Category: Lajme

Grupi Parlamentar i Partisë Demokratike të Kosovës edhe sot do të jetë në sallën e Kuvendit të Kosovës, në vazhdën e kërkesës për vazhdimin e seancës konstituive dhe konstituimin e Kuvendit kjo ngjarje do të mbahet prej orës 11:00.

Sipas PDK-së, ky subjekt politik parlamentar, të premten i ka dërguar sërish kërkesë kryesuesit të seancës konstituive, Avni Dehari, që ta thërrasë vazhdimin e seancës në përputhje me Kushtetutën, aktgjykimet e Gjykatës Kushtetuese dhe Rregulloren e Kuvendit.

Këtij aksioni do t’i bashkohet edhe Aleanca.

PDK-ja dhe Aleanca kanë vazhduar me kërkesën për vazhdimin e seancës për konstituimin e Kuvendit, ndërsa kanë akuzuar Lëvizjen Vetëvendosje për bllokim të procesit.

Kjo e fundit ka thënë se fillimisht duhet të ketë marrëveshje për konstituim të institucioneve në mënyrë që të shmangen zgjedhjet e reja.

Të dyja këto parti parlamentare përveç LDK-së kanë refuzuar ftesat e Lëvizjes Vetëvendosje për takime.

Policia e Kosovës ka njoftuar për një rast të përdorimit të armës apo mjetit të rrezikshëm nga një i mitur në Podujevë.

Rasti ka ndodhur të premten, në ora 12:00.

“Ankuesi mashkull kosovar, ka informuar se nipi i tij i mitur ka marr armën AK-47 dhe gjatë manipulimit ka shkrepur një fishekë dhe predha ka goditur vëllain e tij fëmijë 10 vjeçar”, thuhet në raport.

I lënduari është dërguar për tretman mjekësor në QKUK-Prishtinë dhe është jashtë rrezikut për jetë.

Gjatë kontrollit të shtëpisë në cilësi të provave materiale është gjetur dhe konfiskuar një armë AK-47 me një karikator me 20 copë fishekë.

Në lidhje me rastin është kontaktuar prokurori kujdestar i Departamentit për të mitur i cili ka urdhëruar që rasti të incizohet si më lartë, ndërsa i dyshuari të lirohet në procedurë të rregullt. /Telegrafi/

Ministria e Industrisë, Ndërmarrësisë, Tregtisë dhe Inovacionit (MINTI) ka publikuar çmimet maksimale të lejuara për shitjen e derivateve të naftës për ditën e sotme.

Sipas vendimit të MINT-it, çmimi maksimal i naftës është përcaktuar në 1.79 euro për litër, ndërsa benzina mund të shitet deri në 1.53 euro për litër.

Ndërkohë, çmimi maksimal i gazit mbetet 0.62 euro për litër.

Një ditë më parë, çmimi maksimal i naftës ishte 1.79 euro për litër, ndërsa benzina mund të shitej deri në 1.52 euro për litër.

Ndërkohë, çmimi maksimal i gazit ishte 0.62 euro për litër.

Korporata Energjetike e Kosovës (KEK) ka njoftuar se njësia A4 është rikthyer në procesin e operimit, pas përfundimit me sukses të sanimeve të nevojshme.

Sipas KEK-ut, njësia ka filluar procesin e startimit dhe pritet që së shpejti të sinkronizohet me rrjetin energjetik.

Korporata ka bërë të ditur se gjatë fazës së startimit, për arsye teknologjike, mund të ketë tym më të theksuar për disa orë.

KEK ka kërkuar mirëkuptimin e Komunës së Obiliqit dhe të qytetarëve gjatë kësaj periudhe të shkurtër, duke theksuar se dukuria lidhet me procesin teknik të rikthimit të njësisë në operim.

Presidenti amerikan, Donald Trump, tha se nuk beson që Irani është i gatshëm që të arrijë “marrëveshjen e duhur” për t’i dhënë fund konfliktit, duke shtuar se Uashingtoni po shikon se “çfarë do të ndodhë më pas”.

