ATV

Category: LAJME

  • Presidenca reagon pasi Vuçiq tha se s’do të zbatojë krejt marrëveshjet: Të pasojnë sanksionet

    Presidenca reagon pasi Vuçiq tha se s’do të zbatojë krejt marrëveshjet: Të pasojnë sanksionet

    Presidenti serb, Aleksandar Vuçiq ka thënë se nuk do ta zbatojë totalisht marrëveshjen e arritur së fundmi me Kosovën.

    Vuçiq i tha televizionit publik serbe se disa pika nuk do të zbatohen nga ana e Serbisë.

    Ndaj deklaratës të tij ka reaguar Blerim Vela, shef i stafit në kabinetin e presidentes së Kosovës Vjosa Osmani, duke thënë se Perëndimi tani duhet t’i vë sanksione Serbisë.

    Vela tha se kjo është “një kontradiktë e qartë” me atë për të cilën ka pasur marrëveshje si dhe me qëndrimin e Bashkimit Europian.

    “Sanksionet duhet të pasojnë!”, ka shkruar Vela në Twitter.

  • Analistët serbë: Vuçiç nuk mund dhe as nuk do të shkëputet kurrë prej Putinit

    Analistët serbë: Vuçiç nuk mund dhe as nuk do të shkëputet kurrë prej Putinit

    Presidenti serb Aleksandër Vuçiç për vite të tëra u përpoq të përfitonte politikisht nga lidhjet e tij të ngushta me Moskën, gjë që e ndihmoi atë të ruante pushtetin.

    Megjithatë, thashethemet për prishje të marrëdhënieve u shfaqën në fillim të luftës në Ukrainë, kur kjo “miqësi” pushon së qeni e dëshirueshme. Të paktën publikisht.

    Pas kësaj vjen një kthesë e lehtë në marrëdhëniet mes Beogradit dhe Moskës. Mirëpo, lind pyetja nëse marrëdhënia mes Vuçiçit dhe presidentit rus Vladimir Putin mund të prishet kaq lehtë, apo është e gjitha një shfaqje ndryshe për publikun?

    Sreçko Gjukiç, diplomat dhe ish-ambasador në një prononcim për mediet serbe thekson se është i bindur se ka komunikim mes Beogradit dhe Moskës dhe se kjo shihet nga disa lëvizje të Vuçiçt që kanë të bëjnë me Kosovën.

    “Jam i bindur se mes Beogradit dhe Moskës ka komunikim. Natyrisht, sot mund ta kemi të vështirë ta vërtetojmë këtë, por nuk është diçka që nuk mund të ‘kapet’ dhe të vërtetohet se ekziston”– thotë Gjukiç.

    Sipas diplomatit, ekziston një komunikim mes dy liderëve, nuk ka rëndësi nëse ai është i drejtpërdrejtë apo kalon nëpër kanale të veçanta.

    “Sidoqoftë, nga veprimet e caktuara të Vuçiçit shohim se kjo është rezultat i mbështetjes së Moskës. Për shembull, kur bëhet fjalë konkretisht për çështjen e Kosovës, edhe pse Moska është e thellë e zhytur në probleme, pyetja e vërtetë është se kujt mund t’i ndihmojë”, shton ai.

    I pyetur nëse mendon se presidenti i Serbisë nuk mund të shkëputet nga ai “përqafim”, Gjukiç përgjigjet se rrënjët e kësaj gjenden në politikën radikale të partisë së Vuçiçit.

    “Mendoj se është një përqafim ideologjiko-politik. Duke marrë parasysh rrënjët e partisë që ai drejton, ato rrënjë gjenden në politikën radikale dhe politika radikale në Serbi ka qenë gjithmonë e lidhur me nënën Rusi me një kordon kërthizor. Unë absolutisht mendoj se Vuçiç nuk mund të shkëputet prej Putinit dhe as që do të largohet ndonjëherë prej tij. Pavarësisht nëse është Kosova apo diçka tjetër. Nëse nuk është Kosova, do të ketë diçka tjetër”, thotë Gjukiç.

    Vuçiç: Gjithmonë konsultohem me Putinin

    Vetë Vuçiç ka folur në disa raste për faktin se ai konsultohet rregullisht me presidentin e Rusisë.

    “Unë gjithmonë konsultohem me presidentin Putin dhe kërkoj këshillën e tij. Unë e njoh atë dhe nuk gënjej, po e them të vërtetën. Edhe pse jo gjithmonë i pëlqen gjithçka. Mendoj se kjo është një nga gjërat që Putini e respekton shumë”, është shprehur ai më herët për mediet ruse.

