Category: SPORT

Lionel Messi është vënë nën hetim nga Komiteti Disiplinor i Major League Soccer (MLS) pas një incidenti me Quinn Sullivan gjatë ndeshjes mes Inter Miamit dhe Philadelphia Union, e cila përfundoi në barazim 2-2.

Kapiteni i Inter Miamit mund të përballet me masa disiplinore pasi pamjet televizive e tregojnë duke goditur me shuplakë Sullivanin në pjesën e pasme të kokës gjatë një përplasjeje mes dy lojtarëve.

Ndeshja ishte e tensionuar, veçanërisht në pjesën e dytë. Messi kishte shënuar më herët në takim, ndërsa Inter Miami po kërkonte të rikthente epërsinë kur situata mes tij dhe Sullivanit u përshkallëzua.

Tensionet u shtuan edhe më shumë pasi Philadelphia Union arriti të barazojë rezultatin. Ndërkohë, Cavan Sullivan, vëllai më i vogël i Quinn, u ndëshkua me karton të kuq pas një përplasjeje me Yannick Bright.

Incidenti mes Messit dhe Quinn Sullivan nuk u ndëshkua gjatë ndeshjes nga gjyqtari. Megjithatë, pamjet e përplasjes u bënë virale në rrjetet sociale, duke bërë që Komiteti Disiplinor i MLS-së të nisë shqyrtimin e rastit.

Komiteti do të analizojë pamjet dhe do të vendosë nëse sjellja e Messit meriton ndonjë masë disiplinore. Nëse incidenti cilësohet si sjellje e dhunshme, argjentinasi mund të përballet me gjobë ose edhe me një ndeshje pezullim.

Barcelona ka bërë një hap të rëndësishëm në përpjekjen për të transferuar sulmuesin e Interit, Lautaro Martínez. Sipas raportimeve nga mediat spanjolle, klubi katalanas ka arritur një marrëveshje paraprake me përfaqësuesit e sulmuesit argjentinas për kushtet personale të një kontrate të mundshme.

 

Drejtori sportiv i Barcelonës, Deco, së bashku me Bojan Krkić, kanë zhvilluar takime me stafin e Lautaros dhe palët kanë gjetur gjuhën e përbashkët për aspektet financiare të marrëveshjes.

 

Pas këtij hapi, Barcelona pritet të përqendrohet te negociatat me Interin. Klubi italian nuk ka ndërmend të heqë dorë lehtë nga kapiteni i tij, i cili ka kontratë deri në vitin 2029 dhe mbetet një nga lojtarët më të rëndësishëm të skuadrës zikaltër.

 

Megjithatë, një ofertë e konsiderueshme mund të ndryshojë situatën. Barcelona po përgatit një propozim fillestar që pritet të jetë nën shifrën 100 milionë euro, ndërsa Interi do të vlerësojë çdo ofertë që do të mbërrijë për sulmuesin argjentinas.

 

Lautaro Martínez është identifikuar nga drejtuesit katalanas si objektivi kryesor për repartin ofensiv, pasi klubi ka hequr dorë nga gara për sulmuesin e Atletico Madridit, Julián Álvarez.

 

Tashmë mbetet për t’u parë nëse Barcelona do të arrijë të bindë Interin për të lënë të lirë “El Toron” dhe për ta sjellë atë në Camp Nou.

Drita zbret sonte në fushë me një objektiv të qartë: të marrë rezultat pozitiv në ndeshjen e parë të play-offit për Ligën e Konferencës dhe të krijojë një avantazh të rëndësishëm para duelit të kthimit.

Kampioni i Kosovës do të përballet në stadiumin “Fadil Vokrri” me Inter Escaldes nga Andorra, në një sfidë ku gjilanasit hyjnë si favoritë, por që kërkon përqendrim maksimal përballë një kundërshtari që ka arritur deri në këtë fazë të garës.

Drita është vetëm dy ndeshje larg një tjetër paraqitjeje në fazën e ligës të Ligës së Konferencës. Për këtë arsye, skuadra e Ardian Nuhiut synon ta shfrytëzojë faktorin vendas dhe të marrë një rezultat që do t’i lehtësonte ndjeshëm punën në takimin e kthimit.

Trajneri Nuhiu është shprehur i kujdesshëm, por njëkohësisht ambicioz para sfidës.

“Respekt maksimal për kundërshtarin, por objektivi dhe qëllimi i skuadrës sonë është kualifikimi në fazën e Konferencës”, deklaroi Nuhiu.

Optimist është shprehur edhe sulmuesi Igball Jashari, i cili beson se Drita mund të dalë me rezultat pozitiv nga përballja e parë.

