Category: Lajme

Dhjetë oficerë të Forcës së Sigurisë së Kosovës kanë diplomuar në Akademinë e Forcave të Armatosura të Republikës së Shqipërisë. Në një njoftim për media thuhet se kursi përgatitor për oficer, kishte nisur pas marrëveshjes së arritur mes dy ushtrive shqiptare, në tetor të vitit 2025.

Ministri në detyrë i Mbrojtjes i Republikës së Kosovës, Ejup Maqedonci, mori pjesë në ceremoninë e diplomimit të 67 oficerëve të rinj në Akademinë e Forcave të Armatosura të Republikës së Shqipërisë, me ftesë të ministrit të Mbrojtjes së Shqipërisë, Ermal Nufi.

Në mesin e oficerëve të rinj që përfunduan me sukses studimet ishin edhe 10 pjesëtarë nga Forca e Sigurisë së Kosovës, një zhvillim që, sipas ministrit Maqedonci, paraqet një hap të rëndësishëm në ngritjen profesionale të kuadrove ushtarake.

“Ky është një moment i rëndësishëm për Forcën e Sigurisë së Kosovës dhe një dëshmi e investimit të vazhdueshëm për zhvillimin e kuadrove profesionale ushtarake sipas standardeve të NATO-s”, u shpreh Maqedonci.

Ai theksoi se bashkëpunimi ndërmjet Kosovës dhe Shqipërisë në fushën e mbrojtjes po thellohet vazhdimisht, veçanërisht në aspektin e edukimit dhe trajnimit ushtarak.

“Bashkëpunimi ynë i ngushtë me Republikën e Shqipërisë vazhdon të forcohet çdo ditë. Kjo dëshmohet edhe nga shumëfishimi i numrit të ushtarakëve nga Kosova që ndjekin studime, shkollime dhe trajnime në institucionet ushtarake të Republikës së Shqipërisë”, deklaroi ministri Maqedonci.

Ministri në detyrë i Mbrojtjes uroi oficerët e sapodiplomuar për sukseset e arritura dhe i inkurajoi që me profesionalizëm e përkushtim të vazhdojnë shërbimin e tyre në interes të vendit dhe qytetarëve.

“Ju uroj suksese në këtë rrugëtim të ri dhe në detyrën tuaj fisnike të shërbimit ndaj vendit dhe qytetarëve”, tha Maqedonci.

Sipas të dhënave të Ministrisë së Mbrojtjes, gjatë vitit 2026 qindra pjesëtarë të FSK-së do të ndjekin programe edukimi, shkollimi dhe trajnimi në institucionet ushtarake të Republikës së Shqipërisë, duke reflektuar partneritetin strategjik ndërmjet dy vendeve dhe angazhimin e përbashkët për forcimin e kapaciteteve mbrojtëse.

Gjykata Themelore në Drenas ka dënuar me burgim prej 4 muajve Eqrem Avdullahut nga Rahoveci, i cili akuzohet për veprën penale “kanosje”, ndaj kryetarit të Organizatës së Veteranëve të Luftës së UÇK-së, Hysni Gucati.

Në seancën përfundimtare, gjyqtari tha se i akuzuari dënohet edhe me shumën prej 70 euro, derisa palet mund të ankohen për vendimin.

Sipas Prokurorisë, Avdullahu kishte kërcënuar përmes rrjetit social Facebook kryetarin e Organizatës së Veteranëve të Luftës së UÇK-së, Hysni Gucati.

Sipas aktakuzës, ekziston dyshimi i bazuar mirë se më 3 qershor 2026, rreth orës 13:10, i pandehuri Eqrem Avdullahu, përmes llogarisë së tij në Facebook, ka kanosur seriozisht Hysni Gucatin, duke i shkaktuar frikë, ankth dhe pasiguri për jetën.

Në aktakuzë thuhet se në një faqe në Facebook me emrin “Diaspora në Krye” ishte postuar një fotografi e Hysni Gucatit me mbishkrimin “Prokuroria heton Hysni Gucatin – mori rrogë për 19 vite si sekretar shkolle pa shkuar në punë”.

Sipas Prokurorisë, më pas i pandehuri, përmes profilit të tij personal në Facebook me emrin “Eqrem Avdullahu”, kishte komentuar: “Këtë derr duhet pushkatu”.