    Është gjithashtu interesante të kujtojmë deklaratën e fundit të gazetarit austriak Kristijan Versiç, se në dhjetor të 2021-së, ai mësoi nga Vuçiç se Rusia do të sulmonte Ukrainën.

    “Jo sepse presidenti Putin më tha gjë, kuptova se çfarë do të ndodhte në Ukrainë. Ai gjithmonë ndante 45 minuta për të folur për Ukrainën dhe më pas nuk foli as për tre minuta. Kjo më mjaftoi. Kur çdo herë ai ka nevojë për të shpjeguar dhe atëherë nevoja nuk ekziston më, do të thotë se vendimi është marrë. Nuk mund të flisja kaq hapur, por thashë pa mëdyshje se pres të ndodhin ndryshime të mëdha”, ka thënë Vuçiç.

    Takime sekrete

    Kur filloi lufta në Ukrainë, këto kontakte u ndërprenë përkohësisht. Të paktën zyrtarisht. Deri në maj 2022, kur Vuçiç dhe Putin folën në telefon dhe u pajtuan për nënshkrimin e një kontratë të re për furnizim me gaz. Ndërkohë, dolën informacione për disa “takime sekrete” me njerëz të afërt me udhëheqjen ruse.

    Pasi dështoi ideja që ministri i Jashtëm rus Sergei Lavrov të vizitonte Beogradin, në një kohë kur ai tashmë ishte nën sanksionet e BE-së, Vuçiç u takua me të në New York në margjinat e Asamblesë së Përgjithshme të OKB-së. Ky takim ishte tentuar të fshihej nga sytë e publikut serb.

    Po ashtu, medie serbe Nova ka zbuluar se Vuçiç është takuar fshehurazi me zëvendësin e Lavrovit, Aleksandar Grushka.

    “Çfarë do të doja të fshihja? Ndoshta për të shpëtuar Serbinë. Le të themi se ata ia dolën mirë. Pra, pse më denoncove? Pse e denoncuat presidentin e vendit tuaj? Çfarë jeni ju, informatorë profesionistë? Të dashur miq në Perëndim, ky [Vuçiç] donte t’ju fshehë diçka”, tha Vuçiç pasi ishte publikuar ky informacion.

    Jo shumë kohë pas kësaj, Vuçiç u takua edhe me këshilltarin e liderit çeçen Ramzan Kadyrov, Turk Daudov. Për këtë takim, opinioni serb kishte mësuar nga vetë Daudovi, i cili u mburr me dhuratën që i bëri nikoqirit të tij në Beograd.

    Në faqen zyrtare të Presidencës serbe nuk kishte asnjë lajm për takimin dhe as një deklaratë për medie.

    Urdhër arresti për Putinin nga Haga

    Urdhër arresti për Putinin nga Gjykata Ndërkombëtare Penale në Hagë është një tjetër moment i cili u pasua nga një deklaratë e Vuçiçit që thoshte se u bë shumë keq kur mori lajmin.

    “Për pak e humba vetëdijen kur më treguan lajmin. Një gomar kaq i madh, që peshon gati 120 kilogramë, sepse e di se çfarë do të thotë për vendin tonë”-tha ai në një fjalim para qytetarëve në Mitrovicë të Sremit, deklaratë kjo e cila bazuar nga raportet nuk duhet të bëjë çudi.

    Ai tha gjithashtu se ky vendim tregon se Perëndimi është i gatshëm të shkojë deri në fund për të gjithë ata që nuk kanë vendosur sanksione kundër Rusisë, si dhe se ata që flirtojnë me Putinin do të kenë pasoja të rënda.

    “Kur e them këtë, jam i vetëdijshëm për situatën me të cilën do të përballemi”, ka shtuar ai.

    Duke folur për këtë, profesori në pension i Fakultetit Filozofik, Zharko Koraç, ka thënë për mediet serbe se kjo është për shkak se Vuçiç e sheh Putinin si një politikan të madh dhe të rëndësishëm.

    “Ky qëndrim ndaj tij vazhdon që nga koha kur ai ishte në Partinë Radikale. Nacionalistët serbë historikisht u mbështetën në Rusi, megjithëse Serbia kishte edhe nacionalistë pro-perëndimorë. Vuçiç u trondit kur zbuloi me vonesë se Putini është thjesht një politikan, ylli i të cilit në skenën ndërkombëtare është zbehur përgjithmonë për shkak të luftës në Ukrainë. Romakët e lashtë do të thoshin: kështu kalon lavdia e botës”, shpjegon Koraç.

