Category: SHËNDETËSI

Një studim i fundit zbulon se alergjia e qumështit prek mbi gjysmën e 1 vjeçarëve në botë dhe përbënë 40% të alergjive ushqimore për fëmijët nga një deri dy vjeç.

“Publiku i përgjithshëm duhet të jetë më i vetëdijshëm për alergjitë e qumështit. Ata mendojnë se kjo gjë nuk është serioze”, tha Dr Ruchi Gupta, profesor i pediatrisë në Shkollën Northwestern të Mjekësisë në Çikago.

Në një hulumtim kombëtar prej rreth 52 mijë familjeve amerikane ku u përfshinë më shumë se 38 mijë familje me fëmijë, studiuesit zbuluan se gati 2% e fëmijëve raportojnë simptoma të qëndrueshme të alergjisë ndaj qumështit IgE.

Simptomat e kësaj alergjie janë shtrëngimi i fytit dhe vështërsi në frymëmarrje.

Mëngjesi është vakti kryesor për të filluar dietën tuaj në një mënyrë të shëndetshme.

Problemi qëndron se ne shpesh bëjmë gabime duke e kthyer këtë vakt në një formë të paekuilibruar, sepse mund të përfshijmë shumë sheqer, yndyrë dhe shumë kalori. Ja se si mund t’i rregullojmë këto gabime:

1.Merrni ushqime të pasura në proteina

Nuk duhet ta filloni ditën tuaj me shumë sheqer. Më mirë do të ishte të konsumonit ushqime me shumë fibra dhe proteina, sepse ato mund t’ju ndihmojnë në uljen e sheqerit në gjak, si dhe largimin e rrezikut të prekjes nga sëmundje të ndryshme kardiovaskulare. Ju nuk duhet ta ngarkoni trupin tuaj me shumë lëng. Një gotë me lëng nuk është e njëjtë si një copë e frutave. Një portokall përmban vetëm 62 kalori dhe 3 gram fibra, ndërsa një filxhan mesatar me lëng ka 112 kalori dhe 0 fibra. Të gjithë ju që keni menduar se lëngu është shumë i mirë për mëngjes jeni duke i dhënë trupit tuaj një sasi të konsiderueshme sheqeri.

2.Qumësht pa sheqer

Sheqeri në qumësht mund të rrisë balancën e baktereve në zorrë, të cilat mund të shkaktojnë intolerancë të glukozës dhe deri në shfaqjen e rrezikut për sëmundje të ndryshme metabolike. Ju mund të ndiheni të kënaqur kur qumështit tuaj i fusni pak sheqer. Kombinimi i qumështit që konsumoni në mëngjes me pak vanilje, me pak kanellë, mund të rrisin shijen dhe përmbajnë zero kalori dhe sheqer.

3. Mos e konsumoni mëngjesin sapo të zgjoheni

Duhet të dini gjithashtu se konsumimi i mëngjesit tuaj nuk duhet të kryhet menjëherë sapo të jeni ngritur. Do të bënit shumë mirë që të qëndroni dy orë pa ngrënë dhe pastaj të hani mëngjes. Kështu trupi juaj do të marr vlerat e duhura ushqimore, por edhe ju nuk do të shtoni në peshë.

4.Jo vetëm fruta në mëngjes

Pothuajse të gjithë mendojnë se po të hanë vetëm fruta në mëngjes ata kanë konsumuar një mëngjes të shëndetshëm. E vërteta nuk qëndron kështu, sepse frutat nuk do t’ju furnizojnë juve me energji të mjaftueshme për një kohë të gjatë. Gjithashtu në këtë mënyrë ju dëmtoni edhe stomakun tuaj. Prandaj e mira është që të konsumoni gjithmonë mëngjesin në mënyrën e duhur, me ushqimet e duhura dhe në kohën e duhur.

