Category: Lajme

Ministria e Infrastrukturës dhe Transportit ka njoftuar se sot, më 21 gusht 2026, do të aplikohet kufizim i përkohshëm i qarkullimit për automjetet e transportit të mallrave me masë totale mbi 20 tonë.

Vendimi është marrë për shkak të temperaturave të larta të parashikuara gjatë ditës.

Kufizimi do të jetë në fuqi nga ora 11:00 deri në 17:30 në autoudhë, pasi temperaturat pritet të kalojnë 32 gradë Celsius.

Ndërkohë, në rrugët nacionale, rajonale dhe lidhëse, qarkullimi i automjeteve të rënda do të lejohet pa kufizime.

Nga ky vendim përjashtohen automjetet e organeve të rendit dhe sigurisë publike, shërbimet emergjente dhe institucionet shëndetësore.

MIT u ka bërë thirrje operatorëve ekonomikë dhe ngasësve që ta respektojnë kufizimin dhe ta planifikojnë qarkullimin në përputhje me orarin e përcaktuar.

Një skandal ka shpërthyer në Slloveni, pasi presidentja Natasha Pirc Musar është përfshirë në një debat të fortë mbi lidhjet e dyshuara me persona me të kaluar të lidhur me inteligjencën ruse.

Çështja doli në pah pas një aksidenti automobilistik më 31 korrik, në të cilin u përfshi makina zyrtare e presidentes. Mes personave që udhëtonin me të ishte Viktorija Krivolucka, një mike e vjetër e Pirc Musar me origjinë ruse. Presidentja u shtrua në spital pas aksidentit, ku pësoi frakturë të klavikulës.

Krivolucka është lidhur nga mediat sllovene me Roman Jegliq, një ish-zyrtar të inteligjencës sllovene, i cili u largua drejt Rusisë në vitet ’90. Sipas raportimeve, Krivolucka ka konfirmuar se kishte jetuar me Jeglič në Rusi për disa vite, por ka deklaruar se nuk ka pasur kontakte me të prej rreth 15 vitesh.

Kërkohet t’i ndalohet qasja në informacionet sekrete

Skandali ka marrë përmasa politike pasi deputeti i Partisë Demokratike Sllovene (SDS), Žan Mahnič, i ka kërkuar qeverisë të ndalojë furnizimin e presidentes dhe zyrës së saj me raporte të inteligjencës dhe sigurisë.

Mahnič argumenton se dyshimet për lidhje me rrjete ruse kërkojnë një vlerësim të plotë të kundërzbulimit dhe mbrojtjes së informacionit të klasifikuar. Komisioni parlamentar i sigurisë ka kërkuar gjithashtu sqarime nga shërbimet kompetente për ndikimin e mundshëm rus në rrethin e presidentes.

Presidenca ka deklaruar se presidentja nuk bashkëpunon me rrjetet e inteligjencës ruse dhe ka hedhur poshtë gjithashtu pretendimet që e lidhin atë drejtpërdrejt me Roman Jeglič. Sipas zyrës së presidentes, Pirc Musar nuk e ka takuar dhe nuk e njeh personalisht ish-zyrtarin e inteligjencës.

Edhe Krivolucka ka mohuar lidhjet aktuale me inteligjencën ruse, duke deklaruar se nuk ka pasur kontakte me Jeglič për shumë vite. Deri tani, nuk është bërë publike ndonjë provë që tregon se ajo ka bashkëpunuar me shërbimet ruse. /Ballkanweb

Një vjedhje e rëndë është raportuar në fshatin Borovë të Leshakut, ku persona të dyshuar të panjohur kanë depërtuar në një shtëpi dhe kanë marrë para të gatshme dhe stoli ari.

Sipas raportimit, rasti ka ndodhur të enjten.

Policia ka nisur hetimet për identifikimin e personave të dyshuar dhe zbardhjen e plotë të rrethanave të rastit. Për momentin, nuk janë bërë të ditura detaje të tjera lidhur me vlerën e dëmit.

Rasti është duke u hetuar.

Një shtetas i Serbisë është arrestuar në Gjilan, pasi dyshohet se ka kanosur dhe përdorur forcë fizike ndaj një gruaje, po ashtu shtetase e Serbisë.

Sipas policisë, viktima ishte mbajtur pa dëshirën e saj në banesën e të dyshuarit, ndërkohë që thuhet se ajo ka pranuar trajtim mjekësor.

Tutje Policia njoftoi se me vendim të prokurorit, i dyshuari është dërguar në mbajtje.

Inspektorati Qendror i Punës pas kontrolleve të kryera në 12 vendpunishte në komunat Skenderaj, Mitrovicë, Vushtrri, Prizren dhe Ferizaj ka vendosur për ndalimin e punimeve pas tha se gjatë inspektimeve janë konstatuar shkelje të rënda të dispozitave ligjore, të cilat paraqisnin rrezik serioz për jetën dhe shëndetin e punëtorëve.

