanë vendosur të ndërpresin kontratën e tyre”, thuhet në njoftimin e klubit.

Monaco gjithashtu i ka shprehur mirënjohjen e tij Pogbas, duke vlerësuar profesionalizmin dhe besimin që ai tregoi gjatë periudhës së kaluar në klub.

Edhe vetë fituesi i Kupës së Botës 2018 ka reaguar pas ndarjes, duke falënderuar drejtuesit, bashkëlojtarët, stafin dhe tifozët e Monacos.

“Përfaqësimi i këtij klubi dhe i Principatës ishte një përvojë e jashtëzakonshme. Monaco është një klub fantastik dhe, edhe pse nuk luajta aq shumë ndeshje sa shpresoja, do të jem gjithmonë mirënjohës për mundësinë që pata t’i vesh ngjyrat e tij. Daghe Munegu!”, ka shkruar Pogba.

Rikthimi i francezit në futboll pas pezullimit për doping nuk shkoi sipas pritshmërive. Problemet e vazhdueshme fizike e penguan Pogban të gjejë ritmin e duhur, ndërsa së fundmi ai pësoi edhe një tjetër dëmtim në muskujt e pasmë të kofshës gjatë përgatitjeve parasezonale.

Tashmë, Pogba është sërish lojtar i lirë dhe mbetet për t’u parë se ku do ta vazhdojë karrierën.

Aston Villa ka bërë zyrtare dy përforcime të reja për sezonin e ardhshëm, duke afruar në skuadër portierin japonez Zion Suzuki dhe mbrojtësin italian Matteo Ruggeri.

Klubi anglez po vazhdon të jetë aktiv në merkato, me synimin për të ndërtuar një skuadër sa më konkurruese si në Ligën Premier, ashtu edhe në Ligën e Kampionëve.

Pas afrimeve të Johan Manzambit nga Freiburg, João Gomes nga Wolves dhe huazimit të Alejandro Garnachos nga Chelsea, Aston Villa ka finalizuar edhe dy lëvizje të tjera të rëndësishme.

Transferimet e Ruggerit dhe Suzukit janë konfirmuar nga vetë klubi përmes faqes zyrtare.

“Aston Villa ka kënaqësinë të njoftojë nënshkrimin e Matteo Ruggerit nga Atlético Madrid”, thuhet në njoftimin për mbrojtësin italian.

Ndërsa për portierin japonez, klubi anglez njoftoi: “Aston Villa ka kënaqësinë të njoftojë nënshkrimin e Zion Suzukit nga Parma”.

Sipas raportimeve, Aston Villa ka shpenzuar rreth 18 milionë euro për Ruggerin, ndërsa transferimi i Suzukit kap vlerën e rreth 35 milionë eurove.

Me këto dy përforcime, skuadra nga Birminghami po tregon qartë ambiciet e saj për sezonin e ri.

Mirlind Daku po përshtatet gjithnjë e më mirë me aventurën e tij të re te Spartaku i Moskës, teksa ishte një nga protagonistët e fitores 2-1 ndaj Baltikës në javën e katërt të Premier Ligës ruse.

Sulmuesi shqiptar dha kontribut të drejtpërdrejtë në suksesin e skuadrës së tij, duke asistuar për Manfred Ugalden në golin e parë të Spartakut në ndeshjen e zhvilluar në Kaliningrad.

Pas përfundimit të takimit, Daku e vlerësoi maksimalisht fitoren, duke theksuar se përballja me Baltikën ishte një nga ato ndeshje ku më e rëndësishmja ishte marrja e tri pikëve.

Për sulmuesin shqiptar, nuk ka rëndësi nëse është ai që shënon apo nëse kontribuon në një mënyrë tjetër. Objektivi mbetet i njëjtë: fitorja e ekipit.

Daku ka krijuar tashmë një lidhje interesante me Ugalden në repartin ofensiv. Edhe pse dy lojtarët nuk kanë shumë kohë që luajnë së bashku, shqiptari beson se mirëkuptimi mes tyre është i natyrshëm dhe se me kalimin e ndeshjeve bashkëpunimi do të bëhet edhe më i mirë.

Ai e njeh mirë mënyrën e lojës së Ugaldes dhe beson se të dy mund të formojnë një dyshe të rrezikshme për kundërshtarët në vazhdim të sezonit.

Transferimi te Spartaku shënoi fundin e një kapitulli trevjeçar për Dakun te Rubini i Kazanit. 28-vjeçari pranoi se largimi nuk ishte i lehtë, pasi gjatë qëndrimit në klub kishte krijuar miqësi dhe lidhje të shumta.