Udhëheqësi amerikan po ashtu tha se Shtetet e Bashkuara kanë “kontrollin e plotë” të zonës përreth Ngushticës kyç të Hormuzit, e cila është mbyllur që nga nisja e konfliktit në fund të shkurtit.

Ndërprerja e trafikut përmes ngushticës ka qenë një nga çështjet qendrore të konfliktit dhe një nga pengesat kryesore për arritjen e një marrëveshjeje, teksa Teherani dhe Uashingtoni kanë qëndrime të ndryshme sa i përket kontrollit mbi këtë rrugë të rëndësishme ujore.

Teherani pretendon se e ka kontrollin e plotë të rrugës ujore dhe thotë se ajo do të hapet vetëm pasi Uashingtoni të plotësojë disa kushte.

“Ata do të donin shumë të arrinin një marrëveshje, por, sipas mendimit tim, nuk janë të gatshëm të bëjnë marrëveshjen e duhur”, u tha Trump gazetarëve kur u pyet nëse opsionet ushtarake të SHBA-së kundër Iranit ishin të kufizuara.

Komentet e tij të bëra më 21 gusht erdhën pasi Omani tha se ministrat e Jashtëm të Iranit dhe Omanit kishin diskutuar për rifillimin e negociatave për lundrimin përmes Ngushticës së Hormuzit.

Dy vendet së fundi kanë zhvilluar bisedime për krijimin e një rruge të re që do të garantonte kalim të sigurt përmes kësaj ngushtice./REL/

Një burrë është arrestuar nën dyshimin se ka ngacmuar seksualisht një grua në Fushë Kosovë dhe ishte larguar nga vendi i ngjarjes.

Policia tha se ka arrestuar atë dhe se me vendim të prokurorit u dërgua në Qendrën e Mbajtjes.

“SULM SEKSUAL: Fushë Kosovë  12.04.2026. Është arrestuar i dyshuari mashkull kosovar, pasi që dyshohet se më datë 12.04.2026 kishte ngacmuar seksualisht viktimën femër kosovare dhe ishte larguar nga vendi i ngjarjes. Pas intervistimit, me aktvendim të prokurorit kujdestar, i dyshuari është dërguar në Qendrën e Mbajtjes”.

Rritja e çmimeve të derivateve po vazhdon të rëndojë xhepat e qytetarëve në Kosovë, duke shtuar edhe më tej barrën e një kostoje jetese tashmë të lartë, raporton Ekonomia Online.

Me naftën që të premten arriti në 1.79 euro për litër, benzina në 1.52 euro dhe gazi në 0.62 euro, qytetarët shprehen të shqetësuar për përballueshmërinë e këtyre çmimeve.

Përveç ndikimit të drejtpërdrejtë në buxhetet familjare, ata paralajmërojnë se shtrenjtimi i karburanteve mund të reflektohet edhe në çmimet e produkteve dhe shërbimeve të tjera, për shkak të rritjes së kostove të transportit.

Brahim Vrellaku, mërgimtar, tregoi se krahasuar me pagat, çmimet në Kosovë janë shumë të larta, duke theksuar krizën institucionale.

“Unë rrugës kur kam ardhur nga Italia për me ardhë në Kosovë, në Kroaci e ke më së pakti 50 përqind naftën më lirë se në Kosovë, Shqipëria e kishte pasur më lartë. Në Kosovë tani është çmimi katastrofë me e krahasuar me pagat të cilat merren në Kosovë, çmimi është tepër i lartë. Unë si e shoh, derisa nuk ka shtet, derisa s’ka Kuvend, derisa s’ka Qeveri, këtu njerëzit jo vetëm naftarët, por edhe të gjithë nëpër dogana për mendimin tim as nuk e dinë kush sa hynë, as çka del, as asgjë. Për mendimin tim është katastrofë gjendja në Kosovë. Nuk janë aspak të përballueshme”, tha ai për Ekonomia Online.

Edhe qytetari Rrustem Avdiu, poashtu i konsideron këto çmime të pakuptueshme dhe aspak të arsyeshme.