“Për këtë arsye, IQP ka urdhëruar ndalimin e menjëhershëm të punimeve në 12 vendpunishte, deri në eliminimin e të gjitha parregullsive të evidentuara dhe krijimin e kushteve të sigurta për punë. Këto masa synojnë parandalimin e aksidenteve në vendin e punës dhe garantimin e sigurisë së punëtorëve. Rifillimi i punimeve do të lejohet vetëm pasi inspektorët të konstatojnë se janë përmbushur të gjitha kërkesat ligjore dhe standardet e sigurisë”, tha Inspektorati në njoftim.

Inspektorati Qendror i Punës u zotua se do të vazhdojë kontrollet intensive në të gjithë territorin e Republikës së Kosovës dhe nuk do të tolerojë asnjë shkelje që rrezikon jetën dhe shëndetin e punëtorëve.

Një punëtor 32-vjeçar i Korporatës Energjetike të Kosovës (KEK) ka humbur jetën të mërkurën, më 20 gusht, në vendin e punës, pasi dyshohet se ka pasur kontakt me një kabllo elektrike.

Ky është rasti i katërt me fatalitet që raportohet brenda këtij viti në KEK, raporton Ekonomia Online.

Kryetari i Sindikatës së Re të KEK-ut, Xhelal Jashari, në një intervistë për Ekonomia Online ka shprehur ngushëllime për familjen e të ndjerit, ndërsa ka ngritur shqetësime për kushtet e sigurisë në vendet e punës në këtë korporatë.

“Po fillimisht e ndjejmë obligim ti shprehim ngushëllime familjes së kolegut tonë Arbenit Ahmetit i cili gjeti vdekjen fatkeqësisht në vendin e tij të punës në një kontakt me një kabëll elektrike, ka pësu një aksident që ka qenë fatale për jetën e tij. Ne i shprehim ngushëllime familjes, shokëve dhe gjithë dashamirëve që e kanë njohur, një djalë të sjellshëm, një djalë punëtor dhe një djalë i dalluar në mesin tonë në Korporatën Energjetike të Kosovës. Për rastin se si ka ndodhur aty në vendngjarje është duke u marrë policia dhe organet e hetuesisë, forenzika e të tjera të cilat janë duke u marrë me shkaqet e aksidentit”, tha ai.

Jashari tha se kushtet e punës në KEK janë të rënda dhe se, sipas tij, ka mungesë të pajisjeve mbrojtëse për punëtorët.

“Për kushtet e punës të them me të vërtetë mund të themi se në Korporatën Energjetike të Kosovës kushtet janë jashtëzakonisht të rënda, kemi mungesë të disa pajisjeve mbrojtëse, si nga aspect e pajisjeve elektrike, makinerike dhe nga ana e xetarisë, kështu që natyra e punës në KEK është jashtëzakonisht e vështirë, jashtëzakonisht është e rëndë, kështu që ne i bëjmë apel menaxhmentit, bordit që të merren me përmirësimin e këtyre kushteve, me përmirësimin e gjendjes së vendeve të punës dhe sigurinë në përgjithësi të punëtorëve të Korporatës Energjetike të Kosovës”, tha ai

Ai tha se përveç rasteve me fatalitet, sindikata ka shqetësime edhe për sëmundjet që, sipas dyshimeve të tyre, mund të lidhen me kushtet e punës në KEK.

“Fatkeqësisht i kemi pas këto humbje të kolegëve tanë me aksidente fatale për jetën e tyre, mirëpo kemi edhe vdekje të cilat mirren sëmundjet në vendet e punës që ne dyshojmë për shkak të gazrave të ndryshme, për shkak pluhurit, për shkak zhurmës, për shkak dridhjeve, për shkak natyrës së punës që është e rëndë në Korporatën Energjetike të Kosovës. Ne kemi bo shkresa dhe kemi bo kërkesa të vazhdueshme menaxhmentit dhe bordit që të përmirësohen kushtet e punëtorëve, përmirësohet siguria e tyre në vendet e punës”, tha ai.

Jashari kritikoi qasjen që, sipas tij, institucionet dhe menaxhmenti ndërmarrin masa vetëm pasi të ndodhin aksidentet, duke kërkuar që problemet e sigurisë të adresohen paraprakisht.

“Fatkeqësisht është bë si praktikë, si traditë jo e mirë që vetëm pasi të ndodhë aksidenti, vetëm pasi të ndodhin rastet të mirremi na me to. Duhet njëherë e përgjithmonë që ne të mirremi dhe t’i evitojmë problemet para se të ndodhin. Kur të ndodhin është gjithçka e vonë sepse jeta e njeriut ma nuk kthehet mbrapa”, tha ai.

Vetëm gjatë vitit 2026, katër punëtorë të KEK-ut kanë humbur jetën si pasojë e aksidenteve në vendin e punës: Mixhen Sadiku, Milazim Binaku, Haxhi Gojnovci dhe Arbenit Ahmeti.

Një 16-vjeçar është arrestuar në Kaçanik, pasi dyshohet se gjatë një mosmarrëveshjeje në fshatin Doganaj ka kanosur një person me armë zjarri.

Policia ka dalë në vendin e ngjarjes dhe ka arrestuar dy të dyshuar. Gjatë kontrollit, jashtë një shtëpie, në një hapësirë me barishte, është gjetur dhe konfiskuar një armë zjarri (pistoletë) pa fishekë.