Hipertensioni, ose presioni i lartë i gjakut, prek miliona individë në mbarë botën dhe është një faktor i rëndësishëm rreziku për sëmundjet kardiovaskulare. Ndërsa medikamentet dhe ndryshimet në stilin e jetës mund të ndihmojnë në menaxhimin e hipertensionit, një aspekt kyç që shpesh neglizhohet është dieta. Ushqimi që konsumojmë luan një rol të rëndësishëm në shëndetin tonë të përgjithshëm, dhe kjo përfshin presionin tonë të gjakut.

Disa ushqime mund ta lehtësojnë gjendjen, ndërsa të tjerat mund ta përkeqësojnë atë.

Kardiologu Raed Bargout, dietologia Krutika Nanavati, dietologia Susan Schachter dhe dietologia Rhyan Geiger na zbuluan se cilat ushqime duhet të shmangim nëse jemi duke luftuar me hipertensionin.

Mishi i përpunuar

Mishi i përpunuar i ushqimeve mund të dëmtojë seriozisht shëndetin kardiovaskular. Sipas Dr. Bargout, mishrat e ushqimeve janë ndër opsionet më të këqija kur bëhet fjalë për presionin e gjakut dhe shëndetin e zemrës. “Mishi i përpunuar i ushqimeve kryeson listën e ushqimeve që mund të rrisin rrezikun e ngjarjeve kardiovaskulare, duke përfshirë sulmin në zemër dhe goditjen në tru”, tha ai për SheFinds.

Produkte furre si biskota dhe ëmbëlsira

Nëse na pëlqejnë ëmbëlsirat në vend të ushqimeve të kripura, është e rëndësishme të mbani mend se ato mund të dëmtojnë edhe zemrën. Nanavati thekson se duhet të shmangim produktet e përpunuara të bukës së ëmbël si biskotat dhe ëmbëlsirat nëse duam një zemër më të shëndetshme. Sheqeri mund të çojë në një mori efektesh negative shëndetësore, duke përfshirë presionin e gjakut potencialisht më të lartë.

Ushqime të ngrira

Vaktet e ngrira janë disa nga opsionet më të përshtatshme dhe ndonjëherë më të shijshme, por konsumimi i rregullt mund të jetë i keq për shëndetin e zemrës. Geiger thekson se këto vakte zakonisht janë të ngarkuara me natrium, i cili përbën një rrezik të konsiderueshëm kur konsumohet me tepricë.

Ushqimet e ngrira shpesh përgatiten me konservues dhe përmirësues të shijes për të zgjatur jetëgjatësinë dhe për të përmirësuar shijen.

Marramendja ose ndryshe humbja e ekuilibrit është një fjalë që përdoret shpesh si nga mjekët ashtu edhe pacientët.

Ju ndodh të rriturve ashtu edhe fëmijëve fare të vegjël, për shkaqe dhe arsye nga më të ndryshmet.

Këto shkaqe mund të fillojnë që nga dëmtimet e jashtme që trupi mund të pësojë, e deri tek problemet e brendshme shëndetësore.

Në këtë artikull të AgroWeb.org do të gjeni të shpjeguara të gjitha shkaqet e dy llojeve më të zakonshme të marramendjes.

Ndiqini ato më poshtë në mënyrë që të evitoni problemet dhe të merrni menjëherë kujdesin e duhur.

Gjendja e të fikëtit
Nuk janë të pakta rastet kur marramendja shoqërohet edhe me gjendjen e të fikëtit.

Këputjet e papritura të trupit, mungesa e energjive bëjnë që edhe shikimi dhe ekuilibri të ndikohen negativisht.

Ka shumë shkaqe të cilat mund ta shkaktojnë këtë gjendje në organizëm të cilat mund t’i evitoni fare lehtë, pasi konsiderohen si shkaqe të jashtëm.

Gjithsesi edhe pse mund të shfaqet papritur dhe për arsye thuajse të padukshme, kjo gjendje kërkon mjekim të menjëhershëm.

Ndaj disa prej gjërave që shkaktojnë këtë gjendje janë:

Dehidratimi

Ndodh kur nuk merrni mjaftueshëm ujë, kur jeni të sëmurë, me të vjell, diarre apo pasi keni djersitur shumë gjatë palestrës apo një ditë të nxehtë.

