Category: Lajme

Dy oficerë të Forcës së Sigurisë së Kosovës kanë diplomuar jashtë vendit. Një në Mbretërinë e Bashkuar dhe tjetra në Shtetet e Bashkuara të Amerikës. Kështu thuhet në postimin e ninistrit të Mbrojtjes, Ejup Maqedonci, i cili ka theksuar se kjo arritje dëshmon nivel të lartë profesionalizmi dhe përgatitjeje.

Siç njoftohet, nëntogeri Endi Sherifi ka përfunduar një nga trajnimet më sfiduese të këmbësorisë në Ushtrinë Britanike, PCBC (Platoon Commander Battle Course), në Brecon, Uells, ku për performancën e tij është vlerësuar me Mirënjohje të Veçantë nga Komandanti i Shkollës së Këmbësorisë.

Ndërkohë, në Shtetet e Bashkuara të Amerikës, Ermonda Meshi ka diplomuar nga “The Adjutant General Basic Officer Leader Course” (AGBOLC), një trajnim i avancuar për përgatitjen e oficerëve në fushën e menaxhimit të personelit dhe mbështetjes administrative në operacione ushtarake.

Postimi i tij i plotë:

Ushtarakët e FSK-së po vazhdojnë të shkëlqejnë në akademitë e vendeve të NATO-s. Gjatë muajit prill, dy oficerë kanë diplomuar me sukses në Mbretërinë e Bashkuar dhe në Shtetet e Bashkuara të Amerikës, duke dëshmuar nivel të lartë profesionalizmi dhe përgatitjeje.

Nëntoger Endi Sherifi ka përfunduar me sukses një nga trajnimet më sfiduese të këmbësorisë në Ushtrinë Britanike, PCBC (Platoon Commander Battle Course), në Brecon, Uells, ku për performancën e tij është vlerësuar me Mirënjohje të Veçantë nga Komandanti i Shkollës së Këmbësorisë.

Ndërkohë, në Shtetet e Bashkuara të Amerikës, Ermonda Meshi ka diplomuar me sukses nga The Adjutant General Basic Officer Leader Course (AGBOLC), një trajnim i avancuar për përgatitjen e oficerëve në fushën e menaxhimit të personelit dhe mbështetjes administrative në operacione ushtarake. Për arritjet e saj, ajo është nderuar me medaljen “United States Diplomatic Medal”.

Këto suksese janë dëshmi e përkushtimit dhe profesionalizmit të lartë të ushtarakëve tanë, por njëkohësisht edhe rezultat i investimeve të vazhdueshme të Ministrisë së Mbrojtjes në trajnim, edukim ushtarak dhe zhvillim profesional. Duke zgjeruar mundësitë për shkollim dhe specializim në akademitë dhe qendrat më prestigjioze ushtarake të vendeve partnere, ne po ndërtojmë një ushtri gjithnjë e më profesionale, më të përgatitur dhe të aftë për t’iu përgjigjur sfidave të kohës sipas standardeve më të larta të NATO-s.

Jemi krenarë për secilin ushtarak të FSK-së që me punë, disiplinë dhe përkushtim po përfaqëson me dinjitet Republikën e Kosovës në akademitë dhe shkollat ushtarake të vendeve aleate. Arritjet e tyre janë arritjet e shtetit tonë, të ushtrisë sonë dhe të rrugëtimit tonë të sigurt drejt forcimit të mëtejmë të kapaciteteve tona mbrojtëse.

Java e fundit e prillit pritet të jetë me mot të paqëndrueshëm. Sipas njoftimit të lëshuar nga Instituti Hidrometeorologjik i Kosovës, intervalet me diell dhe vranësira kohë pas kohe do të shoqërohen edhe me reshje shiu e shkarkesa elektrike.

“Era gjatë gjithë javës do të jetë kryesisht nga drejtimi verior (veriperëndim dhe verilindje), me intensitet të dobët deri mesatar, duke reflektuar praninë e një fushe relativisht të dobët presioni, por me ndikim të vazhdueshëm të masave ajrore më të freskëta”, thuhet në njoftimin e IHMK-së.

Të hënën moti do të jetë me diell dhe vranësira të shpërndara. Temperaturat minimale do të sillen rreth 1-3 gradë celsius, ndërsa maksimalet rreth 18-21.

Të martën mot me diell dhe vranësira të shpërndara, të cilat gjatë ditës vende-vende priten të sjellin riga shiu.