4 muaj burgim, shumën prej 50 euro, 20 euro

Ambasada e Mbretërisë së Bashkuar ka bërë thirrje për riintegrimin e serbëve në sistemin e drejtësisë, duke shprehur shqetësimin për zhvillimet e kësaj jave.

Duke iu referuar vendimit të ushtrueses së detyrës së presidentit të Kosovës, Albulena Haxhiu, e cila dekretoi lirimin nga detyra të shtatë prokurorëve serbë, Ambasada theksoi se dorëheqjet masive të gjyqtarëve, prokurorëve dhe stafit administrativ në vitin 2022 i kishte konsideruar një hap prapa.

“Mbretëria e Bashkuar e mirëpriti Marrëveshjen për Drejtësinë të vitit 2015, e cila integroi strukturat e veriut të Kosovës në kuadrin ligjor të Kosovës, duke garantuar njëkohësisht përfaqësim të konsiderueshëm për serbët e Kosovës, dhe i konsideroi dorëheqjet masive të gjyqtarëve, prokurorëve dhe stafit administrativ në vitin 2022 si një hap prapa, që dëmtoi interesat e qytetarëve të Kosovës”, thuhet në një postim të ambasadës britanike në Facebook.

Ambasada e britanike thotë se me riintegrimin e serbëve në sistemin e drejtësisë forcohet besimi i publikur në institucionet e vendit.

“Ne e kemi mirëpritur reagimin e kahershëm të organeve përkatëse profesionale, të cilat e kanë njohur rëndësinë e ruajtjes së besimit të të gjitha komuniteteve në Kosovë ndaj sistemit të drejtësisë, dhe për këtë arsye jemi të shqetësuar nga zhvillimet e kësaj jave. Ne bëjmë thirrje për integrimin e popullsisë shumetnike të Kosovës në sistemin e drejtësisë, në mënyrë që të forcohet besimi i publikut në institucionet e sundimit të ligjit në Kosovë”.

Ambasada e Mbretërisë së Bashkuar në Kosovë ka shprehur shqetësim lidhur me zhvillimet e fundit në sistemin e drejtësisë dhe ka bërë thirrje për riintegrimin e serbëve në këtë sistem.

Reagimi i ambasadës vjen pas vendimit të ushtrueses së detyrës së presidentes së Kosovës, Albulena Haxhiu, për lirimin nga detyra të shtatë prokurorëve serbë.

Ambasada britanike ka rikujtuar se Marrëveshjen për Drejtësinë të vitit 2015 e kishte mirëpritur si një hap të rëndësishëm, pasi ajo kishte integruar strukturat e veriut të Kosovës në kuadrin ligjor të vendit.

“Mbretëria e Bashkuar e mirëpriti Marrëveshjen për Drejtësinë të vitit 2015, e cila integroi strukturat e veriut të Kosovës në kuadrin ligjor të Kosovës, duke garantuar njëkohësisht përfaqësim të konsiderueshëm për serbët e Kosovës”, thuhet në reagimin e ambasadës.

Sipas Ambasadës së Mbretërisë së Bashkuar, dorëheqjet masive të gjyqtarëve, prokurorëve dhe stafit administrativ në vitin 2022 ishin një hap prapa dhe dëmtuan interesat e qytetarëve.

“Ne i konsideruam dorëheqjet masive të gjyqtarëve, prokurorëve dhe stafit administrativ në vitin 2022 si një hap prapa, që dëmtoi interesat e qytetarëve të Kosovës”, thuhet më tej në reagim.

Ambasada ka theksuar se integrimi i të gjitha komuniteteve në sistemin e drejtësisë është i rëndësishëm për rritjen e besimit të publikut në institucionet e sundimit të ligjit.

“Ne e kemi mirëpritur reagimin e kahershëm të organeve përkatëse profesionale, të cilat e kanë njohur rëndësinë e ruajtjes së besimit të të gjitha komuniteteve në Kosovë ndaj sistemit të drejtësisë, dhe për këtë arsye jemi të shqetësuar nga zhvillimet e kësaj jave”, ka deklaruar ambasada.