Gjakderdhja

Nëse vuani nga probleme me gastritin apo tretjen të cilat mund t’ju shkaktojnë gjakderdhje.

Ankthi apo stresi

Kur ndiheni të shtresuar trupi juaj do të ndjejë shumë presion duke bërë që të humbisni energji dhe lëngje.

Problemet kardiovaskulare

Këto probleme përveçse e djersisin dhe e sforcojnë trupin duke ndikuar edhe në shëndetin e mirë dhe ekuilibrin.

Konsumimi i alkoolit apo duhanit

Sipas mjekëve këto janë ndër shkaqet më të zakonshme të sëmundjes, por mund të ketë edhe me qindra të tjera të cilat mund të vijnë nga goditje apo faktorë të jashtëm.

Duke qenë se disa nga këto shkaqe janë të rrezikshme, është shumë e rëndësishme që të konsultoheni në kohë me një mjek.

Humbja e ekuilibrit
Humbja e ekuilibrit zakonisht shkaktohet nga probleme dhe arsye të brendshme të organizmit që lidhen me sëmundje të caktuara.

Gjatë përjetimit të kësaj gjendje duket sikur objektet rreth jush lëvizin apo rrotullohen.

Nuk shoqërohet zakonisht me gjendje të fikti, por është njëjtë shqetësuese dhe e rrezikshme.

Mund të shfaqet si një problem apo infeksion në veshin e mesit, por edhe nga sëmundje të tjera që prekin trurin siç është ishemia dhe skleroza e shumëfishtë.

Kjo gjendje duhet të kontrollohet gjithnjë nga një mjek specialist sidomos nëse shoqërohet me simptomat e mëposhtme.

Mpirje e disa zonave të trupit

Vështirësi në shikim

Dobësim i muskujve

Dridhje e muskujve

Këto simptoma anësore veç humbjes së ekuilibrit, në shumë raste paralajmërojnë sëmundje serioze të sistemit nervor.

Sa më të kujdesshëm të jeni me simptomat dhe kontrollet që më shpejt do t’i kuroni dhe parandaloni ato.

Kur vjen puna tek teshtima, njerëzit ndahen në kategori: ata që teshtijnë fort dhe hapur dhe ata që e mbajnë atë.

Përpjekja për të mbajtur teshtimën niset nga shumë arsye dhe një prej tyre mund të jetë mirësjellja ose bezdia nga zhurma që shkakton ajo.

Mbajtja e teshtimës, sipas ekspertëve mund të shkaktojë probleme serioze për shëndetin.

I tillë është rasti mjekësor i një 34-vjeçari Britanik që u publikua në revistën British Medical Journal.

Ai përfundoi në spital me probleme të rënda pasi u përpoq fort të mbante teshtimën duke mbyllur hundën dhe gojën.

Ekspertë thonë se ai pësoi një çarje të brendshme të fytit, enjtje të qafës, vështirësi në përtypje dhe në të folur.

34-vjeçari u shtrua për 7 ditë në spital dhe gjatë këtyre ditëve u ushqye vetëm falë tubave.

Roli i Teshtimës Në Organizëm Dhe Përse Nuk Duhet Ta Mbani Atë
Sipas të dhënave të AgroWeb.org, kur një lëndë apo objekt i huaj futet në organizëm nëpërmjet hundës, instinkti i parë i trupit është që ta nxjerrë atë jashtë menjëherë.

Po ashtu edhe me alergjitë nga lule apo diçka tjetër që nuhasim.

Kjo aktivizon teshtimën.

Diafragma dhe muskujt e brinjëve kontraktohen në mënyrë që çfarëdo të jetë futur brenda të dalë shpejt nga hunda.

Bëhet fjalë për një refleks automatik dhe të pakontrollueshëm që ka një objektiv të vetëm: të sigurojë pastërtinë e rrugëve të frymëmarrjes.

Teshtima është shumë e fuqishme.