    “Është një goditje e re ndaj politikës së Serbisë, e cila nuk vendosi sanksione ndaj Rusisë”, përfundon ish-zëvendëskryeministri serb.

  • Merret vendim, të mërkurën bojkotohen ligjëratat në UP

    Merret vendim, të mërkurën bojkotohen ligjëratat në UP

    Me kërkesë që të përjashtohet profesori Bekim Bejta, Këshilli Studentor ka marrë vendim që të mërkurën (12 prill) të bojkotohen të gjitha ligjëratat.

    Këshilli njoftoi të dielën mbrëma se ky vendim është marrë në mbledhjen e Këshillit Studentor të Filologjisë në Universitetin e Prishtinës, derisa u përmend edhe bojkotimi i ligjëratave në tërësi.

    “Sot pas mbledhjes së mbajtur nga Këshilli Studentor i Filologjisë, u vendos nga shumica absolute të bojkotohen të gjitha ligjëratat ditën e mërkurë, nga anëtarët e Këshillit Studentor. Në rast se të mërkurën nuk ka një vendim të prerë, atëherë do fillojë bojkotimi i ligjëratave edhe nga shumica e këshillave të tjera studentore dhe jo për shumë kohë do bëhet thirrja e përgjithshme për bojkotim të plotë të ligjëratave nga të gjithë studentët e UP-së, deri në përjashtimin e Bekim Bejtës nga Fakulteti i Filologjisë”, thuhet në reagim.

    Profesori në Departamentin e gjuhës angleze, Bekim Bejta, po akuzohet nga studentët për dhunë dhe shantazh ndaj studentëve të UP-së. Kundër tij është paralajmëruar edhe protestë më 12 prill.

  • Ky është parashikimi i motit për javën e ardhshme

    Ky është parashikimi i motit për javën e ardhshme

    Në Kosovë për pesë ditët e javës së ardhshme do të mbajë mot i vranët, intervale me diell, dhe riga e reshje shiu.

    Në njoftimin e Institutit Hidrometeorologjik të Kosovës thuhet se vikendin e javës së ardhshme parashihet mot i vranët dhe reshje shiu.

    Më poshtë e keni motin për të pesë ditët, nga e hëna deri të premten:

    E hënë – Mot i vranët dhe me intervale me diell. Vranësirat kohë pas kohe parashihen të shoqërohen me reshje shiu. Temperaturat do të jenë pozitive në të dy vlerat ekstreme.

    E martë – Mot i vranët dhe vende-vende me reshje të dobëta shiu. Gjatë ditës do të ketë intervale me diell. Temperaturat do të shënojnë rritje të lehta në vlerat e maksimaleve, kryesisht në mesditë.

    E mërkurë – Mot me vranësira të shpërndara dhe me diell .Temperaturat do mbesin konstante me të ditës së marte.

    E enjte – Mot kryesisht stabil, me pak vranësira dhe intervale me diell. Kjo ditë parashihet të jetë dita më e nxehtë e javës,për shkak të prezence së masave të ajrit me origjinë nga jugperëndimi.

    E premte – Mot kryesisht i vranët dhe me kushte për reshje. Temperaturat do të shënojnë ulje të lehta në vlerat e maksimaleve.

    Gjatë kësaj periudhe kohore do të ketë erëra të lehta deri mesatare nga drejtimi i veriperëndimit dhe jugperëndimit, ndërsa presioni atmosferik do të shënoj vlera të rritura mbi normalen.

  • Prizreni pa tokë për varreza, kërkon 57 hektarë tokë nga AKP-ja

    Prizreni pa tokë për varreza, kërkon 57 hektarë tokë nga AKP-ja

    E gjithë kjo sipërfaqe e tokës, nuk do jetë edhe për shumë gjatë boshe.

    Mbi 57 hektarë të pa shfrytëzuar këtu në Prizren, nën menaxhim të AKP-së do i jepen Komunës.

    Prizreni, hallë të madh ka mungesën e hapësirës për varreza, gjë që tërë këtë sipërfaqe, do e shfrytëzoj për këtë qëllim.

    Megjithatë komuna ka edhe planin se si do bëhet në tërësi.

    Andaj edhe kanë marrë pëlqimin nga Agjencia Kosovare e Privatizimit.

