Category: SPORT

Patrick Vieira ka marrë një nga detyrat më të rëndësishme në karrierën e tij si trajner, pasi është emëruar përzgjedhës i ri i Përfaqësueses së Senegalit.

Federata Senegaleze e Futbollit e ka konfirmuar të martën emërimin e ish-mesfushorit francez, i cili ka lindur në Dakar. Vieira do të zëvendësojë Pape Thiaw, i cili u largua nga posti pas eliminimit të Senegalit në fazën e 1/16-ve të Kampionatit Botëror.

Për Vieira, kjo do të jetë një përvojë krejtësisht e re, pasi për herë të parë do të drejtojë një kombëtare. Deri më tani, 50-vjeçari ka ndërtuar karrierën e tij në pankinat e klubeve në Angli, Francë dhe Itali.

Ai ka drejtuar Crystal Palace në Premier League, ndërsa në Francë ka qenë në krye të Nice dhe Strasbourg. Në Itali pati një eksperiencë të shkurtër me Genoan në Serie A.

Emërimi i Vieira ka edhe një dimension të veçantë, pasi ai ka lindur pikërisht në Dakar dhe tani do të rikthehet në vendlindje për të udhëhequr kombëtaren e Senegalit.

Si futbollist, Vieira ndërtoi një karrierë të jashtëzakonshme. Me Francën, ai ishte pjesë e skuadrës që fitoi Kupën e Botës 1998 dhe Euro 2000, ndërsa regjistroi më shumë se 100 paraqitje me fanellën e “Gjelave”.

Në nivel klubesh, emri i tij lidhet veçanërisht me Arsenalin, ku zhvilloi mbi 400 ndeshje dhe fitoi tri herë titullin e kampionit të Anglisë.

Tashmë, Vieira do të ketë përpara një sfidë të re dhe mjaft të veçantë: të drejtojë Senegalin në përgatitjet për Kupën e Kombeve të Afrikës 2027. Puna e tij pritet të nisë gjatë grumbullimit të ardhshëm të kombëtares, ndërsa kualifikimet për këtë turne pritet të fillojnë në shtator.

Për ish-kampionin e botës, aventura në Senegal do të jetë një kapitull i ri në karrierën e tij, këtë herë në vendin ku nisi gjithçka.

Përballja mes Dritës dhe Prishtinës, e paraparë të zhvillohej në kuadër të javës së dytë të Superligës së Kosovës, nuk do të zhvillohet sipas orarit të planifikuar.

Komisioni i Garave i Federatës së Futbollit të Kosovës ka vendosur ta shtyjë këtë ndeshje për shkak të angazhimit të Dritës në garat evropiane.

Skuadra nga Gjilani është e fokusuar në ndeshjen e play-offit të UEFA Conference League, çka ka bërë që dueli ndaj Prishtinës të zhvendoset për një datë tjetër.

Prishtina ka konfirmuar shtyrjen e takimit, duke bërë të ditur se data e re do të caktohet në një moment të mëvonshëm dhe do të publikohet me kohë.

Kështu, tifozët e të dyja skuadrave do të duhet të presin edhe pak për njërin prej dueleve më interesante të javës së dytë në elitën e futbollit kosovar.

Pep Guardiola ka lënë të hapur mundësinë që të mos rikthehet më në pankinë pas përfundimit të aventurës së tij dhjetëvjeçare me Manchester Cityn.

Trajneri katalanas, i cili gjatë dekadës së kaluar u shndërrua në një prej figurave më të rëndësishme të futbollit modern, ka pranuar se aktualisht ndihet më shumë i lodhur sesa i motivuar për të nisur një tjetër projekt.

Në dokumentarin e ri të Amazon, “A Beautiful Obsession”, Guardiola ka folur hapur për gjendjen e tij pas viteve me presion të jashtëzakonshëm në nivelin më të lartë të futbollit.