Në varësi kapacitetit të mushkërive, ajri që shfryhet përmes teshtimës ka një shpejtësi që mund të arrijë nga 100 deri në 800 km në orë.

Mbajtja e teshtimës nënkupton që ajri që është supozuar të dalë duhet të ndërrojë drejtim.

Një gjë e tillë mund të shkaktojë dëmtim të veshit të mesit dhe çarjen e daulles së veshit.

Një rrezik tjetër që vjen nga mbajtja e teshtimës është edhe infeksioni i veshit sepse mukusi dhe lëngjet e infektuara kthehen mbrapsht.

Ekspertët dhe mjekët nënvizojnë se teshtima nuk duhet mbajtur.

Megjithatë kjo nuk do të thotë që ju të jeni të zhurmshëm apo të mos merrni në konsideratë të tjerët pranë jush.

Nëse jeni sëmurë, teshtima mund të shpërndajë patogjenë të ndryshëm në ajër në një shpejtësi shumë të madhe.

Nëse jeni të ftohur ose jo, mos mbuloni rrugët e frymëmarrjes me dorë.

Kjo e fundit shërben për përhapjen e të ftohurës, gripit apo virozave.

Mbani një shami apo letër për hundët sa herë që ju duhet të teshtini./AgroWeb.org

Më shumë se 3.500 njerëz vdesin çdo ditë nga viruset e hepatitit dhe numri global po rritet, paralajmëroi të martën Organizata Botërore e Shëndetësisë.

Të dhënat e reja nga 187 vende treguan se numri i vdekjeve nga hepatiti viral u rrit në 1.3 milion në vitin 2022 nga 1.1 milion sa ishte në vitin 2019.

Sipas raportit të OBSH-së, 83 për qind e vdekjeve regjistrohen nga hepatiti B dhe 17 për qind nga hepatiti C. Për trajtimin e këtyre viruseve ka barna efektive dhe të lira.

Megjithatë, vetëm 3 për qind e atyre me hepatit B kronik morën trajtim antiviral deri në fund të vitit 2022, thuhet në raportin e OBSH-së.

Për hepatitin C, ndërkaq, u trajtuan vetëm 20 për qind e të prekurve.

“Këto rezultate bien ndesh me objektivat globale për të trajtuar 80 për qind të të gjithë njerëzve që jetojnë me hepatit B dhe C kronik deri në vitin 2030”, tha në një konferencë për gazetarë Meg Doherty, udhëheqëse e programeve globale të HIV-it, hepatitit dhe infeksioneve seksualisht të transmetueshme, pranë OBSH-së.

Shefi i OBSH-së, Tedros Adhanom Ghebreyesus, tha se raporti “paraqet një pamje shqetësuese”.

“Pavarësisht progresit global në parandalimin e infeksioneve të hepatitit, numri i vdekjeve po rritet, sepse shumë pak njerëz me hepatit janë duke u diagnostikuar dhe trajtuar”, tha ai.

Sipas raportit të OBSH-së, dy të tretat e të gjitha rasteve të hepatitit janë në: Bangladesh, Kinë, Etiopi, Indi, Indonezi, Nigeri, Pakistan, Filipine, Rusi dhe Vietnam./REL/

Diabeti është ndër sëmundjet më të përhapura dhe shqetësuese në të gjithë globin. Nga vitit 1980 deri në vitin 2014, numri i diabetikëve në botë u rrit nga 108 milionë në 422 milionë njerëz. Kjo sëmundje shfaqet kur niveli i glukozës dhe i sheqerit në gjak janë më të larta nga normalja. Kështu trupi nuk prodhon më insulinë për të balancuar sheqerin.

Rekomandimet dhe mënyrat e parandalimit të saj janë të shumta, por duket se vetëm disa prej tyre funksionojnë siç duhen. Ushqimi dhe stili i jetesës janë sigurisht faktorë kyç si në shfaqjen ashtu edhe në zhdukjen e tipeve të diabetit. Sipas ekspertëve, vetëm disa mënyra dhe një stil i caktuar jetese mund të jetë efikas në parandalimin e kësaj sëmundje.