“Na pret një ndeshje e vështirë, por besoj se do të arrijmë një rezultat pozitiv”, tha ish-sulmuesi i Drenicës.

Ndeshja në “Fadil Vokrri” do të nisë në ora 20:30, ndërsa dueli i kthimit do të zhvillohet një javë më vonë në Andorrë.

Drita ka bërë një rrugëtim të mirë deri në play-off. Fillimisht eliminoi Florianën e Maltës, ndërsa në raundin pasues kaloi edhe Tre Fiorin e San Marinos.

Tashmë, gjilanasit janë para sfidës së fundit në rrugën drejt fazës së ligës. Një rezultat pozitiv në Prishtinë do t’i jepte Dritës një shtysë të madhe për ta kompletuar misionin në Andorrë dhe për të siguruar një tjetër paraqitje në skenën evropiane.

Jamal Musiala ka marrë konfirmimin e specialistëve neurologë se mund të vazhdojë karrierën në futbollin elitar, pavarësisht dy episodeve shqetësuese që e detyruan të largohej nga fusha brenda vetëm katër ditësh.

Ylli i Bayern Munichut ka bërë të ditur se është diagnostikuar me episode të shkurtra dhe të përkohshme të mungesës së vetëdijes, të lidhura me një çrregullim neurologjik të trajtueshëm. Musiala ka siguruar tifozët se gjendja e tij po monitorohet dhe se nuk ka rrezik shtesë për shëndetin e tij.

23-vjeçari pati dy episode të tilla në ndeshjet miqësore të Bayern Munichut ndaj RB Leipzig dhe Heidenheim. Në të dyja rastet, skenat në fushë shkaktuan shqetësim të madh, por lojtari tashmë është nën kujdes të vazhdueshëm mjekësor.

Presidenti i nderit i Bayern Munichut, ka konfirmuar se neurologët që po e trajtojnë Musialën i kanë dhënë klubit konfirmim se nuk ka pengesa për vazhdimin e sportit të nivelit të lartë. Ai pranoi se dy incidentet e fundit e kanë tronditur klubin dhe se situata është marrë me shumë seriozitet.

Vetë Musiala ka zgjedhur të jetë optimist. Ai ka bërë të ditur se po merr kujdes të shkëlqyer mjekësor dhe se, në koordinim të vazhdueshëm me specialistët, dëshiron të vazhdojë të luajë futboll.

“Më e rëndësishmja është se jam mirë”, ishte mesazhi i tij për tifozët, duke kërkuar njëkohësisht mirëkuptim dhe respekt për privatësinë e tij.

Në Bayern Munich ndërkohë nuk ka sinjale se problemi do ta detyrojë talentin gjerman të ndërpresë karrierën. Klubi është në kontakt të vazhdueshëm me specialistët dhe mbetet i fokusuar te rikuperimi dhe mirëqenia e futbollistit.

Pas dy momenteve që alarmuan botën e futbollit, lajmi më i rëndësishëm për Musialën është se ai ka marrë lejen mjekësore për të vazhduar pasionin e tij, me monitorim të vazhdueshëm dhe nën kujdesin e specialistëve.

Lionel Messi ka gjetur rrjetën për herë të parë që nga ndarja nga jeta e babait të tij, Jorge Messi, duke çuar në 922 numrin e golave të shënuar gjatë karrierës së tij.

Ylli argjentinas realizoi në barazimin 2-2 të Inter Miamit ndaj Philadelphia Union, në një ndeshje që për të kishte një peshë të veçantë emocionale.

Në minutën e 26-të, Messi krijoi hapësirën për goditje dhe me të majtën e tij karakteristike e dërgoi topin në rrjetë. Pas golit, ai nuk pati një festim të zakonshëm. Argjentinasi ngriti gishtin drejt qiellit, duke ia dedikuar golin babait të tij të ndjerë.

Jorge Messi u nda nga jeta më 8 gusht në Rosario të Argjentinës, në moshën 68-vjeçare. Përtej rolit si baba, ai ishte për shumë vite edhe agjenti i Lionel Messit dhe një prej njerëzve më të rëndësishëm në rrugëtimin e tij drejt majave të futbollit botëror.

Messi ka folur vazhdimisht për lidhjen e veçantë që kishte me të atin, duke e konsideruar atë jo vetëm si babë, por edhe si mik dhe bashkëpunëtor. Pikërisht për këtë arsye, rikthimi i tij në fushë dhe goli i shënuar pas humbjes së Jorge Messit morën një dimension krejt tjetër.