Temperaturat minimale nga 1-4 gradë celsius, ndërsa maksimalet nga 19-22.

Të mërkurën pritet të mbajë mot i ngjashëm, por me temperatura më të ulëta. Ndonëse ato minimale do të shënojnë ngritje deri në 8 gradë celsius, maksimalet do të sillen nga 15-18 gradë.

Të enjten po ashtu do të ketë mot me vranësira e reshje shiu në disa vende. Temperaturat minimale do të jenë të ngjashme si të një dite më parë, ndërsa maksimalet do të shënojnë rënie në 13 gradë celsius.

Të premten edhe pse pritet të mbajë mot me diell dhe pjesërisht i vranët e pa reshje shiu, temperaturat minimale do të bien në 0-3 gradë celsius, ndërsa maksimalet në 11-13.

Një atentat i rëndë me armë zjarri ka ndodhur të dielën në rrugën Balldren-Torovicë në Lezhë, ku kanë mbetur të vrarë Kreshnik Mujeci, 39 vjeç, dhe bashkëshortja e tij, Gentiana Mujeci, 32 vjeçe.

Sipas raportimeve nga vendi i ngjarjes, çifti po lëvizte me një automjet tip Audi Q7, kur është qëlluar me breshëri plumbash.

Dyshohet se mbi 30 plumba janë shkrepur në drejtim të automjetit, i cili është bërë shoshë.

Bazuar në të dhënat paraprake të grupit hetimor, autorët dyshohet se kanë përdorur dy automjete dhe kanë monitoruar lëvizjet e viktimës gjatë ditës, para se të kryenin sulmin.

Hetuesit po punojnë për identifikimin e mjeteve të përdorura nga autorët, ndërsa kamerat e sigurisë në zonë pritet të ndihmojnë në zbardhjen e rastit.

Informacioneve fillestare tregojnë se, çifti kishte qenë duke drekuar në një restorant para sulmit, ndërsa dyshohet se autorët i kishin vëzhguar që nga momenti i daljes nga lokali.

Kreshnik Mujeci rezulton emër i njohur për drejtësinë shqiptare. Sipas të dhënave zyrtare, ai ishte arrestuar në vitin 2016 bashkë me vëllanë e tij për vrasjen e Genc Mëhillit, por më pas ishte shpallur i pafajshëm nga Gjykata e Shkallës së Parë në Shkodër për mungesë provash.

Çështja ishte rikthyer për rigjykim nga Gjykata e Lartë në tetor të vitit 2024.

Policia po heton disa pista, përfshirë konflikte të mundshme të fundit të viktimës, si dhe dyshime për përfshirje në aktivitete të paligjshme në fushën e narkotikëve.

Hetimet për zbardhjen e atentatit po vazhdojnë.

Nesër do të mbahet mbledhja e radhës e Komisionit për Drejtat e Njeriut, Barazi Gjinore, Punë, Familje, Vlerat e Luftës Çlirimtare dhe Peticione.

E në këtë mbledhje pritet të shqyrtohet për votim një propozim i deputetit të Partisë Demokratike të Kosovës, Artan Behrami.

Ai për Klankosova.tv bëri të ditur se ka propozuar dërgimin e një ftese zyrtare për raportim të kryetares së Dhomave të Specializuara, Ekaterina Trendafilova.

Mirëpo, në këtë komision pritet që të ketë edhe pika të tjera të rendit të ditës, si ai i shqyrtimit të draft-planit të punës së Komisionit për sesionin pranveror të vitit 2026.

E pak ditë më parë, ishte pikërisht deputeti Artan Behrami, ai i cili kritikoi Gjykatën Speciale dhe kryetaren e saj, Ekaterina Trendafilova.

Në fjalën e tij para Kuvendit, Behrami ishte shprehur Gjykata Speciale dhe Bashkimi Evropian e trajtojnë Kuvendin e Kosovës si “nënë surrogate”.

“Që nga themelimi i Dhomave të Specializuara të Republikës së Kosovës, ky është komunikimi i parë i kësaj gjykate me neve. A e dini pse?”

“Sepse Trendafilova dhe Bashkimi Evropian Kuvendin e Kosovës e konsiderojnë si një nënë surrogate, derisa ‘prindër ligjor’ e konsiderojnë EULEX-in, UNMIK-un dhe Rezolutën 1244. Gjykata Speciale është duke bërë një devijim të tmerrshëm të mandatit që ia ka dhënë ky Kuvend”, kishte deklaruar Behrami.