Pas intervistimit të personave të dyshuar, i dyshuari B.C, 16 vjeç është ndaluar për 24 orë, ndërsa i dyshuari tjetër madhor është liruar në procedurë të rregullt.

Rasti është iniciuar për veprat penale “Sulmi”, “Kanosja me armë” dhe “Mbajtja në pronësi, kontroll ose posedim të paautorizuar të armëve”.

Vdekja e punëtorit të Korporatës Energjetike të Kosovës, Arbenit Ahmeti, pas kontaktit me tensionin elektrik, ka nxitur reagime nga përfaqësues të partive politike.

Sipas njoftimit të KEK-ut, Ahmeti pësoi lëndime të rënda gjatë angazhimit në transportimin dhe zhvendosjen e kabllove 6 kV. Ai u dërgua për trajtim mjekësor në Ambulancën e Obiliqit, por nuk arriti t’u mbijetonte plagëve.

Deputetja e PDK-së, Blerta Deliu, ka kërkuar hetim të plotë dhe të menjëhershëm për rastin, duke vënë theksin te siguria e punëtorëve në vendin e punës.

“Brenda vetëm tri ditësh, dy punëtorë të KEK-ut kanë humbur jetën në vendin e punës. Siguria e punëtorëve duhet të jetë mbi gjithçka. Duhet hetim i plotë, serioz dhe i menjëhershëm për secilin rast, për kushtet e punës, masat e sigurisë dhe përgjegjësinë institucionale”, ka shkruar Deliu.

Edhe deputetja e PDK-së, Ganimete Musliu, ka reaguar duke ngritur pyetje për sigurinë në KEK.

Ajo ka theksuar se brenda tri ditësh kanë humbur jetën dy punëtorë të kësaj korporate dhe ka kërkuar të dihet nëse janë respektuar rregullat e sigurisë dhe kush mban përgjegjësi për to.

Koreja e Veriut nisi të enjten një “breshëri raketash balistike me rreze të shkurtër veprimi” mes stërvitjeve të përbashkëta që po zhvillohen nga SHBA-të dhe Koreja e Jugut në Gadishullin Korean, tha Seuli.

Zyra e kryeministrit japonez konfirmoi gjithashtu lëshime të reja raketash nga Pheniani në pothuajse një javë pasi Koreja e Veriut lëshoi ​​një raketë balistike me rreze të shkurtër veprimi më 12 gusht.

Shefat e Shtabit të Përbashkët të Koresë së Jugut thanë se “zbuluan lëshimin e raketës nga Pheniani rreth orës 5 pasdite” drejt Detit Lindor, i njohur edhe si Deti i Japonisë.

​​​Ky është lëshimi i tretë i raketave nga Pheniani këtë muaj, pas lëshimit të raketave balistike me rreze të shkurtër veprimi më 12 dhe 6 gusht.

Lëshimi i predhës ndodhi në mes të ushtrimeve të përbashkëta ushtarake që po zhvillohen nga SHBA-të dhe Koreja e Jugut në Gadishullin Korean.

Presidenti i SHBA-së, Donald Trump, më parë i uli në pesë ditë stërvitjet 11-ditore vjetore “Ulchi Freedom Shield”, të cilat përfunduan të premten, duke përmendur marrëdhënien e tij me udhëheqësin e Koresë së Veriut, Kim Jong Un.

Motra e Kim-it, Kim Yo-jong, pranoi të mërkurën lidhjet “e shkëlqyera” midis udhëheqësit të Koresë së Veriut dhe Trump, por tha se politika armiqësore e Uashingtonit ndaj Phenianit nuk ka ndryshuar.

“Po i kushtojmë më shumë vëmendje realitetit se stërvitjet e përbashkëta ushtarake midis SHBA-së dhe Koresë së Jugut kanë vazhduar dhe janë ende duke vazhduar, dhe kjo është një shprehje e qartë e armiqësisë ndaj Koresë së Veriut”, tha Kim.

Më tej, Ministri i Unifikimit të Koresë së Jugut, Chung Dong-young, tha të enjten se bisedimet e drejtpërdrejta midis SHBA-së dhe Koresë së Veriut do të jenë një hap i parë kritik drejt ndalimit të programit të armëve bërthamore të Phenianit.

“Rruga e parë për të ndaluar programin bërthamor të Koresë së Veriut është një takim midis dy palëve dhe ne duhet të punojmë shumë për ta mbështetur atë”, tha Chung, duke shtuar se ndalimi i programit bërthamor të Phenianit është në interesin më të mirë të të gjitha palëve.

Trump tha të mërkurën se do të takohet me udhëheqësin e Koresë së Veriut Kim më vonë këtë vit, ndërsa vuri në dukje se Pheniani zotëron 57 armë bërthamore “shumë të fuqishme”, shkruan Euronews.al.

Pas komenteve të Trump, Ministri i Mbrojtjes i Koresë së Jugut, Ahn Gyu-back, u tha ligjvënësve se Seuli zakonisht vlerëson se Koreja e Veriut zotëron midis 80 dhe 120 koka bërthamore.