Category: SPORT

As dita e sotme në “Taranto 2026” nuk ka nisur në mënyrën më të mirë për boksin e Kosovës.

Bashkim Bajoku është boksieri i radhës nga Kosova që është eliminuar në garat e zhvilluara në Itali, pasi u mposht nga vendasi Tommaso Sciacca në duelin e kategorisë deri në 55 kilogramë.

Bajoku zhvilloi një përballje të luftuar dhe tentoi deri në fund të gjente mënyrën për të dalë fitues nga ringu. Megjithatë, në një duel të vendosur nga detaje të vogla, Sciacca rezultoi pak më i saktë dhe më efikas, duke siguruar fitoren përballë boksierit kosovar.

Kështu, aventura e Bajokut në “Taranto 2026” përfundon më herët nga sa shpresohej, ndërsa Kosova do të kërkojë rezultate më të mira në duelet e tjera.

Pas fitores bindëse 4-1 të Interit ndaj Monzës në ndeshjen hapëse të sezonit, dy klubet pritet të rikthehen në bisedime gjatë kësaj jave, këtë herë për një çështje që lidhet drejtpërdrejt me merkaton.

Në qendër të diskutimeve mund të jetë Kristjan Asllani, me Monzën që po shqyrton mundësinë e transferimit të mesfushorit shqiptar për të përforcuar repartin e mesfushës.

Skuadra lombarde po përballet me disa mungesa dhe situata është komplikuar edhe më shumë pas dëmtimit të rëndë të kapitenit Matteo Pessina. Mesfushori italian pritet të qëndrojë jashtë fushave për rreth tre deri në katër muaj, duke detyruar klubin të kërkojë alternativa në treg.

Një prej emrave të marrë në konsideratë është pikërisht Asllani. Monza po vlerëson mundësinë e një huazimi, ndërsa Interi mund të jetë i hapur për një zgjidhje të tillë, nëse ajo i garanton shqiptarit minutat që i nevojiten për të vijuar zhvillimin e tij.

Megjithatë, dëshira e Asllanit duket se është të provojë një eksperiencë jashtë Italisë. Mesfushori shqiptar ka qenë i lidhur edhe me disa mundësi në kampionate të huaja dhe një transferim i tillë mbetet në planet e tij.

Pavarësisht kësaj, situata mund të ndryshojë nëse Monza konkretizon interesimin dhe i ofron një rol të rëndësishëm në skuadër.

Asllani ishte i pranishëm në “San Siro” për sfidën mes dy ekipeve dhe e ndoqi nga afër fitoren e Interit. Në të njëjtën kohë, ai pati mundësinë të shihte edhe potencialin e Monzës, pavarësisht humbjes së thellë.

Me dëmtimin e Pessinës dhe nevojën për të shtuar alternativat në mesfushë, Monza mund të bëjë një lëvizje konkrete për Asllanin gjatë ditëve në vijim.

Për momentin, huazimi mbetet skenari që po shqyrtohet, ndërsa e ardhmja e mesfushorit shqiptar pritet të marrë një drejtim më të qartë gjatë kësaj jave.

Barcelona nuk ka bërë asnjë ofertë për Lautaro Martinez dhe sulmuesi i Interit nuk konsiderohet më një objektiv prioritar nga klubi katalanas, i cili po vijon kërkimet për një numër 9 të ri përpara mbylljes së merkatos së verës.

Me afrimin e fundit të afatit kalimtar, Barcelona vazhdon të ketë në krye të listës Julian Alvarezin. Megjithatë, transferimi i argjentinasit nga Atletico Madrid mbetet një operacion tejet i komplikuar, pasi klubi madrilen nuk dëshiron të humbasë një prej lojtarëve kryesorë në favor të një rivali të drejtpërdrejtë.

Sipas gazetarit të njohur nga Barcelona, Gerard Romero, klubi katalanas nuk ka paraqitur asnjë ofertë zyrtare për Lautaron. Gjithashtu, sulmuesi argjentinas nuk ka marrë ndonjë propozim nga Barcelona.

Lautaro ka qenë prej kohësh në radarët e klubit katalanas dhe në të kaluarën ishte konsideruar një prej objektivave kryesorë për repartin ofensiv. Megjithatë, situata ka ndryshuar dhe ylli i Interit tashmë nuk është më në krye të listës së dëshirave të Barcelonës.

Objektivi kryesor mbetet Julian Alvarez, por Barcelona duhet fillimisht të bindë Atletico Madridin për të hapur negociatat.

Madrilenët nuk janë të prirur të lejojnë largimin e argjentinasit drejt një rivali të drejtpërdrejtë në La Liga, duke e bërë marrëveshjen veçanërisht të vështirë për t’u realizuar.

Nëse operacioni dështon, Barcelona ka shqyrtuar alternativa të ndryshme. Në listë janë përmendur Viktor Gyökeres, Luis Suárez, Nicolo Tresoldi dhe Victor Osimhen, por deri tani asnjëri prej tyre nuk duket se ka bindur plotësisht drejtuesit katalanas.