Shkencëtarët zbulojnë shkaktarin e vërtetë të diabetit

Një studim i ri argumenton se diabeti i tipit 2 është një sëmundje që shkaktohet nga grumbullimi i yndyrnave në mëlçi. Kjo e fundit nxit më pas ndjeshmërinë ndaj insulinës dhe rrit prodhimin e sheqerit në gjak. I gjithë ky mekanizëm rrit edhe nivelet e insulinës në plazmë, duke përshpejtuar kështu prodhimin e yndyrës në mëlçi. Më pas, lipidet prekin shumë zona të tjera në organizëm, përfshirë edhe pankreasin. Ky i fundit është vendi ku ndodhen qelizat beta të cilat janë përgjegjëse për krijimin e insulinës. Ekspozimi afatgjatë ndaj acideve të yndyrnave të ngopura është shumë i dëmshëm ndaj qelizave beta, thonë ekspertët.

Mënyra më e mirë për luftimin e diabetit

Sipas ekspertëve në fjalë, ushqyerja e duhur dhe aktiviteti fizik mund të nxisin humbjen e depozitave të tepërta dhjamore në organizëm. Sa më i shpejtë dhe më i qëndrueshëm të jetë ndryshimi në stilin e jetesës aq më i mirë do të jetë shëndeti i një diabetiku. Dieta me bazë perimet është mënyra më e mirë për të mbajtur në nivelin e duhur të sheqerit. Megjithëse mund të përfshijë një shumësi përbërësish dhe ushqimesh, jo të gjitha janë të rekomanduara për diabetin.

Nëse konsumoni shumë drithëra, ushqime që përmbajnë niseshte apo sheqer nga frutat sëmundja me shumë mundësi do të avancojë. Sipas mjekëve edhe mishi apo vitaminat e marra nga kafshët mund të jenë faktorë kyç të zhvillimit të diabetit. Kjo gjë ndodh kur ushqimet që ju merrni janë të përpunuara, pra edhe nëse janë dietike përbërësit e tyre të shtuar gjatë përpunimit në fabrika janë të dëmshëm. Kjo për shkak se këto ushqime nëse konsumohen në sasi të mëdha bëhen rezistente ndaj insulinës duke krijuar disbalanca në organizëm.

Çfarë duhet të konsumoni?

Sigurohuni që të merrni sa më shumë ushqime të pa përpunuara, pra sa më shumë perime të freskëta. Kini kujdes me racionet, thonë ekspertët duke këshilluar që pjatat me mish të alternohen me sasi më të mëdha perimesh. Perimet jeshile si spinaqi, lakrat apo sallatat do t’ju bëjnë të ndiheni të ngopur dhe do të mbajnë organizmin në formë. Këto perime dhe barishte janë shumë të pasur me fibër e cila të mban të ngopur për shumë gjatë.

Pacientët me diabet të tipit 1 në Angli do të marrin një “pankreas artificial” për të përballuar gjendjen e tyre, njoftoi të martën Shërbimi Shëndetësor Kombëtar (NHS).

NHS do të kontaktojë pacientët këtë muaj, përfshirë fëmijët, për t’u dhënë atyre sistemin që rregullon nivelet e glukozës dhe shpërndarjen e insulinës për herë të parë në botë, sipas një deklarate.

“Teknologjia do të nënkuptojë se disa njerëz me diabet të tipit 1 nuk do të kenë më nevojë të injektojnë veten me insulinë, por të mbështeten te teknologjia për të marrë këtë ilaç që shpëton jetën”, shpjegoi NHS.

Partha Kar, këshilltarja kombëtare e NHS për diabetin, tha “kjo teknologji inovative jo vetëm që përmirëson kujdesin mjekësor, por gjithashtu rrit cilësinë e jetës për të prekurit”.

NHS shpenzon pothuajse 10 miliardë £ (12.55 miliardë dollarë) në vit për “identifikimin dhe trajtimin e diabetit”./AA/