“Ne bëjmë thirrje për integrimin e popullsisë shumetnike të Kosovës në sistemin e drejtësisë, në mënyrë që të forcohet besimi i publikut në institucionet e sundimit të ligjit në Kosovë”, thuhet në reagimin e Ambasadës së Mbretërisë së Bashkuar.

Sot do të vazhdojnë kërkimet për 78 vjeçarin Xhafer Raqi, i cili vuan nga demenca.

I moshuari është shpallur i zhdukur nga fillimi i korrikut.

Detaje për Klankosova.tv ka dhënë Mentor Maloku, kryetar i Shoqatës së Kosovës për Kërkim-Shpëtim.

“Sot do të nisim kërkimet, në grupe pak më të vogla. Do të bëjmë një analizë fillimisht, do t’i analizojmë rrugët se kah ka mundur të shkojë ai, duke filluar nga vendi ku janë gjetur së fundmi gjurmët e tij. Derisa ditëve në vazhdim, do të kryejmë një kërkim më masiv dhe më të thellë”, deklaroi Maloku për Klankosova.

Javë më parë, në Butovc ishte gjetur një sandale e cila dyshohet se i përket 78 vjeçarit.

Ndryshe, kërkimet po rifillojnë me kërkesë të Policisë.

Derisa familja, i lut për ndihmë të gjithë qytetarët për gjetjen e të moshuarit që vuan nga demenca (harresa).

Ndërsa, krejt ata që kanë informacione për 78 vjeçarin le të lajmërohet në këtë numër telefoni:

+383 44 737 900

Shtëpia e familjes Maxhuni në Rrugën A, e cila dyshohet se ishte ndërtuar në pronë komunale, tashmë është rrënuar.

Rrënimin e ka kryer Inspektorati Komunal të enjten.

Në vendin e ngjarjes, në lagjen Veternik, vëllai i pronarit të shtëpisë është ndaluar nga Policia e Kosovës, raporton agjencia e lajmeve Ekonomia Online.

Ai është shoqëruar në stacion pasi ka tentuar t’i afrohej vendit të ngjarjes, por është ndaluar nga zyrtarët policorë.

Vëllai i Fatmir Maxhunit, pronarit të shtëpisë, akuzoi zyrtarët komunalë për rrënim të paligkshëm pa një vendim të formës së prerë nga gjykata.

Euroja do të bëhet monedha zyrtare e vendit tonë pasi Shqipëria të jetë pjesë e BE-së. Një gjë e tillë përcaktohet edhe në projektligjin e ri “Banka e Shqipërisë”.

Jo vetëm që euroja do të jetë monedha me të cilën qytetarët do të blejnë shërbimet, kreditë dhe do të mbajnë depozitat, por gjithashtu në këtë ligj përcaktohen edhe rregullat që duhet të ndjekë Banka e Shqipërisë për t’u bërë pjesë e Bankës Qendrore Evropiane.

Është kapitulli XV i këtij ligji që tregon se është Banka e Shqipërisë ajo që do të kujdeset për hedhjen e euros në treg. Bankës së Shqipërisë i ngarkohet hedhja në qarkullim dhe tërheqja e kartëmonedhave dhe monedhave euro, si dhe përshtatja e dizajnit të monedhave sipas rregullave përkatëse të Bashkimit Evropian.

Euroja si monedhë zyrtare do të ndryshojë edhe rregullat se si mbahet rezerva valutore.

“Një element i rëndësishëm i kapitullit është rregullimi i marrëdhënieve financiare dhe operacionale me Eurosistemin, përfshirë transferimin dhe administrimin e rezervave valutore drejt Bankës Qendrore Evropiane, si dhe menaxhimin e pjesës së mbetur të rezervave.”

Ky projektligj i hap rrugën integrimit të Bankës së Shqipërisë në sistemin monetar evropian. /tch

Gjykata e Tiranës urdhëron lirimin e menjëhershëm të 34-vjeçares që u dërgua në burg me foshnjën, Dorina Sejdini, raporton Top Channel.

Vendimi u dha nga Edvan Veçani, ndërsa në lidhje me rastin pati reagime të menjëhershme si nga Presidenti i vendit Bajram Begaj, ashtu dhe nga avokati i Popullit.