Në këtë situatë, gjithnjë e më shumë vëmendje po merr edhe Hamza Abdelkarim. Barcelona e sheh sulmuesin e ri egjiptian si një profil me potencial për të ardhmen dhe një alternativë interesante për pozicionin e numrit 9.

Në të njëjtën kohë, Hansi Flick ka edhe disa zgjidhje brenda skuadrës. Karim Adeyemi, Dani Olmo dhe Raphinha mund të përdoren në qendër të sulmit, duke i dhënë trajnerit gjerman mundësi për të ndryshuar skemat në varësi të kundërshtarit.

Me vetëm pak ditë të mbetura deri në mbylljen e merkatos, Barcelona ndodhet përballë një dileme të rëndësishme: të investojë për një qendërsulmues të ri, pavarësisht vështirësive në treg, apo t’i besojë alternativave që tashmë ka në dispozicion.

Për momentin, Lautaro nuk është në plan të parë, ndërsa Julian Alvarez mbetet emri që Barcelona dëshiron më shumë.

Manchester City është shumë pranë finalizimit të transferimit të mesfushorit të Lille, Ayyoub Bouaddi, me marrëveshjen që pritet të mbyllet gjatë ditëve të ardhshme, raporton Manchester Evening News.

Negociatat mes dy klubeve kanë zgjatur më shumë nga sa ishte parashikuar fillimisht, pasi City dhe Lille ende nuk kanë gjetur gjuhën e përbashkët për të gjitha detajet e transferimit. Megjithatë, në Manchester mbizotëron optimizmi se marrëveshja do të finalizohet së shpejti.

Drejtuesit e klubit anglez kanë ruajtur qetësinë gjatë gjithë procesit, edhe për faktin se Manchester City aktualisht është skuadra që po shtyn më seriozisht për transferimin e talentit francez. Vonesa ka shkaktuar njëfarë shqetësimi te tifozët, por brenda klubit ekziston besimi se situata është nën kontroll.

Për momentin, Ayyoub Bouaddi mbetet operacioni më konkret për Manchester Cityn. Nëse marrëveshja me Lille përfundon sipas parashikimeve, kampionët e Anglisë mund të hidhen menjëherë në kërkim të përforcimit të radhës, me Enzo Fernandezin dhe Adam Whartonin si dy nga emrat që mbeten në radar.

Bradley Barcola nuk është përfshirë në listën e Paris Saint-Germain për transfertën e së dielës ndaj Rennes, në një moment kur e ardhmja e sulmuesit francez po shoqërohet me interesim të fortë nga Liverpooli.

Reprezentuesi i Francës mori pjesë normalisht në stërvitjen e PSG-së të shtunën, por Luis Enrique vendosi të mos e grumbullojë për sfidën e radhës në Ligue 1. Mungesa e Barcolës nuk besohet të jetë për shkak të një dëmtimi, por lidhet me situatën e krijuar rreth të ardhmes së tij.

Në prapaskenë, negociatat mes PSG-së dhe Liverpoolit vazhdojnë. Klubi anglez ka bërë tashmë një ofertë të parë prej rreth 80-90 milionë eurosh, por propozimi është refuzuar nga kampionët e Francës.

Megjithatë, Liverpooli nuk ka hequr dorë nga tentativa për të siguruar shërbimet e Barcolës dhe pritet të rikthehet me një ofertë të re.

Sipas gazetarit Fabrice Hawkins, PSG-ja e vlerëson sulmuesin francez rreth 170 milionë euro, një shifër që tregon qartë se klubi parisien nuk dëshiron të heqë dorë lehtësisht nga një prej talenteve të tij kryesorë.

Për momentin, Barcola mbetet lojtar i PSG-së, por fakti që ai nuk është grumbulluar për ndeshjen ndaj Rennes, në një kohë kur negociatat me Liverpoolin janë aktive, ka shtuar edhe më shumë pikëpyetjet mbi të ardhmen e tij.

José Mourinho e ka nisur rikthimin e tij në stolin e Real Madridit me një deklaratë të fortë për mënyrën se si Vinicius Jr po trajtohet nga kundërshtarët në La Liga.

Pas fitores 2-1 ndaj Espanyolit, trajneri portugez foli hapur për ndërhyrjet dhe provokimet ndaj sulmuesit brazilian, duke pranuar se Vinicius nuk është pa të meta, por duke theksuar se ajo që po ndodh ndaj tij ka kaluar çdo kufi.

“Vinicius? Ai nuk është një shenjtor, por ajo që po i bëjnë është e tepërt. E godasin dhe kjo është shumë zhgënjyese. Ai duhet të ketë një kontroll të madh emocional. Është një situatë e vështirë. Kjo është bullizëm”, deklaroi Mourinho.