Megjithatë, tashmë e gjithë vëmendja e tij është te aventura e re. Daku dëshiron të konsolidohet te Spartaku dhe të vazhdojë të japë kontribut për skuadrën e Moskës.

Pas katër javësh, Spartaku ka grumbulluar nëntë pikë dhe aktualisht renditet në vendin e tretë në Premier Ligën ruse.

Sfida e radhës do të jetë një test i madh për Dakun dhe bashkëlojtarët e tij, pasi më 23 gusht në Moskë do të presin Zenitin.

Daku iu bashkua Spartakut këtë verë pas tri sezonesh te Rubini, ku zhvilloi 93 ndeshje në të gjitha garat, duke shënuar 38 gola dhe regjistruar 13 asistime. Tani, sulmuesi shqiptar synon ta vazhdojë formën e mirë edhe me gjigantin nga Moska

Luka Modric është gati për sezonin e dytë me fanellën e Milanit dhe duket se motivimi i kroatit për të vazhduar aventurën në “San Siro” është më i madh se kurrë.

Mesfushori 40-vjeçar ka bërë të qartë se synon të luftojë për objektivat e klubit dhe të japë maksimumin për një skuadër me të cilën tashmë është krijuar një lidhje e veçantë.

Modric ka pranuar se dëshira për të qëndruar në Milano kishte qenë gjithmonë e pranishme, por para se të merrte vendimin përfundimtar duhej të zgjidhte disa çështje. Tani, ai është rikthyer me energji të reja dhe me synimin për të dhënë kontributin e tij në sezonin e ri.

Kroati ka folur edhe për fundin zhgënjyes të sezonit të kaluar, duke e përshkruar atë si një periudhë frustruese. Milani ishte në garë për titull deri në muajin mars, ndërsa një lëndim e pengoi Modricin të ndihmonte ekipin në momentet vendimtare.

Pavarësisht mungesës së kualifikimit në Ligën e Kampionëve, ai vlerëson se sezoni solli edhe shumë aspekte pozitive, veçanërisht atmosferën brenda klubit dhe raportet mes lojtarëve.

Edhe gjatë angazhimit me Kroacinë në Kupën e Botës, Modric nuk e humbi lidhjen me Milanin. Edhe pse fokusi i tij ishte te kombëtarja, mesfushori vazhdoi të qëndronte në kontakt me klubin dhe ta ndiqte nga afër situatën në Milano.

Një nga arsyet kryesore që e ka bindur të vazhdojë aventurën në Itali është lidhja e krijuar me tifozët. Modric ka mbetur i impresionuar nga mbështetja që ka marrë gjatë gjithë sezonit dhe dëshiron t’ua shpërblejë këtë dashuri me paraqitje sa më të mira.

Për kroatin, Milani është një klub i veçantë dhe për nga madhështia e vendos në të njëjtën kategori me Real Madridin, klubin ku kaloi pjesën më të madhe të karrierës së tij.

Modric ka theksuar se që nga dita e parë në Milano është ndier sikur ka qenë pjesë e klubit prej vitesh. Pikërisht kjo ndjenjë përkatësie dhe dashuria e tifozëve duket se e kanë shtyrë të kërkojë edhe më shumë nga vetja.

Tani, me sezonin e ri në prag, Modric synon ta shijojë në maksimum aventurën te Milani dhe të ndihmojë “Rossonerët” të rikthehen te trofetë.

Cristiano Ronaldo mund të rikthehet shumë shpejt në fushën e blertë me fanellën e Al-Nassr, pasi gjithçka po shkon sipas planit në përgatitjet e tij fizike.

Ylli portugez i është rikthyer stërvitjeve me skuadrën javën e kaluar, pas më shumë se një muaji jashtë fushave. Megjithatë, ai ende nuk është në gjendjen optimale për të luajtur dhe për këtë arsye ka munguar në dy ndeshjet e para të sezonit.

Sipas raportimeve nga Arabia Saudite, stafi i përgatitjes fizike të Al-Nassr po punon intensivisht për ta rikthyer Ronaldon në formën më të mirë të mundshme. Portugezi po ndjek një program të veçantë stërvitor dhe pritet të zhvillojë edhe seanca të plota fizike gjatë ditëve në vijim.

Ronaldo nuk ishte pjesë e skuadrës në fitoren 3-0 ndaj Al-Fateh në ndeshjen hapëse të Roshn League dhe gjithashtu pritet të mungojë në duelin ndaj Al-Diriyah në King Cup.