Ai ka pranuar se ende nuk e di se çfarë do të bëjë në të ardhmen dhe se rikthimi në pankinë nuk është diçka që e sheh si të afërt. Sipas tij, për momentin ka nevojë të shkëputet, të marrë frymë dhe t’i kushtojë më shumë kohë vetes dhe jetës personale.

Guardiola dëshiron të largohet për një periudhë nga ritmi intensiv i futbollit, edhe pse e pranon se qëndrimi larg emocioneve të pankinës nuk është aspak i lehtë.

Trajneri spanjoll ka folur në vazhdimësi për varësinë që krijon puna në futbollin elitar. Për të, kënaqësia më e madhe mbetet momenti kur sheh ekipin e tij duke luajtur në nivelin që dëshiron, por pikërisht kjo dëshirë për të qenë gjithmonë në majë mund të kthehet edhe në një barrë.

Gjatë periudhës së tij te Manchester City, Guardiola fitoi trofe të shumtë dhe ndërtoi një nga skuadrat më dominuese të epokës moderne, duke e kthyer klubin anglez në një forcë të madhe të futbollit evropian.

Ndërkohë, para se të bëhej publik vendimi i tij për të marrë një pushim, Guardiola kishte qenë në radarët e Federatës Italiane të Futbollit për postin e trajnerit të kombëtares.

Paolo Maldini, i cili në atë kohë ishte drejtor teknik i FIGC-së, ka treguar se Guardiola ishte seriozisht i interesuar për mundësinë dhe madje kishte diskutuar ide taktike gjatë një takimi në Barcelonë.

Megjithatë, në fund trajneri katalanas zgjodhi të mos e ndërmerrte atë sfidë dhe të qëndronte besnik ndaj nevojës së tij për t’u shkëputur nga futbolli.

Tani, e ardhmja mbetet e paqartë. Guardiola mund të rikthehet një ditë në pankinë, por për momentin duket se futbolli nuk është më prioriteti i tij i parë.

Max Verstappen nuk po e shijon në mënyrën më të mirë sezonin e ri në Formula 1. Kampioni katër herë i botës ka qenë mjaft kritik ndaj rregulloreve të reja dhe mënyrës se si po zhvillohet gara në pistë.

Holandezi, i cili në fillim të vitit kishte lënë të hapur edhe mundësinë e largimit nga Formula 1, vazhdon të ketë rezerva për drejtimin që ka marrë sporti. Në prag të garës së shtëpisë në Zandvoort, piloti i Red Bull nuk i ka kursyer kritikat.

Verstappen ka arritur vetëm katër podiume këtë sezon, ndërsa përvojën e tij në makinat e reja e ka përshkruar me tone mjaft të ashpra.

Sipas tij, gara mund të bëhet më argëtuese vetëm në raste të caktuara, sidomos kur makina është më e lehtë për t’u kontrolluar. Në pjesën më të madhe të kohës, megjithatë, ai nuk po gjen kënaqësinë e dikurshme në drejtimin e makinës.

Një tjetër problem që ka ndikuar në përvojën e tij lidhet me menaxhimin e baterisë dhe energjisë gjatë garave. Verstappen ka bërë të qartë se këto elemente kanë ndryshuar ndjeshëm mënyrën se si pilotët duhet t’i qasen garës.

Pavarësisht vështirësive, podiumi i fundit në Hungari i dha një shtysë të rëndësishme në kampionat. Ky ishte podiumi i katërt i Verstappenit këtë sezon dhe i mundësoi atij të ngjitej në vendin e gjashtë në renditje.

Kampioni holandez tani numëron 109 pikë, ndërsa beteja për pozitat e para vazhdon të mbetet e hapur.

Me garën në Zandvoort që po afrohet, mbetet të shihet nëse Verstappen do të arrijë të rikthehet te fitorja apo do të vazhdojë të përballet me vështirësitë që ka sjellë epoka e re e Formula 1.

Diego Simeone ka dhënë sinjale të qarta se Julian Alvarez do të mbetet pjesë e Atletico Madridit edhe në sezonin e ri, pavarësisht interesimit të Barcelonës për sulmuesin argjentinas.