Ndërkaq, kryetarja e Dhomave të Specializuara, Ekaterina Trendafilova, na maj të vitit të kaluar ishte për vizitë në Kosovë, mirëpo konferenca e saj ishte anuluar.

Sipas njoftimit zyrtar të asaj kohe, ajo konferencë ishte anuluar në interes të sigurisë publike dhe sipas këshillave të Policisë së Kosovës.

Deri te anulimi kishte ardhur pasi veteranët e Ushtrisë Çlirimtare të Kosovës ishin mbledhur pranë hotelit ku qëndronte Trendafilova, dhe më pas kishin bllokuar edhe hyrjen për të kundërshtuar vizitën e saj në Kosovë.

Lidhur me këtë, ishte deklaruar edhe kryetari i OVL-UÇK, Hysni Gucati i cili ishte shprehur se “tollovia” atje nuk ka qenë protestë, por reagim për vizitën e saj.

Afatit kushtetues për zgjedhjen e Presidentit po i vjen fundi.

Lëvizja Vetëvendosje e udhëhequr nga Albin Kurti ka kërkuar nga PDK dhe LDK të propozojnë tre emra jopartiakë për President.

Me pas, kreu i LDK-së, Lumir Abdixhiku tha se mund ta propozojnë Vjosa Osmanin nëse VV i ka 66 vota për të.

Por, kjo kërkesë është komentuar nga deputetë të pushtetit, duke thënë se VV ka kërkuar emra jopartiakë.

E Besian Mustafa, deputet i LDK-së ka pyetur pushtetin nëse i kanë 66 vota për Osmanin.

“Ku mbetën qato 66 vota? A i keni a jo?”, ka thënë ai.

Një 17 vjeçar nga Mitrovica është raportuar i zhdukur, ndërsa familja e tij kërkon ndihmën e qytetarëve për gjetjen e tij.

Sipas njoftimit të familjarëve, bëhet fjalë për Muhamed Bala, i cili për herë të fundit është parë më 25 prill 2026, rreth orës 13:45, në afërsi të Xhamisë Isa Beg në Mitrovicë.

Njoftimi:

Emri: MUHAMED BALA

Mosha: 17 vjeçar

Gjinia: Mashkull

Përshkrimi fizik: Gjatësia 1.80, ngjyra e flokëve kafe e mbylltë, ngjyra e syve e kaltër, veshja e fundit, duks i zi me patent, maicë të gjelbër, trenerkat e poshtme ngjyrë e zezë e përzier me ngjyre hiri, puma të zeza!

Është parë për herë të fundit më: 25.04.2026 ora 13:45 tek XHAMIA ISA BEG në Mitrovicë.
Çdo informacion, sado i vogël, mund të jetë shumë i rëndësishëm per ne.

Ju lutem kontaktoni në: 044 288 211, ose 045 985 859, 049 203 741 ose lajmëroni stacionin policor më të afërt.

Pasditja e së dielës ka troditur Shqipërinë, si pasojë e një vrasjeje të rëndë që ka ndodhur në Lezhë.

Nga të shtënat me armë zjarri, një makinë është goditur me mbi 30 plumba, duke lënë të vrarë dy persona.

Nga të dhënat paraprake, dyshohet se nga të shtënat kanë mbetur të vrarë burrë dhe grua.

Rrethanat dhe motivi i këtij rasti ende nuk dihet. Paraprakisht, dyshohet se atentati ka ndodhur teksa viktimat kanë qenë në lëvizje.

Policia ndodhet në vendin e ngjarjes dhe po merret me hetimin e rastit. Drejtori i Drejtorisë Vendore të Policisë së Lezhës, Arben Nasufi, ka reaguar në lidhje me atentatin e rëndë.

“Është konstatuar që një mjet në lëvizje është qëlluar me breshëri armësh dhe dyshohet dhe mjekët kanë konfirmuar se kanë humbur jetën dy persona, një burrë dhe një grua. Lajmi është shumë i rëndë. Nën drejtimin e prokurorit është ngritur grupi hetimor, janë marrë të gjitha masat. Po punojmë intensivisht, po fiksojmë çdo provë me qëllim hetimin e plotë, zbardhjen e gjithë dinamikës dhe zbulimin e autorëve dhe vënien para përgjegjësisë së tyre.”, ka thënë ai.