    “AKP përmes shkresës zyrtare ia ka konfirmuar zyrtarëve të komunës se nuk e kundërshton procesin e shpronësimit të pronës shoqërore të përmendur në kërkesë e Komunës me qëllim të realizimit të projektit nga Komuna e Prizrenit”, thuhet në përgjigjen e AKP-së.

    Megjithatë, krejt në fund do duhet miratimi edhe i Qeverisë. /atvlive.tv

  • 24 vite nga beteja e përgjakshme e Koshares

    24 vite nga beteja e përgjakshme e Koshares

    Kufiri mes Kosovës dhe Shqipërisë u shemb.

    Kjo pamje është simbol i arritjes së qëllimit të Ushtarëve të Ushtrisë Çlirimtare të Kosovës, 24 vite më parë në Koshare.

    Nën udhëheqjen e heroit Agim Ramadani në këtë vend u zhvillua njërën nga betejat më të mëdha në historinë e luftës së UÇK-së.

    Të tillë e kujton edhe Presidentja e vendit, Vjosa Osmani.

    “Sot shënojmë përvjetorin e Betejës së Koshares, njërës ndër betejat më të lavdishme të Ushtrisë Çlirimtare të Kosovës. Në këtë ditë, kujtojmë me respekt heronjtë e Betejës së Koshares dhe të luftës çlirimtare të UÇK-së. Beteja e Koshares dëshmoi fuqishëm se sakrifica për liri është shumë e lartë, por liria nuk ka çmim. Rënia heroike e komandantëve Salih Çekaj, Agim Ramadani, Xhemajl Fetahaj, Abaz Thaçi dhe komandantëve e luftëtareve të tjerë, dëshmoi se Beteja e Koshares ruan vend nderi në kujtesën tonë kolektive”, tha Osmani.

    Beteja e Koshares, u kujtua edhe nga kryeministri Kurti, vetëm se ky zgjodhi rrjetet sociale për ta bërë këtë.

    “Në historinë e luftës për çlirimin e Kosovës, Beteja e Koshares mund të shihet edhe si një panoramë e të gjitha betejave, te e cila mund të lexohen të përbashkuara karakteristikat e të dyja palëve ndërluftuese. Atyre të Ushtrisë Çlirimtare të Kosovës që në betejën për çlirimin e Kosovës nga Serbia, u ndihmua edhe nga ushtarët vëllezër prej Shqipërisë, si dhe e cila me luftën e saj të drejtë për liri, fitoi edhe përkrahjen e vullnetarëve të huaj në këtë rast, por mbi të gjitha, të aleancës së NATO-s, që përshpejtoi çlirimin e plotë të Kosovës. Në anën tjetër, atyre që po luftonin në një betejë të padrejtë dhe për një tokë që s’ishte as nuk mbeti e tyrja, forcave serbe për të cilët, Beteja e Koshares ishte ferri mbi tokë”, tha Kurti.

    Beteja e Koshares, sipas të parit të Aleancës për Ardhmërinë e Kosovës, Ramush Haradinaj ishte vendimtare për të gjithë luftën në Kosovë.

    “Jemi në vendin ku pushojnë luftëtarët shqiptar në vendin që është dëshmi e përpjekjeve të vështira të luftës për liri. Epopeja e Koshares, një luftë mjaft e përgjakshme ka qenë në atë kohë vendimtare për epilogun e luftës tonë, jo vetëm për luftimet këtu në kufi shqiptaro-shqiptar, por për të gjithë luftën. Pa këtë luftë të Koshares, lufta jonë për liri nuk do të ishte. Për këtë liri i nderojmë dhe të gjallët, i përjetshëm qoftë kujtimi për ta”, tha Haradinaj.

    Për Homazhe tek varrezat e dëshmorëve të Betejës së Koshares ishte edhe kryetari i Lidhjes Demokratike të Kosovës, Lumir Abdixhiku.

    “Sot me bashkëpunëtorë të LDK-së nderojmë të gjithë heronjët e rënë 24 vite më parë, nëntë prilli shënon datën e njërës prej betejave më të lavdishme të luftës sonë”, tha Abdixhiku.

    Beteja e Koshares, nisi më 9 prill 1999, në kuadër të operacionit “Shigjeta” duke i hapur rrugë furnizimit me armatim dhe mbështetje logjistike për shumë zona të luftës në brendësi të Kosovës. /atvlive.tv

  • Shënohet 15 vjetori i hartimit të Kushtetutës

    Shënohet 15 vjetori i hartimit të Kushtetutës

    Janë bërë plot 15 vjet që Kosova ka Kushtetutën e saj. Por përpjekjet për shtet të pavarur me aktin më të lartë juridik nisën qysh moti.