Trajneri madrilen ka bërë të ditur se klubi nuk dëshiron të ndahet nga 25-vjeçari dhe se ai konsiderohet një prej figurave qendrore të projektit të Atletico Madridit. Sipas Simeones, synimi është që skuadra e ardhshme të ndërtohet rreth Alvarezit, të cilin e sheh si lojtarin më të rëndësishëm të ekipit.

Megjithatë, argjentinasi nuk pritet të jetë në dispozicion për ndeshjen hapëse të La Ligës ndaj Malagas. Simeone ka sqaruar se sulmuesit i nevojiten edhe disa ditë stërvitje për të arritur nivelin e duhur fizik dhe për të qenë plotësisht i gatshëm për konkurrencën.

Simeone gjithashtu ka përforcuar qëndrimin e klubit duke iu referuar vendimit të pronarit Miguel Ángel Gil Marín, i cili nuk ka dhënë dritën jeshile për largimin e Alvarezit. Për trajnerin, vendimi i pronarit është përfundimtar dhe nuk lë shumë hapësirë për diskutime rreth një transferimi të mundshëm.

Në Atletico Madrid, fokusi duket të jetë te zhvillimi i mëtejshëm i Alvarezit dhe krijimi i një skuadre që mund t’i japë atij një rol edhe më të rëndësishëm. Klubi dëshiron që sulmuesi të vazhdojë të jetë një nga liderët e ekipit, si në aspektin sportiv, ashtu edhe në dhomën e zhveshjes.

Kështu, pavarësisht zërave për një kalim të mundshëm te Barcelona, qëndrimi i Atletico Madridit mbetet i qartë: Julian Alvarez nuk është në shitje dhe pritet të jetë një nga protagonistët kryesorë të skuadrës në sezonin e ri.

Sulmuesi kosovar Muhamet Hyseni do ta vazhdojë karrierën në futbollin rumun, pasi ka kompletuar transferimin te Farul Constanta.

Klubi rumun ka konfirmuar marrëveshjen me skuadrën daneze AC Horsens për transferimin e Hysenit. 25-vjeçari tashmë ka kaluar me sukses edhe testet mjekësore dhe i është bashkuar ekipit, duke nisur kështu një kapitull të ri në karrierën e tij.

Hyseni, i lindur në Podujevë, rikthehet në një kampionat të huaj pas një sezoni te Llapi, ku vazhdoi të dëshmojë instinktin e tij për gol.

Në 32 ndeshje me skuadrën podujevase, sulmuesi realizoi 12 gola dhe tri asistime, duke qenë ndër lojtarët më produktivë të ekipit.

Megjithatë, edicioni më i spikatur i Hysenit mbetet sezoni 2023/24, kur ai shpërtheu me 26 gola dhe shtatë asistime në 36 paraqitje, duke u shpallur golashënuesi më i mirë i Superligës së Kosovës.

Në total, Hyseni ka zhvilluar 108 ndeshje në elitën e futbollit kosovar, në të cilat ka shënuar 41 gola dhe ka regjistruar 13 asistime.

Gjatë karrierës së tij, ai ka mbrojtur ngjyrat e Feronikelit 74, Malishevës dhe Llapit, ndërsa ka pasur edhe përvojë në futbollin danez me AC Horsens.

Hyseni është gjithashtu pjesë e Kombëtares së Kosovës. Me fanellën e “Dardanëve” ka regjistruar dy paraqitje, duke shënuar edhe një gol.

Tashmë, sfida e radhës për sulmuesin kosovar është aventura në Rumani, ku do të synojë të vazhdojë formën e tij para portës dhe të lërë gjurmë edhe në futbollin rumun.

Sezoni i ri në elitën e futbollit turk ka nisur në mënyrën më të mirë të mundshme për Lumbardh Dellovën.