Argjentinasi kishte qenë protagonist edhe në golin e parë të Inter Miamit, duke regjistruar një asistim, por skuadra e tij nuk arriti ta mbyllte ndeshjen me fitore. Philadelphia Union reagoi dhe e barazoi rezultatin në 2-2.

Që prej transferimit në Inter Miami në vitin 2023, Messi ka vazhduar të prodhojë statistika mbresëlënëse. Në 109 paraqitje në të gjitha garat, ai ka shënuar rreth 93 gola dhe ka dhuruar 52 asistime.

Me klubin amerikan, 39-vjeçari ka fituar edhe disa trofe, përfshirë Leagues Cup në vitin 2023, MLS Supporters’ Shield në vitin 2024 dhe MLS Cup në vitin 2025.

Por këtë herë, përtej statistikave dhe trofeve, ishte një gol me një kuptim shumë më personal për legjendën argjentinase, një gol për babanë e tij.

Taranto e Italisë sot pret Asamblenë e Përgjithshme Zgjedhore të Komitetit Ndërkombëtar të Lojërave Mesdhetare (ICMG), takim ky me rëndësi të veçantë edhe për Kosovën, e cila po hyn në një fazë të rëndësishme të përgatitjeve për organizimin e Lojërave Mesdhetare “Prishtina 2030”.

Në këtë mbledhje pritet të zgjidhet presidenti i ri i ICMG-së për mandatin e ardhshëm, ndërsa në agjendë do të jenë edhe çështje që lidhen me të ardhmen e Lojërave Mesdhetare.

Kosova do të ketë një rol aktiv në këtë takim. Ministri në detyrë i Rinisë dhe Sportit, Blerim Gashani, pritet t’u prezantojë përfaqësuesve të komiteteve olimpike dhe drejtuesve të ICMG-së punën e bërë deri më tani dhe ecurinë e përgatitjeve për “Prishtina 2030”.

Raportimi i Gashanit vjen në një periudhë të rëndësishme për Kosovën, e cila synon që përmes organizimit të Lojërave Mesdhetare të dëshmojë se ka kapacitetet e nevojshme për të pritur një ngjarje të madhe sportive ndërkombëtare.

Asambleja në Taranto do të shërbejë gjithashtu si një mundësi për Kosovën që t’i informojë drejtuesit e rinj të ICMG-së për progresin e arritur, projektet që janë në proces dhe hapat konkretë që pritet të ndërmerren gjatë viteve të ardhshme.

Me “Prishtina 2030” në horizont, Kosova synon që përgatitjet të avancojnë paralelisht në aspektin organizativ, sportiv dhe infrastrukturor, në mënyrë që Lojërat Mesdhetare të shndërrohen në një prej ngjarjeve më të mëdha sportive të zhvilluara ndonjëherë në vend.

Federata e Hendbollit të Kosovës ka prezantuar trajnerin e njohur kroat, Nenad Shoshtariq, si përzgjedhësin e ri të Kombëtares së Kosovës në konkurrencën e femrave.

Shoshtariq është prezantuar të mërkurën pasdite në një konferencë për media të mbajtur në ambientet e Federatës së Hendbollit të Kosovës, duke nisur kështu një kapitull të ri në krye të Kombëtares.

Presidenti i FHK-së, Edin Kolgeci, i ka uruar mirëseardhje trajnerit kroat, duke theksuar se Shoshtariq është një profesionist me të cilin federata tashmë ka pasur bashkëpunim dhe që sjell përvojë të madhe ndërkombëtare.

Kolgeci ka bërë të ditur se me Shoshtariqin në krye të shtabit teknik synohen hapa të rinj dhe rezultate sa më të mira me Kombëtaren e Kosovës.

Nga ana tjetër, trajneri kroat ka vendosur menjëherë objektivin kryesor: kualifikimin e Kosovës në një ngjarje të madhe ndërkombëtare, qoftë Kampionat Evropian apo Botëror.

“Nuk kam çfarë të dëshmoj në hendboll”, ka thënë Shoshtariq, duke e cilësuar punën me Kosovën si një sfidë të re dhe të rëndësishme në karrierën e tij të gjatë.

Trajneri i ri do të ketë mundësi që shumë shpejt të shohë nga afër potencialin e lojtareve kosovare. Ai ka folur edhe për pjesëmarrjen në Lojërat Mesdhetare, të cilat nisin më 21 gusht në Taranto të Italisë.

Sipas Shoshtariqit, kjo garë do të jetë një mundësi e rëndësishme për vajzat e reja të Kosovës që të fitojnë përvojë në arenën ndërkombëtare.