Trajneri i Real Madridit theksoi se Vinicius duhet të ruajë qetësinë dhe vetëpërmbajtjen, pavarësisht presionit të madh që përjeton në çdo ndeshje. Sipas Mourinhos, kundërshtarët shpesh tentojnë ta provokojnë brazilianin dhe ta nxjerrin nga loja e tij, duke krijuar tension të panevojshëm në fushë.

Fitorja ndaj Espanyolit ishte një start pozitiv për Mourinhon në rikthimin e tij në drejtimin e Real Madridit. Ndeshja ishte veçanërisht e rëndësishme për trajnerin portugez, i cili është rikthyer në klub me synimin për të rikthyer skuadrën në majat e futbollit spanjoll dhe evropian.

Manchester Unitedi e ka nisur në mënyrën më të keqe sezonin e ri në Ligën Premier, duke u mposhtur në udhëtim nga Hull City me rezultat 2-0, në ndeshjen e vlefshme për xhiron e parë të sezonit 2026/27.

“Djajtë e Kuq” zhgënjyen që në start të kampionatit, duke pësuar humbje ndaj Hull Cityt, ekipit të sapoardhur në elitën e futbollit anglez nga Championshipi.

Pjesa e parë u karakterizua me më shumë kontroll të lojës nga Manchester Unitedi, por ishin vendasit ata që treguan më shumë efikasitet para portës. Fillimisht, Semi Ajayi shënoi në minutën e 17-të për epërsinë 1-0, ndërsa në minutën e 38-të, Nobel Mendy realizoi për 2-0.

Në pjesën e dytë, Michael Carrick bëri disa ndryshime, duke aktivizuar lojtarë më ofensivë. Unitedi rriti presionin dhe dominoi në posedim dhe në krijimin e rasteve, por nuk arriti ta gjejë golin.

Vendasit u mbajtën mirë në mbrojtje dhe ruajtën epërsinë e krijuar në pjesën e parë deri në fund, duke siguruar tri pikë të mëdha në ndeshjen e parë të sezonit.

Në xhiron e ardhshme, Manchester Unitedi do ta presë Ipswich Townin, ndërsa Hull City do të udhëtojë te Coventry City.

George Russell e bën të tijën Garën Sprint të Çmimit të Madh të Holandës në Botërorin e Formula 1. Piloti anglez i Mercedes triumfoi në pistën e Zandvoort, në një garë që u zhvillua pa reshje shiu, me shiu që nisi vetëm pasi Russell kishte kaluar vijën e finishit.

Starti i Garës Sprint ishte perfekt për George Russell, i cili një ditë më parë kishte fituar pole positionin. Piloti i Mercedesit arriti ta ruajë kryesimin nga fillimi deri në fund, duke regjistruar suksesin e tij të tretë në Garat Sprint.

Në podium u ngjitën edhe pilotët e Ferrarit dhe McLaren, Charles Leclerc dhe Lando Norris, të cilët u renditën respektivisht në vendin e dytë dhe të tretë.

Lideri i kampionatit, Andrea Kimi Antonelli, e mbylli Garën Sprint në vendin e katërt, duke lënë pas pilotin tjetër të McLaren, Oscar Piastri.

Klasifikimin e tetë pilotëve më të mirë të Garës Sprint të Holandës, duke nisur nga vendi i gjashtë, e plotësojnë Max Verstappen, Lewis Hamilton dhe Pierre Gasly.

Major League Soccer ka gjobitur sulmuesin e Inter Miamit, Lionel Messi, dhe mbrojtësin Ian Fray, me shuma të pazbuluara, pas dy incidenteve të ndara fizike në zonën e kokës dhe qafës gjatë barazimit 2-2 ndaj Philadelphia Union.

Messi u ndëshkua për goditjen me shuplakë në pjesën e pasme të qafës së lojtarit të Philadelphia Union, Quinn Sullivan, teksa të dy po shkëmbenin fjalë në mesin e fushës. Incidenti ndodhi në minutat e fundit të takimit, ndërsa liga e konsideroi shkelje të rregullores që ndalon kontaktin me fytyrën, kokën ose qafën e kundërshtarit.

Ndeshja kishte një rëndësi të veçantë për Messin, i cili shënoi golin e tij të parë pas vdekjes së babait, Jorge Messi, ndërsa regjistroi edhe një asistim.

Ndëshkimi i Ian Fray erdhi pas një përleshjeje të mëvonshme me Quinn Sullivan brenda zonës së penalltisë. Fray e kapi kundërshtarin për qafe, ndërsa situata u tensionua edhe më shumë mes lojtarëve.

Ndeshja përfundoi me kartonë të kuq për Yannick Bright të Inter Miamit dhe Cavan Sullivan të Philadelphia Union, por më pas Paneli i Pavarur i Rishikimit vendosi unanimisht të anulojë kartonin e kuq dhe pezullimin prej një ndeshjeje për Cavan Sullivan.

Kështu, Messi dhe Fray do të përballen me gjoba financiare, por pa pezullim, ndërsa Inter Miami vijon përgatitjet për ndeshjet e radhës në MLS.