34-vjeçarja u arrestua në Aeroportin e Rinasit menjëherë pas mbërritjes nga Gjermania, për të ekzekutuar një dënim me 2 muaj burg të dhënë në mungesë për veprën penale të dhunës në familje ndaj vjehrrit.

Zëdhënësi i lartë i Forcave të Armatosura të Iranit, gjeneral brigade Abolfazl Shekarchi, deklaroi se kundërshtarët e Iranit, pavarësisht përdorimit të të gjitha mjeteve të zbulimit dhe spiunazhit, ende nuk kanë arritur të zbulojnë vendndodhjet ku vendi prodhon raketat e tij.

Shekarchi i bëri këto komente gjatë një takimi me aktivistë të Këshillit për Koordinimin e Zhvillimit Islamik. Duke folur për atë që e quajti “lufta e dytë e imponuar”, ai tha se kundërshtarët besonin se mund ta shkatërronin ushtrinë e Republikës Islamike brenda shtatë ditësh dhe ta ndanin Iranin gjatë javës pasuese.

Duke iu referuar operacioneve ushtarake iraniane “Premtimi i Vërtetë 1” dhe “Premtimi i Vërtetë 2”, si dhe stërvitjeve “Eqtedar” (“Autoriteti”), gjenerali tha se Irani ka krijuar një bazë të gjerë objektivash që përfshin pozicione të ndjeshme të kundërshtarëve, raportojnë mediat.

Ai shtoi se udhëheqësi suprem i Iranit, ajatollah Ali Khamenei, kishte qenë plotësisht i përgatitur për një “luftë të tretë të imponuar”.

Sipas tij, planet përfshinin edhe zëvendësimin e drejtuesve ushtarakë në rast se ai ose komandantë të tjerë të lartë do të vriteshin.

“Amerikanët përdorën kundër Iranit çdo armë që kishin rezervuar për Luftën e Tretë Botërore, por nuk arritën të na mposhtnin”, deklaroi Shekarchi.

Ai pretendoi gjithashtu se një qendër e madhe përpunimi të dhënash, e ngritur në Emiratet e Bashkuara Arabe më shumë se 20 vjet më parë me mbështetjen e SHBA-së, vendeve evropiane dhe, sipas tij, “aktorëve sionistë”, kishte për qëllim kontrollin e Azisë Perëndimore dhe rajoneve përreth, por se përpjekjet shumëvjeçare u shkatërruan gjatë konfliktit.

Sipas Shekarchit, kundërshtarët humbën rreth 14 baza kryesore strategjike dhe tri baza ndihmëse në rajon, çka, sipas tij, përfaqëson dështimin e investimeve ushtarake të më shumë se pesë dekadave. Ai përsëriti se shërbimet e huaja të inteligjencës “nuk e dinë ende se ku Irani prodhon raketat e tij”.

Në fund të fjalimit, gjenerali tha se objektivi strategjik i Forcave të Armatosura të Iranit mbetet largimi i plotë i ushtrisë amerikane nga Azia Perëndimore, duke shtuar se “regjimi sionist do të pushojë së ekzistuari sapo të arrihet ky qëllim”.

Prokuroria Themelore në Mitrovicë ka ndaluar një person të dyshuar për veprën penale “Ngasja në gjendje të paaftë apo të dehur”, pas aksidentit me fatalitet në magjistralen Mitrovicë–Prishtinë.

Sipas Prokurorisë, aksidenti ka ndodhur mëngjesin e sotëm në fshatin Studime, ku i dyshuari, në gjendje të dehur, dyshohet se ka vozitur veturën në shiritin e kundërt të rrugës dhe është përplasur me një veturë tjetër.

Si pasojë e aksidentit, një grua ka mbetur e vdekur, ndërsa shoferi dhe tre pasagjerë kanë pësuar lëndime serioze dhe janë dërguar për trajtim mjekësor në QKUK.

Në vendin e ngjarjes ka dalë prokurori kujdestar për Krime të Rënda i Prokurorisë Themelore në Mitrovicë, ndërsa me urdhër të prokurorisë trupi i pajetë i viktimës është dërguar për autopsi në Institutin e Mjekësisë Ligjore në Prishtinë.

Prokuroria ka bërë të ditur se brenda afatit ligjor do të paraqesë kërkesë për caktimin e masës së paraburgimit ndaj personit të ndaluar.