Ai tashmë ka nisur punën me Kombëtaren, me synimin për të ndërtuar një ekip konkurrues dhe për ta afruar Kosovën me objektivin e madh të kualifikimit në një Kampionat Evropian apo Botëror.

Nenad Shoshtariq, 67-vjeçar, ka pas vetes më shumë se tri dekada përvojë në trajnim dhe një karrierë të pasur si në nivel kombëtaresh, ashtu edhe klubesh.

Ai ka drejtuar Kombëtaren e Kroacisë në tri periudha të ndryshme: 1997-1998, 2001-2003 dhe 2017-2023. Arritjen më të madhe me kroatet e regjistroi në Kampionatin Evropian 2020, kur e udhëhoqi skuadrën drejt medaljes së bronztë, suksesit më të madh në historinë e kësaj Kombëtareje.

Në Botërorin e vitit 1997, Shoshtariq e drejtoi Kroacinë deri në vendin e gjashtë, ndërsa gjatë karrierës ka punuar edhe me përfaqësueset e moshave U18, U19 dhe U20 të Kroacisë.

Përvoja e tij ndërkombëtare shtrihet edhe në Jordani, ku ka qenë përzgjedhës i kombëtareve në konkurrencën e meshkujve dhe femrave. Në vitin 1999, ai i udhëhoqi të dyja përfaqësueset drejt medaljes së bronztë në Lojërat Pan-Arabe.

Në nivel klubesh, Shoshtariq ka arritur gjithashtu rezultate të rëndësishme. Me Lokomotiva Zagrebin fitoi Challenge Cup në vitin 2017, ndërsa me Krash Zagrebin arriti në finalen e Kupës së Fituesve të Kupave. Me Lokomotivën ishte edhe dy herë në gjysmëfinale të Challenge Cup.

Ai ka fituar tituj të kampionatit kroat dhe ka punuar në disa vende, përfshirë Kinën dhe Emiratet e Bashkuara Arabe.

Karrierën si trajner e nisi në vitin 1990 dhe gjatë këtyre viteve është shpallur disa herë trajneri më i mirë në Kroaci.

Së fundmi, Shoshtariq ishte trajner i Zagrebit në konkurrencën e meshkujve, skuadër që garon në Ligën e Kampionëve.

Përveç punës në parket, trajneri i ri i Kosovës është edhe ligjërues i Federatës Ndërkombëtare të Hendbollit (IHF) dhe Federatës Evropiane të Hendbollit (EHF), ndërsa ka publikuar një numër të madh materialesh profesionale dhe vazhdon të ligjërojë për trajnerë në vende të ndryshme evropiane.

Me një trajner të këtij niveli në krye, Kosova synon të bëjë hapin e radhës dhe të shkruajë një kapitull të ri në historinë e hendbollit të femrave.

Federico Valverde nuk ka ndërmend të largohet nga Real Madridi. Kapiteni i “Los Blancos” ka refuzuar disa oferta të ardhura nga klube të tjera gjatë kësaj vere, pasi dëshiron të vazhdojë karrierën në “Santiago Bernabéu”, raporton MARCA.

E ardhmja e mesfushorit uruguaian ishte vënë në pikëpyetje pas përplasjes së bujshme me Aurélien Tchouaménin gjatë një seance stërvitore sezonin e kaluar. Në atë periudhë u spekulua se njëri prej dy mesfushorëve mund të largohej nga Madridi.

Në fund, ishte Tchouaméni ai që rinovoi kontratën me klubin madrilen, pavarësisht interesimit të Manchester United. Ndërkohë, edhe Valverde mori oferta konkrete për të vazhduar karrierën larg kryeqytetit spanjoll.

Megjithatë, sipas MARCA, përgjigjja e uruguaianit ka qenë e qartë që në fillim. Valverde nuk ka dashur t’i shqyrtojë seriozisht mundësitë për largim dhe ka refuzuar ofertat, duke e bërë të qartë se e ardhmja e tij mbetet në Madrid.

Mesfushori tashmë është kapiteni i parë i Real Madridit dhe pritet të ketë një rol të rëndësishëm edhe nën drejtimin e José Mourinhos. Para sfidës hapëse të La Ligës ndaj Espanyolit, uruguaiani pritet të formojë repartin e mesfushës së bashku me transferimin e ri, Bernardo Silva.

Megjithatë, Mourinho ende nuk e ka vendosur përfundimisht rolin e Valverdes. Aftësia e tij për të luajtur në disa pozicione i jep trajnerit mundësi të shumta taktike.