    Krahas shtypjes që iu bëhej, më 1968 Kosova nisi hapat e parë drejt formimit të kushtetutës.

    Atë vit miratoi Ligjin Kushtetues të Krahinës Socialiste Autonome të Kosovës, aso kohe si një dokument tejet i rëndësishëm që nisi rrugën e Kosovës drejtë një akti ligjor të vërtetë dhe demokratik.

    6 vite më vonë, me 1974 Kosova si krahinë socialiste autonome, miratoi kushtetutën e saj.

    Ndryshe, kjo ishte kushtetuta e parë e Kosovës që u integrua në kushtetutën e Republikës Socialiste Federative të Jugosllavisë.

    Ndërkaq, Kosova bëri edhe një kushtetutë, atë të Kaçanikut në fillim të viteve të 90-ta.

    Kundërshtimet ishin të mëdha, Serbia mori një sërë veprimesh duke shpërbërë kuvendin dhe qeverinë e Kosovës, e duke hequr çdo autonomi të mbetur. Përveç kësaj, miratoi edhe një ligj për marrëdhëniet e punës, që largoj nga puna mbi 80.000 shqiptarë. Por Kosova nuk u zmbraps.

    Rezistenca qoj në luftë të armatosur për t’i dhënë fund pushtimit serb më 1999.

    Në atë kohë u adoptua Korniza Kushtetuese, si ligj i përkohshëm për vetëqeverisje. Ndërkaq më 2008, atë vit kur Kosova shpalli edhe pavarësinë, hartoi Kushtetutën, me të cilën operon edhe tash 15 vjet nga atëherë.

    Sot, Kushtetuta e Kosovës konsiderohet si ndër më të avancuarat në botë, në aspektin e respektimit të të drejtave të njeriut, përfaqësimit të minoriteteve etnike dhe grupeve tjera shoqërore.

    “Mendoj se është një prej punëve më të mira që është bërë në shtet ndërtimin e Kosovës, por edhe në krijimin e bazës të asaj që ka qenë synim i qytetarëve, i paraparë me deklaratën e pavarësisë. Ajo e ka mundësuar që shteti të sendërtohet, por edhe institucionet, po edhe baza legale të ndërtohet në Kosovë”, tha ish-kryetari i komisionit për hartimin e Kushtetutës së Kosovës, Hajredin Kuçi.

    Për 15 vjet si akti më i lart juridik i vendit, bazuar në Kushtetutën e Kosovës u morën vendime goxha të mëdha. Madje për shkak të shkeljeve të saj u rrëzuan edhe qeveri, e u shkarkuan edhe president. /atvlive.tv

  • Dështon projekti i MD-së për dhomat e dëshmive

    Dështon projekti i MD-së për dhomat e dëshmive

    60 mijë euro i kishte ndarë një vit më parë Ministria e Drejtësisë, për rikonstruktimin e dhomave për ruajtjen e dëshmive, brenda Institutit të Mjekësisë Ligjore.

    Projekti që parashihej të përfundonte muaj më parë, ka mbetur në gjysmë.

    Kjo për faktin se kanë përfunduar vetëm dy lote të kontratës, ndërkaq pjesa kryesore e projektit jo.

    “Sa i përket dy lotëve tjera që ka qenë rikonstruksioni i dhomave të dëshmive dhe pajisjeve me disa rafte metalike, kjo ka dështuar, edhe pse është rishpall në të kaluarën mos gabofsha 5 herë, mirëpo ka dështuar për shkak të mos përmbushjes së kritereve ligjore nga ana e operatorëve ekonomik”, tha Ditor Halimi nga Instituti iMjekësisë Ligjore.

    Paratë e mbetura IML-ja kishte planifikuar t’i fuste prapë në këtë projekt, por që më nuk ishin përkrahur nga Ministria.

    “Ne kemi aplikuar më një projekt të ngjashëm për investime kapitale ku kemi planifikuar realisht me i fut përsëri ato dy lote mirëpo për fat të keq ky projekt nuk na është aprovuar nga ministria, kështu që tani projekti ka mbërrut në gjysme”, tha Halimi.