Qendërmbrojtësi kosovar është përfshirë në formacionin më të mirë të javës së parë, sipas platformës së specializuar për statistika, Sofascore. Dellova u rendit mes 11 futbollistëve më të dalluar të xhiros hapëse, pas një paraqitjeje mbresëlënëse me fanellën e Amedsporit.

Në sfidën ndaj Erzurumsporit, Amedspor triumfoi bindshëm me rezultat 3-0, ndërsa Dellova ishte një nga protagonistët kryesorë të fitores.

27-vjeçari u vlerësua me notën 8.2, duke spikatur si në fazën defensive, ashtu edhe në ndërtimin e aksioneve. Ai kontribuoi edhe me asistimin për golin e parë të takimit, ndërsa në mbrojtje tregoi siguri dhe qetësi.

Dellova kompletoi 72 pasime, me saktësi prej 91 për qind, ndërsa regjistroi edhe tri pasime kyçe. Përveç kësaj, ai realizoi pesë rikuperime të topit dhe fitoi dy duele, duke dëshmuar se është një nga përforcimet më të rëndësishme të Amedsporit për sezonin e ri.

Pas një debutimi të tillë, përfshirja e tij në formacionin e javës është një tjetër vlerësim për mbrojtësin kosovar, i cili tashmë ka dhënë sinjale të qarta se synon të ketë një rol të rëndësishëm në skuadrën turke.

Diant Ramaj ka kompletuar rikthimin te Copenhagen, duke u transferuar në formë huazimi nga Borussia Dortmund. Marrëveshja mes klubeve përfshin edhe një opsion blerjeje, që mund t’i mundësojë klubit danez ta transferojë përfundimisht portierin 24-vjeçar.

Portieri me prejardhje nga Kosova nuk kishte hapësirën e dëshiruar te Borussia Dortmund dhe tashmë do të vazhdojë karrierën në Danimarkë, te një klub që e njeh mirë nga aventura e tij e mëparshme.

Drejtori i Copenhagenit, Kristjaan Speakman, ka shprehur kënaqësinë për rikthimin e Ramajt, duke vlerësuar karakterin dhe përvojën e tij.

“Ne e njohim shumë mirë Diantin dhe jemi të lumtur ta mirëpresim përsëri në Copenhagen. Ai është një lojtar ambicioz, i orientuar drejt ekipit dhe me një kulturë të fortë pune, gjë që është e rëndësishme për grupin tonë”, u shpreh Speakman.

Ai theksoi gjithashtu cilësitë e portierit në fushë dhe ndikimin që Ramaj mund të ketë në skuadër gjatë këtij sezoni.

“Ai ka aftësi të shkëlqyera udhëheqëse për pozicionin e tij dhe rikthehet me më shumë përvojë. Kjo do të thotë se mund të ketë një ndikim edhe më të madh për ne këtë sezon”, shtoi drejtori i klubit danez.

Edhe vetë Ramaj është shprehur i kënaqur për rikthimin te Copenhagen, klubin që e kishte lënë pak më shumë se një vit më parë për t’u kthyer në futbollin gjerman.

“Jam shumë i lumtur që marrëveshja është finalizuar dhe mezi pres t’u bashkohem përsëri djemve. Kam kaluar një kohë fantastike këtu dhe mezi pres ta vazhdoj atë”, deklaroi Ramaj.

Portieri shqiptar me prejardhje nga Kosova tha se ndihet mirë në ambientin e Copenhagenit dhe veçanërisht në atmosferën që krijohet në stadiumin Parken.

“Klubi dhe mentaliteti janë një përshtatje shumë e mirë për mua, sepse edhe unë dal në fushë për të fituar çdo herë dhe kjo është ajo që më motivon”, u shpreh ai.

Ramaj theksoi se tani dëshiron të fokusohet te puna dhe rezultatet me skuadrën e re.

“Qëndrimi im i mëparshëm në Copenhagen ishte shumë pozitiv, por tashmë ai i përket së kaluarës. Tani bëhet fjalë për të dhënë maksimumin çdo ditë në stërvitje dhe për ta ndihmuar ekipin drejt fitoreve të reja”, përfundoi portieri.