Përveç rolit në mesfushë, Valverde mund të aktivizohet në krahun e djathtë të sulmit, por edhe si mbrojtës i djathtë, një pozitë në të cilën ka luajtur edhe më parë.

Refuzimi i ofertave nga klubet e tjera është një tjetër dëshmi e lidhjes së fortë të Valverdes me Real Madridin. Me shiritin e kapitenit në krah dhe një rol gjithnjë e më të rëndësishëm në skuadër, uruguaiani duket i vendosur të vazhdojë historinë e tij në “Santiago Bernabéu”.

Sipas të përditshmes spanjolle El País, Rodri është bërë lojtari i dytë më i paguar në ekipin e parë të Barcelonës, menjëherë pas Lamine Yamalit, pas përfundimit zyrtar të transferimit të tij nga Manchester City.

Mesfushori 30-vjeçar ka kaluar me sukses testet mjekësore, ka firmosur kontratën e tij të re dhe tashmë është bashkuar me skuadrën në stërvitje. Madje, Rodri mund të ketë edhe një paraqitje të parë simbolike me fanellën e Barcelonës në ndeshjen për trofeun “Joan Gamper” ndaj Al Ahlyt.

Spanjolli ka kaluar në hierarkinë e pagave edhe disa prej kapitenëve të skuadrës. Sipas raportimeve të bëra gjatë verës, kontrata e tij parashikon rreth 15 milionë euro neto në sezon, shifër që arrin afërsisht 30 milionë euro bruto para taksave.

Kjo marrëveshje financiare pasqyron statusin e Rodrit si një prej mesfushorëve më të mirë në botë, fitues i “Topit të Artë” dhe një prej figurave kryesore të kombëtares spanjolle.

Në aspektin sportiv, cilësitë e tij dhe përshtatja me filozofinë e trajnerit Hansi Flick duken të padiskutueshme. Megjithatë, transferimi mbetet edhe një bast i madh financiar për Barcelonën, sidomos duke marrë parasysh problemet fizike që e kanë shqetësuar lojtarin gjatë dy sezoneve të fundit.

Pikërisht për këtë arsye, një nga prioritetet kryesore të stafit mjekësor dhe atij teknik do të jetë menaxhimi i ngarkesës së Rodrit dhe ruajtja e gjendjes së tij fizike gjatë gjithë sezonit. Barcelona shpreson që ta ketë në dispozicion sidomos në ndeshjet më të rëndësishme, ku përvoja dhe kontrolli i tij në mesfushë mund të bëjnë diferencën.

Katalanasit kanë bërë një investim të madh për të siguruar shërbimet e një prej mesfushorëve më të kompletuar të gjeneratës së tij. Tani, sfida e vërtetë për Rodrin është ta dëshmojë në fushë se çmimi dhe pritshmëritë e larta që shoqërojnë transferimin e tij janë plotësisht të justifikuara.

Dy kombëtaret e Kosovës në volejboll, ajo e vajzave dhe e djemve, kanë mbërritur në Taranto të Italisë, ku do të përfaqësojnë vendin në Lojërat Mesdhetare Taranto 2026.

Pas udhëtimit pa probleme, ekipet kosovare janë akomoduar në anijen ARОYA, e cila do të jetë vendqëndrimi i tyre gjatë gjithë pjesëmarrjes në “Fshatin e Lojërave Mesdhetare”.

Tashmë gjithçka është gati për paraqitjet e para, me të dyja ekipet që synojnë të japin maksimumin në këtë ngjarje të rëndësishme sportive.

Kombëtarja e vajzave do ta nisë garimin më 20 gusht ndaj Greqisë, ndërsa më pas do të përballet me Algjerinë, Maqedoninë e Veriut dhe Turqinë.

 

Ndeshjet e vajzave:

20 gusht: Kosovë – Greqi, 20:00

21 gusht: Algjeri – Kosovë, 11:00

24 gusht: Kosovë – Maqedonia e Veriut, 11:00

26 gusht: Turqi – Kosovë, 14:00

 

Ndërkohë, kombëtarja e djemve do ta nisë aventurën po më 20 gusht, me përballjen ndaj Greqisë.

 

Ndeshjet e djemve:

20 gusht: Kosovë – Greqi, 12:00

22 gusht: Kosovë – Spanjë, 17:00

23 gusht: Egjipt – Kosovë, 17:00

25 gusht: Turqi – Kosovë, 14:00

 

Për të dyja ekipet, pjesëmarrja në Taranto 2026 përbën një tjetër mundësi të rëndësishme për ta përfaqësuar Kosovën në arenën ndërkombëtare dhe për të shkruar një kapitull të ri në historinë e volejbollit kosovar.