    Kësisoj, paratë do të përdoren për shërbime të tjera, e dhomat për ruajtën e dëshmive zor se do të bëhen siç parashihej. Dhe puna në këtë institut vështirësohet pasi duhet të kryhet me standarde Evropiane. /atvlive.tv

  • Pavarësisht gjobave, taksitë ilegale operojnë lirshëm

    Pavarësisht gjobave, taksitë ilegale operojnë lirshëm

    As gjobat nuk ua ndalin punën.

    Taksitë ilegale vazhdojnë të operojnë lirshëm në kryeqytet.

    Për ta zgjidhur këtë problematikë, Drejtoria e Inspeksionit të Komunës së Prishtinës, ka deklaruar se ka hartuar një plan.

    “Aspekti i transportit të udhëtarëve, përgjithësisht duket një problem bukur i hershëm, janë ndërtuar disa praktika të cilat përveç pengesave që i shkaktojnë komunikacionit ose mbarëvajtjes së komunikacionit në qytet, për nevojën edhe rrezik për komunikacionin edhe për vet udhëtaret. Prandaj si drejtori e inspekcionit që nga viti i kaluar kemi filluar me disa kontrolle të kohë pas kohshme”. Kemi mjaft raste të cilat ne kemi dal të njëjtit kemi gjobitur, ata vazhdojnë edhe me tutje prandaj quhen ilegal të shfrytëzojnë momenti kur ndoshta inspektorët mund të lëvizin, ose mund të merren me ankesa ose kërkesa të tjera të qytetarëve”, tha drejtori i inspeksionit, Florian Dushi.

    Këtë vit po ashtu do të zbatohet rregullorja e miratuar vitin e kaluar, që të rritet standardi i mjeteve të cilat përdoren për shërbimin e auto-taksisë.

    “Vitin e kaluar Komuna e Prishtinës ka hartuar rregulloren e re për organizimin e transportit me auto-taksi ashtu siç parashihet edhe me ligjin për transportin rrugorë. Gjithnjë duke shikuar nga ajo që të rritet standardi i mjeteve të cilat përdoren për shërbimin e auto-taksi, tek operatoret ekonomik-kompanitë private qoftë ata që janë persona individual që punojnë veç me një veturë si auto-taksi. Komuna për ketë vit ka planifikuar që ajo rregullore tash është në fuqi dhe të fillohet zbatimi i saj”, tha shefi i Shërbimeve Publike, Habib Qorri.

    Gjobat për taksitë ilegale fillojnë nga 100 euro dhe sipas drejtorisë së Inspeksionit dhe asaj të shërbimeve Publike, aksionet e rendit komunal po bëhen me qëllim të evitimit të tollovisë, e cila po krijohet në kryeqytet dhe që taksitë ilegale të paguajnë taksën e përcaktuar nga Komuna. /atvlive.tv

  • Abdixhiku: Kosharja është themeli i lirisë sonë

    Abdixhiku: Kosharja është themeli i lirisë sonë

    Kryetari i LDK-së, Lumir Abdixhiku, e ka përkujtuar Betejën e Koshares.

    Ai ka thënë se Kosharja sot qëndron si tempull rikujtimi për gjithë sakrificën e djemve e vajzave të vendit për të sotmen tonë dhe të ardhmen e brezave që vijnë

    “Mes heronjëve të rënë që kanë gjetur pavdekësinë, me të gjallët dhe kujtimet e tyre për mëngjesin që mbanë datën 9 prill, shënuam 24 vjetorin e Betejës së Koshares dhe triumfit ushtarak të Ushtrisë Çlirimtare të Kosovës në thyerjen e kufirit shqiptar. Kosharja sot na qëndron si tempull rikujtimi për gjithë sakrificën e djemve e vajzave të vendit për të sotmen tonë dhe të ardhmen e brezave që vijnë. Na qëndron si shenjë rikujtimi se çdo ditë e jona sot, është detyrim shërbimi ndaj atdheut tonë të shenjtë – Kosovës. Sot, nderojmë Agim Ramadanin, Sali Çekajn, Xhemajl Fetahajn, Abaz Thaçin, dhe secilin hero të rënë në altarin e lirisë. Kosharja, vendi i fundit i tyre, është themel i lirisë sonë. Nderojmë po ashtu, gjithë të rënët e huaj në rrugëtimin tonë drejt lirisë; nderojmë francezin Paillard Arnaud Pierre, algjerianin Murad Muhammad Ali e italianin Francesco Giuseppe Bider. Nderojmë të shkuarën tonë të lavdishme e të dhimbshme. Lavdi!”, ka thënë ai.