“Keq boll, kjo është e pakuptueshme, por çfarë të bësh. Është katastrofë. Qeveria jonë kështu po bën. Populli po e voton këtë qeveri, a kjo e ka qëllimin ta shkatërrojë Kosovën, tjetër jo, përparim s’ka prej saj, vetëm shkatërrim. S’janë të arsyeshme hiç, as të naftës, as çmimet ditore, për çdo ditë janë duke shkuar lartë këto, nuk e di sesi populli po mundet të mbijetojë, shumë problem i madh është”, theksoi ai për Ekonomia Online.

Kurse, qytetari Muharrem Faiku, u shpreh se rritja e çmimeve të naftës ndikon edhe në rritjen e çmimeve të produkteve tjera.

“Sigurisht, shumë shtrenjtë janë, kuptohet ajo, është e papërballueshme. Nuk di çfarë të them, mirëpo çmimi i naftës është shumë i lartë, sigurisht që ndikon, kur rriten çmimet, kjo i rrit edhe çmimet tjera pastaj, sepse kostot e transportit, e këto të gjitha edhe është shumë. Ashtu ashtu unë nuk e përdori shumë (veturën), më shumë eci me biçikletë, kjo ende e zvogëlon mundësinë me e përdorë”, u shpreh ai.

Zëvendësdrejtori i Policisë së Kosovës për rajonin e veriut, Veton Elshani, ka deklaruar se situata e sigurisë në veri të vendit është e qetë dhe stabile, por vazhdon të jetë delikate, kryesisht për shkak të veprimeve apo vendimeve të mundshme politike.

Ai në një intervistë për Ekonomia Online ka thënë se Policia e Kosovës është e pranishme në të gjithë veriun e vendit dhe se nuk ka ndonjë problem të theksuar sa i përket sigurisë.

“Situata e sigurisë në veri të vendit është e qetë, është stabile dhe vazhdon të jetë delikate. Kur them delikate, është më shumë për shkak të veprimeve të mundshme apo vendimeve të mundshme politike. Sepse përndryshe Policia e Kosovës është në krejt veriun e vendit dhe nuk ka ndonjë problem për me theksuar. Ajo çka duhet me thënë është që në rast se do të ndodhë ndonjë incident, Policia i ka kapacitetet e veta për me u marrë me atë problem”, ka thënë Elshani.

Sipas tij, aktualisht Policia e Kosovës ka staf të mjaftueshëm për të menaxhuar situatën në veri.

Elshani ka theksuar edhe rritjen e numrit të pjesëtarëve të komunitetit serb në Policinë e Kosovës.

“Ne jemi, qëndrojmë shumë mirë me staf policor, me personel. Kemi pasur një mungesë, një mangësi shumë të madhe të personelit policor të përkatësisë etnike serbe, të kosovarëve të përkatësisë etnike serbe. Tash i kemi 151 policë të cilët janë të përkatësisë etnike serbe. Rreth 450 policë në total mjaftojnë për rajonin e veriut sepse nuk ka shumë krim atje, më shumë ka të bëjë me politikë sesa me krim. Por Policia është duke menaxhuar komplet situatën në veri dhe ne jemi të gatshëm me reaguar në rast se diçka ndodh”, është shprehur ai.

I pyetur për dritën e gjelbër që Bashkimi Evropian i dha hapjes së urës së Ibrit, Elshani tha se urat lidhin njerëzit dhe nuk i ndajnë.

“Ne i kemi disa ura të tjera derisa vjen kjo ura kryesore këtu dhe nuk ka absolutisht kurrfarë problemi për kalimin e njerëzve edhe të mallrave edhe të veturave. Urat lidhin njerëzit, nuk ndajnë. Unë nuk dua me thënë diçka për urën specifike, për urën kryesore, por kurrfarë rreziku nuk ka në veri të vendit sepse Policia është aty në secilin vend edhe ne kemi shumë reagime që i bëjmë edhe ndaj njerëzve të cilët janë shtetas kosovarë të përkatësisë etnike shqiptare ose serbe apo të tjerë. Kështu që ne e kryejmë punën tonë, e ruajmë rendin dhe qetësinë publike. Më shumë ka retorikë politike sa i përket kësaj pune sesa ajo çka ka të bëjë me siguri, me çështje të sigurisë”, ka deklaruar Elshani, për Ekonomia Online.