Me rikthimin në Copenhagen, Ramaj synon të fitojë minuta dhe të rikthehet në formën që e kishte bërë një nga portierët më të përfolur në futbollin danez, ndërsa klubi ka lënë të hapur mundësinë për ta transferuar përfundimisht në fund të huazimit.

Albin Krasniqi është përzgjedhur “Ylli i Javës” për xhiron e parë të edicionit 2026/27 në Albi Mall Superligën e Kosovës. Futbollisti i FC Prishtina u vlerësua për paraqitjen e tij në fitoren 4:2 ndaj FC Ballkanit.

Federata e Futbollit e Kosovës, në bashkëpunim me sponsorin zyrtar të Superligës, Albi Mall, ka nisur edhe këtë edicion me ndarjen e çmimit tradicional për futbollistin më të dalluar të çdo xhiroje.

Pas përfundimit të ndeshjeve të javës së parë, vlerësimi i është dhënë Albin Krasniqit, i cili pati një rol të rëndësishëm në suksesin e Prishtinës ndaj Ballkanit.

Krasniqi realizoi dy gola në këtë përballje, duke kontribuar drejtpërdrejt në fitoren 4:2 të skuadrës kryeqytetase.

Përveç golave, futbollisti i Prishtinës u dallua edhe me angazhimin dhe paraqitjen e tij gjatë gjithë ndeshjes, duke u bërë një nga protagonistët kryesorë të suksesit të skuadrës.

Çmimi “Ylli i Javës” është ndarë pas vlerësimit të bërë nga Komisioni i Veteranëve të Futbollit, i cili përzgjodhi Krasniqin si futbollistin më të dalluar të xhiros së parë.

Kështu, Albin Krasniqi bëhet lojtari i parë që merr çmimin “Ylli i Javës” për edicionin 2026/27 të Albi Mall Superligës.

Sergio Busquets ka rikthyer te Barcelona, por këtë herë në një rol të ri. Ish-mesfushori i katalanasve është bërë pjesë e stafit teknik të Barça Atlètic, ku do të punojë si ndihmës i trajnerit Juliano Belletti.

Pas përfundimit të karrierës si futbollist, Busquets ka nisur një kapitull të ri në futboll, duke u afruar me pankinën e klubit ku kaloi 15 sezone me ekipin e parë.

Sipas mediave spanjolle, Busquets ka nisur punën këtë të hënë me Barça Atlètic dhe do të jetë pjesë e stafit të Bellettit, ndërsa njëkohësisht po ndjek kursin për t’u pajisur me licencën e trajnerit.

Roli i tij do të lidhet edhe me zhvillimin e futbollistëve të rinj të Barcelonës. Përvojën e fituar gjatë karrierës së gjatë si mesfushor, Busquets tashmë do ta përcjellë te lojtarët e rinj, në hapin e parë të tij drejt një karriere në pankinë.

Busquets u largua nga Barcelona në vitin 2023, pas 15 vitesh me ekipin e parë, ndërsa karrierën si futbollist e përfundoi te Inter Miami, ku qëndroi për dy sezone e gjysmë. Tashmë, tre vite pas largimit nga Barça, ai është rikthyer në klub në një tjetër pozicion.

Me fanellën e Barcelonës, Busquets zhvilloi 722 ndeshje dhe fitoi 32 trofe, përfshirë nëntë tituj të La Ligës dhe tri Liga të Kampionëve. Me Spanjën, ai fitoi Kupën e Botës në vitin 2010 dhe Kampionatin Evropian në vitin 2012.

Tani, ish-kapiteni i Barcelonës do të nisë rrugëtimin e tij si trajner pikërisht te klubi ku u formua dhe zhvilloi pjesën më të madhe të karrierës së tij. Busquets do të punojë krah Bellettit, ndërsa vazhdon përgatitjet për licencën e trajnerit.