Megjithatë, rikthimi i shumëpritur mund të ndodhë në ndeshjen e radhës të kampionatit. Al-Nassr do të përballet me Al-Riyadh më 21 gusht, dhe kjo sfidë po shihet si mundësia më e madhe që Ronaldo të rikthehet në aksion.

Raportimet bëjnë të ditur se 40-vjeçari nuk ka humbur shumë nga gjendja e tij fizike gjatë periudhës jashtë skuadrës dhe po i afrohet gradualisht rikthimit në ritmin e garave.

Ronaldo vjen pas një sezoni të jashtëzakonshëm me Al-Nassr, ku ishte një nga protagonistët kryesorë në triumfin e klubit në Roshn League. Tashmë, objektivi i tij i madh është edhe më i qartë: të udhëheqë skuadrën saudite drejt trofeut të parë në AFC Champions League Elite.

Nëse rikuperimi vazhdon pa probleme, 21 gushti mund të jetë data kur Cristiano Ronaldo do të rikthehet sërish në fushë, duke i dhënë një tjetër dimension skuadrës së Al-Nassr.

Guglielmo Vicario është zyrtarisht lojtari më i ri i Juventusit, duke kompletuar kalimin te gjiganti italian nga Tottenham Hotspur.

Portieri italian do t’i bashkohet “Zonjës së Vjetër” në formë huazimi deri në fund të sezonit, me Juventusin që ka siguruar edhe mundësinë për ta blerë përfundimisht kartonin e tij për 8 milionë euro.

Për Vicarion, ky transferim shënon rikthimin në Serie A pas tre vitesh. 29-vjeçari e njeh mirë kampionatin italian, pasi më herët ka mbrojtur portën e Empolit.

Pas aventurës në Itali, Vicario u transferua te Tottenham, ku gradualisht u shndërrua në një prej lojtarëve të rëndësishëm të skuadrës londineze.

Gjatë periudhës së tij me “Spurs”, italiani regjistroi 93 paraqitje, ndërsa në vitin 2025 ishte pjesë e skuadrës që fitoi Europa League.

Tani Vicario rikthehet në Itali me një mision të ri, këtë herë për të mbrojtur portën e Juventusit dhe për të bindur drejtuesit e klubit se meriton një transferim të përhershëm në Torino.

Endrick nuk do të largohet nga Real Madridi gjatë kësaj vere. Pavarësisht spekulimeve për një huazim të mundshëm, sulmuesi brazilian do të vazhdojë të jetë pjesë e skuadrës madrilene edhe në sezonin e ri.

Sipas The Athletic, klubi, trajneri Jose Mourinho dhe vetë Endricku kanë arritur një marrëveshje që 20-vjeçari të qëndrojë në “Santiago Bernabeu” dhe të luftojë për minutat e tij.

Interesimi për brazilianin nuk ka munguar, me Aston Villan dhe Romën që kishin shfaqur interesim për ta marrë në formë huazimi. Megjithatë, Real Madridi ka vendosur të mos e ndërpresë për momentin aventurën e tij në kryeqytetin spanjoll.

Mourinho pritet t’i japë Endrickut një rol më të gjerë në repartin ofensiv. Trajneri portugez e sheh atë si alternativë si në krahun e djathtë, ashtu edhe në qendër të sulmit, duke i krijuar mundësi për të fituar një vend në formacion.

Braziliani do të ketë konkurrencë të fortë për minutat, veçanërisht nga Yan Diomande dhe Brahim Diaz, ndërsa Mourinho tashmë ka nisur të përcaktojë hierarkinë dhe rolet e lojtarëve për sezonin e ri.

Megjithatë, qëndrimi i Endrickut nuk nënkupton domosdoshmërisht se ai do të jetë pjesë e skuadrës deri në fund të sezonit. Real Madridi pritet ta analizojë përsëri situatën e tij në janar, ashtu siç ndodhi edhe sezonin e kaluar.

Nëse sulmuesi nuk arrin të sigurojë minutat e dëshiruara, atëherë një huazim mund të rikthehet në tryezë si opsion.

Për momentin, topi është në këmbët e Endrickut. Braziliani do të ketë mundësinë të bindë Mourinhon dhe të tregojë se meriton një rol të rëndësishëm në projektin e ri të Real Madridit.

Mourinho, ndërkohë, ka fituar një tjetër alternativë në repartin ofensiv, ndërsa rikthimi i tij në stolin e Real Madridit është bërë zyrtar me një kontratë deri në qershor të vitit 2029.