Ai ka folur edhe për kërcënimet ndaj Policisë së Kosovës në veri, duke thënë se pjesëtarët e Policisë janë mësuar me situata të tilla gjatë viteve të fundit.

“Ne jemi që katër vjet aty, jemi mësuar me ato kërcënime: ‘ju vrasim sot, ju vrasim nesër’. Hala s’na kanë vrarë. Kurdoherë që vjen puna aty, merresh me atë lloj situate. Policia e ka punën e vet, e kryejmë punën tonë edhe nuk ka nevojë me u brengosë as qytetarët, sepse në rast se ka nevojë me reaguar, ne jemi aty”, ka thënë zëvendësdrejtori i Policisë së Kosovës për rajonin e veriut, Veton Elshani.

Flet Prof. Dr. Adrian Civici

Ndërsa universitetet shqiptare kanë rifunksionalizuar vitet e fundit ciklet doktorale me standarde më të forta, lidhja mes kërkimit shkencor dhe nevojave konkrete të tregut mbetet ende e brishtë.

Për Prof. Dr. Adrian Civici, problemi nuk është numri i doktoraturave, por cilësia dhe aftësia e tyre për t’u kthyer në kapital real zhvillimi për vendin.

Sipas tij, “mentaliteti” që e sheh doktoraturën si luks akademik ka të bëjë me mungesën e bashkëpunimit universitet – biznes dhe sektorët e rinj që mund të krijojnë një treg më të mirëpaguar për kapitalin njerëzor të kualifikuar.

Shqipëria po prodhon më shumë doktoratura sesa treg që mund t’i absorbojë ato. A kemi krijuar një “inflacion diplomash”?

Në lidhje me doktoraturat nuk mendoj se kemi krijuar një inflacion diplomash, qoftë edhe për faktin se për një kohë të gjatë, procesi i doktoraturave ka qenë i mbyllur. Ka vetëm disa vite që është bërë funksional me rregulla e rregullore më strikte për të gjithë procesin.

Nuk mendoj, se kur është fjala për doktoraturat, ato duhet të shihen thjesht si çështje numrash ose sasi. Thelbi i problemit është cilësia dhe kontributi i tyre real në problematikën e zhvillimit ekonomiko-social të vendit.

Sa e lidhur është sot doktoratura në Shqipëri me nevojat reale të tregut dhe sa mbetet ende një titull formal akademik?

Ky është problemi më thelbësor kur flitet për doktoraturat; lidhja e tyre me nevojat reale të tregut të punës dhe të nevojave për zgjidhje shkencore sa më cilësore.

Faktikisht ka një ndërgjegjësim më të madh të universiteteve për ta respektuar sa më cilësisht një sfidë të tillë.

Po synohet që kërkimet doktorale të integrohen sa më mirë në projekte e akse kërkimore eficiente në funksion të nevojave reale të ekonomisë dhe kërkimit shkencor.

Të mos jenë thjesht dhe vetëm kërkime individuale apo kërkime për të marrë një gradë shkencore rutinë. Por, duhet ta pranojmë se kjo është ende një rrugë e gjatë që kërkon progres të vazhdueshëm dhe mbi të gjitha, koncepte të qarta metodologjike e ndërveprim me strategjitë kombëtare të zhvillimit ekonomiko-social të vendit.

Mbi të gjitha, kërkohet dhe bashkëveprim e koordinim më i mirë me universitetet apo qendrat kërkimore europiane e ndërkombëtare për të shkuar natyrshëm drejt kërkimeve doktorale ndërdisiplinore e bashkëkohore.

Pse sektori privat shqiptar rrallë e përkthen një PhD në një pagë më të lartë apo rol më të avancuar?

Edhe sektori publik dhe ai privat e nxisin shumë pak ose aspak vlerësimin e doktoraturave. Ekziston një mentalitet i gabuar që doktoratura është më shumë një “luks shkencor” personal pa efekte të dukshme në cilësinë e kapitalit njerëzor.

Ky mentalitet është shumë i përhapur, sidomos në sektorin privat që më shumë priret ndaj kompetencave që zotërojnë punonjësit se sa nga gradat apo titujt akademikë.

Në një ekonomi si Shqipëria, a është doktoratura investim racional financiar, apo më shumë bast personal dhe akademik?

Besoj se mbizotërojnë më shumë rastet kur doktoratura shihet si bast personal e akademik. Këtë e provon dhe fakti se pothuajse 100% e doktorantëve janë pjesë e mjediseve universitare e akademike. Pra, një element i rëndësishëm i karrierës dhe detyrimeve akademike.

Çfarë i mungon sot lidhjes universitet – biznes në Shqipëri që kërkimi shkencor të kthehet në vlerë ekonomike reale?

Kjo është një lidhje shumë e gjerë dhe strukturore. Problemi kryesor qëndron në dobësitë që ne kemi aktualisht në bashkëpunimin dhe bashkëveprimin ndërmjet universiteteve dhe biznesit.

E thënë ndryshe, kërkimet doktorale nuk janë të integruara apo pjesë e sfidave të biznesit, tregut apo qeverisjes, qoftë kjo qendrore apo lokale.

A mendoni se Shqipëria ka hyrë në një fazë ku diploma nuk garanton më automatikisht status ekonomik apo social?

Po. Tashmë kemi hyrë plotësisht në këtë fazë. Ky është një trend i përgjithshëm në shumë vende të botës, sidomos ato të zhvilluara.

Diploma universitare apo doktorale tregon shumë për cilësinë e burimeve njerëzore, por nuk po konsiderohen më si merita e vetme apo kryesore për statusin ekonomik apo shoqëror. Në plan të parë kanë dalë zotërimi i kompetencave specifike sipas kërkesave të sektorëve, bizneseve apo vetë tregut të punës.

A mund të krijojnë sektorë si Inteligjenca Artificiale, energjia e pastër apo agro-tech një treg të ri që paguan më mirë kapitalin njerëzor të kualifikuar?

Pa tjetër. Këta sektorë janë aktualisht në një trend zgjerimi të shpejtë. Në njëfarë mënyre, janë sfidat kryesore të zhvillimit në dekadën e ardhshme. Janë sektorët ku po investohet më shumë kapital e burime njerëzore të kualifikuara me kërkesat e kohës.

Statistikat tregojnë, se aktualisht, këta janë dhe sektorët ku kapitali njerëzor i kualifikuar paguhet më mirë, vlerësohet më shumë dhe ku konkurrenca është më e madhe. Kjo situatë është e dukshme dhe në Shqipëri.

Ju keni folur shpesh për nevojën e transformimit të modelit ekonomik shqiptar. A mund të ndërtohet një ekonomi inovacioni pa investim serioz në kërkim dhe doktoratura cilësore?

Sfida më e madhe e modelit ekonomik shqiptar është zhvillimi i sektorëve me vlerë të shtuar të lartë, është zhvillimi i degëve e sektorëve që sigurojnë atë që quhet Rritje Ekonomike Cilësore, atë që quhet Punësim cilësor me standarde të larta që paguhet më mirë, por dhe kontribuon më shumë.

Pa dyshim, që në këtë këndvështrim, vëmendja dhe shtimi i financimeve drejt inovacionit, teknologjive të reja, Inteligjencës Artificiale, Big data, energjive të rinovueshme, teknologjisë blockchain, smart city, etj., përbën thelbin e zhvillimit sot dhe në të ardhmen e afërt.

A po e përdorin universitetet doktoraturën edhe si burim të ardhurash, në një kohë kur infrastruktura kërkimore mbetet e dobët?

Nuk besoj se universitetet po e përdorin doktoraturën si burim të ardhurash. E tillë do të ishte nëse doktoraturat do të orientohen shumë më mirë se deri më sot, drejt kërkimeve aplikative në funksion të kërkesave të biznesit, drejt krijimit të patentave, apo elemente të tjera të kësaj natyre, të cilat mund të ofrohen në treg dhe të garantojnë të ardhura nga këto lloj doktoraturash.

Deri tani, nuk mund të pohohet që kjo gjë po ndodh, qoftë edhe për shkak të infrastrukturës së dobët kërkimore./Monitor